Nega Ibounai Oi Sibona Emu Ura Oi Abia Hidi be Maoro, A?

NATU maragidia rua be idia gadara hebou. Natuna ta ese ia ura henia gadara gauna be ma natu ta ena imana amo ia dadia bona ia boiboi, “Inai be lauegu!” Taunimanima be idia do maragi negana amo, sibona edia ura idia atoa guna karana idia hahedinaraia. (Gen. 8:​21; Roma 3:​23) Oibe, tanobada taudia be sibona edia ura idia laloa bada. Namona be ita hekwarahi unai kara ita dadaraia totona. Bema unai bamona ita karaia lasi, ita ese ma haida do ita hahekwakwanaia bona iseda hetura karana Iehova ida do ita hadikaia danu.​​—⁠Roma 7:​21-​23.

Ma haida dekenai iseda kara ita laloa namonamo totona, aposetolo Paulo ese ita ia hagoadaia, ia gwau: “Momokani, gau ibounai be taravatu lasi ita dekenai, to namo lasi ita laloa gau ibounai be namo ita dekenai. Gau ibounai be taravatu lasi ita dekenai, to namo lasi ita laloa gau ibounai ese ita do idia hagoadaia.” Danu, Paulo ese ita ia sisiba henia ma haida do ita “hakaudia kerere lasi.” (1 Kor. 10:​23, 32) Unai dainai, ita sibona eda ura ita abia hidi gwauraia neganai, aonega dalana be sibona dekenai ita henanadai: ‘Ena be lau be mai egu maoro inai do lau karaia diba, to kongrigeisen ena maino hadikaia lasi totona, egu ura do lau dadaraia, a? Ena be unai be lauegu ura lasi to Baibel ena hakaua herevadia lau badinaia, a?’

Moni Gaukara

Taunimanima momo idia laloa idia be sibona edia ura hegeregerena moni gaukara idia abia hidi diba, bona unai ese ma haida do ia hahekwakwanaia lasi. To, mani South America ena taoni maragina ta dekenai ia noho bisinesi tauna ta ena sivarai oi laloa. Momo idia diba ia be laki gadara ia manadalaia bona ia inuinu kekero momo tauna. To, Iehova ena Witnes taudia ida Baibel ia stadilaia neganai, ia dibaia gaudia ia badinaia bona ena mauri dalana ia haidaua. (2 Kor. 7:⁠1) Ia ura kongrigeisen ida ruma-ta-ruma-ta haroro gaukara ia karaia neganai, elda tauna ta be mai aonega ida unai tauna ia hadibaia iena moni gaukarana dainai, ia be hegeregere lasi haroro gaukara ia karaia totona. Nega daudau lalonai, unai tau be taoni lalonai tohu amo idia karaia kekero muramurana ta ia hoihoilaia. Unai kekero muramura be dala idauidau ai idia gaukaralaia diba, to unai gabu ai taunimanima ese unai muramura be loliwota danu idia mikisi bona idia inua kekero.

Unai tau ia laloparara bema ia haroro bona unai muramura ia hoihoilaia, unai ese kongrigeisen ena ladana do ia hadikaia bona iena hetura karana Dirava ida do ia hadikaia danu. Ena be ia be mai ena maduna ena ruma bese badana ia naria totona, to kekero muramura hoihoilaia gaukarana ia hadokoa. Hari, iena ruma bese durua totona, pepa amo idia karaia gaudia ia hoihoilaia. Hari unai tau, iena adavana bona edia natudia kekeni rua be idia bapatiso vadaeni. Idia be mai hemarai lasi ida sivarai namona idia harorolaia goadagoada.

Turadia

Oi laloa sibona iseda ura hegeregerena, Dirava idia badinaia momokani lasi taudia ita bamoa be maoro eiava Baibel ena hakaua herevadia ita badinaia be namo? Taihu ta be ia ura Dirava ia badinaia momokani lasi merona ta ida pati dekenai ia lao. Ena be ta ese ia sisiba henia unai kara be maoro lasi, to pati dekenai ia lao badina ia laloa ia sibona be mai ena maoro unai abia hidi ia karaia totona. Pati gabuna dekenai, unai taihu ena kekero muramura lalonai ta ese drag ta ia udaia. Hora haida murinai ia noga neganai, ia davaria ia ida pati dekenai ia lao merona ese ia reipia.​​—⁠Genese 34:2 hahegeregerea.

Ena be Dirava idia badinaia momokani lasi taudia bamoa karana ese hanaihanai dika do ia havaraia lasi, to Baibel be ita ia hadibaia: “Aonega tauna danu ia raka hebou noho tauna, be do ia aonega, to kavakava taudia danu oi turana karaia neganai, dika do oi davaria.” (Aon. 13:20) Oibe, turana dikadia ita abia hidi neganai, dika do ita davaria! Aonega Herevadia 22:3 ia gwau: “Aonega tauna ese dika ia itaia noho, bona unai dika dekena amo ia raka siri, to aonega lasi tauna, be unai dika dekenai do ia raka lao, bona gabeai hisihisi do ia davaria.” Iseda hebamo karana ese ita bona iseda hetura karana Dirava ida ia hadikaia diba.​​—⁠1 Kor. 15:33; Iam. 4:⁠4.

Tauanina Ena Toana Bona Dabua

Taunimanima be hanaihanai edia huina bona dabua edia toana idia haidaua. To, Baibel ena hakaua herevadia dabua bona tauanina ena toana dekenai be ia idau lasi. Paulo ese Keristani hahine ia hamaoroa, namona be “mai manau bona mai mataurai danu edia dabua do idia kwatua”​​​—⁠⁠tatau ese unai hakaua herevana idia badinaia danu be namo. (1 Tim. 2:⁠9) Paulo ia gwau lasi toana namona lasi dabua ita hahedokilaia eiava Keristani taudia ibounai be dabua ena sitaelo tamona do idia hahedokilaia. Lasi. To hemataurai be edena bamona? Paulo ia gwau, mai hemataurai danu dabua ita kwatua be namo, bona ita karaia dabua dainai ita hekokoroku lasi.

Namona be sibona dekenai ita nanadaia: ‘Bema lau be sibona egu ura dabuana lau hahedokilaia, taunimanima ese lau idia raraia totona, vadaeni lau gwau diba unai be hemataurai karana, a? Egu dabua ena toana dainai taunimanima be lalohadai kererena idia abia, a?’ Filipi 2:4 ia gwau: “Umui ese umui emui namo sibona do umui tahua lasi. Lasi, to umui ta ta ibounai ese haida edia namo do umui tahua, bona do umui durudia noho.” Bema unai bamona ita karaia ita be ‘taunimanima hadikaia karana ta ita do karaia lasi.’​​—⁠2 Kor. 6:⁠3.

Bisinesi

Korinto kongrigeisen lalonai bisinesi be koikoi dalanai idia karaia neganai, Paulo ia gwau: “Haida ese umui idia hadikaia neganai, o emui gau idia henaoa neganai, umui haheauka diba lasi, a? Hisihisi umui ania diba lasi, a?” Paulo be Keristani taudia ia sisiba henia, sibodia edia ura idia dadaraia bona edia tadikaka be kota dekenai do idia abia lao lasi. (1 Kor. 6:​1-7) United States ai, tadikaka ta be unai sisiba ia laloa bada. Iena gaukara biaguna be Keristani tadikaka ta bona iena pei ia henia namonamo lasi dainai idia hepapahuahu. Unai tadikaka rua be Baibel ena hakaua herevadia idia badinaia bona nega momo idia herevahereva hebou, to unai hekwakwanai idia hamaoromaoroa lasi. Gabeai, unai hekwakwanai be kongrigeisen ena elda taudia dekenai idia herevalaia.​​—⁠Mat. 18:​15-​17.

To, unai hekwakwanai idia hamaoromaoroa lasi. Tadikaka be ia guriguri loulou murinai, ena lalona ia hadaia unai moni do ia laloaboio. Dahaka dainai unai bamona ia karaia? Unai tadikaka ia gwau, “Unai hepapahuahu ese egu moale ia hadikaia bona egu nega ia haorea dainai, egu Keristani maduna lau huaia namonamo lasi.” Abia hidi ia karaia murinai, tadikaka ia moale bona ia mamia Iehova be iena hesiai gaukara ia hanamoa.

Gau Maragidia Ai

Gau maragidia dekenai danu, sibona eda ura ita dadaraia karana ese hahenamo momo ia mailaia. Distrik hebouhebou ta ena dina ginigunana ai, painia tauna ta bona ena adavana be hebouhebou dekenai idia lao guna bona edia ura gabunai idia helai. Program ia matamaia neganai, famili ta mai ena natudia momo be hebou gabuna dekenai idia raka vareai to helai gabudia idia honu vadaeni. Painia tauna bona ena adavana idia itaia unai famili be helai gabudia idia tahua dainai, idia toreisi bona unai famili ese edia helai gabuna idia abia. Unai amo famili taudia ibounai be gabu tamona ai idia helai diba. Hebouhebou ia ore bona dina haida murinai, painia tauna bona ena adavana be unai famili amo tanikiu revareva ta idia abia. Unai revareva lalonai idia gwau, hebouhebou dekenai idia ginidae leiti dainai idia lalohisihisi. To, unai painia tauna bona ena adavana edia kara namona ese idia ia hagoadaia dainai idia moale.

Bema dala ia noho namona be sibona eda ura ita dadaraia haida ita durua totona. Bema lalokau ita hahedinaraia bona sibona eda ura ita dadaraia, ita ese kongrigeisen bona iseda dekena taudia huanai maino do ita havaraia. (1 Kor. 13:⁠5) To mai anina bada gauna be, iseda hetura karana Iehova ida do ia goada noho.

[Picture on page 20]

Dabua oi abia hidi neganai, sibona emu ura oi dadaraia, a?

[Picture on page 20, 21]

Emu helai gabuna be emu tadikaka dekenai oi henia, a?