Daika Oi Kamonai Henia​—Dirava Eiava Taunimanima?

“Dirava ai kamonai henia be namo, taunimanima ai kamonai henia be dika.”—KARA 5:29.

1. (a) Inai stadi ena siri badana be dahaka? (b) Dahaka dainai aposetolo taudia be dibura ruma dekenai idia atodia?

IUDA ena kota badana ena diadi taudia be reana idia badu dikadika. Badina dibura taudia be idia noho lasi. Unai taudia be Iesu Keriso ena aposetolo taudia. Wiki haida gunanai unai kota ese Iesu ia hahemaoro henia bona idia hamasea. Bena daudau lasi murinai, diadi taudia idia ura Iesu murinai idia raka taudia idia kota henia. To gima taudia be dibura rumana dekenai idia lao neganai, tau ta idia davaria lasi, ena be dibura rumana idia lokaia. Gabeai, gima taudia idia kamonai aposetolo taudia be Ierusalema ena dubu dekenai idia noho, bona mai gari lasi ida taunimanima dekenai Iesu Keriso ena sivarai idia harorolaia, to guna unai gaukara dainai idia dogoatao bona dibura ruma dekenai idia atodia! Gima taudia be maoromaoro dubu dekenai idia lao, aposetolo taudia idia dogoatao bona dibura rumana dekenai idia atodia lou. Unai murinai kota dekenai idia hakaudia lao.—Kara 5:17-27.

2. Aneru ta ese aposetolo taudia ia hagania dahaka idia karaia totona?

² Aneru ta ese dibura rumana amo aposetolo taudia ia ruhaia. Unai ena anina be dagedage do idia davaria lasi, a? Lasi. To unai amo Ierusalema dekenai idia noho taudia ese Iesu Keriso ena sivarai namona idia kamonai diba. Unai aneru ese aposetolo taudia ia hagania ‘mauri matamata ena hereva ibounai be hanua taudia dekenai do idia hadibaia.’ (Kara 5:19, 20) Unai dainai gima taudia be dubu dekenai idia lao neganai, idia itaia aposetolo taudia be unai hahegani herevana idia badinaia bona dubu dekenai idia haroro.

3, 4. (a) Kota ese ia oda henidia haroro gaukara do idia hadokoa neganai, Petero bona Ioane be dahaka idia gwau? (b) Aposetolo taudia haida be dahaka idia gwau?

³ Unai haroro goadagoada taudia rua, aposetolo Petero bona Ioane, be guna kota vairanai idia gini dainai, diadi tauna badana Iosepa Kaiapa ese idia ia hamaoroa lou: “Ai ese taravatu ai atoa, umui hadibaia lasi inai ladana dekenai. To hari emui hadibaia hereva dekenai Ierusalema ibounai umui hahonua vadaeni.” (Kara 5:28) Kaiapa ese Petero bona Ioane be kota dekenai ia itaia lou neganai ia hoa lasi. Badina guna, Kaiapa ese unai aposetolo taudia rua ia oda henia haroro gaukara do idia karaia lasi neganai, idia gwau: “Bema Dirava ai kamonai henia lasi, to umui dekenai ai kamonai, inai be maoro Dirava ena vairanai? Badina be ai itaia bona ai kamonai gaudia ai hunia diba lasi, aiemai uduna ai koua diba lasi.” Idaunega peroveta tauna Ieremia bamona, Petero bona Ioane be haroro gaukara idia hadokoa diba lasi.—Kara 4:18-20; Ieremia 20:9.

⁴ To unai negai, Petero bona Ioane sibona lasi to aposetolo taudia ibounai, idia abia hidi tauna Mataia danu, be kota vairanai idia gini. (Kara 1:21-26) Kota ese ia oda henidia haroro gaukara do idia hadokoa neganai, idia danu be mai gari lasi ida idia gwau: “Dirava ai kamonai henia be namo, taunimanima ai kamonai henia be dika.”—Kara 5:29.

Dirava Eiava Taunimanima Kamonai Henia

5, 6. Dahaka dainai aposetolo taudia ese kota ena oda herevana idia kamonai henia lasi?

⁵ Aposetolo taudia be taravatu badinaia taudia dainai, kota ena oda herevana do idia utua lasi. To, siahu bada tauna ta ese ma ta ia oda henia diba lasi Dirava ena taravatu ia utua totona. Iehova sibona be “Ataiai Momokani Diravana.” (Salamo 83:18) Ia be “tanobada ibounai ena kota biaguna” sibona lasi, to danu ia be Taravatu Henia Tauna Badana bona King ela bona hanaihanai. Bema kota ta ese taravatu ia atoa bona unai taravatu ese Dirava ena taravatu ta ia utua, Dirava ena vairanai unai taravatu be anina lasi.—Genese 18:25; Isaia 33:22.

⁶ Taravatu diba momo taudia haida be unai hereva idia abia dae. Hegeregere, lagani 1800 murinai, taravatu ia diba momo England tauna, William Blackstone ia gwau, namo lasi taunimanima edia taravatu ese Baibel lalonai Dirava ia “hahedinaraia taravatuna” ia hakoikoia. Unai dainai, Sanhedrin ena diadi taudia ese aposetolo taudia idia hagania edia haroro gaukara idia hadokoa neganai, idia ese Dirava ena taravatu idia utua. Unai dainai aposetolo taudia ese unai oda herevana idia kamonai henia lasi.

7. Dahaka dainai hahelaga taudia badadia be aposetolo taudia edia haroro gaukara dekenai idia badu?

⁷ Aposetolo taudia edia haroro goadagoada karana ese hahelaga taudia badadia ia habadua. Hahelaga taudia haida, Kaiapa danu, be Sadukea taudia, bona idia ese toreisi lou herevana idia abia dae lasi. (Kara 4:1, 2; 5:17) To, aposetolo taudia idia hereva loulou Iesu be mase amo ia toreisi lou vadaeni. Ma danu, hahelaga taudia haida ese gau momo idia karaia Roma ena lohia taudia edia lalonamo idia abia totona. Pilato ese hahelaga taudia badadia ia hamaoroa Iesu do idia abia dae edia King neganai, idia boiboi idia gwau: “Ai be mai emai king ta lasi, Kaisara sibona.” (Ioane 19:15)a Aposetolo taudia be Iesu ena toreisi lou sibona lasi, to Iesu ena ladana danu idia hahedibalaia, “badina be tanobada ibounai lalonai, ladana idauna ta Dirava ese ia henia lasi, ita do ia hamauria totona.” (Kara 2:36; 4:12) Hahelaga taudia idia laloa bema taunimanima ese ia toreisi lou tauna Iesu, be edia Hakaua Tauna ai idia halaoa, Roma taudia do idia mai bona Iuda hakaua taudia ‘edia dubu helaga bona bese do idia hadikaia ore.’—Ioane 11:48.

8. Gamaliela ese Sanhedrin ena diadi taudia dekenai dahaka aonega sisiba herevana ia gwauraia?

⁸ Toana be Iesu Keriso ena aposetolo taudia edia vaira negana ia dika. Badina Sanhedrin ena diadi taudia idia ura aposetolo taudia idia alaia mase. (Kara 5:33) To edia palani ia guguru lasi. Taravatu ia diba momo tauna Gamaliela, ia gini tore bona ena turadia ia hamaoroa kara ta do idia karaia haraga lasi. Mai aonega ida, ia gwau: “Bema inai hereva bona inai kara be taunimanima dekena amo ia mai, dohore anina ia vara lasi. To, bema ia be Dirava dekena amo ia mai, umui be hegeregere lasi edia dala umui koua.” Bena Gamaliela ese mai anina bada herevana ma ta ia gwauraia: “Dirava danu umui tuari henia garina.”—Kara 5:34, 38, 39.

9. Dahaka ese ia hamomokania aposetolo taudia edia gaukara be Dirava amo idia abia?

⁹ Hoa gauna be inai, kota ese Gamaliela ena hereva ia abia dae. Sanhedrin ese “aposetolo idia boiria idia mai, bona ibounai idia dadabaia. Ma taravatu idia atoa, Iesu ena ladana dekenai idia hadibaia lou lasi, vadaeni idia ruhaia, idia siaidia lao.” Aposetolo taudia be unai kara dainai idia gari lasi, to aneru ena oda idia kamonai bona edia lalona idia hadaia idia haroro noho totona. Unai dainai, dibura amo idia ruhaia murinai, “dina ibounai, Dubu Helaga lalonai bona ruma lalonai, taunimanima idia hadibaia noho, bona Iesu Keriso ena Sivarai Namona idia gwauraia noho. Inai gaukara idia hadokoa lasi.” (Kara 5:40, 42) Iehova ese edia hekwarahi ia hanamoa. Edena dala ai? “Dirava ena hereva ia bada daekau, bona diba tahua taudia idia momo daekau Ierusalema dekenai.” Oibe, “hahelagaia taudia momo danu ese Iesu ena dala idia abia dae.” (Kara 6:7) Reana unai ese hahelaga taudia badadia ia habadua momokani! Idia vara gaudia ese idia hamomokania, aposetolo taudia edia gaukara be Dirava amo idia abia!

Dirava Idia Tuari Henia Taudia Do Idia Kwalimu Lasi

10. Dahaka dainai Kaiapa ia laloa nega daudau lalonai ena dagi do ia dogoatao, to dahaka dainai unai be lalohadai maorona lasi?

¹⁰ Aposetolo edia negai, Iuda hahelaga taudia badadia be Roma ena siahu taudia ese idia abia hidi. Taga tauna Iosepa Kaiapa ena dagi be Valerius Gratus ese ia henia, bona Iosepa be nega daudau lalonai unai dagi ia dogoatao, ia vairanai idia gaukara taudia ta be unai bamona lasi. Kaiapa ia laloa ia be gavamani ena gwaukau tauna namona bona Pilato ena turana dainai unai dagi ia abia, to ia diba lasi Dirava ese ia dekenai unai dagi ia henia. Taunimanima ia abidadama henia kava. Aposetolo taudia be Sanhedrin ena kota vairanai idia gini bena lagani toi murinai, Roma ena siahu taudia be Kaiapa idia ura henia lasi bona hahelaga tauna ena dagi amo idia kokia.

11. Dahaka ia vara Pontio Pilato bona Iuda besena dekenai, bona unai amo dahaka ita dibaia?

¹¹ Pilato ena dagi ia hereaia tauna, Suria ena gavana Lucius Vitellius, ese oda ia henia Kaiapa ena dagi idia kokia totona, bona Kaiapa ena turana namona Pilato ese unai ia koua lasi. Unai ia vara bena lagani ta ia ore murinai, Pilato danu be ena dagi amo idia kokia bona ia be kerere haida ia karaia dainai, Roma dekenai ia giroa lou, ia idia kota henia totona. To Kaisara idia tabekau henia Iuda hakaua taudia ‘edia dubu helaga bona bese’ be Roma taudia ese idia hadikaia ore. Unai be lagani 70 C.E. ai ia vara, unai negai Roma ena tuari taudia ese Ierusalema hanua, dubu helaga bona kota rumana idia hadikaia ore momokani. Unai ese Salamo torea tauna ena hereva ia hamomokania: “King taudia do umui abidadama henia lasi, badina taunimanima ese umui do idia hamauria diba lasi”!—Ioane 11:48; Salamo 146:3.

12. Iesu ena haheitalai ese edena bamona ia hamomokania Dirava kamonai henia be aonega karana?

¹² Dirava ese mase amo ia toreisi lou tauna, Iesu Keriso, ia abia hidi lauma dubu badana ena Hahelaga Tauna badana ai ia lao totona. Tau ta ese ia amo unai dagi do ia kokia lasi. Oibe, ‘ta ese Iesu ena gabu do ia abia diba lasi.’ (Heberu 2:9; 7:17, 24; 9:11) Danu, Dirava be Iesu ia abia hidi, mauri taudia bona mase taudia ia kota henia totona. (2 Timoteo 4:1) Unai neganai, Iesu ese abia hidi do ia karaia, Iosepa Kaiapa bona Pontio Pilato be mauri do idia abia eiava lasi.—Mataio 23:33; Kara 24:15.

Hari mai Gari Lasi ida Basileia Idia Harorolaia Taudia

13. Daidia be Dirava idia hesiai henia bona daidia be lasi, bona edena bamona unai oi diba?

¹³ Aposetolo taudia edia nega hegeregerena, hari inai negai danu, taunimanima momo ese ‘Dirava idia tuari henia.’ (Kara 5:39) Hegeregere Germany ai, Iehova ena Witnes taudia ese Heil Hitler idia gwauraia lasi dainai, Adolf Hitler ia gwauhamata idia ibounai do ia hamasea ore. (Mataio 23:10) Hitler ese taunimanima haida ia gaukaralaia Witnes taudia idia hamasea totona. Nazi taudia idia kwalimu badina Witnes taudia tausen momo idia dogoatao bona dibura kamepadia dekenai idia siaia lao. Bona Witnes taudia haida idia hamasea danu. To Nazi taudia be inai dala ai idia kwalimu lasi: Idia ese Witnes taudia edia abidadama Dirava sibona do idia tomadiho henia karana dekenai idia hamanokaia lasi, bona Dirava ena orea taudia ibounai idia hamasea ore lasi. Unai Keristani taudia ese Dirava ena gaukara idia karaia, to taunimanima edia gaukara lasi, bona Dirava ena gaukara be tau ta ese ia koua diba lasi. Lagani 60 murinai, Hitler ena dibura amo idia roho mauri abidadama taudia be mai edia “kudouna ibounai” ida Iehova idia do hesiai henia noho, to Hitler bona ena politikol pati idia badinaia taudia idia mase ore bona taunimanima ese idia laloaboio vadaeni.—Mataio 22:37.

14. (a) Dirava ena hesiai taudia idia dagedage henia taudia ese dahaka idia karaia, bona unai dainai dahaka ia vara? (b) Edia dagedage karana ese Dirava ena taunimanima ia koua, a? (Heberu 13:​5, 6)

¹⁴ Nazi taudia idia mase murinai, ma haida danu ese Iehova bona ena taunimanima idia tuari henia, to idia kwalimu lasi. Europe ena tano haida ai, tomadiho bona politikol orea haida ese Iehova ena Witnes taudia idia gwauraia ‘orea dikana’ ta, guna Keristani ginigunadia be unai bamona idia gwauraia danu. (Kara 28:22) To, European Court of Human Rights idia abia dae Iehova ena Witnes taudia be orea dikana ta lasi, to ia be tomadiho oreana ta. Ita idia dagedage henia taudia be unai idia diba. To, Witnes taudia edia ladana idia do hadikaia noho. Unai dainai, tadikaka haida be edia gaukara amo idia hadokoa. Bona Witnes natudia danu be sikuli dekenai idia dagedage henidia. Tano biagudia be Witnes taudia ida kontraka idia karaia edia ruma be hebou totona idia gaukaralaia, to hereva koikoidia dainai idia gari bona edia ruma idia abidia lou. Bona gavamani orea haida ese tadikaka dekenai gwaumaoro idia henia lasi tano ta dekenai idia noho totona, badina idia be Iehova ena Witnes taudia! To unai ese Witnes taudia ia koua lasi.

15, 16. France dekenai Iehova ena Witnes taudia be edia Keristani gaukara dainai dagedage idia davaria, to dahaka idia karaia, bona dahaka dainai idia haroro noho?

¹⁵ Hegeregere, France dekenai, taunimanima momo be laloa maoromaoro taudia. To, ita idia dagedage henia taudia haida ese taravatu idia atoa Basileia ena gaukara idia koua totona. Unuseniai idia noho Iehova ena Witnes taudia be dahaka idia karaia? Idia ese edia gaukara idia habadaia bona unai ese anina namona ia havaraia. (Iamesi 4:7) Badina hua siks sibona lalonai, unai tano dekenai Baibel stadi be 33 pesen amo ia bada daekau! Diabolo ia badu dikadika badina France dekenai idia noho kudou-maoro taudia ese sivarai namona idia abia dae. (Apokalupo 12:17) Iseda Keristani tadikaka France dekenai idia diba momokani peroveta tauna Isaia ese ia gwauraia herevana be idia dekenai ia momokani: “Tuari gauna ta ese oi do ia hadikaia diba lasi. Bona oi idia samania gwauraia taudia, be oi ese idia edia hereva ibounai do oi koua diba.”—Isaia 54:17.

¹⁶ Iehova ena Witnes taudia ese dagedage idia davaria neganai, idia moale lasi. To, Dirava ese Keristani taudia ibounai dekenai ia henia haheganina idia badinaia dainai, idia kamonai gaudia idia herevalaia noho. Idia ura edia tano ena taravatu idia badinaia. To bema taunimanima edia taravatu ese Dirava ena taravatu ia utua, Dirava do idia kamonai henia.

Ita Gari Henidia Lasi

17. (a) Dahaka dainai iseda inai taudia ita gari henidia lasi? (b) Ita idia dagedage henia taudia be edena bamona ita kara henidia be namo?

¹⁷ Ita idia inai henia taudia ese dika do idia davaria, badina Dirava idia tuari henia noho. Unai dainai, Iesu ena hereva hegeregerena, idia ita gari henidia lasi, to idia totona ita guriguri. (Mataio 5:44) Bema idia be Taso tauna Saulo hegeregerena Dirava idia dagedage henia kava, Iehova ese edia matadia do ia kehoa bona hereva momokani do idia dibaia. (2 Korinto 4:4) Saulo be Keristani aposetolo tauna Paulo ai ia lao neganai, iena nega lalonai idia noho lohia taudia ese ia idia dagedage henia bada. To, ia ese tadikaka ia hadibadia loulou “idia ese gavana bona gavamani ena siahu taudia do idia kamonai henia. Edia oda hereva do idia badinaia, bona do idia naria hegaegae kara namodia ibounai do idia karaia totona. Idia ese tau ta [edia dagedage taudia danu] do idia gwauraia dika lasi, bona do idia heai lasi, to do idia manau. Nega ibounai taunimanima ibounai dekenai manada kara do idia karaia.” (Tito 3:1, 2) Iehova ena Witnes taudia France bona ma gabu haida dekenai ese unai sisiba herevana idia laloa bada.

18. (a) Iehova ese edena dala ai ena taunimanima do ia naria? (b) Bona dahaka ita diba momokani?

¹⁸ Dirava ese peroveta tauna Ieremia ia hamaoroa: “Lau be oi dekenai do lau noho, bona lau ese oi do lau naria.” (Ieremia 1:8) Iehova ese hari inai negai, edena dala ai ita be dagedage amo do ia naria? Reana dala do ia kehoa, laloa maoromaoro tauna ta Gamaliela bamona, ese diadi gaukara do ia karaia totona. Eiava ia ese ita ia dagedage henia tauna be ena dagi amo do ia kokia bona laloa maoromaoro tauna ta ese ena gabu do ia abia. To nega haida, Iehova ese ena taunimanima idia dagedage henia karana ia koua lasi. (2 Timoteo 3:12) Bema unai bamona ia vara, Iehova ese hanaihanai ita dekenai goada do ia henia unai dagedage ita haheaukalaia totona. (1 Korinto 10:13) Herevana Dirava ese unai dagedage karadia ia koua lasi, to inai ita diba momokani: Dirava ena taunimanima idia tuari henia taudia be Dirava idia tuari henia noho, bona do idia kwalimu lasi.

19. Lagani 2006 ena siri badana be dahaka, bona dahaka dainai unai be siri maorona?

¹⁹ Iesu ese ena hahediba taudia ia hamaoroa idia ese dagedage do idia davaria. (Ioane 16:33) Unai dainai, Kara 5:29 ena hereva be mai anina bada: “Dirava ai kamonai henia be namo, taunimanima ai kamonai henia be dika.” Unai dainai, unai siri ena hereva idia abia hidi, Iehova ena Witnes taudia edia lagani 2006 ena siri badana. Unai dainai herevana dahaka ia vara, namona be iseda lalona ita hadaia inai lagani ela bona hanaihanai lalonai, Dirava iseda Lohia Tauna ita kamonai henia!

[Footnote]

Oi Haere Diba, A?

• Aposetolo taudia ese dagedage idia haheaukalaia karana amo ita dekenai dahaka haheitalai namona idia hahedinaraia?

• Dahaka dainai hanaihanai Dirava ita kamonai henia be namo to taunimanima lasi?

• Ita idia inai henia taudia be daika idia tuari henia noho?

• Dagedage idia haheaukalaia taudia ese dahaka namo do idia davaria?

[Blurb on page 7]

Lagani 2006 ena siri badana be: “Dirava ai kamonai henia be namo, taunimanima ai kamonai henia be dika.”—Kara 5:29.

[Picture on page 3]

“Dirava ai kamonai henia be namo, taunimanima ai kamonai henia be dika”

[Picture on page 5]

Kaiapa ese taunimanima ia abidadama henia, to Dirava ia abidadama henia lasi