“Nega Namona Be Harihari!”
“Umui kamonai! Dirava ena hariharibada ita abia ena nega namona be harihari! Hari dina hamauria ita abia dae be namo!”—2 KOR. 6:2.
1. Mai anina bada gauna ta ita ura karaia totona, dahaka dainai nega maorona ita abia hidi be aonega karana?
“INAI tanobada dekenai idia vara gaudia ibounai be mai edia nega korikori, bona kara ibounai danu be mai edia nega.” (Had. 3:1) Solomona ia gwau mai anina bada gauna ta ita ura karaia neganai, nega maorona ita abia hidi be aonega karana. Herevana uma gaukara ita karaia, gabu ma ta ita lao, bisinesi ita karaia eiava ma haida ida ita herevahereva, to namona be ita abia hidi edena gaukara do ita karaia guna, bona edena be gabeai do ita karaia.
2. Edena dala ai ita diba Iesu be tanobada ai ia noho negana ia lalopararalaia?
2 Iesu be tanobada ai ia noho neganai, ia laloparara ia be edena bamona negana ai ia noho bona dahaka ia karaia be namo. Iesu ia diba Mesia idia perovetalaia herevadia momo be ena nega ai do idia guguru, unai dainai ia laloparara dahaka ia karaia guna be namo. (1 Pet. 1:11; Apok. 19:10) Ia be gaukara haida do ia karaia be namo unai amo taunimanima do idia diba ia be Dirava ese ia gwauhamatalaia Mesiana. Ia ese Basileia ena hereva momokani ia harorolaia bona Basileia lalonai ia ida do idia lohia taudia ia haboua. Danu, ia ese kongrigeisen ginigunana ia haginia bona ia hadibaia, badina idia ese tanobada ena kahana ibounai dekenai haroro bona hahediba gaukarana do idia karaia.—Mar. 1:15.
3. Iesu ia diba tanobada ai do ia noho daudau lasi dainai, dahaka ia karaia?
3 Iesu ia diba tanobada ai do ia noho daudau lasi dainai, ena Tamana ena ura ia karaia goadagoada. Iena hahediba taudia ia hamaorodia: “Uiti anina be ia momo herea vadaeni, to utua taudia be momo lasi. Unai dainai uma biaguna dekenai do umui noinoi, ia ese utua taudia haida do ia siaia, iena uiti do idia utua.” (Luka 10:2; Mal. 4:5, 6) Iesu ese hahediba taudia 12 bona gabeai ma 70 ia abia hidi, haroro dalana ia hadibadia, bona ia siaidia lao inai mai anina bada herevana idia harorolaia totona: “Guba Basileia be kahirakahira ia mai vadaeni.” Iesu be dahaka ia karaia? Baibel ia gwau: “Iesu be iena diba tahua taudia 12 dekenai ia hereva ore neganai, unai gabu ia rakatania. Hanua haida unai kahana dekenai ia lao, do ia hadibaia, bona do ia haroro henia totona.”—Mat. 10:5-7; 11:1; Luka 10:1.
4. Edena dala ai Paulo ese Iesu Keriso ia tohotohoa?
4 Iesu be haheitalai namona ena murinai idia raka taudia ibounai dekenai, badina ena Tamana ia lalokau henia bada bona ena ura ia karaia goadagoada. Aposetolo Paulo ese Korinto tadikaka ia hagoadaia neganai, unai ia herevalaia ia gwau: “Lau karaia bamona do umui karaia, Keriso ena kara lau karaia bamona.” (1 Kor. 11:1) Edena dala ai Paulo be Keriso ia tohotohoa? Sivarai namona harorolaia gaukarana ia karaia goadagoada. Paulo be kongrigeisen ia tore henidia neganai, ena revareva lalonai inai bamona herevadia ia torea: “Gaukara goada. Gaukara lalonai do umui lahedo lasi. Lohiabada ena gaukara do umui karaia, mai emui lalona ibounai.” “Nega ibounai Lohiabada ena gaukara do umui karaia goadagoada.” “Emui hesiai gaukara ibounai lalonai, mai emui kudouna ibounai . . . Lohiabada ena gaukara umui karaia.” (Roma 12:11; 1 Kor. 15:58; Kol. 3:23) Paulo be Damaseko dalana ai Lohiabada Iesu Keriso ese ia hereva henia, bona Anania ena hereva ia laloaboio diba lasi. Iesu ia gwau: “Inai tau be lau ese lau abia hidi vadaeni, idau bese taudia bona king bona Israela taudia edia vairanai lauegu ladana do ia gwauraia.”—Kara 9:15; Roma 1:1, 5; Gal. 1:16.
“Nega Namona be Harihari!”
5. Dahaka ese Paulo ia durua mai gari lasi bona mai ura bada ida ia haroro totona?
5 Kara bukana ita duahia neganai, ita itaia Paulo be mai gari lasi bona mai ura bada ida ena haroro gaukara ia karaia. (Kara 13:9, 10; 17:16, 17; 18:5) Paulo ia diba ia noho negana be mai anina bada, unai dainai ia gwau: “Umui kamonai! Dirava ena hariharibada ita abia ena nega namona be harihari! Hari dina hamauria ita abia dae be namo!” (2 Kor. 6:2) Babulonia ai idia noho igui Israela taudia dekenai lagani 537 B.C.E. be nega namona Ierusalema dekenai idia giroa lou totona. (Isa. 49:8, 9) To, Paulo ena hereva ena anina be dahaka? Badinai idia noho siridia ese Paulo ena hereva ena anina idia hahedinaraia.
6, 7. Horoa tadikaka be Dirava amo dahaka gaukara badana idia abia, bona daidia ese horoa taudia idia durua noho?
6 Iena revareva matamanai, Paulo be Dirava ese ia bona ena horoa tadikaka dekenai ia henia gaukara badana ia herevalaia. (2 Korinto 5:18-20 duahia.) Ia gwau Dirava ese idia dekenai gaukara ta ia henia. Idia ese ‘taunimanima do idia veria, do idia haroro henia, ela bona idia danu Dirava ena turana ai idia lao.’ Anina be taunimanima ese Dirava ida maino do idia karaia bona do idia tura henia lou.
7 Eden umana ai gwau-edeede ia vara negana amo ema bona hari, taunimanima be Dirava amo idia daudau. (Roma 3:10, 23) Unai dainai, taunimanima ibounai be hisihisi bona mase idia davaria. Paulo ia gwau: “Ita diba Dirava ese ia karadia gaudia ibounai be idia hisihisi noho, hahine ese natuna ia havaraia noho ena hisihisi bamona. Oibe, idia tai noho, guna, ia mai bona harihari.” (Roma 8:22) To, Dirava ese dala ia karaia, bona taunimanima ia “noia” ia dekenai idia giroa lou bona ia idia tura henia totona. Unai gaukara be Dirava ese Paulo bona ena horoa tadikaka dekenai ia henia. Iesu idia abidadama henia taudia dekenai “unai nega namona” be hahemauri dinana. Horoa Keristani taudia bona edia bamodia, “mamoe idaudia” unai, be idia gaukara hebou taunimanima idia boiria “unai nega namona” ai mauri idia davaria totona.—Ioa. 10:16.
8. Dahaka dainai taunimanima ita boiria Dirava ida maino idia karaia be kara idauna?
8 Taunimanima ita boiria Dirava ida maino do idia karaia be kara idauna. Badina ena be Eden umana ai taunimanima ese Dirava idia gwau-edeede henia, to Dirava sibona ese dala ia karaia taunimanima be ia ida maino idia karaia totona. (1 Ioa. 4:10, 19) Dirava be dahaka ia karaia? Paulo ia haere: “Dirava be Keriso . . . dekena amo, tanobada taudia danu ia turana karaia noho. Keriso lalonai, Dirava ese edia kara dika ia laloatao lasi. Inai bamona haroro gaukara Dirava ese ai dekenai ia henia vadaeni, taunimanima be ia danu do idia turana karaia totona.”—2 Kor. 5:19; Isa. 55:6.
9. Paulo be Dirava ena hebogahisi karana ia laloa bada dainai, dahaka ia karaia?
9 Iehova ese ia karaia gauna be inai: Keriso ena mauri davalaia boubouna idia abidadama henia taudia edia kara dika ia gwauatao, bona ia idia tura henia diba. Ma danu, Dirava ese tanobada hegegemadai ena gwaukau taudia ia siaia taunimanima idia hadibaia ia ida maino idia karaia totona. (1 Timoteo 2:3-6 duahia.) Paulo be Dirava ena ura ia lalopararalaia dainai, ia gaukara goadagoada ‘taunimanima ia haroro henia, ela bona idia danu be Dirava ena turana ai idia lao.’ Iehova ena ura ia idau lasi, ia ura taunimanima be ia ida maino do idia karaia. Hari inai negai danu, Paulo ena hereva be mai anina bada, ia gwau: “Dirava ena hariharibada ita abia ena nega namona be harihari! Hari dina hamauria ita abia dae be namo!” Momokani, Iehova be hebogahisi bona hariharibada Diravana!—Eso. 34:6, 7.
‘Dirava Ena Hariharibada Negea Kava Lasi’
10. Hahemauri dinana dainai, idaunega amo ema bona hari horoa taudia be dahaka idia karaia noho?
10 Dirava ida maino idia karaia taudia ginigunadia be ‘Keriso danu idia hakapua tamona taudia.’ (2 Kor. 5:17, 18) Edia hahemauri dinana be Pentekoste 33 C.E. ai ia hamatamaia. Unai nega amo, idia ese haroro gaukara amo taunimanima idia durua Dirava idia tura henia totona. Hari, horoa Keristani taudia be unai gaukara idia do karaia noho. Idia laloparara aposetolo Ioane ena matahanai lalonai, aneru 4 ese ‘lai 4 edia toa dalana idia koua, unai amo lai ta be tanobada dekenai ia toa lasi.’ Unai dainai, ita gwau diba “Dirava ena hariharibada ita abia ena nega namona be harihari! Hari dina hamauria ita abia dae be namo!” (Apok. 7:1-3) Unai dainai, lagani 1900 amo ema bona hari, horoa taudia be tanobada ena kahana ibounai dekenai taunimanima idia durua Dirava ena turana ai idia lao totona.
11, 12. Lagani 1900 lalodiai, horoa Keristani taudia be idia noho negana idia lalopararalaia dainai, dahaka idia karaia? (Rau 15 ai ia noho laulau itaia.)
11 Hegeregere, buka ladana Jehovah’s Witnesses—Proclaimers of God’s Kingdom ese ia hahedinaraia lagani 1900 lalodiai, “C.T. Russell bona ena bamodia idia laloparara idia be ‘aniani gogoa negana’ ai idia noho bona taunimanima ese Baibel ena hereva momokani idia kamonai be namo.” Dahaka idia karaia? Kerisendom ena tomadiho gunalaia taudia ese taunimanima be dubu dekenai idia boiria sibona. To, horoa taudia be unai “nega namona” idia gaukaralaia taunimanima idia boiria bona Baibel ena hereva momokani be idia dekenai idia hadibaia. Danu, dala matamatadia idia gaukaralaia edia haroro gaukara idia habadaia totona.
12 Ena be unai nega ai tadikaka be momo lasi to idia ese Basileia ena sivarai namona be gabu idauidau ai idia harorolaia totona pepapepa, magasin bona buka idia gaukaralaia. Danu, Baibel herevadia be niuspepa momo ai idia halasia. America bona tano ma haida dekenai reidio steiseni momo amo haroro herevadia idia halasia. Bona muvini piksa mai ena herevahereva idia karaia Baibel ena hereva idia halasia totona. Momokani, ena be edia diba be bada lasi, to idia gaukara goadagoada. Edia gaukara namona dainai dahaka ia vara? Hari inai negai, taunimanima 7 milioni mai kahana be inai boiboi herevana ‘Dirava danu do umui turana karaia’ idia abia dae bona ma haida dekenai idia harorolaia noho.
13. Dirava ena ura badana be dahaka?
13 Hari inai negai, Paulo ena hereva “nega namona be harihari” be mai anina. Iehova ena hebogahisi ita mamia taudia ita moale badina Dirava ida maino ita karaia herevana ita abia dae. Namo lasi ita laloa unai sibona be hegeregere, Paulo ia gwau: “Umui ai noia goada inai bamona, ‘Umui ese Dirava ena hariharibada umui abia vadaeni, be umui negea kava lasi.’ ” (2 Kor. 6:1) Dirava ese hebogahisi bada ia hahedinaraia, badina Keriso amo “taunimanima be ia danu do idia turana karaia” dalana ia hegaegaelaia.—2 Kor. 5:19.
14. Tano momo ai taunimanima be dahaka idia karaia noho?
14 Satani ese taunimanima momo edia lalona ia hadiburaia dainai, Dirava amo idia daudau bona iena hebogahisi bada karana idia diba lasi. (2 Kor. 4:3, 4; 1 Ioa. 5:19) To, tanobada ena mauri ia dika ia lao dainai, taunimanima idia laloparara kara dika bona hisihisi idia vara badina taunimanima be Dirava idia tura henia lasi. Tano haida ai, guna taunimanima idia ura lasi sivarai namona idia kamonai, to hari momo be sivarai namona idia abia dae bona Dirava idia tura henia. Unai dainai, namona be ita haroro goadagoada bona taunimanima ita hamaorodia: ‘Dirava danu do umui turana karaia.’
15. Ita harorolaia sivarai namona be dahaka?
15 Dubu haida be taunimanima edia lalona hanamoa herevadia sibona idia gwauraia. Idia gwau bema Dirava dekenai idia giroa lou ia ese edia hekwakwanai ibounai do ia haorea. To, ita be unai bamona ita karaia lasi. (2 Tim. 4:3, 4) Ita harorolaia sivarai namona be inai: Iehova be ita ia lalokau henia dainai, Keriso ena boubou gauna amo iseda kara dika ia gwauatao diba. Unai dainai, taunimanima be Dirava ida maino idia karaia bona iena turana ai idia lao diba. (Roma 5:10; 8:32) To, unai “nega namona” be kahirakahira do ia ore.
“Dirava Ena Lauma amo Umui Hururuhururu”
16. Dahaka ese Paulo ia durua mai gari lasi bona boga auka ida ia haroro totona?
16 Edena dala ai tomadiho momokanina ita badinaia bona haroro gaukara ita karaia goadagoada diba? Haida be hemarai taudia dainai ma haida ida idia herevahereva be auka. To, bema ita laloa ia hemarai tauna be mai ena lalona ibounai ida haroro gaukara ia karaia diba lasi, unai be lalohadai kererena. Paulo be mai iseda ura bada ida haroro gaukara ita karaia dalana ia herevalaia. Keristani taudia dekenai ia gwau: “Dirava ena lauma amo umui hururuhururu.” (Roma 12:11, NW ) Iehova ena lauma helaga ese Paulo ia hagoadaia ena haroro gaukara be mai gari lasi bona boga auka ida ia karaia totona. Iesu ese Paulo ia abia hidi negana amo ela bona Roma ai idia hamasea negana ena daudau be lagani 30 mai kahana, to unai negadia ai Paulo be haroro gaukara ia rakatania lasi. Nega ibounai Dirava dekenai ia tabekau, bona Dirava ese ena lauma helaga amo ia hagoadaia. Paulo ia gwau: “[Dirava] ese lau ia hasiahua, vadaeni gau ibounai lau goadalaia diba.” (Fili. 4:13) Oibe, Paulo ena haheitalai amo gau momo ita dibaia!
17. Edena dala ai ‘lauma helaga amo ita hururuhururu’ diba?
17 Inai hereva “hururuhururu” be Greek herevana ta amo idia hahanaia, bona ena anina be lahi ese ranu ia hasiahua bamona. Pani ta lalonai ranu oi hasiahua totona, lahi ia hururu noho be namo. Unai hegeregerena, Iehova ena hesiai gaukara ita karaia noho totona, iena lauma helaga ese ita ia hasiahua be gau badana. Lauma helaga ena heduru ita abia totona, Iehova ese ita ia hagoadaia daladia ibounai ita gaukaralaia be namo. Hegeregere, hanaihanai kongrigeisen hebou dekenai ita lao, sibona eda stadi bona ruma bese ena tomadiho ita karaia bona guriguri karana ita laloa boio lasi. Unai amo lauma helaga ese ita do ia hasiahua iseda gaukara ita karaia noho totona.—Kara 4:20; 18:25 duahia.
18. Ita bapatiso vadaeni Keristani taudia eda tahua gauna badana be dahaka?
18 Mai ena lalona ibounai ida gaukara ta ia karaia tauna be unai gaukara sibona do ia laloa bada, bona gau ta ese ia koua lasi unai ia hagugurua totona. Iesu hegeregerena, ita bapatiso vadaeni Keristani taudia eda tahua gauna badana be Dirava ena ura do ita karaia noho. (Heb. 10:7) Hari inai negai, Iehova ia ura taunimanima ibounai be ia do idia tura henia. Unai dainai, namona be Iesu bona Paulo edia haheitalai ita tohotohoa, bona haroro gaukara ita karaia goadagoada.
Inai Oi Laloatao, A?
• Dirava ese Paulo bona horoa Keristani taudia dekenai dahaka gaukara badana ia henia?
• Horoa orena taudia be edena dala ai “nega namona” idia gaukaralaia haroro gaukara idia karaia goadagoada totona?
• Edena dala ai Keristani taudia be ‘lauma helaga amo idia hururuhururu’ diba?
[Picture on page 12]
Paulo be Damaseko dalanai Lohiabada Iesu Keriso ena hereva ia laloaboio diba lasi