Anina Haboua Gaukarana Oi Karaia Noho!
“Idia hadohado neganai, madi edia matana ena ranu ia diho taudia, be gabeai mai edia moale danu, anina do idia gogoa.”—SALAMO 126:5.
1. Dahaka dainai hari inai negai ‘uma ena biaguna ese utua taudia ma haida ia siaia totona ita noinoi’ be namo?
IESU KERISO be Galilea dekenai ia haroro negana ihatoina murinai, iena hahediba taudia ia hamaoroa: “Uiti ena anina abia negana ia ginidae vadaeni, to utua taudia be momo lasi.” (Mataio 9:37) Iudea dekenai danu be unai bamona. (Luka 10:2) Kahirakahira lagani 2,000 bamona gunanai unai be momokani, to hari be edena bamona? Hesiai lagani gunana lalonai, Iehova ena Witnes taudia 6,000,000 mai kahana ese tanobada taudia 6,000,000,000, idia momo “edia tauanina idia manokamanoka, bona idia lao idau gabu idau gabu dekenai, mamoe idia naria lasi bamona,” huanai anina haboua gaukarana idia karaia. Unai dainai, Iesu ena hereva, “uma ena biaguna dekenai umui noinoi, ia ese utua taudia ma haida do ia siaia,” be mai anina bada hari, lagani handred momo gunanai ia be mai anina bada hegeregerena.—Mataio 9:36, 38.
2. Dahaka gauna dainai taunimanima edia lalona ita veria?
2 Iehova Dirava, anina haboua gaukarana ena Biaguna, ese unai noinoi ia haerelaia bona gaukara taudia ma haida ia siaia. Bona Dirava ese ia hakaua anina haboua gaukarana, ita durua diba be moale gauna! Ena be tanobada besedia ida eda namba ita hahegeregerea neganai ita itaia iseda namba ia maragi, to Basileia ita harorolaia bona hahediba taudia halaoa gaukarana ita karaia goadagoada dainai, tanobada taudia edia lalona ita veria. Tano momo dekenai nius halasia oreadia ese ita idia herevalaia loulou. Reana televisen drama dekenai iduara ena gaba ia rege neganai, idia gwau Iehova ena Witnes taudia idia mai unai. Oibe, iseda Keristani gaukara, laulau dalanai ita karaia anina haboua gaukarana, be lagani 2000 murina negana lalonai taunimanima momo idia diba.
3. (a) Edena bamona ita diba aposetolo taudia edia negai taunimanima ese Basileia harorolaia gaukarana idia itaia? (b) Dahaka dainai ita gwau diba aneru ese iseda haroro gaukara idia durua?
3 Aposetolo taudia edia negai danu, taunimanima ese Basileia harorolaia gaukarana idia itaia bona sivarai namona harorolaia taudia idia dagedage henia. Unai dainai, aposetolo Paulo ia gwau: “Lau laloa inai bamona: Dirava ese ai aposetolo taudia be gabeai taudia momokani ai ia halaoa vadaeni. Ai be hegeregere taunimanima ese edia kota dekenai idia gwau ai be do ai mase. . . . Ibounai ese edia matana dekenai ai [aposetolo taudia] do idia itaia, taunimanima bona aneru danu.” (1 Korinto 4:9) Unai hegeregerena, ena be dagedage ita davaria to Basileia harorolaia gaukarana ita karaia noho dainai, taunimanima edia lalona ita veria bona aneru dekenai unai be mai anina bada. Apokalupo 14:6 ia gwau: “Vadaeni aneru ma ta lau [aposetolo Ioane] itaia, guba ena ataiai ia roho lao. Iena gaukara be, noho hanaihanai Sivarai Namona do ia gwauraia hedinarai. Taunimanima ibounai dekenai ia gwauraia, bese ibounai, iduhu ibounai, gado ibounai bona kopina idauidau ibounai taudia.” Oibe, aneru ese iseda haroro gaukara—anina haboua gaukarana—idia durua!—Heberu 1:13, 14.
“Do Idia Badu Henia”
4, 5. (a) Iesu ese ena hahediba taudia dekenai dahaka hadibaia herevana ia henia? (b) Dahaka dainai hari inai negai Dirava ena hesiai taudia “idia badu henia”?
4 Iesu ese anina haboua totona ena aposetolo taudia ia siaia neganai, ena hadibaia herevana idia badinaia bona ‘idia aonega gaigai bamona, bona idia dagedage lasi, pune manu bamona.’ Iesu ma ia gwau: “To taunimanima dekenai do umui naria namonamo. Badina be idia ese kaunsolo edia vairana dekenai do idia hakaua umui, bona idia edia dubu lalonai do idia botaia umui. Lohia bona king edia vairana dekenai do idia hakaua umui, lau dainai. Inai dala dekenai umui ese lau do umui gwauraia hedinarai idia dekenai, bona bese idauidau ibounai dekenai. . . . Lauegu ladana dainai taunimanima ibounai ese do idia badu henia umui dekenai. To do ia haheauka lao ela bona dokona tauna be do ia mauri.”—Mataio 10:16-22.
5 Hari inai negai ‘ita idia badu henia,’ badina “Satani ese tanobada taudia ibounai ia gunalaia noho,” bona ia be Dirava bona Iena taunimanima edia inai tauna badana. (1 Ioane 5:19) Iseda inai taudia ese lauma dalanai eda noho namo idia itaia to idia ura lasi idia abia dae unai be Iehova dainai ia vara. Mai moale ida anina ita haboua lalonai, dagedage taudia ese iseda vairana ai moale toana idia itaia. Iseda lalo-tamona idia hoalaia! Momokani, edia gabu dekenai Iehova ena Witnes taudia edia gaukara idia itaia bona tano ma ta dekenai idia lao bona unai gaukara tamona idia itaia neganai, idia abia dae ita be mai lalo-tamona to unai dainai idia moale lasi. Bona ita diba, nega maorona ai, iseda inai taudia danu ese do idia diba ita ia hagoadaia bona iseda lalo-tamona ena badina be Iehova.—Esekiela 38:10-12, 23.
6. Anina ita haboua lalonai dahaka ita diba, to dahaka henanadai ia vara?
6 Anina haboua gaukarana ena Biaguna ese ena Natuna, Iesu Keriso, dekenai “siahu ibounai guba dekenai bona tanobada dekenai” ia henia. (Mataio 28:18) Unai dala ai Iehova ese Iesu ia gaukaralaia, guba anerudia bona tanobada dekenai ia noho “hesiai tauna mai ena kamonai, bona mai ena kara maoromaoro” oreana amo, anina haboua gaukarana ia hakaua totona. (Mataio 24:45-47; Apokalupo 14:6, 7) To, edena bamona iseda inai taudia edia dagedage karana ita haheaukalaia bona anina haboua gaukarana dekenai iseda moale ita dogoatao diba?
7. Ita idia dadaraia eiava dagedage henia neganai, dahaka lalohadai ita hahedinaraia toho be namo?
7 Ita idia dadaraia eiava idia dagedage henia neganai, namona be Dirava ena heduru ita tahua, Paulo bamona ita karaia diba totona. Ia gwau: “Ai dekenai idia hereva dika noho, to ai ese idia ai hanamoa. Ai idia dagedage henia noho, to davana ai henia lasi. Aiemai ladana idia hadikaia noho, to idia dekenai ai hereva mai manau danu.” (1 Korinto 4:12, 13) Unai lalohadai bona dala namona ai ita karaia haroro gaukarana dainai, nega haida ita idia dadaraia taudia ese edia lalohadai idia haidaua.
8. Iesu ena hereva Mataio 10:28 ai ese edena bamona oi ia hagoadaia?
8 Ena be ita idia hamasea diba to ita gari lasi bona anina ita haboua goadagoada noho. Mai gari lasi ida Basileia sivaraina ita harorolaia, iboudiai idia itaia totona. Bona Iesu ena hereva ese ita ia hagoadaia bada, ia gwau: “Tauanina be do idia alaia diba, to lauma be do idia alaia diba lasi taudia dekenai do umui gari lasi. To lauma bona tauanina . . . do ia alaia mase diba Diravana dekenai be do umui gari, be namo.” (Mataio 10:28) Ita diba iseda guba Tamana be mauri ia Henia Diravana. Ia idia badinaia taudia bona mai kamonai ida anina idia haboua noho taudia edia davana namona do ia henia.
Hahemauri Sivaraina
9. Haida edia lalohadai Esekiela ena hereva dekenai be dahaka, bona hari inai negai edena dala ai unai bamona ia vara noho?
9 Peroveta tauna Esekiela ese mai gari lasi ida “dagedage besena”—Israela bona Iuda basileiadia—dekenai Iehova ena hereva ia gwauraia neganai, taunimanima haida ese ia gwauraia herevana idia moalelaia. (Esekiela 2:3) Iehova ia gwau: “Idia dekenai oi be lalokau ane ia abia noho tauna sibona bamona, iena gadona be namo herea, bona gita be ia gadaralaia namonamo.” (Esekiela 33:32) Ena be Esekiela ena hereva idia ura henia, to idia badinaia lasi. Hari inai negai dahaka ia vara noho? Horoa orena taudia bona edia bamodia ese mai gari lasi ida Iehova ena hereva idia harorolaia neganai, haida idia ura Basileia ese ia mailaia hahenamo edia sivarai idia kamonai, to idia abia dae momokani lasi, hahediba taudia ai idia lao lasi, bona anina haboua gaukarana idia karaia lasi.
10, 11. Lagani 1950 vairanai, dahaka idia karaia taunimanima ese ita harorolaia hahemauri sivaraina idia itaia totona, bona unai amo dahaka ia vara?
10 To, momo herea ese anina haboua gaukarana ai idia harorolaia sivaraina idia abia dae, bona Dirava ena hereva harorolaia gaukarana idia durua. Hegeregere, lagani 1922 ia lao 1928 lalonai idia karaia Keristani hebouheboudia lalonai, Satani ena tanobada ena oromana dikana dekenai hahemaoro herevadia idia gwauraia goevagoeva. Unai hebouhebou lalodiai idia gwauraia hahemaoro herevadia be reidio steiseni ese idia halasia. Unai murinai, Dirava ena taunimanima ese unai hereva idia halasia pepapepadia milioni momo idia hariharilaia.
11 Lagani 1940 be kahirakahira neganai, haroro dalana ma ta idia kehoa—dala dekenai saini idia huaia. Guna, Iehova ena taunimanima ese edia kemena bona doruna dekenai pablik tok idia hahedinaraia saini idia atoa. Gabeai, idia ese inai hereva, “Tomadiho be Idoa Bona Kara Koikoi Gauna” bona “Dirava Bona Pavapava Keriso Edia Hesiai Oi Karaia,” idia hahedinaraia saini idia huaia. Dala dekenai idia raka neganai, taunimanima edia lalona idia veria. London ai, England dekenai, taunimanima momo herea idia loaloa daladia dekenai hanaihanai unai gaukara ia karaia tadikakana ta ia gwau: ‘Unai gaukara ese Iehova ena Witnes taudia ia hagoadaia bona ia dainai taunimanima ese Witnes taudia idia diba.’
12. Iseda haroro gaukara lalonai Dirava ena hahemaoro herevadia sibona lasi to dahaka danu ita halasia, bona hari daidia ese mai lalo-tamona ida sivarai namona idia harorolaia hebou?
12 Ita ese Dirava ena hahemaoro herevadia ita halasia neganai, Basileia ena sivarai ia hahedinaraia gau namodia ita halasia danu. Taunimanima edia vairanai mai gari lasi ida ita haroro karana ese ita ia durua kara namo taudia ita tahua totona. (Mataio 10:11) Horoa orena taudia momo ese lagani 1920 ia lao 1930 lalonai bona unai murinai anina haboua taudia boiria herevadia goevagoevadia idia abia dae. Bena, lagani 1935 ena hebouhebouna dekenai, “mamoe idaudia” edia ‘hutuma bada herea’ ese tanobada paradaisona lalonai do idia abia vaira negana ena sivarai namona idia kamonai. (Apokalupo 7:9; Ioane 10:16) Idia ese Dirava ena hahemaoro herevadia idia abia dae bona horoa taudia ida hahemauri sivaraina namona idia harorolaia hebou.
13, 14. (a) Edena dala ai Salamo 126:5, 6 ese ita ia hagoadaia? (b) Bema uhe ita hadoa bona dairia noho, dahaka do ia vara?
13 Salamo 126:5, 6 ena hereva ese Dirava ena gaukara, anina haboua gaukarana, idia karaia taudia ia hagoadaia, bona dagedage idia davaria taudia ia hagoadaia bada, ia gwau: “Idia hadohado neganai, madi edia matana ena ranu ia diho taudia, be gabeai mai edia moale danu, anina do idia gogoa. Io, momokani, uhe idia abia lao neganai idia tai noho taudia, be mai moale danu do idia giroa mai, bona anina idia mailaia neganai ane do idia abia.” Salamo torea tauna ese hadohado bona anina haboua gaukarana ia herevalaia bona unai be Iehova ese idaunegai Babulonia ena igui hesiai amo idia giroa lou orena taudia ia naria bona ia hanamoa karana ia laulaulaia. Idia ruhadia neganai idia moale bada, to lagani 70 lalonai ta ese ia naria lasi gabuna dekenai uhe idia hadoa neganai, reana idia tai. To, edia hadohado bona haginia gaukarana idia karaia noho taudia ese edia gaukara ia havaraia anina dainai moale idia abia.
14 Reana ita tai, bema hahetoho ita davaria eiava kara maoromaoro ita badinaia dainai hisihisi ita davaria, eiava bema iseda tadikaka dekenai unai ia vara. (1 Petero 3:14) Reana anina ita haboua lalonai nega aukana ita davaria, bema haroro gaukara lalonai ita hekwarahi to toana be anina ita havaraia lasi. To bema uhe ita hadoa bona ita dairia noho, Dirava ese unai hadoa gauna do ia hatubua, nega momo guna ita laloa diba lasi dalanai unai ia karaia. (1 Korinto 3:6) Baibel bona Baibel idia herevalaia buka bona magasin ita hariharilaia karana amo ia vara anina ese unai ia hahedinaraia namonamo.
15. Anina haboua gaukarana lalonai Keristani buka bona magasin ese idia havaraia namo ena haheitalai ta oi gwauraia.
15 Tau ta ladana Jim ena ekspiriens mani oi laloa. Iena sinana ia mase neganai, iena kohu huanai Life—How Did It Get Here? By Evolution or by Creation? a bukana ia davaria. Mai ena ura bada ida ia duahia. Witnes taihu ta ese dala dekenai Jim ia hereva henia murinai, Jim ia gwau do ia lou henia diba, bena Baibel stadi ia abia dae. Jim be lauma dalanai ia goada haraga, Iehova dekenai sibona ia gwauhamatalaia, bona bapatiso ia abia. Iena ruma bese taudia ma haida dekenai ia dibaia gaudia ia herevalaia. Unai amo, ena taihuna bona kakana be Iehova ena Witnes taudia ai idia lao, bona gabeai Jim ia moale badina London Betele dekenai ful-taim volantia gaukara ia karaia diba.
Dagedage Ita Davaria to Ita Moale
16. (a) Dahaka dainai anina haboua gaukarana ese anina namona ia havaraia? (b) Sivarai namona dainai ia vara gauna be Iesu ese edena bamona ia herevalaia, to taunimanima be edena dala ai ita hereva henia?
16 Dahaka dainai anina haboua gaukarana ese anina namona ia havaraia? Badina horoa Keristani taudia bona edia bamodia ese Iesu ena hadibaia herevana idia badinaia, ia gwau: “Dibura lalonai umui lau hamaoroa herevadia be diari dekenai do umui gwauraia. Bona emui taiana dekenai umui kamonai herevadia be ruma ena ataiai dekena amo do umui harorolaia diho.” (Mataio 10:27) To, ita diba hekwakwanai do ita davaria, badina Iesu ia gwau: “Kakana ese iena tadina do ia samania, do ia mase totona. Tamana ese iena natuna do ia samania, do ia mase totona. Memero do idia toreisi, edia tamana bona sinana do idia alaia mase.” Iesu be ma ia gwau: “Umui emui lalona dekenai umui gwau lasi, maino lau mailaia tanobada dekenai totona lau mai. Maino lau mailaia lasi, to tuari kaia sibona.” (Mataio 10:21, 34) Iesu ese mai ena ura ida ruma bese ia hapararadia lasi. To, nega haida sivarai namona dainai unai ia vara. Hari inai negai Dirava ena hesiai taudia be unai bamona danu. Ruma bese ita vadivadi henidia neganai, ita ura lasi ruma bese do ia hapararaia gauna ita hahedinaraia. Iseda ura gauna be taunimanima iboudiai ese sivarai namona do idia abia dae. Unai dainai, ita ese ruma bese taudia ta ta ibounai be hebogahisi dalana namona ai ita hereva henia toho, ‘mauri hanaihanai do idia abia diba taudia ibounai’ ese ita harorolaia sivaraina idia ura henia totona.—Kara 13:48.
17. Dirava ena lohia siahuna idia abia isi taudia be edena bamona idia idau, bona unai ena haheitalai ta be dahaka?
17 Basileia ena sivarai dainai, Dirava ena lohia siahuna idia abia isi taudia idia idau. Hegeregere, National Socialism ena nega lalonai Germany dekenai iseda tadikaka ese ‘Kaisara ena be Kaisara dekenai idia henia, to Dirava ena be Dirava dekenai idia henia’ dainai, ia hedinarai goevagoeva idia be idau. (Luka 20:25) Iehova ena hesiai taudia idia gini goada bona Baibel ena hakaua herevadia utua karana idia dadaraia, bona unai dainai tomadiho gunalaia taudia bona sibodia be Keristani taudia idia gwauraia Kerisendom ena dubu idauidau dekenai idia lao taudia amo idia idau. (Isaia 2:4; Mataio 4:10; Ioane 17:16) Profesa Christine King, The Nazi State and the New Religions bukana ia torea hahinena, ia gwau: “Witnes taudia hadikaia gaukarana dekenai sibona [Nazi] gavamani ia kwalimu lasi, badina ena be tausen momo idia hamasedia, to edia gaukara ia doko lasi bona May 1945 ai Iehova ena Witnes taudia edia orea ia do gaukara noho, to National Socialism ia ore vadaeni.”
18. Ena be Iehova ena taunimanima ese dagedage idia davaria to dahaka kara idia hahedinaraia?
18 Iehova ena taunimanima ese dagedage idia davaria neganai edia kara be idau herea. Siahu idia abia taudia ese iseda abidadama idia laloa bada, to danu, ita ese badu eiava davana henia karadia ita hahedinaraia lasi dainai idia hoa. Hegeregere, Holocaust amo idia roho mauri Witnes taudia ese idia davaria gaudia idia laloa lou neganai, hanaihanai moale idia hahedinaraia. Idia diba Iehova ese idia dekenai “siahu badana” ia henia. (2 Korinto 4:7) Ita huanai idia noho horoa taudia idia diba momokani edia “ladana be guba dekenai ia torea vadaeni.” (Luka 10:20) Edia haheauka ese ia havaraia helaro ese lalohisihisi do ia havaraia lasi, bona anina haboua kamonai taudia, tanobada dekenai mauri do idia abia taudia unai, be unai idia diba momokani danu.—Roma 5:4, 5.
Anina Haboua Gaukarana Oi Karaia Noho
19. Keristani haroro gaukarana dekenai dahaka dala namodia idia gaukaralaia?
19 Edena negai Iehova ese ita karaia anina haboua gaukarana do ia haorea be gabeai do ita itaia. To hari, namona be ita laloatao anina haboua taudia be mai edia dala idauidau edia gaukara idia karaia totona. Unai hegeregerena, ita diba idia tohoa vadaeni haroro daladia ita badinaia karana ese anina do ia havaraia. Paulo ese ena Keristani tadikaka ia hamaorodia: “Umui lau noia, lauegu kara bamona do umui karaia.” (1 Korinto 4:16) Paulo be Mileto dekenai Efeso elda taudia ida ia hedavari neganai, idia dekenai ia gwau guna, ‘ruma ai bona taunimanima edia vairana dekenai’ idia ia hadibaia. (Kara 20:20, 21) Paulo ena bamona Timoteo ese aposetolo tauna ena haroro daladia ia dibaia, bona unai dainai Korinto taudia dekenai unai daladia ia hadibaia diba. (1 Korinto 4:17) Dirava ese Paulo ena hadibaia daladia ia hanamoa, bona sivarai namona be ruma ta ruma ta ai, lou henia ai, Baibel stadi ai, bona taunimanima idia noho gabudia ibounai ai ita harorolaia noho karana do ia hanamoa danu.—Kara 17:17.
20. Edena dala ai Iesu ia hahedinaraia lauma dalanai anina haboua gaukarana do ia bada, bona vanegai laganidia lalonai edena bamona unai ia momokani?
20 Iesu ese lagani 30 C.E. ai, Sukara kahirakahira dekenai Samaria hahinena ia haroro henia murinai, lauma dalanai ia vara anina haboua gaukarana ia herevalaia. Iena hahediba taudia ia hamaoroa: “Emui matana umui abia isi, uma gabu umui itaia, anina be idia auka bona mage vadaeni, utua nega danu ia hegeregere. Utua tauna ese ena davana ia abia noho, vadaeni anina ia haboua, mauri hanaihanai henia gauna. Unai dainai, hadoa tauna bona utua tauna be do idia moale hebou.” (Ioane 4:34-36) Reana Iesu ese Samaria hahinena ida ia herevahereva amo ia vara anina ia itaia vadaeni, badina unai hahine ena hereva dainai momo ese Iesu idia abidadama henia. (Ioane 4:39) Vanegai laganidia lalonai, tano haida ai Iehova ena Witnes taudia taravatua karana idia kokia eiava taravatu dalanai idia rejista, unai dala ai gabu matamatadia idia kehoa anina ita haboua totona. Unai dainai lauma dalanai anina haboua gaukarana badana ia vara noho. Momokani, tanobada hegegemadai, lauma dalanai mai moale ida anina ita haboua lalonai hahenamo badadia ita davaria.
21. Dahaka dainai mai moale ida anina haboua gaukarana do ita karaia?
21 Uma ena anina ia mage bona hegeregere vadaeni neganai, gaukara taudia ese karaharaga idia haboua be namo. Idia naria lasi to mai goada ida do idia gaukara. Hari inai negai, mai karaharaga lalohadaina ida ita gaukara goada be namo, badina ita be “dokona negana” lalonai ita noho. (Daniela 12:4) Oibe, ita ese hahetoho ita davaria, to Iehova idia tomadiho henia taudia momo herea ita haboua noho, guna bamona lasi. Unai dainai inai be moale bada negana. (Isaia 9:3) Unai dainai, mai moale ida anina haboua gaukarana do ita karaia noho!
[Footnote]
a Iehova ena Witnes taudia ese idia halasia bona idia hariharilaia.
Edena Bamona Do Oi Haere?
• Gaukara taudia ma haida ia siaia totona anina haboua gaukarana ena Biaguna idia noia neganai, edena bamona ia haere?
• Ena be taunimanima ese ita “idia badu henia,” to edena kara ita hahedinaraia?
• Ena be ita idia dagedage henia, to dahaka dainai ita moale?
• Dahaka dainai mai karaharaga lalohadaina ida anina haboua gaukarana ita karaia noho be namo?
[Pictures on page 16, 17]
Aneru ese lauma dalanai anina idia haboua taudia idia durua
[Picture on page 18]
Dala dekenai saini idia huaia karana amo Basileia ena sivarai be momo ese idia kamonai
[Picture on page 18]
Uhe ita hadoa bona dairia, to Dirava ese ia hatubua