“Dirava Ena Hoa Gaudia” ese Edia Kudouna Idia Hamarerea

“Inai taudia be Dirava ena hoa gaudia idia herevalaia ita dekenai, iseda gado korikori dekenai.”​—KARA 2:11.

1, 2. Pentekoste 33 C.E. ai, edena hoa gauna be Ierusalema dekenai ia vara?

SIAHU negana ena daba ta lagani 33 C.E. ai, Ierusalema dekenai ruma ta lalonai idia hebou tatau bona hahine edia orea ta, Iesu Keriso ena hahediba taudia, dekenai hoa gauna ta ia vara. “Guba dekena amo karaharaga regena ta ia diho mai, lai bada ena regena hegeregere, idia helai hebou noho ruma ena kahana ibounai ia hahonua. Bona lahi ena malana hegeregere idia hedinarai. . . . Vadaeni unai abidadama taudia ibounai be Lauma Helaga dekenai idia honu, bona gado idauidau dekenai idia hereva.”​—Kara 2:​2-4, 15.

² Hutuma bada be ruma vairanai idia hebou. Idia huanai be idau tano dekenai idia vara Iuda taudia, “Dirava idia laloa momo taudia,” Pentekoste aria moalelaia totona Ierusalema dekenai idia mai. Idia hoa badina idia ta ta idia kamonai, hahediba taudia be edia gado dekenai “Dirava ena hoa gaudia idia herevalaia.” Edena bamona unai ia vara bema unai gado idia kikilaia taudia ibounai be Galilea taudia?​—Kara 2:​5-8, 11.

3. Pentekoste ai, aposetolo Petero ese dahaka sivarai be hutuma dekenai ia gwauraia?

³ Unai Galilea tauna ta be aposetolo Petero. Ia gwau pura haida gunanai, Iesu Keriso be kara maoromaoro lasi taudia haida ese idia alaia mase. To, Dirava ese mase amo iena Natuna ia hatoreaisi vadaeni. Unai murinai, Iesu be iena hahediba taudia momo, Petero bona unuseniai idia noho taudia ma haida edia vairanai ia hedinarai danu. Dina 10 gunanai, Iesu be guba dekenai ia daekau vadaeni. Ia ese lauma helaga be iena hahediba taudia latanai ia bubua diho. Unai ia vara gauna be mai ena anina unai Pentekoste idia moalelaia taudia dekenai, a? Oibe. Iesu ena mase ese edia kara dika gwauatao bona ‘Lauma Helaga ena harihari gauna’ abia dalana ia kehoa, bema ia idia abidadama henia. (Kara 2:​22-24, 32, 33, 38) Unai dainai “Dirava ena hoa gaudia” idia kamonai taudia be edena bamona idia kara? Bona edena dala ai unai sivarai ese ita ia durua diba, iseda hesiai gaukara Iehova dekenai ita laloa totona?

Edia lalona Ia Hamarerea Bena Kara ta Idia Karaia!

4. Edena peroveta herevana Ioela ese ia gwauraia be Pentekoste 33 C.E. ai ia guguru?

⁴ Hahediba taudia Ierusalema dekenai ese lauma helaga idia abia neganai, maoromaoro hahemauri ena sivarai namona be ma haida dekenai idia harorolaia, bona unai daba ai idia hebou taudia hutuma dekenai unai idia karaia hamatamaia. Edia haroro gaukarana be Ioela, Petuela ena natuna, ese lagani 800 gunanai ia torea peroveta herevana ta ia hagugurua: “Nega gabeai lau ese egu Lauma, be taunimanima ibounai dekenai do lau bubua diho. Bona emui natuna tau bona natuna hahine ese, egu peroveta hereva do idia gwauraia hedinarai. Emui tau buruka be do idia nihi, bona emui eregabe taudia ese, mata hanai do idia itaia. Unai neganai danu egu Lauma, be hesiai taudia bona hesiai hahinedia danu, edia latanai do lau bubua diho.” Unai be Iehova ena dina badana mai garina ia do ginidae lasi neganai ia vara.​—Ioela 1:1; 2:​28, 29, 31; Kara 2:​17, 18, 20.

5. Keristani taudia ginigunadia be edena dala ai idia peroveta? (Futnout itaia.)

⁵ Unai ena anina be Dirava ese peroveta taudia edia uru ta, tatau bona hahine, Davida, Ioela, bona Debora bamona taudia, do ia havaraia bona do ia gaukaralaidia vaira negai do idia vara gaudia idia perovetalaia totona, a? Lasi. Keristani ‘natuna tau bona natuna hahine, bona hesiai taudia bona hesiai hahinedia’ ese peroveta hereva idia gwauraia ena anina be Iehova ena lauma ese idia ia hagoadaia Iehova ese ia karaia vadaeni bona do ia karaia “hoa gaudia” idia harorolaia totona. Unai dainai idia be Ataiai Momokani Diravana ena hereva gwauraia taudia.a To, hutuma be edena bamona idia kara?​—Heberu 1:​1, 2.

6. Momo ese Petero ena hereva idia kamonai neganai, edia lalona ia hamarerea bena dahaka idia karaia?

⁶ Hutuma ese Petero ena hereva idia kamonai murinai, edia lalona ia hamarerea bena kara ta idia karaia. Mai edia kudouna ibounai ida “iena hereva idia abia dae taudia be bapatiso idia abia, bona unai dina tamona lalonai, taunimanima 3000 bamona be edia orea lalonai idia vareai.” (Kara 2:41) Idia be Iuda taudia korikoridia bona Iuda tomadihona idia abia dae taudia dainai, Buka Helaga ena hereva badadia dekenai diba idia abia vadaeni. Unai bona Petero amo idia dibaia gaudia idia abidadama henia ese dala ia kehoa, ‘Tamana, Natuna, bona lauma helaga ena ladanai’ idia bapatiso totona. (Mataio 28:19) Edia bapatiso murinai “nega ibounai idia haboua noho, aposetolo edia hadibaia herevadia idia kamonai totona.” Unai neganai danu, edia abidadama matamatana be ma haida dekenai idia harorolaia matamaia. Momokani, “dina ibounai mai laloa tamona danu Dubu Helaga lalonai idia haboua. . . . Dirava idia hanamoa noho, bona taunimanima ibounai be idia dekenai idia moale.” Unai haroro gaukarana dainai, “dina ibounai, Lohiabada ese mauri ia henia taudia, be abidadama taudia edia orea lalonai ia haboua.” (Kara 2:​42, 46, 47) Unai abidadama matamata taudia idia noho tanodia momo dekenai, Keristani kongregesen idia haginidia matamaia. Ita daradara lasi, edia namba ia bada badina edia gabu dekenai idia giroa lou neganai, mai goada ida “Sivarai Namona” idia harorolaia.​—Kolose 1:23.

Dirava Ena Hereva be mai Ena Siahu

7. (a) Hari inai negai, dahaka ese bese idauidau taudia be Iehova ena orea dekenai ia veria mai? (b) Tanobada hegegemadai bona oiemu gabu ai edena tubu daekau dalana ta oi itaia diba? (Futnout itaia.)

⁷ Hari inai negai, idia ura Dirava ena hesiai taudia ai idia lao taudia be edena bamona? Idia danu be Dirava ena Hereva idia stadilaia namonamo be namo. Unai bamona idia karaia neganai, do idia diba Iehova be ‘bogahisihisi bona hariharibada Diravana, bona ia be badu dekenai ia haraga lasi, to bogahisihisi bona lalokau dekenai ia haraga.’ (Esodo 34:6; Kara 13:48) Idia diba Iehova ese Iesu Keriso amo ia henia mauri davalaia boubouna, ena rarana ese idia be kara dika ibounai amo ia hagoevaia diba. (1 Ioane 1:7) Idia moale bada danu badina idia diba Dirava ena ura be “mase taudia dohore idia toreisi lou, kara maoromaoro taudia, bona kara maoromaoro lasi taudia danu.” (Kara 24:15) Edia lalokau unai “hoa gaudia” ia karaia Tauna dekenai be edia kudouna ia hahonua, bona unai ese idia ia veria hereva momokani idia harorolaia. Bena Dirava ena gwauhamata bapatiso hesiai taudia ai idia lao bona “diba maoromaorona Dirava dekenai [idia] habadaia noho.”b​​—Kolose 1:​10b, NW; 2 Korinto 5:​14.

8-10. (a) Keristani hahinena ta ena ekspiriens ese edena bamona ia hahedinaraia Dirava ena Hereva be “mai ena siahu”? (b) Unai ekspiriens ese oi dekenai dahaka ia hadibaia, Iehova bona ia ese iena hesiai taudia ia kara henia dalana dekenai? (Esodo 4:12)

⁸ Dirava ena hesiai taudia ese edia Baibel stadi amo idia abia diba be murimuri gauna sibona lasi. Unai bamona diba ese edia kudouna ia hamarerea, edia laloa dalana ia haidaua, bona idia lalonai ia noho. (Heberu 4:12) Hegeregere, hahine ta ladana Camille be buruka taudia naria gaukarana ia karaia. Ia naria hahinena ta be Martha, ia be Iehova ena Witnes hahinena. Martha be kwara gorere dikana ia abia dainai, ta ese ia naria hanaihanai be namo. Ena aniani ia ania totona​—bona ia hadonoa totona danu​—ta ese ia hadibaia be namo. To do ita itaia, Martha ese gau ta ia laloaboio diba lasi.

⁹ Dina ta, Martha ese Camille ia itaia sibona ena hekwakwanai haida dainai ia taitai. Martha ese Camille ia rosia bona ia noia ia ida Baibel idia stadilaia totona. To Martha bamona tauna ta ese Baibel stadi ia karaia diba, a? Oibe, ia karaia diba! Ena be Martha be gau momo ia laloatao diba lasi, to ia ese ena Dirava mai hairaina ia laloaboio lasi; bona Baibel amo ia dibaia mai anina bada hereva momokanidia danu ia laloaboio lasi. Stadi idia karaia neganai, Martha ese Camille ia hamaoroa paragraf ta ta, idia gwauraia siridia, bona rau henunai idia noho henanadai do ia duahia, bona ia haerelaia. Nega sisina daudau lalonai unai bamona idia karaia, bona ena be Martha be gau haida ia karaia diba lasi, to Camille ena diba Baibel dekenai ia bada ia lao. Martha ia laloa Camille be Dirava idia ura hesiai henia taudia ma haida ida ia hebou be namo. Unai dainai, iena stiuden dekenai tamaka bona dabua ta ia henia, unai amo Camille be Kingdom Hall dekenai ena hebou ginigunana totona ia lao neganai, dabua namona do ia karaia.

¹⁰ Martha ena lalokau, haheitalai, bona abidadama ese Camille ia hagoadaia. Ia laloa Martha ese Baibel amo ia dekenai ia ura hadibaia gauna be mai anina bada, badina Martha ese kahirakahira gau ibounai ia laloaboio vadaeni to Buka Helaga amo ia dibaia gaudia sibona be ia do laloaboio lasi. Gabeai, Camille be gaukara gabuna ma ta dekenai idia siaia lao neganai, ia lalo-parara nega ia ginidae kara ta do ia karaia. Dala ia davaria neganai Kingdom Hall dekenai ia lao, unai neganai Martha ese ia dekenai ia henia dabua bona tamaka ia karaia, bona Baibel stadi totona ia noia. Camille ia goada ia lao bona bapatiso ia abia.

Edia Kudouna Ia Hamarerea Iehova Ena Hereva Idia Badinaia Totona

11. Haroro gaukara ita karaia goadagoada sibona lasi, to edena bamona ita hahedinaraia diba Basileia ena sivarai ese iseda kudouna ia hamarerea?

¹¹ Hari, Iehova ena Witnes taudia milioni 6 ia hanaia be Martha bona Camille bamona, tanobada hegegemadai lalonai “Basileia ena Sivarai Namona” idia harorolaia noho. (Mataio 24:14; 28:​19, 20) Keristani taudia ginigunadia bamona, “Dirava ena hoa gaudia” ese edia kudouna ia hamarerea bada. Idia moale badina Iehova ena ladana idia abia bona iena lauma be idia latanai ia bubua. Unai dainai, idia hekwarahi bada ‘Lohiabada ena ura hegeregerena idia noho, bona nega ibounai do idia hamoalea,’ bona edia mauri ibounai lalonai iena hereva idia badinaia totona. Idia badinaia gaudia haida be, edia dabua bona tauanina ena toana amo Dirava ena hereva idia matauraia.​—Kolose 1:10; Tito 2:10.

12. Dabua bona tauanina ena toana dekenai, dahaka sisiba be 1 Timoteo 2:​9, 10 dekenai ita davaria?

¹² Momokani, Iehova be mai ena hereva iseda toana dekenai danu. Unai gauna dekenai, aposetolo Paulo ese Dirava ena hahegani haida ia gwauraia. ‘Lau ura danu hahine taudia ese mai manau bona mai mataurai danu edia dabua do idia kwatua namonamo. Edia huina danu sitaelo sitaelo bamona do idia karaia lasi, bona golo o kavabukavabu herahera gaudia do idia atoa lasi. Davana bada dabua danu do idia abia lasi. To kara namodia ibounai, be herahera bamona do idia karaia. Unai be maoro, bona Dirava idia matauraia hahine edia kara korikori.’c Unai hereva amo dahaka ita dibaia?​​—1 Timoteo 2:​9, 10.

13. (a) ‘Dabua do idia kwatua namonamo’ ena anina be dahaka? (b) Dahaka dainai ita gwau Iehova ena taravatu ita badinaia be ia auka lasi?

¹³ Paulo ena hereva ese idia hahedinaraia namona be Keristani taudia ese ‘edia dabua do idia kwatua namonamo.’ Namo lasi dabua idia atoa kava bona edia toana ia dika. Taunimanima ibounai, ogogami taudia danu, ese unai dala maorodia idia badinaia diba, bema edia dabua ia goeva bona ena toana ia namo. Hegeregere, lagani ta ta ai, Witnes taudia South America ena tano ta dekenai be distrik hebouhebou idia lao totona uda bada lalonai kilomita momo idia raka bona vanagi amo danu be hora momo idia heau lao. Edia laolao lalonai, vaia idia vara gaudia haida be sinavai dekenai idia moru eiava edia dabua be uda lalonai idia noho gaudia ese idia darea. Unai dainai hebouhebou gabuna dekenai idia ginidae neganai, nega momo edia toana be ia goeva lasi. Unai dainai edia dabua ena pitopito idia turia, sipa idia hanamoa bona hebouhebou totona idia atoa dabua idia huria bona aenia. Iehova ena pata amo aniani do idia abia ena boiboi idia laloa bada dainai, idia ura dabua maorona idia atoa.

14. (a) “Mai manau bona mai mataurai” ida dabua ita karaia ena anina be dahaka? (b) “Dirava idia matauraia” taudia bamona iseda dabua ita karaia ena anina be dahaka?

¹⁴ Paulo ma ia hahedinaraia danu namona be “mai manau bona mai mataurai” danu eda dabua do ita karaia. Unai ena anina be herahera gaudia mai sitaelo, dabua idaudia, lebulebu toana, tauanina ena kahana idia hahedinaraia dabua, eiava hari idia karaia dabua ena toana ita hahedinaraia lasi. To namona be iseda dabua toana amo ita hahedinaraia ‘Dirava ita matauraia.’ Unai ita lalohadailaia be namo, ani? Do ita gwau lasi unai ena anina be kongregesen heboudia ita lao henidia neganai dabua namona ita atoa, to hebou lasi negadiai ita laloa lasi edena bamona dabua ita atoa. Lasi. Namona be nega ibounai iseda dabua amo Dirava matauraia bona hanamoa toana ita hahedinaraia, badina dina ena hora ibounai 24 lalonai ita be Keristani taudia bona hesiai taudia. Iseda gaukara dabua bona sikuli dabua be ita karaia gaukaradia hegeregerena ita atoa be maoro. To, namona be mai manau bona hemataurai ida unai dabua ita atoa. Bema nega ibounai iseda dabua amo iseda abidadama Dirava dekenai ita hahedinaraia, ita be nega bona gabu idauidau ai do ita haroro sibona, badina ita karaia dabua ena toana dainai ita hemarai lasi.​—1 Petero 3:15.

“Tanobada Do Umui Ura Henia Lasi”

15, 16. (a) Dahaka dainai iseda dabua bona tauanina ena toana dekenai, tanobada taudia ita tohotohoa lasi? (1 Ioane 5:19) (b) Dahaka badina namona dainai dabua ena sitaelo idauidau ita dadaraia be namo?

¹⁵ Ioane Ginigunana 2:​15, 16 dekenai ia noho sisibana ese dabua bona tauanina ena toana abia hidi karana dekenai ita do ia hakaua danu. Ia gwau: “Tanobada do umui ura henia lasi, bona tanobada ena gaudia danu do umui ura henia lasi. Bema tanobada umui ura henia noho neganai, Tamana Dirava umui ura henia lasi inai. Badina be tanobada gaudia ibounai, tauanina ena ura dikadia, matabodaga ena ura dikadia, bona hekokoroku, inai gaudia be Tamana Dirava dekena amo idia mai lasi. Idia be tanobada dekena amo idia mai noho.”

¹⁶ Unai sisiba be nega maorona ai idia henia! Inai nega lalonai, bamodia edia lalo-ani karana ia bada dainai, namo lasi dabua atoa dalana dekenai tanobada taudia ita tohotohoa. Vanegai laganidia lalonai, dabua ena sitaelo bona toana be ia dika vadaeni. Bisinesi taudia bona sikuli bada gaukara taudia ese idia atoa dabua be nega momo Keristani taudia dekenai dala maorona ia hahedinaraia lasi. Unai danu be nega ibounai ‘inai tanobada taudia edia kara bamona do ita karaia lasi’ be namo ena badina ma ta ia hahedinaraia, bema ita ura Dirava ena hereva hegeregerena ita noho, bona unai amo “iseda Hahemauri Tauna, Dirava, ena hahediba herevadia do [ita] hahairaia” diba.​—Roma 12:2; Tito 2:​10, NW.

17. (a) Dabua hoia totona ita loaloa eiava sitaelo ta ita abia hidi neganai, dahaka henanadai ita lalodia diba? (b) Dahaka dainai ruma bese kwaradia ese edia ruma bese taudia edia toana idia laloa be namo?

¹⁷ Dabua ta oi do hoia lasi neganai, aonega dalana be sibona oi nanadaia: ‘Dahaka dainai inai sitaelo lau ura henia? Inai sitaelo be ladana bada tauna​​—lau ura henia tauna ena dabua sitaelo hegeregerena, a? Inai dabua be raskol oreadia eiava sibona ena ura badinaia bona gwau-edeede lalohadaina idia habadaia taudia edia toana ia hahedinaraia, a?’ Namona be unai dabua ita itaia namonamo. Bema ia be dabua eiava rami ta, ena lata be edena bamona? Unai dabua idia utua dalana amo dahaka sitaelo ia hahedinaraia? Unai dabua be ia namo bona hemataurai toana ia hahedinaraia o ia be tauanina dekenai ia kamokau, eiava mahuta hebou urana ia havaraia, eiava toana ia namo lasi? Sibona oi nanadaia, ‘Bema inai dabua lau karaia, haida do ia hahekwakwanaia, a?’ (2 Korinto 6:​3, 4) Dahaka dainai unai ita laloa bada be namo? Badina Baibel ia gwau: “Keriso ese sibona ena namo ia tahua lasi.” (Roma 15:3) Keristani ruma bese kwaradia ese edia ruma bese taudia edia toana idia laloa be namo. Idia tomadiho henia Dirava mai hairaina dekenai hemataurai idia hahedinaraia totona, namona be ruma bese kwaradia ese mai lalokau ida sisiba goadana idia henia, bema unai idia karaia be namo.​—Iamesi 3:13.

18. Dahaka ese oi ia hagoadaia emu dabua bona tauanina ena toana oi laloa namonamo totona?

¹⁸ Ita gwauraia sivaraina be Iehova, hemataurai bona helaga karana ia haheitalaia tauna badana, amo ia mai. (Isaia 6:3) Baibel ese ita ia hagoadaia “natuna” bamona ia do ita tohotohoa. (Efeso 5:1) Iseda dabua bona tauanina ena toana ese iseda guba Tamana ena ladana ia hanamoa eiava ia hadikaia diba. Momokani, ita ura iena kudouna ita hamoalea.​—Aonega Herevadia 27:11.

19. “Dirava ena hoa gaudia” be ma haida dekenai ita gwauraia karana amo dahaka namo ita abia diba?

¹⁹ “Dirava ena hoa gaudia” oi dibaia dainai, emu hemami be edena bamona? Oibe, hereva momokani ita dibaia be hahenamo bada hereana! Iesu Keriso ese ia bubua rarana dekenai ita abidadama dainai, iseda kara dika ia gwauatao. (Kara 2:38) Unai dainai, Dirava vairanai ita hereva diba mai hemarai lasi. Mase dekenai ita gari lasi, helaro lasi taudia idia karaia bamona. To Iesu ese ita ia hagoadaia, “nega ta do ia mai, mase guria gabu dekenai idia noho taudia ibounai ese iena gadona do idia kamonai. Vadaeni guria gabu dekena amo do idia toreisi.” (Ioane 5:​28, 29) Iehova be mai ena harihari bada ida unai gaudia ibounai be ita dekenai ia hahedinaraia. Ma danu, iena lauma helaga be ita latanai ia bubua diho. Unai dainai, unai harihari gaudia ibounai laloa bada karana ese ita ia veria iena dala hereadaedia ita matauraia bona mai eda ura bada ida ia ita hanamoa, iena “hoa gaudia” be ma haida dekenai ita gwauraia.

[Footnotes]

Edena Bamona Do Oi Haere?

• Pentekoste 33 C.E. ai, taunimanima ese dahaka “hoa gaudia” idia kamonai, bona edena bamona idia kara?

• Ta be edena dala ai Iesu Keriso ena hahediba tauna ai ia lao, bona hahediba tauna ai ia lao totona dahaka gaudia do ia karaia?

• Dahaka dainai iseda dabua bona tauanina ena toana ita laloa be gau badana?

• Dabua ta eiava ena sitaelo ita abia hidi neganai, dahaka gaudia ita laloa be namo?

[Picture on page 27]

Petero ia gwau Iesu be mase amo ia toreisi lou vadaeni

[Pictures on page 29]

Oiemu toana ese oi tomadiho henia Diravana ena ladana ia hanamoa, a?

[Pictures on page 30]

Namona be Keristani tama sina ese edia ruma bese taudia edia toana idia laloa be namo