“Lohiabada e, Guriguri Oi Hadibaia Ai Dekenai”
“Iena diba tahua tauna ta ese ia noia, ia gwau, ‘Lohiabada e, guriguri oi hadibaia ai dekenai.’ ”—LUKA 11:1.
1. Dahaka dainai Iesu ena diba tahua tauna ta ese Iesu ia noia idia dekenai guriguri dalana ia hadibaia totona?
LAGANI 32 C.E. ai, nega ta Iesu ena diba tahua tauna ta be Iesu ia guriguri lalonai ia raraia noho. Ia ese Iesu ena guriguri herevana ena Tamana dekenai be ia kamonai lasi, badina Iesu be ena lalona dekenai guriguri ia gwauraia. To, Iesu ia guriguri murinai, unai diba tahua tauna ese ia hereva henia: “Lohiabada e, guriguri oi hadibaia ai dekenai.” (Luka 11:1) Dahaka dainai unai bamona ia noinoi? Iuda taudia edia mauri bona tomadiho lalonai guriguri be hanaihanai idia karaia karana. Heberu Revarevadia, Salamo bona buka ma haida dekenai be guriguri herevadia momo idia noho. Unai dainai, diba tahua tauna be ia diba lasi karana eiava guna ia karaia lasi karana ta dibaia totona ia noinoi lasi. Ita diba ia be Iuda tomadiho gunalaia taudia edia guriguri daladia ia diba namonamo. To hari Iesu ena guriguri dalana ia itaia, bona reana ia itaia rabi taudia edia guriguri koikoidia be Iesu ena guriguri dalana amo ia idau vaitani.—Mataio 6:5-8.
2. (a) Dahaka ese ia hahedinaraia Iesu ia gwau lasi guriguri ena hereva ta ta do ita gwauraia loulou be namo? (b) Dahaka dainai guriguri gwauraia dalana ita dibaia be namo?
2 Hua 18 gunanai, Iesu ese ena Haroro Herevana Badana amo ena hahediba taudia dekenai edia guriguri gwauraia dalana ia hadibaia. (Mataio 6:9-13) Reana unai nega ai unai diba tahua tauna ia noho lasi, unai dainai Iesu ese manau dalanai unai guriguri ena point badadia ia gwauraia lou. Ita itaia gauna be, Iesu ese unai guriguri ena hereva ta ta ibounai ia gwauraia lou lasi, ia hedinarai ia henia gurigurina be ita gwauraia loulou totona ia henia lasi. (Luka 11:1-4) Unai diba tahua tauna hegeregerena, ita danu ita ura guriguri dalana ita dibaia, unai amo ita be Iehova kahirakahira do ita lao. Unai dainai, namona be aposetolo Mataio ese ia torea gurigurina ibounai ita tahua namonamo. Unai guriguri lalonai noinoi herevadia seven idia noho, idia toi be mai anina bada Dirava ena ura dekenai bona foa be iseda tauanina bona lauma gaudia totona. Inai stadi lalonai, ita ese unai noinoi herevadia toi do ita herevalaia guna.
Lalokau Tamana Ta
3, 4. Iehova ita gwauraia “aiemai Tamana” ena anina be dahaka?
3 Matamanai ita itaia bamona, Iesu ese ia hahedinaraia namona be eda guriguri amo ita hahedinaraia Iehova ita tura henia momokani mai hemataurai ida. Ororo ai, Iesu be ia badinai idia helai hahediba taudia edia namo ia laloa bada dainai, idia ia hamaoroa Iehova idia guriguri henia neganai, namona be idia gwau: “Aiemai Tamana e, guba dekenai oi noho.” (Mataio 6:9) Diba bada tauna ta ia gwau, herevana Iesu be Heberu eiava Aramia gado amo inai hereva “Tamana” ia gwauraia, to ia gaukaralaia herevana bona beibi ese tamana do ia boiria ladana be idia hegeregere. Iehova ita gwauraia “aiemai Tamana” neganai, ita hahedinaraia ia ita lalokau henia bona ia be iseda tura namona.
4 Inai hereva “aiemai Tamana” ita gwauraia neganai, ita hahedinaraia ita be ruma bese badana ta lalonai idia noho tatau bona hahine bona ita diba Iehova be Mauri Henia Tauna. (Isaia 64:8; Kara 17:24, 28) Lauma amo ia havaraia lou Keristani taudia be “Dirava ena natuna,” bona ia idia gwauraia diba: “Tamagu e, lauegu Tamana lalokau e!” (Roma 8:14, 15) Taunimanima milioni momo be edia abidadama turadia ai idia lao. Edia mauri be Iehova dekenai idia gwauhamatalaia bona ranu bapatiso amo edia gwauhamata idia hamomokania. Unai “mamoe idaudia” taudia ibounai be Iesu ena ladana amo Iehova idia guriguri henia diba danu, bona Ia idia gwauraia diba “aiemai Tamana.” (Ioane 10:16; 14:6) Hanaihanai guriguri amo iseda guba Tamana ita hanamoa, ita dekenai ia hahedinaraia kara namodia ibounai dainai ia ita tanikiu henia, bona ia dekenai eda lalo-hekwarahi gaudia ita gwauraia hedinarai badina ita diba ita ia laloa bada.—Filipi 4:6, 7; 1 Petero 5:6, 7.
Iehova Ena Ladana Ita Lalokau Henia
5. Iesu ia gwauraia gurigurina ena matamana kahana be dahaka ia gwau, bona dahaka dainai unai be maoro?
5 Iesu ia gwauraia gurigurina ena matamana kahana ai mai anina bada gaudia ia gwauraia guna. Ia gwau: “Oiemu ladana do ai hahelagaia.” (Mataio 6:9) Oibe, Iehova ena ladana hahelagaia karana ita laloa bada be namo, badina be ia ita lalokau henia bona iena ladana idia hadikaia daladia ita inai henia. Satani ia gwau-edeede bona tau bona hahine ginigunadia ia koia Iehova Dirava idia gwau-edeede henia bona Dirava ese guba bona tanobada ia lohiaia siahuna idia henanadailaia neganai, Iena ladana idia hadikaia unai. (Genese 3:1-6) Ma danu, lagani momo lalonai, sibona idia gwauraia Iehova ena gwaukau taudia edia hemarai karadia bona hahediba herevadia amo Iehova ena ladana idia hadikaia.
6. Bema Iehova ena ladana hahelagaia totona ita guriguri, dahaka ita karaia lasi be namo?
6 Iehova ena ladana hahelagaia totona ita guriguri neganai, ita hahedinaraia guba bona tanobada ena lohia siahuna ena hepapahuahu lalonai ita be daika ena kahanai ita gini—ita abia dae vaitani Iehova ese guba bona tanobada ia biagua be maoro. Iehova ia ura mai edia ura bona moale ida iena lohia siahuna maorona idia badinaia taudia ese guba bona tanobada idia noholaia, badina idia ese ia idia lalokau henia bona iena ladana idia hahedinaraia gaudia ibounai idia lalokau henia. (1 Sivarai 29:10-13; Salamo 8:1; 148:13) Iehova ena ladana ita lalokau henia karana ese ita do ia durua, ena ladana helagana hadikaia karana ta ita karaia lasi totona. (Esekiela 36:20, 21; Roma 2:21-24) Guba bona tanobada bona idia noholaia taudia be maino ai idia noho totona, Iehova ena ladana ita hahelagaia bona mai lalokau ida ena lohia siahuna ita badinaia be namo, unai dainai iseda guriguri lalonai ita gwau “oiemu ladana do ai hahelagaia” neganai, ita abia dae Iehova ena ura do ia guguru neganai ia do ita hanamoa.—Esekiela 38:23.
Ita Gurigurilaia Basileiana
7, 8. (a) Iesu ese ita ia hadibaia edena Basileia totona ita guriguri be namo? (b) Daniela bona Apokalupo bukadia ese idia gwauraia Basileiana amo dahaka ita dibaia?
7 Iesu ia gwauraia gurigurina ai, noinoi iharuana be: “Oiemu Basileia do ia mai.” (Mataio 6:10) Inai noinoi herevana be noinoi ginigunana ida ita hakapua. Iehova be Mesia Basileiana, iena guba gavamanina unai, amo ena ladana do ia hahelagaia, bona ena Natuna, Iesu Keriso, be King ai ia halaoa be maoro. (Salamo 2:1-9) Daniela ena peroveta herevana ai Mesia Basileiana be “ororo” ta amo ia toreisi “nadi ta” ese ia laulaulaia. (Daniela 2:34, 35, 44, 45) Ororo be Iehova ena lohia siahuna, guba bona tanobada ai, ia laulaulaia, unai dainai nadi, Basileia unai, be Iehova ena lohia siahuna, guba bona tanobada ai, ia hahedinaraia dala matamatana. Unai peroveta herevana dekenai, unai nadi be ororo badana ai ia lao bona tanobada ibounai ia hahonua, unai ese ia hahedinaraia Mesia Basileiana be Dirava ena lohia siahuna do ia laulaulaia bona tanobada do ia lohiaia.
8 Unai Basileia gavamanina lalonai Keriso idia bamoa taudia ibounai be 144,000, idia be “taunimanima ibounai edia huanai dekena amo Dirava ese idia ia hoia vadaeni” Iesu ida king bona hahelaga gaukara do idia karaia hebou totona. (Apokalupo 5:9, 10; 14:1-4; 20:6) Daniela ia gwau, idia be “Ataiai Momokani Dirava ena helaga taudia,” bona edia Kwarana Keriso ida basileia bona lohia siahuna bona inai tanobada ena bese edia siahu bada do idia abia. “Edia siahu be do ia ore diba lasi, bona basileia ibounai ese Dirava ena hesiai gaukara do idia karaia, bona do idia kamonai henia.” (Daniela 7:13, 14, 18, 27) Keriso ese ena murinai idia raka taudia ia hadibaia, unai guba gavamanina totona idia guriguri be namo.
Dahaka Dainai Ita Guriguri Noho Basileia Do Ia Mai Totona?
9. Dahaka dainai Dirava ena Basileia do ia mai totona ita guriguri be namo?
9 Keriso ia gwauraia gurigurina lalonai ita ia hadibaia, Dirava ena Basileia do ia mai totona ita guriguri be namo. Baibel ena peroveta herevadia idia guguru ese idia hahedinaraia, Mesia Basileiana be lagani 1914 ai guba dekenai idia haginia.a Unai dainai, ita guriguri unai Basileia do ia “mai” totona be namo, a? Oibe. Badina Daniela ena peroveta herevana lalonai, Mesia Basileiana, nadi ta ese ia laulaulaia gauna, be taunimanima edia politikol gavamanidia, kaivakuku ese ia laulaulaia gauna, ia lao henia noho. Nadi be unai kaivakuku do ia lao henia bona do ia botaia bona ia hamakohia maragimaragi, kahu bamona. Daniela ena peroveta herevana, ia gwau: “Unai basileia be Dirava ese do ia naria, vadaeni bese ta ese do ia halusia diba lasi. Bona unai basileia ese basileia ibounai do ia hamakohia, bona haorea momokani, bona ia sibona do ia noho ela bona hanaihanai.”—Daniela 2:44.
10. Dahaka dainai Dirava ena Basileia do ia mai negana ita naria noho be namo?
10 Ita ura Dirava ena Basileia ese Satani ena tanobada dikana ia haorea negana ita itaia, badina unai ese Iehova ena ladana do ia hahelagaia bona Dirava ena lohia siahuna idia dadaraia taudia ibounai do ia kokia. Ita guriguri goadagoada: “Oiemu Basileia do ia mai,” bona aposetolo Ioane ida ita gwau: “Amen. Lohiabada Iesu e, oi mai.” (Apokalupo 22:20) Oibe, namona be Iesu ia mai bena Iehova ena ladana ia hahelagaia bona Iena lohia siahuna ena maoro do ia hamomokania, unai amo salamo torea tauna ena hereva do ia momokani: “Lau ura inai bamona do oi karaia, vadaeni idia be do idia diba oiemu ladana be Iehova. Bona oi sibona, Ataiai Momokani Diravana, ese tanobada oi biagua noho.”—Salamo 83:18.
“Oiemu Ura Gauna Tanobada Dekenai Do Ai Karaia”
11, 12. (a) Bema ita noinoi Dirava ena “ura gauna tanobada dekenai do ai karaia, guba dekenai idia karaia bamona” neganai, ita be dahaka totona ita noinoi? (b) Dirava ena ura do ita karaia totona ita noinoi neganai, unai ena anina be dahaka?
11 Iesu ese ena hahediba taudia ma ia hadibadia inai bamona idia guriguri totona: “Oiemu ura gauna tanobada dekenai do ai karaia, guba dekenai idia karaia bamona.” (Mataio 6:10) Iehova ena ura dainai guba bona tanobada idia noho. Mai edia siahu bada guba taudia idia boiboi: “Aiemai Lohiabada, aiemai Dirava e, oi be hegeregere momokani vadaeni, taunimanima ibounai ese hairai bona mataurai, be oi dekenai do idia henia, bona oiemu siahu henunai do idia noho. Badina gau ibounai be oi ese oi havaraia. Oiemu ura dainai oi karadia, bona oiemu ura dainai idia noho.” (Apokalupo 4:11) Iehova be mai ena palani guba gaudia bona tanobada gaudia totona. (Efeso 1:8-10) Dirava ena ura ia guguru totona ita guriguri neganai, anina be Iehova ita noia ena palani ia hagugurua totona. Danu, ita hahedinaraia ita ura bada Dirava ese guba bona tanobada ibounai dekenai ena ura do ia hagugurua negana ita naria noho.
12 Danu unai bamona ita guriguri neganai, ita hahedinaraia ita ura bada Iehova ena ura do ita badinaia. Iesu ia gwau: “Egu aniani be inai: Lau ia siaia Diravana ena ura do lau karaia, iena gaukara do lau karaia haorea momokani.” (Ioane 4:34) Iesu bamona, ita be gwauhamata Keristani taudia dainai Dirava ena ura ita karaia neganai ita moale. Iehova bona ena Natuna ita lalokau henia karana ese ita ia veria eda mauri lalonai ‘tauanina ena ura dikadia do ita karaia lasi, to Dirava ena ura sibona do ita badinaia’ totona. (1 Petero 4:1, 2; 2 Korinto 5:14, 15) Ita gaukara goada Iehova ia ura lasi karadia ita dadaraia totona. (1 Tesalonika 4:3-5) Baibel duahiduahi bona stadi totona nega ita atoa neganai, ‘Lohiabada ena ura gaudia sibona do ita tahua,’ anina be “Basileia ena Sivarai Namona” do ita harorolaia goadagoada.—Efeso 5:15-17; Mataio 24:14.
Iehova Ena Ura Guba Dekenai
13. Satani ia do gwau-edeede lasi neganai, Dirava ena ura be edena bamona ia guguru?
13 Iehova ena lauma natuna ta ia gwau-edeede bona Satani ai ia do lao lasi neganai, Iehova ena ura be guba ai ia guguru. Aonega Herevadia bukana ai, Dirava ena vara guna Natuna be aonega bamona ia gwauraia. Ia hahedinaraia, ita duahia diba lasi laganidia momo lalonai, Dirava ena Natuna tamona sibona ‘be iena vairana dekenai, ia moale noho nega ibounai,’ bona mai moale ida Tamana ena ura ia karaia. Gabeai, ia be Iehova ena “gaukara karaia [“namonamo,” NW ] tauna” ai ia lao bona “ia dekena amo Dirava ese gau ibounai ia karaia, guba dekenai bona tanobada dekenai. Ita itaia diba gaudia bona ita itaia diba lasi gaudia.” (Aonega Herevadia 8:22-31; Kolose 1:15-17) Iehova ese Iesu be ena Hereva eiava Hereva Gwauraia Tauna ai ia halaoa.—Ioane 1:1-3.
14. Salamo 103 dekenai, aneru ese Iehova ena ura guba dekenai idia karaia dalana amo dahaka ita dibaia?
14 Salamo torea tauna ese ia hahedinaraia Iehova ena lohia siahuna ese gau ibounai ia hereaia, bona aneru iboudiai be ena hadibaia bona oda herevadia idia kamonaia. Ita duahia: “Lohiabada be guba ena King momokani, bona ia be taunimanima, aneru, bona gau ibounai edia biaguna. Lohiabada ena aneru ibounai e, umui be mai emui goada badana. Umui ese Lohiabada ena hereva umui badinaia noho, bona emui taiana umui kehoa noho Lohiabada ena hereva dekenai. Lohiabada ena ladana do umui hanamoa bada. Lohiabada ena hesiai taudia, guba dekenai umui noho, bona Lohiabada ena ura umui karaia noho. Umui ese Lohiabada ena ladana do umui abia isi. Lohiabada ese ia karaia gaudia ibounai, ia ese ia biagua [eiava lohia siahuna] gabu ibounai dekenai umui noho, Lohiabada ena ladana do umui hanamoa bada.”—Salamo 103:19-22.
15. Iesu ese Basileia siahuna ia abia neganai, edena bamona Dirava ena ura guba dekenai ia karaia?
15 Satani ia gwau-edeede murinai, ia be guba dekenai ia do vareai diba, Iobu bukana ena hereva bamona. (Iobu 1:6-12; 2:1-7) To, Apokalupo bukana ia peroveta, nega ta do ia mai bona Satani bona ena demoni be guba dekena amo do idia lulua. Lagani 1914 ai, Iesu Keriso be Basileia siahuna ia abia murinai unai nega ia ginidae. Unai nega amo ema bona hari, unai aneru dikadia be guba ai idia noho lasi. Idia be tanobada ai idia noho. (Apokalupo 12:7-12) Hari, guba ai Iehova ena lohia siahuna hepapahuahulaia karana be lasi, to “Mamoe ena Natuna” Keriso Iesu bona Iehova hanamoa herevadia sibona idia gwauraia. (Apokalupo 4:9-11) Iehova ena ura guba dekenai be ia guguru vadaeni.
Iehova Ena Ura Tanobada Totona
16. Kerisendom edia hahediba herevana, taunimanima edia helaro totona, be Iesu ia gwauraia gurigurina ese edena bamona ia hakoikoia?
16 Kerisendom ena dubu ese Dirava ena ura idia gwauraia neganai, tanobada idia herevalaia lasi, to idia gwau taunimanima namodia ibounai be guba dekenai do idia lao. To Iesu ese ita ia hadibaia inai bamona do ita guriguri: “Oiemu Basileia do ia mai, oiemu ura gauna tanobada dekenai do ai karaia, guba dekenai idia karaia bamona.” (Mataio 6:10) Ita gwau diba inai dagedage, kara gageva, gorere, bona mase amo ia honu tanobadana ai, Iehova ena ura ia guguru, a? Lasi vaitani! Unai dainai, Iehova ena ura tanobada dekenai ia karaia totona ita guriguri goadagoada be namo, aposetolo Petero ese ia gwauraia gwauhamatana hegeregerena: “Dirava ese ia gwauhamata vadaeni, guba matamata [Keriso ese do ia gunalaia Mesia Basileia gavamanina] bona tanobada matamata [kara maoromaoro taudia] do ia havaraia. Inai totona do ita naria noho. Unai gabu dekenai be kara maoromaoro sibona do ia noho.”—2 Petero 3:13.
17. Iehova ese tanobada ia havaraia ena badina be dahaka?
17 Iehova ese tanobada ia havaraia be mai ena badina. Dirava ese peroveta tauna Isaia ia hasiahua bena ia gwau: “Lohiabada ese guba ia karaia. Ia sibona be Dirava! Ia ese tanobada ia karaia, bona tanobada ena toana, be Dirava ese ia henia. Ia ese tanobada ia karaia, goada herea. Ia ese tano do ia noho kava totona ia karaia lasi, to tano mai anina namona, taunimanima idia noholaia diba gabuna, ia karaia. Unai ia karaia Dirava be ia gwau, ‘Lau be Lohiabada, bona dirava ma ta be lasi.’ ” (Isaia 45:18) Dirava ese headava tau bona hahine ginigunadia be paradaiso umana lalonai ia atodia bona ia hadibadia: “Emui bese do umui havaraia, do umui momo herea. Tanobada ena gabu ibounai dekenai do umui noho, bona unai tano do umui biagua.” (Genese 1:27, 28; 2:15) Momokani, Havaraia Tauna ia ura mai moale ida Iehova ena lohia siahuna idia badinaia kara maoromaoro besena be tanobada ai do idia noho, bona Keriso ese ia gwauhamatalaia Paradaisona ai do idia mauri hanaihanai totona.—Salamo 37:11, 29; Luka 23:43.
18, 19. (a) Dirava ena ura be tanobada dekenai ia do hagugurua lasi lalonai, dahaka ita karaia be namo? (b) Iesu ia gwauraia gurigurina lalonai, dahaka be stadi gabena ai do ita herevalaia?
18 Bema Iehova ena lohia siahuna idia dadaraia tatau bona hahine be tanobada ai idia do noho, Iehova ena ura tanobada totona be do ia guguru diba lasi. Dirava be Keriso ena hakaua siahuna henunai idia noho lauma taudia goadadia do ia gaukaralaia, ‘tanobada idia hadikaia vadaeni taudia do ia alaia ore’ totona. Satani ena tanobada dikana mai ena tomadiho koikoi, politikol karadia dikadia, bisinesi taudia mai edia mataganigani bona koikoi, bona ami dikadia do ia haorea vaitani. (Apokalupo 11:18; 18:21; 19:1, 2, 11-18) Iehova ena lohia siahuna ena maoro do ia hamomokania bona ena ladana do ia hahelagaia. Unai ibounai ita gurigurilaia neganai, ita gwau: “Aiemai Tamana e, guba dekenai oi noho, oiemu ladana do ai hahelagaia. Oiemu Basileia do ia mai, oiemu ura gauna tanobada dekenai do ai karaia, guba dekenai idia karaia bamona.”—Mataio 6:9, 10.
19 To, Iesu ia gwauraia gurigurina lalonai, ia hahedinaraia tauanina gaudia totona ita guriguri diba danu. Iesu ese unai guriguri ia herevalaia dalana ma haida be stadi gabena ai do ita herevalaia.
[Footnote]
a Iehova ena Witnes taudia ese idia halasia bukana, Daniela Ena Peroveta Herevana!, ena karoa 6 itaia.
Riviu
• Dahaka dainai Iehova ita gwauraia “aiemai Tamana” be maoro?
• Dahaka dainai iseda guriguri lalonai Iehova ena ladana hahelagaia totona ita guriguri be namo?
• Dahaka dainai Dirava ena Basileia do ia mai totona ita guriguri be namo?
• Dirava ena ura be tanobada ai ia vara, guba ai ia vara hegeregerena ita guriguri neganai, unai ena anina be dahaka?
[Picture on page 15]
Farisea taudia edia guriguri koikoidia be Iesu ena guriguri dalana amo ia idau vaitani
[Picture on page 16]
Keristani taudia idia guriguri Dirava ena Basileia do ia mai, iena ladana idia hahelagaia, bona iena ura idia karaia totona