Dahaka Dainai Nega Ibounai Ita Guriguri be Namo?
“Nega ibounai do umui guriguri. Emui mauri lalonai idia vara gaudia ibounai dainai Dirava do umui tanikiu henia.”—1 TESALONIKA 5:17, 18.
1, 2. Daniela ese edena dala ai ia hahedinaraia guriguri ena hahenamo ia laloa bada, bona unai dainai iena hetura karana Dirava ida be edena bamona?
VAIA, peroveta tauna Daniela ena kara be dina ta ai nega toi Iehova dekenai ia guriguri. Ia be ena atai daiutuna dekenai, Ierusalema ia vaira henia uindo badinai ia tui diho, bona ia guriguri. (1 King Taudia 8:46-49; Daniela 6:10) Ena be Mede ena King Dariuse ese taravatu ia atoa, guriguri be tau ta dekenai lasi to ia sibona dekenai do idia gwauraia neganai, Daniela be ena kara ia haidaua lasi. Herevana unai guriguri momo tauna be ena mauri do ia haboioa eiava lasi, to nega ibounai Iehova ia guriguri henia.
2 Iehova ese Daniela be edena bamona ia laloa? Aneru Gabriela be Daniela ena guriguri ta haerelaia totona ia mai neganai, ia ese unai peroveta tauna ia gwauraia ‘Dirava ese ia lalokau henia bada’ tauna. (Daniela 9:20-23) Esekiela ena peroveta herevana lalonai, Iehova ese Daniela ia gwauraia kara maoromaoro tauna. (Esekiela 14:14, 20) Daniela ena mauri lalonai, iena guriguri karana dainai ena hetura karana iena Dirava ida ia habadaia, Dariuse ese unai ia itaia danu.—Daniela 6:16.
3. Misinari ta ena ekspiriens ese ia hahedinaraia bamona, guriguri ese edena dala ai ita ia durua diba kara maoromaoro ita karaia noho totona?
3 Guriguri hanaihanai karana ese ita ia durua diba hahetoho dikadia ita haheaukalaia totona. Hegeregere, Harold King, China ai misinari gaukara ia karaia bona lagani faiv dibura rumana ena daiutu maragina lalonai ia noho tauna, ena sivarai mani ita laloa. Tadikaka King ese ena ekspiriens ia gwauraia, ia gwau: “Ena be taunimanima edia amo lau idia hapararaia lau sibona lau noho totona, to tau ta ese lau bona Iehova ia hapararaia diba lasi. . . . Egu dibura daiutu be hedinarai gabuna dekenai ia noho dainai, idia raka hanai taudia ese lau idia itaia diba, egu dibura daiutuna lalonai dina ibounai nega toi lau tui diho bona lau guriguri badabada, unai negadiai Baibel ese ia herevalaia tauna Daniela lau laloa. . . . Toana be unai bamona negadiai Dirava ena lauma ese lau ia durua dainai gau namodia momo lau laloa bona lalo-maino ia henia. Guriguri karana ese lauma dalanai egu lalona ia hagoadaia momokani!”
4. Inai stadi herevana lalonai, guriguri karana dekenai dahaka henanadai do ita lalodia?
4 Baibel ia gwau: “Nega ibounai do umui guriguri. Emui mauri lalonai idia vara gaudia ibounai dainai Dirava do umui tanikiu henia.” (1 Tesalonika 5:17, 18) Unai sisiba dainai, inai henanadai haida mani ita laloa: Dahaka dainai iseda guriguri ita laloa namonamo be namo? Dahaka badina idauidau dainai nega ibounai Iehova ita guriguri henia? Bona dahaka ita karaia be namo bema ita laloa iseda kerere dainai Dirava dekenai ita guriguri be hegeregere lasi?
Guriguri amo Turana Karana Habadaia
5. Guriguri ese ita ia durua edena hetura karana namona ita moalelaia totona?
5 Oi ura Iehova be iena turana bamona oi do ia laloa, a? Ia ese bese kwarana tauna Aberahamo be unai bamona ia gwauraia. (Isaia 41:8; Iamesi 2:23) Iehova ia ura ia ida unai bamona turana karana ita haginia. Ia ese ita ia noia iena kahirakahira ita lao totona. (Iamesi 4:8) Unai boiboi herevana dainai ita ese guriguri ena hahenamo hereadaena ita laloa bada be namo, ani? Ladana bada gavamani tauna ta ida oi hereva totona nega oi abia be ia auka, iena turana ai oi lao totona be ia auka danu! To, guba bona tanobada ia Havaraia Tauna ese ita ia hagoadaia iseda ura negana ai, guriguri amo ia ita hereva henia diba. (Salamo 37:5) Nega ibounai ita guriguri karana ese ita ia durua Iehova ena turana namona ai ita lao totona.
6. Iesu ena haheitalai ese “guriguri” loulou karana dekenai dahaka ia hadibaia ita dekenai?
6 To, guriguri karana ita rakatania be ia auka lasi! Dina ta ta ena hekwarahi ese iseda nega bada ia abia diba, unai dainai nega ita atoa lasi Dirava dekenai ita hereva totona. Iesu ese iena hahediba taudia ia hagoadaia idia “guriguri” loulou totona, bona ia be unai bamona ia karaia. (Mataio 26:41) Ena be daba ia lao hanuaboi ai ia bisi bada, to nega ia atoa iena guba Tamana ia hereva henia totona. Nega haida, Iesu be “daba maragi, dina ena diari ia mai lasi” neganai ia toreisi, ia guriguri totona. (Mareko 1:35) Ma nega haida ai, adorahi ai taunimanima idia noho lasi gabuna dekenai ia lao, unai amo Iehova do ia hereva henia. (Mataio 14:23) Iesu be hanaihanai nega ia atoa ia guriguri totona, bona unai bamona danu ita karaia be namo.—1 Petero 2:21.
7. Dahaka gaudia idia vara dainai, dina ta ta ai iseda guba Tamana ita hereva henia be namo?
7 Dina ta ta ai, hekwakwanai bona hedibagani ita davaria, eiava abia hidi ita karaia neganai, nega momo unai be nega maorodia ita guriguri totona. (Efeso 6:18) Iseda mauri lalonai ita karaia gaudia ibounai lalonai Dirava ena hahekau ita tahua neganai, iseda turana karana ia ida do ita habadaia. Bema turadia rua ese hekwakwanai idia davaria hebou, unai ese edia turana karana ia hagoadaia, ani? (Aonega Herevadia 17:17) Unai be momokani bema Iehova dekenai ita tabekau bona iena heduru ita mamia, unai ese iseda hetura karana ia ida do ia hagoadaia.—2 Sivarai 14:11.
8. Nehemia, Iesu, bona Hana edia haheitalai amo, iseda guriguri ena lata dekenai dahaka ita dibaia?
8 Ita moale badina Dirava ese guriguri ena daudau bona nega hida ia ida ita hereva ena hetoana ia atoa lasi! Nehemia ese Parasa ena King ia do noia lasi neganai, ena lalona dekenai guriguri kwadogina ta ia gwauraia. (Nehemia 2:4, 5) Iesu ese Iehova ia noia siahu ia henia Lasaro ia hatorea isi lou gwauraia neganai, guriguri kwadogina ta ia gwauraia. (Ioane 11:41, 42) To, Hana ese “Iehova dekenai guriguri latana ia gwauraia” neganai, iena lalona ena hemami ibounai be ia dekenai ia gwauraia hedinarai. (1 Samuela 1:12, 15, 16; NW ) Sibona iseda guriguri be iseda ura gaudia bona noho dalana hegeregerena ia kwadogi eiava ia lata diba.
9. Dahaka dainai iseda guriguri lalonai Iehova ese ia karaia gaudia ibounai dainai ia ita hanamoa bona ita tanikiu henia be namo?
9 Baibel lalonai idia gwauraia guriguri momo ese Iehova ena atai herea momokani dagina bona iena hoa karadia dainai mai kudouna ibounai ida idia gwauraia tanikiu herevadia idia hahedinaraia. (Esodo 15:1-19; 1 Sivarai 16:7-36; Salamo 145) Aposetolo Ioane ese matahanai ta lalonai, elda taudia 24 ia itaia—guba ai do idia noho horoa Keristani taudia edia namba ibounai unai—Iehova idia hanamoa, idia gwau: “Aiemai Lohiabada, aiemai Dirava e, oi be hegeregere momokani vadaeni, taunimanima ibounai ese hairai bona mataurai, be oi dekenai do idia henia, bona oiemu siahu henunai do idia noho. Badina gau ibounai be oi ese oi havaraia. Oiemu ura dainai oi karadia, bona oiemu ura dainai idia noho.” (Apokalupo 4:10, 11) Ita danu be unai badina dainai nega ibounai Havaraia Tauna ita hanamoa. Tama sina be gau ta idia karaia dainai edia natudia ese mai edia kudouna ibounai ida idia tanikiu henia neganai, idia moale bada! Iehova ena hebogahisi ita laloa bada bona mai kudouna ibounai ida iseda tanikiu herevana ita gwauraia neganai, unai be dala namona iseda guriguri ita hanamoa totona.
“Nega Ibounai Do Umui Guriguri”—Dahaka Dainai?
10. Guriguri karana ese edena dala ai iseda abidadama ia hagoadaia?
10 Iseda abidadama dekenai guriguri be mai anina bada. Iesu ese ‘nega ibounai do idia guriguri bona hesiku lasi’ karana be haheitalai ta amo ia gwauraia murinai, ia henanadai ia gwau: “Taunimanima ena Natuna do ia mai neganai, tanobada dekenai abidadama do ia davaria o?” (Luka 18:1-8) Mai anina bada bona kudouna ibounai ida ita gwauraia gurigurina ese abidadama ia hagoadaia. Bese kwarana tauna Aberahamo ia buruka bona natudia ia do havaraia lasi neganai, Dirava ida unai gauna ia herevalaia. Iehova ese ia haere henia neganai, ia noia guba ia itaia bona hisiu ia duahia totona, bema ia hegeregere. Bena Dirava ese Aberahamo ia hamaoroa, ia gwau: “Oiemu tubuna edia momo be dohore unai bamona.” Dahaka ia vara? Aberahamo “ese Lohiabada dekenai ia abidadama henia, unai dainai Lohiabada ia gwauraia, Aberamo be maoro.” (Genese 15:5, 6) Bema guriguri amo iseda kudouna dekenai idia noho gaudia be Iehova dekenai ita gwauraia, Baibel lalonai iena hagoadaia herevadia ita abia dae, bona ia ita badinaia, iseda abidadama do ia hagoadaia.
11. Guriguri ese edena bamona ita ia durua diba hekwakwanai idauidau ita haheaukalaia totona?
11 Danu, guriguri ese ita ia durua diba hekwakwanai ita hamaoromaoroa totona. Iseda mauri be metau momo amo ia honu bona iseda noho dalana ia dika, ani? Baibel ese ita ia hamaoroa: “Oiemu laloa hekwarahi be Lohiabada dekenai do oi henia, bona ia ese idia dekena amo oi do ia durua. Ia ese kara maoromaoro taudia ia durua noho. Idia be do idia moru lasi, lasi momokani.” (Salamo 55:22) Abia hidi ta ita karaia totona ia auka neganai, Iesu ena haheitalai ita tohotohoa diba. Ia be ena aposetolo taudia 12 ia do abia hidi lasi neganai, hanuaboi ta ibounai lalonai ia guriguri. (Luka 6:12-16) Bona ia do mase lasi hanuaboina ai, Iesu be ia guriguri goadagoada dainai “iena kopina ia siahu ranuna be rara bamona ia moru tano dekenai.” (Luka 22:44) Dahaka ia vara? “Dirava ese Iesu ena noinoi ia abia dae, badina Iesu be . . . Dirava henunai ia manau noho dainai.” (Heberu 5:7) Nega ibounai ita guriguri goadagoada karana ese ita do ia durua lalo-hekwarahi bona hahetoho badadia ita haheaukalaia totona.
12. Guriguri karana ese edena bamona ia hahedinaraia Iehova ese ita ta ta ia laloa?
12 Guriguri amo Iehova kahirakahira ita lao ena badina ma ta be, ia be ita kahirakahira do ia mai. (Iamesi 4:8) Guriguri amo Iehova dekenai iseda lalona ai idia noho gaudia ita herevalaia neganai, ita mamia ia be iseda ura gaudia ia laloa bona mai ena lalokau ida ita ia naria, ani? Dirava ena lalokau be eda mauri ta ta lalonai do ita mamia. Iehova be iena hesiai taudia edia guba Tamana dainai, ia dekenai idia gwauraia guriguri ibounai kamonai henia ena maduna be ta dekenai ia henia lasi. (Salamo 66:19, 20; Luka 11:2) Bona ita ia noia ‘iseda laloa hekwarahi gaudia ibounai be iena imana dekenai ita atoa.’—1 Petero 5:6, 7.
13, 14. Dahaka badina haida dainai nega ibounai ita guriguri?
13 Guriguri karana ese ita dekenai ura bada ia henia diba haroro gaukara ita habadaia totona bona taunimanima edia ura lasi karana eiava dagedage dainai ita mamia unai gaukara ita hadokoa neganai, ita ia hagoadaia. (Kara 4:23-31) Danu, guriguri ese “Satani ena koikoi karadia” amo ita ia naria diba. (Efeso 6:11, 17, 18) Dina ta ta ena hahetoho idauidau ita hekwarahilaia neganai, Dirava ita nanadaia diba ita ia hagoadaia totona. Iesu ese ia gwauraia gurigurina lalonai Iehova ia noia ‘Satani ena imana dekena amo ita do ia hamauria.’—Mataio 6:13.
14 Bema iseda kara dika urana ita biagua totona ita guriguri noho, Iehova ena heduru do ita mamia. Inai gwauhamata herevana ita abia, ia gwau: “Dirava be ia momokani. Ia ese umui do ia naria, emui goada ia hanaia dibagani ese umui do ia pidia garina. Bona dibagani ia mai neganai, emui dala ta do ia kehoa. Vadaeni inai dala dekena amo unai dibagani dekena amo do umui kwalimu diba.” (1 Korinto 10:13) Aposetolo Paulo ese noho daladia idauidau lalonai Iehova ena naria dalana ia mamia. Ia gwau: “Lau dekenai siahu ia henia Diravana dainai, lau be mai egu goada gau iboudiai karaia totona.”—Filipi 4:13; 2 Korinto 11:23-29.
Ena be Kerere Ita Karaia to Guriguri Ita Goadalaia
15. Iseda kara be Dirava ena taravatu ida ia hegeregere lasi neganai, dahaka ia vara diba?
15 Dirava ese iseda guriguri ia kamonai henia totona, iena Hereva amo idia mai sisiba herevadia ita dadaraia lasi be namo. Aposetolo Ioane ia gwau: “Ita noia gaudia ibounai be ia ese ita dekenai do ia henia. Badina be iena taravatu ita badinaia noho, bona ia do ita hamoalea karadia ita karaia noho dainai.” (1 Ioane 3:22) To, iseda kara be Dirava ena taravatu ida ia hegeregere lasi neganai, reana dahaka ia vara diba? Adamu bona Heva idia kara dika murinai, Eden umana lalonai idia hunia. Reana ita danu ita laloa “Dirava dekena amo” do ita hunia bona guriguri karana do ita hadokoa. (Genese 3:8) Ia manada vadaeni loaloa naria tauna ta ladana Klaus, ia gwau: “Lau itaia nega momo Iehova bona iena orea amo idia hure oho taudia idia karaia gau ginigunana be, guriguri karana idia hadokoa.” (Heberu 2:1) Jose Angel dekenai unai ia vara. Ia gwau: “Lagani 8 lalonai, nega momo Iehova dekenai lau guriguri lasi. Ena be lau laloa ia be egu guba Tamana, to lau mamia lau hegeregere lasi ia lau hereva henia totona.”
16, 17. Guriguri hanaihanai karana ese ita ia durua diba lauma dalanai iseda manoka ita hanaia totona, mani haheitalai haida oi gwauraia.
16 Ita haida be reana ita mamia ita hegeregere lasi ita guriguri totona badina lauma dalanai ita manoka eiava kara dika ta ita karaia. To unai be nega namona guriguri ita goadalaia totona. Iona be iena hesiai gaukara amo ia heau boio. To ‘iena hisihisi lalonai ia boiboi Iehova dekenai, bona Ia ese ia haere henia. Mase gabuna ena dobu gabuna dekena amo, durua totona Iehova dekenai ia boiboi, bona Ia ese Iona ia kamonai henia.’ (Iona 2:2) Iona ia guriguri, Iehova ese ena guriguri ia haerelaia, bona Iona be lauma dalanai ia goada lou.
17 Jose Angel be heduru totona ia guriguri goadagoada danu. Ia gwau: “Lauegu kudouna ai idia noho gaudia lau gwauraia bona Dirava lau noia egu kara dika do ia gwauatao. Bona ia ese lau ia durua. Lau laloa bema guriguri ena heduru lau abia lasi, hereva momokani dekenai do lau giroa mai lasi. Hari lau be dina ta ta ai hanaihanai lau guriguri, bona guriguri negadia lau laloa bada.” Namona be Dirava dekenai ita gari lasi to ia dekenai iseda kerere ita gwauraia hedinarai bona mai manau ida ita noia iseda dika ia gwauatao totona. King Davida be iena kerere ia gwauraia hedinarai neganai, Iehova ese ena dika ia gwauatao. (Salamo 32:3-5) Iehova ia ura ita ia durua, ia ura lasi ita ia gwauraia dika. (1 Ioane 3:19, 20) Bona kongregesen ena tatau badadia edia guriguri ese lauma dalanai ita ia durua diba, badina unai bamona guriguri be “mai ena siahu.”—Iamesi 5:13-16.
18. Ena be Dirava ena hesiai taudia be nega daudau idia raka siri, to dahaka idia diba momokani?
18 Guna ia kerere bona hari mai manau ida ena tamana ena heduru bona sisiba ia noia natuna, be ena tamana ese do ia dadaraia lasi, ani? Ia boio merona ena parabolena ese ia hahedinaraia ena be nega daudau ita raka siri, to iseda guba Tamana dekenai ita giroa lou neganai ia moale bada. (Luka 15:21, 22, 32) Iehova ese kerere idia karaia taudia ibounai ia hagoadaia ia dekenai idia boiboi totona, badina “ia ese dika do ia gwauatao momokani.” (Isaia 55:6, 7) Ena be Davida be kara dika badadia haida ia karaia, to Iehova ia boiboi henia, ia gwau: “Dirava e, egu guriguri do oi kamonai. Egu noinoi do oi negea lasi.” Danu ia gwau: “Adorahi neganai, daba neganai, bona dina tubua neganai, lau ese [Iehova] dekenai lau taitai henia, bona ia ese egu gadona do ia kamonai henia.” (Salamo 55:1, 17) Unai be hagoadaia gauna!
19. Bema toana be Dirava ese guriguri ia haerelaia lasi, dahaka dainai ita gwau lasi unai ese ia hahedinaraia Dirava ese unai guriguri ia abia dae lasi?
19 Bema iseda noinoi ena haere ita abia haraga lasi be edena bamona? Vadaeni, namona be ita hamomokania iseda noinoi be Iehova ena ura hegeregerena bona Iesu ena ladanai ita gwauraia. (Ioane 16:23; 1 Ioane 5:14) Hahediba tauna Iamesi ia gwau Keristani taudia haida edia guriguri ena haere idia abia lasi, badina idia be ‘mai laloa kerere danu idia noia.’ (Iamesi 4:3) To, bema toana be Dirava ese guriguri ia haerelaia lasi, namo lasi karaharaga ita gwau unai ese ia hahedinaraia Dirava ese unai guriguri ia abia dae lasi. Nega haida Iehova ia ura kamonai tomadiho taudia ese gau ta idia gurigurilaia nega sisina daudau lalonai, ela bona haere ia henia. Iesu ia gwau: “Umui noinoi [noho], vadaeni Dirava ese do ia henia umui dekenai.” (Mataio 7:7) Unai dainai, ‘guriguri do ita goadalaia nega ibounai.’—Roma 12:12.
Guriguri Hanaihanai
20, 21. (a) Inai “nega dokona” lalonai, dahaka dainai nega ibounai ita guriguri be namo? (b) Iehova ena helai gabuna kahirakahira dekenai ita raka lao neganai, dahaka do ita abia?
20 Metau bona hekwarahi be inai “nega ena dokona dekenai” idia bada idia lao noho bona “metau dikadia momo . . . idia vara” danu. (2 Timoteo 3:1) Bona hahetoho ese iseda lalona idia veria haraga diba. To, nega ibounai ita guriguri karana ese ita do ia durua iseda mauri lalonai lauma gaudia ita laloa bada totona, ena be hekwakwanai, hedibagani, bona lalo-manoka ita davaria. Dina ta ta ai Iehova dekenai ita gwauraia gurigurina ese ita ura heduruna ia henia diba.
21 Iehova, ‘guriguri ia kamonai’ Diravana, dekenai nega bada ia noho ita ia kamonai henia totona. (Salamo 65:2) Namo lasi ita gaukara momo dainai ita be nega lasi ia ida ita hereva totona. Iseda hetura karana Dirava ida be ita abia dava bada gauna ta. Unai gauna ita laloa maragi lasi. “Unai dainai mai gari lasi danu, Dirava ena bogahisihisi ia noho helai gabuna dekenai ita raka kahirakahira lao, be namo. Vadaeni ia ese ita do ia bogahisihisi henia, bona ia ese hariharibada bona durua ita dekenai do ia henia, iseda metau hegeregerena.”—Heberu 4:16.
Edena Bamona Do Oi Haere?
• Peroveta tauna Daniela ena kara amo guriguri karana ena namo dekenai dahaka ita dibaia?
• Iehova ida iseda hetura karana be edena bamona ita hagoadaia diba?
• Dahaka dainai nega ibounai ita guriguri be namo?
• Dahaka dainai ita hegeregere lasi lalohadaina ese Iehova guriguri henia karana amo ita ia koua lasi be namo?
[Picture on page 12]
Nehemia be king ia do hereva henia lasi neganai, ena lalona ai guriguri kwadogina ta ia gwauraia
[Picture on page 13]
Hana ese “Iehova dekenai guriguri latana ia gwauraia”
[Pictures on page 14]
Iesu ese ena aposetolo taudia 12 ia do abia hidi lasi neganai, hanuaboi ibounai ta lalonai ia guriguri
[Pictures on page 16]
Dina ibounai lalonai guriguri nega namodia idia noho