Oi be Haheauka Tauna Momokanina, A?

NEGA ta oi badu dikadika ta ena kara be maoro lasi dainai, a? Emu turadia do idia hadikaia diba karadia oi itaia neganai, oi karaharaga, a?

Nega haida maoromaoro kara namona ta ita karaia be namo, kara dikana ta koua totona. Hegeregere, lagani 1600 B.C.E. murinai, kara dika bada hereana ta ese Israela taudia ia hamiroa gwauraia neganai, Arona ena tubuna, Pineha, ese kara ta ia karaia kara dika kokia totona. Iehova Dirava ese ena kara ia ura henia, ia gwau: “Pineha . . . ese lauegu badu be Israela taudia dekena amo ia abia lao. Pineha be, iena kudouna ia ura lasi momokani, Israela taudia ese dirava idauna ta do idia tomadiho henia, to lau sibona ia ura henia.”​​—⁠Numera 25:​1-​11.

Unai kara dika ese ma haida do ia hamiroa lasi totona Pineha ese kara maorona ia karaia. To edena bamona bema taunimanima ma haida edia kerere dainai ita badu dikadika? Bema ita karaharaga eiava iseda kara be badina lasi, ita be kara maoromaoro badinaia tauna ai do ita lao lasi to haheauka lasi tauna ai do ita lao​​—⁠unai bamona tauna ese ma haida edia kerere ia badulaia haraga. Dahaka ese ita ia durua unai bamona tarapu lalonai ita moru lasi totona?

‘Iehova ese Iseda Kara Dika Ibounai Ia Gwauatao’

Iehova ia ura lasi ita be ‘kaivakuku ta ita tomadiho henia, badina be Dirava ia ura ita be iena sibona.’ (Esodo 20:​5) Ia be ita ia Havaraia Tauna dainai, ia sibona ita tomadiho henia be ia oda diba mai ena maoro ida. (Apokalupo 4:​11) To, Iehova ese taunimanima edia manoka ia haheaukalaia diba. Davida ese ia herevalaia neganai, inai ane ia abia: “Lohiabada be mai ena bogahisihisi, bona mai ena hariharibada. Ia ese iena badu ia hakerua noho. Iena lalokau bona bogahisihisi be bada herea. Ia ese ita do ia gwau henia hanaihanai lasi. . . . Iseda kara dika ena bada hegeregerena davana ia henia lasi. Ita ese kara dika momo ita karaia vadaeni, bona Dirava ese kerere davana bada herea ia henia diba, to unai bamona ia karaia lasi.” Oibe, bema ita helalo-kerehai, Dirava ese iseda ‘kara dika ibounai do ia gwauatao.’​​—⁠Salamo 103:​3, 8-10.

Badina be Iehova ia lalo-parara taunimanima be mai edia kara dika, ia ura lasi helalo-kerehai taudia ia “gwau henia hanaihanai.” (Salamo 51:5; Roma 5:​12) Momokani, iena ura be taunimanima edia kara dika bona goevadae lasi nohona do ia haorea. Unai ia do karaia momokani lasi lalonai, Dirava ese iseda “kerere davana bada herea” ia henia lasi, to mai hebogahisi ida Iesu ena mauri davalaia boubouna amo, ita ia gwauatao henia noho. Bema Iehova ese ia hegeregere negadia ai ita ia hebogahisi henia lasi, ita ta lasi do ita roho mauri diba. (Salamo 130:⁠3) Mai ena maoro ida iseda guba Tamana ia ura ia sibona ita tomadiho henia, to ita moale diba badina ia be hebogahisi Diravana!

Ita Laloa Maoromaoro be Namo

Guba bona tanobada edia Siahu Ibounai Lohiabadana ese kara dika taudia ia kara henia mai haheauka ida, unai dainai ita karaia danu be namo, ani? Haida idia gwau haheauka karana ena anina be ‘ta ese ma haida edia lalohadai eiava edia kara ia badulaia haraga lasi.’ Ita be unai bamona, a? Taunimanima ma haida edia hereva ta eiava edia kara ta be kara dika badana lasi to ita dekenai ia namo momokani lasi neganai, iseda lalohadai ginigunana be do ita haheaukalaia, a?

To momokani, gau ibounai ita haheaukalaia be namo lasi. Hegeregere, tomadiho gunalaia taudia haida ese pris taudia edia kara dikadia, memero bona kekeni sihari henia karadia, idia haheaukalaia neganai dika bada herea ia vara. Ireland dekenai ia noho niuspepa tauna ta ia gwau: “Unai natudia idia kara henia dalana be idia laloa kara dika sibona dainai ia vara, bona dubu gunalaia taudia ese sihari henia pris taudia be gabu ma ta dekenai idia siaia sibona.”

Unai bamona tauna idia siaia lao gabu ma ta dekenai be haheauka karana ena haheitalai maorona, a? Lasi! Mani oi laloa bema hospital biagua taudia ese ivaia doketa dikana ta idia koua lasi, herevana gorere taudia ia hamasea eiava idia ia hadikaia bada, to hospital ma ta bena ma haida dekenai idia siaia lao. Reana doketa taudia idia laloa kerere doketa ibounai idia badinaia be namo dainai unai bamona “haheauka karana” ia vara diba. To iena kara kerere o taravatu hamakohia karana dainai edia mauri idia haboioa eiava edia tauanina ia hadikaia taudia be edena bamona?

Gari gauna ma ta be, reana ta be haheauka karana sisina sibona ia hahedinaraia. Iesu be tanobada dekenai ia noho neganai, Iuda taudia haida be idia gwauraia Zealot taudia, bona Pineha ena haheitalai idia gaukaralaia edia kara edia maoro idia hamomokania totona. Zealot taudia edia kavakava karana ta be “Ierusalema dekenai aria bona unai bamona negadia ai hutuma huanai idia noho bona hunia dalanai kaia ta amo idia ura lasi taudia idia gwadaia.”

Ita Keristani taudia be unai Zealot taudia bamona lasi, ita ura henia lasi taudia do ita dagedage henia lasi. To haheauka lasi mamina ia noho dainai, dala idauna ta ai ita be ita ura lasi taudia ita dagedage henia​​—⁠reana ita herevalaia dalana amo, a? Bema ita be haheauka taudia momokanidia, unai bamona hahisia herevadia do ita gaukaralaia lasi.

Aposetolo taudia edia negai idia noho Farisea taudia be haheauka lasi oreana ma ta. Idia be hanaihanai ma haida idia gwauraia dika bona taunimanima edia goevadae lasi karadia idia badulaia haraga. Idia hekokoroku Farisea taudia ese ladana maragi taudia idia laloa maragi, idia gwauraidia dika, idia gwau idia be “dika davana do idia davaria” taudia. (Ioane 7:​49) Mai badina namona dainai, Iesu ese unai sibodia edia maoro idia heagilaia tatau ia gwauraia dika, ia gwau: “Taravatu hadibaia taudia bona Farisea taudia, kara koikoi taudia, dika do umui davaria momokani! Badina be aniani edia ava maragimaragi ibounai dekenai umui haria be kahana 10 umui karaia, kahana ta be boubou gauna dekenai umui halaoa. To taravatu ena hereva badadia, kota henia, bona bogahisihisi, bona abidadama, umui negea. Bema umui badinaia, bona kara namodia haida danu bema umui badinaia be ia namo.”​​—⁠Mataio 23:⁠23.

Iesu ese unai hereva ia henia neganai, Mose ena Taravatu badinaia ena anina ia hamaragia lasi. Ia ura ia hahedinaraia unai Taravatu “ena hereva badadia” eiava mai anina bada gaudia, idia karaia mai laloa maoromaoro bona hebogahisi ida be namo. Iesu bona ena hahediba taudia edia kara be unai haheauka lasi Farisea bona Zealot taudia edia kara amo idia idau momokani!

Iehova Dirava bona Iesu Keriso ese kara dika idia abia dae lasi. Daudau lasi murinai, ‘Dirava ese ia idia ura lasi taudia bona sivarai namona idia abia dae lasi taudia dekenai davana metauna do ia henia.’ (2 Tesalonika 1:​6-10) Iesu be kara maoromaoro ia goadalaia, to iena guba Tamana ena haheauka, hebogahisi bona iena lalokau, kara namo idia ura idia karaia taudia ibounai dekenai be hanaihanai ia hahedinaraia danu. (Isaia 42:​1-3; Mataio 11:​28-30; 12:​18-21) Iesu ese haheitalai namona ia hahedinaraia ita dekenai!

Mai Haheauka ida Ita Gwauatao Heheni

Ena be mai eda ura bada ida kara maorona ita karaia, to namona be aposetolo Paulo ena sisiba ita badinaia: “Bema tau ta ese iena bamona tauna ia maumauraia, ia kara dika henia dainai, namona be unai dika do ia gwauatao. Lohiabada ese umui emui dika ia gwauatao, vadaeni unai bamona do umui karaia danu.” (Kolose 3:13; Mataio 6:​14, 15) Haheauka ena anina be inai tanobada dikana lalonai iseda kerere bona dika do ita gwauatao heheni. Momokani, bema ma haida edia manoka bona kerere ita haheaukalaia diba lasi, unai be kavakava karana, badina tanobada taudia ibounai idia goevadae lasi. Namona be ita be ma haida amo idia henia diba gaudia sibona ita tahua.​​—⁠Filipi 4:⁠5.

To ita gwau lasi haheauka dainai kara dika do ita abia dae eiava kerere do ita itaia lasi. Reana iseda tadikaka ena lalohadai ta eiava kara ta be Iehova ena taravatu hegeregerena momokani lasi. Ena be ena kerere be ia do dika momokani lasi bona Dirava ese ia do dadaraia lasi, to reana ia be toa ta bona ia hahedinaraia gau haida ia haidaua be namo. (Genese 4:​6, 7) Lauma dalanai idia goada taudia be kerere tauna ena lalohadai idia hanamoa mai manau ida neganai, unai be lalokau karana! (Galatia 6:⁠1) To ia do idia durua momokani totona, do idia kara ia idia laloa bada dainai, bona kerere tahua goadagoada lalohadaina dainai idia karaia lasi.

“Mai Mataurai Bona Manau Danu”

To tomadiho idauna taudia dekenai haheauka karana ita hahedinaraia be namo danu, a? Lagani 1831 ai, Ireland ena National Schools iboudiai dekenai “Hadibaia Herevana Badana” ta idia atoa, bona ia gwau: “Iesu Keriso ia ura lasi ena tomadiho be taunimanima dekenai idia fosia mai dagedage ida. . . . Aiemai dekena taudia ida ai hepapahuahu bona idia ai gwauraia dika amo, do idia laloa lasi ai be maoro bona idia kerere. Reana unai kara dainai edia lalona do idia hadaia Keristani laumana ai abia lasi.”

Iesu ena hadibaia dalana bona ena kara ese taunimanima idia veria Dirava ena Hereva dekenai, bona namona be ita be ia bamona. (Mareko 6:34; Luka 4:​22, 32; 1 Petero 2:21) Ia be tau goevadaena bona Dirava ese aonega idauna ia henia ia dekenai, unai dainai taunimanima edia kudouna lalonai idia noho gaudia ia itaia diba. Unai dainai, ia namo neganai, Iesu be Iehova ena inai taudia ia gwauraia dika diba. (Mataio 23:​13-33) Unai kara ia karaia neganai ia be badu haraga karana ia karaia lasi.

Ita be Iesu bamona lasi, taunimanima edia kudouna ai idia noho gaudia ita itaia diba lasi. Unai dainai, namona be aposetolo Petero ena sisiba ita badinaia, ia gwau: “Emui kudouna dekenai Keriso do umui abia dae, do umui matauraia, bona ia tamona emui Lohiabada do umui halaoa. Bema haida ese emui abidadama bona lalona namo totona umui idia nanadaia neganai, nega ibounai do umui naria hegaegae noho, idia do umui haere henia totona. To mai mataurai bona manau danu do umui haere.” (1 Petero 3:15) Ita be Iehova ena hesiai taudia dainai, namona be iseda abidadama ena maoro ita hamomokania, badina Dirava ena Hereva amo ita abia. To namona be ma haida bona mai momokani ida idia abia dae lalohadai ita matauraia dalana ai ita karaia. Paulo ia gwau: “Nega ibounai mai laloa namona bona mai gado namo do umui hereva. Bona taunimanima ta ta dekenai do umui haere henia mai maoromaoro danu.”​​—⁠Kolose 4:⁠6.

Iesu ese ororo dekenai ia henia Haroro Herevana Badana lalonai, ia gwau: “Unai dainai, gau ibounai umui ura taunimanima ese do idia karaia umui dekenai, umui ese unai bamona do umui karaia idia dekenai.” (Mataio 7:12) Unai dainai, namona be ita haheauka heheni bona sivarai namona ita harorolaia neganai, ita haroro henia taudia ita matauraia. Kara maoromaoro goadalaia karana be Baibel ese ia herevalaia haheauka karana ida ita hahedinaraia neganai, Iehova do ita hamoalea bona haheauka taudia momokanidia ai do ita lao.

[Picture on page 23]

Farisea taudia edia haheauka lasi karana oi dadaraia

[Picture on page 23]

Iesu ese ena Tamana ena haheauka ia hahedinaraia. Oi hahedinaraia danu, a?