Ladana Idia Diba Lasi Diravana Ena Boubou Patana

LAGANI 50 C.E. ai, aposetolo Paulo be Atena, Greece dekenai, ia vadivadi. Unuseniai idia diba lasi diravana ena boubou patana ta ia itaia bona gabeai Iehova ia herevalaia lalonai unai gauna ia gwauraia.

Areo Ororo dekenai, Paulo be ena hamatamaia hereva lalonai ia gwau: “Atena taudia e, lau itaia vadaeni, dirava idauidau momo umui laloa bada. Badina be umui emui hanua lalonai lau loaloa bona umui emui tomadiho henia gaudia lau itaia neganai, boubou patana ta lau davaria, iena latanai revareva inai bamona idia torea, ‘Ita diba lasi Dirava ena.’ Inai dainai umui diba lasi Diravana, to umui tomadiho henia, unai Dirava ena kara do lau hadibaia umui.”​​—Kara 17:​22-​31.

Herevana unai Atena boubou patana be idia davaria lasi, Greece ena gabu haida dekenai unai bamona boubou patadia haida idia noho. Hegeregere, lagani 140 C.E. murinai ia noho Greek tauna Pausanias, tanobada bona ena mauri gaudia ia stadilaia tauna ta unai, ia gwau Phaleron, Atena amo ia daudau lasi tanona ai, “Ladana Idia Gwauraia Idia Diba Lasi diravadia” edia boubou patadia idia noho. (Description of Greece, Attica I, 4) Unai buka tamona ia gwau Olympia dekenai “Idia Diba Lasi diravadia edia boubou patana ta” ia noho.​​—Eleia I, XIV, 8.

Greek ena toretore tauna Philostratus (lagani 170-​245 C.E. bamona) be ena buka The Life of Apollonius of Tyana (VI, III) lalonai ia gwau Atena dekenai “idia diba lasi diravadia hanamoa totona boubou patadia idia karadia danu.” Bona Lives of Philosophers (1.110) lalonai, Diogenes Laertius (lagani 200-​250 C.E. bamona) ia gwau Atena ena gabu idauidau ai “ladana lasi boubou patadia” oi itaia diba.

Roma taudia ese danu ladana idia diba lasi diravadia dekenai boubou patadia idia haginidia. Laulau ai ia hedinarai gauna be lagani 100 B.C.E. ena vairana eiava murina negana amo, bona Palatine Antiquarium, Rome, Italy, dekenai ia noho. Unai pata ai ia noho Latin gado toretore ese ia hahedinaraia unai boubou patana be “dirava tau ta eiava dirava hahine ta” hahelagaia totona​​—unai hereva be “nega momo guriguri eiava hereva helagadia lalonai idia davaria bona unai be koroa toretore bona buka herevadia ai idia hedinarai.”

Taunimanima momo be “tanobada bona ena lalonai noho gaudia ibounai ia karaia Diravana” idia do diba lasi. To Paulo ese Atena taudia ia hamaorodia bamona, unai Dirava​​—Iehova​—“be daudau lasi ita ta ta dekenai.”​​—Kara 17:​24, 27.

[Picture Credit Line on page 32]

Altar: Soprintendenza Archeologica di Roma