Karoa 3

Dirava Ena Hereva Dogoatao Auka

1. (a) Edena dala ai idaunegai Israela taudia idia davaria Dirava ena hereva be momokani? (b) Dahaka dainai unai be mai anina bada ita dekenai?

“UMUI ibounai be emui lalona, bona emui laumana dekenai umui diba, Lohiabada, emui Dirava, ese iena gwauhamata namodia ibounai umui dekenai ia hamomokania vadaeni, idia ta ia reaia lasi. Ibounai idia vara momokani, ta ia moru lasi.” (Iosua 23:​14-16) Israela taudia be Gwauhamata Tanona dekenai idia vareai murinai, Iosua be Israela ena tau badadia dekenai unai bamona ia hereva. Oibe, Iehova ena gwauhamata idia abidadama henia diba. Dirava ese unai sivarai​—⁠bona Baibel ena sivarai iboudiai​—⁠ia naria, “helaro ita abia totona.”​—⁠Roma 15:​4, NW.

2. (a) Edena dala ai Baibel be “Dirava ena lauma amo ia vara”? (b) Unai ita diba dainai iseda maduna be dahaka?

² Ena be Iehova ese taunimanima 40 bamona ia gaukaralaia Baibel idia torea totona, to ia be Baibel ia Havaraia Tauna. Unai ena anina be Baibel lalonai idia noho hereva ibounai be iena hakaua henunai idia torea, a? Oibe. Iena lauma helaga goadana, iena gaukara siahuna, amo unai ia karaia. Aposetolo Paulo ia hereva momokani, ia gwau: “Buka Helaga ibounai be Dirava ena lauma amo ia vara . . . Dirava ena tau be do ia hegeregere momokani, gau ibounai ia abia hegaegae gaukara namodia ibounai karaia totona.” Gabu iboudiai dekenai unai idia abia dae taudia ese Baibel ena hereva idia kamonai henia bona edia mauri lalonai idia badinaia.​—⁠2 Timoteo 3:​16, 17, NW; 1 Tesalonika 2:⁠13.

Ma Haida Oi Durua Baibel Idia Laloa Bada Totona

3. Baibel be Dirava ena Hereva idia abia dae lasi taudia be edena dala namona amo ita durua diba?

³ Ita hereva henia taudia haida idia abia dae lasi Baibel be Dirava ena Hereva. Edena bamona idia ita durua diba? Nega momo, dala namona be Baibel ita kehoa bona idia dekenai ena hereva ita hahedinaraia. “Dirava ena hereva be ia mauri noho, bona ia be mai ena siahu. Ia be mai ena matana momokani. Iena matana ese kaia mai ena kahana ruaosi ena matana ia hereaia momokani. . . . Bona ia ese iseda lalona bona iseda kudouna ena ura ibounai ia tahua diba.” (Heberu 4:12) “Dirava ena hereva” be histori ena sivarai sibona lasi; ia mauri noho! Baibel ena gwauhamata idia guguru momokani. Baibel ena sivarai ena siahu tau ta ena kudouna ena ura dekenai ese ita eda hereva ibounai edia siahu ia hanaia.

4. Dahaka hereva momokanidia Baibel lalonai ese taunimanima haida edia lalohadai Baibel dekenai idia haidaua, bona dahaka dainai?

⁴ Baibel lalonai Dirava ena ladana idia itaia dainai, momo idia ura Baibel idia stadilaia. Ma haida ese mauri ena anina, Dirava ese dika ia do koua lasi ena badina, hari idia vara gaudia edia anina, eiava tanobada paradaisona dekenai mauri hanaihanai do idia abia diba helarona be Baibel dekenai idia itaia neganai, idia ura Baibel idia stadilaia. Tomadiho karadia dainai lauma dikadia ese taunimanima idia hahisia tanodia dekenai, unai ia vara ena badina bona koua dalana idia hahedinaraia Baibel herevadia ese haida edia lalona idia veria. Dahaka dainai kudou maoro taudia ese unai hereva idia laloa bada? Badina unai bamona mai anina bada gaudia dekenai, Baibel sibona ese ita abidadama henia diba hereva maorodia ia henia.​—⁠Salamo 119:130.

5. (a) Taunimanima idia gwau Baibel idia abidadama henia lasi neganai, reana ena badina be dahaka? (b) Edena dala ai unai bamona taudia ita durua diba?

⁵ To, bema taunimanima ese ita idia hadibaia Baibel idia abidadama henia lasi be edena bamona? Hereva ita hadokoa be namo, a? Reana lasi bema idia ura unai idia herevalaia. Reana idia laloa Baibel be Kerisendom ena buka. Bona reana Kerisendom ena koikoi karadia bona politikol daladia durua karadia, bona moni noia loulou karana dainai, Baibel idia ura henia lasi. Namona be oi nanadaia bema unai bamona ia laloa, ani? Bema idia diba Baibel ese Kerisendom ena dala dikadia ia gwauraia dika, bona Kerisendom bona Keristani dala momokanina edia idau idia diba, reana unai ese edia lalona ia veria.​—⁠Mika 3:​11, 12; Mataio 15:​7-9; Iamesi 4:⁠4.

6. (a) Dahaka dainai oi abia dae Baibel be Dirava ena Hereva? (b) Dahaka gaudia ma haida ita herevalaia karana amo taunimanima ita durua diba bena idia abia dae Baibel be Dirava amo ia mai momokani?

⁶ Ma haida dekenai Baibel be Dirava ena lauma amo ia vara idia hamomokania gaudia idia herevalaia maoromaoro neganai, idia ia durua bada. Dahaka dainai oi abia dae momokani Baibel be Iehova Dirava amo ia mai? Baibel ese sibona ia vara dalana ia gwauraia herevadia dainai, a? Eiava badina be Baibel ena peroveta herevadia momo herea ese vaira negana idia hahedinaraia goevagoeva, bona unai gaudia be taunimanima ese idia gwauraia diba lasi, a? (2 Petero 1:​20, 21) Eiava, ena be taunimanima 40 bamona ese lagani 1,600 bamona lalonai Baibel idia torea, to ena hereva ibounai idia hamomokania heheni dainai, a? Eiava badina be saiens dalanai ia be maoro dainai ia be idaunegai bukadia ma haida amo ia idau, a? Eiava idia torea taudia idia torea maoromaoro dainai, a? Eiava, ena be haida ese idia hadikaia ore toho, to ia boio lasi ema bona hari dainai, a? Oi dekenai unai idia hamomokania gaudia oi gaukaralaia diba taunimanima ma haida durua totona.a

Iseda Baibel Duahia Karana

7, 8. (a) Baibel dekenai dahaka ita karaia be namo? (b) Baibel ita duahia sibona lasi, to dahaka danu ita karaia be namo? (c) Edena dala ai oi ese Iehova ena ura dekenai lalo-parara oi abia?

⁷ Ma haida ita durua Baibel do idia abidadama henia, to namona be ita danu ese nega ita atoa hanaihanai Baibel ita duahia totona. Oi ese unai oi karaia noho, a? Idia karaia bukadia ibounai amo, Baibel be mai anina bada. To momokani, ita gwau lasi bema ita ese Baibel ita duahia, ita hegeregere vadaeni. Lasi. Baibel ese ita ia sisiba henia, namo lasi ita sibona ita noho, turana lasi. Namo lasi ita laloa ita sibona ese tahua karana ita karaia neganai gau iboudiai edia anina ita davaria diba. Bema ita ura laloa maoromaoro Keristani taudia ai ita lao, sibona eda stadi bona Dirava ena taunimanima idia karaia heboudia dekenai ita lao hanaihanai be mai anina bada.​—⁠Aonega Herevadia 18:1; Heberu 10:​24, 25.

⁸ Baibel lalonai Isaia ena peroveta herevana ia duahia Etiopia ofesa tauna ena sivarai ese unai ia hahedinaraia. Aneru ta ese Keristani evanelia tauna Filipo ia hakaua, unai tauna do ia nanadaia: “Oi diba dahaka oi duahia, a?” Mai manau ida Etiopia tauna ia haere: “Bema hadibaia tauna lasi, edena bamona lau diba?” Filipo ia noia Baibel ena kahana ta ena anina ia gwauraia hedinarai totona. Filipo be Baibel ia duahia tauna, to ia ese sibona ena lalohadai Baibel siridia dekenai ia gwauraia lasi. Ia ese Dirava ena tanobada oreana ia bamoa noho. Unai dainai, ia ese Etiopia tauna ia durua diba, Iehova ese ena orea amo ia henia hadibaia herevadia amo heduru ia abia totona. (Kara 6:​5, 6; 8:​5, 26-35) Hari inai negai be unai bamona danu, tau ta be ia sibona ia stadi neganai, Iehova ena ura ia lalo-pararalaia namonamo diba lasi. Ita ibounai be Iehova ese ena orea amo mai lalokau ida ia henia heduru ita abia be gau badana.

9. Dahaka Baibel duahiduahi ena sediual ese ita ibounai ia durua diba?

⁹ Baibel ita lalo-pararalaia totona, Iehova ena orea ese buka idauidau ai Baibel ena hereva ena anina ia hahedinaraia goevagoeva. Danu, tanobada ibounai Iehova ena Witnes taudia edia kongregesen iboudiai dekenai idia karaia Tiokratik Haroro Sikuli lalonai, ita totona Baibel duahiduahi ena sediual idia karaia. Oi sibona ese Buka Helaga oi tahua karana amo heduru bada oi abia diba. (Salamo 1:​1-3; 19:​7, 8) Namona be oi hekwarahi hanaihanai Baibel oi duahia totona. Ena be gau iboudiai oi lalo-pararalaia goevagoeva lasi, to Baibel ena hereva ibounai oi diba be mai anina bada. Hegeregere, bema dina ta ta ai rau foa eiava faiv oi duahia, lagani tamona bamona lalonai Baibel ibounai do oi duahia ore.

10. (a) Edena negai emu Baibel duahiduahi oi karaia? (b) Daidia ida Baibel oi duahia be namo, bona dahaka dainai hanaihanai oi duahia be gau badana?

¹⁰ Edena negai emu Baibel duahiduahi oi karaia diba? Bema dina iboudiai miniti 10 eiava 15 lalonai oi duahia diba, namo bada do oi abia. Bema unai oi karaia diba lasi, namona be pura ta ta ai nega haida unai oi karaia totona nega oi atoa, bena unai sediual oi badinaia. Bema oi headava, oi bona emu adavana ese Baibel umui duahia hebou badabada karana umui moalelaia diba. Bema natudia haida idia duahiduahi diba vadaeni, reana kahana ta idia duahia badabada danu. Namona be emu mauri ibounai lalonai Baibel oi duahia, aniani oi ania hegeregerena. Oi diba, bema ta ia aniani namonamo lasi, do ia gorere. Unai hegeregerena, lauma dalanai ita goada bena mauri hanaihanai ita abia totona, dala tamona be hanaihanai “Dirava ena uduna dekena amo idia mai hereva” ita abia.​—⁠Mataio 4:⁠4.

Iseda Tahua Gauna

11. Baibel ita duahia lalonai namona be iseda tahua gauna be dahaka?

¹¹ Baibel ita duahia lalonai namona be iseda tahua gauna be dahaka? Namo lasi iseda tahua gauna be rau haida ita duahia sibona. Namona be iseda tahua gauna be Dirava ita diba namonamo, unai amo iseda lalokau ia dekenai ita habadaia bona ia abia dae dalanai ia ita tomadiho henia diba. (Ioane 5:​39-42) Namona be Baibel torea tauna ta bamona ita laloa, ia gwau: “Lohiabada e, oiemu kara lau dekenai do oi hadibaia. Oiemu dala lau dekenai do oi hedinaraia.”​—⁠Salamo 25:⁠4.

12. (a) Dahaka dainai “diba maoromaoro” ita abia be gau badana, bona unai diba ita abia totona reana edena bamona ita hekwarahi be namo? (b) Ita duahia Baibel ena kahana ita laloa namonamo totona, dahaka laloa daladia foa ita gaukaralaia diba bena heduru bada ita abia? (Rau 30 ai ia noho mauana itaia.) (c) Unai daladia hahedinaraia totona, inai paragraf lalonai idia noho henanadai oi haerelaia. Idia gwauraia to idia torea hanai lasi siridia itaia.

¹² Iehova ese ita ia hadibaia lalonai, namona be ita ura “diba maoromaoro” ita abia. Bema lasi, edena bamona iseda mauri lalonai Dirava ena Hereva ita badinaia eiava ma haida dekenai ita gwauraia hedinarai maoromaoro diba? (Kolose 3:​10, NW; 2 Timoteo 2:15) Diba maoromaoro ita abia totona, namona be ita duahia namonamo, bona bema kahana ta ita lalo-pararalaia be auka, reana ena anina abia totona nega tamona lasi to nega rua eiava toi ita duahia be namo. Ita ia durua danu bema unai gauna ita lalohadailaia totona nega ita atoa, anina be dala idauidau amo ena anina ita laloa namonamo. Laloa daladia namodia foa be rau 30 dekenai idia noho. Baibel ena kahana momo be unai dala ta eiava haida ai ita laloa namonamo neganai, heduru bada ita abia. Rau gabedia dekenai idia noho henanadai oi haerelaia lalonai, unai do oi itaia.

(1) Nega momo, oi duahia Baibel siridia ese oi dekenai Iehova ena kara haida idia hahedinaraia. Hegeregere, Salamo 139:​13, 14 amo ita diba, Dirava ese idia do vara lasi natudia ia laloa bada: “Lauegu sinana ena bogana dekenai lau oi atoa vadaeni. Oi lau tanikiu henia, badina mai hoa danu lau oi karaia. Oiemu kara ibounai be mai hoa bona gari danu. Lauegu kudouna dekenai, inai bamona lau diba momokani.” Iehova ese ia havaraia gaudia be namo herea! Ia ese taunimanima ia karaia dalana amo ia hamomokania ita ia lalokau henia bada.

Ioane 14:​9, 10 ena hereva hegeregerena, Iesu ese ma haida ia kara henia sivaraidia ita duahia neganai, ita itaia Iehova be edena bamona ia kara. Bema unai ita laloa bona Luka 5:​12, 13 bona Luka 7:​11-15 ai idia noho sivaraidia ita duahia, Iehova be edena bamona ita gwauraia diba?

(2) Baibel ena sinado be: Iesu Keriso, gwauhamata Garana, ese Basileia amo Iehova ena lohia siahuna ena maoro do ia hamomokania bona ena ladana do ia hahelagaia. Oi duahia siridia ese unai idia hahedinaraia dalana oi laloa.

Edena dala ai Esekiela bona Daniela ese Baibel ena sinado idia hahedinaraia? (Esekiela 38:​21-23; Daniela 2:44; 4:17; 7:​9-14)

Edena dala ai Baibel ia hahedinaraia goevagoeva Iesu be gwauhamata Garana? (Galatia 3:⁠16)

Apokalupo ese Basileia ena guguru negana be edena bamona ia herevalaia? (Apokalupo 11:15; 12:​7-10; 17:​16-18; 19:​11-16; 20:​1-3; 21:​1-5)

(3) Oi sibona oi nanadaia edena dala ai oi duahia siridia oi badinaia diba. Hegeregere, Esodo amo ia lao Deuteronomi dekenai Israela taudia edia matabodaga bona gwau-edeede karadia ita duahia. Ita itaia unai lalohadai bona karadia ese dika idia havaraia. Unai dainai, namona be unai ese ita ia veria, Iehova do ita hamoalea bona Israela taudia edia haheitalai dikana ita tohotohoa lasi. “Unai bamona kara idia vara, be ita dekenai toa bamona, do ita itaia mai gari danu. Edia sivarai danu Buka Helaga lalonai idia torea vadaeni, idia ese ita do idia sisiba henia totona. Badina be tanobada ena dokona be kahirakahira negana ita noho inai.”​—⁠1 Korinto 10:⁠11.

Kaino ese Abela ia hamasea sivaraina amo dahaka ita diba? (Genese 4:​3-12; Heberu 11:4; 1 Ioane 3:​10-15; 4:​20, 21)

Baibel ena sisiba guba helarona idia abia Keristani taudia dekenai be mai anina tanobada helarona idia abia taudia dekenai danu, a? (Numera 15:16; Ioane 10:⁠16)

Ena be Keristani kongregesen lalonai iseda ladana ia namo, to dahaka dainai ita diba vadaeni Baibel ena sisiba badinaia namonamo daladia ita laloa be namo? (2 Korinto 13:5; 1 Tesalonika 4:⁠1)

(4) Oi duahia siridia be ma haida durua totona oi gaukaralaia diba daladia oi laloa. Taunimanima ibounai ese edia helt idia laloa, unai dainai idia ida Iesu ena kara sivaraina ita duahia karana amo, Basileia siahuna ia abia neganai dala badana ai do ia karaia karadia ita hahedinaraia diba: “Taunimanima momo ia dekenai idia lao. Aena idia dika taudia, matakepulu taudia, idia hereva diba lasi taudia, edia imana idia dika taudia, bona gorere idauidau taudia momo herea idia abia lao. . . . Vadaeni Iesu ese idia ia hanamoa.”​—⁠Mataio 15:⁠30.

Iairo ena kekeni ena toreisi lou sivaraina amo reana daika ita durua diba? (Luka 8:​41, 42, 49-56)

13. Bema Iehova ena orea ida hanaihanai Baibel ita duahia bona ita stadilaia, dahaka namo do ita abia?

¹³ Baibel duahiduahi lalonai unai laloa daladia foa ita gaukaralaia neganai namo bada ita abia! Momokani, Baibel ita duahia be mai ena hekwarahi. To iseda mauri ibounai lalonai ita ia durua diba, badina Baibel ita duahia neganai, lauma dalanai do ita goada ita lao. Hanaihanai Baibel ita duahia karana amo iseda lalokau Tamana Iehova bona iseda Keristani tadikaka kahirakahira do ita lao. Unai ese ita do ia durua, ‘mauri herevana ita dogoatao auka’ totona.​—⁠Filipi 2:​16, NW.

[Footnote]

Riviu Henanadai

• Dahaka dainai Baibel idia torea bona naria ema bona hari?

• Edena dala ai ma haida ita durua diba, Baibel idia laloa bada totona?

• Dahaka dainai hanaihanai Baibel ita duahia karana ese ita ia durua? Ita duahia siridia laloa totona edena laloa daladia foa ita gaukaralaia diba?

[Box/Picture on page 30]

BAIBEL ENA KAHANA TA OI DUAHIA NEGANAI, OI LALOA

Iehova ena kara be edena bamona ia hahedinaraia

Edena dala ai Baibel ena sinado ia hahedinaraia

Ena anina emu mauri lalonai be dahaka

Edena dala ai ma haida durua totona oi gaukaralaia diba