Iehova Abidadama Henia mai Lalogoada Ida
“Lohiabada dekenai do umui abidadama henia. Do umui laloa goada, daradara lasi. Lohiabada dekenai do umui abidadama henia.”—SALAMO 27:14.
1. Dahaka dainai helaro be mai anina bada?
HELARO korikorina be diari ta bamona. Helaro ese ita ia durua hari inai nega lalonai ita davaria hekwakwanai ita haheaukalaia, bona mai gari lasi bona moale ida vaira negana ita naria totona. Iehova ese Baibel amo ita dekenai helaro korikorina ia henia diba. (2 Timoteo 3:16) Momokani, inai hereva helaro, ena anina be ta be gau namona ta ia naria noho mai ena ura bada ida. Unai be lalohadai kavakavana ta sibona lasi.
2. Edena dala ai Iesu ena helaro ese ia ia durua?
2 Iesu be hahetoho bona nega aukadia ia davaria neganai, ia be vaira negana ia laloa bona Iehova ia abidadama henia. “Iesu be satauro dainai ia hesiku lasi. Lasi momokani. Ia diba guba ena moale be iena vairanai ia noho dainai, ia ese satauro ena hemarai bona ena mase ia laloa lasi. Bona hari ia be Dirava ena helai gabuna badana ena idiba kahanai ia helai noho.” (Heberu 12:2) Iesu be Iehova ena lohia siahuna do ia abia isi bona Iena ladana do ia hanamoa karana ia laloa bada. Unai dainai ena be Iesu ese hahetoho ia davaria, to Dirava badinaia karana ia rakatania lasi.
3. Dirava ena hesiai taudia edia mauri lalonai, helaro ese edena dala ai idia ia durua?
3 King Davida ese ia hahedinaraia abidadama eiava helaro bona lalogoada be idia gaukara hebou, ia gwau: “Lohiabada dekenai do umui abidadama henia. Do umui laloa goada, daradara lasi. Lohiabada dekenai do umui abidadama henia.” (Salamo 27:14) Bema ita ura iseda kudouna ia goada, namo lasi iseda helaro ita laloa maragi, to nega ibounai ita laloa noho. Bema unai bamona ita karaia, unai ese ita ia durua Iesu ese ia hahedinaraia lalogoada bona ura bada karana ita tohotohoa totona. Bona Iesu ese ena hahediba taudia dekenai ia henia hahegani ita badinaia diba. (Mataio 24:14; 28:19, 20) Momokani, Dirava ena hesiai taudia edia mauri lalonai abidadama, lalokau bona helaro be mai anina bada.—1 Korinto 13:13, NW.
“Dirava Ena Nega Namona” Oi Naria Noho, A?
4. Horoa oreana bona “mamoe idaudia” be dahaka idia naria noho?
4 Dirava ena taunimanima be vaira negana namona idia naria noho. Horoa Keristani taudia be mai ura ida Keriso ida guba ai do idia lohia negana idia naria noho, bona “mamoe idaudia” edia helaro be “kara dika ena igui amo do ia ruhadia bona Dirava ena natudia edia ura kwalimu hereadaena do idia abia.” (Ioane 10:16; Roma 8:19-21, NW; Filipi 3:20) Unai “ura kwalimu hereadaena” be kara dika bona ia havaraia dika idauidau amo ita ia ruhaia karana. Momokani, Iehova—‘gau namodia bona harihari gaudia ibounai’ ia Henia Tauna—be iena kamonai hesiai taudia dekenai gau namodia sibona do ia henia.—Iamesi 1:17; Isaia 25:8.
5. Edena dala ai iseda “helaro” ia goada diba?
5 Dahaka dainai iseda Keristani abidadama be mai anina bada? Roma 15:13 ia gwau: “Dirava be iseda abidadama [“helaro,” NW ] ena badina korikori dainai ia dekenai ita naria noho. Ia ese umui emui abidadama dainai, moale momokani bona maino momokani do ia henia umui dekenai. Inai dainai umui ese Dirava ena nega namona umui naria dalana, be do ia tubu daekau noho, Lauma Helaga ena siahu dekena amo.” Oibe, helaro dainai, ta ena mauri lalonai maino bona moale ia havaraia, bona ia diba ena mauri be mai anina bona ia lalogoada. Dirava ena Hereva ita abidadama henia bona lauma helaga ita abia neganai, iseda “helaro” do ia goada. Roma 15:4 ia gwau: “Buka Helaga dekenai idia torea hereva be ita dekenai hadibaia totona idia torea, vadaeni do ita gini goada, bona Dirava ena namo [“helaro,” NW ] dekenai do ita naria, mai haheauka danu.” Sibona oi nanadaia: ‘Baibel lau duahia hanaihanai dainai, egu helaro lau laloa bada, a? Hanaihanai lau guriguri Dirava ena lauma lau abia totona, a?’—Luka 11:13.
6. Iseda helaro ita laloa bada noho totona, dahaka dekenai ita naria namonamo be namo?
6 Iseda Haheitalai Tauna, Iesu Keriso, be Dirava ena Hereva ese ia hagoadaia. Bema Iesu ena kara ita laloa, do ita ‘hesiku lasi bona do ita manoka lasi.’ (Heberu 12:3) Bema Dirava ese ia henia helaro ita laloa bada lasi, bona reana kohu eiava sibona eda tahua gaudia ma haida ita laloa bada, unai ese iseda hetura karana Iehova ida do ia hadikaia diba. Unai nega ai, iseda “abidadama ia dika, vanagi be davara nadi dekenai ia kamokau, bona ia dika bamona.” (1 Timoteo 1:19) To, helaro korikori ese iseda abidadama ia hagoadaia.
Abidadama be mai Anina Bada
7. Iseda abidadama ia goada totona, edena dala ai helaro be mai anina bada?
7 Baibel ia gwau: “Abidadama ena anina be inai bamona: Ita daradara lasi, to ita diba momokani, Dirava ena davana namona ita naria kava lasi. Matana dekenai ita itaia lasi, to iseda lalona ia diba momokani, inai gauna do ita abia.” (Heberu 11:1) Unai dainai, abidadama ia goada totona, helaro be mai anina bada. Aberahamo mani oi laloa. Iehova ia gwauhamata, Aberahamo bona ena adavana Sara be natuna ta do idia abia, to taunimanima edia lalohadai dekenai idia be idia buruka vadaeni bona natuna ta idia havaraia diba lasi. (Genese 17:15-17) Aberahamo be dahaka ia karaia? “Aberahamo ia diba lasi edena bamona Dirava ese unai iena gwauhamata gaudia do ia karaia, to ia ese Dirava dekenai ia abidadama henia momokani, daradara ta lasi. Unai dainai ia be bese momo herea edia tamana Dirava ese ia halaoa.” (Roma 4:18) Oibe, Aberahamo be Dirava ese ia henia helarona ia abidadama henia dainai, ia diba momokani natuna ta do ia abia. Iena abidadama ese iena helaro ia hagoadaia. Aberahamo bona Sara be mai lalogoada ida edia hanua bona varavara idia rakatania, tano idauna ai palai ruma ai idia noho totona!
8. Edena dala ai haheauka karana ese iseda helaro ia hagoadaia?
8 Aberahamo be Iehova ena hereva ibounai ia badinaia, ena be nega haida unai bamona ia karaia be auka. (Genese 22:2, 12) Unai hegeregerena, bema Iehova ita badinaia bona iena hesiai gaukara lalonai ita haheauka, davana namona do ita abia. Paulo ia gwau, ita “haheauka” neganai, unai ese helaro do ia havaraia, bona unai helaro “ese lalohisihisi ia havaraia lasi.” (Roma 5:4, 5; NW ) Unai dainai Paulo ia gwau: “Ai ura bada umui ta ta ese unai bamona do umui karaia goadagoada noho, ela bona emui mauri dokona. Badina be unai neganai, umui naria noho davana namona, mauri hanaihanai, do umui abia momokani.” (Heberu 6:11) Unai bamona lalohadai maorona ita abia badina Iehova ita tura henia namonamo, unai ese ita ia durua diba mai lalogoada bona moale ida metau negadiai ita haheauka totona.
‘Naria Noho mai Moale Danu’
9. Iseda “helaro” ia goada noho totona, hanaihanai dahaka ita karaia be namo?
9 Dirava ese ita dekenai ia henia helaro be tanobada ena kohu ibounai ia hereaia momokani. Salamo 37:34 ia gwau: “Lohiabada dekenai do oi naria, iena dala dekenai do oi raka. Unai neganai ia ese oi dekenai ia henia tano, be do oi dogoatao diba, bona Lohiabada ese tau dikadia do ia hadikaia ore neganai, oi ese inai kara do oi itaia.” Oibe, “mai moale danu” iseda helaro ita dogoatao noho. (Roma 12:12) To unai ita karaia totona, hanaihanai iseda helaro ita laloa noho be namo. Oi be hanaihanai unai bamona oi karaia, a? Paradaiso ai do oi gorere lasi, gau ta dainai do oi lalohekwarahi lasi, emu lalokau taudia huanai do oi noho, bona gaukara namona do oi karaia. Unai oi lalohadailaia vadaeni, a? Iseda buka bona magasin dekenai idia noho paradaiso laulaudia oi laloa dobu, a? Unai nega namodia ita laloa loulou be namo. Bema unai bamona ita karaia, unai be hegeregere, iseda uindo ena murimuriai ia tubu au badana be gabu ena toana ia koua, to ita utua bona negea dainai, gabu ena toana ita itaia namonamo diba. Bema unai au ita utua lasi, gabu ena toana bona ena hairai do ita moalelaia lasi. Bona gau ma haida ese iseda lalona idia veria diba. Namo lasi ita dekenai unai ia vara!
10. Dahaka dainai iseda davana namona ita laloa noho karana ese iseda hetura karana Iehova ida ia hanamoa?
10 Iehova ita hesiai henia ena badina badana be lalokau. (Mareko 12:30) To, namona be iseda davana namona be mai ura ida ita raraia noho. Iehova ia ura unai bamona do ita karaia! Heberu 11:6 ia gwau: “Tau ta bema Dirava ia abidadama henia lasi neganai, ia hegeregere lasi Dirava ena ura do ia badinaia. Badina be bema tau ta be Dirava kahirakahira ia ura lao neganai, ia ese Dirava do ia abidadama henia guna, Dirava be ia mauri noho. Bona unai tau ena abidadama be inai bamona: Dirava idia tahua taudia ibounai, be davana namona Dirava ese do ia henidia.” Dahaka dainai Iehova ia ura ita abia dae Ia be davana namona ia henia Tauna? Badina bema unai ita abia dae, ita hahedinaraia iseda guba Tamana ita diba namonamo. Ia be hariharibada Diravana bona Iena natudia ia lalokau henia. Mani oi laloa, bema “vaira negana bona helaro” ia henia lasi, do ita moale lasi bona do ita lalohisihisi haraga diba.—Ieremia 29:11.
11. Edena dala ai Dirava ese ia henia helarona ese Mose ia durua ena abia hidi ia karaia totona?
11 Mose be haheitalai namona ta, badina Dirava ese ia henia helarona ia laloa bada. Ia be “Farao natuna hahine ena natuna” dainai, ia be siahu, ladana bada, bona Aigupito ena kohu ibounai ia abia diba. Mose be unai gaudia do ia tahua, eiava Iehova do ia hesiai henia? Mose be mai lalogoada ida Iehova hesiai henia karana ia abia hidi. Dahaka dainai? Badina “Dirava do ia henia davana namona ia laloa.” (Heberu 11:24-26) Oibe, Mose be Iehova ese do ia henia helaro namona ia laloa bada.
12. Dahaka dainai iseda helaro be tuari kwara gauna bamona?
12 Aposetolo Paulo ese iseda helaro be tuari kwara gauna ida ia hahegeregerea. Badina tuari kwara gauna ese iseda lalona ia gimaia, unai amo abia hidi namodia ita karaia, mai anina bada gaudia ita atoa guna, bona Dirava do ita badinaia. (1 Tesalonika 5:8) Oiemu tuari kwara gauna be nega ibounai oi atoa, a? Bema oibe, Mose bona Paulo bamona, namona be ‘tanobada ena kohu do ita abidadama henia lasi, to Dirava sibona do ita abidadama henia,’ badina ‘Dirava ese ita ia hamoalea totona, gau momo ita dekenai ia henia davana lasi.’ Momokani, namona be sibona emu ura gaudia, taunimanima momo ese idia karaia gaudia oi dadaraia totona lalogoada oi hahedinaraia, unai amo namo bada do oi davaria! Oibe, Iehova idia abidadama henia bona lalokau henia taudia ese idia naria vaira negana ena hahenamo, be gau ta ida oi hahegeregerea diba lasi.—1 Timoteo 6:17, 19.
“Lau ese Umui Do Lau Negea Lasi”
13. Iehova be ena kamonai hesiai taudia dekenai dahaka gwauhamata ia henia?
13 Inai tanobada idia abidadama henia taudia be edia vaira negana idia laloa namonamo be namo, badina “hisihisi nega” be ia dika ia lao noho. (Mataio 24:8) To Iehova idia abidadama henia taudia be idia gari lasi. Idia be do idia “noho namonamo, gari ta lasi.” (Aonega Herevadia 1:33) Badina idia be inai tanobada ena kohu idia abidadama henia lasi, to Paulo ena sisiba idia badinaia: “Moni do umui ura henia dikadika lasi. To umui dekenai ia noho gauna, be inai bamona do umui laloalaia, ‘Lau dekenai noho gauna be namo, ia hegeregere vadaeni.’ Badina be Dirava be inai bamona ia hereva, ia gwau: ‘Lau ese umui do lau negea lasi, bona umui do lau rakatania lasi. Lasi bona lasi momokani.’ ”—Heberu 13:5.
14. Dahaka dainai Keristani taudia be tauanina durua gaudia dekenai idia lalohekwarahi bada lasi be namo?
14 Ita diba momokani Iehova ese ita do ia rakatania lasi. Iesu be Iehova ese ita ia laloa bada karana ia herevalaia: “To umui ese Dirava ena Basileia bona iena kara maoromaoro do umui tahua guna, vadaeni unai gau ibounai [tauanina durua gaudia] danu umui dekenai dohore ia henia. Umui emui lalona do idia hekwarahi lasi kerukeru totona. Badina be kerukeru ese sibona ena metau do ia huaia.” (Mataio 6:33, 34) Iehova ia diba iena Basileia ita tahua goadagoada karana be mai ena hekwarahi, badina tauanina dalanai sibona eda maduna ita huaia danu be namo. Unai dainai namona be ita diba momokani Iehova ese iseda dabu gaudia do ia henia.—Mataio 6:25-32; 11:28-30.
15. Edena dala ai Keristani taudia edia “matana ia namo”?
15 Bema iseda “matana ia namo,” ita hahedinaraia Iehova dekenai ita tabekau. (Mataio 6:22, 23) Matana ia namo anina be ta be mai momokani ida ia kara, ia mataganigani lasi bona sibona ia laloa bada lasi. Namo lasi ita laloa ena anina be ogogami maurina do ita noholaia eiava iseda Keristani maduna do ita huaia lasi. Lasi, to ena anina be Iehova ena hesiai gaukara ita atoa guna dainai, “laloa maoromaoro” karana ita hahedinaraia.—2 Timoteo 1:7, NW.
16. Iseda matana ia namo totona, dahaka dainai abidadama bona lalogoada be mai anina bada?
16 Iseda matana ia namo totona, lalogoada bona abidadama ita hahedinaraia be namo. Hegeregere, bema emu gaukara biaguna ia ura Keristani hebou negadiai oi gaukara, dahaka do oi atoa guna, Dirava ena ura eiava tauanina gaudia? Iehova ia gwauhamata iena hesiai taudia do ia naria. To, bema ta be unai dekenai ia daradara, Satani ese ena lalona do ia veria bona unai bamona tauna be hebou lao henia karana do ia hadokoa. Oibe, bema ita ese Iehova ita abidadama henia lasi, unai ese dala do ia kehoa Satani ese ita ia biagua totona, bena iena ura gaudia be iseda mauri lalonai do ita atoa guna, to Iehova ena lasi. Unai ese dika bada do ia havaraia!—2 Korinto 13:5.
“Iehova Dekenai Do Oi Naria”
17. Hari inai negai, Iehova ese Ia idia abidadama henia taudia be edena bamona ia hanamodia?
17 Baibel ese ita ia hadibaia loulou Iehova idia abidadama henia taudia be do idia kwalimu. (Aonega Herevadia 3:5, 6; Ieremia 17:7) Momokani, nega haida edia kohu be momo lasi, to unai idia laloa bada lasi, idia laloa bada gauna be nega vaira ai do idia moalelaia hahenamo idauidau. Idia hahedinaraia idia be “Lohiabada dekenai idia naria” bona idia diba momokani Ia ese ena kamonai hesiai taudia edia ura gaudia namodia do ia henia. (Salamo 37:4, 34) Unai dainai, hari idia do moale noho. “Kara maoromaoro tauna ese ia diba, do ia abia gauna be moale momokani, to kara dika tauna ese, do ia naria noho gauna be anina lasi.”—Aonega Herevadia 10:28.
18, 19. (a) Iehova be dahaka hagoadaia herevana ia henia? (b) Dahaka ita karaia diba, unai amo Iehova be iseda “imana idibana ai” do ia noho?
18 Mero maragina ta be ena tamana ena imana ia dogoatao bona idia raka hebou neganai, do ia gari lasi. Unai hegeregerena, ita be iseda guba Tamana ida ita raka neganai, do ita gari lasi. Iehova ese Israela taudia ia hamaoroa: “Do umui gari lasi, lau be umui dekenai lau noho! . . . Umui do lau durua. . . . Lau be Lohiabada, emui Dirava. Lau ese umui lau hagoadaia noho [“emui imana idibana lau dogoatao noho,” NW ], lau gwau, ‘Do umui gari lasi, lau ese umui do lau durua.’ ”—Isaia 41:10, 13.
19 Iehova ese ta ena imana ia dogoatao karana ita laloa neganai, ita dekenai hemami namona ia havaraia! Davida ia gwau: “Nega ibounai lau diba, Lohiabada be lau dekenai ia noho. Ia be lau kahirakahira [“egu imana idibana ai,” NW ] dainai, gau ta ese lau ia hagaria lasi.” (Salamo 16:8) Dahaka ita karaia diba, unai amo Iehova be iseda “imana idibana ai” do ia noho? Gau rua ita karaia diba. Ginigunana be, iseda mauri lalonai Iena Hereva ita badinaia; bona gau iharuana be, Iehova ese ita dekenai do ia henia hahenamo namo hereana ita laloa. Salamo torea tauna Asapa ia gwau: “Lau be nega ibounai oi kahirakahira lau noho, bona oi ese egu imana oi dogoatao noho. Oi ese oiemu sisiba dekena amo lau oi hakaua noho. Dokona neganai oi ese lau do oi abia dae, guba ena hairai dekenai.” (Salamo 73:23, 24) Unai bamona hereva ese ita ia hagoadaia vaira negana ita laloa noho totona.
“Emui Hamauria be Ia Kahirakahira Vadaeni”
20, 21. Nega vaira ai, Iehova idia abidadama henia taudia be dahaka hahenamo do idia moalelaia?
20 Dina ta ta ai, Iehova be iseda imana idibana ai ia noho be gau badana. Daudau lasi, tomadiho koikoi ibounai do idia hadikaia ore, bena Satani ena tanobada dekenai hisihisi bada herea do ia vara, Dirava ese tanobada ia karaia negana amo hisihisi unai bamona ta ia vara lasi, bona gabeai do ia vara lou lasi. (Mataio 24:21) Abidadama lasi taudia be do idia gari dikadika. To, unai daradara bada negana ai, mai lalogoada ida Iehova idia hesiai henia taudia be edia helaro dainai do idia moale! Iesu ia gwau: “Inai gaudia do idia vara hamatamaia neganai, be emui kwarana do umui abia isi. Badina be umui emui hamauria be ia kahirakahira vadaeni.”—Luka 21:28.
21 Namona be Dirava ese ita dekenai ia henia helaro dainai ita moale, bona Satani ena koikoi karadia ita dadaraia. To danu, namona be ita hekwarahi abidadama, lalokau, bona Dirava gari henia karana ita hahedinaraia totona. Unai bamona ita karaia neganai, ena be iseda noho dalana be edena bamona, to Iehova do ita badinaia noho bona Satani do ita dadaraia. (Iamesi 4:7, 8) Oibe, “Lohiabada ena nega namona umui naria noho taudia ibounai e, do umui goada, do umui boga auka.”—Salamo 31:24.
Oi Haere Diba, A?
• Edena dala ai Iesu ena helaro ese ia ia durua lalogoada karana ia hahedinaraia totona?
• Edena dala ai abidadama bona helaro be idia gaukara hebou?
• Edena dala ai helaro bona abidadama ese Keristani tauna ia durua diba mai lalogoada ida ena mauri lalonai abia hidi maorodia ia karaia totona?
• Dahaka dainai Iehova idia abidadama henia taudia be vaira negana idia abidadama henia diba?
[Picture on page 30]
Herevana oi be matamata eiava buruka, emu lalona ena matana ai oi sibona oi itaia diba oi be Paradaiso ai oi noho, a?