Kara Namodia amo Iehova Hanamoa
1 Lai dikana ese oi ia abia neganai bona ruma oi davaria neganai, oi moale bada! Bema ruma lalona ia siahu bona namo bona ruma taudia be heabidae taudia, mai moale ida do oi noho. Basileia harorolaia gaukarana ese Satani ena nega dikana amo, unai bamona gabu namona dekenai taunimanima ia hakaudia. Iseda kara ese ma haida dekenai ia hahedinaraia diba unai gabu be namo herea, a? Oibe, Iesu ia gwau, ‘iseda kara namodia do idia itaia neganai, iseda Tamana guba dekenai do idia hanamoa.’—Mat. 5:16.
2 Dahaka do ita karaia, bena iseda kara amo Iehova bona ena orea dekenai ma haida do ita veria mai? Namona be Iesu ena hereva Luka 6:31 bona 10:27 dekenai ese iseda dina ta ta maurina do idia hanamoa. Unai ese ita ia doria taunimanima ita hebogahisi henia totona, bena inai lalokau lasi bona heduru lasi tanobadana amo do ita idau.
3 Taihu ta be bouti ta ai ia guia neganai, ia itaia hahine matamata ia gorere dainai ena natuna maragina ia naria diba lasi. Taihu ia gwau ena natuna do ia naria diba. Hahine ia nanadaia edena dala ai iena tanikiu karana ia hahedinaraia diba, bena taihu ia gwau: ‘Iehova ena Witnes taudia idia vadivadi neganai mani do oi kamonai henia.’ Unai ia karaia, bona hari ia bona ena adavana be Witnes taudia. Kara namodia dainai Basileia sivaraina idia abia dae.
4 Iseda Mauri Ibounai Lalonai: Haida ese iseda noho gabudia dekenai, gaukara eiava sikuli dekenai, bona moale negadia lalonai iseda kara hegeregerena ita bona iseda tomadiho do idia laloa. Unai dainai, sibona ita henanadai be namo: ‘Lau bona egu ruma bese idia itaia taudia be dahaka idia laloa? Dekena taudia idia laloa emai ruma bona gabu be goeva bona ai naria namonamo, a? Iseda gaukara bona sikuli turadia idia itaia, nega korikori ai ita ginidae bona ita gaukara goada, a? Ma haida dekenai manau bona hemataurai ita hahedinaraia, a?’ Ma haida ese iseda kara namodia dainai Iehova ena tomadiho do idia ura henia.
5 Petero ia gwau taunimanima ese Keristani taudia do idia hereva dika henia. (1 Pet. 4:4) Namo lasi iseda kara dainai ita do idia hereva dika henia diba. (1 Pet. 2:12) Bema iseda kara ese ita tomadiho henia Diravana ia hanamoa, ita be ataiai idia dogoatao lamepadia bamona, Iehova ese ia henia mauri abia gabuna dekenai ma haida ita hakaudia lao.—Mat. 5:14-16.