5 Edena Gabu Bona Nega Ai?

REANA oi itaia tomadiho momo edia guriguri rumadia be mai edia hairai bona dina ta lalonai do idia guriguri ena nega korikori idia abia hidi. Baibel ese do ita guriguri gabudia bona negadia ia gwauraia hidi, a?

Baibel ese guriguri negana maorona ia herevalaia. Hegeregere, Iesu be ena hahediba taudia danu ia do aniani lasi neganai, guriguri lalonai Dirava ia tanikiu henia. (Luka 22:17) Bona iena hahediba taudia be tomadiho totona idia hebou neganai, idia guriguri. Idia be guna Iuda taudia edia dubu bona Ierusalema ena dubu helagana ai idia karaia guriguri daladia idia badinaia. Dirava ia ura dubu helaga be “bese ibounai edia guriguri Rumana.”​—Mareko 11:17.

Dirava ena hesiai taudia idia hebou bona guriguri neganai, Dirava ese edia guriguri ia haerelaia. Hebou taudia ibounai idia lalotamona, bona ta idia abia hidi Baibel ena hakaua herevadia hegeregerena ai ia guriguri neganai, Dirava do ia moale. Unai guriguri dainai Dirava be idia do ia durua. (Heberu 13:18, 19) Iehova ena Witnes taudia be hanaihanai edia hebou dekenai idia guriguri. Oi ai boiria emu gabu kahirakahira ai ia noho Kingdom Hall ta dekenai oi lao, bona oi sibona ese unai bamona guriguri do oi kamonai.

To, Baibel ese guriguri gabuna bona negana ia gwauraia lasi. Baibel lalonai, Dirava ena hesiai taudia be gabu bona nega idauidau ai idia guriguri ena sivarai ita duahia. Iesu ia gwau: “Oi guriguri neganai oiemu ruma dekenai oi vareai, iduara oi koua, oiemu Tamana, hunia gabuna ia noho dekenai do oi guriguri henia. Vadaeni oiemu Tamana ese hunia gabuna dekenai oi sibona oi karaia gauna ia itaia noho, bona ena davana do ia henia oi dekenai.”​—Mataio 6:6.

Unai be hereva namo hereana, ani? Oi sibona ese guba bona tanobada edia King badana oi hereva henia, nega idauidau ai danu, bona oi diba momokani Ia ese emu guriguri do ia kamonai henia. Iesu be nega momo ia ura sibona ia noho unai amo ia guriguri. Nega ta, Iesu be hanuaboi ibounai lalonai guriguri amo Dirava ena heduru ia tahua, abia hidi badana ta ia karaia totona.​—Luka 6:12, 13.

Baibel ese tatau bona hahine haida ia herevalaia, idia be abia hidi badadia idia karaia o hekwakwanai badadia idia davaria neganai, idia guriguri. Nega haida idia guriguri badabada o edia lalona dekenai idia guriguri; sibona idia noho o haida ida idia noho neganai idia guriguri. Gau badana be idia guriguri. Dirava be ena hesiai taudia ia noia: “Nega ibounai do umui guriguri.” (1 Tesalonika 5:17) Dirava be nega ibounai mai moale ida ena ura idia karaia taudia edia guriguri ia kamonai henia. Unai noinoi herevana ese Iehova ena lalokau ia hahedinaraia, ani?

Oibe, inai tanobada lalonai, momo be guriguri karana idia laloa bada lasi. Reana do oi henanadai, ‘Guriguri karana ese lau do ia durua, a?’