Kara Namo Ita Habadaia Diba Dalana

HARI inai negai diksenari idia gwau “kara namo” ena anina be “mauri ena kara goeva; namo karana.” Ia be “kara bona lalohadai maorodia; kara namo tauna ena kara.” Diksenari ena hereva haboudia tauna, Marvin R. Vincent, ia gwau “kara namo” be Greek hereva gunana amo idia hahanaia bona ena anina be “namo momokani gaudia.” Unai dainai ita hoa lasi nega idauidau ai inai bamona kara, hegeregere aonega, gari lasi, sibona biagua karana, dala maorona ai ma haida kara henia karana, hebogahisi, haheauka, koikoi lasi, manau, bona badinaia karana be taunimanima ese idia gwauraia kara namo. Idia gwau kara namo ena anina ma ta be “kara maoro taravatuna badinaia karana.”

To daika ena kara maoro bona kara namo taravatudia ita badinaia be namo? Newsweek magasin ia gwau: ‘Hari taunimanima momo edia lalohadai be kara maoromaoro taravatudia idia abia dae lasi, tubudia bona dubu edia lalohadai idia dadaraia dainai, bona dahaka be maoro bona dahaka be kerere be ta ta ena ura, hemami bona kastom hegeregerena ia abia hidi diba.’ To ta be sibona ena ura hegeregerena dahaka be maoro bona dahaka be kerere ia abia hidi be namo, a? Lasi. Bema ita ura kara namo ita habadaia, namona be kara namo bona kara dika edia idau idia hahedinaraia taravatu namodia ita diba​​—⁠unai taravatu amo do ita diba bema kara ta, lalohadai ta, eiava gau ma ta ita gwauraia namo o kerere.

Kara Maoromaoro Taravatudia Edia Badina Tamona

Kara maoromaoro taravatudia edia Badina korikorina be tamona​​—⁠taunimanima ia Havaraia Tauna, Iehova Dirava. Iehova Dirava ese tau ginigunana, Adamu, ia havaraia bena nega daudau lasi murinai, inai hahegani ia henia ia dekenai: “Uma gabu dekenai gini au ibounai edia huahua oi ania diba, idia be taravatu lasi, to kara namo bona kara dika hadibaia au ena huahua oi ania lasi, badina be inai huahua oi ania dina dekenai do oi mase momokani.” (Genese 2:​16, 17) Iehova Dirava ese unai au dekenai ladana idauna ta ia atoa, ia hahedinaraia ia havaraia gaudia dekenai dahaka be namo bona dahaka be dika be ia sibona do ia abia hidi diba. Unai dala ai Dirava ena taravatu, dahaka be namo bona dahaka be dika, be tau ta ena kara, lalohadai, bona kara toana hahemaoro henia ena badina ai ia lao. Bema unai bamona taravatu be lasi, maoro bona kerere edia idau ita diba lasi.

Kara namo bona kara dika hadibaia auna dekenai ia noho hahegani ena anina be Adamu bona Heva ese kara ta​​—⁠do idia kamonai eiava do idia kamonai lasi​​—⁠do idia abia hidi diba. Idia dekenai, kara namo ena anina be unai hahegani do idia badinaia. Gabeai, Iehova ia hahedinaraia edena kara ese ia idia hamoalea bona ia idia habadua, bona ita totona Baibel lalonai ia torea. Unai dainai kara namo habadaia karana be, Iehova ena kara maoromaoro taravatudia Baibel lalonai ita badinaia.

Dirava Ena Taravatu Diba Namonamo

Iehova Dirava ese dahaka be namo bona dahaka be dika taravatudia ia abia hidi vadaeni bona Baibel lalonai ia hahedinaraia dainai, namona be idia ita diba namonamo, ani? Aposetolo Paulo ia gwau: “Buka Helaga ibounai be Dirava ena lauma amo ia vara bona ia be mai ena namo hadibaia totona, sisiba henia totona, gau idauidau hamaoromaoroa totona, kara maoromaoro ai matahakani henia totona, vadaeni Dirava ena tau be do ia hegeregere momokani, gau ibounai ia abia hegaegae gaukara namodia ibounai karaia totona.”​​—⁠2 Timoteo 3:​16, 17, NW.

Hegeregere, namona be Kunihito, hereva ginigunana lalonai ai kikilaia tauna, oi laloa. Ena tano ena kastom be manau ia hahedinaraia, to tau ta ese lalohadai kererena ia abia. Gabeai, Baibel ena taravatu ia itaia namonamo neganai, unai ese ia durua unai kara ia laloa namonamo totona. Baibel ese manau ia hanamoa, bona ena sisiba be ita hekokoroku lasi. (Aonega Herevadia 11:2; Mika 6:⁠8) To, aposetolo Paulo ese “gunalaia tauna ena dagi” idia tahua taudia edia taravatu ia kikilaia neganai, ia gwau unai hahenamo do idia “ura henia.” (1 Timoteo 3:⁠1) Idia “ura henia” ena anina be do idia karaia mai hekokoroku ida lasi to edia gaukara ena namo do idia hamaragia kava lasi danu.

Baibel ia gwau bisinesi karadia lalonai kara goeva be mai anina, a? Hari nega momo bisinesi lalodiai taunimanima ese gavamani ena taravatu idauidau bona takisi henia taravatudia idia badinaia momokani lasi. To herevana taunimanima ma haida ese dahaka idia karaia, Baibel ena taravatu ia gwau namona be ‘nega ibounai kara maoromaoro do ita karaia.’ (Heberu 13:18) Unai dainai iseda biagua taudia, ita biagua taudia, iseda gaudia idia hoia taudia, bona gavamani ita koia lasi bona ita kara henia mai momokani ida, unai amo kara namo ita habadaia. (Deuteronomi 25:​13-16; Roma 13:1; Tito 2:​9, 10) Koikoi lasi karana ese abidadama henia bona lalo-namo henia karana ia habadaia. Bona bema gwauhamata heheni karana ta be pepapepa dekenai ita torea vadaeni, bona “dika ia vara kava,” nega momo unai ese lalohadai kererena bona hekwakwanai ma haida ia koua diba.​​—⁠Hadibaia Tauna 9:11; Iamesi 4:​13, 14.

Kara namo habadaia dalana ma ta be iseda dabua bona tauanina ena toana. Tano idauidau ai edia dabua be idauidau, bona gabu haida dekenai taunimanima ia doria gauna be momo idia ura dabua ena sitaelo matamatadia sibona idia atoa. To ita be dabua ena sitaelo matamatadia ibounai ita badinaia be namo, a? Baibel ena sisiba be “inai tanobada taudia edia kara bamona do umui karaia lasi.” (Roma 12:⁠2) Aposetolo Paulo ese taravatu haida ia haginia lasi, to lauma helaga ena siahu henunai inai ia torea, ia gwau: “Lau ura danu hahine taudia ese mai manau bona mai mataurai danu edia dabua do idia kwatua. Edia huina danu sitaelo sitaelo bamona do idia karaia lasi, bona golo o kavabukavabu herahera gaudia do idia atoa lasi. Davana bada dabua danu do idia abia lasi. To kara namodia ibounai, be herahera bamona do idia karaia. Unai be maoro, bona Dirava idia matauraia hahine edia kara korikori.” (1 Timoteo 2:​9, 10) Unai hakaua herevana badana be tatau bona hahine edia. To momokani, sitaelo idauidau momo, iseda gabu o kastom o ura be idauidau dainai, be namo bona ita idia hamoalea.

Baibel ese Dirava ia gwauraia dika matabodaga karadia ia hahedinaraia danu. Ita be 1 Korinto 6:​9, 10 ai inai sisiba ita duahia: “Umui diba lasi, a, kara dika taudia be Dirava ena Basileia do idia davaria lasi? Umui sibona do umui koia lasi: Lebulebu taudia, kaivakuku idia tomadiho henia taudia, heudahanai taudia, o lebulebu hahine edia kara bamona idia karaia tatau, o tatau ese tatau danu hemarai karadia idia karaia taudia. O henaoa taudia, mataganigani taudia, kekero taudia, edia hereva dekenai haida idia hadikaia taudia, o haida edia gau idia dadia taudia. Inai bamona taudia ta lasi be Dirava ena Basileia do ia davaria diba.” Unai siri ese Maria, guna ena sivarai ai gwauraia, ia durua. Ia itaia Havaraia Tauna ena kara goeva taravatudia hegeregerena, iena kara Juan ida ia kerere bona bema ia ura Dirava ena lalo-namo ia abia unai kara ia hadokoa be namo. Ia hedinarai goevagoeva, kara namo habadaia totona, Iehova ena taravatu ita diba namonamo be gau badana.

Kudouna Dekenai Ita Dibaia

Kara namo be kara dika dadaraia karana sibona lasi. Ia be mai ena siahu kara maoromaoro badinaia totona. Unai bamona tauna be tau namona. Profesa ta ia gwau: “Kara namo be emu lalona ai oi dibaia, to emu kudouna dekenai oi dibaia danu be namo.” Kara namo habadaia karana be Dirava ena Hereva ita diba namonamo sibona lasi. Ia lalonai idia torea gaudia ita laloa dobu, iseda kudouna be tanikiu kara amo ia honu totona, bena ita ura iseda mauri lalonai Baibel ena hakaua herevadia ita badinaia.

Salamo torea tauna ia gwau: “Oiemu taravatu lau ura henia. Dina ena hora ibounai lalonai, oiemu taravatu lau laloa noho.” (Salamo 119:97) Bona King Davida ia gwau: “Dina gunadia lau laloa noho. Oiemu [Dirava ena] kara gunadia ibounai lau laloa noho. Oiemu imana edia kara badadia ibounai lau laloatao noho.” (Salamo 143:⁠5) Namona be Baibel bona Baibel buka bona magasin ita stadilaia neganai, nega ita atoa unai gaudia ita laloa dobu totona.

Momokani, nega ita davaria unai stadi namonamo bona laloa dubu karadia karaia totona be auka. To kara namo tahua karana ena anina be kara ma haida amo nega ita hoia bamona. (Efeso 5:​15, 16) Aaron, mauri lagani 24 tauna, be dina ta ta ai nega ia hoia bamona totona, dabai ia toreisi haraga bona miniti ma 30 ia abia. Ia gwau: “Matamanai, unai miniti 30 ibounai lalonai Baibel lau duahia sibona. Vanegai sibona lau lalo-parara matamaia unai gaudia lau laloa dobu be mai anina. Hari miniti 15 lau gaukaralaia lau duahia gaudia lau laloa dobu totona. Unai ese lau ia durua bada herea.” Nega ma haida ai, laloa dobu karana oi karaia diba. Davida be ane ta ia abia Iehova dekenai, ia gwau: “Hanuaboi lalonai lau ese oi sibona dekenai lau laloa.” (Salamo 63:⁠6) Bona Baibel ia gwau: “Adorahi ta, dina ia diho kahirakahira neganai, Isako be tano palaka dekenai ia loaloa, [“gau haida ia laloa dobu totona,” NW ].”​​—⁠Genese 24:⁠63.

Laloa dobu karana be mai anina bada kara namo habadaia totona, badina ita ia durua Iehova ena hemami bona iena lalohadai ita abia totona. Hegeregere, Maria ia diba Dirava ese sihari kava karana ia taravatua. To, ‘dika ia negea momokani bona namo do ia dogoatao momokani’ totona, gau badana be Baibel ena siri badadia ia laloa dobu. (Roma 12:⁠9) Kolose 3:5 ia duahia murinai, ia itaia iena kara ia haidaua be namo. Unai siri ese ita ia hagoadaia ‘tauanina ena ura karadia, do ita hamasea gaudia, be heudahanai, lebulebu, ura dikadia, bona matabodaga.’ Maria be sibona ia nanadaia: ‘Edena bamona lebulebu urana lau hamasea be namo? Edena gaudia lau rakatania be namo badina reana miro karadia karaia urana do idia habadaia? Tatau lau kara henia daladia haida lau haidaua be namo, a?’

Laloa dobu karana ena kahana ta be iseda kara do ia havaraia anina ita laloa. Paulo ese Keristani taudia ia hagoadaia heudahanai idia karaia lasi bona sibodia edia tauanina idia biagua bena unai ‘bamona kara dika do idia karaia lasi edia Keristani varavara tauna dekenai.’ (1 Tesalonika 4:​3-7) Ita laloa dobu henanadai namodia haida be inai: ‘Bema inai kara lau karaia, lau, egu ruma bese, bona ma haida edia mauri lalonai edena dika do lau havaraia? Lauma dalanai, hemami dalanai, bona tauanina dalanai dahaka do ia karaia diba lau dekenai? Guna, Dirava ena taravatu idia utua taudia edia mauri be edena bamona?’ Maria be unai bamona laloa dobu karana ia karaia neganai, iena kudouna ia hagoadaia, bona unai ia vara diba ita dekenai danu.

Haheitalai amo Diba Ita Abia

Kara namo idia hadibaia diba klasrum ta lalonai, a? Lagani tausen momo lalodiai, taunimanima momo ese unai henanadai idia laloa bona idia daradaralaia. Greek aonega tauna Plato ia laloa idia karaia diba. To, Aristotle ia laloa kara namo be oi karaia loulou karana amo do oi abia momokani. Nius ia torea tauna ta be idia hepapahuahulaia gauna ia herevalaia, bona ia gwau: “Egu hereva dokona be inai, kara namo ena taravatu oi dibaia diba sibona lasi. Buka amo idia hadibaia diba lasi. Kara toana namona oi abia dalana be oi noho gabuna . . . ena taunimanima ese kara namo idia hagoadaia bona oi karaia neganai davana namona idia henia.” To kara namo momokani taudia be edeseniai do ita davaria? Ena be tano idauidau ai kara namo taudia edia haheitalai haida idia gwauraia, reana edia gori sivarai taudia be unai bamona, to Baibel lalonai taunimanima korikoridia edia haheitalai momo idia noho.

Kara namo ena haheitalai hereadaena be Iehova. Nega ibounai ia be kara namo dalanai ia kara bona kara maoromaoro bona idia namo gaudia ia karaia. Kara namo ita habadaia diba bema ita be ‘Dirava ena kara bamona do ita karaia.’ (Efeso 5:⁠1) Bona Dirava ena Natuna, Iesu Keriso, ese ita dekenai ‘iena kara toana ia hahedinaraia, iena murinai do ita raka totona.’ (1 Petero 2:21) Danu, Baibel lalonai abidadama taudia, hegeregere Aberahamo, Sara, Iosepa, Ruta, Iobu, bona Daniela bona ena Heberu bamodia toi edia sivarai idia noho. Bona, hari inai negai Iehova idia hesiai henia kara namo taudia edia haheitalai ita laloaboio lasi be namo.

Ita Kwalimu Diba

Dirava ena matana ai kara namo do ita karaia diba mai kwalimu ida, a? Ita be kara dika taudia dainai, nega haida iseda lalona bona iseda tauanina idia tuari heheni​​—⁠ita ura kara namona ita karaia to kara dika karaia urana ia noho danu. (Roma 5:​12; 7:​13-​23) To Dirava ena heduru amo unai tuari lalonai do ita kwalimu diba. (Roma 7:​24, 25) Iehova ese ena Hereva bona Baibel bukadia bona magasin ia henia. Baibel ita stadilaia namonamo bona mai guriguri ida ita laloa dobu neganai, iseda kudouna do ia goeva. Unai kudouna goevana amo lalohadai, hereva, bona kara namodia do idia vara. (Luka 6:​45) Iehova Dirava bona Iesu Keriso edia haheitalai amo, Dirava ena kara do ita tohotohoa matamaia diba. Bona hari Dirava idia hesiai henia mai abidadama danu taudia amo gau momo ita dibaia danu.

Aposetolo Paulo ese ena revareva idia duahia taudia ia hagoadaia kara namo bona taunimanima edia ladana do idia hanamoa karadia ma haida ‘idia laloa’ noho be namo. Unai ita karaia neganai Dirava ena hahenamo do ita abia. (Filipi 4:​8, 9) Iehova ena heduru amo, kara namo do ita habadaia mai kwalimu ida.

[Picture on page 6]

Namona be Baibel stadilaia karana ena kahana ta be laloa dobu karana

[Picture on page 7]

Keriso Iesu tohotohoa karana amo Dirava ena kara do oi tohotohoa diba