Paulo ese Helaga Taudia Totona Heduru Monina Haboua Karana Ia Naria
KERISTANI taudia momokanidia dekenai lauma gaudia be mai anina bada. To, idia ese ma haida edia namo tauanina dalanai idia laloa danu. Nega momo hisihisi idia davaria noho taudia edia dabu gaudia idia henia. Tadikaka lalokau henia karana ese Keristani taudia ia doria, edia abidadama tamona taudia huanai idia dabu taudia idia durua totona.—Ioane 13:34, 35.
Iena lauma tadikaka bona taihu lalokau henia karana ese aposetolo Paulo ia doria, Akaia, Galatia, Makedonia, bona Asia ena kahana dekenai idia noho kongregesen amo moni ia haboua totona. Dahaka dainai unai idia karaia be namo? Edena bamona unai durua gaukara idia hegaegaelaia? Unai amo dahaka ia vara? Bona dahaka dainai ita ese ia vara gauna ita laloa be namo?
Ierusalema Kongregesen Ena Noho Dalana
Pentekoste 33 C.E. murinai, Pentekoste dinana ai hahediba taudia ai idia lao Iuda taudia bona Iuda tomadiho idia abia dae taudia gabu idauidau amo, be abidadama momokani idia dibaia namonamo totona nega sisina Ierusalema dekenai idia noho. Bema heduru idia abia be namo, edia tadikaka ese mai moale ida idia durudia, edia noho daudau ena metau idia huaia totona. (Kara 2:7-11, 41-44; 4:32-37) Reana heduru ma haida idia abia be namo, badina Iuda bese idia abia isi taudia ese taunimanima idia veria, gavamani idia gwau-edeede henia bona idia dagedage henia hebou totona. Iesu murinai idia raka taudia idia hitolo lasi totona, dina ta ta heduru idia abia be namo vabu hahinedia dekenai kontribusen idia henia. (Kara 6:1-6) Heroda ese kongregesen ia dagedage henia, bona lagani 45 C.E. bamona ai, Iudea dekenai hitolo bada ia vara. Iesu murinai idia raka taudia dekenai, unai gau ibounai ese Paulo ia gwauraia “hisihisi momo,” “dagedage” bona ‘edia kohu dadia’ karadia idia havaraia.—Heberu 10:32-34; Kara 11:27–12:1.
Lagani 49 C.E. bamona lalonai, unai hekwakwanai be ia do noho. Unai dainai, idia lalo-tamona Paulo be idau bese taudia do ia haroro henia, bena murinai Petero, Iamesi, bona Ioane ese ia idia hamaoroa ‘ogogami taudia do ia laloa be namo.’ Paulo ia hekwarahi unai ia karaia totona.—Galatia 2:7-10.
Moni Haboua Karana Ia Naria
Paulo be Iudea ai idia noho ogogami Keristani taudia totona moni haboua gaukarana ia gunalaia. Lagani 55 C.E. bamona ai, Keristani taudia ia hamaoroa: “Ierusalema dekenai ekalesia orea durua totona moni lau ura herevalaia. Galatia ekalesia orea lau hamaoroa hegeregerena, umui danu lau hamaoroa, moni do umui haboua. Pura ena dina ginigunana ibounai umui ta ta ese emui ruma ta ta dekenai moni do umui haboua noho, ena bada be emui gaukara davana ena bada hegeregerena. . . . Umui abia hidi taudia . . . do lau siaia, emui harihari gauna moni, Ierusalema dekenai do idia abia lao.” (1 Korinto 16:1-3) Lagani ta murinai Paulo ia gwau Makedonia bona Akaia taudia be heduru idia henia. Bona unai moni ibounai be Ierusalema dekenai idia siaia neganai, Asia ena distrik amo idia lao taudia idia noho ese ia hahedinaraia, unai gabu dekenai idia noho kongregesen ese moni idia henia danu.—Kara 20:4; 2 Korinto 8:1-4; 9:1, 2.
Ta idia doria lasi ia henia diba lasi moni bada ia henia totona. To, unai be ibounai idia hegeregere totona, edia gaudia amo Ierusalema bona Iudea dekenai idia noho helaga taudia huanai ogogami taudia idia durua diba. (2 Korinto 8:13-15) Paulo ia gwau: “Umui ta ta, sibona emui laloa, emui laloa hegeregerena do umui henia, mai maumau danu henia lasi, bona oda dainai lasi. Badina be mai moale danu ia henia tauna be Dirava ese ia lalokau henia noho.”—2 Korinto 9:7.
Aposetolo tauna ese badina namona ia henia Korinto taudia ese hariharibada karana idia hahedinaraia totona. Iesu be “ogogami tauna bamona ia lao, iena ogogami dekena amo umui ese [lauma dalanai] kohu momo do umui abia totona.” (2 Korinto 8:9) Momokani iena henia karana do idia ura tohotohoa. Danu, Iehova ese ‘bogahisihisi kara momo do idia karaia diba’ totona edia kohu ia habadaia dainai, helaga taudia idia durua bona edia dabu gaudia idia henia be maoro.—2 Korinto 9:10-12.
Heduru Idia Henia Taudia Edia Lalohadai
Sibona eda ura hegeregerena henia karana dekenai, aposetolo edia negai helaga taudia durua program lalonai heduru idia henia taudia edia lalohadai amo, gau momo ita dibaia diba. Unai moni haboua karana be Iehova idia tomadiho henia ogogami taudia laloa karana sibona lasi. Ia hahedinaraia Iuda bona Idau Bese Keristani taudia huanai tadikaka bamona lalo-tamona ia noho. Moni henia bona abia karana ese Idau Bese taudia bona Iuda taudia huanai ia noho lalo-tamona bona hetura karana ia hahedinaraia. Edia durua karana be tauanina dalanai bona lauma dalanai idia karaia.—Roma 15:26, 27.
Reana Paulo be matamanai Makedonia Keristani taudia ia boiria lasi heduru idia henia totona—idia danu idia ogogami bada. To, “idia noinoi, edia moni haida do ai abia lao.” Ena be “hisihisi bada idia davaria gaudia ese edia haheauka idia tohoa,” to “edia goada ia hanaia gauna” be mai edia moale ida idia henia! (2 Korinto 8:1-4) Reana edia hisihisi bada lalonai hadikaia herevadia idia abia, badina Roma taudia ese idia taravatua tomadihona idia badinaia. Unai dainai edia Iudea tadikaka idia hebogahisi henia karana ita lalo-pararalaia diba, badina edia hisihisi be idia abia hisihisi hegeregerena.—Kara 16:20, 21; 17:5-9; 1 Tesalonika 2:14.
Ena be Paulo ese Korinto taudia edia ura bada moni haboua karana dekenai ia gaukaralaia Makedonia taudia ia hagoadaia totona, to Korinto taudia edia ura bada be ia maragi ia lao vadaeni. Hari aposetolo tauna be Makedonia taudia edia hariharibada karana ia gaukaralaia Korinto taudia edia lalona ia veria totona. Ia laloa namona be idia ia hagoadaia, vanegai lagani lalonai idia hamatamaia gaukarana be hari idia haorea totona. Dahaka ia vara?—2 Korinto 8:10, 11; 9:1-5.
Tito be Korinto dekenai unai moni haboua karana ia hamatamaia, to hekwakwanai idia vara bona unai kara idia hadokoa. Paulo ida Makedonia dekenai unai ia herevalaia murinai, Tito be bamodia rua ida idia giroa Korinto kongregesen idia hagoadaia bona moni haboua gaukarana idia haorea totona. Haida be reana idia laloa Paulo be Korinto taudia edia lalona ia veria sibona ena kohu habadaia totona. Reana unai dainai taunimanima toi ia siaia moni haboua gaukarana idia haorea totona bona idia ta ta do idia abia dae ena badina ia hahedinaraia. Paulo ia gwau: “Ai ura lasi tau ta ese ai do ia samania, do ia gwau inai harihari gaudia gaukara ai karaia namonamo lasi.” Ma ia gwau: “Aiemai ura tamona be do ai gaukara maoromaoro, Dirava ena vairanai bona taunimanima edia vairanai danu.”—2 Korinto 8:6, 18-23; 12:18.
Kontribusen Moni Idia Abia Lao
Lagani 56 C.E. ena siahu negana ia matamaia lalonai, moni idia hegaegaelaia vadaeni Ierusalema dekenai idia abia lao totona. Paulo be moni idia henia taudia ese idia abia hidi taudia ida do ia lao. Kara 20:4 ia gwau: “Asia dekenai Paulo idia bamoa taudia be inai: Sopatera Puro, Berea tauna, Arisitako bona Sekundo, Tesalonika taudia, Gaio, Derebe tauna, Timoteo, bona Tukiko bona Tropimo, Asia taudia.” Toana be, idia huanai Luka ia noho danu, reana ia be Filipi Keristani taudia amo. Unai dainai, taunimanima 9 bamona be unai gaukara totona idia lao.
Diba bada tauna Dieter Georgi ia gwau, “ia hedinarai moni bada idia haboua, badina bema lasi Paulo bona idia lao taudia ma haida edia hekwarahi ginigabena be goada bona moni negea kava karana.” Bamoa taudia idia momo be dika koua totona sibona lasi, to danu, idia durua Paulo idia gwauraia koikoi garina. Idia siaia taudia be Ierusalema dekenai helaga taudia vairanai be Idau Bese taudia edia kongregesen taudia.
Bouti dekenai Korinto amo idia lao Suria dekenai, unai dainai reana Pasova dinana ai Ierusalema dekenai do idia noho. To, Paulo idia hamasea gwauraia herevana dainai edia palani ia haidaua. (Kara 20:3) Reana ia idia inai henia taudia idia ura davara dekenai ia idia hamasea.
Paulo be mai ena lalo-hekwarahi gaudia ma haida danu. Ia do lao lasi neganai, Roma dekenai idia noho Keristani taudia ia tore henia do idia guriguri Dirava ‘ese Iudea dekenai kamonai lasi taudia dekena amo do ia hamauria, bona iena gaukara Ierusalema dekenai, be Dirava ena taudia ese do idia abia dae.’ (Roma 15:30, 31) Ena be ia diba helaga taudia be mai tanikiu ida unai moni do idia abia dae, to reana Paulo ia lalo-hekwarahi badina ia laloa iena mai ese Iuda taudia ibounai huanai hekwakwanai do ia havaraia.
Aposetolo tauna be momokani ogogami taudia ia laloa. Edena negai moni idia henia be Buka Helaga ese ia gwauraia lasi, to idia henia karana ese lalo-tamona ia havaraia bona Idau Bese Keristani taudia dekenai dala ia kehoa edia Iudea abidadama tamona taudia amo idia abia lauma kohu namodia dainai edia tanikiu karana idia hahedinaraia totona. Paulo be Ierusalema dekenai ia ginidae bona daudau lasi murinai dubu dekenai ia hedinarai neganai, dagedage ia vara bona ia idia dogoatao. To unai ese dala ia kehoa gavana taudia bona king taudia ia haroro henia totona.—Kara 9:15; 21:17-36; 23:11; 24:1–26:32.
Iseda Kontribusen Hari Inai Negai
Keristani taudia ginigunadia edia nega amo, gau momo idia idau—to hakaua hereva badadia idia idau lasi. Haida be moni dainai idia hekwarahi be Keristani taudia dekenai idia hadibaia be maoro. Idia dabu taudia totona idia henia kontribusen be sibodia edia ura hegeregerena idia henia, badina Iehova bona taunimanima idia lalokau henia karana ese ia doridia dainai.—Mareko 12:28-31.
Aposetolo edia negai helaga taudia totona idia karaia heduru gaukarana ese ia hahedinaraia, unai bamona kontribusen haboua gaukarana idia hegaegaelaia namonamo bona mai kara maoromaoro ida idia kara be namo. Momokani, Iehova Dirava be taunimanima edia dabu gaudia ia diba, bona hekwakwanai lalodiai Basileia ena sivarai namona be ma haida dekenai do idia harorolaia diba totona ena hesiai taudia ia durua. (Mataio 6:25-34) To, ita ibounai be iseda maduna ita huaia diba, herevana iseda moni dalana be edena bamona. Unai dala amo, “aniani ia haboua bada tauna ena aniani, be [“hegeregere bona,” NW ] sisina ia haboua tauna ena aniani be hegeregere.”—2 Korinto 8:15.