Iesu be Hel Ia Herevalaia, A?

Iesu ia gwau: “Bema oiemu matana ese kara dika ia karaia, oi kokia, namo oi be matana tamona tauna, bona oi vareai lao Dirava ena Basileia dekenai. Badina ia namo lasi oiemu matana rua idia noho, to oi vareai lao hel dekenai. Unai gabuna dekenai, ‘gaigai maragi idia mase lasi, lahi danu ia bodo lasi.’ ”​​—⁠MAREKO 9:​47, 48.

Ma nega ta ai, Iesu ia gwau kara dika taudia do ia hahemaoro henidia neganai, ia gwau: “Lau dekena amo umui raka siri, lahi do ia bodo lasi lalonai do umui lao, ia gabua hegaegae vadaeni, Satani danu mai ena aneru danu edia.” Danu, ia gwau unai taudia be “davana ia dika hanaihanai gabuna dekenai do idia lao.”​​—⁠MATAIO 25:​41, 46.

NEGA ginigunana unai siri rua ita duahia neganai, toana be Iesu ese taunimanima ia hadibaia hel be lahi gabuna ta. To ita diba, Iesu be ia ura lasi Dirava ena Hereva ia hakoikoia, badina Hadibaia Tauna 9:5 dekenai ia gwau: “Mase taudia be gau ta idia diba lasi.”

Vadaeni, Iesu ia gwau mase tauna be do ia “vareai lao hel dekenai” ena anina be dahaka? Iesu ese ia herevalaia “lahi do ia bodo lasi” gauna be lahi korikorina o laulau herevana ta sibona? Edena dala ai kara dika taudia be “davana ia dika hanaihanai gabuna dekenai do idia lao”? Namona be unai henanadai ta ta edia haere ita tahua.

Iesu ia gwau tau ta be do ia “vareai lao hel dekenai” ena anina be dahaka? Mareko 9:​47 ai idia gaukaralaia Greek gado herevana be Geʹen·na, to Baibel momo ese unai hereva idia hahanaia “hel.” Geʹen·na be Heberu gado herevana Geh Hin·nomʹ amo ia mai, bona ena anina be “Hinoma ena Koura.” Hinoma ena Koura be Ierusalema hanua gunana ena magu murimurinai ia noho. Israela ena king taudia edia lohia negana ai, unai gabu dekenai natudia idia bouboulaia. Dirava be unai kara ia ura lasi momokani. Unai dainai, Ia gwau unai gabu dekenai tomadiho koikoi idia karaia taudia do ia hamasedia ore. Vadaeni, unai koura ena ladana do idia hatoa “Taunimanima Alaia ena Koura” bona mase taudia be do idia guria lasi. (Ieremia 7:​30-​34) Unai amo ita itaia, Iehova ia gwau Hinoma ena Koura be mauri taudia hahisia gabuna lasi, to idia mase taudia edia tauanina idia negea gabuna.

Iesu ena negai, Ierusalema hanua taudia ese Hinoma ena Koura be momoru negea gabuna ai idia halaoa. Unai gabu dekenai hanua taudia ese kara dika o raskol taudia edia mase tauanidia idia negea bona lahi be ia bodo lasi, unai momoru bona mase tauanidia ia gabua ore totona.

Iesu ese idia mase diba lasi gaigai maragi bona ia bodo diba lasi lahi ia gwauraia neganai, ia be Isaia 66:24 ena hereva ia gwauraia lou. Isaia ia gwau: “[Dirava idia] dagedage henia taudia edia mase tauanidia do idia itaia. Badina be biluga be do idia mase lasi, bona unai tauanidia ia gabua noho lahi be do ia bodo lasi.” Iesu bona iena hereva idia kamonai taudia idia diba, Isaia ese idia guria lasi mase tauanidia dekenai ia vara gauna ia herevalaia.

Unai dainai, Iesu ese Hinoma ena Koura o Gehena ia gwauraia be maoro, badina unai ese toreisi lou be lasi eiava mase hanaihanai ia laulaulaia. Iesu be unai point ia hahedinaraia namonamo badina ia gwau, Dirava be “lauma bona tauanina ruaosi lahi ia araia gabuna [Gehena] dekenai do ia alaia mase diba.” (Mataio 10:28) Gehena be mase hanaihanai ia laulaulaia, to ia be hisihisi abia hanaihanai karana ia herevalaia lasi.

Iesu ese “lahi do ia bodo lasi” herevana ia gwauraia neganai, unai be lahi korikorina o laulau herevana ta? Mani oi itaia, Mataio 25:41 ai Iesu ia gwau “lahi do ia bodo lasi” be “ia gabua hegaegae vadaeni, Satani danu mai ena aneru danu edia.” Oi laloa lahi korikorina be lauma taudia ia gabua diba, a? Eiava Iesu ese “lahi” be laulau dalanai ia gaukaralaia? Momokani, unai karoa tamona lalonai ia herevalaia “mamoe” bona “nanigosi” be laulau sibona o idia be mamoe bona nanigosi korikoridia lasi, to idia be taunimanima edia orea rua idia laulaulaia. (Mataio 25:​32, 33) Laulau dalanai Iesu ese ia herevalaia ia bodo diba lasi lahina be kara dika taudia do ia gabua ore.

Edena dala ai kara dika taudia be “davana ia dika hanaihanai gabuna dekenai do idia lao”? Ena be Baibel momo ai Mataio 25:46 dekenai inai hereva “panisi” idia gaukaralaia, to Greek gado herevana koʹla·sin ena anina korikorina be “au edia tubu dalana idia sekea” o idia ura henia lasi rigidia idia utua karana ia herevalaia. Unai amo ita itaia, mamoe bamona taudia be mauri hanaihanai idia abia, to idia helalo-kerehai lasi nanigosi bamona taudia be mauri amo do idia utua bamona.

Emu Lalohadai be Dahaka?

Iesu ese ma haida ia hadibaia taunimanima be mai edia mase diba lasi lauma, a? Lasi. To, Iesu ese kamonai taudia dekenai, mase taudia be do idia toreisi lou herevana ia hadibaia. (Luka 14:​13, 14; Ioane 5:​25-​29; 11:​25) Vadaeni, bema Iesu ia abia dae lauma be ia mase lasi, dahaka dainai ia gwau mase taudia be do idia toreisi lou?

Iesu be taunimanima dekenai ia gwau Dirava be kara dika taudia do ia hahisidia ela bona hanaihanai, a? Lasi, to Iesu be ia gwau: “Dirava ese inai tanobada ia lalokau henia bada dainai, iena Natuna tamona sibona ia vara, ia henia vadaeni ita dekenai, do idia abidadama henia taudia ibounai be do idia mase lasi, to mauri hanaihanai do idia abia.” (Ioane 3:​16) Dahaka dainai Iesu ia gwau ia idia abidadama henia lasi taudia be do idia mase? Bema ena hereva ena anina be kara dika taudia be do idia mase lasi, to hel lahina dekenai hisihisi do idia abia, vadaeni dahaka dainai unai bamona ia hereva lasi?

Hel be hisihisi gabuna ena hahediba herevana be Baibel ena hahediba herevana lasi. To, ia be Dirava momokanina idia diba lasi tomadiho oreadia ese koikoi dalanai Keristani hahediba herevana ta ai idia halaoa. (Maua “Hel Ena Histori Kwadogina,” rau 6 dekenai itaia.) Dirava be hel dekenai taunimanima ia hahisia ela bona hanaihanai lasi. Oi laloparara hel be hahediba hereva koikoina neganai, unai ese edena bamona emu lalohadai Dirava dekenai ia haidaua?

[Box on page 6]

HEL ENA HISTORI KWADOGINA

DIRAVA KOIKOIDIA IDIA TOMADIHO HENIA TAUDIA AMO IA MAI: Idaunegai Aigupito taudia idia abia dae hel be lahi gabuna. Lagani 1375 B.C.E. ai idia torea bukana ta (The Book Ȧm-Ṭuat) ia gwau, taunimanima be “hel ena lahi gurina lalonai do idia negea; bona . . . unai gabu amo do idia heau boio diba lasi, bona . . . lahi hururuna amo idia heau diba lasi.” Greek ena aonega tauna Plutarch (c.46-​120 C.E.) ese mase taudia edia gabu be inai bamona ia gwauraia: “Unai gabu dekenai idia noho taudia be hisihisi bada idia mamia dainai idia taitai bona lolo badabada noho.”

IUDA TOMADIHO ESE HEL ENA HAHEDIBA HEREVANA IDIA ABIA DAE: Histori torea tauna Josephus (37-​c.100 C.E.) ia gwau, Iuda tomadiho oreana ta ladana, Essene idia abia dae “lauma ia mase diba lasi, to ia noho hanaihanai.” Ma ia gwau: “Unai be Greek taudia edia lalohadai bamona . . . Kara dika laumana ia mase neganai, ia be dibura bona gari gabuna ta dekenai ia lao, bona unuseniai panisi ia abia ela bona hanaihanai.”

KERISTANI TOMADIHO KOIKOI OREADIA ESE IDIA ABIA DAE: Lagani 100 C.E. ai, gori bukana ta (Apocalypse of Peter) ese kara dika taudia be inai bamona ia herevalaidia: “Idia totona ia bodo diba lasi lahina ia araia noho.” Ma ia gwau: “Ezrael, dagedage aneruna, ese tatau bona hahine edia tauanina kahana ia gabua bona dibura gabuna dekenai ia negedia bona dagedage laumana ta ese idia ia panisia.” Unai nega lalonai danu, Antioka toretore tauna Theophilus ese Greek peroveta hahinena Sibyl ena hereva, kara dika taudia panisia herevana unai, ia gwauraia lou: “Umui emui latanai lahi do ia diho mai, bona dina ta ta ai umui be lahi ese do ia gabua.” Theophilus ia gwau unai hereva be “momokani, maoro bona taunimanima ibounai do ia durua.”

HEL LAHINA IDIA GAUKARALAIA DAGEDAGE KARADIA KARAIA TOTONA: England edia kwini, Mary Namba 1 (1553-​1558), ena ladana ma ta be “Bloody Mary” idia hatoa, badina ia ese Protestan taudia 300 bamona be lahi amo ia gabudia, bona ia gwau: “Dubu ena hereva idia dadaraia taudia edia lauma be hel lahina lalonai do idia gabua hanaihanai dainai, Dirava ena badu karana do lau tohotohoa bona tanobada ai lahi amo idia do lau gabua.”

HEL ENA ANINA HAIDAUA: Vanegai lagani lalodiai, tomadiho oreadia haida be hel ena hahediba herevana idia haidaua. Hegeregere, lagani 1995 ai, Doctrine Commission of the Church of England, ia gwau: “Hel be hisihisi abia hanaihanai gabuna lasi, to taunimanima be Dirava ese ia inai henia dalana ta idia abia hidi bona edia kara idia haidaua lasi dainai, Dirava ese do ia hamasedia vaitani bona do idia toreisi lou lasi.”

[Box/Picture on page 7]

LAHI GOHUNA BE DAHAKA?

Apokalupo 20:10 ia gwau Satani be ‘lahi gohuna’ dekenai do idia negea diho bona ‘unuseni hisihisi do ia abia dina bona hanuaboi, ela bona hanaihanai.’ Bema Diabolo be hisihisi do ia abia hanaihanai, vadaeni Dirava ese Satani do ia hamasea lasi, a? Lasi, Baibel ia gwau Iesu ese Satani do ia “moia diho.” (Roma 16:20) Unai lahi gohuna be “mase iharuana” ia laulaulaia. (Apokalupo 21:⁠8) Unai mase be Adamu ena kara dika dainai ia vara mase ia herevalaia lasi, badina Adamu ena kara dika dainai idia mase taudia be do idia toreisi lou. (1 Korinto 15:​21, 22) To, Baibel ia gwau lasi ‘lahi gohuna’ lalonai idia negea taudia be do idia toreisi lou, unai dainai “mase iharuana” ena anina be idau​—⁠unai be mase hanaihanai, toreisi lou be lasi.

Vadaeni, edena dala ai ‘lahi gohuna’ lalonai idia lao taudia be hisihisi idia abia hanaihanai? Nega haida Greek gado herevana “hisihisi” ena anina be “koua.” Hegeregere, nega ta Iesu be demoni haida ia lulua neganai, idia lolo idia gwau: “Aiemai nega be dohore, ai dekenai hisihisi henia [guri dobu masemase dekenai ai koua] totona oi mai vadaeni, a?” (Mataio 8:​29; Luka 8:​30, 31) Unai ese ia hahedinaraia, ‘gohu’ dekenai “hisihisi” idia abia taudia ibounai be unuseniai do idia koua hanaihanai o “mase iharuana” do idia abia.