Iesu ese Dirava Ena Kara Maoromaoro Ia Hahedinaraia

“Dirava ese Iesu ia abia hidi, ia be do ia mase, vadaeni iena rarana ia bubua, be idia abidadama henia taudia edia dika do ia gwauatao. Dirava ese inai bamona ia karaia, iena kara maoromaoro hedinaraia totona.”​—⁠ROMA 3:⁠25.

1, 2. (a) Adamu ena kara dika dainai taunimanima dekenai dahaka ia vara? (b) Inai stadi lalonai edena henanadai do ita herevalaidia?

BAIBEL lalonai Eden umana ai ia vara gwau-edeede karana ena sivarai be momo idia diba. Ita ibounai be Adamu ena kara dika dainai ita mase, inai siri ena hereva bamona: “Tau tamona dekena amo kara dika ia vareai mai tanobada dekenai, bona iena kara dika ese mase ia mailaia. Unai dainai mase be taunimanima ibounai ese idia abia, badina ibounai be mai edia kara dika.” (Roma 5:12) Unai dainai ena be ita hekwarahi kara maoromaoro ita badinaia totona, to kara dika ita karaia, bona Iehova ese iseda dika ia gwauatao be namo. Aposetolo Paulo danu ia gwau: “Kara namodia lau ura karaia neganai, be lau karaia diba lasi. Bona kara dikadia lau ura lasi karaia neganai, be lau karaia inai. Lau madi o! Lau be dika momokani inai!”​—⁠Roma 7:​19, 24.

² Inai stadi lalonai ita be inai henanadai do ita herevalaidia: Edena dala ai Nasareta tauna Iesu ia vara neganai, ia be goevadae tauna, bona dahaka dainai ia bapatiso be maoro? Edena dala ai Iesu ena mauri dalana ese Iehova ena kara maoromaoro ia hahedinaraia? To, mai anina bada henanadai be inai: Iesu ena mase ese dahaka namo ia havaraia?

Satani ese Iehova Ena Kara Maoromaoro Lohia Siahuna Ia Hepapahuahulaia

3. Edena dala ai Satani ese Heva ia koia?

³ Adamu bona Heva be Dirava ena lohia siahuna idia dadaraia bona “idaunegai gaigaina, . . . iena ladana be Diabolo bona Satani” ena lohia dalana idia abia dae. (Apok. 12:⁠9) Unai ia vara dalana mani ita laloa. Satani ia gwau Iehova ena lohia dalana be ia maoro lasi. Satani ese Heva ia nanadaia: “Momokani, uma gabu ena au huahua ta ania lasi taravatu Dirava ese ia atoa o lasi?” Heva ia gwau Iehova ese idia ia hagania au huahua ta be do idia ania lasi, bema idia ania do idia mase. Bena Satani ese Dirava ena hereva ia hakoikoia, ia gwau: “Inai be momokani lasi, dohore umui mase lasi.” Ia ese Heva ia koia dainai Heva ia laloa Dirava be ia amo gau namona ta ia hunia, bona bema ia ese unai au huahua ia ania, ia be Dirava ida do ia hegeregere bona ia sibona ese kara namo bona kara dika ia abia hidi diba.​—⁠Gen. 3:​1-5.

4. Edena dala ai Satani ese taunimanima ia lohiaia matamaia?

⁴ Satani ia gwau bema taunimanima be sibodia idia lohiaia, do idia moale. Adamu be Dirava ena lohia siahuna maorona ia abia isi lasi, to ia ese adavana ena hereva ia kamonai bona au huahua ia ania. Unai amo Adamu ese ena hetura karana Dirava ida ia hadikaia, bona ita dekenai kara dika bona mase ia henia hanai. Unai idia karaia neganai, taunimanima be Satani, “inai tanobada ena dirava” ena lohia henunai idia noho matamaia.​—⁠2 Kor. 4:4; Roma 7:⁠14.

5. (a) Edena dala ai Iehova ena hereva be ia momokani? (b) Dirava ese Adamu bona Heva edia natudia totona dahaka hahemauri dalana ia hegaegaelaia?

⁵ Iehova ena hereva be ia momokani. Adamu bona Heva be edia gwau-edeede karana dainai, gabeai idia mase. (Gen. 3:​16-19) To unai ese Iehova ena palani ia haidaua lasi. Iehova ese Adamu bona Heva ia hahemaoro henia neganai, edia natudia totona hahemauri dalana ta ia hegaegaelaia. Iehova ia gwau “garana” ta do ia havaraia bona Satani ese unai “garana” ena aena geduna do ia haberoa. To, unai garana ena bero be do ia namo lou bona Satani ena ‘kwarana do ia botaia.’ (Gen. 3:​15, BHğ) Baibel ese Iesu Keriso ena maduna be inai bamona ia gwauraia: “Dirava ena Natuna ia hedinarai ena badina korikori be inai: Satani ena kara dika do ia haorea momokani.” (1 Ioa. 3:⁠8) To, edena dala ai Iesu ena kara bona mase ese Iehova ena lohia siahuna ia abia isi?

Iesu Ena Bapatiso Ena Anina

6. Edena dala ai ita diba Iesu ia vara neganai ia be goevadae tauna?

⁶ Iesu be goevadae tauna, guna Adamu bamona. (Roma 5:14; 1 Kor. 15:45) To, edena dala ai Iesu ia vara neganai ia be goevadae tauna? Aneru ladana Gabriela ese Iesu ena sinana Maria ia hamaoroa: “Lauma Helaga be oi dekenai do ia diho, bona Dirava ena siahu oi dekenai do ia atoa. Vadaeni, oi dekena amo do ia vara, inai mero helagana, be Dirava ena Natuna do idia gwauraia.” (Luka 1:35) Iesu be ia do maragi neganai Maria ese ia dekenai ena vara dalana ena sivarai haida ia hadibaia. Unai dainai nega ta Maria bona Iosepa be dubu helaga dekenai mero maragina Iesu idia davaria neganai, Iesu ese idia ia nanadaia: “Umui diba lasi egu Tamana ena ruma be lauegu noho ruma, a?” (Luka 2:49) Unai ese ia hahedinaraia Iesu be do mero maragi neganai ia diba ia be Dirava ena Natuna. Unai dainai, Iesu ia diba ena tamana ena ladana ia hahelagaia karana be mai anina bada.

7. Iesu be goevadae tauna dainai, dahaka ia karaia diba?

⁷ Iesu be tomadiho karana ia laloa bada dainai nega ibounai dubu helaga dekenai hebou totona ia lao. Iena harana be goevadae dainai, Heberu Toretoredia amo ia duahia bona kamonai gaudia ibounai ia lalopararalaia. (Luka 4:16) Danu, iena tauanina be ia goevadae dainai, taunimanima hamauridia totona ia bouboulaia diba. Ia bapatiso neganai reana ena guriguri lalonai ia be Salamo 40:​6-8 ena peroveta herevana ia laloatao.​—⁠Luka 3:21; Heberu 10:​5-10 duahia.

8. Dahaka dainai Ioane Bapatiso ia ura lasi Iesu ia bapatisoa?

⁸ Matamanai, Ioane Bapatiso ia ura lasi Iesu ia bapatisoa. Dahaka dainai? Badina Ioane ese Mose ena Taravatu idia utua bona idia helalo-kerehai Iuda taudia sibona ia bapatisoa. To, Ioane be Iesu ena kasin dainai, ia diba Iesu be kara maoromaoro tauna bona ia helalo-kerehai be anina lasi. Iesu ese Ioane Bapatiso ia hamaoroa do ia bapatisoa be namo, ia gwau: “Mani oi karaia, badina be inai bamona dala dekenai Dirava ena ura gauna be do ita karaia.”​—⁠Mat. 3:⁠15.

9. Iesu ena bapatiso ena anina be dahaka?

⁹ Iesu ia diba ia be goevadae tauna dainai, reana ia laloa Adamu bamona goevadae natudia ia havaraia diba. To, Iesu be unai bamona ia laloa lasi, badina unai be Iehova ena ura lasi. Dirava ese tanobada dekenai Iesu ia siaia ena badina be gwauhamata garana o Mesia ena maduna ia hagugurua totona. Unai ia karaia totona, Iesu ese ena mauri goevadaena do ia bouboulaia. (Isaia 53:​5, 6, 12 duahia.) Momokani, Iesu ena bapatiso ena anina be iseda bapatiso amo ia idau. Iesu ia bapatiso neganai, ia be Dirava dekenai gwauhamata ia karaia lasi, badina ia be Dirava dekenai idia gwauhamata vadaeni Israela besena lalonai ia vara. To, Iesu ena bapatiso anina be, sibona ia henia Iehova ena ura ia karaia totona, unai amo ia ese Baibel ai Mesia totona idia perovetalaia herevadia ia hagugurua diba.

10. Iesu be Mesia ena maduna huaia totona dahaka ia karaia, bona ena hemami be edena bamona?

¹⁰ Iehova ia ura Iesu be: Dirava ena Basileia ena sivarai namona do ia harorolaia, hahediba taudia halaoa gaukarana do ia karaia, bona ena hahediba taudia dekenai haroro dalana do ia hadibaia. Iesu ia bapatiso neganai, ia hahedinaraia ia be mai ena ura ida dagedage bona mase do ia haheaukalaia, unai amo Iehova Dirava ena kara maoromaoro lohia siahuna do ia abia isi. Ena guba Tamana ia lalokau henia bada dainai, mai moale ida sibona ia henia Dirava ena ura ia karaia bona taunimanima ia hamauridia totona ena mauri goevadaena ia bouboulaia. (Ioa. 14:31) Iesu ia moale badina Dirava dekenai ia henia boubou goevadaena ese kara dika bona mase ena igui amo ita ia ruhaia diba. Iehova ese Iesu ena boubou gauna ia abia dae, a? Oibe!

11. Edena dala ai Iehova ia hahedinaraia Iesu be Gwauhamata Mesiana o Keriso?

¹¹ Evanelia bukadia foa ese idia hahedinaraia, Iesu be Ioridane Sinavaina amo ia daekau neganai, Iehova Dirava ese ia hanamoa. Ioane Bapatiso ia gwau: “Lauma Helaga lau itaia vadaeni, guba dekena amo ia diho, pune manu bamona, ia latanai ia kamokau. . . . Lau ese lau itaia vadaeni, bona umui dekenai lau gwauraia hedinaraia inai, ia be Dirava ena Natuna.” (Ioa. 1:​32-34) Bona danu Iehova ma ia gwau: “Inai be lauegu Natuna, egu lalokau, lau moale bada ia dekenai.”​—⁠Mat. 3:17; Mar. 1:11; Luka 3:⁠22.

Dirava Ia Badinaia Ela Bona Ena Mase

12. Iesu ia bapatiso murinai lagani toi mai kahana lalonai dahaka ia karaia?

¹² Lagani toi mai kahana lalonai, Iesu be haroro gaukara dekenai ia bisi bada bona taunimanima dekenai iena Tamana ena kara namo bona ena kara maoromaoro lohia siahuna ia harorolaia. Gwauhamata tanona ibounai dekenai ia raka loaloa dainai ia hesiku, to gau ta ese ia koua lasi hereva momokani ia harorolaia totona. (Ioa. 4:​6, 34; 18:37) Ma haida dekenai Dirava ena Basileia ia harorolaia. Gorere taudia ia hanamoa, hutuma ia ubua bona mase taudia ia hatoredia isi lou amo, ia hahedinaraia nega vaira ai Dirava ena Basileia ese unai gaudia do ia karaia.​—⁠Mat. 11:​4, 5.

13. Eda guriguri lalonai dahaka mai anina bada gaudia ita gwauraia be namo?

¹³ Iesu ena hahediba dalana bona ia karaia hoa karadia amo sibona ena ladana ia abia isi lasi, to mai manau ida hairai ibounai be Iehova ia henia. (Ioa. 5:19; 11:​41-44) Iesu ese iseda guriguri lalonai do ita gwauraia mai anina bada gaudia ia herevalaia: Dirava ita noia ena ladana ‘do ia hahelagaia,’ ena kara maoromaoro lohia siahuna ese Satani ena lohia dalana dikana do ia kokia, bona ena “ura gauna tanobada dekenai do ia vara, guba dekenai ia vara bamona.” (Mat. 6:​9, 10) Danu, Iesu ese ita ia hadibaia iseda guriguri hegeregerena ita kara be namo, bona ‘Dirava ena Basileia bona iena kara maoromaoro do ita tahua guna.’​—⁠Mat. 6:⁠33.

14. Ena be Iesu be goevadae tauna, dahaka dainai Dirava ena ura ia hagugurua totona ia lalogoada be namo?

¹⁴ Iesu ena mase negana ia kahirakahira neganai, ia lalohekwarahi bada badina ia diba ia be maduna metauna ia huaia. Dagedage ia haheaukalaia bona ia mase neganai, unai ese ena Tamana ena palani ia hagugurua bona ena ladana ia abia isi. Dina 5 idia do noho bena do ia mase neganai, Iesu ia guriguri ia gwau: “Harihari lauegu kudouna ia hisihisi. Dahaka do lau gwauraia? Do lau gwau, ‘Egu Tamana e, inai harihari nega dekena amo lau oi hamauria?’ Lasi, badina be hari inai nega totona lau mai ginidae vadaeni.” Ena be Iesu ia lalohisihisi, to sibona ena namo ia laloa lasi. Ena Tamana ena ladana ia hahairaia karana ia laloa bada dainai, ia guriguri ia gwau: “Egu Tamana e, oiemu ladana oi hanamoa!” Vadaeni maoromaoro Iehova ia haere, ia gwau: “Lau hanamoa vadaeni, ma do lau hanamoa lou.” (Ioa. 12:​27, 28) Oibe, Iesu ese hahetoho badana ia davaria; taunimanima ta be unai bamona hahetoho ia davaria lasi. Unai dainai, ena Tamana ena hereva ia kamonai neganai, unai ese ia hagoadaia Iehova ena lohia siahuna ia abia isi bona hahairaia totona. Bona unai ia hagugurua momokani!

Iesu Ena Mase ese Ia Havaraia Namo

15. Iesu ia mase gwauraia neganai, dahaka dainai ia gwau: “Ia ore vadaeni!”?

¹⁵ Iesu be ia mase gwauraia neganai, ia gwau: “Ia ore vadaeni!” (Ioa. 19:30) Ia bapatiso negana amo ela bona ia mase, Dirava ena heduru amo Iesu be Dirava ena ura ibounai ia hagugurua! Ia mase neganai, tano mareremarere ia vara bona Roma ena ami opesa badana ia gwau: “Momokani, inai be Dirava ena Natuna.” (Mat. 27:54) Unai opesa tauna ia itaia Iesu be momo ese idia kirikirilaia badina ia gwau ia be Dirava ena Natuna. Ena be Iesu ese hisihisi bada ia davaria, to Dirava ia badinaia noho dainai ia hamomokania Satani be koikoi tauna badana. Iehova ena lohia siahuna idia durua taudia dekenai Satani ese inai hepapahuahu herevana ia gwauraia: “Tau ta ese iena gau ibounai do ia negea, iena mauri do ia dogoatao totona.” (Iobu 2:⁠4) Iesu ese ena Dirava badinaia karana amo ia hahedinaraia, Adamu bona Heva be idia davaria hahetoho maragina ai Dirava idia badinaia diba. Gau badana be inai: Iesu ena mauri dalana amo ia ese Iehova ena lohia siahuna ia abia isi bona ia hahairaia. (Aonega Herevadia 27:11 duahia.) Iesu ena mase ese hahenamo ma haida ia havaraia, a? Oibe!

16. Dahaka dainai Iesu ia do mai lasi neganai idia noho hesiai taudia be Dirava ese ia gwauraidia maoromaoro?

¹⁶ Iesu be tanobada ai ia do mai lasi neganai, Iehova idia hesiai henia taudia haida idia noho vadaeni. Dirava ese idia ia gwauraia maoromaoro bona idia dekenai toreisi lou helarona ia henia. (Isa. 25:8; Dan. 12:13) Dahaka dainai helaga Diravana Iehova ese idia ia gwauraia maoromaoro diba? Baibel ia gwau: “Dirava ese ia be boubou gauna ta bamona ia henia, bona Keriso ena rara abidadama henia karana amo, taunimanima be Dirava ida maino idia karaia diba. Dirava ese unai ia karaia ena kara maoromaoro ia hahedinaraia totona, badina idaunegai idia vara kara dika ia gwauatao neganai, haheauka ia hahedinaraia. Bona hari inai negai danu, ia ese ena kara maoromaoro ia hahedinaraia totona, Iesu ia abidadama henia tauna ia gwauraia maoromaoro.”​—⁠Roma 3:​25, 26, NW.a

17. Edena dala ai Iehova ese Iesu ena abidadama karana ia hanamoa, bona hari Iesu Keriso be dahaka ia karaia noho?

¹⁷ Iesu be mase amo ia toreisi lou neganai, Iehova ese ia dekenai dagi badana ia henia; unai ese guna ia abia dagina ia hereaia. Hari ia be mase diba lasi laumana ta. (Heb. 1:⁠3) Ia be Hahelaga Tauna bona King bona ena murinai idia raka taudia ia durua noho Dirava ena kara maoromaoro idia abia isi totona. Ita moale badina iseda guba Tamana, Iehova be iena Natuna idia tohotohoa bona Iena ura idia karaia taudia do ia hanamoa!​—⁠Salamo 34:3; Heberu 11:6 duahia.

18. Stadi gabena ai dahaka do ita herevalaia?

¹⁸ Abela ena nega amo Iehova idia abidadama henia taudia be Ia idia tura henia diba badina gwauhamata Garana idia abidadama henia. Iehova ia diba iena Natuna be Ia do ia badinaia ela bona ia mase, unai dainai ia be “tanobada ena dika kokia tauna” hereadaena. (Ioa. 1:29) Iesu ena mase ese hari inai negai idia noho taudia dekenai namo ia havaraia danu. (Roma 3:26) Ena mauri davalaia boubouna ese oi dekenai dahaka namo ia havaraia diba? Stadi gabena ai unai do ita herevalaia.

[Footnote]

Edena Bamona Do Oi Haere?

• Satani ese edena dala ai Dirava ena kara maoromaoro lohia siahuna ia hepapahuahulaia?

• Iesu ena bapatiso ena anina be dahaka?

• Iesu ena mase ese dahaka namo ia havaraia?

[Picture on page 9]

Iesu ena bapatiso ena anina oi diba, a?