“Idau Taudia Edia Gadona” Dainai Naria Namonamo
“Idau tauna ena murina dekenai do idia raka lasi, lasi momokani. Ia dekena amo do idia heau siri, badina be idau taudia edia gadona idia diba lasi.”—IOANE 10:5.
1, 2. (a) Iesu be Maria ena ladana ia boiria neganai Maria be dahaka ia karaia, bona unai ese edena hereva, Iesu ese nega sisina gunanai ia gwauraia gauna unai, ena anina ia hahedinaraia? (b) Dahaka ese ita ia durua Iesu kahirakahira ita noho totona?
IESU ia toreisi lou murinai, ia itaia ena guria gabuna kahirakahira ai hahine ta ia gini. Unai hahine ia diba namonamo. Ia be Maria Magadala. Kahirakahira lagani rua gunanai, Iesu ese ia be demoni ena siahu amo ia hanamoa. Unai nega amo Iesu bona ena aposetolo taudia ia bamoa, bona dina ta ta ai tauanina dalanai ia durudia. (Luka 8:1-3) To hari, Maria ia tai, ia lalohisihisi bada badina ia itaia Iesu ia mase bona hari ena mase tauanina danu ia boio! Unai dainai Iesu ese ia nanadaia: “Hahine e, dahaka dainai oi tai? Daika oi tahua?” Maria ia laloa ia be uma gabu naria tauna dainai, ia haere: “Tau badana e, bema inai be oi ese idau gabu ta dekenai oi abia lao be mani gabuna oi hamaoroa lau dekenai, vadaeni do lau lao abia.” Bena Iesu ia gwau: “Maria e!” Maoromaoro, Iesu ena gadona ia diba. Mai moale ida ia gwau: “Hadibaia Tauna.” Bena Iesu ia rosia.—Ioane 20:11-18.
2 Unai sivarai ese kudouna hamarerea dalanai Iesu be nega sisina gunanai ia gwauraia herevana ena anina ia hahedinaraia. Ia hahedinaraia ia sibona be mamoe naria tauna bona ia murinai idia raka taudia be mamoe bona ia gwau mamoe naria tauna ese ena mamoe be edia ladana amo ia boiridia bona idia be iena gadona idia diba. (Ioane 10:3, 4, 14, 27, 28) Momokani, mamoe be ena naria tauna ia diba hegeregerena, Maria be ena Naria Tauna, Keriso, ia diba. Hari Iesu murinai idia raka taudia dekenai unai ia momokani danu. (Ioane 10:16) Mamoe ia kamonai namonamo bona ena naria tauna kahirakahira ia noho hegeregerena, lauma dalanai laloa kehoa karana ese ita ia durua iseda Naria Tauna Namona, Iesu Keriso, ena aena gabudia kahirakahira ita raka totona.—Ioane 13:15; 1 Ioane 2:6; 5:20.
3. Iesu ia herevalaia mamoe edia magu ena haheitalai dainai, dahaka henanadai haida ita laloa?
3 To, unai haheitalai tamona hegeregerena, mamoe ese taunimanima edia gadona ia diba dainai, iena turana sibona lasi to ena inai tauna danu ia diba. Unai be mai anina bada badina ita be mai eda inai taudia dikadia. Idia be daidia? Edena bamona idia gaukara? Edena dala ai ita sibona ita gimaia diba? Unai ita diba totona, namona be Iesu ese mamoe edia magu ena haheitalai lalonai ia gwauraia hereva ma haida ita laloa.
‘Iduara Dekenai Ia Raka Vareai Lasi Tauna’
4. Mamoe naria tauna ena haheitalai lalonai, mamoe be daika murinai idia raka, bona daika murinai idia raka lasi?
4 Iesu ia gwau: “Iduara dekena amo ia raka vareai tauna be mamoe naria tauna. Iduara gimaia tauna ese iduara ia kehoa unai tau ena, vadaeni mamoe ese iena gadona idia kamonai. Ia ese iena mamoe momokani edia ladana ia atoa, vadaeni ia hakaudia murimuri dekenai. Iena mamoe momokani ibounai be murimuri dekenai ia hakaudia, edia vairana dekenai ia raka, vadaeni iena gadona idia diba dainai, iena murina dekenai idia raka. To idau tauna ena murina dekenai do idia raka lasi, lasi momokani. Ia dekena amo do idia heau siri, badina be idau taudia edia gadona idia diba lasi.” (Ioane 10:2-5) Mani oi itaia, Iesu ese nega toi inai hereva “gadona” ia gaukaralaia. Nega rua mamoe naria tauna ena gadona ia herevalaia, to nega ihatoina ai, “idau taudia edia gadona” ia herevalaia. Iesu be edena bamona idau tauna ia herevalaia?
5. Dahaka dainai Ioane karoa 10 ese ia gwauraia idau tauna dekenai heabidae karana ita hahedinaraia lasi?
5 Iesu be idau taudia dekenai ita hahedinaraia be namo heabidae karana ia herevalaia lasi. Baibel idia torea gadona ai unai hereva heabidae ena anina be “idau taudia lalokau henia.” (Heberu 13:2) Iesu ena haheitalai lalonai, idau tauna be ta ese ia boiria vadivadi tauna lasi. Ia be “mamoe edia magu ena iduara dekenai ia raka vareai lasi, to magu ena iduara ia noho lasi gabuna dekenai ia hanaia kava.” Ia be “henaoa bona dadia tauna.” (Ioane 10:1) Dirava ena Hereva ese daika ia gwauraia henaoa bona dadia tauna ginigunana? Satani Diabolo. Genese bukana ese unai ia hamomokania.
Idau Tauna Ena Gadona Idia Kamonai Negana Ginigunana
6, 7. Dahaka dainai ita gwau diba Satani be idau tauna bona henaohenao tauna be maoro?
6 Genese 3:1-5 ese tanobada dekenai idau tauna ena gadona idia kamonai negana ginigunana ia hahedinaraia. Unai sivarai ia gwau Satani ese hahine ginigunana, Heva, be gaigai ena uduna amo koikoi dalanai ia hereva henia. Momokani, unai sivarai lalonai Satani idia gwauraia lasi “idau tauna.” To, ena kara ese ia hahedinaraia dala momo ai ia be Ioane karoa 10 ai Iesu ese ia gwauraia idau tauna bamona. Unai dala haida mani ita itaia.
7 Iesu ia gwau unai idau tauna be magu lalonai idia noho mamoe hadikadia totona, dala idauna amo ia vareai. Unai hegeregerena, Satani ese maoromaoro Heva ia hereva henia lasi, to gaigai ena uduna amo ia hereva henia. Unai koikoi dalana ese Satani ena kara korikorina ia hahedinaraia—ia be dala kererena ia gaukaralaia henaohenao tauna dikana. Danu, magu lalonai ia vareai idau tauna ia ura mamoe be edia biaguna amo ia henaoa. Momokani, iena dika ese henaoa tauna ena dika ia hanaia, badina ia ura mamoe ia “alaia, bona hadikaia ore” danu. (Ioane 10:10) Unai hegeregerena, Satani be henaohenao tauna. Heva ia koia neganai, Heva ena badinaia karana Dirava amo ia henaoa. Satani ese taunimanima dekenai mase ia mailaia danu. Unai dainai, ia be ala-ala tauna.
8. Edena dala ai Satani ese Iehova ena hereva bona ena kara ena badina ia mogea?
8 Satani ena koikoi karana be Iehova ena hereva bona ena kara ena badina ia mogea dalana amo ia hedinarai. Ia be Heva ia nanadaia: “Momokani, uma gabu ena au huahua ta ania lasi taravatu Dirava ese ia atoa o lasi?” Satani be ia hoa koikoi bamona, hegeregere ia gwau: ‘Dirava be ia laloa maoromaoro lasi momokani, ani?’ Ma ia gwau: “Dirava . . . ia diba, umui ania neganai aonega do umui davaria.” Mani iena hereva oi laloa, ia gwau: “Dirava . . . ia diba.” Inai be hegeregere Satani ia gwau: ‘Dirava ia diba gaudia lau diba. Ena kara ena badina lau diba, bona ia dika.’ (Genese 2:16, 17; 3:1, 5) Madi, Heva bona Adamu be unai idau tauna ena gadona amo idia siri lasi. To, idia badinaia bona idia sibodia bona edia natudia dekenai dika idia havaraia.—Roma 5:12, 14.
9. Dahaka dainai ita diba hari inai negai idau taudia edia gadona do ita kamonai?
9 Satani ese hari Dirava ena taunimanima koia totona unai bamona daladia ia gaukaralaia danu. (Apokalupo 12:9) Ia be “koikoi ibounai edia tamana,” bona ia bamona taudia, Dirava ena hesiai taudia idia koia toho taudia unai, be iena natudia. (Ioane 8:44) Mani unai idau taudia edia gadona be hari ita kamonai daladia haida, ita itaia.
Hari Idau Taudia Edia Gadona Ita Kamonai Daladia
10. Idau taudia edia gadona ita kamonai dalana ta be dahaka?
10 Hadibaia hereva koikoidia. Aposetolo Paulo ia gwau: “Do umui naria, hadibaia hereva idauidau ese dala maorona dekena amo umui idia hakaua kerere garina.” (Heberu 13:9) Edena bamona hadibaia herevadia? Ita idia “hakaua kerere” diba dainai, ia hedinarai Paulo ese lauma dalanai iseda noho idia hadikaia diba hadibaia herevadia ia herevalaia. Daidia ese unai bamona hadibaia hereva idaudia idia gwauraia? Paulo ese Keristani elda taudia haida ia hamaoroa: “Emui huanai tatau haida do idia toreisi, hereva koikoi do idia gwauraia, bona diba tahua taudia do idia hakaua kerere.” (Kara 20:30) Momokani, Paulo ena nega hegeregerena hari danu, guna Keristani kongrigeisen lalonai idia noho taudia haida ese hari mamoe idia hakaua kerere totona “hereva koikoi”—hereva momokani ena kahana sibona eiava idia koikoi momokani herevadia—idia gwauraia. Aposetolo Petero ia gwau bamona, idia ese “sivarai koikoi” idia gaukaralaia—unai sivarai edia toana be momokani, to idia be anina lasi.—2 Petero 2:3.
11. Edena dala ai 2 Petero 2:1, 3 ena hereva ese aposteit taudia edia gaukara dalana bona edia ura korikorina ia hahedinaraia?
11 Petero ese aposteit taudia edia dala ia hahedinaraia noho bona ia gwau “hunia dekenai hereva koikoi do idia gwauraia.” (2 Petero 2:1, 3) Iesu ia gwauraia mamoe edia magu ena haheitalai lalonai, henaoa tauna be “magu ena iduara dekenai ia raka vareai lasi, to magu ena iduara ia noho lasi gabuna dekenai ia hanaia kava” hegeregerena, aposteit taudia be hehuni daladia ai ita dekenai idia hereva toho. (Galatia 2:4; Iuda 4) Dahaka dainai unai bamona idia karaia? Petero be ma ia gwau: “Sivarai koikoi dekena amo umui emui lalona do idia ania.” Momokani, herevana aposteit taudia be dahaka idia gwau, to edia ura korikorina be idia ‘henaohenao, alaia, bona hadikaia ore.’ (Ioane 10:10) Unai bamona idau taudia dainai oi naria namonamo!
12. (a) Edena dala ai ita bamoa taudia amo idau taudia edia gadona ita kamonai diba? (b) Satani bona hari negai idia noho idau taudia edia kara be edena dala ai idia hegeregere?
12 Hebamo dikadia. Idau taudia edia gadona be ita bamoa taudia amo ita kamonai diba. Hebamo dikadia ese matamata taudia idia hadikaia haraga. (1 Korinto 15:33) Laloaboio lasi, Satani ese Heva—tau bona hahine ginigunadia amo ia matamata bona ena diba be ia do bada lasi hahinena—ia hereva henia. Heva ena lalona ia ania bena ia abia dae Iehova ese ena ura kwalimu ia koua momokani, to unai be koikoi. Iehova be ia havaraia taunimanima ia lalokau henia bona edia namo ia laloa bada. (Isaia 48:17) Hari danu be unai bamona, idau taudia ese umui matamata taudia emui lalona idia ania toho, idia ura umui abia dae emui Keristani tama sina ese emui ura kwalimu idia koua momokani. Edena dala ai unai bamona idau taudia edia gadona ese oi idia veria diba? Keristani kekeni ta ia gwau: “Nega sisina lalonai egu sikuli turadia ese egu abidadama idia hamanokaia. Idia gwau loulou egu tomadiho ena taravatu be momo bona idia auka.” To momokani, emui tama sina ese umui idia lalokau henia. Unai dainai, emui sikuli turadia ese emui tama sina umui abidadama henia lasi totona emui lalona idia ania neganai, unai koikoi herevana umui abia dae lasi, Heva ese ia abia dae bamona.
13. Davida be dahaka aonega dalana ia badinaia, bona edena dala ta ai ia ita tohotohoa diba?
13 Salamo torea tauna Davida ese hebamo dikadia ia herevalaia, ia gwau: “Koikoi taudia danu lau helai noho lasi, bona kara maoromaoro koikoi taudia danu, be lau haboua tamona lasi.” (Salamo 26:4) Idau taudia ese idia gaukaralaia dalana ma ta oi itaia lou, a? Sibodia edia kara korikorina idia hunia—Satani ese gaigai ia gaukaralaia dalana ai, ia sibona ena kara ia hunia bamona. Hari, matabodaga taudia haida ese edia kara bona ura korikorina be Internet amo idia hunia. Kompiuta ai taunimanima be ta ta dekenai idia tore heheni diba, idia matabodaga taunimanima badadia be haida idia tore henia neganai idia gwau idia be matamata taudia bona tarapu lalonai umui idia veria toho. Umui matamata taudia e, mani umui naria namonamo lauma dalanai dika umui davaria garina.—Salamo 119:101; Aonega Herevadia 22:3.
14. Edena dala ai nius halasia oreadia ese nega haida idau taudia edia gadona idia halasia?
14 Samania hereva koikoidia. Ena be niusi lalonai idia halasia sivarai haida Iehova ena Witnes taudia dekenai be maoro, to nega haida idau taudia edia gadona idia halasia. Hegeregere, tano ta dekenai niusi koikoina idia halasia, idia gwau Tanobada Tuarina Iharuana lalonai Witnes taudia ese Hitler idia durua. Tano ma ta ai, sivarai ta ese Witnes taudia ia samania ia gwau idia ese dubu idia hadikadia. Tano momo dekenai nius halasia oreadia idia koikoi idia gwau, Witnes taudia ese edia natudia totona medikol heduru idia tahua lasi bona edia tadikaka edia kara dika badadia idia hunia. (Mataio 10:22) Ena be unai ia vara, to ita idia diba kudou maoro taudia idia diba unai bamona samania herevadia be koikoi.
15. Dahaka dainai nius halasia oreadia ese idia halasia gaudia iboudiai ita abia dae be aonega karana lasi?
15 Dahaka ita karaia be namo, bema unai bamona idau taudia ese samania herevadia idia halasia? Namona be Aonega Herevadia 14:15 ena sisiba ita badinaia, ia gwau: “Mai ena lalona kehoa lasi tauna ese, hereva ibounai ia hamomokania noho, to laloa kehoa tauna ese, iena raka dalana ia laloa namonamo noho.” Nius halasia oreadia ese hereva momokani bamona idia halasia gaudia iboudiai ita abia dae be aonega karana lasi. Ena be inai tanobada ese ia halasia hereva ibounai ita dadaraia lasi, to ita diba momokani “Satani ese tanobada taudia ibounai ia gunalaia noho.”—1 Ioane 5:19.
“Do Umui Tohoa Guna”
16. (a) Edena dala ai mamoe korikoridia edia kara ese Iesu ena hereva Ioane 10:4 dekenai ia hamomokania? (b) Baibel ese ita ia hagoadaia dahaka ita karaia totona?
16 To, edena dala ai ita diba momokani ita kamonai gadona be turana ta ena eiava ita inai henia tauna ta ena? Iesu ia gwau mamoe be naria tauna murinai idia raka badina “iena gadona idia diba.” (Ioane 10:4) Mamoe be naria tauna ena toana dainai ia murinai idia raka lasi; iena gadona dainai unai bamona idia karaia. Baibel tanodia ia herevalaia bukana ta ia gwau, vadivadi tauna ta be ia gwau mamoe ese edia naria tauna be ena dabua amo idia diba, iena gadona amo lasi. Mamoe naria tauna ta ia gwau idia be ena gadona idia diba. Unai ia hamomokania totona ia ese unai idau tauna ida ena dabua ia haidaua. Idau tauna be mamoe naria tauna ena dabua ia hahedokilaia bona mamoe ia boiria neganai, ia dekenai idia lao lasi. Ena gadona idia diba lasi. To, mamoe naria tauna ese idia ia boiria neganai, herevana ena toana be idau, to mamoe be karaharaga ia dekenai idia lao. Unai amo ita diba, ena be ta ena toana be mamoe naria tauna ena bamona, to mamoe dekenai unai ese ia hamomokania lasi ia be naria tauna. Mamoe ese boiria tauna ena gadona idia tohoa bona edia naria tauna ena gadona ida idia hahegeregerea. Dirava ena Hereva ese ita ia hagoadaia unai bamona ita karaia danu—“do umui tohoa guna, do umui davaria, Dirava ena Lauma ia abia momokani, o lasi.” (1 Ioane 4:1; 2 Timoteo 1:13) Dahaka ese ita do ia durua unai ita karaia totona?
17. (a) Edena dala ai Iehova ena gadona ita dibaia? (b) Iehova ita diba namonamo neganai dahaka ita karaia diba?
17 Ita lalo-parara diba, Iehova ena gadona, eiava hereva, ita diba namonamo neganai, do ita hegeregere idau tauna ena gadona ita diba totona. Baibel ese unai bamona diba ita abia dalana ia hahedinaraia. Ia gwau: “Gadona do umui kamonai, do ia gwau, ‘Dala be inai, ia dekenai do umui raka lao.’ ” (Isaia 30:21) Unai “gadona” be Dirava ena Hereva amo ia mai. Dirava ena Hereva ita duahia negadia ibounai lalonai, ita ese iseda Naria Tauna Badana, Iehova, ena gadona ita kamonai bamona. (Salamo 23:1) Unai dainai, Baibel ita stadilaia goadagoada neganai, Dirava ena gadona do ita dibaia namonamo. Unai diba namona dainai idau taudia edia gadona do ita diba maoromaoro.—Galatia 1:8.
18. (a) Iehova ena gadona ita diba ena anina be dahaka? (b) Mataio 17:5 ena hereva hegeregerena, dahaka dainai Iesu ena gadona ita kamonai henia be namo?
18 Iehova ena gadona ita diba ena anina ma ta be dahaka? Ita kamonai sibona lasi, to ita badinaia danu. Mani Isaia 30:21 oi laloa lou. Dirava ena Hereva ia gwau: “Dala be inai.” Oibe, Baibel stadilaia karana amo Iehova ena hadibaia herevadia ita kamonai. Bena ia gwau: “Ia dekenai do umui raka lao.” Iehova ia ura ita kamonai herevadia hegeregerena do ita karaia. Unai dainai, ita dibaia gaudia ita badinaia karana amo ita hahedinaraia Iehova ena gadona ita kamonai henia. (Deuteronomi 28:1) Iehova ena gadona ita kamonai henia ena anina ma ta be Iesu ena gadona ita kamonai henia, badina Iehova ese ita ia hamaoroa unai ita karaia be namo. (Mataio 17:5) Iesu, Mamoe Naria Tauna Namona, ese ita ia hamaoroa dahaka ita karaia totona? Ia ese ita ia hadibaia taunimanima be hahediba taudia do ita halaoa bona “hesiai tauna mai ena kamonai, bona mai ena kara maoromaoro” do ita abidadama henia. (Mataio 24:45; 28:18-20) Iena gadona ita kamonai henia karana amo mauri hanaihanai do ita abia.—Kara 3:23.
“Ia Dekena amo Do Idia Heau Siri”
19. Idau taudia edia gadona dainai dahaka ita karaia be namo?
19 Vadaeni, idau taudia edia gadona dainai dahaka ita karaia be namo? Mamoe idia karaia bamona ita karaia be namo. Iesu ia gwau: “Idau tauna ena murina dekenai do idia raka lasi, lasi momokani. Ia dekena amo do idia heau siri.” (Ioane 10:5) Do ita karaia gaudia be rua. Ginigunana be, ‘idau tauna ena murina dekenai do ita raka lasi.’ Oibe, idau tauna ita dadaraia momokani. Momokani, Baibel idia torea neganai idia gaukaralaia Greek herevana idia hahanaia, “do idia raka lasi,” ese unai gado ai dadaraia karana goadana ia hahedinaraia. (Mataio 24:35; Heberu 13:5) Iharuana be, ‘ia dekena amo do ita heau siri,’ eiava ia ita dadaraia. Unai dala maorodia ita badinaia, unai dala sibona amo Mamoe Naria Tauna Namona ena gadona ida idia hegeregere lasi hadibaia herevadia, ita dadaraia diba.
20. Dahaka do ita karaia bema (a) aposteit taudia koikoidia, (b) hebamo dikadia, (c) niusi halasia oreadia edia maoro lasi sivaraidia ita kamonai neganai?
20 Unai dainai, aposteit lalohadai idia gwauraia taudia ita davaria neganai, ita ura Dirava ena Hereva ita badinaia, ia gwau: “Ekalesia orea idia hapararaia taudia bona taunimanima haida edia abidadama idia hadikaia taudia do umui naria namonamo. Ai ese umui dekenai ai henia vadaeni hadibaia hereva idia ura hamakohia gwauraia. Idia dekena amo do umui raka siri.” (Roma 16:17; Tito 3:10) Unai hegeregerena, hebamo dikadia dainai dika idia davaria gwauraia Keristani matamata taudia, ese Paulo be matamata tauna Timoteo dekenai ia henia sisibana idia badinaia be namo, ia gwau: “Uhau edia lebulebu karadia do oi rakatania.” Bona nius halasia oreadia ese ita idia samania koikoi neganai, Paulo ena sisiba hereva ma haida Timoteo dekenai do ita laloatao, ia gwau: “Gori kavakava do idia kamonai henia [idau taudia edia gadona unai]. To oi ese nega ibounai do oi laloa maoromaoro.” (2 Timoteo 2:22; 4:3-5) Herevana idau taudia edia gadona ia namo herea, to iseda abidadama idia hadikaia diba gaudia iboudiai amo ita heau siri.—Salamo 26:5; Aonega Herevadia 7:5, 21; Apokalupo 18:2, 4.
21. Idau taudia edia gadona idia dadaraia taudia ese dahaka davana namona do idia abia?
21 Horoa Keristani taudia ese idau taudia edia gadona idia dadaraia noho karana amo, Mamoe Naria Tauna Namona ena hereva Luka 12:32 lalonai idia kamonai henia. Iesu be idia dekenai ia gwau: “Orea maragi e, umui gari lasi, badina emui Tamana ese ia hereva vadaeni Basileia do ia henia umui dekenai.” Unai hegeregerena, “mamoe idaudia” be mai edia ura bada ida Iesu ena hereva do idia kamonai negana idia naria noho, do ia gwau: “Umui mai, egu Tamana ese ia hanamoa taudia e, Basileia umui abia, tanobada ia karaia neganai, ia ese ia karaia hegaegae umui emui.” (Ioane 10:16; Mataio 25:34) Bema “idau taudia edia gadona” ita dadaraia, davana namo hereana do ita abia!
Oi Laloatao, A?
• Edena dala ai Satani be Iesu ese mamoe edia magu ena haheitalai lalonai ia herevalaia idau tauna bamona?
• Edena dala ai idau taudia edia gadona be hari ita kamonai?
• Edena dala ai idau taudia edia gadona ita diba?
• Idau taudia edia gadona dainai dahaka ita karaia be namo?
[Picture on page 27]
Maria be Keriso ena gadona ia diba
[Picture on page 28]
Idau tauna be dala idauna amo mamoe dekenai do ia lao
[Picture on page 31]
Idau taudia edia gadona dainai dahaka ita karaia?