Alkahol Bona Lalohadai Maorona

RAU 3 dekenai ai herevalaia tauna, Tony, ese bema inuinu karana ena dika ia lalopararalaia, reana hari ia do mauri noho. Ia be unai bamona ia karaia lasi to ia inuinu momo, bona ia laloa ena mauri ia biagua namonamo. Dahaka dainai lalohadai kererena ia abia?

Alkahol momo inua karana be Tony ena laloa namonamo karana ia hadikaia. Herevana Tony ia laloparara o lasi, to alkahol momo inua karana ese iena kwarana harana​​—⁠ena tauanina, lalona, bona hemami ia biagua gauna​​—⁠​ena heau dalana ia hakererea. Oibe, Tony be alkahol momo ia inua dainai, ena harana ia gaukara namonamo lasi.

Tony ese lalohadai maorona ia abia lasi ena badina iharuana be inai: Ia ura dikadika ia inuinu. Rau 3 ai ai herevalaia tauna, Allen, be matamanai ia koikoi, ia gwau ia inuinu momo lasi. Ia gwau: “Egu inuinu karana lau hunia, ekskius lau gwauraia, bona lau gwau alkahol momo lau inua lasi. Lau ura lasi ta ese egu inuinu karana ia koua.” Ena be haida idia itaia diba, inuinu karana ese Tony bona Allen edia mauri ia biagua, to Tony bona Allen idia laloa gau ibounai idia namo. To idia ese edia inuinu karana idia biagua be gau badana. Vadaeni dahaka idia karaia be namo?

Kara ta Karaia!

Alkahol momo inua karana idia hadokoa taudia momo be Iesu ena sisiba bamona idia karaia: “Oiemu matana idiba kahana ese bema kerere ia havaraia oi dekenai, oiemu imana dekenai oi kokia, oi negea momokani, badina oiemu tauanina ena kahana ta bema ia boio be ia dika sisina, to oiemu tauanina ibounai lahi ia araia gabuna dekenai do idia negea vareai, be ia dika herea momokani.”​​—⁠Mataio 5:​29.

Iesu be tauanina hadikaia karana ia herevalaia, a? Lasi, iena hereva ena anina be inai: Dirava tomadiho henia karana idia hadikaia gaudia ibounai ita negea be gau badana. Momokani, unai bamona ita karaia neganai, reana hisihisi haida do ita davaria. To, unai ese ita do ia durua alkahol momo inua karana ia havaraia lalohadaina o karadia ita dadaraia totona. Unai dainai, bema alkahol momo oi inua dainai ma haida ese oi idia hereva henia, vadaeni kara ta oi karaia emui inuinu karana oi biagua totona.a Bema oi itaia emu inuinu karana oi biagua be ia auka, vadaeni mai emu ura ida inuinu karana oi hadokoa vaitani. Herevana unai bamona oi karaia be ia auka, to bema kara ta oi karaia lasi, emu mauri lalonai dika badana ta do oi davaria.

Herevana oi be kekero tauna lasi, to alkahol momo oi inua, a? Bema oi gwau “oibe,” vadaeni dahaka oi karaia diba alkahol dekenai lalohadai maorona oi abia totona?

Heduru Daladia

1. Hanaihanai oi guriguri bona oi abia dae unai guriguri be mai ena siahu. Bema oi ura Iehova Dirava oi hamoalea, vadaeni oi dekenai Baibel ena sisiba be inai: “Gau ibounai lalonai do umui guriguri bona noinoi goadagoada, bona mai tanikiu ida Dirava dekenai emui noinoi herevadia do umui gwauraia hedinarai. Bona Dirava ena maino, lalohadai ibounai ia hereaia gauna, ese emui kudouna bona lalona do ia gimaia, Keriso Iesu amo.” (Filipi 4:​6, 7, NW ) Unai maino oi abia totona, dahaka gaudia oi gurigurilaia be namo?

Mai momokani ida Iehova oi hamaoroa emu hekwakwanai be alkahol oi inua momo, ena be unai hekwakwanai be oi sibona ese oi hamaoromaoroa gauna. Dirava oi hamaoroa dahaka oi karaia diba unai hekwakwanai oi hamaoromaoroa totona, bena Ia ese emu hekwarahi do ia hanamoa bona hekwakwanai badadia ma haida do oi hanaia. Baibel ia gwau: “Bema oiemu kara dika oi hunia noho neganai, namo ta do oi davaria lasi. Oiemu kara dika do oi gwauraia hedinarai, bona dika do oi rakatania, unai neganai Dirava ese oi do ia bogahisihisi henia.” (Aonega Herevadia 28:13) Danu, Iesu ia gwau inai bamona ita guriguri diba: “Dibagani dika gabuna dekenai ai do oi hakaua vareai lasi, to Satani ena imana dekena amo do oi hamauria ai.” (Mataio 6:​13) Edena dala ai unai bamona guriguri hegeregerena oi karaia diba, bona edeseniai emu noinoi herevadia edia haere oi davaria diba?

2. Dirava Ena Hereva amo goada oi abia. “Dirava ena hereva be ia mauri noho, bona ia be mai ena siahu . . . bona ia ese iseda lalona bona iseda kudouna ena ura ibounai ia tahua diba.” (Heberu 4:​12) Kekero taudia gunadia momo be dina ta ta Baibel idia duahia bona laloa dobu karana amo heduru idia abia. Dirava ia gari henia salamo torea tauna ta ia gwau: “Inai bamona taudia be idia moale momokani: Idia ese kara dika taudia edia sisiba, bona edia laloa idia abia dae lasi. . . . Ma inai taudia ese, Lohiabada ena Taravatu dekenai idia moale, bona Lohiabada ena Taravatu idia laloa, dina bona hanuaboi ibounai lalonai. . . . Edia gaukara ibounai be ena anina ia vara, bona mai edia kwalimu danu.”​​—⁠Salamo 1:​1-3.

Allen be Iehova ena Witnes taudia ese Baibel amo idia durua dainai, alkahol inua momo karana ia hadokoa. Ia gwau, “Lau abia dae momokani Baibel ena hakaua herevadia ese lau idia durua inuinu karana lau hadokoa totona. Bema lasi, lau be idaunegai lau mase vadaeni.”

3. Oi boga auka. Baibel ia hahedinaraia, idaunegai Keristani kongrigeisen ai idia noho kekero taudia be “Dirava ena Lauma dainai” Dirava ese edia kara dika ia huria bona idia goeva. (1 Korinto 6:​9-​11) Edena dala ai? Idia ese boga auka​—⁠Dirava ena lauma helaga ese ia havaraia huahuana​—⁠idia hahedinaraia dainai, kekero bona lebulebu karadia idia hadokoa. Baibel gwau: “Inuinu dekena amo do umui kekero lasi, inai be emui mauri do ia hadikaia. To Lauma Helaga dekena amo do umui honu.” (Efeso 5:​18; Galatia 5:​21-​23, NW ) Iesu Keriso ia gwauhamata, “Tamana guba dekenai ia noho ese Lauma Helaga be idia noinoi taudia dekenai do ia henidia.” Unai dainai, “do umui noinoi, do ia henia umui dekenai.”​​—⁠Luka 11:​9, 13.

Bema oi ura Iehova ese emu tomadiho karana ia abia dae, vadaeni hanaihanai Baibel oi duahia, oi stadilaia, bona mai emu kudouna ibounai ida oi guriguri, unai ese oi do idia durua boga auka karana oi hahedinaraia totona. Oi lalometau lasi to inai siri dekenai ia noho Dirava ena gwauhamata oi abia dae, ia gwau: “Dirava ena lauma hegeregerena ia hadoa tauna be Dirava ena lauma amo, mauri hanaihanai do ia abia. Unai dainai ita hesiku lasi kara namodia ita karaia totona, badina bema ita hesiku lasi, nega korikori ai ita ese huahua do ita abia.”​​—⁠Galatia 6:​8, 9.

4. Tura namodia abia hidi. “Aonega tauna danu ia raka hebou noho tauna, be do ia aonega, to kavakava taudia danu oi turana karaia neganai, dika do oi davaria.” (Aonega Herevadia 13:20) Emu turadia oi hamaoroa oi ura lasi alkahol momo oi inua o oi ura lasi emu inuinu ena sikele oi hanaia. Baibel ia gwau, bema “wain momo inua karadia, regerege bada pati, [bona] inuinu helulu” oi dadaraia, emu turana gunadia haida do ‘idia hoa bona oi idia gwauraia dika.’ (1 Petero 4:​3, 4, NW ) Bema emu turana ta ese oi ia doria oi inuinu totona, vadaeni unai bamona tauna oi bamoa momo lasi.

5. Emu inuinu ena sikele hanaia lasi. “Inai tanobada taudia edia kara bamona do umui karaia lasi, to Dirava ese emui lalona do ia hagiroa, vadaeni do umui matamata, bona idau momokani. Unai dekena amo Dirava ena ura be do umui diba momokani. Do umui diba edena kara be namo, edena kara Dirava ia ura henia, bona edena kara be goeva momokani.” (Roma 12:​2) Bema Baibel ena hakaua herevadia oi badinaia bona emu inuinu ena sikele oi hanaia lasi, bona bema emu turadia o “inai tanobada taudia” bamona oi karaia lasi, oi be Iehova ese ia abia dae mauri dalana do oi moalelaia. To edena bamona oi diba emu inuinu ena sikele maorona oi hanaia lasi?

Herevana alkahol sisina o momo oi inua, to bema emu laloa namonamo karana ia hadikaia, anina be emu inuinu ena sikele maorona oi hanaia vadaeni. Unai dainai, bema oi ura oi inuinu, emu sikele hegeregerena oi inua be namo​—⁠emu sikele maorona oi hanaia o kahirakahira oi kekero be maoro lasi. Oi sibona oi koia lasi, oi gwau lasi momo oi inua neganai, kerere ta do ia vara lasi. Emu inuinu ena sikele maorona oi atoa, unai ese oi do ia durua oi kekero lasi totona.

6. Alkahol dadaraia karana manadalaia. “Namona be emui ‘oibe’ be oibe bona emui ‘lasi’ be lasi.” (Mataio 5:​37) Bema ta be oi ia doria loulou oi inuinu totona, mai hemataurai ida ia oi hamaoroa oi ura lasi​—⁠unai kara oi manadalaia. “Namona be hanaihanai mai hebogahisi ida emui hereva do umui gwauraia, damena umui atoa bamona, unai amo do umui diba edena bamona ta ta do umui haere henia.”​​—⁠Kolose 4:⁠6.

7. Ma haida edia heduru tahua. Emu turana namodia haida oi nanadaia, reana idia ese oi do idia hagoadaia inuinu karana oi dadaraia bona Baibel amo heduru hereva do idia gwauraia. “Tau rua ese tau tamona idia hereaia noho, badina rua edia gaukara davana be namo. Badina bema ta ia moru neganai, iena turana ese do ia abia isi.” (Hadibaia Tauna 4:​9, 10; Iamesi 5:​14, 16) United States ena orea ta (National Institute on Alkahol Abuse and Alkaholism) ena sisiba be inai: “Nega haida inuinu karana oi hadokoa be ia auka. Unai dainai, namona be emu ruma bese bona turadia oi noia, oi idia durua inuinu karana oi hadokoa totona.”

8. Emu gwauhamata badinaia. “Dirava ena hereva do umui kamonai kava lasi, to umui badinaia danu. Bema umui kamonai kava, umui sibona umui koia noho. To taravatu namona bona goevagoeva momokani ia noho, ia ese kara dika ena siahu dekena amo ita ia ruhaia vadaeni. Tau ta bema inai taravatu ia itaia namonamo noho, bona ia badinaia noho, bona ia kamonai kava lasi, to ia karaia momokani neganai, unai tau be namo. Dirava ese unai tau, iena kara ibounai lalonai, do ia hanamoa.”​​—⁠Iamesi 1:​22, 25.

Alkahol Inua Momo Karana Dadaraia

Haida be alkahol momo idia inua to idia kekero lasi. Ma haida be alkahol idia inua momo matamaia, ela bona unai kara idia manadalaia. To, alkahol inua momo karana ese tauanina bona lalona ia hadikaia diba dainai, alkahol momo inua taudia ese Baibel bona turana ena heduru sibona lasi, to doketa edia heduru idia abia be gau badana danu. Allen ia gwau: “Alkahol inua karana lau hadokoa gwauraia neganai, hisihisi badana ta lau mamia. Unai neganai lau laloparara, doketa edia heduru lau abia be namo, herevana Baibel ena heduru lau abia vadaeni.”

Kekero taudia momo ese Baibel ena heduru sibona lasi to doketa edia heduru idia abia be namo, unai amo alkahol inua momo karana amo idia gini siri o dadaraia diba.b Haida be hospital dekenai idia noho be namo, unai amo doketa ese muramura haida amo do idia durua edia hisihisi idia hanaia o alkahol ura henia dikadika karana idia hamaragia o hadokoa totona. Hoa karadia ia karaia tauna, Dirava ena Natuna ia gwau: “Idia gorere lasi taudia be doketa idia tahua lasi, to idia gorere taudia sibona ese idia tahua.”​​—⁠Mareko 2:​17, NW.

Dirava Ena Sisiba Badinaia Karana Ena Namo

Baibel ena sisiba, alkahol dekenai, be Dirava momokanina ese ia henia, ia ura ita noho namonamo​​—⁠hari sibona lasi to ela bona hanaihanai. Allen ese alkahol ia dadaraia negana amo ema bona hari be lagani 24 idia hanaia vadaeni, bona ia gwau: “Lau moale bada badina lau diba egu mauri lau senisia, bona lau diba Iehova ia ura lau ia durua egu kara lau hamaoromaoroa totona, unai dainai Iehova . . . ” Allen be ena hereva ia hadokoa sisina bona ia tai​—⁠ena mauri gunana ia laloa lou dainai. “Aaa, . . . lau diba Iehova ia laloparara bona ita ia laloa bada bona heduru maorona ia henia​​—⁠unai be namo herea.”

Bema alkahol inua momo karana be oiemu hekwakwanai ta, vadaeni oi hesiku haraga lasi o oi gwau lasi dala ma ta be lasi. Allen bona ma haida be guna kekero taudia, to alkahol inua momo karana idia hamaragia o hadokoa vaitani. Unai bamona idia karaia dainai idia moale; oi danu oi moale diba.

Herevana oi ura alkahol sisina oi inua o hadokoa momokani, to Dirava ena sisiba namona oi badinaia be namo, ia gwau: “Egu oda hereva bema umui kamonai henia neganai, emui noho be do ia namo, mai maino danu, sinavai hegeregerena, bona emui kara maoromaoro be goada, davara ena hurehure bamona.”​​—⁠Isaia 48:18.

[Footnotes]

[[Box/​Picture on page 8]

Alkahol ese Oi Ia Biagua, A?

Oi sibona oi nanadaia:

• Hari alkahol momo lau inua, guna bamona lasi, a?

• Hari nega momo lau inuinu, guna bamona lasi, a?

• Muramura aukadia lau inua noho, guna bamona lasi, a?

• Alkahol lau inua, egu lalometau o hekwakwanai lau hanaia totona, a?

• Egu inuinu karana dainai, ruma bese o turana ta ese lau ia hereva henia vadaeni, a?

• Egu inuinu karana ese hekwakwanai haida ruma bese lalonai, gaukara gabunai, o lau loaloa neganai ia havaraia, a?

• Wiki ta lalonai alkahol lau inua lasi neganai be ia auka, a?

• Haida ese alkahol idia inua lasi neganai, egu hemami ia dika, a?

• Alkahol hida lau inua ena namba be ma haida amo lau hunia, a?

Bema unai henanadai tamona o haida dekenai emu haere be oibe, vadaeni dala oi tahua emu inuinu karana oi biagua totona.

[Box/​Picture on page 9]

Aonega Daladia Abia Hidi

Alkahol oi do inua lasi neganai, oi henanadai:

• Lau inua be namo o lasi?

Aonega dalana: Ena inuinu karana ia biagua namonamo lasi tauna ia inuinu lasi be namo.

• Hida lau inua be namo?

Aonega dalana: Emu inuinu ena sikele oi laloa bona oi hanaia lasi; namo lasi alkahol momo oi inua dainai oi laloa maoromaoro lasi.

• Edena negai do lau inua?

Aonega dalana: Oi inuinu lasi bema oi be motuka oi taria gwauraia, Dirava ena gaukara oi karaia, oi rogorogo, doketa ena muramura oi inua, o gaukara badadia ma haida oi karaia.

• Edeseniai do lau inua?

Aonega dalana: Aniani gabudiai; hunia gabunai oi inuinu lasi; alkahol idia ura henia lasi taudia vairanai oi inuinu lasi.

• Daika ida do lau inua?

Aonega dalana: Emu ruma taudia o tura namodia ida; kekero taudia ida oi inuinu lasi.

[Box/​Picture on page 10]

Baibel ese Kekero Tauna ta Ia Durua

Thailand ai, Supot be guna kekero tauna ta. Matamanai, ia be adorahi sibona ia inuinu. Bena dina haida murinai, daba bona dina tubua ai inuinu karana ia hamatamaia. Nega haida ia inuinu ela bona ia kekero. To gabeai, Supot be Iehova ena Witnes taudia ida Baibel ia stadilaia matamaia. Ia davaria Iehova Dirava be kekero taudia ia abia dae lasi, unai dainai inuinu karana ia hadokoa. To daudau lasi murinai, Supot ese inuinu karana ia hamatamaia lou, guna bamona. Ena ruma bese taudia idia moale lasi.

To, Supot be Iehova ia lalokau henia noho, bona ia ura dala maorona ai Dirava ia tomadiho henia be namo. Supot ena turadia be ia sibona idia durua noho lasi, to ena ruma bese idia hagoadaia Supot idia durua noho bona idia hesiku lasi totona. Unai negai, 1 Korinto 6:​10 ena sisiba ese Supot ia durua ena mauri ia haidaua haraga totona. Unai siri ia gwau, ‘kekero taudia ta lasi be Dirava ena Basileia do ia davaria diba.’ Supot ia laloparara, namona be ia gaukara goada inuinu momo karana ia hadokoa totona.

Unai neganai Supot be ena lalona ia hadaia alkahol do ia inua lasi totona. Dirava ena lauma helaga, Baibel, ruma bese bona kongrigeisen taudia edia heduru dainai, Supot be Dirava tomadiho henia karana ia goadalaia lou bona alkahol ura henia karana ia dadaraia. Ruma bese taudia idia moale, badina Supot be Dirava dekenai ena mauri ia gwauhamatalaia bona bapatiso ia abia. Hari, Supot be Dirava ia tura henia noho bona nega ibounai ma haida ia durua Iehova idia diba totona.