Iesu Ena Hereva ese Emu Kara Bona Lalohadai Ia Haidaua be Namo
“Dirava ese ia siaia tauna ese Dirava ena hereva ia gwauraia.”—IOA. 3:34.
1, 2. Ororo Harorona be dahaka ia hereaia, bona dahaka dainai ita gwau diba ia be “Dirava ena hereva”?
IESU ena Ororo Harorona be dava bada daimon eiava nadinadi mai hairaidia ibounai ia hereaia. Dahaka dainai? Badina Keriso be Iehova ena hereva ia harorolaia! Baibel ese Iesu be inai bamona ia herevalaia: “Dirava ese ia siaia tauna ese Dirava ena hereva ia gwauraia.”—Ioa. 3:34-36.
2 Ororo Harorona be lata momokani lasi. Ia lalonai Heberu Revarevadia ena buka 8 edia hereva idia noho dainai, ita gwau diba ia be “Dirava ena hereva.” Namona be Dirava ena Natuna lalokauna ena Ororo Harorona bona ita badinaia daladia haida ita itaia.
“Emu Tadikaka ida Maino Oi Karaia Guna”
3. Iesu be ena hahediba taudia dekenai ta badu henia noho karana ena davana dikana ia herevalaia murinai, dahaka sisiba ma ia henia?
3 Ita Keristani taudia be moale bona maino ai ita noho badina Dirava ena lauma helaga be ita dekenai ia noho, bona unai lauma helaga ena huahua rua be moale bona maino. (Gal. 5:22, 23) Iesu ia ura ena hahediba taudia huanai moale bona maino ia noho dainai, ia ese ta badu henia noho (eiava hemaka karana) ena davana dikana ia gwauraia. (Mataio 5:21, 22 duahia.) Bena ia gwau: “Bema emu harihari gauna oi abia lao pata helagana dekenai bona oi laloatao emu tadikaka be oi dekenai ia badu, namona be emu harihari gauna be pata helagana vairanai oi rakatania bona oi lao, emu tadikaka ida maino oi karaia guna. Bena oi giroa lou neganai, emu harihari gauna oi bouboulaia.”—Mat. 5:23, 24, NW.
4, 5. (a) Iesu ese Mataio 5:23, 24 ai ia gwauraia “harihari gauna” be dahaka? (b) Dahaka dainai ita ia habadua tadikaka ida maino ita karaia be gau badana?
4 Iesu ese ia gwauraia “harihari gauna,” be Ierusalema ena dubu helaga ai idia henia boubou gaudia ibounai ia herevalaia. Hegeregere, unai negai, tomadiho lalonai, taunimanima ese Iehova dekenai animal idia bouboulaia be mai anina bada. To, Iesu be mai anina bada gauna ta ia gwauraia—emu tadikaka danu maino do umui karaia guna, gabeai oi giroa lou, oiemu harihari gauna Dirava dekenai do oi henia.
5 Inai hereva “maino do umui karaia” ena anina be, hepapahuahu hamaoromaoroa be namo. Unai dainai, Iesu ena hereva amo dahaka ita dibaia? Gauna be inai: Haida ita kara namo henia neganai, ita hahedinaraia ita be Iehova ena turadia. (1 Ioa. 4:20) Idaunegai Israela dekenai, bema tau ta be ena tadikaka ia kara dika henia, Dirava be unai tau ia bouboulaia animal ia abia dae lasi.—Mika 6:6-8 duahia.
Ita Manau be Namo
6, 7. Ita ia habadua tadikaka ida maino ita karaia totona, dahaka dainai manau be mai anina bada?
6 Ia badu tadikakana danu maino do ita karaia karana ese eda manau karana do ia tohoa. Manau taudia be edia tadikaka ida idia heai lasi o heatu lasi, o idia gwau lasi idia be maoro bona edia tadikaka be kerere. Unai bamona kara be maino ia hadikaia diba—nega ta ai, Korinto kongrigeisen taudia huanai be unai bamona hekwakwanai ia vara. Unai dainai, Paulo ia gwau: “Umui emui Keristani varavara tauna inai bamona umui kota henia ena anina korikori be inai: Emui Keristani mauri ia moru momokani. Haida ese umui idia hadikaia neganai, o emui gau idia henaoa neganai, umui haheauka diba lasi, a? Hisihisi umui ania diba lasi, a?”—1 Kor. 6:7.
7 Iesu ena hereva anina be, ita lao eda tadikaka ita hamaoroa ita be maoro bona ia be kerere, a? Lasi, ita ura bada eda tadikaka ida maino ita karaia. Unai bamona ita karaia totona, namona be mai momokani ida tadikaka dekenai eda hemami o lalohadai ita gwauraia hedinarai. To danu, namona be ita laloparara eda tadikaka be ia lalohisihisi danu. Bema kerere be ita ese ita havaraia guna, vadaeni manau dalanai sori herevana ita gwauraia.
“Bema Emu Matana Idibana be Oi Ia Hahekwakwanaia Noho”
8. Iesu ena hereva Mataio 5:29, 30 dekenai mani oi herevalaia sisina.
8 Ororo Harorona dekenai, Iesu be sisiba namona ia henia. Ia diba, iseda tauanina ena kahana haida be kerere idia karaia diba. Unai dainai, ia gwau: “Bema emu matana idibana be oi ia hahekwakwanaia noho, oi kokia bona oi negea. Badina emu tauanina ena kahana ta oi haboioa be namo, to emu tauanina ibounai be Gehena dekenai idia negea be dika herea. Danu, bema emu imana idibana be oi ia hahekwakwanaia noho, oi utua bona oi negea. Badina emu tauanina ena kahana ta oi haboioa be namo, to emu tauanina ibounai be Gehena dekenai idia negea be dika herea.”—Mat. 5:29, 30, NW.
9. Edena dala ai iseda “matana” o “imana” be ita ia “hahekwakwanaia” diba?
9 Iesu ese ia kikilaia “matana” anina be, tau ta ese gau ta ia raraia noho karana, bona “imana” anina be, tau ta ese ena imana ia gaukaralaia kerere karana. Bema ita naria namonamo lasi, iseda imana, matana, o tauanina ena kahana ma ta be ita ia “hahekwakwanaia” bona Dirava ita rakatania diba. (Gen. 5:22; 6:9) Bema ta ese ita ia tohoa Dirava ena taravatu ita utua totona, namona be kara maorona ita karaia haraga, unai be hegeregere iseda matana ita kokia o imana ita utua oho.
10, 11. Dahaka ese ita do ia durua matabodaga gaudia ita dadaraia totona?
10 Edena dala ai eda matana amo matabodaga gaudia do ita raraia lasi? Dirava ia gari henia tauna Iobu ia gwau: “Lauegu matana dekenai taravatu lau atoa vadaeni, nega ta kekeni do lau itaia noho lasi, matabodaga kara totona.” (Iobu 31:1) Iobu be headava tauna, bona ia ura lasi Dirava ena taravatu ia utua. Namona be Iobu ena haheitalai ita tohotohoa, herevana ita headava o lasi. Matabodaga gaudia ita dadaraia totona, namona be Dirava ena lauma helaga ese ita ia hakaua—unai lauma helaga be Dirava idia lalokau henia taudia ia durua idia sibona edia ura idia biagua totona.—Gal. 5:22-25.
11 Matabodaga gaudia ita dadaraia totona, namona be ita sibona ita nanadaia, ‘Lau ura dikadika egu matana amo buka, TV, o Internet dekenai matabodaga laulaudia lau itaia, a?’ Danu, Iamesi ena sisiba ita laloatao, ia gwau: “Dibagani ena badina korikori be, tau ta sibona ena ura dainai, kara dika ta ese ia veria noho, bona ia koia noho. Vadaeni iena ura dikadia be idia rogorogo bamona, unai murinai kara dika ia havaraia. Bona kara dika ia tubu bona ia bada neganai, mase ia havaraia.” (Iam. 1:14, 15) Bema tadikaka ta be kekeni ta ia raraia noho (o bema taihu ta be mero ta ia raraia noho) lalonai matabodaga lalohadaina ia abia, gau badana be ena kara ia haidaua haraga, unai be hegeregere ena matana ia kokia bona ia negea momokani.—Mataio 5:27, 28 duahia.
12. Edena sisiba be ita ia durua diba matabodaga lalohadaidia o ura dikadia ita tuari henia totona?
12 Iseda imana ita gaukaralaia kerere karana amo Baibel ena kara maoromaoro taravatudia ita utua diba, unai dainai namona be eda lalona ita hadaia kara maoromaoro ita karaia noho totona. Namona be Paulo ena sisiba ita badinaia, ia gwau: “Emui tauanina ena kahadia umui hamasea, idia ese inai ura idia havaraia: matabodaga, kara mirodia, mahuta hebou urana, ura dikadia, bona kohu ura henia dikadika, unai be kaivakuku bona laulau tomadiho henia karana.” (Kol. 3:5, NW ) Inai hereva “hamasea” ese ia hahedinaraia, namona be ita gaukara goada tauanina ena ura dikadia ita tuari henia totona.
13, 14. Dahaka dainai matabodaga lalohadaidia o karadia ita dadaraia be maoro?
13 Nega haida ai, ta be mauri ia abia totona, gwaumaoro ia henia doketa ese ena imana dikana o aena dikana idia utua oho totona. Unai hegeregerena, iseda matana o imana ita “negea” anina be, matabodaga lalohadai bona karadia ita dadaraia be namo, unai amo Iehova be ita do ia lalonamo henia. Hanaihanai eda lalona, kara, bona tomadiho dalana ia goeva be namo, badina unai dala sibona amo ita be Gehena ese ia laulaulaia hadikaia hanaihanai karana amo do ita roho mauri.
14 Ita be goevadae lasi taudia dainai, iseda kara ia goeva noho totona, ita gaukara goada be namo. Paulo ia gwau: “Lauegu tauanina lau botaia momokani, bona iena ura lau karaia lasi, do ia goada totona. Inai bamona lau karaia, badina be haida do lau haroro henidia, to gabeai lau sibona egu mauri do lau halusia garina.” (1 Kor. 9:27) Namona be ita gaukara goada iseda mauri lalonai Keriso ena sisiba ita badinaia totona, bona eda kara ibounai lalonai ita hahedinaraia ita be Iesu ena mauri davalaia boubouna ita matauraia.—Mat. 20:28; Heb. 6:4-6.
“Henia Kara Do Umui Manadalaia”
15, 16. (a) Edena dala ai Iesu be henia karana ia hahedinaraia? (b) Iesu ese Luka 6:38 dekenai ia gwauraia herevana ena anina be dahaka?
15 Iesu ena kara bona hahediba herevadia ese idia hahedinaraia, henia karana be mai anina bada. Iesu be tanobada dekenai ia mai goevadae lasi taudia ia durua totona—unai be henia karana hereadaena. (2 Korinto 8:9 duahia.) Iesu be mai ena ura bada ida guba ai ena dagi o taga ia rakatania bona tanobada dekenai ia mai kara dika taudia hamauria totona, bona idia haida be guba Basileia dekenai Iesu ida do idia lohia hebou. (Roma 8:16, 17) Iesu ese ena hahediba taudia dekenai henia karana ia hadibaia neganai, ia gwau:
16 “Henia kara do umui manadalaia, vadaeni taunimanima ese umui dekenai do idia henia. Emui rami do idia hahonua, do idia pataia diho, bona do idia hamarerea, ela bona do ia bubua. Badina ma haida dekenai umui henia sikele hegeregerena, umui dekenai unai bamona sikele do idia henia.” (Luka 6:38, NW ) Inai hereva, “rami do idia hahonua” be Baibel tanodia ai maketi taudia ese idia karaia karana ta ia herevalaia; maketi ai, taunimanima ese edia atai dabua be puse bamona idia karaia, unai amo idia hoia gaudia be unuseniai idia udaia diba. Henia karana ita karaia dainai nega haida—reana ita dabu negadiai danu—hahenamo namodia ita abia.—Had. 11:2.
17. Edena dala ai henia karana dekenai Iehova be haheitalai hereadaena, bona edena bamona gaudia ita henia be moale gauna?
17 Mai moale ida taunimanima dekenai ena gau ia henia tauna be Iehova ese ia lalokau henia bona hanamoa. Iehova be haheitalai hereadaena, badina “iena Natuna tamona sibona ia vara, ia henia vadaeni ita dekenai, do idia abidadama henia taudia ibounai be do idia mase lasi, to mauri hanaihanai do idia abia.” (Ioa. 3:16) Paulo ia gwau: “Uhe momo do ia hadoa tauna be anina momo do ia geia. Umui ta ta, sibona emui laloa, emui laloa hegeregerena do umui henia, mai maumau danu henia lasi, bona oda dainai lasi. Badina be mai moale danu ia henia tauna be Dirava ese ia lalokau henia noho.” (2 Kor. 9:6, 7) Tomadiho momokani totona eda nega, goada, bona kohu ita henia neganai, hahenamo bona moale bada ita abia.—Aonega Herevadia 19:17; Luka 16:9 duahia.
“Kibi Umui Hiriria Guna Lasi”
18. Eda guba Tamana be ita dekenai “davana” namona ia henia lasi bema dahaka ita karaia?
18 “Umui naria namonamo, namo lasi kara maoromaoro umui karaia taunimanima ese idia itaia totona. Bema unai bamona umui karaia, emui Tamana guba ai ia noho ese umui dekenai davana do ia henia lasi.” (Mat. 6:1, NW ) Iesu ese ia kikilaia “kara maoromaoro” be, Dirava ese ia ura henia karadia. To Iesu ese taunimanima vairanai kara maoromaoro ita hahedinaraia karana ia taravatua, a? Lasi, Iesu be ena hahediba taudia ia hamaoroa, edia “diari taunimanima edia vairana dekenai” do idia hahedinaraia be namo. (Mat. 5:14-16) To bema televisen ai idia hedinarai ladana bada taudia bamona ita karaia, hegeregere ita ura ita karaia gaudia be “taunimanima ese idia itaia” bona ita eda ladana idia abia isi, eda guba Tamana be ita dekenai “davana” namona do ia henia lasi. Momokani, unai bamona taudia be Dirava ena turana lasi bona Basileia henunai hahenamo do idia abia lasi.
19, 20. (a) Iesu ena hereva, “harihari gaudia umui henia neganai, kibi umui hiriria guna lasi,” ena anina be dahaka? (b) Inai hereva, “namo lasi emu imana laurina be emu imana idibana ia karaia gauna ia diba,” anina be dahaka?
19 Lalohadai maorona idia abia taudia be Iesu ena sisiba idia badinaia, ia gwau: “Harihari gaudia umui henia neganai, kibi umui hiriria guna lasi, koikoi taudia ese sinagoga lalonai bona dala dekenai idia karaia bamona, unai amo taunimanima ese do idia hanamodia. Umui lau hamaoroa momokani, Idia be edia davana idia abia vadaeni.” (Mat. 6:2, NW ) Idaunegai, haida be edia “harihari gaudia” amo ogogami taudia idia durua. (Isaia 58:6, 7 duahia.) Iesu bona ena aposetolo taudia be mai edia kontribusen mauana, bona unuseniai idia haboua monidia amo ogogami taudia idia durua. (Ioa. 12:5-8; 13:29) To, ogogami taudia ia durua tauna be kibi ia hiriria lasi. Iesu be unai ia diba dainai, ia gwau ‘harihari gaudia ita henia neganai, kibi ita hiriria guna lasi.’ Iuda ena Farisea taudia edia kara ita tohotohoa lasi. Iesu ia gwau idia be koikoi taudia, badina edia harihari gaudia be “sinagoga lalonai bona dala dekenai” idia henia, taunimanima ese idia itaia totona. Unai koikoi taudia “edia davana idia abia vadaeni.” Bema ta sibona ena ladana ia abia isi bona reana sinagoga vairana kahanai rabi taudia ida ia helai, ia be ena davana ia abia unai bona Iehova be ia dekenai hahenamo ma ta do ia henia lasi. (Mat. 23:6, NW ) To, Iesu ena hahediba taudia ese dahaka idia karaia be namo? Iesu ese idia—bona ita—ia hamaoroa herevana be inai:
20 “To oi, harihari gaudia oi henia neganai, namo lasi emu imana laurina be emu imana idibana ia karaia gauna ia diba. Emu harihari gaudia be hunia ai do oi henia. Vadaeni emu Tamana, hehuni dekenai oi ia itaia tauna ese oi dekenai ahuna do ia henia.” (Mat. 6:3, 4, NW ) Nega momo iseda imana laurina bona idibana be idia gaukara hebou. Unai dainai, Iesu ena hereva, “namo lasi emu imana laurina be emu imana idibana ia karaia gauna ia diba,” anina be ma haida dekenai harihari gaudia ita henia neganai, ia namo lasi taunimanima ibounai, turadia bona ruma bese dekenai unai ita gwauraia hedinarai.
21. Iesu ena hereva, “emu Tamana, hehuni dekenai oi ia itaia tauna ese oi dekenai ahuna do ia henia,” anina be dahaka?
21 Eda harihari gaudia ita hekokorokulaia lasi o heagilaia lasi, to ‘iseda harihari gaudia be hunia ai do ita henia. Vadaeni iseda Tamana, hehuni dekenai ita ia itaia tauna ese ita dekenai ahuna do ia henia.’ Iehova be guba ai ia noho bona taunimanima ese edia matana amo idia itaia diba lasi dainai, ita gwau diba Ia be “hehuni dekenai” ia noho bamona. (Ioa. 1:18) Iesu ena hereva, “emu Tamana, hehuni dekenai oi ia itaia tauna ese oi dekenai ahuna do ia henia,” anina be, Iehova be ita do ia durua Ia ita tura henia noho totona, eda dika do ia gwauatao, bona mauri hanaihanai do ia henia. (Aon. 3:32; Ioa. 17:3; Efe. 1:7) Momokani, unai hahenamo be taunimanima amo ita abia hanamoa ia hanaia!
Ororo Harorona Laloa Bada
22, 23. Dahaka dainai Iesu ena hereva ita laloa bada be namo?
22 Ororo Harorona lalonai be hereva namodia momo idia noho. Unai hereva ese ita dekenai moale ia mailaia diba, herevana nega dikana lalonai ita noho. Momokani, moale ita davaria diba bema Iesu ena hereva ita badinaia, bona eda lalohadai bona kara ita haidaua.
23 Iesu ena hereva “ia kamonai, bona ia karaia tauna” be namo bada do ia davaria. (Mataio 7:24, 25 duahia.) Unai dainai, namona be iseda lalona ita hadaia Iesu ena sisiba ita badinaia totona. Ororo Harorona ena hereva ma haida be stadi gabena ai do ita itaia.
Edena Bamona Do Oi Haere?
• Dahaka dainai ita ia habadua tadikaka ida maino ita karaia be gau badana?
• Eda “matana idibana” be ita ia hahekwakwanaia lasi totona, dahaka ita karaia be namo?
• Harihari gaudia ita henia neganai, dahaka lalohadai ita abia be namo?
[Picture on page 11]
Ita ia habadua tadikaka o taihu ida maino ita karaia be gau badana!
[Pictures on page 12, 13]
Taunimanima dekenai ena gau ia henia tauna be Iehova ese ia hanamoa