Ladana Bada Abia Karana Dekenai Keriso Ena Lalohadai Abia
“Bema ta ia ura be do ia lohia gwauraia [“do ia bada,” NW], ia be umui emui hesiai gaukara do ia karaia.”—MATAIO 20:26.
1. Tanobada ena lalohadai ladana bada abia karana dekenai be dahaka?
THEBES (hari Karnak), idaunegai Aigupito ena siti ta, be kilomita 500 bamona Cairo ena saut kahana ai, unuseniai Farao Amenhotep Ihatoina ena nadi laulauna ta ia gini, ena lata be mita 18. Ta be unai nadi laulauna bada hereana ida ia sibona ia hahegeregerea neganai, ia be maragi herea momokani. Toana be unai nadi laulauna idia karaia unai lohia tauna idia laloa bada totona, unai ese tanobada ena lalohadai ladana bada abia karana dekenai ia hahedinaraia—ta sibona habadaia bona ma haida hamaragia karana unai.
2. Iesu be dahaka haheitalai namona ia hahedinaraia ia murinai idia raka taudia totona, bona ita sibona dekenai edena henanadai ita henia be namo?
2 Unai ladana bada abia karana ena lalohadai be Iesu Keriso ia hadibaia lalohadaina ida mani ita hahegeregerea. Ena be Iesu be ia murinai idia raka taudia edia “Lohiabada bona hadibaia tauna,” to idia ia hadibaia ladana bada abia karana be ma haida hesiai henia karana amo ia mai. Iesu ena tanobada mauri dina ginigabena ai, ia hadibaia herevana ena anina be ena hahediba taudia edia aena huria karana amo ia hahedinaraia. Unai hesiai gaukarana ese manau karana ia hahedinaraia! (Ioane 13:4, 5, 14) Ma haida oi hesiai henia eiava idia ese oi idia hesiai henia—edena oi ura henia? Keriso ena haheitalai ese emu lalona ia veria ia bamona manau oi hahedinaraia totona, a? Vadaeni, namona be Keriso ena lalohadai bona taunimanima momo edia lalohadai ladana bada abia karana dekenai ita tahua.
Tanobada Ena Lalohadai Ladana Bada Abia Karana Dekenai Dadaraia
3. Baibel lalonai edena haheitalai haida ese idia hahedinaraia taunimanima amo hairai idia tahua taudia be dika do idia davaria?
3 Baibel lalonai haheitalai momo idia noho, unai ese idia hahedinaraia tanobada ena lalohadai ladana bada abia karana dekenai ese dika ia havaraia. Eseta bona Morodekai edia negai ia noho siahu bada tauna Hamana, Parasa ena king ena ruma lalonai ia noho dagi bada tauna oi laloa. Hamana be hairai ia ura henia bada dainai, hemarai bona mase ia davaria. (Eseta 3:5; 6:10-12; 7:9, 10) Hekokoroku tauna Nebukanesa, iena siahu bada dainai ia kavakava tauna, be edena bamona? Iena lalohadai kererena ladana bada abia karana dekenai be inai hereva ai ia hedinarai, ia gwau: “Babulonia badana be inai, lau ese lau haginia, lauegu siahu dekenai lau haginia, bona lauegu heagi totona ia gini.” (Daniela 4:30) Ma danu, hekokoroku tauna Heroda Agripa Ginigunana be hairai ia henia lasi Dirava dekenai, to sibona dekenai hairai abia karana ia abia dae. “Vadaeni gaigaigaigai ese iena tauanina idia ania, vadaeni ia mase momokani.” (Kara 12:21-23) Unai tatau iboudiai ese Iehova ena lalohadai ladana bada abia karana dekenai idia abia dae lasi dainai, mai hemarai ida edia siahu idia haboioa.
4. Daika ese tanobada ena hekokoroku lalohadaina ia havaraia?
4 Ita ura ita dekenai hemataurai ia henia dalanai iseda mauri ita gaukaralaia. To, Diabolo ese unai ura ia gaukaralaia ita dekenai hekokoroku lalohadaina ia havaraia totona, unai amo ia sibona ese ena ura dikana ia hahedinaraia. (Mataio 4:8, 9) Laloaboio lasi ia be “inai tanobada ena dirava,” bona ena lalona ia hadaia tanobada dekenai ena lalohadai ia habadaia totona. (2 Korinto 4:4; Efeso 2:2; Apokalupo 12:9) Keristani taudia be unai lalohadai ena badina idia diba dainai, tanobada ena lalohadai ladana bada abia karana dekenai idia dadaraia.
5. Gaukara dekenai ita kwalimu, ladana bada bona kohu ese ia noho daudau moalena ia havaraia, a? Gwauraia hedinarai.
5 Diabolo ese ia habadaia lalohadaina ta be tanobada dekenai ita abia ladana bada karana, taunimanima edia hanamoa herevadia, bona moni bada ese mauri lalonai moale idia havaraia. Unai be momokani, a? Gaukara dekenai ita kwalimu, ladana bada bona kohu ese mauri lalonai moale ia havaraia, a? Baibel ese ita ia sisiba henia unai bamona lalohadai ese ita idia hakaua kerere lasi totona. Aonega King Solomona ia gwau: “Lau itaia, taunimanima ese hekwarahi bada idia karaia noho ena badina be inai: Idia ese edia badibadinai noho taudia idia mama henidia dainai. To inai danu be anina lasi, lai bema idia lulua kava hegeregerena.” (Hadibaia Tauna 4:4) Edia mauri ibounai lalonai sibona edia ladana habadaia bona kohu abia totona idia hekwarahi taudia momo ese unai Baibel sisibana idia hamomokania diba. Haheitalai ta be hua dekenai taunimanima ia abia lao roketi ia palanilaia, karaia bona tohoa gaukarana ia durua tauna. Unai tauna ia gwau: “Lau gaukara auka bona egu gaukara lau karaia namo herea. To ia be anina lasi, badina be ia amo noho daudau moalena bona lalo-maino lau davaria lasi.”a Tanobada ena lalohadai ladana bada abia karana dekenai, herevana ia be bisinesi, spot gadara, eiava moale karadia amo, to unai ese noho daudau moalena ia havaraia lasi.
Ladana Bada Abia Karana be Lalokau Dainai Ita Karaia Hesiai Gaukara amo Ia Mai
6. Dahaka ese ia hahedinaraia Iamesi bona Ioane edia lalohadai ladana bada abia karana dekenai be kerere?
6 Iesu ena mauri lalonai ia vara gauna ta ese ladana bada abia karana ena anina korikorina ia hahedinaraia. Lagani 33 C.E. ena Pasova totona Iesu bona ena hahediba taudia be Ierusalema dekenai idia lao. Dala dekenai, Iesu ena kasin rua, Iamesi bona Ioane, ese ladana bada abia karana dekenai lalohadai kererena idia hahedinaraia. Edia sinana amo, Iesu idia noia, idia gwau: ‘Mani oi hereva, ai ta oiemu idiba kahanai, ta oiemu lauri kahanai do ai helai oiemu Basileia lalonai.’ (Mataio 20:21) Iuda taudia huanai, ta ena idibana eiava laurina kahana ai helai karana be hahenamo badana ta. (1 King Taudia 2:19, Buka Helağa) Iamesi bona Ioane idia ura dikadika ladana bada idia abia. Idia ura unai siahu dagina do idia abia. Iesu be idia lalohadailaia gauna ia diba dainai, unai nega ia gaukaralaia edia lalohadai kererena ladana bada abia karana dekenai ia hamaoromaoroa totona.
7. Iesu ese Keristani ladana bada abia karana korikorina be edena dala ai ia gwauraia?
7 Iesu ia diba inai hekokoroku tanobadana ai, ma haida ia biagua, hagania bona ia ura karaharaga ena ura ibounai idia hagugurua tauna be ladana bada tauna. To Iesu murinai idia raka taudia huanai, ladana bada abia karana be mai manau ida ita karaia hesiai gaukara amo ia mai. Iesu ia gwau: “Ta ia ura be do ia lohia gwauraia [“do ia bada,” NW ], ia be umui emui hesiai gaukara do ia karaia. Bona bema ta ia ura be guna tauna, ia be umui emui hesiai tauna do umui halaoa.”—Mataio 20:26, 27.
8. Hesiai tauna ena anina be dahaka, bona edena henanadai ita laloa be namo?
8 Baibel lalonai Greek herevana idia hahanaia “hesiai tauna” ena anina be hanaihanai ia hekwarahi bona mai ena ura bada ida ma haida edia hesiai gaukara ia karaia. Iesu be ena hahediba taudia dekenai mai anina bada gauna ia hadibaia: Ma haida ia hagania ena gau idia karaia totona tauna be ia bada lasi; lalokau dainai ma haida ia hesiai henia tauna be ia bada. Oi sibona oi nanadaia: ‘Bema lau be Iamesi eiava Ioane, edena bamona do lau kara? Ladana bada korikorina be lalokau dainai ma haida hesiai henia karana amo ia mai dalana lau lalo-pararalaia, a?’—1 Korinto 13:3.
9. Iesu be ma haida ia kara henia dalana dekenai dahaka haheitalai namona ia hahedinaraia?
9 Iesu ese ena hahediba taudia dekenai ia hahedinaraia, tanobada ena lalohadai ladana bada abia karana dekenai be Keriso ena lalohadai bamona lasi. Nega ta lasi ia hesiai henia taudia dekenai idia ia hereaia lalohadaina bona anina lasi hemamina ia havaraia. Taunimanima idauidau—tatau, hahine, natudia, kohu bada taudia, ogogami taudia, siahu taudia, bona kara dika taudia danu—be ia ida idia noho neganai edia mamina ia namo. (Mareko 10:13-16; Luka 7:37-50) Nega momo taunimanima be haida edia manoka gaudia dekenai idia haheauka diba lasi. To Iesu be idau. Ena be iena hahediba taudia be nega haida idia laloa maoromaoro lasi bona idia hepapahuahu, to mai haheauka ida ia hadibadia bona idia dekenai ia hahedinaraia ia be manau momokani bona dagedage lasi.—Sekaraia 9:9; Mataio 11:29; Luka 22:24-27.
10. Edena dala ai Iesu ena mauri ese ia hahedinaraia sibona ena namo laloa lasi dalanai ma haida ia hesiai henia?
10 Dirava ena Natuna ese sibona ena namo laloa lasi dalanai ladana bada abia karana ena anina korikorina ia hahedinaraia. Iesu be tanobada dekenai ia mai lasi ma haida ese ia idia hesiai henia totona, to taunimanima ia hesiai henia totona ia mai, ia ese “gorere idauidau” bona lauma dikadia ese idia hadikaia taudia ia hanamoa. Ena be ia hesiku bona laga-ani ia abia be namo, to hanaihanai ma haida edia namo ia laloa guna bona ia gaukara goada idia ia hagoadaia totona. (Mareko 1:32-34; 6:30-34; Ioane 11:11, 17, 33) Iena lalokau dainai ia ura lauma dalanai taunimanima ia durua, kahu daladia dekenai kilomita handred momo ia raka Basileia ena sivarai namona ia harorolaia totona. (Mareko 1:38, 39) Ita daradara lasi, Iesu ese ma haida hesiai henia karana ia laloa bada.
Keriso Ena Manau Karana Tohotohoa
11. Kongregesen lalonai naria gaukara karaia totona idia abia hidi tadikaka ese edena bamona kara idia hahedinaraia be namo?
11 Lagani 1800 dokonai, Dirava ena taunimanima durua totona loaloa naria taudia idia abia hidi neganai, Keristani naria taudia ese idia hahedinaraia be namo karana ia hedinarai. September 1, 1894 ena Zion’s Watch Tower magasin hegeregerena, idia tahua taudia be “manau taudia—idia hekokoroku lasi . . . , lalo-manau taudia, sibona edia lalohadai lasi, to Keriso ena idia harorolaia—sibona edia diba lasi, to iena auka lasi bona mai ena siahu Herevana idia hahedinaraia taudia.” Ia hedinarai goevagoeva, Keristani taudia korikoridia ese sibona edia ura gauna, ladana bada, siahu, bona ma haida biagua dagina abia karana idia tahua lasi be namo. Ia manau naria tauna ia laloaboio lasi iena maduna lalonai “gaukara namona” (NW ) be mai anina bada, ia abia dagi eiava hairai lasi. (1 Timoteo 3:1, 2) Namona be elda bona hesiai taudia ibounai idia hekwarahi mai manau ida ma haida edia namo totona idia gaukara bona hesiai gaukara helagana idia gunalaia, unai amo haheitalai namona idia hahedinaraia ma haida ese idia tohotohoa totona.—1 Korinto 9:19; Galatia 5:13; 2 Timoteo 4:5.
12. Kongregesen lalonai, hesiai gaukara ena maduna haida idia ura abia taudia be sibodia dekenai dahaka henanadai haida idia henia be namo?
12 Namona be hesiai gaukara ena dagi abia totona ia hekwarahi tadikaka ta ta be sibona idia nanadaia: ‘Ma haida hesiai henia daladia lau tahua, eiava lau ura ma haida ese lau idia hesiai henia? Ma haida ese idia itaia haraga lasi heduru karadia be mai egu ura ida lau karaia, a?’ Hegeregere, reana tau matamata ta ia ura Keristani kongregesen lalonai hereva ia henia, to reana ia ura momokani lasi buruka taudia ia durua. Reana kongregesen lalonai maduna idia huaia taudia bamoa karana ia moalelaia, to ia ura momokani lasi haroro gaukara ia karaia. Namona be unai bamona tau matamata be sibona ia nanadaia: ‘Dirava ena hesiai gaukara lau karaia ena badina be sibona lau abia isi bona hanamoa lau abia totona, a?’ Ma haida vairanai hairai lau ura abia, a?’ Sibona eda hairai tahua karana be Keriso ena kara bamona lasi.—Ioane 5:41.
13. (a) Naria tauna ia hahedinaraia manau karana ese edena dala ai ma haida ia hagoadaia diba? (b) Dahaka dainai ita gwau diba manau karana be Keristani tauna ena maduna ta?
13 Keriso ena manau karana tohotohoa totona ita gaukara goada neganai, ita ia veria ma haida do ita hesiai henia totona. Mani Iehova ena Witnes taudia edia brens opesi ta ena gaukara ia tahua soun naria tauna ta ena haheitalai oi laloa. Ena be unai naria tauna ia bisi bada bona ena maduna be momo, to magasin bona buka edia rau ia hakapua masini hamaoromaoroa totona ia hekwarahi tadikaka matamatana ia durua. Unai tadikaka matamatana ia gwau: “Lau hoa bada! Lau ia hamaoroa ia be tau matamata neganai, Betele dekenai unai bamona masini ia gaukaralaia danu bona ia laloatao unai masini hamaoromaoroa totona be ia auka. Lau ida nega sisina daudau unai masini ai hamaoromaoroa, ena be mai anina bada gaukara momo ia karaia. Unai kara lau laloa bada.” Unai tadikaka, hari Iehova ena Witnes taudia edia brens opesi ta dekenai naria tauna ena gaukara ia karaia, be unai manau karana ia laloaboio lasi. Namona be ita laloa lasi ita bada dainai gaukara maragidia ita karaia diba lasi eiava eda dagi bada dainai anina maragi gaukara ita karaia diba lasi. To, namona be ita “manau.” Unai be iseda maduna ta. Ia be “mauri matamata” ena kahana ta dainai Keristani tauna ta ese ia hahedinaraia be gau badana.—Filipi 2:3; Kolose 3:10, 12; Roma 12:16.
Ladana Bada Abia Karana Dekenai Keriso Ena Lalohadai Ita Abia Dalana
14. Edena dala ai iseda hetura karana Dirava bona taunimanima ida ita lalohadailaia karana ese ita do ia durua, lalohadai maorona ladana bada abia karana dekenai ita abia totona?
14 Edena dala ai ladana bada abia karana dekenai lalohadai maorona ita abia diba? Dala ta be iseda hetura karana Iehova Dirava ida ita lalohadailaia. Iena hairai, siahu, bona aonega be bada herea momokani dainai taunimanima be maragi herea. (Isaia 40:22) Danu taunimanima ida iseda hetura karana ita lalohadailaia neganai, ita ia durua manau karana ita habadaia totona. Hegeregere, reana gau haida dekenai ma haida ita hereaia, to reana idia be mauri lalonai mai anina bada gaudia dekenai idia kwalimu, eiava reana iseda Keristani tadikaka edia kara namo haida be ita dekenai idia noho lasi. Inai be momokani, Dirava ese ia laloa bada taudia momo be taunimanima ese idia laloa bada lasi, badina idia ese manau karana idia hahedinaraia.—Aonega Herevadia 3:34; Iamesi 4:6.
15. Edena dala ai Dirava ena taunimanima edia abidadama karana ese ia hahedinaraia idia ese ma haida idia hereaia lalohadaina idia dadaraia?
15 Edia abidadama dainai hahetoho idia davaria Iehova ena Witnes taudia ese unai idia hahedinaraia namo herea. Nega momo, tanobada ese ia laloa maragi taudia ese hahetoho badadia lalonai Dirava idia badinaia noho. Unai bamona haheitalai ita lalohadailaia neganai, ita ia durua diba ita manau totona bona ‘ita laloa lasi ita be bada momokani.’—Roma 12:3.b
16. Edena dala ai kongregesen taudia iboudiai ese Iesu ena lalohadai ladana bada abia karana dekenai idia habadaia diba?
16 Namona be Keristani taudia ibounai, matamata bona buruka taudia, ese Keriso ena lalohadai ladana bada abia karana dekenai idia habadaia toho. Kongregesen lalonai, gaukara idauidau ita karaia be namo. Oi badu lasi bema haida ese oi idia noia gaukara maragina ta oi karaia totona. (1 Samuela 25:41; 2 King Taudia 3:11) Tama sina e, emui natudia umui hagoadaia idia abia gaukara ibounai, herevana ia be Kingdom Hall eiava hebouhebou ai be mai moale ida do idia karaia, a? Idia ese umui idia itaia unai gaukara maragidia umui karaia, a? Hari Iehova ena Witnes taudia edia hedikwota dekenai ia gaukara tadikaka ta, ese ena tama sina edia haheitalai ia laloatao namonamo. Ia gwau: “Kingdom Hall eiava hebouhebou gabuna hagoevaia gaukarana idia karaia dalana amo lau diba idia ese unai gaukara idia laloa bada. Nega momo idia volantia, kongregesen eiava tadikaka oreana durua gaukaradia idia karaia totona, herevana unai gaukara be haida ese idia laloa maragi. Unai lalohadai ese lau ia durua, Betele dekenai gaukara iboudiai be mai moale ida lau abia dae totona.”
17. Edena daladia ai kongregesen dekenai manau karana idia hahedinaraia taihudia be hahenamo badana?
17 Ma haida edia namo laloa guna karana ena haheitalai namona be Eseta, ia be lagani 400 B.C.E. murinai Parasa Basileia ena kwini ai ia lao hahinena. Ena be king ena ruma dekenai ia noho, to ia gini hegaegae Dirava ena taunimanima totona do ia mase, Dirava ena ura hegeregerena. (Eseta 1:5, 6; 4:14-16) Hari inai negai herevana Keristani hahinedia be moni dalanai idia hekwarahi, to Eseta ena lalohadai idia hahedinaraia diba. Idia ese lalo-manoka taudia idia hagoadaia, gorere taudia idia vadivadi henia, haroro gaukara idia karaia, bona elda taudia ida idia gaukara hebou diba. Kongregesen dekenai unai bamona manau karana idia hahedinaraia taihudia be hahenamo badana!
Keriso Ena Lalohadai Ladana Bada Abia Karana Dekenai Ena Hahenamo Haida
18. Dahaka hahenamo ita abia diba, bema Keriso ena lalohadai ladana bada abia karana dekenai ita hahedinaraia?
18 Keriso ena lalohadai ladana bada abia karana dekenai oi hahedinaraia neganai, hahenamo momo oi abia. Sibona emu ura dadaraia bona ma haida oi durua karana ese idia bona oi do ia hamoalea. (Kara 20:35) Mai emu ura bada ida emu tadikaka oi durudia neganai, oi do idia lalokau henia. (Kara 20:37) To gau badana be inai, emu Keristani tadikaka edia namo habadaia totona oi karaia gaudia be Iehova ia moalelaia boubouna bona unai ia laloa bada.—Filipi 2:17.
19. Keriso ena lalohadai ladana bada abia karana dekenai ita laloa neganai, namona be iseda lalona ita hadaia dahaka ita karaia totona?
19 Namona be ita ta ta ese sibona eda kudouna ita tahua bona sibona ita nanadaia: ‘Keriso ena lalohadai ladana bada abia karana dekenai be hereva sibona amo lau hahedinaraia, eiava lau gaukara goada lau badinaia totona?’ Iehova ena lalohadai hekokoroku taudia dekenai be ia hahedinaraia goevagoeva. (Aonega Herevadia 16:5; 1 Petero 5:5) Namona be iseda kara ese ia hahedinaraia Keristani kongregesen lalonai, ruma bese lalonai, eiava dina ta ta taunimanima ma haida ita kara henia neganai, Keriso ena lalohadai ladana bada abia karana dekenai ita hahedinaraia dainai ita moale—gau iboudiai ita karaia Dirava ita hanamoa totona.—1 Korinto 10:31.
[Footnotes]
a Gima Kohorona, February 1, 1983, rau 13-17, “Kwalimu Dalana Lau Tahua” itaia.
b Haheitalai haida totona, lagani 1992 Yearbook of Jehovah’s Witnesses, rau 181-2 bona September 1, 1993 Gima Kohorona rau 27-31 itaia.
Anina Oi Gwauraia Diba, A?
• Dahaka dainai tanobada ena lalohadai ladana bada abia karana dekenai ita dadaraia be namo?
• Iesu ena lalohadai ladana bada abia karana dekenai be dahaka?
• Edena dala ai naria taudia ese Keriso ena manau karana idia tohotohoa diba?
• Dahaka ese ita ia durua diba Keriso ena lalohadai ladana bada abia karana dekenai ita hahedinaraia totona?
[Box on page 26]
Daika Ena Lalohadai be Keriso Ena Bamona?
Ia ura ma haida ese ia idia hesiai henia tauna eiava ia ura ma haida ia hesiai henia tauna?
Taunimanima edia hanamoa hereva ia ura henia tauna eiava haida idia gwauraia gaukara maragina ia karaia tauna?
Sibona ia abia isi tauna eiava ma haida ia abia isi tauna?
[Picture on page 23]
Farao Amenhotep Ihatoina ena nadi laulau badana
[Picture on page 24]
Hamana ena mase ena badina oi diba, a?
[Pictures on page 25]
Dala oi tahua ma haida oi hesiai henia totona, a?