Iehova ese Ia Ura Henia Kudouna Oi Abia
“Dirava e, lauegu kudouna lalonai laloa goevagoeva do oi havaraia, bona lauma matamatana bona maoromaorona, be egu lalona dekenai do oi atoa.”—SALAMO 51:10.
1, 2. Dahaka dainai iseda kudouna ita laloa bada?
IA BE tau latana bona mai ena hairai. Peroveta tauna Samuela ese ia itaia bona ia laloa unai Iese ena natuna mero ginigunana be Dirava ese ia abia hidi, Saulo murinai king ai do ia lao. To Iehova ia gwau: “Iena toana, o iena lata do oi laloa lasi, badina be lau ese lau ura henia lasi. . . . Taunimanima ese tau ena toana idia itaia, to Lohiabada ese tau ena kudouna ia itaia.” Iehova ese ia abia hidi tauna be Iese ena natuna mero ginigabena, Davida—“ia ese ia ura henia tauna.”—1 Samuela 13:14; 16:7.
2 Dirava ese taunimanima edia kudouna ia itaia diba, unai ia hahedinaraia ia gwau: “Lau Lohiabada ese taunimanima edia kudoudia lau tahua noho, bona edia lalodia danu lau tohoa noho. Taunimanima ta ta edia dala . . . bona idia ta ta edia kara . . . edia davana korikori do lau henidia totona.” (Ieremia 17:10) Oibe, ‘kudouna be Iehova ese ia tohoa noho.’ (Aonega Herevadia 17:3) Iehova ese tau ta lalonai ia itaia kudouna be dahaka? Bona dahaka ita karaia diba, ia ese ia ura henia kudouna ita abia totona?
“Hairai Korikori be Emui Lalona Dekenai Ia Noho”
3, 4. Baibel lalonai inai hereva “kudouna” be dahaka ia herevalaia momo? Haheitalai gwauraia.
3 Buka Helaga dekenai, inai hereva “kudouna” be nega handred momo ia hedinarai. Nega momo ia be laulau dalana ai idia gaukaralaia. Hegeregere, Iehova ese peroveta tauna Mose ia hamaoroa, ia gwau: “Israela taudia do oi hamaoroa, idia ese edia harihari gaudia lau dekenai do idia henia. Mai edia laloa namo lau dekenai taudia [“edia kudouna ese idia hauraia taudia ibounai,” NW ] ese edia harihari gaudia do oi abia mai, lauegu.” Bona “idia ura idia henia taudia [“edia kudouna ese ia veria taudia,” NW ] ibounai” ese harihari gaudia idia mailaia. (Esodo 25:2; 35:21) Ia hedinarai, kudouna ese ia laulaulaia lalona dekenai ura goadana ia noho—kara ta ita karaia totona ita ia hagoadaia siahuna. Danu, iseda kudouna be iseda hemami idauidau bona ura idauidau ia hahedinaraia. Iseda kudouna ese ia laulaulaia lalona be badu eiava gari amo ia honu diba, ia hisihisi bada eiava ia moale dikadika diba. (Salamo 27:3; 39:3; Ioane 16:22; Roma 9:2) Ia hekokoroku eiava ia manau diba, lalokau eiava inai henia mamina ia hahedinaraia diba.—Aonega Herevadia 16:5; Mataio 11:29; 1 Petero 1:22.
4 Unai hegeregerena, “kudouna” be nega momo iseda ura bona hemami danu ia hakapua, to “lalona (darana)” be lalohadai gauna ia herevalaia. Baibel lalonai unai hereva be nega tamona idia hedinarai neganai, unai bamona do ita lalodia. (Mataio 22:37; Filipi 4:7) To kudouna bona lalona (darana) be idau momokani gaudia lasi. Hegeregere, Mose ese Israela taudia ia hamaoroa, ia gwau: “Unai dainai hari dina umui diba momokani, bona do umui laloaboio lasi [eiava “emui kudouna dekenai do umui laloa lou,” NW ], Lohiabada be Dirava.” (Deuteronomi 4:39) Iesu be ia idia hadikaia totona palani idia karaia taravatu hadibaia taudia dekenai ia gwau: “Badina be dahaka umui laloa kerere [“emui kudouna dekenai gau dikadia umui laloa,” NW ]?” (Mataio 9:4) Danu, “laloa kehoa,” “diba,” bona “laloa” be kudouna danu idia hakapua diba. (1 King Taudia 3:12; Aonega Herevadia 15:14; Mareko 2:6) Unai dainai kudouna ese ia laulaulaia lalona be iseda darana—iseda lalohadai eiava lalo-parara—danu ia gwauraia diba.
5. Kudouna ese ia laulaulaia gauna be dahaka?
5 Buka ta ia gwau kudouna ese ia laulaulaia lalona be “mai anina bada kahana, lalonai gauna, bona unai dainai ia be taunimanima edia lalona, bona taunimanima ia doria urana ena kara idauidau dekenai, ena ura badadia, ena lalokau, ena mamina gau haida dekenai, ena ura dikadika, ena lalohadai, ena lalo-parara, do idia vara gaudia ia lalodia neganai, ena aonega, ena diba, ena aonega karadia, ena abidadama, bona gau haida edia anina ia tahua, gau haida ia laloatao, bona ena mauri ena hemami.” Ia laulaulaia gauna be iseda ‘hairai korikori, iseda lalona dekenai ia noho.’ (1 Petero 3:4) Iehova ese unai ia itaia bona tahua namonamo. Unai dainai, Davida ia guriguri diba: “Dirava e, lauegu kudouna lalonai laloa goevagoeva do oi havaraia, bona lauma matamatana bona maoromaorona, be egu lalona dekenai do oi atoa.” (Salamo 51:10) Iseda kudouna be edena bamona ia goeva diba?
Dirava Ena Hereva Emui Kudouna ai “Umui Laloatao”
6. Israela taudia be Moaba ena Tano Palaka ai idia noho neganai, Mose ese idia dekenai dahaka sisiba ia henia?
6 Israela taudia be Gwauhamata Tanona ai idia vareai gwauraia bona Moaba ena Tano Palaka ai idia hebou neganai, Mose ese ia sisiba henidia, ia gwau: “Hari dina dekenai umui lau hamaoroa herevadia ibounai do umui laloatao, emui natudia dekenai danu do umui hadibaia. Inai lau hadibaia taravatu ena hereva ibounai do idia badinaia bona edia kara do idia karaia.” (Deuteronomi 32:46) Israela taudia ese unai ‘ibounai do idia laloatao.’ Dirava ena hahegani idia diba namonamo karana sibona amo edia natudia dekenai idia hadibaia goada diba.—Deuteronomi 6:6-8.
7. Dirava ena Hereva iseda kudouna ai ‘ita laloatao’ ena anina be dahaka?
7 Iseda kudouna ia goeva totona kara badana ta be Dirava ena ura bona palani ita diba maoromaoro. Unai diba ita abia gabuna be tamona sibona, Dirava ena Hereva, Iena lauma amo ia havaraia bukana amo. (2 Timoteo 3:16, 17) To, kwarana sibona ai ia noho dibana be ita do ia durua lasi Iehova ia hamoalea kudouna goevana ita abia totona. Unai diba ese iseda lalona ia hamarerea totona, namona be ita dibaia gaudia be eda kudouna ai “ita laloatao,” eiava “eda kudouna ai ita laloa bada.” (Deuteronomi 32:46, An American Translation) Edena bamona ita karaia diba? Salamo torea tauna Davida ese ia herevalaia, ia gwau: “Dina gunadia lau laloa noho. Oiemu kara gunadia ibounai lau laloa noho. Oiemu imana edia kara badadia ibounai lau laloatao noho.”—Salamo 143:5.
8. Ita stadi lalonai edena henanadai ita lalodia diba?
8 Namona be ita danu be mai tanikiu ida Iehova ena kara ita laloa dobu. Baibel eiava Baibel herevalaia bukadia ita duahia neganai, inai henanadai ita lalodia: ‘Inai kahana amo dahaka lau dibaia, Iehova be edena bamona Diravana? Iehova ena kara idauidau amo, edena be iniseniai ia hedinarai? Inai sivarai ese Iehova ia ura henia gaudia bona ia ura lasi gaudia be edena bamona ia hahedinaraia? Dirava ia ura henia dalana badinaia ena davana be dahaka bona ia inai henia dalana badinaia ena davana be dahaka? Lau diba vadaeni gaudia dekenai inai hereva be edena bamona ia hakapua?’
9. Sibona eda stadi bona laloa dobu edia namo be edena bamona?
9 Lisa,a iena mauri lagani be 32, ese stadi namonamo bona laloa dobu karadia edia namo ia laloa bada dalana ia herevalaia, ia gwau: “Lagani 1994 ai lau bapatiso murinai, lagani rua bamona hereva momokani lalonai lau goada. Hebou ibounai dekenai lau lao, hua ta ta haroro gaukara dekenai hora 30 ia lao 40 lau henia, bona Keristani turadia lau bamoa. Bena lau hure oho matamaia. Lau moru momokani bona Dirava ena taravatu lau utua danu. To lau noga bamona bona egu lalona lau hadaia egu mauri do lau hagoevaia. Iehova ese egu helalo-kerehai ia itaia bona lau ia abia lou dainai lau moale bada! Nega momo lau laloa: ‘Dahaka dainai lau moru?’ Nega ibounai egu haere tamona be stadi namonamo bona laloa dobu karadia lau negea dainai. Baibel ena hereva momokani be egu kudouna ai ia vareai momokani lasi. Inai nega amo, sibona egu stadi bona laloa dobu karana be hanaihanai egu mauri ena kahana badana ta.” Iseda diba Iehova, iena Natuna, bona iena Hereva dekenai ita habadaia lalonai, unai ita lalohadailaia totona nega ita atoa be mai anina bada momokani!
10. Dahaka dainai sibona eda stadi bona laloa dobu totona harihari nega ita atoa be namo?
10 Inai bisi bada tanobada ai, stadi bona laloa dobu totona nega atoa be mai ena hekwarahi. To, Keristani taudia be Gwauhamata Tanona namo hereana—Dirava ena kara maoromaoro tanobada matamatana—dekenai kahirakahira do idia vareai. (2 Petero 3:13) Hoa gaudia, hegeregere “Babulonia badana” do idia hadikaia ore bona “Goga, Magoga tano tauna,” ese Iehova ena taunimanima do ia tuari henia, be kahirakahira do idia vara. (Apokalupo 17:1, 2, 5, 15-17; Esekiela 38:1-4, 14-16; 39:2) Do idia vara gaudia ese iseda lalokau Iehova dekenai ia tohoa diba. Harihari nega namona ita atoa bona mai eda kudouna ida Dirava ena hereva ita badinaia haraga!—Efeso 5:15, 16.
‘Emu Kudouna Oi Hegaegaelaia’ Dirava ena Hereva Tahua Totona
11. Edena dala ai iseda kudouna be tano ida ita hahegeregerea diba?
11 Kudouna ese ia laulaulaia lalona be tano bamona, ia lalonai ta ese hereva momokani ena uhe ia hadoa diba. (Mataio 13:18-23) Aniani ia tubu namonamo totona tano korikori idia hegaegaelaia namonamo. Unai hegeregerena, kudouna ita hegaegaelaia Dirava ena Hereva ia abia dae totona be namo. Hahelaga tauna Esera be “mai ena lalona ibounai [“ena kudouna ia hegaegaelaia,” NW ], Lohiabada ena Taravatu ia tahua, bona ena kara ia karaia danu.” (Esera 7:10) Iseda kudouna be edena bamona ita hegaegaelaia diba?
12. Ita stadi totona dahaka ese kudouna hegaegaelaia karana ia durua?
12 Dirava ena Hereva ita tahua neganai, kudouna hegaegaelaia karana hereadaena ta be mai momokani ida ita guriguri. Tomadiho momokani taudia edia Keristani heboudia be guriguri amo idia kehoa bona koua. Unai hegeregerena mai momokani ida guriguri amo sibona eda stadi negadia ta ta ita hamatamaia bona eda stadi lalonai ita laloa goada noho be kara maorona!
13. Iehova ese ia ura henia kudouna ita abia totona dahaka ita karaia be namo?
13 Namona be kudouna ese ia laulaulaia lalona ita hegaegaelaia ita abia vadaeni lalohadai aukadia ita atoa siri totona. Iesu ena negai, dubu gunalaia taudia idia ura lasi unai bamona idia karaia. (Mataio 13:15) To, Iesu ena sinana, Maria, be guna ia kamonai hereva momokanidia dainai “ena kudouna ai” lalohadai ia abia. (Luka 2:19, 51, NW ) Ia be Iesu ena hahediba hahinena ta mai ena kamonai ai ia lao. Tuatira hahinena Lidia be Paulo ena hereva ia kamonai, “bona Lohiabada ese iena lalona [eiava kudouna] ia kehoa.” Ia danu be abidadama hahinena ta ai ia lao. (Kara 16:14, 15) Namona be ita sibona eda lalohadai eiava ita ura henia hahediba lalohadai ta ita dogoatao auka masemase lasi. To, ita abia dae “taunimanima ibounai be idia koikoi noho, to Dirava tamona be nega ibounai ia hereva momokani.”—Roma 3:4.
14. Iseda kudouna be edena bamona ita hegaegaelaia diba, Keristani heboudia lalonai ita kamonai totona?
14 Keristani heboudia lalonai ita kamonai totona iseda kudouna ita hegaegaelaia be mai anina bada. Gau haida ese hereva ita kamonai karana ia hadikaia diba. Idia gwauraia herevadia ese ita do idia durua badabada lasi bema dina lalonai idia vara gaudia eiava kerukeru do idia vara gaudia ita laloa. Bema ita ura idia gwauraia herevadia amo namo bada ita davaria, namona be eda lalona ita hadaia do ita kamonai bona diba ita abia. Namo bada herea do ita abia bema eda lalona ita hadaia idia herevalaia bona edia anina idia gwauraia siridia ita lalo-pararalaia totona!—Nehemia 8:5-8, 12.
15. Edena dala ai manau ese ita ia durua, ita idia hadibaia diba totona?
15 Tano korikorina ai muramura maorodia idia atoa karana ese tano ia hanamoa hegeregerena, manau, lauma hitolona, abidadama, bona Dirava gari henia bona lalokau henia karadia ita habadaia ese iseda kudouna ia hanamoa. Manau ese kudouna ia hamanokaia dainai ita idia hadibaia diba. Iehova ese Iuda ena King Iosaia ia hamaoroa, ia gwau: “Oiemu lalona oi giroa, bona lauegu vairana dekenai do oi manau, . . . oi taitai. Unai bamona oi karaia, badina be oi kamonai lau ese Ierusalema bona iena taudia do lau panisia. . . . Oiemu guriguri lau kamonai vadaeni.” (2 King Taudia 22:19) Iosaia ena kudouna ia kehoa mai manau ida. Iesu ena “sikuli bada lasi bona aonega bada lasi” hahediba taudia idia manau dainai lauma ena hereva momokanidia idia lalo-pararalaidia bona badinaia, to “aonega taudia bona diba taudia” ese unai idia abia lasi. (Kara 4:13; Luka 10:21) Iehova ese ia ura henia kudouna ita abia totona ita gaukara noho lalonai ‘Dirava ena vairana dekenai ita manau.’—Esera 8:21.
16. Dahaka dainai do ita hekwarahi lauma aniani ita ania urana ita habadaia totona?
16 Iesu ia gwau: “Idia diba lauma gaudia idia tahua be namo taudia idia moale.” (Mataio 5:3, NW ) Dirava ese ita ia karaia neganai lauma gaudia goadalaia dibana ia atoa, to inai tanobada dikana amo idia mai lalo-hekwarahi bona ena kara haida hegeregere lahedo dainai, unai gaudia abia urana do ita laloaboio diba. (Mataio 4:4) Namona be lauma aniani ita ania urana namona ita habadaia. Ena be matamanai Baibel duahia bona sibona eda stadi ita moalelaia bada lasi, to mai haheauka ida ita karaia neganai do ita davaria unai diba ese iseda “laumana do ia hamoalea,” unai dainai mai eda ura ida stadi negadia do ita naria.—Aonega Herevadia 2:10, 11.
17. (a) Dahaka dainai Iehova be hegeregere do ita abidadama henia momokani? (b) Iehova abidadama henia karana be edena bamona ita habadaia diba?
17 King Solomona be sisiba ia henia, ia gwau: “Lohiabada do oi abidadama henia, mai emu kudouna ibounai. Oi sibona oiemu diba do oi abidadama henia lasi.” (Aonega Herevadia 3:5) Ena kudouna amo Iehova ia abidadama henia tauna ia diba Iehova ese ena Hereva amo ia noia karadia eiava gwauraia daladia ibounai be maoro. (Isaia 48:17) Iehova be hegeregere do ita abidadama henia momokani. Ia be ia hegeregere ena ura ibounai do ia hagugurua. (Isaia 40:26, 29) Oibe, iena ladana ena anina be “Ia ese Ia Halaoa,” unai dainai ita diba momokani ia be hegeregere ia gwauhamatalaia gaudia do ia hagugurua! Ia “ena kara ibounai be maoromaoro, bona ia ese taunimanima ibounai dekenai ia bogahisihisi henia noho.” (Salamo 145:17) Momokani, ia ita abidadama henia totona, namona be eda mauri lalonai Baibel amo ita dibaia gaudia ita badinaia bona ia havaraia anina namona ita laloa karana amo iena dala ita “tohoa namonamo, vadaeni do [ita] diba momokani, Lohiabada be namo momokani.”—Salamo 34:8.
18. Dirava gari henia karana ese edena bamona ita ia durua Iena hakaua dalana ita abia dae totona?
18 Dirava ena hakaua dalana ita abia dae totona iseda kudouna ia kehoa karana ma ta be Solomona ese ia gwauraia, ia gwau: “Lohiabada dekenai do oi gari henia, bona kara dika dekena amo do oi raka siri.” (Aonega Herevadia 3:7) Iehova ese idaunegai Israela taudia ia herevalaia ia gwau: “Nega ibounai unai bamona bema idia laloa [“edia kudouna,” NW ] be namo, bona bema lau dekenai idia matauraia, bona egu Taravatu bema idia kamonai henia, edia noho be do ia namo, bona edia natudia bona tubudia danu edia noho be do namo ela bona hanaihanai.” (Deuteronomi 5:29) Oibe, Dirava idia gari henia taudia ese ia idia kamonai henia. Iehova be hegeregere “ia dekenai idia badinaia momokani taudia do ia hagoadaia totona” bona ia idia kamonai henia lasi taudia do ia panisia. (2 Sivarai 16:9) Namona be iseda kara, lalohadai, bona hemami ibounai ita naria, badina mai hemataurai ida Dirava habadua garina ita gari.
‘Iehova Oi Lalokau Henia mai Emu Kudouna Ibounai Ida’
19. Iseda kudouna amo Iehova ena hakaua dalana ita abia dae totona lalokau ena gaukara be dahaka?
19 Kara iboudiai amo, lalokau ese kudouna ia hanamoa momokani Iehova ena hakaua dalana ia abia dae totona. Lalokau amo ena kudouna ia honu tauna ia ura dikadika Dirava idia hamoalea karadia bona ia idia habadua karadia ia diba. (1 Ioane 5:3) Iesu ia gwau: “Lohiabada oiemu Dirava dekenai do oi lalokau henia mai emu lalona ibounai, mai emu lauma ibounai, mai emu kudouna ibounai.” (Mataio 22:37) Namona be Dirava ena kara namo ita laloa hanaihanai, turana namo hereana bamona ita hereva henia hanaihanai, bona mai eda ura ida ma haida dekenai ia ita herevalaia karadia amo iseda lalokau ia dekenai ita habadaia.
20. Edena dala ai Iehova ese ia ura henia kudouna ita abia diba?
20 Unai gaudia mani ita laloa lou: Iehova ese ia ura henia kudouna ita abia ena anina be dala ita kehoa Dirava ena Hereva ese iseda lalona korikori, eiava eda kudouna ena hairai korikori, ia biagua totona. Baibel ita stadilaia namonamo bona mai tanikiu ida ita laloa dobu be mai anina bada karadia. Unai bamona ita karaia namonamo totona iseda kudouna ita hegaegaelaia—eda kudouna ai ita abia dae vadaeni lalohadai aukadia idia noho lasi, to ia be kara namodia amo ia honu dainai ita idia hadibaia diba! Oibe, Iehova ena heduru amo, kudouna namona ita abia diba. To, dahaka kara haida ita karaia diba, iseda kudouna ita gimaia totona?
[Footnote]
a Ladana ai haidaua.
Edena Bamona Do Oi Haere?
• Iehova ese ia itaia noho kudouna be dahaka?
• Dirava ena Hereva be edena dala ai iseda kudouna ai do ita “laloatao”?
• Iseda kudouna be edena bamona do ita hegaegaelaia Dirava ena Hereva ita tahua totona?
• Inai hereva ita stadilaia murinai, oi ura bada dahaka do oi karaia?
[Picture on page 17]
Davida be mai tanikiu ida lauma gaudia ia laloa dobu. Oi danu, a?
[Pictures on page 18]
Dirava ena Hereva oi do stadilaia lasi neganai, emu kudouna oi hegaegaelaia