Dirava Vairanai Oi Taga, A?
“Iena kohu sibona dekenai ia haboua, to Dirava dekenai ia be gau momo ia henia lasi tauna [“Dirava vairanai ia taga lasi tauna,” BHğ] be unai bamona.”—LUKA 12:21.
1, 2. (a) Dahaka dainai taunimanima be edia mauri idia haboioa bona gau haida idia rakatania? (b) Keristani taudia be dahaka totona idia hekwarahi? Bona dahaka idia laloaboio diba?
LAGANI momo lalonai, taunimanima momo be idia gaukara goada edia kohu idia habadaia totona. Hegeregere, lagani 1900 murinai, taunimanima momo be edia noho gabudia bona ruma bese idia rakatania Australia, South Africa, Canada, bona United States o idia diba lasi gabudia dekenai idia lao golo idia tahua totona. Oibe, momo be idia ura bada gaudia idia abia totona edia mauri idia haboioa diba o gau haida idia rakatania.
2 Ena be hari taunimanima momo be golo tahua gaukara idia karaia lasi, to moni gaukara idia karaia goadagoada edia ruma bese idia naria totona. Inai nega dokona lalonai, unai bamona ita karaia be mai ena hekwarahi. Aniani, dabua, bona ruma totona idia lalohekwarahi taudia be mai anina bada gaudia idia laloaboio diba. (Roma 14:17) Iesu ese parabole ta amo unai ia hahedinaraia. Unai parabole be Luka 12:16-21 dekenai ia noho.
3. Luka 12:16-21 ai Iesu ena parabole oi gwauraia.
3 Vanegai stadi dekenai ita be kohu momo ura henia dikadika karana ita herevalaia. Iesu be unai ia herevalaia murinai, kavakava tauna ena parabole ia gwauraia. Iesu ia gwau unai tau ena uma aniani haboua rumana be aniani amo ia honu, to ia laloa unai be hegeregere lasi dainai, unai ruma ia kokia bona ruma badadia ia haginia. Unai amo aniani namodia momo do ia haboua diba. Unai ia karaia neganai, ia laloa mauri namona do ia moalelaia, to Dirava ese ia hamaoroa iena mauri be do ia ore, bona ia haboua gau namodia ibounai be tau ta ese do ia abia. Bena Iesu ia gwau: “Iena kohu sibona dekenai ia haboua, to Dirava dekenai ia be gau momo ia henia lasi tauna [“Dirava vairanai ia taga lasi tauna,” BHğ ] be unai bamona.” (Luka 12:16-21) Unai parabole amo dahaka ita dibaia? Ita dibaia gauna be iseda mauri lalonai edena bamona ita badinaia diba?
Lalohekwarahi Tauna
4. Iesu ese ena parabole lalonai ia gwauraia tauna be edena bamona ita gwauraia diba?
4 Iesu ese ia gwauraia parabole be taunimanima momo idia diba. Iesu be unai sivarai ia hamatamaia neganai, ia gwau: “Kohu momo tauna ena uma aniani be momo herea.” Iesu ia gwau lasi, kohu momo tauna be koikoi dalanai ena kohu ia habadaia. Eiava ia gwau lasi, kohu momo tauna be tau dikana. To, Iesu ena hereva amo ita diba, unai tauna be ia gaukara goada. Eiava ia be palani namona ia karaia o kohu ia haboua, unai amo vaira negana ai ia o iena ruma bese taudia be namo do idia davaria. Unai dainai, ita gwau diba Iesu ese ia gwauraia tauna be gaukara goada tauna, bona ia sibona bona ena ruma bese edia mauri ia laloa bada.
5. Iesu ena parabole lalonai, kohu momo tauna ena kerere be dahaka?
5 Parabole lalonai Iesu ese unai tau ia gwauraia kohu momo tauna o taga tauna. To, Iesu ia herevalaia bamona, kohu momo tauna be mai ena kerere ta. Badina ena uma aniani be momo herea, bona ia hegeregere lasi unai gaudia ibounai ia naria totona. Dahaka ia karaia be namo?
6. Hari, Dirava ena hesiai taudia momo be dahaka abia hidi idia karaia be namo?
6 Hari inai negai, Iehova ena hesiai taudia momo edia noho dalana be unai kohu momo tauna ena bamona. Keristani taudia momokanidia be moni gaukara dekenai idia koikoi lasi bona idia gaukara goadagoada. (Kolose 3:22, 23) Herevana idia be gaukara biaguna ta henunai moni gaukara ta idia karaia, eiava mai edia bisinesi, to edia gaukara idia karaia namo herea. Nega haida gaukara biaguna ia ura dagi ta ia henia eiava tadikaka ia ura ena bisinesi ia habadaia, to tadikaka ese abia hidi maorona idia karaia be namo. Dagi idia abia dae bona moni idia habadaia be namo, a? Unai hegeregerena, sikuli ai danu, Witnes matamata taudia momo be maka namona idia abia dainai, sikuli badadia dekenai idia lao, edia diba idia habadaia totona. Natudia ese unai idia abia dae sibona be namo, a?
7. Iesu ena parabole lalonai, kohu momo tauna be dahaka ia karaia?
7 Iesu ena parabole lalonai, kohu momo tauna ena aniani be momo herea bona aniani haboua gabuna be lasi neganai, dahaka ia karaia? Ia gwau, iena uma aniani haboua ruma do ia kokia bona ruma badadia haida do ia haginia, unai amo uma aniani bona kohu ibounai be unuseniai do ia haboua. Ena palani namona dainai ia moale, bena sibona dekenai ia gwau: “Egu laumana dekenai do lau hamaoroa, do lau gwau: ‘Egu laumana e, oiemu kohu be momo herea, lagani momo ena hegeregerena. Do oi laga-ani, do oi aniani, do oi inuinu, do oi moale.’ ”—Luka 12:19.
Dahaka Dainai Kohu Momo Tauna be “Kavakava Tauna”?
8. Kohu momo tauna be dahaka mai anina bada gauna ia laloaboio?
8 To, Iesu ese ia hahedinaraia, kohu momo tauna ena palani ese namo ia havaraia lasi. Badina mai anina bada gauna ta—Dirava ena ura unai—ia laloaboio. Kohu momo tauna ia laloa bada gauna be do ia noho namonamo, do ia aniani, do ia inuinu bona do ia moale. Ia laloa iena “kohu be momo herea” dainai, “lagani momo” lalonai do ia noho danu. To madi, iena palani ena anina ia vara lasi. Iesu ena hereva bamona, “taunimanima edia mauri badina be kohu momo dekena amo lasi, lasi momokani.” (Luka 12:15) Unai hanuaboi ai, unai tau ese ia haboua gaudia ibounai be anina lasi, badina Dirava ese ia hamaoroa: “Kavakava tauna! Hari hanuaboi oiemu laumana oi dekena amo do lau kokia, vadaeni inai oi haboua kohudia be daika ese do ia abia?”—Luka 12:20.
9. Dahaka dainai kohu momo tauna be Dirava ese ia gwauraia kavakava tauna?
9 Hari, ita be Iesu ena parabole ena point badana do ita herevalaia. Dirava ese kohu momo tauna ia gwauraia kavakava tauna. Buka ta Exegetical Dictionary of the New Testament ia gwau Greek gado dekenai inai hereva “kavakava tauna” “ena anina be, tau ta be gau ta ia lalopararalaia namonamo lasi.” Unai buka ia gwau unai parabole lalonai Dirava ia gwau kohu momo tauna be “kavakava tauna” anina be ena “palani vaira negana totona be anina lasi.” Danu, unai hereva “kavakava tauna” be aonega lasi o laloparara lasi tauna ia herevalaia lasi, to “tau ta be ia ura lasi Dirava dekenai ia tabekau” karana ia herevalaia. Iesu ese kohu momo tauna ia herevalaia karana dainai, gabeai Laodikea kongrigeisen, Asia Minor dekenai ia gwauraia herevana ita laloatao: “Oi gwau, ‘Lau be mai egu moni, bona gau ibounai lau dekenai be hegeregere vadaeni.’ To lasi. Oi diba lasi, to oi be namo lasi momokani, oi be bogahisihisi gauna, oi be ogogami, matakepulu, bona kopina kavakava.”—Apokalupo 3:17.
10. Dahaka dainai “kohu momo” haboua karana ese mauri hanaihanai ia henia lasi?
10 Unai parabole ita laloa namonamo be namo. Unai tau bamona ita gaukara goada eda ‘kohu ia momo herea’ totona, to “lagani momo” lalonai do ita mauri hanaihanai totona ita hekwarahi lasi, a? (Ioane 3:16; 17:3) Baibel ia gwau: “Dirava ena Kota bada dinana dekenai, oiemu kohu bada ese gau namona ta, oi dekenai do idia henia lasi,” bona “iena moni bona kohu ia abidadama henia tauna, be au raurau masena bamona do ia moru.” (Aonega Herevadia 11:4, 28) Unai dainai, Iesu ena hereva dokonai ia gwau: “Iena kohu sibona dekenai ia haboua, to Dirava dekenai ia be gau momo ia henia lasi tauna [“Dirava vairanai ia taga lasi tauna,” BHğ] be unai bamona.”—Luka 12:21.
11. Dahaka dainai kohu momo ita tahua be anina lasi?
11 Iesu ese inai hereva “unai bamona” ia gaukaralaia neganai, ia hahedinaraia kohu momo tauna dekenai ia vara karana be taga o noho namona idia tahua taudia dekenai do ia vara danu. Unai tau ese kohu ia haboua be kerere lasi, to ena kerere be inai: Ia be “Dirava vairanai ia taga lasi.” Iamesi danu ia gwau: “Umui haida inai bamona umui hereva, umui gwau, ‘Hari dina o kerukeru dina unai hanua badana do ita lao, unuseni lagani ta do ita noho, do ita hoihoi, moni momo do ita abia.’ Umui dekenai inai bamona lau hereva: Umui diba lasi kerukeru dina dahaka do ia vara.” Dahaka do idia karaia? “To namona be inai bamona do umui hereva: ‘Bema Dirava ia ura, ita be ita mauri noho, vadaeni unai kara o inai kara do ita karaia.’ ” (Iamesi 4:13-15) Herevana ta be taga tauna bona ena kohu be momo herea, to bema ia be Dirava vairanai ia taga lasi, iena kohu ibounai danu be anina lasi. Dirava vairanai ita taga ena anina be dahaka?
Dirava Vairanai Ita Taga
12. Dirava vairanai ita taga totona, dahaka ita karaia be namo?
12 Iesu ia gwau, kohu momo do ita haboua lasi, badina moale korikori do ita davaria lasi, to ia gwau Dirava vairanai ita taga be namo. Unai dainai, Iesu ese ia hahedinaraia, namona be iseda mauri lalonai kohu ita haboua lasi eiava ita haboua kohu ita moalelaia lasi. To, namona be iseda kohu ita gaukaralaia iseda hetura karana Iehova ida ita habadaia totona. Unai bamona ita karaia neganai, ita be Dirava vairanai ita taga bamona. Dahaka dainai? Badina unai ese dala ia kehoa Dirava amo hahenamo momo ita abia totona. Baibel ia gwau: “Lohiabada ena hanamoa sibona ese, kohu momo oi dekenai ia henia noho, bona unai kohu danu, ese lalohisihisi sisina oi dekenai do ia henia lasi.”—Aonega Herevadia 10:22.
13. Edena dala ai Iehova ese ia hanamoa taudia be ia vairanai idia taga?
13 Iehova ese iena taunimanima dekenai hahenamo ia henia neganai, hanaihanai gau namodia sibona ia henia. (Iamesi 1:17) Hegeregere, Iehova ese “tano namona, rata bona hani dekenai ia honu” be Israela taudia dekenai ia henia. Ena be Aigupito tano danu be unai tano bamona, to Iehova ese ena bese taudia dekenai ia henia tanona ese Aigupito ia hereaia. Badina Mose ese Israela taudia ia hamaoroa, unai tano be Iehova ese “ia naria noho.” Eiava, Iehova be idia ia naria dainai, idia be namo bada do idia davaria. Israela taudia be Iehova idia kamonai henia neganai, Ia ese idia ia hanamoa bona mauri namona idia moalelaia. Edia noho dalana ese idia badibadinai idia noho besedia edia noho dalana ia hanaia. Oibe, Iehova ese ia hanamoa taudia be Ia vairanai idia taga!—Numera 16:13; Deuteronomi 4:5-8; 11:8-15.
14. Dirava vairanai idia taga taudia be dahaka idia moalelaia?
14 Kohu momo taudia idia ura taunimanima vairanai idia hahedinaraia idia be taga taudia, to Baibel ia gwau unai be hekokoroku karana. (1 Ioane 2:16) To, Dirava vairanai idia taga taudia be idia ura Dirava ena lalonamo idia abia, ena hebogahisi bada karana idia abia, bona Ia ida idia hetura namonamo. Unai dainai, idia noho namonamo bona idia moale. Kohu momo be unai bamona noho namona do ia havaraia lasi. (Isaia 40:11) Henanadai be inai, Dirava vairanai ita taga totona, dahaka ita karaia be namo?
Dirava Vairanai Ita Taga Dalana
15. Dirava vairanai ita taga totona, dahaka ita karaia be namo?
15 Iesu ena parabole lalonai, kohu momo tauna be ia gaukara goada sibona ena kohu ia habadaia totona, unai dainai Dirava ia gwau ia be kavakava tauna. To, Dirava vairanai ita taga totona, namona be ita gaukara goada bona Dirava vairanai mai anina bada gaukaradia ita karaia. Hegeregere, Iesu be ita ia hagania: “Unai dainai do umui lao, bese ibounai be diba tahua taudia do umui halaoa.” (Mataio 28:19) Namona be ita sibona eda ura gaudia ita dadaraia, to iseda nega, goada, bona diba ita gaukaralaia Basileia harorolaia gaukara bona hahediba taudia halaoa gaukarana ita karaia totona. Unai bamona idia karaia taudia momo be hahenamo momo idia abia. Bona ekspiriens haida be unai do idia hahedinaraia.—Aonega Herevadia 19:17.
16, 17. Edena ekspiriens ese idia hahedinaraia ta be Dirava vairanai ia taga diba?
16 Asia tanona ta dekenai, tadikaka ta mani oi laloa. Ia be kompiuta hanamoa gaukara ia karaia, bona pei namona ia abia. To, iena gaukara dekenai ena nega bada ia haorea dainai, ia be ia laloa ia hebou momo lasi bona ia haroro momo lasi. Unai dainai, ena kompiuta hanamoa gaukarana ia rakatania bona ice cream ia hoihoilaia, unai amo ena haroro gaukara ia habadaia bona kongrigeisen ai maduna haida ia huaia diba. Ena gaukara tura gunadia be ia idia kirikirilaia, to iena hemami be edena bamona? Ia gwau: “Momokani, guna kompiuta hanamoa gaukara lau karaia neganai, egu moni be momo. To egu moni gaukara lau rakatania dainai lau moale, badina hari lau lalohekwarahi momo lasi, guna bamona. Bona mai anina bada gauna be, lau mamia lau be Iehova kahirakahira lau noho.” Unai tadikaka be ena moni gaukara ia rakatania dainai ful-taim hesiai gaukara ia karaia diba. Bona hari, iena tano ai, ia be Iehova ena Witnes taudia edia brens opesi dekenai ia gaukara. Iehova ena hahenamo idia abia taudia be ‘ia vairanai idia taga’ bamona.
17 Hahine ta ena haheitalai mani ita laloa. Iena ruma bese taudia be edukeisen idia laloa bada. Ia be France, Mexico, bona Switzerland edia iunivesiti dekenai ia lao, bona gabeai gaukara namona ta ia abia. Ia gwau: “Gau namodia momo lau abia; ladana namona bona gaukara namona lau abia, to lau moale lasi.” Bena Iehova ia dibaia. Ia gwau: “Egu hetura karana Iehova ida ia tubu neganai, lau ura Iehova lau hamoalea bona Ia ese lau dekenai ia henia gauna dainai lau ura gau ta lau karaia Ia totona, unai lalohadai ese lau ia durua ful-taim hesiai gaukara lalonai lau vareai totona.” Ia be ena moni gaukara dekenai ia doko bona ia bapatiso. Lagani 20 idia hanaia vadaeni, taihu be mai moale ida ful-taim hesiai gaukara ia karaia. Ia gwau: “Haida idia gwau lau be kavakava, to idia itaia lau moale, bona egu noho dalana idia hoalaia. Dina ta ta ibounai Iehova lau noia lau ia durua lau manau totona, unai amo Ia ese lau do ia lalonamo henia.”
18. Paulo bamona, edena dala ai Dirava vairanai ita taga diba?
18 Saulo, aposetolo Paulo unai, be gaukara namona ia abia. To, gabeai ia gwau: “Gau ibounai lau laloa be anina lasi gaudia, inai mai anina bada gauna do lau abia totona, gauna be inai: Keriso Iesu, lauegu Lohiabada do lau diba momokani.” (Filipi 3:7, 8) Paulo dekenai, Keriso amo ia abia dibana be tanobada ena ia hereaia. Unai hegeregerena, iseda ura gaudia ita dadaraia bona iseda mauri lalonai Dirava ita badinaia neganai, Dirava vairanai ita taga diba. Baibel ia gwau: “Lohiabada do oi gari henia, bona do oi manau. Inai bamona oi karaia neganai, kohu, bona matauraia, bona mauri do oi davaria.”—Aonega Herevadia 22:4.
Anina Oi Gwauraia Diba, A?
• Iesu ena parabole lalonai, kohu momo tauna ena kerere be dahaka?
• Dahaka dainai kohu momo tauna be Dirava ese ia gwauraia kavakava tauna?
• Dirava vairanai ita taga ena anina be dahaka?
• Edena dala ai Dirava vairanai ita taga diba?
[Picture on page 28]
Dahaka dainai kohu momo tauna be Dirava ese ia gwauraia kavakava tauna?
[Picture on page 29]
Edena dala ai moni gaukara ena dagi namona oi abia be oi ia tohoa diba?
[Picture on page 30, 31]
‘Iehova ena hahenamo sibona ese, kohu momo oi dekenai ia henia noho’