Basileia Ena Sivarai Namona—Ia be Dahaka?
Lagani gunanai, tano 235 lalodiai, matamata bona buruka taudia 6,035,564 ese hora 1,171,270,425 idia gaukaralaia ma haida dekenai ia idia herevalaia totona. Uduna amo ia idia gwauraia sibona lasi, to idia printaia buka bona magasin milioni 700 mai kahana amo taunimanima dekenai idia harorolaia bona idia gwauraia hedinarai. Danu, kaset teipi bona vidio kaset tausen momo idia hariharilaia amo ia idia harorolaia. “Ia” be dahaka?
“IA” BE Dirava ena Basileia ena sivarai namona. Momokani, taunimanima edia histori ibounai lalonai, hari ita itaia “Basileia ena Sivarai Namona” harorolaia karana be gaukara bada hereana.—Mataio 24:14.
Unai tanobada ibounai haroro gaukarana bona hadibaia gaukarana idia karaia taudia ibounai be volantia taudia. Tanobada ena diba amo unai taudia idia laloa neganai, reana edia toana be idia hegeregere lasi unai gaukara idia karaia totona. Vadaeni, dahaka dainai idia gari lasi bona idia kwalimu? Basileia ena sivarai namona ena siahu be gau badana, badina ia ese taunimanima dekenai do ia mailaia hahenamodia ia sivarailaia. Taunimanima ese unai bamona hahenamo idia ura idia abia—moale, moni ena hekwakwanai idauidau be lasi, gavamani namona, maino bona noho namona, bona taunimanima momo idia laloa lasi gauna ta idia ura danu—mauri hanaihanai! Momokani mauri ena anina bona badina idia tahua taudia dekenai, unai be sivarai namona. Oibe, unai hahenamo ibounai bona ma momo oi abia diba bema idia harorolaia Basileia ena sivarai namona oi kamonai henia bona kara ta oi karaia.
Basileia be Dahaka?
To, sivarai namona bamona idia harorolaia Basileiana be dahaka? Taunimanima milioni momo idia hadibaia unai Basileia idia gurigurilaia totona, idia diba vadaeni herevadia do idia gaukaralaia, inai bamona: “Aiemai Tamana e, guba dekenai oi noho, oiemu ladana do ai hahelagaia. Oiemu Basileia do ia mai, oiemu ura gauna tanobada dekenai do ai karaia, guba dekenai idia karaia bamona.”—Mataio 6:9, 10.
Lagani 2500 mai kahana gunanai, Heberu peroveta tauna Daniela be unai Basileia ia herevalaia, ia gwau: “Guba ena Dirava ese basileia ta do ia haginia, inai basileia be do idia hadikaia diba lasi ela bona hanaihanai. Unai basileia be Dirava ese do ia naria, vadaeni bese ta ese do ia halusia diba lasi. Bona unai basileia ese basileia ibounai do ia hamakohia, bona haorea momokani, bona ia sibona do ia noho ela bona hanaihanai.”—Daniela 2:44.
Unai dainai, sivarai namona be Dirava ena Basileia, eiava gavamani, be kara dika ibounai do ia haorea bena maino dalana ai tanobada ibounai do ia lohiaia. Unai ese Dirava ena ura ginigunana taunimanima bona tanobada totona be do ia havaraia momokani.—Genese 1:28.
“Dirava Ena Basileia be Kahirakahira Ia Mai”
Kahirakahira lagani 2,000 gunanai, Basileia ena sivarai namona be nega ginigunana taunimanima vairanai idia harorolaia. Gwauhamata ia badinaia bona iena toana bona kara be taunimanima ese idia hoalaia tauna ese ia harorolaia. Unai tau be Ioane Bapatiso, Iuda hahelaga tauna Sekaraia bona ena adavana, Elisabeta, edia natuna merona. Peroveta tauna Elia ese Ioane ia laulaulaia, bona ia bamona, Ioane ena dabua be kamelo ena huina bona ena gaba gauna be boromakau ena kopina. To, ia gwauraia sivaraina ese momo edia lalona ia veria. Ia gwau: “Emui lalona umui giroa, badina be Dirava ena Basileia be kahirakahira ia mai.”—Mataio 3:1-6.
Ioane ena hereva idia kamonai henia taudia be Iuda taudia, sibona idia gwauraia Dirava momokanina, Iehova, tomadiho henia taudia unai. Lagani 1,500 bamona gunanai, unai bese be Mose ena amo Taravatu gwauhamatana idia abia. Ierusalema dekenai dubu namo hereana be ia gini noho, ma unuseniai Taravatu hegeregerena edia boubou gaudia idia henia noho. Iuda taudia idia laloa Dirava ena matanai edia tomadiho be maoro.
To, Ioane idia kamonai henia lalonai, taunimanima haida idia lalo-parara matamaia edia tomadiho be maoro lasi. Greek mauri dalana bona lalohadai ese Iuda tomadiho ena hahediba herevadia ia haidaua. Taunimanima idia abia dae herevadia bona sene karadia dainai, Dirava ese Mose amo ia henia taravatu idia hadikaia, eiava anina lasi gauna ai idia halaoa. (Mataio 15:6) Edia kudouna ia auka bona idia hebogahisi lasi tomadiho gunalaia taudia ese idia hakaudia kerere dainai, Dirava ese idia momo edia tomadiho karana ia abia dae lasi. (Iamesi 1:27) Unai dainai Dirava idia kara dika henia bona Taravatu gwauhamatana idia utua karana amo idia helalo-kerehai be namo.
Unai neganai, Iuda taudia momo be gwauhamata Mesiana, eiava Keriso, ena hedinarai negana idia naria noho, bona haida idia laloa ia be Ioane, idia gwau: “Sedira Ioane be Keriso o?” To, Ioane ia gwau ia be Keriso lasi, bona tau ma ta ia herevalaia, ia gwau: “Lau be namo lasi iena tamaka varona do lau ruhaia.” (Luka 3:15, 16) Ioane ese iena hahediba taudia ia hakaua lao Iesu dekenai, ia gwau: “Itaia, Dirava ena Mamoe Natuna ia mai inai, ia be tanobada ena dika kokia tauna.”—Ioane 1:29.
To unai be sivarai namona, badina Ioane be taunimanima ibounai dekenai mauri bona moale abia dalana—Iesu, “tanobada ena dika kokia tauna”—ia gwauraia hedinarai. Adamu bona Heva be iseda tubudia dainai, taunimanima ibounai be kara dika bona mase ena igui lalonai idia noho. Roma 5:19 ia gwau: “Tau tamona [Adamu] ese Dirava ia kamonai henia lasi dainai, taunimanima momo be kara dika taudia idia halaoa, unai bamona danu, tau tamona [Iesu] ena kamonai dainai, taunimanima momo be do idia maoromaoro Dirava ena vairanai.” Iesu, idia bouboulaia mamoena ta bamona, be ‘dika do ia kokia’ bona taunimanima edia mauri dikana do ia hanamoa momokani. Baibel ia gwau: “Kara dika ena davana be mase, to Dirava ena harihari gauna davana lasi be mauri hanaihanai, Iesu Keriso iseda Lohiabada lalonai ita noho dainai.”—Roma 6:23.
Tau goevadaena—oibe, tau hereadaena—Iesu be sivarai namona ia harorolaia. Baibel ena sivarai ta Mareko 1:14, 15 ai, ia gwau: “Ioane Bapatiso idia atoa dibura ruma dekenai murinai, Iesu ia lao Galilea dekenai, Dirava ena Sivarai Namona ia harorolaia. Ia haroro, ia gwau, ‘Harihari be Dirava ena nega, bona Dirava ena Basileia be kahirakahira ia ginidae. Umui emui lalona umui giroa, Sivarai Namona umui abidadama henia.’ ”
Iesu ena hereva idia kamonaia bona sivarai namona idia abidadama henia taudia ia hanamoa bada. Ioane 1:12 ia gwau: “Taunimanima haida ese [Iesu] dekenai idia abidadama henia. Vadaeni inai ia dekenai idia abia dae taudia dekenai siahu ia henia, idia be Dirava ena natudia idia lao totona.” Idia be Dirava ena natudia dainai, mauri hanaihanai ena hahenamo do idia abia.—1 Ioane 2:25.
To aposetolo taudia edia negai idia noho taudia sibona be Basileia ena hahenamo do idia abia lasi. Guna ai herevalaia hegeregerena, hari tanobada hegegemadai Dirava ena Basileia ena sivarai namona be taunimanima ibounai dekenai idia harorolaia bona hadibaia. Unai dainai Basileia ena hahenamo ita abia noho diba. Unai hahenamo idauidau oi abia totona, dahaka oi karaia be namo? Hereva gabena ese do ia haerelaia.