Iehova Oi Abidadama Henia
“Lohiabada Dirava e, oi be egu mauri namona abia dalana. Lohiabada e, egu uhau dinadia ia mai bona hari, lau ese oi lau abidadama henia.”—SALAMO 71:5.
1. Mamoe naria merona Davida be dahaka hetoho ia davaria?
GOLIATA ena lata be mita toi bamona. Unai dainai Israela ena tuari taudia ibounai be ia tuari henia totona idia gari! Wiki momo ia hanaia vadaeni, daba bona hanuaboi ibounai, unai Pilistia tauna badana, Goliata, ese Israela ena tuari taudia ia hevaseha henidia, ia hauradia tau goadana ta do idia siaia ia heai henia totona. Dokonai, unai hereva be tuari tauna ta ese ia abia dae lasi, to mero matamata ta ese ia abia dae. Ena inai tauna amo mamoe naria merona Davida be maragi momokani. Oibe, Goliata ena tuari dabua bona kohu edia metau ese reana Davida ena metau ia hanaia! To, unai mero matamata ese unai tau badana ia tuari henia bona unai nega amo taunimanima ese Davida idia gwauraia gari lasi toana ia haheitalaia tauna.—1 Samuela 17:1-51.
2, 3. (a) Dahaka dainai Davida be mai gari lasi ida Goliata ia heai henia diba? (b) Iehova ita abidadama henia totona, dahaka dala rua do ita herevalaia?
2 Dahaka ese Davida ia hagoadaia unai bamona gari lasi toana ia hahedinaraia totona? Gabeai ena mauri lalonai Davida ese ia torea hereva haida mani ita itaia: “Lohiabada Dirava e, oi be egu mauri namona abia dalana. Lohiabada e, egu uhau dinadia ia mai bona hari, lau ese oi lau abidadama henia.” (Salamo 71:5) Oibe, Davida be do matamata neganai, ia ese Iehova ia abidadama henia momokani. Goliata ia lao henia neganai, ia gwau: “Oi be mai oiemu tuari kaia, bona mai oiemu io, bona mai oiemu auri labora io ta danu lau dekenai oi mai, to lau be Lohiabada [“Iehova,” NW ] ena ladana dainai oi dekenai lau raka mai inai. Ia be Israela tuari orea, oi ese oi boiboi dika henia taudia edia Dirava.” (1 Samuela 17:45) Goliata ese sibona ena goada bona ena tuari kohu ia abidadama henidia, to Davida be Iehova ia abidadama henia. Tanobada ibounai ena Siahu Ibounai Lohiabadana be Davida ena kahanai ia gini dainai, badina dahaka ia ese taunimanima ta sibona, tau badana mai ena tuari kohu namodia dekenai do ia gari?
3 Davida ena sivarai oi duahia neganai, oi ura oiemu abidadama Iehova dekenai ia goada momokani, a? Reana, ita momo ita ura eda abidadama be unai bamona. Vadaeni, namona be ita karaia diba dala rua do ita tahua, unai amo Iehova do ita abidadama henia diba. Dala ginigunana be, momo edia abidadama dalana ia koua gauna do ita tahua bona ita biagua. Dala iharuana be, Iehova abidadama henia totona dahaka do ita karaia be namo, do ita dibaia.
Iehova Abidadama Henia Dalana Ia Koua Gauna Hanaia
4, 5. Dahaka dainai taunimanima momo ese Dirava idia abidadama henia be auka?
4 Taunimanima ese Dirava idia abidadama henia dalana be dahaka ese ia koua? Nega momo, haida be gau dikadia idia vara ena badina idia daradaralaia. Momo idia hadibadia Dirava ese hisihisi ia havaraia. Dika ta ia vara neganai, dubu gunalaia taudia idia gwau Dirava ese unai dika idia davaria taudia ia “abidia” guba dekenai ia ida idia noho totona. Danu, tomadiho gunalaia taudia momo edia hahediba be Dirava ese inai tanobada ai, idia vara gaudia ibounai—dika karadia bona kara gageva ibounai—be guna ia gwauraia hidi vadaeni. Unai bamona hebogahisi lasi Diravana abidadama henia be do ia auka. Satani, abidadama lasi taudia edia lalona ia hadiburaia tauna, be ia ura dikadika unai bamona “lauma dikadia edia hadibaia hereva” ibounai ia habadaia.—1 Timoteo 4:1; 2 Korinto 4:4.
5 Satani ia ura taunimanima ese Iehova abidadama henia karana idia haboioa. Unai Dirava ena inai tauna ia ura lasi ita be taunimanima ese idia davaria hisihisi ena badina korikori ita diba. Bona bema Baibel amo hisihisi ena badina ita dibaia vadaeni, Satani ia ura unai do ita laloaboio. Unai dainai, nega ta ta ai tanobada ai idia vara hisihisi edia badina toi ita laloa lou be namo. Unai ita karaia neganai, iseda kudouna ai do ita diba momokani Iehova be eda mauri lalonai ita davaria hekwakwanai ia havaraia lasi.—Filipi 1:9, 10.
6. Petero Ginigunana 5:8 ese taunimanima idia davaria hisihisi ena badina ta be edena bamona ia hahedinaraia?
6 Taunimanima ese hisihisi idia davaria ena badina ta be Satani ia ura Iehova ena abidadama taudia edia Dirava badinaia karana ia hamanokaia. Ia ura Iobu ena Dirava badinaia karana ia hadikaia. Unai neganai ia kwalimu lasi, to unai kara ia do hadokoa lasi. Ia be inai tanobada ena lohia dainai, ia ura Iehova ena abidadama hesiai taudia ia “ania.” (1 Petero 5:8) Unai be ita ta ta ibounai! Satani ia ura Iehova hesiai henia karana do ita rakatania. Unai dainai, nega momo ia ese dagedage ia havaraia. Ena be unai dagedage karadia ese ita idia hahisia bada, badina namona dainai ita haheauka be namo. Unai bamona ita karaia neganai, ita hamomokania Satani be koikoi tauna bona Iehova ita hamoalea. (Iobu 2:4; Aonega Herevadia 27:11) Dagedage ita haheaukalaia totona Iehova ese ita ia hagoadaia neganai, iseda abidadama ia dekenai ia goada ia lao.—Salamo 9:9, 10.
7. Galatia 6:7 amo ita lalo-parara hisihisi idia vara ena badina ta be dahaka?
7 Hisihisi ita davaria ena badina iharuana be inai hakaua herevana lalonai ia hedinarai: “Tau ta aniani uhena ia hadoa, vadaeni unai bamona aniani sibona be do ia abia.” (Galatia 6:7) Nega haida taunimanima ese abia hidi kererena idia hadoa bona unai abia hidi ena hisihisi idia abia. Reana idia ura motuka idia taria haraga momokani, unai ese aksiden ia havaraia. Momo idia ura kuku idia ania, unai amo kudou gorere eiava baragi dekenai kensa idia davaria. Matabodaga karadia idia ura karaia taudia be edia ruma bese maurina idia hadikaia, sibona matauraia karana idia haboioa, mahuta hebou amo idia vara daihanai goreredia idia abia, bona idia rogorogo kava. Unai bamona hisihisi idia davaria taudia idia gwau Dirava ese unai dika ia havaraia, to momokani sibodia edia abia hidi kereredia dainai unai hisihisi idia davaria.—Aonega Herevadia 19:3.
8. Hadibaia Tauna 9:11 hegeregerena, dahaka dainai taunimanima be hisihisi idia davaria?
8 Hisihisi idia vara ena badina ihatoina be Hadibaia Tauna 9:11 ese ia gwauraia: “Inai tanobada lalonai, heau helulu dekenai, heau haraga taudia be guna lasi, bona tuari lalonai, goada taudia idia kwalimu lasi. Aonega taudia ese aniani idia abia lasi, diba momo taudia ese kohu momo idia davaria lasi, bona gaukara bada taudia be do idia hanamoa lasi. Badina ibounai ese nega dika idia davaria noho, bona inai dika ia vara kava noho.” Nega haida, taunimanima be nega kererena ai gabu dikana ta dekenai idia noho. Herevana ita ta ta eda goada eiava eda manoka be edena bamona, ita laloa lasi negana ai ita ta ese hisihisi bona mase ita davaria diba. Hegeregere, Iesu ena negai, Ierusalema dekenai kohoro ta ia moru bona taunimanima 18 ia hamasea. Iesu ia hahedinaraia guna idia karaia kara dika dainai Dirava ese idia ia panisia lasi. (Luka 13:4) Lasi, unai bamona hisihisi be Iehova ese ia havaraia lasi.
9. Momo be hisihisi dekenai dahaka idia lalo-pararalaia lasi?
9 Hisihisi idia vara ena badina haida ita lalo-pararalaidia be mai anina bada. To momo ese idia daradaralaia bada gauna be: Dahaka dainai Dirava ese hisihisi ia koua lasi?
Dahaka Dainai Iehova ese Hisihisi Ia Koua Lasi?
10, 11. (a) Roma 8:19-22 hegeregerena, “ia karaia gaudia” ibounai dekenai dahaka ia vara? (b) Edena dala amo ita diba daika ese karaia gaudia be anina lasi maurina lalonai ia atodia?
10 Aposetolo Paulo ese Roma taudia dekenai ia torea revarevana ena kahana ta ese unai mai anina bada herevana ena anina ia gwauraia hedinarai. Paulo ia gwau: “Dirava ese ia karaia gaudia be mai edia ura dikadika ida idia naria noho Dirava ena natudia do ia hahedinaraidia totona. Badina be ia karaia gaudia be anina lasi maurina lalonai ia atodia, sibodia edia ura dainai lasi to ia atodia tauna dainai, mai ena helaro ida. Unai helaro be ia karaia gaudia danu be kara dika ena igui amo do ia ruhadia bona Dirava ena natudia edia ura kwalimu hereadaena do idia abia. Badina ita diba Dirava ese ia karaia gaudia iboudiai be idia taitai hebou noho bona idia hisihisi hebou noho ema bona hari.”—Roma 8:19-22, NW.
11 Unai siri edia anina ita lalo-pararalaia totona, mai anina bada henanadai haida edia haere ita tahua guna be namo. Hegeregere, daika ese karaia gaudia be anina lasi maurina lalonai ia atodia? Haida idia gwau Satani ese, to ma haida idia gwau Adamu ese ia karaia. To idia ta be unai ia karaia diba lasi. Badina be dahaka? Badina karaia gaudia be anina lasi maurina lalonai ia atodia tauna be “mai ena helaro ida” ia karaia. Oibe, ia henia helaro be dokonai mai edia abidadama taudia be “kara dika ena igui amo do ia ruhadia.” Adamu eiava Satani be unai bamona helaro ia henia diba lasi. Iehova sibona ia karaia diba. Vadaeni, ia hedinarai goevagoeva, Dirava sibona ese anina lasi maurina lalonai ia karaia gaudia ia atodia.
12. “Karaia gaudia” dekenai dahaka daradara ia vara, bona unai henanadai be edena bamona ita haerelaia diba?
12 To, unai siri ese ia gwauraia “karaia gaudia” ibounai be dahaka? Haida idia gwau unai “karaia gaudia” ibounai be mauri gaudia ibounai, animal bona tubutubu gaudia danu. To animal bona tubutubu gaudia be “Dirava ena natudia edia ura kwalimu hereadaena do idia abia,” a? Lasi. (2 Petero 2:12) Unai dainai, “karaia gaudia” ibounai be taunimanima sibona ia herevalaia. Eden umana lalonai ia vara gwau-edeede karana dainai kara dika bona mase ese unai karaia gaudia ia hadikaia bona helaro ta idia abia haraga be namo.—Roma 5:12.
13. Eden umana ai ia vara gwau-edeede karana dainai, taunimanima dekenai dahaka ia vara?
13 Unai gwau-edeede karana ese taunimanima dekenai dahaka ia havaraia? Paulo ia gwau unai dainai taunimanima be anina lasi maurina idia abia. Buka ta ese Paulo ia gaukaralaia Greek gado herevana ena anina be inai bamona ia gwauraia, “gau ta idia havaraia gaukara ta karaia totona, to ia be anina lasi badina gau ta ia hagugurua diba lasi.” Dirava ese taunimanima ia havaraia do idia mauri hanaihanai totona, mai lalo-tamona ruma bese goevadaena ta bamona do idia gaukara hebou paradaiso tanobadana idia naria totona. To madi, edia mauri be ia kwadogi, mai ena hisihisi bada bona nega momo hekwarahi bada maurina idia noholaia. Iobu ia hereva bamona: “Hahine edia bogana, dekena amo ita vara taudia, iseda mauri dinadia be momo lasi, bona iseda hekwarahi be bada herea.” (Iobu 14:1) Anina lasi momokani!
14, 15. (a) Dahaka ese ia hamomokania Iehova ena hahemaoro karana taunimanima dekenai be maoro? (b) Dahaka dainai Paulo ia gwau anina lasi maurina henunai karaia gaudia idia atoa be “sibodia edia ura dainai lasi”?
14 Vadaeni, mai anina bada henanadai be inai: Dahaka dainai “tanobada ibounai ena kota biaguna” ese taunimanima be inai hisihisi bada, bona hekwarahi bada maurina henunai ia atodia? (Genese 18:25) Unai bamona ia karaia be maoro, a? Iseda tama sina ginigunadia ese idia karaia karana, mani oi laloa lou. Dirava idia gwau-edeede henia neganai, idia be Satani ena kahana ai idia gini, ia ese Iehova ena lohia siahuna ia hepapahuahulaia. Edia kara amo idia hahedinaraia idia abia dae bema Iehova ese ia lohiadia lasi, taunimanima be gwau-edeede aneruna ena hakaua henunai sibodia idia naria namonamo diba. Unai gwau-edeede taudia ia hahemaoro henidia neganai, Iehova ese edia ura gauna ia henidia. Taunimanima ia rakatania Satani ena siahu henunai sibodia do idia lohiaia. Unai dainai ia hahemaoro henidia neganai, mai helaro ida taunimanima be anina lasi maurina henunai ia atodia be maoro, ani?
15 Oibe, unai be ia karaia gaudia “sibodia edia ura dainai lasi.” Ita be dala lasi, to igui hesiai taudia bamona kara dika bona mauri dikana lalonai ita vara. To, Iehova ena hebogahisi ai, Adamu bona Heva idia noho daudau bona natudia idia havaraia. Ena be ita, edia natudia, be kara dika bona mase ena anina lasi maurina henunai ita noho, ita be mai eda dala Adamu bona Heva ese idia karaia karana ita dadaraia totona. Ita ese Iehova ita kamonai henia bona ena lohia siahuna be maoro bona goevadae ita dibaia diba. To, taunimanima be Iehova idia dadaraia bona sibodia idia lohiaia neganai, hisihisi, lalo-hekwarahi bona anina lasi maurina idia abia. (Ieremia 10:23; Apokalupo 4:11) Bona Satani ena lalona veria karadia ese hekwakwanai ma ia habadaia. Taunimanima edia histori ese unai hereva idia hamomokania.—Hadibaia Tauna 8:9.
16. (a) Dahaka dainai ita diba momokani, Iehova be inai tanobada ai idia vara hisihisi ia havaraia lasi? (b) Mai lalokau ida Iehova ese abidadama taudia totona dahaka helaro ia henia?
16 Ia hedinarai goevagoeva, Iehova be badina maorodia dainai taunimanima be anina lasi maurina henunai ia atodia. Unai ena anina be, hari ita ta ta ese ita davaria anina lasi maurina bona hisihisi be Iehova ese ia havaraia, a? Vadaeni, diadi ta ese kerere ia karaia tauna ia hahemaoro henia maoromaoro karana mani oi laloa. Unai hahemaoro dainai kerere tauna ese dibura ai reana hisihisi ia davaria diba, to ia maoro bema diadi tauna ia badu henia bona ia gwau diadi be unai hisihisi ena badina, a? Lasi vaitani! Danu, Iehova be kara dika ena badina lasi. Iamesi 1:13 ia gwau: “Kara dika ese Dirava ia dibagania diba lasi momokani. Bona Dirava ese tau ta do ia dibagania lasi.” Danu, namona be ita laloatao, Iehova be “mai ena helaro ida” unai hahemaoro herevana ia henia. Mai lalokau ida dala ia karaia Adamu bona Heva edia kamonai natudia ese anina lasi maurina ena ore do idia itaia bona “Dirava ena natudia edia ura kwalimu hereadaena” do idia moalelaia. Unai negai, abidadama taudia be gabeai anina lasi maurina mai hisihisina noholaia lou totona do idia lalo-hekwarahilaia lasi ela bona hanaihanai. Iehova ese dala maorona ai unai gaudia ia hamaoromaoroa dainai, ena lohia siahuna maorona be do ia haginia ela bona hanaihanai.—Isaia 25:8.
17. Inai tanobada lalonai idia vara hisihisi edia badina ita riviulaia murinai, iseda lalohadai be dahaka?
17 Taunimanima edia hisihisi ena badina idauidau ita riviulaia murinai, Iehova ese kara dika ia havaraia eiava ia ita abidadama henia lasi ena badina ta ita davaria, a? Lasi, to unai riviu amo badina namodia ita dibaia, unai amo Mose ena hereva ita gwauraia diba: “Ia be Nadi Badana, iena gaukara be namo momokani. Iena dala ibounai be maoro, bona iena kota be momokani. Ia be abidadama ena Diravana, ia kara dika lasi. Ia be momokani bona maoromaoro.” (Deuteronomi 32:4) Nega ta ta ai, unai gaudia ita laloa dobu bona idia ita lalo-pararalaidia karana ita hanamoa be namo. Unai dala amo, hahetoho ita davaria neganai, Satani ese iseda lalona ai daradara ia havaraia dalana ita koua diba. To, inai hereva matamanai ita gwauraia dala iharuana be edena bamona? Iehova abidadama henia ena anina be dahaka?
Iehova Abidadama Henia Ena Anina
18, 19. Edena hereva amo Baibel ese ita ia hagoadaia Iehova ita abidadama henia totona, to unai kara dekenai, haida be dahaka lalohadai kereredia idia abia?
18 Dirava ena Hereva ese ita ia hagoadaia: “Lohiabada do oi abidadama henia, mai emu kudouna ibounai. Oi sibona oiemu diba do oi abidadama henia lasi. Oi karaia gaudia ibounai lalonai, Lohiabada do oi laloa, vadaeni ia ese dala maorona, be oi dekenai do ia hadibaia.” (Aonega Herevadia 3:5, 6) Unai be hagoadaia hereva namodia. Momokani, tanobada bona guba ibounai lalonai, tau ta be iseda lalokau guba Tamana hegeregerena ita abidadama henia diba lasi. Aonega Herevadia bukana ena hereva ita duahia be auka lasi, to ita badinaia totona be ia auka.
19 Momo be Iehova abidadama henia ena anina idia laloa kerere. Haida idia laloa unai abidadama karana be hemami ta sibona, kudouna dekenai ia vara kava moale mamina. Haida idia laloa Dirava abidadama henia karana ena anina be, dika ibounai amo ia ese ita do ia gimaia, iseda hekwakwanai ta ta do ia hamaoromaoroa, bona dina ta ta edia hekwarahi be iseda ura dalanai do ia hanamoa haraga! To unai bamona lalohadai be maoro lasi. Abidadama be hemami ta sibona lasi, to ia be kara momokanina ta. Taunimanima badadia dekenai abidadama anina be idia laloa namonamo guna bona unai hegeregerena abia hidi idia karaia.
20, 21. Iehova abidadama henia anina be dahaka? Haheitalai gwauraia.
20 Aonega Herevadia 3:5 ena hereva mani ita itaia lou. Ia hahedinaraia Iehova abidadama henia karana be sibona iseda diba tabekau henia karana amo ia idau, bona unai kara ruaosi ita karaia hebou diba lasi. Unai anina be iseda diba do ita gaukaralaia be kerere, a? Lasi, badina Iehova, ita dekenai diba ia henia tauna, ia ura ita tomadiho henia neganai unai diba ita gaukaralaia. (Roma 12:1, NW ) To, dahaka dekenai do ita tabekau? Bema iseda lalohadai be Iehova ena lalohadai hegeregerena lasi, ita abia dae Iehova ena aonega be iseda aonega ia hanaia momokani, a? (Isaia 55:8, 9) Iehova abidadama henia anina be dala ita kehoa eda lalohadai be ena lalohadai ese do ia hakaua.
21 Haheitalai: Mani oi laloa, motuka ta lalonai, mero maragina ta be murina dekenai ia helai bona ena tamana sinana be vairana dekenai idia helai. Ena tamana ese motuka ia taria. Edia heau lalonai hekwakwanai hegeregere, edena dala do idia badinaia eiava medu ia diho eiava dala be ia dika idia vara neganai, mai ena kamonai bona abidadama natuna be edena bamona do ia kara? Murina amo do ia boiboi, tamana do ia hamaoroa motuka be edena bamona ia taria be maoro, a? Ena tamana sinana idia gwauraia hidi gaudia ia daradaralaia eiava idia hamaoroa ena helai gauna ena beleta do ia atoa neganai ia kamonai lasi, a? Lasi, ena tamana sinana ia abidadama henidia, idia diba dahaka do idia karaia, ena be idia be goevadae lasi taudia. Iehova be iseda Tamana goevadaena. Unai dainai, hekwakwanai ita davaria neganai, ia ita abidadama henia momokani be namo, ani?—Isaia 30:21.
22, 23. (a) Hekwakwanai ita davaria neganai, dahaka dainai Iehova ita abidadama henia be namo, bona edena bamona ita karaia diba? (b) Hereva gabena ai dahaka do ita herevalaia?
22 To, Aonega Herevadia 3:6 ia hahedinaraia hekwakwanai ita davaria negadia sibona lasi to ‘ita karaia gaudia ibounai lalonai Iehova do ita laloa’ be namo. Anina be dina ta ta ai ita karaia abia hidi ese iseda abidadama karana Iehova dekenai ia hahedinaraia be namo. Hekwakwanai idia vara neganai, namo lasi ita dara doko, gari eiava Iehova ese ia henia sisiba namona unai hekwakwanai hanaia totona ita dadaraia. Namona be ita laloa hahetoho ita davaria negadia be nega namona, ita ese Iehova ena lohia siahuna ita abia isi, ita hamomokania Satani be koikoi tauna bona iseda kamonai karana bona Iehova hamoalea karadia ma haida ita habadaia totona.—Heberu 5:7, 8.
23 Herevana dahaka hekwakwanai ita davaria, iseda abidadama Iehova dekenai ita hahedinaraia diba. Iseda guriguri karana amo bona Iehova ena Hereva bona ena orea ena hakaua dalana ita tahua karana amo unai ita hahedinaraia. To, hari inai tanobada lalonai idia vara hekwakwanai ita davaria neganai, iseda abidadama Iehova dekenai be edena bamona ita hahedinaraia diba? Hereva gabena ese unai do ia herevalaia.
Edena Bamona Do Oi Haere?
• Edena dala amo Davida ia hahedinaraia Iehova ia abidadama henia?
• Inai negai taunimanima idia davaria hisihisi ena badina toi be dahaka, bona dahaka dainai nega ta ta ai ita riviulaidia be namo?
• Iehova ese dahaka hahemaoro ia henia taunimanima dekenai, bona dahaka dainai ita gwau diba unai hahemaoro be maoro?
• Iehova abidadama henia anina be dahaka?
[Pictures on page 20]
Davida ese Iehova ia abidadama henia
[Picture on page 22]
Iesu ia hahedinaraia Ierusalema ai kohoro ta ia moru neganai, Iehova ese unai dika ia havaraia lasi