“Keriso be Dirava Ena Siahu”

1-3. (a) Galilea Gohuna ai, dahaka ia vara dainai hahediba taudia idia gari dikadika bona Iesu ese dahaka ia karaia? (b) Dahaka dainai aposetolo Paulo ia gwau “Keriso be Dirava ena siahu” be maoro?

HAHEDIBA TAUDIA idia gari dikadika. Vanagi amo Galilea Gohuna dekenai idia lao neganai, lai gubana ta ia toa. Momokani, guna unai gohu dekenai lai gubadia idia itaia vadaeni—badina idia haida be haoda diba momo taudia.a To inai be “lai bada herea,” unai dainai davara ena hurehure idia bada daekau. Unai tatau idia gaukara goadagoada vanagi idia taria namonamo totona, to lai gubana ena goada be bada herea. “Hurehure ese bouti idia botaia” bona bouti be ranu amo ia honu. Ena be unai regerege bada ia vara, to Iesu be vanagi ena duduna dekenai ia mahuta boio, ia hesiku bada badina unai dina lalonai hutuma ia haroro henidia. Hahediba taudia be mase garina idia gari dainai, Iesu idia hanogaia, idia noia: “Lohiabada e, ita oi hamauria, kahirakahira do ita mase!”​—Mareko 4:35-38; Mataio 8:23-25.

² Iesu ia gari lasi. Mai lalogoada ida, lai bona davara ia gwau henidia: “Hadokoa! Regerege lasi!” Maoromaoro, lai bona davara idia kamonai—“lai ia doko bona gohu ia manada lou.” Hahediba taudia idia gari dikadika. Ta ta dekenai idia gwau: “Inai tauna be daika?” Momokani, edena bamona tauna ese lai bona davara ia gwau henia diba, hegeregere ia be kamonai lasi natuna ia hamaoromaoroa bamona?​—Mareko 4:39-41; Mataio 8:26, 27.

³ To Iesu be taunimanima amo ia idau. Iehova ese Iesu dekenai ena siahu ia hahedinaraia bona Iesu ese hoa dalanai unai siahu ia hahedinaraia. Dirava ena lauma ese ia hasiahua tauna, aposetolo Paulo, be mai maoro ida ia gwau: “Keriso be Dirava ena siahu.” (1 Korinto 1:24) Edena dala ai Iesu ese Dirava ena siahu ia hahedinaraia? Bona Iesu ese siahu ia gaukaralaia diba ena anina iseda mauri dekenai be dahaka?

Dirava Ena Natuna Tamona Sibona Ena Siahu

4, 5. (a) Iehova ese ena Natuna tamona sibona dekenai dahaka siahu bona dagi ia henia? (b) Natuna be dahaka heduru ia abia Tamana ena ura gaudia ia havaraia totona?

⁴ Iesu be tanobada dekenai ia do mai lasi neganai ia gaukaralaia siahu, mani oi laloa. Iehova ena “siahu be ia doko diba lasi” bona unai ia gaukaralaia ena Natuna tamona sibona ia havaraia neganai, gabeai unai Natuna idia gwauraia Iesu Keriso. (Roma 1:20; Kolose 1:15) Unai murinai, Iehova ese unai Natuna dekenai siahu bona dagi bada ia henia, Natuna ese Iena ura gaudia ia havaraia totona. Baibel ese unai Natuna be inai bamona ia gwauraia: “Gau ibounai be ia amo idia vara, ma dala idauna ta amo idia vara lasi.”​—Ioane 1:3.

⁵ Unai gaukara ena bada ita lalopararalaia diba lasi. Mani oi laloa, aneru goadadia milioni momo, guba ai idia noho galaksi bilioni momo, bona tanobada ai idia noho mauri gaudia idauidau momo havaraia totona, siahu bada herea idia gaukaralaia. Unai gaukara karaia totona, Dirava ena Natuna tamona sibona be guba bona tanobada dekenai ia goada bada herea siahuna ia abia—Dirava ena lauma helaga unai. Unai Natuna be gaukara karaia tauna namona ena dagi ia moalelaia, Iehova ese ia gaukaralaia gau ibounai ia havaraia totona.​—Aonega Herevadia 8:22-31.

6. Iesu be tanobada ai ia mase bona toreisi lou murinai, dahaka siahu bona dagi ia abia?

⁶ Unai Natuna tamona sibona ese siahu bona dagi ma haida danu ia abia diba, a? Iesu be tanobada ai ia mase bona ia toreisi lou murinai, ia gwau: “Dirava ese lau dekenai siahu ia henia, guba bona tanobada gaudia ibounai lau biagua totona.” (Mataio 28:18) Oibe, Iehova ese Iesu dekenai diba bona maoro ia henia guba bona tanobada ai unai siahu ia gaukaralaia totona. Ia be “king ibounai edia King, bona lohia ibounai edia Lohia” dainai, gwaumaoro ia abia, ena Tamana idia inai henia taudia—ita itaia diba bona ita itaia diba lasi “gavamani ibounai, lohia taudia ibounai, bona siahu taudia ibounai be ia ese ia haorea” totona. (Apokalupo 19:16; 1 Korinto 15:24-26) Dirava ese “gau ibounai be ena natuna henunai ia atoa, anina be gau ta be do ia noho kava lasi”—to Iehova be Iesu henunai ia noho lasi.​—Heberu 2:8; 1 Korinto 15:27.

7. Dahaka dainai ita diba momokani, Iesu be Iehova ese ia henia siahuna do ia gaukaralaia kerere lasi?

⁷ Iesu ese reana ena siahu do ia gaukaralaia kerere dainai, do ita laloa momo, a? Lasi vaitani! Iesu be ena Tamana ia lalokau henia bada bona gau ta do ia karaia lasi ia habadua totona. (Ioane 8:29; 14:31) Iesu ia diba namonamo Iehova ese ena siahu bada herea ia gaukaralaia kerere lasi. Iesu ia itaia Iehova ese dala ia tahua “Ia idia badinaia momokani taudia dekenai ena goada ia hahedinaraia totona.” (2 Sivarai 16:9) Momokani, Iesu be ena Tamana hegeregerena, taunimanima ia lalokau henidia, unai dainai ita diba momokani Iesu ese nega ibounai taunimanima edia namo totona ena siahu do ia gaukaralaia. (Ioane 13:1) Unai kara ia hahedinaraia goevagoeva. Tanobada dekenai ia noho neganai, dahaka ese ena lalona ia veria unai siahu ia gaukaralaia totona, mani ita itaia.

“Iena Hereva be mai Ena Siahu”

8. Iesu be Lauma helaga ese ia horoa murinai, siahu ia abia dahaka ia karaia totona bona iena siahu be edena bamona ia gaukaralaia?

⁸ Ia hedinarai goevagoeva, Iesu ia maragi bona Nasareta dekenai ia tubu daekau noho lalonai, hoa karadia ia karaia lasi. To lagani 29 C.E. ai, ena mauri lagani 30 ai bapatiso ia abia neganai, unai ia idau. (Luka 3:21-23) Baibel ese ita ia hadibaia: “Dirava ese lauma helaga amo ia horoa bona siahu ia henia. Vadaeni gabu ibounai dekenai ia lao bona kara namodia ia karaia bona Diabolo ese ia hahisia taudia ibounai ia hanamoa.” (Kara 10:38) “Kara namodia ia karaia”—unai ese ia hahedinaraia Iesu be dala maorona ai ena siahu ia gaukaralaia, ani? Lauma helaga ese ia horoa murinai, ia be “peroveta tauna” ai ia lao bona “hoa karadia ia karaia, bona mai siahu ida ia hereva.”​—Luka 24:19.

9-11. (a) Nega momo Iesu be edeseniai taunimanima ia hadibaia, bona edena dala ai unai ia karaia? (b) Dahaka dainai hutuma be Iesu ena hadibaia dalana dekenai idia hoa bada?

⁹ Edena dala ai Iesu be mai ena siahu ida ia hereva? Nega momo ia be gohu badinai, ororo dorina ai, dala ai, bona maketi gabudia ai taunimanima ia hadibadia. (Mareko 6:53-56; Luka 5:1-3; 13:26) Idia kamonai taudia idia raka siri diba bema ena hereva ese edia lalona ia veria lasi. Unai nega ai, idia printaia bukadia idia noho lasi, unai dainai mai edia ura bada ida iena hereva idia kamonai taudia, be edia lalona bona kudouna dekenai ena hereva idia laloatao be namo. Unai dainai edia lalona ia veria, idia laloparara, bona idia laloatao haraga dalanai ia hadibaia be namo. To, Iesu dekenai unai be hekwarahi gauna lasi. Hegeregere, iena Ororo Harorona mani ita itaia.

¹⁰ Daba ta lagani 31 C.E. ai, hutuma be Galilea Gohuna kahirakahira ia noho ororo dorina ai idia hebou. Idia haida be Iudea bona Ierusalema amo idia mai, unai gabu edia daudau be kilomita 100 ia lao 110 bamona. Ma haida be not kahana, Turo bona Sidono edia kone amo idia mai. Gorere taudia momo be Iesu kahirakahira idia lao ia idia dogoatao totona bona idia ibounai ia hanamodia. Gorere taudia ibounai ia hanamoa murinai, ia hadibadia matamaia. (Luka 6:17-19) Gabeai ena hereva ia hadokoa neganai, idia kamonai gaudia dainai idia hoa bada. Dahaka dainai?

¹¹ Lagani haida murinai, unai haroro herevana ia kamonai tauna ta ia gwau: “Hutuma be ena hadibaia dalana dekenai idia hoa bada, badina ia be mai ena siahu.” (Mataio 7:28, 29) Iesu ena hereva be mai ena siahu bona idia mamia diba. Dirava totona ia hereva bona Dirava ena Hereva amo ia hadibaia gaudia ia hamomokania. (Ioane 7:16) Iesu ena hereva be goevagoeva, taunimanima edia lalona ia veria, bona ta ese unai hereva ia hakoikoia diba lasi. Hereva badadia edia anina ia hahedinaraia goevagoeva, danu kamonai taudia ese idia laloa bada gaudia ia herevalaia. Idia dekenai moale ia davaria dalana, guriguri dalana, Dirava ena Basileia tahua dalana bona vaira negana namona davaria dalana ia hadibaia. (Mataio 5:3–7:27) Iena hereva ese hereva momokani bona kara maoromaoro totona idia hitolo taudia edia lalona ia kehoa. Unai taudia be ‘sibona edia ura idia dadaraia’ to gau ibounai idia rakatania, unai amo ia murinai idia raka diba. (Mataio 16:24; Luka 5:10, 11) Unai ibounai ese idia hamomokania Iesu be mai ena siahu ida ia hereva!

Iena Kara be ‘Mai Ena Siahu’

12, 13. Edena dala ai Iesu ena kara be ‘mai ena siahu,’ bona dahaka hoa karadia idauidau ia karaia?

¹² Iesu ena kara be ‘mai ena siahu’ danu. (Luka 24:19) Evanelia bukadia ese ia karaia hoa karadia 30 mai kahana idia herevalaia—“Iehova amo siahu”b ia abia unai ibounai ia karaia totona. (Luka 5:17) Iesu ena hoa karadia amo taunimanima tausen momo ia durudia. Hoa karadia rua mani ita laloa—taunimanima 5,000 bona gabeai tatau 4,000 hahine bona natudia bona reana hutuma tausen bamona danu ia ubudia!​—Mataio 14:13-21; 15:32-38.

¹³ Iesu be hoa karadia idauidau momo ia karaia. Ia be mai ena siahu demoni dekenai bona ia luludia diba. (Luka 9:37-43) Ia be mai ena siahu ranu bona lai ia biagua totona, ranu be uaina ai ia halaoa. (Ioane 2:1-11) Mani oi laloa iena hahediba taudia idia itaia “Iesu be gohu latanai ia raka” neganai idia hoa bada. (Ioane 6:18, 19) Ia be mai ena siahu gorere idauidau dekenai, tauanina kahana idia dika, nega daudau idia noho gorere, bona gorere dikadia momo ia hanamodia. (Mareko 3:1-5; Ioane 4:46-54) Unai gorere idauidau be dala idauidau ai ia hanamodia. Iesu be gabu daudau amo ia hereva sibona bona haida edia gorere ia hanamoa, to ma haida be ia ese ia dogoatao bena idia namo. (Mataio 8:2, 3, 5-13) Haida ia hanamoa haraga, ma haida be metairametaira.​—Mareko 8:22-25; Luka 8:43, 44.

14. Edena dala ai Iesu ia hahedinaraia ia be mai ena siahu mase taudia ia hatorea isi lou totona?

¹⁴ Hoa gauna badana be inai, Iesu be mai ena siahu mase taudia ia hatorea isi lou totona. Baibel lalonai, nega toi mase taudia ia hatorea isi lou, mauri lagani 12 kekenina be ena tama sina dekenai ia henia lou, vabu ena natuna tamona, bona ena taihudia ese idia lalokau henia tauna ia hatorea isi lou. (Luka 7:11-15; 8:49-56; Ioane 11:38-44) Unai ibounai ia karaia diba. Ena mauri lagani be 12 kekenina ia mase bena daudau lasi murinai, iena mase gedana amo ia hatorea isi lou. Vabu ena natuna mero ia mase dinana ai, Iesu ese mase patana amo ia hatorea isi lou. Bona Lasaro be dina foa ia mase murinai, Iesu ese guri gabuna amo ia hatorea isi lou.

Haida Edia Namo Ia Tahua, Laloa Namonamo Bona Hebogahisi Dalanai Siahu Ia Gaukaralaia

15, 16. Dahaka gaudia ese idia hamomokania Iesu ese ena siahu ia gaukaralaia neganai, sibona ena namo ia laloa lasi?

¹⁵ Bema Iesu ena siahu be goevadae lasi lohia tauna ta ese ia abia, unai siahu do ia gaukaralaia kerere, mani unai oi laloa. To Iesu be goevadae tauna. (1 Petero 2:22) Iesu ese sibona ena namo ia tahua lasi, dagi tahua karana bona mataganigani karana ia dadaraia. Unai kara ese goevadae lasi taudia ia veria edia siahu idia gaukaralaia ma haida idia hahisia totona.

¹⁶ Iesu be sibona ena namo ia laloa lasi, ena ura gauna ta dainai siahu ia gaukaralaia lasi. Ia hitolo neganai, ia ura lasi ia sibona totona, nadi be beredi ai ia halaoa. (Mataio 4:1-4) Ia be kohu momo lasi tauna, unai ese ia hamomokania iena siahu ia gaukaralaia karana amo kohu ia habadaia lasi. (Mataio 8:20) Gau ma haida ese idia hamomokania danu, sibona ena ura gaudia ia abia totona, hoa karadia ia karaia lasi. Hoa karadia ia karaia neganai, sibona ena namo ia laloa lasi. Gorere taudia ia hanamodia neganai, ia mamia siahu be ena tauanina ia rakatania. Ena be gorere tauna tamona sibona ia hanamoa, unai ia mamia danu. (Mareko 5:25-34) To, hutuma ese ia idia dogoatao karana ia koua lasi bona edia gorere ia namo lou. (Luka 6:19) Sibona ena namo ia laloa lasi karana unai!

17. Iesu ese edena dala ai ia hahedinaraia ena siahu ia gaukaralaia namonamo?

¹⁷ Iesu ia laloa namonamo guna bena ena siahu ia gaukaralaia. Hoa karadia ia karaia kava lasi taunimanima ese idia itaia eiava ia hekokoroku totona. (Mataio 4:5-7) Iesu ia ura lasi hoa karadia ia karaia Heroda ena lalohadai kererena ia hamoalea totona. (Luka 23:8, 9) Iesu ese ena siahu ia hekokorokulaia lasi, nega momo ia hanamoa taudia ia hadibaia tau ta do idia hamaoroa lasi. (Mareko 5:43; 7:36) Ia ura lasi unai sivarai idauidau dainai taunimanima ese ia dekenai lalohadai idauidau do idia abia.​—Mataio 12:15-19.

18-20. (a) Dahaka ese Iesu ena siahu ia gaukaralaia dalana ia biagua? (b) Iesu ese taia kudima tauna ta ia hanamoa dalana be edena bamona oi laloa?

¹⁸ Unai siahu tauna badana, Iesu, be unai negai idia noho lohia taudia hegeregerena lasi, idia ese mai kara auka ida edia siahu idia gaukaralaia, ma haida edia namo idia laloa lasi. Iesu be taunimanima ia lalodia bada. Hisihisi idia ania taudia ia itaia neganai, ia hebogahisi henidia bada bona unai dainai edia gorere ia hanamoa. (Mataio 14:14) Edia hemami bona edia dabu gaudia ia laloa bona unai kara dainai iena siahu be hebogahisi dalanai ia gaukaralaia. Unai bamona hebogahisi sivaraina ta be Mareko 7:31-37 ai ita davaria diba.

¹⁹ Unai nega ai, hutuma bada herea ese Iesu idia davaria bona gorere taudia momo be ia dekenai idia hakaua lao bona idia ibounai ia hanamodia. (Mataio 15:29, 30) To Iesu ese tau tamona sibona ia abia hidi bona dala idauna ai ia kara henia. Unai tauna be taia kudima bona ia hereva be auka. Iesu be reana unai tauna ena gari eiava hemarai ia mamia. Iesu ia laloa namonamo dainai, unai tauna ia hakaua siri hutuma amo, taunimanima ta be lasi gabuna dekenai ia abia lao. Bena Iesu ese kara haida amo unai tauna ia hadibaia ia be dahaka do ia karaia. Ena “taiana lalonai ena ima kwakikwaki ia atoa, bona ia kanudi murinai, unai tauna ena malana ia daua tao.”c (Mareko 7:33) Gabeai, Iesu be guba ia itaia murinai ia guriguri. Unai bamona kara amo unai tauna ia hadibaia, ‘Oi dekenai lau karaia karana be Dirava ena siahu amo lau karaia.’ Dokonai, Iesu ia gwau: “Oi kehoa.” (Mareko 7:34) Vadaeni, unai tauna ia kamonai diba bona ia hereva namonamo diba.

²⁰ Iesu ese Dirava amo ia abia siahuna be gorere hanamoa totona ia gaukaralaia neganai, taunimanima edia hemami ia laloa danu. Unai ita diba ese iseda kudouna ia hamarerea bada! Ita moale badina ita diba Iehova ese Mesia Basileiana be taunimanima ia laloa bada bona hebogahisi henia Lohia Tauna ena imana dekenai ia atoa, ani?

Gabeai Do Idia Vara Gaudia Edia Toana Ia Hahedinaraia

21, 22. (a) Iesu ena hoa karadia ese edena dala ai gabeai do idia vara gaudia idia hahedinaraia? (b) Iesu be tanobada ena siahu gaudia ia biagua dainai, iena Basileia henunai dahaka gaudia do idia vara lasi?

²¹ Iesu ese tanobada dekenai ia karaia hoa karadia be gabeai ena lohia henunai do ia karaia hahenamo badadia idia hahedinaraia. Dirava ena tanobada matamatana lalonai, Iesu ese hoa karadia do ia karaia lou—to tanobada ibounai dekenai do ia karaia! Mani ita vairanai ia noho moale gaudia haida ita laloa.

²² Iesu ese tanobada ena mauri gaudia ibounai do ia hanamoa, idia ibounai edia momo do ia hegeregere. Oi laloatao, ia ese lai gubana ia hadokoa, unai amo ia hahedinaraia dika havaraia gaudia ia biagua diba. Vadaeni, Keriso ena Basileia henunai, taunimanima be lai badadia, tano mareremarere, lahi ororodia eiava idia vara kava dika ma haida dekenai do idia gari lasi. Iesu be Gaukara Tauna Badana dainai, Iehova ese ia gaukaralaia tanobada bona ia lalonai idia noho mauri gaudia ibounai ia havaraia totona, unai dainai tanobada bona ia lalonai idia noho gaudia ibounai ia diba momokani. Tanobada lalonai idia noho gaudia gaukaralaia dalana maorona ia diba. Iena lohia henunai, inai tanobada ibounai be Paradaiso ai do ia lao.​—Luka 23:43.

23. Iesu be King dainai, edena dala ai taunimanima edia dabu gaudia do ia henia?

²³ Taunimanima edia dabu gaudia be edena bamona? Iesu ese aniani sisina sibona amo taunimanima tausen momo ia ubua karana ese ia hahedinaraia, iena lohia henunai taunimanima be do idia hitolo lasi. Oibe, aniani bada herea idia haria maoromaoro ese hitolo do ia hadokoa ela bona hanaihanai. (Salamo 72:16) Ia be mai ena siahu gorere idauidau dekenai, unai ese ita ia hadibaia gorere, matakepulu, taia kudima, bona aena dika taudia ibounai do ia hanamodia, do idia gorere lou lasi. (Isaia 33:24; 35:5, 6) Mase taudia ia hatorea isi lou diba karana ese ia hahedinaraia ia be guba dekenai ia noho King ta mai ena siahu bada. Bona ia be mai ena siahu ena Tamana ese ia laloatao taudia ibounai do ia hatoredia isi lou.​—Ioane 5:28, 29.

24. Iesu ena siahu ita laloa neganai, dahaka ita laloatao be namo, bona dahaka dainai?

²⁴ Iesu ena siahu ita laloa neganai, namona be ita laloatao, Natuna ese dala hereadaena ai ena Tamana ia tohotohoa. (Ioane 14:9) Unai dainai, Iesu ena siahu ia gaukaralaia dalana ese ita dekenai Iehova ena siahu ia gaukaralaia dalana ia hahedinaraia goevagoeva. Hegeregere, Iesu ese mai lalokau ida lepera tauna ta ia hanamoa dalana mani oi laloa. Mai ena hebogahisi ida unai tauna ia dogoatao bona ia gwau: “Lau ura!” (Mareko 1:40-42) Unai bamona sivarai idauidau amo, Iehova be hegeregere ia gwau, ‘Lauegu siahu be unai bamona lau gaukaralaia!’ Iseda Siahu Ibounai Diravana be unai bamona lalokau dalana ai ena siahu ia gaukaralaia dainai, oi ura ia do oi hanamoa bona tanikiu henia, a?