Iesu Ena Hereva ese Oi Ia Durua Emu Guriguri Oi Hanamoa Totona
“Iesu ena haroro ia hadokoa, bona taunimanima ese iena hadibaia hereva dekenai idia hoa bada.”—MAT. 7:28.
1, 2. Dahaka dainai hutuma be Iesu ena hadibaia dalana dekenai idia hoa?
NAMONA be Dirava ena Natuna, Iesu Keriso ena hereva ita abia dae bona hanaihanai ita badinaia. Iena hadibaia dalana be idau momokani. Unai dainai, taunimanima be Iesu ena Ororo Harorona dekenai idia hoa bada!—Mataio 7:28, 29 duahia.
2 Taravatu hadibaia taudia be goevadae lasi taudia edia hadibaia herevadia amo taunimanima idia hadibaia, to Iehova ena Natuna be unai bamona ia karaia lasi. Keriso be Dirava ena hereva amo taunimanima ia hadibaia dainai, iena hereva be “mai siahu danu.” (Ioa. 12:50) Hari, namona be ita itaia edena dala ai Iesu ena Ororo Harorona ese ita do ia durua eda guriguri ita hanamoa totona.
Koikoi Taudia Bamona Guriguri Lasi
3. Iesu ese Mataio 6:5 ai ia gwauraia point badadia oi gwauraia hedinarai.
3 Guriguri karana be tomadiho momokanina ena kara badana ta, bona hanaihanai Iehova ita guriguri henia be maoro. To namona be Iesu ena Ororo Harorona ese ita ia durua eda guriguri ita hanamoa totona. Ia gwau: “Umui guriguri neganai, koikoi taudia bamona umui karaia lasi, badina be idia ura dubu dekenai bona dala edia huanai idia gini, vadaeni idia guriguri, taunimanima ese idia itaia totona. Umui lau hamaoroa momokani, edia davana ibounai idia abia vadaeni.”—Mat. 6:5.
4-6. (a) Dahaka dainai Farisea taudia idia ura dikadika “dubu dekenai bona dala edia huanai idia gini” bona idia guriguri? (b) Edena dala ai unai koikoi taudia be “edia davana ibounai idia abia vadaeni”?
4 Iesu ena hahediba taudia idia guriguri neganai, Farisea taudia idia tohotohoa lasi be namo. Farisea taudia be “koikoi taudia” bona idia ura taunimanima vairanai idia hahedinaraia idia be kara maoromaoro taudia. (Mat. 23:13-32) Unai koikoi taudia be idia ura dikadika “dubu dekenai bona dala edia huanai idia gini” bena idia guriguri. Dahaka dainai? Badina idia ura “taunimanima ese idia itaia.” Aposetolo edia negai, Iuda taudia be kongrigeisen dekenai idia hebou bona dubu dekenai idia karaia gabua boubouna negadiai idia guriguri (unai be daba 9 o’klok bona adorahi 3 o’klok). Hutuma be dubu ena magu lalonai idia hebou neganai, Ierusalema ai idia noho taudia momo danu be idia ida idia hebou bona idia guriguri. Ierusalema ena magu murimurinai, tomadiho idia laloa bada Iuda taudia be nega momo guriguri totona “dubu dekenai . . . idia gini” bona dina tamona lalonai nega rua idia guriguri.—Luka 18:11, 13 hahegeregerea.
5 Daba 9 o’klok bona adorahi 3 o’klok ena guriguri negadiai, bema momo be dubu o sinagoga kahirakahira idia noho lasi, vadaeni idia noho gabudia dekenai idia gini bona idia guriguri. Haida be idia ura dikadika “dala edia huanai idia gini” bona idia guriguri. Idia ura idia raka hanai taudia ese “idia itaia.” Unai koikoi taudia be “guriguri lata herea idia gwauraia,” unai amo taunimanima ese edia ladana do idia abia isi. (Luka 20:47) Unai koikoi taudia ita tohotohoa lasi.
6 Iesu ia gwau unai koikoi taudia be “edia davana ibounai idia abia vadaeni.” Idia ura dikadika taunimanima ese edia ladana idia abia isi bona hanamoa. Edia davana be unai sibona, badina Iehova ese koikoi taudia edia guriguri do ia haerelaia lasi. To, Dirava be Keriso murinai idia raka taudia momokanidia edia guriguri do ia haerelaia. Iesu ese gabeai ia gwauraia herevana be unai ia hahedinaraia.
7. “Oi guriguri neganai, daiutu lalonai oi vareai bona iduara oi koua” ena anina be dahaka?
7 “To oi guriguri neganai, daiutu lalonai oi vareai bona iduara oi koua murinai, emu Tamana, hehuni dekenai ia noho tauna oi guriguri henia. Vadaeni emu Tamana, hehuni ai oi ia itaia tauna ese oi dekenai ahuna do ia henia.” (Mat. 6:6, NW ) Bema Iesu ia gwau, “oi guriguri neganai, daiutu lalonai oi vareai bona iduara oi koua,” vadaeni kongrigeisen ai guriguri ita gwauraia be kerere, a? Unai be kerere lasi, to Iesu ia ura lasi ma haida vairanai ita guriguri neganai, ita sibona eda ladana ita abia isi. Dirava ena taunimanima vairadiai ita guriguri neganai, Iesu ena sisiba ita laloatao be namo. Danu, Iesu ena sisiba ma ta ita laloa.
8. Mataio 6:7 hegeregerena, edena guriguri daladia ita dadaraia be namo?
8 “Oi guriguri neganai, gau tamona oi herevalaia loulou lasi, tanobada taudia idia karaia bamona. Badina idia laloa hereva momo idia gwauraia dainai, Dirava ese edia guriguri do ia kamonai.” (Mat. 6:7, NW ) Iesu be guriguri gaukaralaia kerere dalana ma ta ia gwauraia lou—Ia gwau, “gau tamona oi herevalaia loulou lasi.” Anina be eda guriguri lalonai ita noinoi loulou o tanikiu loulou be kerere, a? Unai be kerere lasi, badina hanuaboi ginigabena ai, Getesemane umana ai, guriguri lalonai Iesu be “guna ia gwauraia hereva ia gwauraia lou.”—Mar. 14:32-39; NW.
9, 10. Edena dala ai guriguri lalonai gau tamona ita herevalaia loulou be kerere?
9 “Tanobada taudia” ita tohotohoa lasi, badina idia be edia guriguri herevadia idia gwauraia loulou. Idia be hereva haida—anina lasi herevadia danu—idia laloatao bena edia guriguri lalonai idia “herevalaia loulou.” Bala idia tomadiho henia taudia be unai bamona idia karaia—Bala ena ladana idia boiboi, “daba amo ela bona dina tubua idia gwau, ‘Bala e, ai oi haere henia,’ ”—to gau ta ia vara lasi. (1 Kin. 18:26, BHğ) Hari inai negai, milioni momo be guriguri hereva latadia momo idia gwauraia loulou, badina idia laloa “Dirava ese edia guriguri do ia kamonai.” To Iesu ia gwau, Iehova be guriguri latadia o “hereva momo idia gwauraia” loulou taudia edia guriguri ia abia dae lasi. Iesu ma ia gwau:
10 “Idia danu do umui hegeregere lasi, badina be emui Tamana guba dekenai ia noho, be umui ura gaudia ia diba vadaeni, do umui noinoi henia lasi neganai.” (Mat. 6:8) Iuda tomadiho gunalaia taudia momo be idau bese taudia bamona, idia guriguri neganai hereva momo idia gwauraia. To, tomadiho momokani taudia idia guriguri neganai, gau badana be mai edia kudouna ibounai ida hanamoa, noinoi, bona tanikiu herevadia idia gwauraia. (Fili. 4:6) Bema eda guriguri lalonai gau tamona ita herevalaia loulou badina ita laloa Dirava ia laloaboio vadaeni be maoro, a? Lasi. To, namona be ita laloatao ita guriguri henia Diravana be ‘iseda ura gaudia ia diba vadaeni.’
11. Taunimanima vairanai ita guriguri neganai, dahaka ita laloatao be namo?
11 Iesu ese ia hahedinaraia Dirava be guriguri haida ia abia dae lasi dainai, ita ia hadibaia Dirava be eda guriguri latadia eiava hereva hairaidia amo ita hamoalea diba lasi. Danu, ita laloatao taunimanima vairanai ita guriguri neganai, ita ura lasi kamonai taudia be eda ladana idia abia isi, o namo lasi eda guriguri ia lata herea dainai idia maumau edena negai “Amen” do ita gwauraia. Guriguri lalonai kamonai taudia ita hadibaia o sisiba henia be maoro lasi, bona unai be Iesu ese Ororo Harorona ai ia gwauraia dalana hegeregerena lasi.
Iesu ese Guriguri Dalana Ia Hadibaia
12. Inai hereva “oiemu ladana do oi hahelagaia” ena anina mani oi herevalaia.
12 Ena be Iesu be guriguri gaukaralaia kerere karana ia sisibalaia, to ena hahediba taudia dekenai guriguri dalana ia hadibaia. (Mataio 6:9-13 duahia.) Vadaeni, unai guriguri herevadia ita laloatao bona ita gwauraia loulou be namo, a? Lasi, to unai ese ita ia durua eda guriguri karana ita hanamoa totona. Hegeregere, Iesu ena guriguri matamanai, ia be Dirava ia gwauraia guna: “Aiemai Tamana e, guba dekenai oi noho, oiemu ladana do oi hahelagaia.” (Mat. 6:9, NW ) Iehova ita gwauraia “aiemai Tamana” be maoro, badina Ia be eda Havaraia Tauna, bona Ia be ‘guba dekenai ia noho.’ (Deu. 32:6; 2 Siv. 6:21; Kara 17:24, 28) Inai hereva “aiemai” ita gaukaralaia, badina ita laloatao eda tadikaka taihu danu be Dirava idia tura henia. Inai hereva, “oiemu ladana do oi hahelagaia” anina be ita noinoi Iehova sibona be ena ladana do ia hahelagaia, badina Eden lalonai gwau-edeede ia vara negana amo ema bona hari, taunimanima be Iehova ena ladana idia hadikaia noho. Unai guriguri hegeregerena, Iehova be tanobada amo kara dika taudia ia kokia neganai, ia sibona be ena ladana do ia hahelagaia.—Ese. 36:23.
13. (a) Edena dala ai inai noinoi ena anina do ia guguru: “Oiemu basileia do ia mai”? (b) Inai hereva Dirava ena “ura gauna tanobada dekenai do ia vara” ena anina be dahaka?
13 “Oiemu basileia do ia mai. Oiemu ura gauna tanobada dekenai do ia vara, guba dekenai ia vara bamona.” (Mat. 6:10, NW ) Unai guriguri dainai, namona be ita laloatao “basileia” be guba Mesia gavamanina, bona Keriso bona idia toreisi lou “helaga taudia” ese do idia lohiaia. (Dan. 7:13, 14, 18; Isa. 9:6, 7) Inai hereva “basileia do ia mai” ita gwauraia neganai, anina be ita noinoi Dirava ena Basileia do ia mai tanobada ai Dirava ena lohia siahuna idia dadaraia taudia ia kokidia totona. Kahirakahira unai ia vara neganai, unai ese dala do ia kehoa tanobada paradaisona lalonai kara maoromaoro, maino bona noho namona ia vara totona. (Sal. 72:1-15; Dan. 2:44; 2 Pet. 3:13) Iehova ena ura be guba ai ia vara vadaeni, to ita noinoi iena “ura gauna tanobada dekenai do ia vara” anina be Dirava ita noia hari inai negai Ia idia inai henia taudia do ia kokia, idaunegai ia karaia hegeregerena.—Salamo 83:1, 2, 13-18 duahia.
14. Dahaka dainai inai bamona ita guriguri be maoro: “Ai dekenai hari dina ena aniani oi henia”?
14 “Mani ai dekenai hari dina ena aniani oi henia.” (Mat. 6:11, NW; Luka 11:3, NW ) Unai bamona ita guriguri neganai, anina be Dirava ita noia “hari dina” do ita ania gauna ia henia totona. Unai amo ita hahedinaraia ita abia dae momokani Iehova be dina ta ta ai ita dabu gaudia ia henia diba. Unai bamona guriguri lalonai gau momo ita noia be anina lasi. Unai guriguri dainai ita laloatao, Dirava be Israela taudia ia oda henia “dina ta ta do idia raka lao, dina tamona ena aniani [mana] do idia haboua.”—Eso. 16:4.
15. Iehova ese eda dika ia gwauatao totona, dahaka ita karaia be namo?
15 Iesu ena guriguri amo ita karaia gauna ma ta ita diba be namo. Ia gwau: “Emai kara dika oi gwauatao, ai dekenai idia kara dika taudia ai gwauatao bamona.” (Mat. 6:12, NW ) Iehova be iseda dika do ia gwauatao bema ita ese ma haida ‘edia dika ita gwauatao.’ (Mataio 6:14, 15 duahia.) Unai dainai, ma haida edia dika ita gwauatao be namo.—Efe. 4:32; Kol. 3:13.
16. Mataio 6:13 ena hereva ruaosi edia anina be edena bamona ita lalopararalaia?
16 “Ai oi durua unai amo hedibagani lalonai do ai vareai lasi. To, Dika Tauna amo ai oi hamauria.” (Mat. 6:13, NW ) Unai guriguri ena anina be edena bamona ita lalopararalaia? Gau badana be ita laloparara, Iehova be ita ia tohoa lasi. (Iamesi 1:13 duahia.) Satani—“Dika Tauna”—be “Hedibagani Tauna.” (Mat. 4:3, NW ) Unai dainai ita guriguri, “ai oi durua unai amo hedibagani lalonai do ai vareai lasi” anina be Iehova ita noia ita ia durua hahetoho lalonai ita moru lasi totona. Guriguri dokonai, inai noinoi “Dika Tauna amo ai oi hamauria” ia gwauraia, anina be Iehova ita noia ita ia durua Satani ita halusia totona. Bona ita diba momokani Dirava be ‘ita do ia naria, iseda goada ia hanaia dibagani ese ita do ia pidia garina.’—1 Korinto 10:13 duahia.
Noinoi Noho, Tahua Noho, Bona Iduara Dekenai Pidipidi Noho
17, 18. Iesu ena sisiba ‘do umui noinoi noho, bona do umui tahua noho’ anina be dahaka?
17 Aposetolo Paulo ese ena tadikaka ia hagoadaia: “Guriguri do umui goadalaia nega ibounai.” (Roma 12:12) Iesu ma ia gwau: “Do umui noinoi noho, bona umui dekenai do idia henia. Do umui tahua noho, bona do umui davaria, bona iduara dekenai do umui pidipidi noho, bena do idia kehoa. Badina idia noinoi taudia ibounai be do idia abia, bona idia tahua taudia ibounai be do idia davaria, bona iduara dekenai idia pidipidi taudia ibounai dekenai iduara do idia kehoa.” (Mat. 7:7, 8, NW ) Bema ita gurigurilaia gaudia be Dirava ena ura hegeregerena, vadaeni ita “noinoi noho” be maoro. Iesu ena hereva hegeregerena, aposetolo Ioane ia gwau: “Dirava ita abidadama henia dainai, ita diba momokani, bema gau ta iena ura hegeregerena ita noia neganai, ia ese ita dekenai do ia kamonai.”—1 Ioa. 5:14.
18 Iesu ena sisiba ‘do umui noinoi noho, bona do umui tahua noho’ anina be inai: Namona be guriguri karana dekenai ita hesiku lasi. Danu, ‘iduara dekenai do ita pidipidi noho’ be namo, unai amo Basileia ese do ia mailaia hahenamo idauidau do ita moalelaia. To ita abia dae momokani Dirava be eda guriguri do ia haerelaia, a? Oibe, Iehova ita abidadama henia, badina Keriso ia gwau: “Idia noinoi taudia ibounai be do idia abia, bona idia tahua taudia ibounai be do idia davaria, bona iduara dekenai idia pidipidi taudia ibounai dekenai iduara do idia kehoa.” Iehova ena hesiai taudia edia ekspiriens namodia momo ese idia hamomokania Iehova be “guriguri kamonai henia Diravana.”—Sal. 65:2, BHğ.
19, 20. Mataio 7:9-11 ena hereva hegeregerena, edena dala ai Iehova be tamana lalokauna ta bamona?
19 Iesu ia gwau Iehova be tamana namona ta bamona Iena natudia dekenai gau namodia ia henia. Mani oi laloa oi be Iesu badinai oi helai, bona Ororo Harorona oi kamonai noho! Vadaeni Iesu ia gwau: “Bema umui ta ena natuna mero be paraoa totona ia noinoi, ia dekenai nadi do ia henia, a? Eiava gwarume totona ia noinoi neganai, ia dekenai gaigai do ia henia, a? Unai dainai, bema umui kara dika taudia ese emui natudia dekenai harihari gaudia namodia umui henia diba, namona be umui diba momokani, emui Tamana, guba ai ia noho ese gau namodia be idia noinoi taudia dekenai do ia henia!”—Mat. 7:9-11, NW.
20 Tamana ta—ena be Adamu dainai ia be mai ena “kara dika”—be ena natuna ia lalokau henia. Iena natuna do ia koia lasi, to ia hekwarahi natuna dekenai “gau namodia” ia henia totona. Iseda guba lalokau Tamana Iehova be unai bamona, “gau namodia” hegeregere ena lauma helaga be ita dekenai ia henia. (Luka 11:13) Lauma helaga ese ita ia hagoadaia diba dala maorona ai Iehova ita hesiai henia totona. Momokani, Iehova be “gau namodia ibounai, bona harihari gaudia namodia momokani ibounai” ia Henia Tauna.—Iam. 1:17.
Iesu Ena Hereva Ena Namo Ita Abia Noho
21, 22. Dahaka dainai Ororo Harorona be idau momokani, bona Iesu ena hereva be edena bamona oi laloa?
21 Tanobada hegegemadai Ororo Harorona be hereadae. Unai haroro herevana be Dirava ena sivarai ia gwauraia goevagoeva. Inai stadi toi amo ita dibaia point ese idia hahedinaraia, bema Ororo Harorona ai idia noho sisiba ita badinaia, namo bada do ita abia. Unai haroro herevana ese iseda mauri ia hanamoa diba, hari bona vaira negana ai danu.
22 Inai stadi lalonai, ita be Iesu ena Ororo Harorona ena hereva namodia haida sibona ita itaia. Momokani, unai haroro idia kamonai taudia be Iesu ena “hadibaia hereva dekenai idia hoa bada.” (Mat. 7:28) Ita danu be Iesu ena hereva do ita hoalaia bema eda lalona bona kudouna be unai Tau Hereadaena, Iesu Keriso, ena hereva hereadaedia amo ita hahonua.
Emu Haere be Dahaka?
• Iesu ese koikoi taudia edia guriguri be edena bamona ia herevalaia?
• Ita guriguri neganai, dahaka dainai gau tamona ita gwauraia loulou be namo lasi?
• Iesu ena guriguri lalonai dahaka noinoi idia noho?
• Edena dala ai ita noinoi noho, ita tahua noho, bona iduara dekenai ita pidipidi noho?
[Picture on page 15]
Iesu ese koikoi taudia ia gwau henidia, badina idia guriguri taunimanima ese idia itaia eiava kamonai henidia totona
[Picture on page 17]
Oi diba dahaka dainai hari dina ena aniani totona ita guriguri be namo, a?