Momokani O Koikoi​​—⁠Iesu Ena Sivarai Korikorina

DAHAKA OI LALOA? HENUNAI BE GORI O SIVARAI KORIKORIDIA?

Iesu be December 25 ai ia vara.

Aonega tatau toi be Iesu ia vara dinana ai idia vadivadi henia.

Iesu be sibona ia vara.

Iesu be Dirava, to taunimanima edia tauanina ia abia.

Iesu be tau namona ta sibona lasi, to ia be tau hereadaena.

MOMO do idia abia dae ataiai idia noho hereva ibounai be momokani. To haida do idia daradara, idia diba lasi unai hereva be idia momokani o koikoi. Reana, do idia laloa bema oi be Iesu oi abidadama henia, vadaeni unai henanadai edia haere be anina lasi.

To, Baibel be unai bamona ia hereva lasi. Ita ia hagoadaia, ia gwau: “Iesu Keriso iseda Lohiabada umui diba.” (2 Petero 1:⁠8) Evanelia bukadia ita duahia neganai, unai diba do ita abia. Idia ese Iesu ena sivarai korikorina idia hahedinaraia bona ita idia hadibaia edena be hereva momokani bona edena be hereva koikoi. Hari do ita itaia, Evanelia bukadia be dahaka idia gwau ataiai herevadia dekenai.

TAUNIMANIMA ESE IDIA ABIA DAE GAUNA: Iesu be December 25 ai ia vara.

MOMOKANI O KOIKOI: KOIKOI.

Baibel ese Iesu ena vara ena hua bona dina korikorina ia gwauraia lasi. Vadaeni, December 25 be edeseni amo idia abia? The Encyclopædia Britannica ia gwau, sibona idia gwauraia Keristani taudia idia ura “unai dina be Dirava momokanina diba lasi Roma taudia edia aria dinana ta, ‘idia halusia diba lasi dina ena vara dinana,’ ida do idia tamona.” Unai buka ma ia gwau, Krismas negana ai idia karaia karadia momo be “Dirava momokani diba lasi taudia ese keru negana ai idia karaia biru gaukara ena kastom karadia bona dina idia hahelagaia karadia.”

Oi laloa taunimanima be December 25 ai Iesu ena vara dinana idia moalelaia be Iesu ese ia abia dae, a? Mani inai oi laloa: Iesu ena vara dinana be ita diba lasi. Baibel be ita ia hadibaia lasi Iesu ena vara dinana do ita moalelaia totona, bona ia hahedinaraia lasi Keristani taudia ginigunadia be unai dina idia moalelaia. To, Baibel ese Iesu ena mase dinana ia gwauraia, bona iena hahediba taudia ia hadibaia unai dina do idia laloatao.a (Luka 22:19) Unai ese ia hahedinaraia goevagoeva, Iesu ia ura bada iena mase dinana ita laloatao, to ena vara dinana lasi.​​—⁠Mataio 20:⁠28.

TAUNIMANIMA ESE IDIA ABIA DAE GAUNA: Aonega tatau toi (o gori haida lalonai idia gwau king taudia toi) be Iesu ia vara dinana ai idia vadivadi henia.

MOMOKANI O KOIKOI: KOIKOI.

Reana oi ese idia penia laulau ta oi itaia eiava dubu haida be ruma maragina ta idia haginia bona Iesu be boromakau ena aniani mauana lalonai ia hekure, bona aonega taudia toi mai edia harihari gaudia be Iesu badinai idia helai. To unai be ia vara gauna korikorina lasi.

Dina daekau kahana amo idia mai taudia ese Iesu idia tomadiho henia, a? Iesu idia vadivadi henia taudia be hisiu stadilaia taudia. (Mataio 2:⁠1) Idia ese Iesu idia vadivadi henia neganai, Iesu be boromakau ena aniani mauana lalonai ia hekure noho, a? Lasi; idia be ruma ta dekenai Iesu idia vadivadi henia. Unai ese ia hahedinaraia, Iesu ia vara bena hua haida murinai idia lao Iesu idia vadivadi henia totona.​​—⁠Mataio 2:​9-​11.

Tatau hida ese Iesu idia vadivadi henia, rua, toi eiava 30? Baibel ese edia namba ia gwauraia lasi. Reana idia gwau aonega taudia toi badina be edia harihari gaudia idaudia toi idia abia lao.b (Mataio 2:​11) Haida idia gwau unai aonega taudia toi be tano idaudia toi amo idia mai. To, Baibel ese unai ia gwauraia lasi. Evanelia bukadia ia herevalaia bukana ta ia gwau, unai “sivarai koikoina be lagani 1700 lalonai ia noho histori torea tauna ta ena lalohadai sibona.”

TAUNIMANIMA ESE IDIA ABIA DAE GAUNA: Iesu be sibona ia vara.

MOMOKANI O KOIKOI: KOIKOI.

Evanelia bukadia ese idia hahedinaraia Iesu be mai ena tadina. Luka ena buka ese ia hahedinaraia Iesu be Maria ena “vara guna” natuna, bona gabeai natuna ma haida ia havaraia.c (Luka 2:⁠7) Mareko ena buka ese ia hahedinaraia Nasareta taudia haida idia gwau Iesu be ena tadidia hegeregerena, bona idia laloa lasi ia be Mesia. Idia henanadai: “Maria ena natuna, Iamesi bona Iose bona Iuda bona Simona edia kakana, a? Iena taihuna idia danu ita dekenai idia noho, a?”​​—⁠Mareko 6:3; Mataio 12:46; Ioane 7:⁠5.

Ena be Evanelia bukadia ese idia hahedinaraia Iesu be mai ena tadina haida, to tomadiho stadilaia taudia idia gwau Iesu be sibona ia vara. Haida idia gwau Iesu ena tadina be iena kasin.d Bona ma haida idia laloa unai be Iosepa ena natuna. To, mani inai oi laloa: Bema Iesu be Maria ena natuna tamona sibona, dahaka dainai Nasareta taudia haida be unai bamona idia hereva? Reana, haida be edia matana korikori amo Maria ia rogorogo negadiai idia itaia. Idia diba Maria ese Iesu bona ena tadina ma haida ia havaraia.

TAUNIMANIMA ESE IDIA ABIA DAE GAUNA: Iesu be Dirava, to taunimanima edia tauanina ia abia.

MOMOKANI O KOIKOI: KOIKOI.

Dirava be Iesu bona taunimanima bamona tanobada ai ia mai lalohadaina be idaunega amo ia matamaia, bona ia be Toi Tamona ena hahediba herevana ia durua. To, Iesu be tanobada ai ia noho neganai unai lalohadai ia noho lasi. The Encyclopædia Britannica ia gwau: “Unai hereva Toi Tamona eiava ena hahediba herevana be Taravatu Matamatana ai ia noho lasi . . . Unai hahediba herevana be lagani handred momo lalonai idia hepapahuahulaia bona metairametaira haida ese idia abia dae.”

Iesu be Dirava bona tanobada dekenai ia mai hahediba herevana, idia abia dae tomadiho oreadia ese Iesu ena ladana idia hadikaia.e Edena dala ai? Mani inai haheitalai oi laloa. Gaukara taudia haida be edia bosi dekenai gau ta totona idia noinoi, to edia bosi ia gwau ia dekenai siahu be lasi unai gauna ia henia totona. Bema iena hereva be momokani, ia hahedinaraia ia laloparara iena dagi be mai ena hetoana. To, bema iena hereva be koikoi bona ia ese edia ura gauna ia henia diba to ia ura lasi ia karaia, vadaeni ia be koikoi tauna.

Iesu ena aposetolo taudia rua be dagi totona idia hepapahuahu neganai, Iesu be edena bamona ia haere? Ia hamaorodia: “Lauegu idiba kahanai bona lauegu lauri kahanai do idia helai taudia be lau ese do lau abia hidi lasi. Egu Tamana ese ia diba taudia dekenai do ia henidia.” (Mataio 20:23) Bema Iesu be momokani Dirava, ia be hereva koikoi ia gwauraia unai, ani? To, Iesu be siahu ibounai Tamana ia herevalaia neganai, ia hahedinaraia ia be manau tauna bona Dirava ena siahu ese iena siahu ia hereaia.

TAUNIMANIMA ESE IDIA ABIA DAE GAUNA: Iesu be tau namona ta sibona lasi, to ia be tau hereadaena.

MOMOKANI O KOIKOI: MOMOKANI.

Iesu ia hahedinaraia ia be tau namona ta sibona lasi. Ia gwau: “Lau be Dirava ena Natuna.” (Ioane 10:36) Momokani, taunimanima idauidau idia gwau diba idia be Dirava ena Natuna. To, bema Iesu ena hereva be koikoi, unai ese do ia hahedinaraia ia be edena bamona tauna? Reana, do ita gwau diba ia be tau namona lasi, to koikoi bada tauna!

Dirava sibona ese hereva momokani ia gwauraia. Nega rua Iesu ia herevalaia neganai, ia gwau: “Inai be lauegu Natuna.” (Mataio 3:​17; 17:⁠5) Mani inai oi laloa: Baibel be taunimanima ese Dirava ena gadona idia kamonai negadia ta ta ia sivarailaia. Bona nega rua Dirava ese ia hamomokania Iesu be Iena Natuna.

Inai hereva lalonai Iesu ena sivarai korikoridia oi duahia neganai, idia haida be matamata oi dekenai, a? Bema oibe, Evanelia bukadia edia sivarai ma haida oi duahia be namo. Unai bamona tahua karana be moale gauna bona mai ena namo. Badina Iesu ia gwau, ia bona ena Tamana oi dibaia karana amo “mauri hanaihanai” oi abia diba.​​—⁠Ioane 17:⁠3.

[Footnotes]

[Box/Picture on page 14]

Do Oi Moalelaia Hereva Momokani Ma Haida

Iesu be edena bamona tauna? Oi laloa Iesu be ia kiri diba lasi, taunimanima ia dadaraia, ia hebogahisi lasi bona ogogami taudia ia durua lasi, a? Reana, haida do idia gwau, oibe. Unai dainai, henunai idia noho herevadia idia diba neganai idia hoa badina Iesu be  . . .

• headava ena pati ta dekenai ia lao.​​—⁠Ioane 2:​1-​11.

• ma haida hanamoa herevadia ia gwauraia.​​—⁠Mareko 14:​6-9.

• natudia edia hebamo karana ia moalelaia.​​—⁠Mareko 10:​13, 14.

• taunimanima vairanai ia tai.​​—⁠Ioane 11:⁠35.

• hebogahisi karana ia hahedinaraia.​​—⁠Mareko 1:​40, 41.