Matamata Taudia E—Dirava Idia Hanamoa Gaudia Umui Tahua
“Dirava ena ura kara do oi tahua, bona do oi badinaia noho.”—1 TIMOTEO 4:7.
1, 2. (a) Dahaka dainai Paulo ese Timoteo ia hanamoa? (b) Hari, matamata taudia be edena dala ai ‘Dirava ena ura idia tahua, bona idia badinaia noho’?
“LAU dekenai ta ia noho lasi Timoteo hegeregerena, iena laloa bona lauegu laloa be tamona. . . . Mero ese iena tamana ia durua bamona, ia ese lau ia durua vadaeni. Sivarai Namona dainai ai ruaosi ai gaukara hebou vadaeni.” (Filipi 2:20, 22) Aposetolo edia negai, Paulo be Filipi Keristani taudia ia tore henidia neganai, unai hanamoa herevana ia gwauraia. Paulo be daika ia herevalaia? Oibe, Paulo be ia ida ia loaloa hebou tau matamatana Timoteo, ia herevalaia. Unai hereva ese Paulo ena lalokau bona abidadama karana Timoteo dekenai ia hahedinaraia, bona unai ese reana Timoteo ia hagoadaia bada!
2 Oibe, Dirava idia gari henia matamata taudia Timoteo bamona, be mai anina bada Iehova ena orea lalonai. (Salamo 110:3, NW ) Hari tanobada hegegemadai, Dirava ena orea lalonai matamata taudia momo be painia, misinari, konstraksen bona Betele gaukara idia karaia. Danu, matamata taudia haida be kongrigeisen ena gaukara idauidau idia durua bona maduna ma haida idia huaia, idia ai hanamoa bada. Unai bamona matamata taudia be iseda guba Tamana, Iehova, idia hanamoa gaudia idia tahua dainai, moale korikori idia davaria. Idia be ‘Dirava ena ura idia tahua, bona idia badinaia noho.’—1 Timoteo 4:7, 8.
3. Inai stadi lalonai edena henanadai do ita herevalaidia?
3 Oi be matamata tauna ta dainai, Dirava idia hanamoa gaudia oi tahua, a? Unai bamona oi karaia totona, heduru bona hagoadaia hereva be edeseniai oi davaria diba? Edena bamona inai tanobada ena kohu momo tahua karana oi dadaraia diba? Bema Dirava idia hanamoa gaudia oi tahua, dahaka hahenamo idauidau do oi abia? Unai henanadai edia haere ita dibaia totona, mani Timoteo ena mauri bona ena gaukara ita laloa.
Timoteo Ena Mauri
4. Timoteo ena Keristani maurina mani oi herevalaia.
4 Timoteo be Roma ena provinsi, Galatia, ena taoni maragina Lusitera ai ia tubu daekau. Lagani 47 C.E. ai, Paulo be Lusitera hanua dekenai ia haroro neganai, Timoteo be ia do mero, bona unai negai Keristani tomadihona ia abia dae. Bona unai murinai, Keristani tadikaka huanai ladana namona ia abia. Lagani rua murinai Paulo be Lusitera hanua dekenai ia giroa lou, bona Timoteo ena sivarai ia kamonai neganai, ia ese Timoteo ia abia hidi misinari gaukara lalonai ia do ia bamoa. (Kara 14:5-20; 16:1-3) Timoteo be lauma dalanai ia goada ia lao neganai, ia dekenai maduna idauidau idia henia, hegeregere ia idia siaia gabu haida dekenai tadikaka ia hagoadaia totona. Lagani 65 C.E. bamona ai, Paulo be dibura rumana amo Timoteo ia tore henia neganai, Timoteo be Efeso dekenai elda gaukara ia karaia.
5. Timoteo Iharuana 3:14, 15 ena hereva hegeregerena, dahaka gau rua ese Timoteo idia durua Dirava idia hanamoa gaudia ia tahua totona?
5 Ia hedinarai goevagoeva, Timoteo ese Dirava hanamoa gaudia ia tahua. To dahaka ese ia ia durua unai bamona abia hidi ia karaia totona? Paulo ese Timoteo dekenai ia torea revareva iharuana lalonai, Timoteo idia durua gaudia rua ia gwauraia. Ia gwau: “Oi ese oi abia dae, bona oi abidadama henia hereva momokani, be do oi badinaia namonamo noho. Inai hereva momokani oi dekenai ai hadibaia taudia ibounai oi diba noho, ani? Bona inai danu oi diba noho, oi be mero maragi neganai, Buka Helagadia dekenai oi manada momokani.” (2 Timoteo 3:14, 15) Namona be ita tahua, Keristani taudia ma haida be dahaka idia karaia, unai amo Timoteo idia durua abia hidi maorona ia karaia totona.
Ma Haida Edia Heduru ese Namo Ia Havaraia
6. Timoteo dekenai dahaka idia hadibaia, bona edena bamona ia kara?
6 Timoteo be tomadiho dalanai ia parara ruma besena lalonai ia tubu daekau. Iena tamana be Helene tauna, bona ena sinana Eunike bona tubuna hahine Loi be Iuda taudia. (Kara 16:1) Timoteo ia beibi neganai, Eunike bona Loi ese Heberu Revarevadia amo ia idia hadibaia. Keristani tomadihona idia abia dae murinai, ia idia durua Keristani hahediba herevadia ia abia dae totona. Timoteo ese edia hadibaia karana ia abia dae dainai, namo bada ia abia. Paulo ia gwau: “Oiemu abidadama lau laloa, ia be abidadama momokani. Inai bamona abidadama be oiemu tubuna hahine Loi bona oiemu sinana Eunike edia lalona dekenai ia noho. Lau diba momokani, harihari danu inai bamona abidadama be oiemu lalona dekenai ia noho.”—2 Timoteo 1:5.
7. Tama sina ese edena bamona edia natudia idia durua diba? Haheitalai ta mani oi gwauraia.
7 Hari, matamata taudia momo edia tama sina bona tubudia be Dirava idia gari henia taudia, bona unai be hahenamo badana. Loi bona Eunike bamona, idia laloparara matamata taudia ese Dirava idia hanamoa gaudia idia tahua be mai anina bada. Hegeregere, Samira ia do laloatao noho, ia kekeni matamata neganai, ena tama sina ida idia herevahereva daudau. Ia gwau: “Tama bona sina ese lau idia hadibaia Iehova ena lalohadai gau idauidau dekenai lau abia totona, bona haroro gaukara lau atoa guna. Nega momo lau idia hagoadaia ful-taim hesiai gaukara lau karaia totona.” Samira be ena tama sina edia hagoadaia hereva ia abia dae, bona hari ia be ena tano ai ia noho brens opesi dekenai ia gaukara. Bema emu tama sina ese oi idia hagoadaia Dirava idia hanamoa gaudia oi tahua, namona be edia sisiba herevana oi laloa namonamo. Badina idia ura momokani emu mauri lalonai moale oi davaria.—Aonega Herevadia 1:5.
8. Timoteo be edena dala ai Keristani hebamo karana amo namo ia abia?
8 Gau badana be Keristani tadikaka huanai tura namodia oi tahua danu. Timoteo ena kongrigeisen ai idia noho Keristani elda taudia bona Ikonio taudia be ia idia diba. Ikonio ena daudau Lusitera hanua amo be kilomita 30 bamona. (Kara 16:1, 2) Bona ia be Paulo ena turana namona ai ia lao. (Filipi 3:14) Paulo ena revareva ese idia hahedinaraia, Timoteo be sisiba ia abia dae bona abidadama taudia edia haheitalai ia tohotohoa. (1 Korinto 4:17; 1 Timoteo 4:6, 12-16) Paulo ia gwau: “Oi ese lauegu hadibaia hereva oi badinaia vadaeni. Bona lauegu kara, lauegu ura namodia, lauegu abidadama, lauegu haheauka, lauegu lalokau, inai ibounai oi itaia vadaeni. Oi itaia danu, metau ibounai lalonai lau goada noho.” (2 Timoteo 3:10) Oibe, Timoteo ese Paulo ena haheitalai ia tohotohoa. Unai hegeregerena, bema kongrigeisen lalonai lauma dalanai idia goada taudia oi bamodia, idia ese oi idia durua diba Dirava idia hanamoa gaudia oi tahua totona.—2 Timoteo 2:20–22.
‘Buka Helaga’ Stadilaia
9. Tura namodia abia hidi karana sibona be hegeregere lasi, to dahaka danu ita karaia be namo ‘Dirava do ita badinaia noho’ totona?
9 Lauma dalanai idia goada taudia oi bamoa sibona be ia hegeregere emu tahua gauna do oi abia totona, a? Lasi. To Timoteo hegeregerena, ‘Buka Helaga’ oi stadilaia be namo. Reana stadi karana oi moalelaia lasi, to laloatao, Timoteo ese ‘Dirava ena ura ia tahua bona ia badinaia.’ Heau helulu taudia be lagani momo lalonai idia treinini, unai amo edia tahua gauna idia abia diba. Unai hegeregerena, Dirava idia hanamoa gaudia ita tahua totona, namona be sibona eda ura ita dadaraia bona ita hekwarahi. (1 Timoteo 4:7, 8, 10) Reana oi henanadai, ‘To Baibel stadilaia karana ese edena bamona lau ia durua diba egu tahua gauna lau abia totona?’ Mani dala toi ita herevalaia.
10, 11. Dahaka dainai Baibel ese oi do ia hagoadaia emu tahua gauna oi hagugurua totona? Haheitalai ta gwauraia.
10 Dala ginigunana be, Baibel ese oi do ia hagoadaia emu tahua gauna oi hagugurua totona. Badina Baibel ese iseda guba Tamana ena kara hereadaena, ita totona ia hahedinaraia lalokau hereadaena, bona ena kamonai hesiai taudia dekenai do ia henia hahenamo idauidau, ia hahedinaraia. (Amosa 3:7; Ioane 3:16; Roma 15:4) Iehova dibaia karana oi habadaia neganai, emu lalokau Ia dekenai do oi habadaia bona do oi ura emu mauri oi gwauhamatalaia.
11 Keristani matamatadia momo idia gwau, Baibel stadilaia hanaihanai karana ese idia ia durua hereva momokani idia abia dae totona. Hegeregere, Adele be Keristani ruma besena lalonai ia tubu daekau, to Dirava idia hanamoa gaudia ia tahua lasi. Ia gwau: “Egu tama sina ese Kingdom Hall dekenai lau idia hakaua lao, to sibona egu stadi lau karaia lasi bona hebou dekenai danu hereva lau kamonai lasi.” Adele ena kakana badana ia bapatiso murinai, Adele be hereva momokani ia laloa bada matamaia. Ia gwau: “Tahua gauna lau atoa Baibel ibounai lau duahia totona. Baibel ena siri haida lau duahia murinai, lau duahia gauna lau torea. Lau torea hereva ibounai be idia do noho. Lagani tamona lalonai Baibel lau duahia haorea.” Unai ese Adele ena lalona ia veria bona Iehova dekenai ena mauri ia gwauhamatalaia. Bona ena be ena tauanina kahana ta ia dika, to hari ia be painia gaukara ia karaia noho.
12, 13. (a) Baibel stadilaia karana ese edena dala ai matamata tauna ia durua diba? (b) Dirava ena Hereva lalonai edena aonega hereva namodia ese oi idia durua diba?
12 Dala iharuana be, Baibel ese oi do ia durua emu kara oi haidaua totona. Paulo ese Timoteo ia hamaoroa, ‘Buka Helaga ena hereva be mai ena siahu hereva momokani ita dekenai do ia hadibaia, iseda kara dika do ia hahedinaraia, iseda kerere do ia hamaoromaoroa, bona mauri dala maoromaorona ita dekenai do ia hadibaia. Unai hereva momokani dainai, Dirava ena tau ena goada be hegeregere momokani, vadaeni kara namodia ibounai do ia karaia diba, mai kwalimu danu.’ (2 Timoteo 3:16, 17) Bema Dirava ena Hereva oi laloa dobu bona ena hakaua herevadia oi badinaia, vadaeni Dirava ena lauma ese oiemu kara do ia hanamoa. Oi do ia durua kara namodia hegeregere, manau, haheauka, gaukara goada bona Keristani tadikaka dekenai lalokau korikorina oi hahedinaraia totona. (1 Timoteo 4:15) Timoteo ese unai kara namodia ia hahedinaraia dainai, ia noho kongrigeisen taudia bona Paulo ese ia idia laloa bada.—Filipi 2:20-22.
13 Dala ihatoina be, Dirava ena Hereva lalonai aonega hereva namodia momo idia noho. (Salamo 1:1-3; 19:7; 2 Timoteo 2:7; 3:15) Idia ese oi do idia durua emu turadia bona moale karadia oi abia hidi namonamo, bona hekwakwanai idauidau oi haheaukalaia totona. (Genese 34:1, 2; Salamo 119:37; 1 Korinto 7:36) Abia hidi namodia karaia karana ese oi do ia durua emu tahua gauna oi hagugurua totona.
“Abidadama Ena Heau Helulu Do Oi Heaulaia”
14. Dahaka dainai Dirava idia hanamoa gaudia oi tahua be mai ena hekwarahi?
14 Emu mauri lalonai Iehova idia hanamoa gaudia oi tahua guna be aonega dalana, to ia be mai ena hekwarahi. Hegeregere, moni gaukara ta oi abia hidi gwauraia neganai, emu varavara, turadia, bona tisa taudia ese oi do idia doria sikuli badana dekenai oi lao totona, badina idia laloa unai ese emu mauri do ia hanamoa bona moale korikori do ia mailaia. (Roma 12:2) To Timoteo hegeregerena, “abidadama ena heau helulu oi heaulaia” be namo, unai amo Iehova ese ia henia mauri hanaihanai do oi abia.—1 Timoteo 6:12; 3:12.
15. Timoteo be dahaka hahetoho badana ia davaria?
15 Bema emu Witnes lasi ruma bese taudia be oi abia hidi gaudia idia moalelaia lasi, unai be hahetoho badana oi dekenai. Reana Timoteo be unai bamona kara ia hanaia be namo. Buka ta ia gwau, Timoteo ena ruma bese taudia be “diba bada bona taga taudia.” Reana ena tamana ia ura edukeisen badana ia tahua bona edia famili bisinesi ia naria.a Timoteo ena tamana be ia kamonai Timoteo ia ura Paulo ida misinari gaukara ia karaia neganai, ia badu. Badina ia laloa unai gaukara dainai dika ia davaria diba bona moni dalanai do ia hegeregere lasi!
16. Edena dala ai matamata tauna ta ese ena tamana ena kara ia haheaukalaia?
16 Hari, Keristani matamatadia ese unai bamona hekwakwanai idia davaria. Iehova ena Witnes taudia edia brens opesi dekenai ia gaukara tauna, Matthew, ia gwau: “Painia gaukara lau hamatamaia neganai, egu tamana be ia badu momokani. Ia laloa sikuli lau karaia kava, badina gabu hagoevaia gaukarana ta lau karaia, egu hesiai gaukara durua totona. Lau ia hevasehalaia, ia gwau bema ful-taim moni gaukara lau karaia, moni bada do lau abia.” Matthew ese edena bamona unai kara ia haheaukalaia? “Egu Baibel duahiduahi bona guriguri karana lau hadokoa lasi, bona lau mamia egu badu ia daekau negadiai, lau guriguri.” Matthew ena gini goada karana dainai hahenamo ia abia. Nega ia hanaia lalonai, ena hetura karana ena tamana ida ia namo. Bona unai kara ese Matthew ia durua Iehova kahirakahira ia lao totona. Matthew ia gwau: “Lau itaia Iehova ese lau ia naria, hagoadaia, bona lau ia durua abia hidi maorodia lau karaia totona. Unai gaudia do lau mamia lasi bema Dirava idia hanamoa gaudia lau tahua lasi.”
Dirava Idia Hanamoa Gaudia Tahua Noho
17. Edena dala ai Keristani tadikaka haida edia hereva dainai, ma haida ese ful-taim hesiai gaukara idia karaia lasi? (Mataio 16:22)
17 Reana nega haida emu Keristani tadikaka edia hereva dainai, Dirava idia hanamoa gaudia oi tahua lasi. Reana idia henanadai, ‘Dahaka dainai oi ura painia gaukara oi karaia? Ena be painia gaukara oi karaia lasi, to haroro gaukara oi karaia diba. Moni gaukara namona oi abia bona moni dalanai do oi hegeregere.’ Toana be unai be sisiba namona, to bema unai sisiba oi badinaia, Dirava ena ura oi badinaia noho, a?
18, 19. (a) Edena dala ai Dirava idia hanamoa gaudia oi tahua noho diba? (b) Oi be matamata tauna dainai, Basileia totona dahaka oi karaia noho? Mani oi gwauraia hedinarai.
18 Timoteo ena negai idia noho Keristani taudia haida be unai bamona idia laloa danu. (1 Timoteo 6:17) Paulo ia ura Timoteo ia durua Dirava idia hanamoa gaudia do ia tahua, unai dainai ia gwau: “Tuari tauna ese inai tanobada mauri ena gaukara idauidau bona tuari danu nega tamona ia karaia diba lasi. Lasi, to ia be tuari gaukara sibona do ia karaia, iena tuari biaguna do ia hamoalea totona.” (2 Timoteo 2:4) Bema tuari tauna ta be ia tuari noho, gaukara ma ta do ia karaia lasi. Namona be hanaihanai iena biaguna ena oda ia badinaia, unai amo ia bona ma haida be do idia mauri. Ita be tuari taudia bamona Keriso henunai, unai dainai kohu tahua karana ita dadaraia be namo, unai amo taunimanima hamauria gaukarana ita karaia namonamo diba.—Mataio 6:24; 1 Timoteo 4:16; 2 Timoteo 4:2, 5.
19 Namo lasi kohu momo ita tahua mauri namona noholaia totona, to sibona eda ura gaudia ita dadaraia be namo. “Keriso Iesu ena tuari tauna namona ta do oi lao. Oiemu dagi ena hisihisi bona metau do oi abia, ai tuari taudia ai abia bamona.” (2 Timoteo 2:3) Timoteo be Paulo ia bamoa dainai, metau bada negadiai danu moale davaria dalana ia dibaia. (Filipi 4:11, 12; 1 Timoteo 6:6-8) Oi danu be unai bamona oi karaia diba. Basileia dainai oi ura gau haida oi dadaraia, a?
Hahenamo Hari Bona Vaira Negai
20, 21. (a) Dirava idia hanamoa gaudia oi tahua neganai, dahaka hahenamo haida do oi moalelaia? (b) Emu lalona oi hadaia dahaka do oi karaia totona?
20 Timoteo be lagani 15 lalonai Paulo ida ia gaukara hebou. Sivarai namona be Meditereinien ena not kahana dekenai idia harorolaia neganai, Timoteo ia itaia kongrigeisen matamatadia momo idia haginidia. Iena misinari gaukara lalonai ia davaria gaudia dainai ia moale, to bema edukeisen badana ia tahua, unai bamona moale do ia davaria lasi. Dirava idia hanamoa gaudia oi tahua neganai, hahenamo momo do oi abia. Iehova kahirakahira do oi lao bona emu Keristani tadikaka ese oi do idia matauraia. Kohu momo tahua karana amo ia mai lalohisihisi do oi mamia lasi, to henia karana amo ia vara moale korikorina do oi mamia. To mai anina bada gauna be inai, mauri hanaihanai tanobada paradaisona dekenai do oi abia.—1 Timoteo 6:9, 10, 17-19; Kara 20:35.
21 Unai dainai bema Dirava idia hanamoa gaudia oi do tahua lasi, oi ai hagoadaia Dirava badinaia karana oi tahua matamaia. Namona be kongrigeisen lalonai oi idia durua diba taudia oi bamoa bona edia hakaua herevadia oi kamonai henia, unai amo emu tahua gauna oi abia diba. Dirava ena Hereva oi stadilaia hanaihanai. Namona be emu lalona oi hadaia inai tanobada ena kohu momo tahua karana oi dadaraia. Bona nega ibounai oi laloatao, ‘gau momo oi dekenai ia henia’ Diravana be oi dekenai ia gwauhamata, bema Ia idia hanamoa gaudia oi abia hidi, hari bona nega vairai oi do ia hanamoa bada.—1 Timoteo 6:17.
[Footnote]
a Helene taudia ese edukeisen idia laloa bada. Timoteo ena negai ia noho tauna, Plutarch, ia gwau: “Edukeisen ese namo bada ia mailaia. . . . Unai ese taunimanima ia durua kara namodia idia hahedinaraia bona idia moale totona. . . . Gau ma haida be anina lasi, bona ita laloa bada lasi.”—Moralia, I, “The Education of Children.”
Oi Laloatao, A?
• Matamata taudia be edia tahua gaudia idia hagugurua totona, edeseniai heduru idia abia diba?
• Dahaka dainai Baibel stadilaia karana be mai anina bada?
• Edena dala ai matamata taudia ese inai tanobada ena kohu momo tahua karana idia dadaraia diba?
• Dirava idia hanamoa gaudia oi tahua neganai, dahaka hahenamo do oi davaria?
[Picture on page 24]
Timoteo be tahua gaudia namodia ia atoa
[Pictures on page 25]
Daidia ese Timoteo idia durua?
[Pictures on page 26]
Dirava idia hanamoa tahua gaudia oi atoa, a?