Iehova Ena “Hereva” Ia Moru Diba Lasi

“Lohiabada ena hereva do lau harorolaia, inai bamona lau dekenai ia gwau, ‘Oi be lauegu natuna, . . . Lau dekenai oi noinoi, vadaeni lau ese bese idauidau ibounai, be oi dekenai do lau henia.’ ”​—SALAMO 2:​7, 8.

1. Dirava ena ura bona tanobada besedia edia ura be edena bamona idia idau?

IEHOVA DIRAVA be mai ena ura taunimanima bona tanobada totona. Tanobada besedia danu be mai edia ura. To edia ura bona Dirava ena ura be idia idau momokani! Unai ita hoalaia lasi, badina Dirava ia gwau: “Guba be tanobada ena ataiai daudau herea hegeregerena, lauegu dala be emui dala edia ataiai idia noho, bona egu laloa be emui laloa edia ataiai idia noho.” Dirava ena ura be do ia guguru momokani, badina ma ia gwau: “Lauegu hereva be sinou bona medu bamona. Guba dekena amo idia diho mai, tanobada idia hapariparia totona. Idia ese uiti bona koni idia hatubua daekau. Ma uhe idia havaraia noho, hadohado totona, bona taunimanima do idia ania totona danu. Inai bamona danu, lau ese lau gwauraia hereva, be anina do ia havaraia, bona lau dekenai do ia giroa kava lasi. Lau siaia totona gaukarana be do ia karaia momokani.”—Isaia 55:9-11.

2, 3. Salamo ena karoa iharuana ese dahaka ia hahedinaraia goevagoeva, to dahaka henanadai idia vara?

² Salamo ena karoa iharuana ese ia hahedinaraia goevagoeva Dirava ena ura ena Mesia Pavapavana totona be do ia guguru momokani. Ena torea tauna, idaunegai Israela ena King Davida, be Dirava ena lauma amo ia peroveta, mai anina bada negana ta ai tanobada besedia do idia heiriheiri. Edia lohia taudia ese Iehova Dirava bona ia Horoa Tauna do idia tuari henia. To, Salamo torea tauna be ma ia gwau: “Lohiabada ena hereva do lau harorolaia, inai bamona lau dekenai ia gwau, ‘Oi be lauegu natuna, . . . Lau dekenai oi noinoi, vadaeni lau ese bese idauidau ibounai, be oi dekenai do lau henia. Tanobada ibounai oi dekenai do lau henia.’ ”—Salamo 2:7, 8.

³ Iehova ena “hereva” ena anina tanobada besedia dekenai be dahaka? Taunimanima iboudiai dekenai ena anina be dahaka? Momokani, Salamo ena karoa iharuana idia duahia Dirava gari henia taudia ibounai dekenai, unai gaudia edia anina be dahaka?

Tanobada Besedia Idia Heiriheiri

4. Salamo 2:​1, 2 ena hereva badadia be edena bamona oi gwauraia diba?

⁴ Salamo torea tauna ese ena ane ia hamatamaia neganai, bese idauidau bona edia lohia taudia edia kara ia gwauraia, ia gwau: “Badina dahaka bese idauidau ese, tuari daladia idia tahua [“idia heiriheiri,” Buka Helağa]? Badina dahaka taunimanima edia laloa be kavakava? Edia king taudia be tuari totona idia toreisi, bona edia lohia taudia ese idia haboua noho. Idia ura be, Lohiabada bona ia ese ia Abia Hidi Tauna, do idia dagedage henia.”—Salamo 2:1, 2.a

5, 6. Tanobada besedia idia ‘laloa kavakava’ gauna be dahaka?

⁵ Hari inai negai, tanobada besedia idia ‘laloa kavakava’ gauna be dahaka? Dirava ia Abia Hidi Tauna eiava Horoa Tauna—Mesia, eiava Keriso⁠—​idia abia dae lasi, to tanobada besedia ese sibona edia lohia siahuna dogoatao noho dalana idia “laloa.” Aposetolo edia negai, Iuda bona Roma siahu taudia be Dirava ese King totona ia abia hidi tauna, Iesu Keriso, hamasea dalana idia tahua hebou neganai, Salamo ena karoa iharuana ena hereva ia guguru danu. To, lagani 1914 ai Iesu be King dagina ia abia neganai, dala badana ai ia guguru. Unai nega amo ema bona hari, tanobada ena politikol oreadia ta ese Dirava ia haginia King ia abia dae lasi.

⁶ Salamo torea tauna ia gwauraia henanadai, ‘badina dahaka taunimanima edia laloa be kavakava,’ ena anina be dahaka? Edia ura be kavakava; anina do ia havaraia lasi to do ia moru. Tanobada dekenai maino bona noho namo idia mailaia diba lasi. To, edia dala idia badinaia ela bona Dirava ena lohia siahuna idia tuari henia. Momokani, mai lalo-tamona ida idia gaukara hebou, Ataiai Momokani Diravana bona ia Horoa Tauna idia dadaraia totona. Unai be kavakava momokani!

Iehova Ena King Ia Kwalimu

7. Guriguri lalonai, edena dala ai Iesu murinai idia raka taudia ginigunadia idia hahedinaraia, Salamo 2:​1, 2 be Iesu dekenai ia guguru?

⁷ Iesu murinai idia raka taudia idia gwau Salamo 2:​1, 2 ena hereva be Iesu dekenai idia guguru. Edia abidadama dainai dika idia davaria neganai, idia guriguri: “Lohiabada [Iehova] e, oi ese guba bona tanobada bona davara bona idia lalonai noho gaudia ibounai oi karaia. Guna Lauma Helaga dekena amo, aiemai sene tauna, oiemu hesiai tauna Davida ena uduna dekenai oi hereva, oi gwau: Idau bese taudia badina dahaka idia badu, bona dahaka dainai Dirava hadikaia laloa idia karaia kava noho? Tanobada idauidau edia king idia gini noho, bona hanua lohia taudia idia haboua noho, Lohiabada bona iena Keriso edia dala idia koua totona.’ Momokani, Heroda [Anetipa] bona Pontio Pilato bona idau bese taudia bona Israela bese taudia idia haboua tamona inai hanua lalonai, oiemu hesiai Tauna helagana Iesu, guna oi abia hidi Tauna, do idia hadikaia totona.” (Kara 4:24-27; Luka 23:1-12)b Oibe, aposetolo edia negai, Dirava ia horoa hesiai tauna Iesu hadikaia dalana idia tahua. To, unai Salamo be lagani handred momo murinai do ia guguru lou.

8. Edena dala ai Salamo 2:3 be hari inai negai idia noho besedia dekenai ia guguru?

⁸ Idaunegai Israela dekenai Davida be king ai ia lao neganai, kaivakuku tomadiho henia besedia bona edia lohia taudia idia gaukara hebou, Dirava bona ia horoa king tauna idia tuari henia totona. To iseda nega be edena bamona? Hari inai negai idia noho besedia idia ura lasi Iehova bona Mesia edia taravatu idia badinaia. Unai dainai, laulau dalanai inai bamona idia gwau: “Ita ura lasi Lohiabada, bona iena King henunai do ita noho, idia ese ita idia guia vadaeni, be ita ese unai guia varodia do ita negea.” (Salamo 2:3) Lohia taudia bona tanobada besedia ese Dirava bona ia Horoa Tauna idia atoa taravatu ibounai idia dadaraia. To momokani, unai guia varodia negea toho karana dekenai do idia kwalimu lasi.

Iehova be Idia Dekenai Ia Hevaseha

9, 10. Dahaka dainai Iehova ese bese idauidau ia kirikirilaia?

⁹ Bese idauidau edia lohia taudia ese sibona edia lohia siahuna idia abia isi karadia be Iehova ese ia laloa momo lasi. Salamo iharuana ena hereva ma ia gwau: “Guba dekenai ia noho Dirava ese, idia dekenai do ia kiri. Ia ese edia laloa dekenai do ia hevaseha.” (Salamo 2:4) Dirava ese ena ura ia hagugurua noho, hegeregere unai lohia taudia idia noho lasi bamona. Edia hekokoroku karana dekenai ia kiri bona idia ia hevasehalaia. Idia karaia gwauraia karadia idia hekokorokulaia diba. To Iehova dekenai idia be kiri gauna. Edia palani ia moru dainai do ia kiri.

¹⁰ Davida be Salamo ena siri ma haida ai unai taudia bona besedia ia herevalaia bona ia gwau: “Lohiabada, Siahu Ibounai Dirava, Israela ena Dirava, mani do oi toreisi, bona Dirava idia ura lasi taudia edia dika davana do oi henia. Kara dika karaia totona, hunia dekenai idia laloa hebou taudia, be do oi alaia mase, do oi bogahisihisi henidia lasi. Adorahi ibounai idia giroa mai noho, bona sisia bamona idia boiboi noho, hanua lalonai idia raka loaloa neganai. Edia uduna dekena amo hereva dika, bona hereva badu idia mai, mumuta bamona. Edia malana be tuari kaia bamona. To idia laloa, idia gwau, ‘Daika ese ai dekenai ia kamonai diba?’ To Lohiabada e, oi ese idia dekenai oi kiri noho. Oi ese Dirava ura lasi taudia ibounai dekenai, oi kirikirilaia noho.” (Salamo 59:5-8) Kavakava dalanai Iehova idia tuari henia besedia edia hekokoroku bona daradara karadia ia kirikirilaia.

11. Tanobada besedia ese Dirava ena ura idia koua neganai, dahaka ia vara?

¹¹ Salamo 2 ena hereva ese iseda abidadama ia hagoadaia badina ita diba Dirava ia hegeregere hekwakwanai ibounai ia hanaia totona. Ita diba momokani ena ura do ia hagugurua hanaihanai bona ena kamonai hesiai taudia do ia rakatania lasi. (Salamo 94:14) Unai dainai, tanobada besedia ese Iehova ena ura idia koua neganai, dahaka ia vara? Inai Salamo hegeregerena, Dirava ese “idia do ia gwau henia, mai badu danu,” guba ena boiboi bada bamona. Danu, “iena badu mai siahu bada,” kevaru badana bamona, ese “do ia hagaridia.”—Salamo 2:5.

Dirava ese Ena King Ia Atoa Vadaeni

12. Salamo 2:6 be daika dekenai ia guguru?

¹² Ita daradara lasi Iehova ese hari Salamo torea tauna amo ia gwauraia herevana dainai tanobada besedia idia badu. Dirava ia gwau: “Siona Ororo ena ataiai dekenai, lauegu ororo helagana dekenai, lauegu King do lau atoa.” (Salamo 2:6) Siona Ororo be Ierusalema dekenai ia noho ororo maragina ta, unuseniai Davida be Israela edia king ai ia lao. To Mesia Pavapavana be unai hanua eiava tanobada ena gabu ma ta ena terona latanai do ia helai lasi. Momokani, Iehova ese guba dekenai ia noho Siona Ororona dekenai Iesu Keriso, ia abia hidi Mesia Pavapavana, ia haginia vadaeni.—Apokalupo 14:1.

13. Iehova be ena Natuna ida dahaka gwauhamata ia karaia?

¹³ Hari Mesia Pavapavana ia hereva. Ia gwau: “Lau ese Lohiabada [ena Natuna ida gwauhamata ia karaia Basileia do ia abia totona] ena hereva do lau harorolaia, inai bamona lau dekenai ia [Iehova Dirava ia] gwau, ‘Oi be lauegu natuna, hari dina dekenai oi lau havaraia vadaeni.’ ” (Salamo 2:7) Keriso ese ena aposetolo taudia ia hereva henia neganai, Basileia gwauhamatana ia herevalaia, ia gwau: “Metau bona dibagani be lau dekenai idia ginidae negadia lalonai, umui ese lau umui badinaia noho, lau umui rakatania lasi. Unai dainai, egu Tamana ese Basileia ta ia henia lau dekenai hegeregerena, lau danu Basileia ta lau henia inai, umui dekenai.”—Luka 22:28, 29.

14. Dahaka dainai ita gwau diba Iesu be mai ena maoro king dagina ia abia totona?

¹⁴ Salamo 2:7 ia peroveta bamona, Iesu ia bapatiso bona Iehova ese lauma maurina dekenai ia hatorea isi lou neganai, ia hahedinaraia Iesu be Iena Natuna. (Mareko 1:9-11; Roma 1:4; Heberu 1:5; 5:5) Oibe, Dirava sibona ese ia havaraia Natuna tamona be guba Basileiana ena King. (Ioane 3:16) Iesu be King Davida ena tubuna dainai, ia be mai ena maoro king dagina ia abia. (2 Samuela 7:4-17; Mataio 1:6, 16) Inai Salamo hegeregerena, Dirava ese ena Natuna ia hamaoroa: “Lau dekenai oi noinoi, vadaeni lau ese bese idauidau ibounai, be oi dekenai do lau henia. Tanobada ibounai oi dekenai do lau henia.”—Salamo 2:8.

15. Dahaka dainai Iesu ia noinoi tanobada besedia do ia abia ena ahuna bamona?

¹⁵ Unai King—Dirava ena Natuna—ena dagi ia bada, to Iehova sibona ena dagi ese unai ia hereaia. Iesu be hahetoho ia davaria neganai Iehova ia badinaia noho, unai dainai Iehova ese ia abidadama henia diba. Danu, Iesu be Dirava ena Vara Guna Natuna ena ahuna ia abia. Oibe, Iesu Keriso be “Dirava ena toana hegeregerena. Ia be vara guna Natuna.” (Kolose 1:15) Dirava ia noia sibona bena Dirava ese ‘bese idauidau ibounai bona tanobada ibounai ia dekenai do ia henia.’ Iesu be unai bamona ia noinoi, badina ia be ‘tanobada mai ena noho taudia ibounai dekenai ia moale noho’ bona ia ura bada iena guba Tamana ena ura tanobada bona taunimanima totona do ia hagugurua.—Aonega Herevadia 8:30, 31.

Iehova Ena Hereva Tanobada Besedia Dekenai

16, 17. Salamo 2:9 hegeregerena, tanobada besedia dekenai dahaka do ia vara?

¹⁶ Salamo ena karoa iharuana be hari—Iesu Keriso ena noho negana lalonai—ia guguru noho dainai, tanobada besedia dekenai dahaka do ia vara? Nega daudau lasi King ese Dirava ena hereva do ia hagugurua, ia gwau: “Oi ese idia [tanobada besedia] do oi hamakohia, auri itotohi dekena amo. Uro bamona, idia do oi makohia maragimaragi.”—Salamo 2:9.

¹⁷ Idaunegai king taudia edia itotohi ese edia lohia siahuna ia laulaulaia. Itotohi haida be auri amo idia karaia, inai Salamo ese ia herevalaia bamona. Unai siri lalonai idia gaukaralaia laulau herevana ia hahedinaraia, King Keriso ese tanobada besedia ia hadikaia be auka lasi. Ta ese auri itotohi amo uro karaia tauna ena uro ia botaia neganai, do ia makohia maragimaragi bona ta ese do ia hanamoa diba lasi.

18, 19. Dirava ena lalo-namo abia totona, tanobada ena king taudia ese dahaka idia karaia be namo?

¹⁸ Tanobada besedia edia lohia taudia be unai dika badana do idia itaia, a? Lasi, badina Salamo torea tauna ese idia ia noia: “Unai dainai, king taudia e, inai sisiba do umui kamonai: Tanobada ena lohia taudia e, do umui diba.” (Salamo 2:10) Salamo torea tauna ese king taudia ia noia unai hereva do idia kamonai, bona idia laloa namonamo. Namona be idia itaia edia palani be do ia moru, to Dirava ena Basileia ese taunimanima do ia durua momokani.

¹⁹ Dirava ena lalo-namo abia totona, tanobada ena king taudia ese edia kara idia haidaua be namo. Inai sisiba idia abia, “Lohiabada do umui tomadiho henia, mai emui gari danu, mai heudeheude danu Lohiabada do umui hanamoa.” (Salamo 2:11) Dahaka ia vara diba bema unai sisiba idia badinaia? Do idia heiriheiri eiava daradara lasi, to Mesia Pavapavana ese idia totona do ia karaia gaudia be mai moale ida idia laloa diba. Gau badana be tanobada ena lohia taudia ese edia lohia siahuna amo idia hahedinaraia hekokoroku karana idia rakatania. Danu, namona be karaharaga edia kara idia haidaua bona Iehova ena lohia siahuna hereadaena bona Dirava bona iena Mesia Pavapavana edia siahu, ta ia koua diba lasi siahuna, do idia laloa mai aonega ida.

“Natuna Do Umui Kisi Henia”

20, 21. ‘Natuna idia kisi henia’ ena anina be dahaka?

²⁰ Hari Salamo karoa 2 ese tanobada besedia edia lohia taudia dekenai hebogahisi boiboi herevana ta ia gwauraia. Tuari totona idia hebou lasi, to inai sisiba idia abia: “Dirava ena Natuna do umui kisi henia, do ia badu garina, bona do umui mase haraga garina. Badina be iena badu be ia vara haraga diba.” (Salamo 2:12) Siahu Ibounai Lohiabadana Iehova ese hereva ia gwauraia neganai ibounai idia kamonai be namo. Dirava ese terona dekenai ena Natuna ia atoa neganai, namona be tanobada ena lohia taudia ese edia ‘laloa kavakava’ idia rakatania. Namona be karaharaga unai King idia abia dae bona idia kamonai henia.

²¹ Dahaka dainai ‘Natuna idia kisi henia’ be namo? Unai Salamo idia torea neganai, kisi henia karana ese hetura karana ia hahedinaraia bona ta ese ena ruma dekenai vadivadi taudia ia abia dae neganai unai kara ia karaia, unai amo ena heabidae karana idia moalelaia diba. Kisi henia karana ese badinaia karana eiava kamonai karana ia hahedinaraia diba. (1 Samuela 10:1) Inai Salamo ena karoa iharuana ena siri lalonai, Dirava ese tanobada besedia ia hagania iena Natuna be horoa King bamona do idia kisi henia, eiava idia abia dae.

22. Namona be tanobada besedia edia lohia taudia ese dahaka sisiba idia abia dae?

²² Dirava ia abia hidi King ena siahu idia abia dae lasi taudia ese Iehova idia gwauraia dika. Idia abia dae lasi Iehova Dirava be guba bona tanobada ena lohia badana bona ia be mai ena siahu bona diba tanobada taudia totona King hereadaena ta ia abia hidi. Tanobada besedia edia lohia taudia be edia palani idia karaia toho lalonai, do idia itaia Dirava ena badu be karaharaga idia latanai do ia ginidae. “Iena badu be ia vara haraga diba,” oibe, ia vara haraga bona ta ese ia koua diba lasi. Tanobada besedia edia lohia taudia ese mai lalo-namo ida unai sisiba idia abia dae bona idia badinaia be namo. Unai idia karaia neganai mauri do idia abia.

23. Nega ia do noho taunimanima ese dahaka idia karaia totona?

²³ Inai mai anina bada Salamo ena hereva gabena ia gwau: “To ia [Iehova] dekenai idia abidadama taudia be idia moale, ia ese ia naridia dainai.” (Salamo 2:12b) Nega ia do noho taunimanima ta ta idia heau mauri totona. Tanobada besedia edia palani idia abia isi lohia taudia ta ta danu. Iehova dekenai idia heau mauri diba, ia ese Basileia ena lohia siahuna henunai roho mauri gabuna ia henidia. To namona be Mesia Basileiana ese ia idia dadaraia besedia ia do hadikaia lasi neganai unai idia karaia be namo.

24. Edena dala ai inai heiriheiri tanobadana lalonai danu mauri namona ita moalelaia diba?

²⁴ Bema mai ura bada ida Baibel ita stadilaia bona iseda mauri lalonai ita badinaia, inai heiriheiri tanobadana lalonai danu mauri namona ita moalelaia diba. Baibel ena sisiba ita badinaia neganai, iseda ruma bese maurina do ia namo bona inai tanobada lalonai taunimanima idia davaria lalo-hekwarahi gaudia momo do ita davaria lasi. Baibel ena sisiba ita badinaia dainai ita diba momokani Havaraia Tauna ita hamoalea noho. Guba bona Tanobada edia Lohia Badana sibona ese “inai mauri dekenai bona mauri gabena dekenai” gwauhamata ia karaia diba, bona Basileia ena lohia siahuna idia dadaraia taudia be inai tanobada amo do ia haorea.—1 Timoteo 4:8, NW.

25. Iehova ena “hereva” ia moru diba lasi dainai, ita diba dahaka do ia vara iseda nega lalonai?

²⁵ Iehova ena “hereva” be ia moru diba lasi. Dirava be iseda Havaraia Tauna dainai, ia diba dahaka be namo taunimanima totona bona ena ura do ia hagugurua, iena lalokau Natuna ena Basileia henunai kamonai taudia be maino, lalo-namo, bona ia noho daudau noho namona do idia abia. Peroveta tauna Daniela ese iseda nega ia herevalaia, ia gwau: “Unai basileia namba 4 ena nega lalonai, guba ena Dirava ese basileia ta do ia haginia, inai basileia be do idia hadikaia diba lasi ela bona hanaihanai. Unai basileia . . . ese basileia ibounai do ia hamakohia, bona haorea momokani, bona ia sibona do ia noho ela bona hanaihanai.” (Daniela 2:44) Unai dainai, hari be nega namona ‘Natuna ita kisi henia’ bona Siahu Ibounai Lohiabadana Iehova ita hesiai henia!

[Footnotes]

Edena Bamona Do Oi Haere?

• Tanobada besedia idia ‘laloa kavakava’ gauna be dahaka?

• Dahaka dainai Iehova ese tanobada besedia ia hevasehalaia?

• Dirava ena hereva tanobada besedia dekenai be dahaka?

• ‘Natuna idia kisi henia’ ena anina be dahaka?

[Picture on page 12]

Davida be ia kwalimu Mesia Pavapavana ia anelaia

[Picture on page 13]

Israela ena lohia taudia bona taunimanima ese palani idia karaia Iesu Keriso idia hadikaia totona

[Picture on page 14]

Keriso be guba Siona Ororo dekenai King dagina ia abia vadaeni