Dagedage Idia Davaria to Idia Moale
“Bema egu murinai umui raka dainai idia hadikaia umui, bona idia hisihisi henia umui, bona hereva dika mai koikoi danu idia gwauraia loaloa umui totona lau dainai, umui danu namo [“moale,” NW].”—MATAIO 5:11.
1. Moale bona dagedage karana dekenai, Iesu ese ia murinai idia raka taudia dekenai dahaka ia hamaorodia?
IESU ese ena aposetolo taudia be nega ginigunana Basileia harorolaia totona ia siaidia neganai, idia ia hadibaia idia be dagedage do idia davaria. Ia gwau: “Lauegu ladana dainai taunimanima ibounai ese do idia badu henia umui dekenai.” (Mataio 10:5-18, 22) To matamanai, Iesu ese ena Ororo Harorona amo ena aposetolo taudia bona ma haida ia hamaoroa, unai bamona dagedage karana ese edia moale do ia hadikaia lasi. Oibe, Iesu ese moale karana bona Keristani taudia ese dagedage idia davaria karana ia gwauraia hebou! To edena dala ai dagedage karana ese moale ia mailaia diba?
Kara Maoromaoro Dainai Hisihisi Idia Abia
2. Iesu bona aposetolo Paulo edia hereva hegeregerena, edena bamona hisihisi ese moale ia mailaia?
2 Iesu ese ia gwauraia moale gauna namba 8 be inai: “Dirava ena kara maoromaoro idia karaia dekena amo hisihisi idia abia taudia be idia namo [“moale,” NW ], Guba Basileia be idia edia.” (Mataio 5:10) Ita gwau lasi hisihisi ese moale ia havaraia. Aposetolo Petero ia gwau: “Bema umui kara dika, vadaeni umui idia dadabaia neganai umui haheauka, emui namo be dahaka? To bema umui kara namo, vadaeni hisihisi umui abia neganai, Dirava ena vairanai umui be namo.” Ma ia gwau: “To ia namo lasi bema umui ta ia hisihisi, sibona ena kerere dainai. Tau ta sedira ia ala-ala, o ia henaoa, o ia kara dika, o haida edia kara ia herevalaia kerere, bona unai kara dainai ia hisihisi. Unai bamona hisihisi be mai ena hanamoa ta lasi. To tau ta, bema ia be Keristani tauna dainai ia hisihisi, unai tau be do ia hemarai lasi. Lasi momokani, to ia ese Dirava do ia tanikiu henia, Keriso ena ladana ia abia dainai.” (1 Petero 2:20; 4:15, 16) Iesu ena hereva hegeregerena, kara maoromaoro dainai hisihisi ita haheaukalaia neganai, unai ese moale ia mailaia.
3. (a) Kara maoromaoro dainai ta ese hisihisi ia abia ena anina be dahaka? (b) Dagedage karana ese Keristani taudia ginigunadia dekenai dahaka ia mailaia?
3 Kara maoromaoro korikorina be Dirava ena ura bona hahegani badinaia karana amo ia vara. Unai dainai, ta be kara maoromaoro dainai hisihisi ia abia ena anina be, ia ura lasi Dirava ena taravatu ia utua. Iuda gunalaia taudia ese aposetolo taudia idia dagedage henia badina Iesu ena ladana harorolaia karana idia hadokoa lasi. (Kara 4:18-20; 5:27-29, 40) Unai ese edia moale ia hamaragia eiava edia haroro gaukara ia koua, a? Lasi vaitani! “Aposetolo taudia ese kaunsolo idia rakatania mai moale bada danu. Edia moale badina be, Dirava ese idia ia abia hidi vadaeni Iesu ena ladana dainai hisihisi do idia abia. Bona dina ibounai, Dubu Helaga lalonai bona ruma lalonai, taunimanima idia hadibaia noho, bona Iesu Keriso ena Sivarai Namona idia gwauraia noho. Inai gaukara idia hadokoa lasi.” (Kara 5:41, 42) Unai dagedage karana ese idia dekenai moale ia mailaia bona haroro gaukara dekenai edia ura ia habadaia. Gabeai, Keristani taudia ginigunadia idia ura lasi pavapava idia tomadiho henia dainai, Roma taudia ese idia dagedage henia.
4. Dahaka badina haida dainai Keristani taudia ese dagedage idia davaria?
4 Hari inai negai, Iehova ena Witnes taudia ese dagedage idia davaria badina idia ura lasi “Basileia ena Sivarai Namona” harorolaia gaukarana idia hadokoa. (Mataio 24:14) Edia Keristani heboudia idia taravatua neganai, idia ura hisihisi idia abia to idia ura lasi edia hebou karana idia hadokoa, Baibel ena hahegani hegeregerena. (Heberu 10:24, 25) Rara gaukaralaia kerere karana idia dadaraia eiava edia Keristani gini siri karana dainai, dagedage idia davaria. (Ioane 17:14; Kara 15:28, 29) To, kara maoromaoro totona idia gini goada karana ese hari inai negai Dirava ena taunimanima dekenai maino bona moale bada ia mailaia.—1 Petero 3:14.
Keriso Dainai Hisihisi Idia Davaria
5. Dahaka badina badana dainai hari Iehova ena taunimanima ese dagedage idia davaria?
5 Iesu ese ena Ororo Harorona ai ia gwauraia moale gauna namba 9 be dagedage karana dainai ia vara danu. Ia gwau: “Bema egu murinai umui raka dainai idia hadikaia umui, bona idia hisihisi henia umui, bona hereva dika mai koikoi danu idia gwauraia loaloa umui totona lau dainai, umui danu namo [“moale,” NW ].” (Mataio 5:11) Iehova ena taunimanima ese dagedage idia davaria ena badina badana be inai: idia be inai tanobada dikana ena kahana lasi. Iesu ese ena hahediba taudia ia hamaoroa: “Bema umui be tanobada ena taudia momokani neganai, tanobada taudia ese umui do idia lalokau henia. To umui be tanobada ena lasi, lau ese tanobada dekena amo lau abia hidi umui, unai dainai tanobada ese umui do ia badu henia.” (Ioane 15:19) Unai hegeregerena, aposetolo Petero ia gwau: “Harihari inai Dirava diba lasi taudia be idia hoa, badina umui ese unai bamona lebulebu karadia umui karaia lou lasi. Oibe, idia edia kara dekena amo umui raka siri vadaeni, unai dainai unai Dirava diba lasi taudia ese umui idia hereva dika henia noho.”—1 Petero 4:4.
6. (a) Dahaka dainai orena taudia bona edia bamodia idia gwauraia dika bona idia dagedage henia? (b) Ita idia gwauraia dika karana ese iseda moale ia hamaragia, a?
6 Ita itaia vadaeni, Keristani taudia ginigunadia ese dagedage idia davaria badina idia ura lasi Iesu ena ladana idia harorolaia karana idia hadokoa. Keriso ese ena murinai idia raka taudia ia hagania: “Lauegu ladana do umui gwauraia hedinarai . . . do ia lao bona tanobada ena kahana ibounai.” (Kara 1:8) Keriso ena horoa tadikaka ena kamonai orena taudia bona edia bamodia hutuma bada herea taudia ese unai hahegani idia badinaia goadagoada. (Apokalupo 7:9) Unai dainai, Satani ese “hahine [Dirava ena guba oreana ena kahana] ena natuna oredia, Dirava ena taravatu idia badinaia momokani bona Iesu ena hereva momokani idia gwauraia hedinarai” taudia unai, ia dagedage henidia. (Apokalupo 12:9, 17) Ita be Iehova ena Witnes taudia dainai, Iesu—hari ia lohia noho Basileia gavamanina ena King—ita gwauraia hedinarai, bona ena gavamani ese tanobada gavamanidia ibounai do ia haorea bona Dirava ena kara maoromaoro tanobada matamatana do ia mailaia. (Daniela 2:44; 2 Petero 3:13) Ena be ita idia gwauraia dika bona idia dagedage henia, to Keriso ena ladana dainai hisihisi ita abia neganai ita moale.—1 Petero 4:14.
7, 8. Keristani taudia idia inai henia taudia ese idia dekenai dahaka koikoi herevadia idia gwauraia?
7 Iesu ia gwau, ia dainai ena murinai idia raka taudia be taunimanima ese “hereva dika mai koikoi danu idia gwauraia loaloa” neganai, idia moale be namo. (Mataio 5:11) Unai be ia momokani Keristani taudia ginigunadia dekenai. Lagani 59-61 C.E. bamona ai, aposetolo Paulo idia dogoatao bona Roma ai ia noho neganai, Iuda gunalaia taudia ese Keristani taudia be inai bamona idia herevalaia: “Ai diba gabu ibounai ese inai orea totona idia hereva ia dika.” (Kara 28:22) Paulo bona Sila idia samania koikoi, idia gwau “inai taudia be gabu ibounai dekenai kerere idia havaraia” bona “Kaisara ena taravatu idia makohia noho.”—Kara 17:6, 7.
8 Histori torea tauna K. S. Latourette, ese Roma Basileiana ia gini negana ai idia noho Keristani taudia ia herevalaia neganai, ia gwau: “Samani hereva koikoidia be idauidau. Keristani taudia be tomadiho koikoi edia moale karadia lalonai idia vareai lasi dainai, idia gwau Keristani taudia be Dirava ia noho lasi lalohadaina idia abia dae taudia. Edia noho gabuna ai idia karaia karadia—Dirava koikoidia tomadiho henia taudia edia aria bona moale karadia idauidau . . .—lalonai idia vareai lasi dainai, idia gwau Keristani taudia be taunimanima inai henia taudia. . . . Idia gwau tatau bona hahine be hanuaboi ai idia hedavari . . . matabodaga karadia idia karaia totona. . . . To hanuaboi ai [Keriso ena mase ena Memorial] hahelagaia totona, abidadama taudia idia hebou karana dainai idia gwau, Keristani taudia be hanaihanai beibi ta idia bouboulaia bona ena rara bona hidio idia ania.” Ma danu, Keristani taudia ese pavapava idia tomadiho henia lasi dainai, idia samanidia koikoi idia gwau idia be Gavamani idia inai henia taudia.
9. Keristani taudia ginigunadia be samania hereva koikoidia idia kamonai neganai dahaka idia karaia, bona hari inai nega be edena bamona?
9 Unai samania hereva koikoidia ese Keristani taudia ginigunadia ia koua lasi Basileia ena sivarai namona idia harorolaia totona. Lagani 60-61 C.E. ai, Paulo ese “Sivarai Namona,” “tanobada ibounai huahua ia havaraia” bona ‘tanobada ibounai dekenai idia harorolaia’ gauna, ia herevalaia diba. (Kolose 1:5, 6, 23; Buka Helağa) Unai kara be hari inai negai ia vara danu. Keristani taudia ginigunadia idia samania koikoi hegeregerena, hari danu Iehova ena Witnes taudia idia samania koikoi. To hari, Basileia ena sivarai harorolaia gaukarana idia karaia noho bona unai gaukara idia karaia taudia dekenai moale bada ia mailaia.
Peroveta Taudia Bamona Dagedage Ita Davaria Neganai Ita Moale
10, 11. (a) Iesu ese moale gauna namba nain ia herevalaia murinai edena bamona ena hereva ia hadokoa? (b) Dahaka dainai peroveta taudia ese dagedage idia davaria? Haheitalai haida gwauraia.
10 Iesu ese moale gauna namba nain ia herevalaia murinai, ena hereva ia hadokoa: “Umui moale bada momokani, badina be unai bamona danu, peroveta taudia gunadia be taunimanima ese idia dagedage henia.” (Mataio 5:12) Kamonai lasi Israela taudia be Iehova ese ia siaia peroveta taudia idia abia dae lasi, bona nega momo idia ese unai taudia idia dagedage henia. (Ieremia 7:25, 26) Aposetolo Paulo ese unai kara ia hamomokania: “Ma dahaka do lau gwauraia? . . . peroveta taudia herevalaia totona, lauegu nega be hegeregere lasi. Unai taudia ese Dirava idia abidadama henia dainai, . . . ma haida . . . ese idia kirikirilaidia, idia kwadidia, auri dekenai idia guidia, bona dibura ruma lalonai idia koudia.”—Heberu 11:32-38.
11 King dikana Ahaba bona ena adavana, Iesebele, edia lohia negana lalonai, Iehova ena peroveta taudia momo be kaia amo idia hamasedia. (1 King Taudia 18:4, 13; 19:10) Peroveta tauna Ieremia be seini dekenai idia guia bona gabeai ranu guri lalonai idia negea diho. (Ieremia 20:1, 2; 38:6) Peroveta tauna Daniela be laiona ena guri lalonai idia negea diho. (Daniela 6:16, 17) Keriso ia do vara lasi neganai idia noho peroveta taudia ibounai be dagedage idia abia, badina Iehova ena tomadiho goevana idia abia isi. Peroveta taudia momo be Iuda tomadiho gunalaia taudia ese idia dagedage henidia. Iesu ese taravatu hadibaia taudia bona Farisea taudia ia gwauraidia, “peroveta taudia idia alaia taudia edia natuna.”—Mataio 23:31.
12. Idaunegai peroveta taudia ese dagedage idia abia hegeregerena, ita Iehova ena Witnes taudia ese dagedage ita davaria neganai, dahaka dainai ita moale?
12 Hari, ita Iehova ena Witnes taudia ese nega momo dagedage ita davaria badina Basileia ena sivarai namona ita harorolaia goadagoada. Iseda inai taudia ese ita idia samania koikoi idia gwau, “mai dagedage ida taunimanima ita doria iseda orea ena memba taudia ai idia lao” totona, to ita diba idaunegai Iehova idia tomadiho henia abidadama taudia danu ese unai bamona maumau herevadia idia kamonai. (Ieremia 11:21; 20:8, 11) Idaunegai abidadama peroveta taudia be badina ta dainai hisihisi idia davaria, bona hari ita danu be unai badina tamona dainai dagedage ita davaria neganai, ita moale. Hahediba tauna Iamesi, ia gwau: “Lauegu varavara taudia e, peroveta taudia do umui laloa. Lohiabada ena ladana dekenai idia hereva neganai, hisihisi lalonai idia haheauka bona idia goada. Edia kara bamona do umui karaia be namo. Ita diba inai haheauka taudia ese moale idia davaria vadaeni, ani?”—Iamesi 5:10, 11.
Badina Badadia Dainai Ita Moale
13. (a) Dahaka dainai dagedage karana ese ita ia hamanokaia lasi? (b) Dahaka ese ita ia durua ita gini goada totona, bona unai ese dahaka ia hamomokania?
13 Dagedage dainai ita lalo-manoka lasi, to ita moale badina ita diba ita be peroveta taudia, Keristani taudia ginigunadia bona Iesu Keriso edia haheitalai ita tohotohoa. (1 Petero 2:21) Baibel ena siri idauidau amo moale bada ita abia, aposetolo Petero ena hereva bamona: “Lauegu lalokau taudia e, inai hisihisi bada, umui ia hisihisi henia noho gauna, be umui tohoa totona ia vara noho. Unai dainai do umui hoa lasi, do umui laloa lasi idau gauna ta be umui dekenai ia ginidae vadaeni. Umui be Keriso ena taudia dainai, do umui moale bema haida ese umui idia hereva dika henia. Badina inai anina be, Dirava ena Lauma, hairai Laumana, be umui dekenai ia noho vadaeni.” (1 Petero 4:12, 14) Ita diba dagedage neganai ita gini goada ena badina tamona be, Iehova ena lauma be ita latanai ia noho bona ita ia hagoadaia. Lauma helaga ena heduru ese ia hamomokania Iehova ese ita ia hanamoa noho bona unai ese ita dekenai moale bada ia mailaia.—Salamo 5:12; Filipi 1:27-29.
14. Kara maoromaoro dainai hisihisi ita abia neganai, dahaka badina idauidau dainai ita moale be namo?
14 Kara maoromaoro totona dagedage ita davaria dainai ita moale ena badina ma ta be, ia hamomokania ita be Keristani taudia momokanidia hegeregerena Dirava ita badinaia noho. Aposetolo Paulo ia gwau: “Keriso Iesu danu idia hakapua dainai, Dirava badinaia idia ura taudia ibounai ese dagedage ena hisihisi do idia abia.” (2 Timoteo 3:12) Ita moale bada badina hahetoho lalonai Dirava ita badinaia neganai, Satani ena koikoi herevana—Iehova ena taunimanima ese sibodia edia namo totona Ia idia hesiai henia herevana—ita haerelaia diba. (Iobu 1:9-11; 2:3, 4) Herevana iseda gaukara ia maragi momokani, to ita moale badina unai amo Iehova ena lohia siahuna ena maoro ita hamomokania.—Aonega Herevadia 27:11.
Davana Namona Dainai Ita Moale Bada Momokani
15, 16. (a) Iesu ese dahaka badina ia gwauraia dainai ita “moale bada momokani” be namo? (b) Horoa Keristani taudia ese guba dekenai dahaka davana namona do idia abia, bona edena dala ai edia bamodia “mamoe idaudia” ese davana do idia abia danu?
15 Idaunegai peroveta taudia bamona, ita idia gwauraia dika bona dagedage henia neganai, Iesu ese ita moale ena badina ma ta ia gwauraia. Ia ese moale gauna namba nain ia herevalaia murinai, ia gwau: “Umui moale bada momokani, badina emui davana guba dekenai ia bada.” (Mataio 5:12) Aposetolo Paulo ia gwau: “Kara dika ena davana be mase, to Dirava ena harihari gauna davana lasi be mauri hanaihanai, Iesu Keriso iseda Lohiabada lalonai ita noho dainai.” (Roma 6:23) Oibe, ita abia “davana” bada hereana be mauri, to ia be iseda gaukara ena davana lasi. Ia be harihari gauna. Iesu ia gwau unai davana be “guba dekenai,” badina ia be Iehova amo ia mai.
16 Horoa taudia be “kwalimu ahuna” do idia abia, anina be Keriso ida mase diba lasi maurina guba dekenai do idia abia. (Iamesi 1:12, 17) Tanobada helarona idia abia taudia, “mamoe idaudia” unai, be tanobada paradaisona ai mauri hanaihanai do idia abia negana idia naria noho. (Ioane 10:16; Apokalupo 21:3-5) Unai orea rua idia abia “davana” be edia gaukara ena davana lasi. Horoa taudia bona “mamoe idaudia” be Iehova ena “hariharibada” dainai edia davana idia abia, unai kara dainai aposetolo Paulo ia gwau: “Namona be Dirava ita hanamoa bada, iena hariharibada namo herea momokani dainai. Inai hariharibada ia bada herea dainai, iena anina be, tau ta ia gwauraia namonamo diba lasi.”—2 Korinto 9:14, 15.
17. Dagedage ita davaria neganai, dahaka dainai ita “moale bada momokani”?
17 Pavapava Nero ese ia dagedage henia Keristani taudia haida dekenai, aposetolo Paulo ia gwau: “Namona be hisihisi lalodiai ita moale, badina be ita diba hisihisi ese haheauka ia havaraia; bena haheauka amo, lalo-namo abia mamina; bena lalo-namo abia mamina amo, helaro, bona unai helaro be lalohisihisi ia havaraia lasi.” Ia gwau danu: “Lohiabada ena namo umui dekenai do umui laloa noho mai moale danu. Nega dika ia mai neganai do umui gini goada.” (Roma 5:3-5; 12:12; NW ) Herevana iseda helaro be guba ai eiava tanobada ai, to hahetoho lalonai mai kamonai ida ita gini goada dainai do ita abia davana be gau ta ida ita hahegeregerea diba lasi. Iseda King Iesu Keriso henunai eda lalokau Tamana do ita hesiai henia bona hanamoa ela bona hanaihanai, unai be hahenamo bada hereana. Unai dainai, ita “moale bada momokani.”
18. Dokona ia kahirakahira lalonai bese idauidau ese dahaka do idia karaia, bona Iehova be dahaka do ia karaia?
18 Tano haida lalonai, Iehova ena Witnes taudia ese dagedage idia davaria vadaeni bona idia davaria noho. Iesu ese inai nega dokona ia perovetalaia neganai, Keristani taudia momokanidia dekenai ia gwau: “Lauegu ladana dainai bese ibounai ese umui do idia badu henia.” (Mataio 24:9) Dokona negana ia kahirakahira lalonai, Satani ese bese idauidau edia lalona do ia veria Iehova ena taunimanima idia inai henia totona. (Esekiela 38:10-12, 14-16) Unai neganai, Iehova ese kara ta do ia karaia. “Unai dekena amo egu ladana ena namo herea bona egu helaga do lau hedinaraia, bona bese momo edia vairana dekenai egu kara do lau hedinaraia. Unai neganai do idia diba lau be Lohiabada.” (Esekiela 38:23) Unai amo Iehova ese ena ladana badana do ia hahelagaia bona dagedage amo ena taunimanima do ia hamauria. Unai dainai, ia haheauka noho tauna be do ia moale.—Iamesi 1:12, NW.
19. ‘Iehova ena dina’ badana ita naria noho lalonai, dahaka ita karaia be namo?
19 ‘Iehova ena dina’ badana ia kahirakahira noho lalonai, namona be ita moale badina ‘Dirava ese ita ia abia hidi vadaeni Iesu ena ladana dainai hisihisi do ita abia.’ (2 Petero 3:10-13; Kara 5:41) Keristani taudia ginigunadia bamona, Iehova ena kara maoromaoro tanobadana ai iseda davana namona ita naria noho lalonai, namona be “Iesu Keriso ena Sivarai Namona” bona ena Basileia gavamanina “ita gwauraia noho bona inai gaukara ita hadokoa lasi.”—Kara 5:42; Iamesi 5:11.
Riviu
• Kara maoromaoro totona hisihisi ita abia ena anina be dahaka?
• Dagedage karana ese Keristani taudia dekenai dahaka ia mailaia?
• Dahaka dainai ita gwau diba Iehova ena Witnes taudia idia davaria dagedage, be idaunegai peroveta taudia ese idia davaria dagedage bamona?
• Dagedage ita davaria neganai, dahaka dainai ita “moale bada momokani” be namo?
[Pictures on page 28, 29]
‘Bema umui idia hisihisi henia bona umui dekenai hereva dika mai koikoi danu idia gwauraia, umui moale’
[Credit Line]
Group in prison: Chicago Herald-American