‘Solomona Ena Dabua be Herahera ta Ena Hairai Hegeregerena Lasi’
AFRICA ena saut kahana dekenai, inai rau ai idia hedinarai flaoaflaoa be nega momo dala badinai do oi itadia. Unai flaoaflaoa idia gwauraia cosmos, bona idia be America ena siahu gabudia dekenai idia tubu. Unai flaoaflaoa mai edia hairai dainai, reana Iesu ia hadibaia herevana ta ita laloa. Iesu ena hereva idia kamonai taudia momo be ogogami taudia, bona idia be edia tauanina durua gaudia, aniani bona dabua idia laloa momo.
Iesu ia henanadai: “Dahaka dainai dabua totona umui laloa momo? Tano ena herahera edia tubu dalana mani umui itaia, idia gaukara lasi, dabua idia turia lasi; to umui lau hamaoroa, Solomona be mai ena kohu momo, to iena dabua be herahera ta ena hairai hegeregerena lasi.”—Mataio 6:28, 29.
Iesu ese edena bamona flaoaflaoa ia herevalaia neganai lalohadai idauidau idia vara. To, Iesu be momo idia diba tubutubu gauna ida ia hahegeregerea, ia gwau: “Oibe, tano ena avadia, hari idia noho, bona kerukeru lahi dekenai do idia negea, to Dirava ese unai gaudia edia hairai ia henia. Be, ia ese umui dekenai danu dabua do ia henia namonamo lasi a? Umui abidadama maragimaragi taudia e!”—Mataio 6:30.
Ena be cosmos flaoaflaoa be Israela dekenai ia tubu lasi, to idia ese Iesu ia hadibaia herevana idia hamomokania diba. Herevana gabu daudauna eiava kahirakahira amo unai flaoaflaoa oi itaia, to idia be mai edia hairai bada bona foto abia taudia bona laulau torea taudia ese idia ura henia bada. Momokani, Iesu be inai hereva ia ura hahedinaraia, “Solomona be mai ena kohu momo, to iena dabua be herahera ta ena hairai hegeregerena lasi” herevana, be ia gwauraia kava lasi.
Hari inai negai, unai ese ita dekenai dahaka ia hadibaia? Namona be Dirava idia hesiai taudia idia diba momokani, metau negadia ai Dirava ese idia do ia durua edia mauri durua gaudia idia abia totona. Iesu ia gwau: “Dirava ena Basileia do umui tahua, vadaeni unai gaudia ibounai [hegeregere aniani bona dabua] danu be do ia henia umui dekenai.” (Luka 12:31) Oibe, hahenamo korikoridia be Dirava ena Basileia tahua karana amo idia mai. To, Dirava ena Basileia be dahaka bona taunimanima totona do ia karaia gauna oi diba, a? Iehova ena Witnes taudia do idia moale bada oi idia durua Baibel amo haere oi davaria totona.