Dirava Danu Do Oi Raka, A?
“Mai manau danu Dirava danu do ita raka hebou.”—MIKA 6:8.
1, 2. Tama ta ese ena natuna dekenai raka dalana ia hadibaia hegeregerena, Iehova ena kara be edena bamona?
BEIBI ta be ia raka matamaia neganai, metairametaira tamana dekenai ia raka lao. Ita dekenai reana unai be gau maragina sibona, to tama sina dekenai beibi ia raka matamaia be mai anina bada gauna. Badina nega vaira ai, hua ta ta bona lagani ta ta lalonai, edia natuna ena imana do idia dogoatao bona ia danu do idia raka hebou. Anina be tauanina bona hemami dalanai, edia natuna do idia naria, idia durua bona idia hakaua.
2 Iehova Dirava ese ena tanobada natudia be unai bamona ia laloa danu. Guna, iena taunimanima Israela taudia, be inai bamona ia gwauraidia: “Israela ena raka dalana lau hadibaia. Egu imana dekenai egu bese taudia lau rosia, . . . Mai lalokau bona bogahisihisi danu dekena amo lau hakaudia.” (Hosea 11:3, 4) Inai siri lalonai Iehova be hegeregere mai ena lalokau tama ta bamona, mai haheauka ida natuna dekenai raka dalana ia hadibaia noho bona ia moru gwauraia neganai, ia rosia. Iehova, iseda Tamana namona, be ia ura ita dekenai raka dalana ia hadibaia. Bona iseda raka dalanai ita goada ita lao neganai, ia be mai moale ida ita danu ia raka hebou. Oibe, iseda siri badana ia hahedinaraia bamona, Dirava danu ita raka diba! (Mika 6:8) To, Dirava danu ita raka ena anina be dahaka? Dahaka dainai unai ita karaia be namo? Edena dala ai Dirava danu ita raka diba? Bona, Dirava danu ita raka neganai, dahaka hahenamo ita abia? Mani unai henanadai ta ta edia haere ita tahua.
Dirava Danu Ita Raka Anina be Dahaka?
3, 4. (a) Dahaka dainai Iehova danu ita raka ena haheitalai be haheitalai namona? (b) Dirava danu ita raka ena anina be dahaka?
3 Oibe, Iehova be lauma dainai, tauanina dalanai ia danu ita raka hebou diba lasi. (Esodo 33:20; Ioane 4:24) Unai dainai Baibel ese taunimanima be Iehova danu idia raka karana be laulau dalanai ia herevalaia. Herevana, oi be edena hanua tauna, to turana ta ida raka hebou karana ena haheitalai oi lalopararalaia namonamo diba, ani? Unai haheitalai ese lalokau bona hetura karana ia hahedinaraia. Dirava danu ita raka hebou neganai, unai bamona hemami ita abia diba. Mani, unai kara ita tahua namonamo.
4 Abidadama taudia Enoka bona Noa mani oi laloa. Dahaka dainai Baibel ia gwau idia be Dirava danu idia raka? (Genese 5:24; 6:9, NW ) Baibel lalonai, inai hereva “raka” ena anina be mauri dalana ta badinaia karana. Enoka bona Noa be edia nega ai idia noho taudia edia kara idia tohotohoa lasi, to Iehova ena hakaua dalana bona ena sisiba idia badinaia. Idia ese Iehova idia abidadama henia. Anina be Iehova ese idia totona abia hidi ibounai ia karaia, a? Lasi. Iehova ese taunimanima dekenai ura kwalimu ia henia, bona ia ura idia ese mai laloa maoromaoro ida edia ura kwalimu do idia gaukaralaia. (Roma 12:1, NW ) To, abia hidi ita karaia neganai, ita manau be gau badana bona Iehova ena lalohadai hereadaena ese iseda laloa maoromaoro karana ia biagua be namo. (Aonega Herevadia 3:5, 6; Isaia 55:8, 9) Unai bamona ita karaia neganai, iseda mauri lalonai ita be Iehova danu ita raka hebou.
5. Mataio 6:27 ai Iesu ena hereva ena anina be dahaka?
5 Baibel ese mauri ia herevalaia neganai, nega momo ia be laolao ta eiava gabu daudauna ta dekenai raka lao karana ia herevalaia. Hegeregere, Iesu ia gwau: “Umui daika be ena laloa hekwarahi dekena amo iena mauri ena nega sisina do ia halataia diba, a?” (Mataio 6:27) Iesu ena hereva ena anina be dahaka? Iesu ia hahedinaraia iseda mauri be laolao ta bamona. Bona lalohekwarahi momo karana ese iseda mauri ia halataia diba lasi. Unai ena anina be Iehova danu ita raka hebou karana be nega sisina gauna sibona, a? Lasi! Vadaeni, mani iseda henanadai iharuana ita laloa, Dahaka dainai Dirava danu ita raka be namo?
Dahaka Dainai Dirava Danu Ita Raka be Namo?
6, 7. Dahaka dainai Iehova ena heduru ita tahua be namo?
6 Dirava danu ita raka be namo ena badina ta be Ieremia 10:23 ese ia gwauraia: “Lohiabada e, lau diba taunimanima edia mauri dalana, be idia sibona ese idia naria lasi, bona taunimanima ta lasi ese iena mauri ia biagua noho.” Unai dainai, ita taunimanima be hegeregere lasi sibona eda mauri dalana ita abia hidi totona. Dirava ese ita do ia hakaua be namo. Sibodia edia ura idia karaia, bona Dirava idia dadaraia taudia be Adamu bona Heva bamona idia kerere. Adamu bona Heva idia laloa idia be mai edia maoro, namo bona dika idia abia hidi totona. (Genese 3:1-6) To, ita be hegeregere lasi unai abia hidi ita karaia totona.
7 Emu mauri ena laolao lalonai oi mamia ta ese oi ia hakaua be namo, a? Dina ta ta ai ita be abia hidi badadia bona maragidia ita karaia. Unai abia hidi haida be auka bona ita bona iseda lalokau taudia edia vaira negana idia haidaua diba. Ena mauri lagani ia bada tauna ta mai ena aonega be mai moale ida ia ura ita ia durua abia hidi ita karaia totona! To madi, hari, taunimanima momo be sibodia edia lalohadai bona ura idia badinaia. Aonega Herevadia 28:26 ena hereva idia laloa lasi, ia gwau: “Sibona ena lalona dekenai ia abidadama henia tauna be kavakava, to aonega ena dala dekenai ia raka tauna, be do ia mauri.” Iehova ia ura lasi iseda koikoi momo kudouna ita badinaia, bena dika ita davaria. (Ieremia 17:9) Ia ura ia do ita abidadama henia, badina ia ese aonega dalanai ita do ia hakaua bona hadibaia. Unai bamona ita karaia neganai, iseda mauri ena laolao lalonai, noho namo, maino bona moale do ita davaria.
8. Kara dika dainai dahaka ia vara taunimanima dekenai, to Iehova ena ura be dahaka ita totona?
8 Dirava danu ita raka be namo ena badina ma ta be, ita ura Iehova ida nega daudau ita raka. Baibel ese ia hahedinaraia goevadae lasi taudia ibounai be gabu tamona dekenai idia raka lao noho. Hadibaia Tauna 12:5 be buruka taudia ese idia davaria hekwakwanai ia gwauraia: “Ita be iseda laga-ani gabuna, dokona dekenai ita lao noho, bona mase dainai idia taitai taudia be ariara dekenai idia tai noho.” Unai “laga-ani gabuna” be dahaka? Ia be gara gabuna—ita mase neganai unuseniai ita lao. (Roma 6:23) To, Iehova ia ura lasi ita vara, nega kwadogina sibona lalonai Ia danu ita raka hebou, bena ita mase. (Iobu 14:1) Oibe, bema Dirava danu ita raka noho, do ita mauri ela bona hanaihanai. Unai dainai oi ura mauri hanaihanai oi abia, a? Vadaeni, namona be emu Tamana danu oi raka.
Edena Dala ai Dirava Danu Ita Raka Diba?
9. Dahaka dainai Iehova be nega haida ena taunimanima amo ia hunia, to Isaia 30:20 ese dahaka hagoadaia herevana ia gwauraia?
9 Iseda henanadai ihatoina do ita laloa namonamo be gau badana. Unai henanadai be: Edena dala ai Dirava danu ita raka diba? Isaia 30:20, 21 ia gwau: “Ia be umui dekenai do ia noho, umui do ia hadibaia, bona ia ese sibona umui dekena amo do ia hunia lasi. Badina be emui matadia dekenai, emui Hadibaia Tauna do umui itaia. Bona bema idiba kahanai o lauri kahanai do umui raka siri neganai, emui Hadibaia Tauna ena gadona do umui kamonai, do ia gwau, ‘Dala be inai, ia dekenai do umui raka lao.’ ” Isa 30 Siri 20 ena hereva ese ia hahedinaraia Israela taudia be idia gwau-edeede neganai, Iehova be idia amo ia hunia. (Isaia 1:15; 59:2) To, inai siri ese ma ia hahedinaraia, Iehova be do ia hunia lasi to iena abidadama taudia vairanai do ia gini. Unai be hegeregere, tisa tauna be klasrum lalonai ia hadibaia natudia vairanai ia gini bona idia dekenai ia ura hadibaia gaudia ia herevalaia.
10. Edena dala ai Iehova ena gadona ita kamonai?
10 Siri 21 be haheitalai idauna ta ia gwauraia. Ia gwau Iehova be hegeregere iena taunimanima edia murinai ia raka bamona, bona idia ia hamaorodia edena dala dekenai do idia raka lao. Diba bada taudia idia gwau unai haheitalai be hegeregere, nega haida mamoe naria tauna be iena mamoe serina murinai ia raka bona ia boiboi, unai amo mamoe be dala maorona dekenai idia raka diba. Unai haheitalai ena anina be dahaka ita dekenai? Ena be Dirava ena Hereva be lagani tausen gunanai idia torea, to ita idia durua diba. Vadaeni, ita gwau diba Dirava be iseda murinai ia raka bona ena gadona ita kamonai bamona. Herevana Baibel be idaunegai idia torea, to hari inai negai ia be mai anina bada ita dekenai. Dina ta ta lalonai abia hidi ita karaia neganai, Baibel ena sisiba herevadia ese ita idia hakaua, bona iseda nega vairadia totona, abia hidi maorodia ita karaia diba. (Salamo 119:105) Unai bamona sisiba ita tahua bona ita badinaia neganai, Iehova ese ita ia hakaua bona ita be ia danu ita raka hebou.
11. Ieremia 6:16 ai, Iehova ese ena taunimanima ia noia dahaka idia karaia totona, bona edena bamona idia haere?
11 Ita be Dirava ena hakaua herevadia Baibel lalonai ita badinaia momokani, a? Nega haida mai momokani ida ita ta ta eda kara ita tahua be namo. Unai ita karaia totona siri ta mani ita laloa: “Lohiabada ia hereva, ia gwau, ‘Israela besena e, umui emui vairana dekenai idia noho daladia edia huanai, do umui laloa namonamo edena dala do umui raka. Umui ese emui tubuna taudia edia dala do umui tahua, bona unai dala do umui badinaia. Oibe, unai dala gunana dekenai do umui raka, vadaeni maino do umui davaria.’ ” (Ieremia 6:16) Unai hereva ita duahia neganai, ita ese laolao tauna ta ita laloa—ia vairana dekenai dala rua idia noho bona dala maorona ia abia hidi totona ma haida ia nanadaia. Lauma dalanai Iehova ena Israela besena be unai bamona idia karaia be namo. To, idia kamonai lasi dainai “dala gunana” idia rakatania. Unai “dala gunana” be edia tubuna taudia ese idia rakalaia dalana bona unai dala idia badinaia lou be namo. To madi, Israela besena be idia ura lasi Iehova ena sisiba idia badinaia. Unai siri ma ia gwau: “Israela taudia idia gwau, ‘Lasi, ai be unai dala dekenai do ai raka lasi.’ ” To, hari inai negai, Dirava ena taunimanima edia kara be idau.
12, 13. (a) Edena dala ai Keriso ena horoa tadikakadia ese Ieremia 6:16 ena sisiba idia badinaia? (b) Edena dala ai ita sibona ita raka dalana ita tahua be namo?
12 Lagani 1800 dokonai, Iesu ena horoa Keristani taudia ese Ieremia 6:16 ena hereva idia badinaia. Unai orea be mai edia kudouna ibounai ida unai “dala gunana” dekenai idia raka. Kerisendom be Iehova idia rakatania to horoa oreana be unai bamona lasi. Idia be mai abidadama ida, aposetolo taudia ese idia karaia hegeregerena, Iesu Keriso ese ia hadibaia “hereva momokani” idia badinaia. (2 Timoteo 1:13) Ena be Kerisendom ese unai dala ia dadaraia, to horoa oreana taudia ese idia ta ta bona “mamoe idaudia” idia durua, mauri dalana namona idia badinaia noho totona.—Ioane 10:16.
13 Hesiai tauna mai ena kamonai oreana ese lauma aniani be nega korikorina ai ia henia dainai, taunimanima milioni momo ia durua Dirava danu “dala gunana” dekenai idia raka totona. (Mataio 24:45-47) Oi be unai taudia ta, a? Bema oibe, dahaka do oi karaia unai dala oi rakatania lasi totona? Aonega dalana be nega ta ta ai, oi sibona emu mauri lalonai oi raka dalana oi tahua be namo. Bema, oi ese dina ta ta ai Baibel bona Baibel bukadia oi duahia bona hari horoa taudia ese idia hegaegaelaia heboudia dekenai oi lao, oi be Dirava danu oi raka dalana do oi diba. Bona, oi idia henia sisiba be mai manau ida oi badinaia neganai, oi be Dirava danu unai “dala gunana” dekenai oi raka noho.
Ita Itaia Diba Lasi Diravana be Matana Dekenai Ita Itaia Bamona
14. Bema ita abia dae Iehova be ia noho momokani, abia hidi ita karaia neganai edena bamona unai ia hedinarai?
14 Dirava ida ita raka totona, namona be ita abia dae Iehova be ia noho momokani. Namona be ita laloatao, Iehova ese Israela bese taudia ia hamaoroa ia be idia amo ia hunia lasi. Hari, ia be Hadibaia Tauna Badana bamona sibona ia hahedinaraia iena taunimanima dekenai. Oi dekenai Iehova be hegeregere oiemu vairanai ia gini momokani bona oi ia hadibaia noho, a? Bema ita ura Dirava danu ita raka, unai bamona abidadama ita hahedinaraia be gau badana. Mose ena abidadama be unai bamona badina “ita itaia diba lasi Diravana, be Mose ese matana dekenai ia itaia bamona.” (Heberu 11:27) Bema ita abia dae Iehova be ia noho momokani, abia hidi ita karaia neganai, ita ese iena lalohadai do ita laloa guna. Namo lasi inai bamona ita laloa: ‘Kerere ta lau karaia diba, bona egu ruma bese eiava elda taudia amo do lau hunia.’ Herevana taunimanima ese ita idia itaia eiava lasi, to do ita hekwarahi bada Dirava danu ita raka totona. King Davida bamona iseda lalona do ita hadaia: “Egu ruma dekenai do lau noho namonamo, mai egu kerere ta lasi.”—Salamo 101:2.
15. Tadikaka bona taihu ida ita hebamo karana ese edena dala ai ita dekenai ia hahedinaraia, Iehova be ia noho momokani?
15 Iehova ia laloparara ita be goevadae lasi taudia, unai dainai ita itaia lasi gaudia ita abidadama henia be auka. (Salamo 103:14) To, Iehova ese ita ia durua unai gaudia ita abidadama henia totona. Hegeregere, tanobada besedia ibounai amo, taunimanima ia gogodia bona ‘iena bese taudia ai ia halaodia.’ (Kara 15:14) Mai lalotamona ida Iehova ita tomadiho henia neganai, ta ta ita hagoadaia heheni. Iehova ese tadikaka eiava taihu ta ia durua bona ena manoka karana eiava hekwakwanai ta ia hanaia dalana ita kamonai neganai, ita diba Iehova be ia noho momokani.—1 Petero 5:9.
16. Iesu ena kara ita stadilaia ese edena bamona ita ia durua Dirava danu ita raka totona?
16 Iehova ena Natuna ese haheitalai namona ia hahedinaraia ita dekenai. Iesu ia gwau: “Dala be lau, hereva momokani be lau, mauri danu lau. Tamana dekenai do idia lao taudia ibounai edia dala ta be lasi, lau sibona.” (Ioane 14:6) Iesu ena mauri tanobada dekenai ita stadilaia karana ese ita ia durua ita abia dae Iehova be ia noho momokani. Iesu ena hereva bona kara ibounai ese iena guba Tamana ena kara ia hahedinaraia. (Ioane 14:9) Abia hidi ita karaia neganai, namona be ita laloa namonamo: Bema Iesu ese unai abia hidi ia karaia, dahaka do ia karaia? Bema ita ura abia hidi maorona ita karaia, namona be ita laloa namonamo bona ita gurigurilaia guna. Unai bamona ita karaia neganai, ita be Keriso ena aena gabudiai ita raka unai. (1 Petero 2:21) Anina be Dirava danu ita raka noho.
Hahenamo
17. Bema Iehova ena dala dekenai ita raka, edena bamona “maino” do ita davaria?
17 Iehova Dirava danu ita raka be mauri namona momokani. Bema iena taunimanima ese “dala gunana” idia badinaia, Iehova ia gwauhamata hahenamo ta do idia abia. Ia gwau: “Unai dala gunana dekenai do umui raka, vadaeni maino do umui davaria.” (Ieremia 6:16) “Maino” ena anina be hekwakwanai lasi maurina do idia noholaia, a? Lasi. Iehova ese gau hereadaena ta ia gwauraia, taga taudia ese idia abia diba lasi gauna unai. Maino do oi davaria, anina be emu lalona dekenai maino korikorina ia noho, oi moale, bona lauma dalanai oi goada. Unai bamona maino ia hahedinaraia oi moale diba badina oi ese mauri dalana namona oi abia hidi. Inai tanobada dekenai, unai bamona maino ita davaria be auka!
18. Iehova ia ura dahaka hahenamo ia henia oi dekenai, bona emu lalona oi hadaia dahaka oi karaia totona?
18 Oibe, ena be ita mauri daudau lasi, to nega sisina lalonai ita mauri be hahenamo badana. Iehova ia ura lasi nega sisina sibona lalonai oi mauri. To, Iehova ia ura oi ese hahenamo badana do oi abia. Ia ura oiemu mauri ena laolao lalonai, ia danu do oi raka ela bona hanaihanai! Mika 4:5 ese unai ia hahedinaraia goevagoeva: “Bese ta ta ibounai ese sibodia edia dirava, edia dirava idia tomadiho henia bona kamonai henia. To ita ese Lohiabada, iseda Dirava do ita tomadiho henia, bona kamonai henia, ela bona hanaihanai.” Oi ura unai hahenamo oi abia, a? Oi ura Iehova ese ia gwauraia “mauri korikori” oi abia, a? (1 Timoteo 6:19, NW ) Vadaeni, namona be emu lalona oi hadaia, hari dina amo ela bona hanaihanai, Iehova ida oi raka totona!
Edena Bamona Do Oi Haere?
• Dirava danu ita raka ena anina be dahaka?
• Dahaka dainai oi ura Dirava danu oi raka?
• Dahaka ese oi do ia durua Dirava danu oi raka totona?
• Dirava danu idia raka taudia ese dahaka hahenamo idia abia?
[Pictures on page 25]
Baibel amo Iehova ena gadona ita kamonai, ia gwau: “Dala be inai, ia dekenai do umui raka lao”
[Picture on page 26]
Keristani heboudia ai, lauma aniani be nega korikori ai ita abia