Dahaka ese Ita Ia Durua Diba Hereva Momokani Ita Hadibaia Maoromaoro Totona?

NIUSPEPA ai maumau herevadia ia torea tauna ta be nega ta drama rumana lalonai idia karaia gadara ta itaia totona ia lao. Unai drama ia ura henia lasi bona gabeai ia gwau: “Bema mai anina bada lasi gauna oi ura, mani oi lao unai drama oi itaia.” Gabeai, unai drama idia hegaegaelaia taudia ese hereva ta idia halasia, ia lalonai be unai drama ia maumauraia tauna ia torea hanai herevana ena kahana sibona idia halasia. Unai hereva kahana be: “Mani oi lao unai drama oi itaia”! Unai hereva ese drama be niuspepa lalonai ia torea tauna ena hereva ia hahedinaraia momokani, to idia ese hereva ta kahirakahira idia noho herevadia idia kokia bona mai kerere ida ena lalohadai idia hagagevaia.

Unai haheitalai ese ia hahedinaraia hereva ta kahirakahira idia noho herevadia be mai anina bada. Satani be Iesu ia koia toho totona Baibel ena hereva ena anina ia hagagevaia hegeregerena, hereva ta kahirakahira idia noho herevadia haida ita kokia neganai, edia anina ita hagagevaia diba. (Mataio 4:​1-11) To, hereva ta kahirakahira idia noho herevadia laloa namonamo karana ese ita ia durua ena anina ita lalo-pararalaia maoromaoro totona. Unai badina dainai, Baibel ena siri ta ita stadilaia neganai, nega ibounai unai siri ena kahirakahira idia noho herevadia ita itaia be gau badana, unai amo toretore tauna ia herevalaia gauna ita lalo-pararalaia namonamo.

Dirava Ena Hereva Oi Hadibaia Maoromaoro

Hereva ta kahirakahira idia noho herevadia be hereva ta ena vairanai eiava murinai idia torea eiava gwauraia herevana, nega momo ena anina ia hedinarai. Danu, kahirakahira idia noho herevadia ena anina be “nega eiava gau ta ese kara haida eiava mai anina bada gaudia idia hamomokania.” Anina ginigabena lalonai, hereva ta “kahirakahira idia noho hereva” ena hereva ma ta be “sivarai ma haida.” Siri ta ena kahirakahira idia noho herevadia be mai anina bada bema aposetolo Paulo be Timoteo dekenai ia torea herevana ita laloa, ia gwau: “Do oi gaukara goada, bona gaukara namona momokani tauna do oi lao, Dirava ese oi dainai do ia moale bada totona. Vadaeni oi ese hereva momokani do oi hadibaia maoromaoro, bona Dirava ena vairanai do oi hemarai lasi.” (2 Timoteo 2:15) Dirava ena Hereva ita hadibaia maoromaoro totona, namona be ita lalo-pararalaia namonamo bena ma haida dekenai mai momokani bona maoromaoro ida ita hahedinaraia. Iehova, Baibel ia Torea Tauna, ita matauraia dainai, unai ese ita ia hagoadaia unai do ita karaia toho, bona hereva ta kahirakahira idia noho herevadia ita laloa be heduru gauna namona.

Timoteo Iharuana Ena Sivarai Ma Haida

Hegeregere, Baibel bukana Timoteo Iharuana mani ita laloa.a Iseda tahua karana ita hamatamaia totona, buka ena sivarai ma haida ita tahua diba. Daika ese Timoteo Iharuana ia torea? Edena negai? Edena bamona negadia ai ia torea? Bena ita henanadai diba, buka ena hereva kwarana dekenai ia hedinarai tauna “Timoteo” ena noho dalana be edena bamona? Dahaka dainai buka lalonai idia noho herevadia ia abia be gau badana? Unai henanadai edia haere ese unai buka dekenai iseda laloa bada karana do ia habadaia bona ita ia durua edena dala ai hari inai negai namo do ita davaria diba.

Timoteo Iharuana ena siri ginigunadia ese idia hahedinaraia unai buka be aposetolo Paulo ese Timoteo dekenai ia torea revarevana ta. Siri ma haida ese idia hahedinaraia Paulo ese unai revareva ia torea neganai, ia be dibura rumana lalonai ia noho badina sivarai namona ia harorolaia. Momo ese Paulo idia rakatania dainai, ia laloa do ia mase. (2 Timoteo 1:​15, 16; 2:​8-10; 4:​6-8) Unai dainai, reana lagani 65 C.E. ai, Roma dekenai nega iharuana idia hadiburaia neganai unai buka ia torea. Nega sisina murinai, Nero ese oda ia henia idia hamasea totona.

Unai be Timoteo Iharuana ena sivarai ma haida. To, namona be inai ita laloa, Paulo be Timoteo dekenai unai revareva ia torea ena badina be ena hekwakwanai ia herevalaia totona lasi. To, Timoteo ia sisiba henia, nega vairai mauri ena nega aukadia do ia davaria bona ena turana ia hagoadaia lalona veria gaudia do ia dadaraia, “do ia goada noho” bona ma haida dekenai Paulo ena hadibaia herevadia do ia hadibaia. Bona, unai taudia be do idia hegeregere ma haida idia durua totona. (2 Timoteo 2:​1-7) Inai nega aukadia lalonai, ma haida edia namo tahua karana dekenai unai be haheitalai namona! Bona hari inai negai ita dekenai unai be sisiba namona!

Paulo ese Timoteo ia gwauraia “lauegu natuna lalokau.” (2 Timoteo 1:⁠2) Nega momo, Keristani Greek Revarevadia lalonai, inai tau matamatana idia gwauraia Paulo ia bamoa abidadama turana. (Kara 16:​1-5; Roma 16:21; 1 Korinto 4:17) Paulo be ia dekenai unai revareva ia torea neganai, toana be Timoteo ena mauri lagani be 30 ia hanaia​—⁠to idia gwau ia be tau matamata. (1 Timoteo 4:12) To, ia be mai ena abidadama namona vadaeni, reana lagani 14 lalonai, ‘Paulo ia durua.’ (Filipi 2:​19-22) Ena be Timoteo be tau matamata, to Paulo ese gaukara ia henia elda taudia do ia sisiba henidia, “anina lasi hereva gaudia totona do idia hepapahuahu lasi,” to mai anina bada gaudia idia laloa, hegeregere abidadama bona haheauka. (2 Timoteo 2:14) Danu, Timoteo dekenai gwaumaoro idia henia kongregesen naria taudia bona hesiai taudia abia hidi gaukarana ia naria totona. (1 Timoteo 5:22) To, reana Timoteo be ena dagi ena siahu ia gaukaralaia totona ia hemarai sisina.​—⁠2 Timoteo 1:​6, 7.

Unai elda matamatana ese hekwakwanai badadia haida ia davaria. Unai hekwakwanai ta be, tatau rua, Humenaio bona Pileto, idia ese ‘haida edia abidadama idia hamanokaia,’ idia gwau “mase dekena amo toreisi lou be ia ore vadaeni.” (2 Timoteo 2:​17, 18) Toana be, idia abia dae momokani toreisi lou tamona be lauma dalanai gauna bona Keristani taudia dekenai unai ia vara vadaeni. Reana, Paulo ena hereva ena kahirakahira idia noho herevadia idia laloa lasi, idia gwau Keristani taudia be edia kara dika lalonai idia mase vadaeni, to Dirava ena lauma ese idia ia hamauria. (Efeso 2:​1-6) Paulo ia gwau unai bamona hereva momokani negea taudia do idia bada idia lao. Ia gwau: “Negana do ia ginidae, taunimanima be hereva maoromaoro do idia ura lasi kamonai. . . . Hereva momokani do idia negea, to gori kavakava do idia kamonai henia.” (2 Timoteo 4:​3, 4) Paulo ese guna ia gwauraia sisibana ese ia hahedinaraia, Timoteo ese aposetolo tauna ena sisiba ia badinaia haraga be gau badana.

Hari Inai Negai Unai Buka Ena Namo

Ataiai idia noho herevadia amo ita diba, Paulo ese Timoteo Iharuana ia torea inai badina toi dainai: (1) Ia diba ena mase be kahirakahira, unai dainai unai nega totona Timoteo ia hegaegaelaia. (2) Ia ura Timoteo ia hegaegaelaia ia naria kongregesen be hereva momokani negea karana bona dika idia havaraia gaudia ma haida amo do ia gimaia. (3) Ia ura Timoteo ia hagoadaia, Iehova ena hesiai gaukara lalonai ia bisi bona hahediba hereva koikoidia ia dadaraia totona namona be Dirava ena lauma helaga ese ia havaraia Herevana lalonai ia noho diba maoromaorona dekenai ia tabekau.

Unai sivarai ma haida ita lalo-pararalaia karana ese ia hahedinaraia Timoteo Iharuana be mai anina bada. Hari inai negai danu, hereva momokani idia negea taudia be Humenaio bona Pileto bamona, idia ese sibodia edia lalohadai idia hadibaia bona idia ura iseda abidadama idia hadikaia. Danu, Paulo ese ia perovetalaia “metau dikadia momo do idia vara,” negana lalonai ita noho. Momo ese Paulo ena sisiba herevana idia hamomokania, ia gwau: “Keriso Iesu danu idia hakapua dainai, idia ibounai ese dagedage ena hisihisi do idia abia.” (2 Timoteo 3:​1, 12) Edena dala ai ita gini goada diba? Timoteo bamona, namona be lagani momo lalonai Iehova idia hesiai henia taudia edia sisiba herevadia ita badinaia. Bona sibona eda stadi, guriguri, bona Keristani hebamo karana amo, ita ese Iehova ena hebogahisi dainai ‘do ita goada noho’ diba. Danu, diba maorona ena siahu ita abidadama henia dainai, Paulo ena hagoadaia herevana ita badinaia diba ia gwau: ‘Hereva momokani ita badinaia noho.’​—⁠2 Timoteo 1:⁠13.

“Hereva Momokani”

Paulo ese ia gwauraia “hereva momokani” be dahaka? Unai hereva ia gaukaralaia Keristani momokani ena hahediba herevadia ia herevalaia totona. Paulo ena revareva ginigunana Timoteo dekenai ia hahedinaraia “hereva momokani” be “iseda Lohiabada Iesu Keriso ena.” (1 Timoteo 6:⁠3) Hereva momokani ena dala ita tohotohoa karana ese ta dekenai laloa maoromaoro, lalokau, bona ma haida laloa bada karana ia havaraia. Iesu ena hesiai gaukara bona hahediba herevadia be Baibel ibounai lalonai idia noho hahediba herevadia ma haida ida idia hegeregere dainai, inai hereva “hereva momokani” ese Baibel ena hahediba herevadia ibounai ia herevalaia diba.

Timoteo bona Keristani elda taudia ibounai dekenai, hereva momokani be “dagi” ta bona idia dogoatao noho be gau badana. (2 Timoteo 1:​13, 14) Namona be Timoteo ese ‘Sivarai Namona do ia harorolaia goadagoada, nega namodia neganai, bona nega dikadia neganai danu. Taunimanima do ia sisiba henia, taunimanima edia lalona do ia hagoadaia, bona idia do ia hadibaia, mai ena haheauka danu.’ (2 Timoteo 4:⁠2) Timoteo ena nega lalonai, hereva momokani idia negea taudia edia hadibaia herevadia ia bada ia lao ita lalo-pararalaia neganai, ita abia dae dahaka dainai Paulo ese hereva momokani hadibaia gaukarana ia gwauraia. Ita lalo-parara danu, namona be Timoteo ese mamoe oreana ia gimaia, unai ia karaia dalana be ia ‘sisiba henia, hagoadaia, bona ia hadibaia’ mai ena haheauka ida, hadibaia dalana namona ia hahedinaraia.

Timoteo be daidia dekenai sivarai namona do ia harorolaia? Unai hereva ena kahirakahira idia noho herevadia idia hahedinaraia Timoteo be elda tauna bamona, Keristani kongregesen lalonai sivarai namona do ia harorolaia. Timoteo ena inai taudia ese hahetoho idia havaraia dainai, namona be lauma dalanai ia goada bona mai gari lasi ida Dirava ena hereva ia harorolaia, to taunimanima edia aonega, sibona ena hereva, eiava anina lasi lalohadai idauidau ia tahua lasi. Momokani, reana unai ese lalohadai kereredia idia abia taudia amo dagedage ia havaraia. (2 Timoteo 1:​6-8; 2:​1-3, 23-26; 3:​14, 15) To, Timoteo ese Paulo ena sisiba ia kamonai henia karana amo, hereva momokani idia negea taudia do ia koua noho diba, Paulo ia karaia hegeregerena.​—⁠Kara 20:​25-32.

Paulo ena hereva, sivarai namona harorolaia herevana, be mai anina bada kongregesen murimurinai idia karaia haroro karana dekenai danu, a? Oibe, Unai hereva ena kahirakahira idia noho herevadia idia hahedinaraia bamona idia be mai anina bada. Paulo be ma ia gwau: “To oi ese nega ibounai do oi laloa maoromaoro. Hisihisi lalonai do oi haheauka. Sivarai Namona harorolaia gaukara do oi karaia, bona Dirava ena hesiai tauna ena dagi karadia ibounai do oi karaia namonamo.” (2 Timoteo 4:⁠5) Keristani haroro gaukara lalonai evanelia gaukarana​—⁠abidadama lasi taudia dekenai hahemauri ena sivarai namona harorolaia gaukarana⁠—be mai anina bada. (Mataio 24:14; 28:​19, 20) Bona “nega dikadia” ai, kongregesen lalonai Dirava ena hereva idia harorolaia hegeregerena, ita danu ita hekwarahi nega aukadia lalonai, kongregesen murimurinai idia noho taudia ita haroro henidia totona.​—⁠1 Tesalonika 1:⁠6.

Iseda haroro bona hadibaia gaukara ibounai edia badina be Dirava ena lauma amo ia vara Herevana. Ita ese Baibel ita abia dae momokani. Paulo ese Timoteo ia hamaoroa: “Buka Helaga ibounai be Dirava ena lauma amo ia vara bona ia be mai ena namo hadibaia totona, sisiba henia totona, gau idauidau hamaoromaoroa totona, kara maoromaoro ai matahakani henia totona.” (2 Timoteo 3:​16, NW ) Nega momo unai hereva idia hahedinaraia namonamo, unai amo idia hahedinaraia Baibel be Dirava ena lauma amo ia vara Herevana. To, dahaka dainai Paulo ese unai hereva ia torea?

Paulo ese elda ta ia hereva henia, kongregesen lalonai ia be mai ena maduna taunimanima ia “sisiba henia totona, gau idauidau hamaoromaoroa totona, kara maoromaoro ai matahakani henia totona.” Unai dainai, Timoteo ia hadibaia lou Dirava ena lauma amo ia vara Hereva ena aonega do ia abidadama henia, Timoteo ia maragi negana amo idia hadibaia bamona. Timoteo bamona, elda taudia be nega haida kerere idia karaia taudia idia sisiba henia. Unai idia karaia neganai, hanaihanai Baibel idia abia dae be gau badana. Danu, Baibel be Dirava ena lauma amo ia vara dainai, sisiba ibounai be Dirava ena amo. Baibel ena sisiba idia dadaraia taudia ese taunimanima edia lalohadai idia dadaraia lasi, to Iehova ena lauma amo ia vara sisibana idia dadaraia.

Timoteo Iharuana ena buka be Dirava ena aonega amo ia honu! Bona ena sisiba ena kahirakahira idia noho herevadia ita itaia neganai, unai be anina bada momokani! Inai hereva lalonai, inai buka ese Dirava ena lauma amo ia vara hereva namodia haida sibona ita itaia, to unai be hegeregere, Baibel lalonai ita duahia gaudia edia kahirakahira idia noho herevadia ita tahua be mai ena heduru. Unai ese ita do ia durua, ‘hereva momokani do ita hadibaia maoromaoro’ totona.

[Footnote]

[Picture on page 17]

Paulo ia ura Timoteo ia hadibaia unai amo kongregesen do ia gimaia

[Picture on page 20]

Paulo ese Timoteo ia hadibaia lou Dirava ena lauma amo ia vara Herevana do ia abidadama henia