Iesu Keriso Ena Raka Dalana Tohotohoa
“Bema tau ta ia hereva, ia gwau, ‘Lau be Dirava ena lalona dekenai lau noho,’ vadaeni unai tau ese Keriso ena mauri dalana hegeregerena do ia noho be namo.”—1 IOANE 2:6.
1, 2. Iseda matana ita negea lao Iesu dekenai ena anina be dahaka?
APOSETOLO Paulo ia gwau: “Iseda vairana dekenai ia noho heau helulu, be mai haheauka danu do ita heau goada. Iseda matana be Iesu [“Hakaua Tauna Badana,” NW ] dekenai do ita negea lao.” (Heberu 12:1, 2) Kamonai karana ita badinaia ena anina be iseda matana be Iesu Keriso dekenai do ita negea lao.
2 Keristani Greek Revarevadia lalonai idia gaukaralaia herevana “iseda matana be Iesu dekenai ita negea lao,” ena anina be “gau momo ia raraia lasi, to gau tamona sibona ia raraia noho.” Buka ta ia gwau: “Steidiam dekenai, Greek heau helulu tauna be heau dalana bona ena dokona ia raraia lasi, to ia giroa bona hutuma ia itaia, ia be do ia heau goada lasi. Keristani tauna be unai bamona danu.” Iseda matana idia veria gaudia ese iseda tubu lauma dalana ai ia koua diba. Iesu Keriso dekenai iseda matana ita negea lao be gau badana. Bona Hakaua Tauna Badana amo dahaka ita tahua? Greek herevana “hakaua tauna badana” ena anina be “gau ibounai ia hakaua tauna bona ia be haheitalai namona ia hahedinaraia.” Iseda matana ita negea lao Iesu dekenai ena anina be ena haheitalai ita badinaia.
3, 4. (a) Iesu Keriso hegeregerena ita raka ena anina be dahaka do ita karaia? (b) Edena henanadai ita laloa be namo?
3 Baibel ia gwau: “Bema tau ta ia hereva, ia gwau, ‘Lau be Dirava ena lalona dekenai lau noho,’ vadaeni unai tau ese Keriso ena mauri dalana hegeregerena do ia noho be namo.” (1 Ioane 2:6) Iesu ese ena Tamana ena hahegani ia badinaia hegeregerena, ita danu Iesu ena hahegani ita badinaia be namo. Unai amo ita be Dirava ena lalona dekenai ita noho.—Ioane 15:10.
4 Unai dainai, Iesu hegeregerena ita raka ena anina be ia be iseda Hakaua Tauna Badana bona ena aena gabudia dekenai do ita raka. Unai dainai mai anina bada henanadai ita laloa be inai: Hari inai negai, Keriso ese edena dala ai ita ia hakaua? Edena dala ai iena raka dalana ita tohotohoa ese ita ia durua diba? Iesu ese ia hahedinaraia dalana ita badinaia ena namo be dahaka?
Keriso ese Ena Murinai Idia Raka Taudia Ia Hakaua Dalana
5. Iesu be guba dekenai ia do daekau lasi neganai, ena murinai idia raka taudia dekenai dahaka gwauhamata ia henia?
5 Iesu Keriso ia toreisi lou bona guba dekenai ia do daekau lasi neganai, ena hahediba taudia dekenai ia hedinarai bona mai anina bada gaukara ta ia henidia. Ia gwau: “Unai dainai do umui lao, bese ibounai be diba tahua taudia do umui halaoa.” Unai negai edia Hakaua Tauna Badana be idia ia gwauhamata henia danu, idia ida do ia noho ela bona edia gaukara idia hagugurua, ia gwau: “Umui kamonai bona laloa noho, lau be hanaihanai umui danu ita noho ela bona tanobada dokona.” (Mataio 28:19, 20) Hari tanobada ena dokona ai, edena dala ai Iesu Keriso be ena murinai idia raka taudia ida ia noho?
6, 7. Edena dala ai Iesu ese lauma helaga amo ita ia gunalaia?
6 Iesu ia gwau: “Durua Tauna, Lauma Helaga be unai, Tamana ese lauegu gabuna abia totona do ia siaia. Ia ese gau ibounai do ia hadibaia umui dekenai. Hereva ibounai lau henia vadaeni umui dekenai, be ia ese umui emui lalona dekenai do ia hedinaraia lou.” (Ioane 14:26) Iesu ena ladanai ita abia lauma helaga ese hari inai negai ita ia hakaua bona ia hagoadaia. Lauma helaga ese ita ia durua lauma gaudia bona “Dirava ena laloa dobu gaudia” ita lalopararalaia totona. (1 Korinto 2:10) Danu, inai kara namodia “lalokau, moale, maino, haheauka, bogahisihisi, kara maoromaoro, abidadama momokani kara, manau, tauanina ena ura koua karana,” be lauma helaga ese ia havaraia karadia. (Galatia 5:22, 23) Lauma helaga ena heduru amo, inai kara namodia ita hahedinaraia diba.
7 Baibel ita stadilaia bona ita dibaia gaudia ita badinaia totona ita hekwarahi neganai, Iehova ena lauma helaga ese ita do ia durua aonega, laloa kehoa, laloparara, diba, hahemaoro karadia ita habadaia totona. (Aonega Herevadia 2:1-11) Lauma helaga ese ita ia durua danu hahetoho ita haheaukalaia totona. (1 Korinto 10:13; 2 Korinto 4:7; Filipi 4:13) Baibel ese Keristani taudia ia sisiba henia ‘tauanina bona lauma hamiroa karadia ibounai do idia hadokoa, bona edia mauri idia hagoevaia’ totona. (2 Korinto 7:1) Bema lauma helaga ena heduru ita abia lasi, ita be Dirava ena taravatu, helaga karadia dekenai ita badinaia diba, a? Iehova Dirava ese ena Natuna dekenai lauma helaga ia henia, bona hari inai negai, Iesu ese unai ia gaukaralaia ita ia hakaua totona.—Mataio 28:18.
8, 9. Edena dala ai Keriso ese “hesiai tauna mai ena kamonai, bona mai ena kara maoromaoro” ia gaukaralaia ita ia gunalaia totona?
8 Hari inai negai, Keriso ese kongrigeisen ia gunalaia dalana ta mani ita laloa. Iesu be ena giroa mai bona nega dokona ena toana ia herevalaia neganai, ia gwau: “Hesiai tauna mai ena kamonai, bona mai ena kara maoromaoro, iena biaguna ese ia abia hidi, iena ruma do ia naria, bona biaguna ena natuna edia aniani neganai edia aniani do ia henia, tauna be daika? Iena biaguna do ia mai neganai do ia davaria, unai bamona ia karaia noho tauna be ia namo. Umui lau hamaoroa momokani, iena kohu ibounai naria tauna iena biaguna ese do ia halaoa.”—Mataio 24:3, 45-47.
9 Unai “biaguna” be Iesu Keriso. “Hesiai tauna” be tanobada ai idia noho horoa Keristani oreana. Unai hesiai tauna oreana ese Iesu ena tanobada gaudia idia naria bona lauma aniani be nega korikori ai idia henia. Unai hesiai tauna oreana amo tadikaka haida idia abia hidi Hakaua Oreana lalonai idia gaukara totona. Bona unai hakaua oreana be hesiai tauna oreana ena gwaukau tauna. Idia ese tanobada ibounai haroro gaukarana idia hakaua bona lauma aniani be nega korikori ai idia henia noho. Unai dala amo, Keriso be lauma ese ia horoa “hesiai tauna mai ena kamonai, bona mai ena kara maoromaoro” bona ena hakaua oreana amo kongrigeisen ia hakaua noho.
10. Elda taudia be edena bamona ita lalodia be namo, bona dahaka dainai?
10 Keriso ese ita ia hakaua dalana ma ta be “harihari gaudia” amo—idia be Keristani elda taudia. Idia ese ‘Dirava ena taudia ibounai do idia durua. Idia be Dirava ena hesiai gaukara do idia karaia namonamo, Keriso ena tauanina do ia gini goada totona.’ (Efeso 4:8, 11, 12) Heberu 13:7 ese idia ia gwauraia: “Umui emui hakaua taudia gunadia do umui laloatao. Idia ese Dirava ena hereva umui dekenai idia hadibaia. Edia mauri dalana do umui laloa lou, bona edia abidadama kara hegeregerena do umui badinaia.” Elda taudia ese kongrigeisen idia hakaua. Iesu Keriso idia tohotohoa dainai, edia abidadama ita tohotohoa be namo. (1 Korinto 11:1) Ita hahedinaraia elda taudia ita laloa bada, bema unai “harihari gaudia” ita kamonai henia bona ita matauraia.—Heberu 13:17.
11. Hari inai negai, Keriso ese edena dala ai ena murinai idia raka taudia ia gunalaia, bona Iesu hegeregerena ita raka totona dahaka ita karaia be namo?
11 Oibe, hari inai negai Iesu Keriso be ena lauma helaga, “hesiai tauna mai ena kamonai, bona mai ena kara maoromaoro,” bona kongrigeisen elda taudia amo ia murinai idia raka taudia ia gunalaia. Keriso hegeregerena ita raka totona, namona be ita ia gunalaia dalana ita lalopararalaia bona ita abia dae. Ena anina ma ta danu be iena raka dalana do ita tohotohoa. Aposetolo Petero ia gwau: “Dirava ese umui ia boiria, unai bamona do umui hisihisi totona. Badina be Keriso ese umui dainai hisihisi ia abia. Vadaeni iena kara toana umui dekenai ia hedinaraia, iena murinai do umui raka totona. Iena aena gabudia dekenai do umui raka.” (1 Petero 2:21) Iesu ena haheitalai goevadaena ita tohotohoa neganai, edena dala ai ita ia durua?
Siahu Oi Gaukaralaia Neganai Lalomanada Hahedinaraia
12. Keriso ena haheitalai amo edena kara be kongrigeisen elda taudia ese idia hahedinaraia be gau badana?
12 Ena be Iesu ese ena tamana amo siahu bada ia abia, to mai lalomanada ida ia gaukaralaia. Kongrigeisen taudia ibounai—to momokani elda taudia—be “manau bona manada kara taunimanima ibounai” dekenai idia hahedinaraia be namo. (Filipi 4:5; 1 Timoteo 3:2, 3) Kongrigeisen lalonai elda taudia be mai edia siahu dainai, Keriso ena aena gabudia dekenai idia raka be gau badana.
13, 14. Elda taudia be ma haida idia durua Dirava idia hesiai henia neganai, edena dala ai Keriso ena kara idia tohotohoa diba?
13 Iesu be ena hahediba taudia edia goada ena hetoana ia laloa danu. Iesu be idia amo gau momo ia noia lasi. (Ioane 16:12) Iesu ese ia murinai idia raka taudia ia doria lasi, to ia hagoadaia Dirava ena ura idia karaia totona do ‘idia raka goada.’ (Luka 13:24) Unai ia karaia dalana be idia ia hakaua bona edia kudouna ia hamarerea. Unai hegeregerena, hari Keristani elda taudia ese haida idia doria bena hemarai dainai Iehova idia hesiai henia lasi. Lasi, to idia durua namona be idia ese Iehova, Iesu bona edia dekena taudia idia lalokau henia dainai, Iehova idia hesiai henia.—Mataio 22:37-39.
14 Iesu be ia abia siahuna ia gaukaralaia lasi taunimanima ia biagua totona. Taravatu aukadia eiava taravatu momo ia atoa lasi. Ena hadibaia dalana amo ma haida edia lalona ia veria totona, Mose ena taravatu ena hakaua herevadia ia gaukaralaia. (Mataio 5:27, 28) Elda taudia be Iesu Keriso idia tohotohoa dainai, edia ura hegeregerena taravatu maragimaragi idia atoa lasi eiava sibona edia lalohadai idia laloa bada lasi. Dabua eiava tauanina ena toana eiava moale karadia dekenai, elda taudia be tadikaka edia kudouna idia hamarerea totona, Dirava ena hakaua herevadia Mika 6:8; 1 Korinto 10:31-33; bona 1 Timoteo 2:9, 10 ai idia gaukaralaia.
Ita Hebogahisi Bona Dika Ita Gwauatao
15. Iesu ena hahediba taudia idia kerere neganai, Iesu be dahaka ia karaia?
15 Keriso ena hahediba taudia idia kerere neganai, ia kara henia daladia amo diba ita abia diba. Iesu ena hanuaboi ginigabena ai, idia vara gaudia rua mani ita laloa. Getesemane umana dekenai idia ginidae murinai, Iesu ese “Petero bona Iamesi bona Ioane ia hakaua lao” bona idia ia hamaoroa do “idia naria noho.” Bena “ia raka lao sisina, tano dekenai ia moru diho, ia guriguri.” Ia giroa mai neganai, “ia davaria, idia mahuta noho.” Iesu be dahaka ia karaia? Ia gwau: “Lauma ia ura goada, to tauanina ia manokamanoka.” (Mareko 14:32-38) Petero, Iamesi bona Ioane ia gwau henia lasi, to idia ia hebogahisi henia! Unai hanuaboi tamona ai, Petero be nega toi Iesu ia gorea. (Mareko 14:66-72) Unai murinai, Iesu ese Petero be edena bamona ia kara henia? “Momokani, Lohiabada be ia toreisi vadaeni! Simona [Petero] ese ia itaia vadaeni!” (Luka 24:34) Baibel ia gwau: “Petero ese ia itaia, unai murinai aposetolo taudia 12 ese idia itaia.” (1 Korinto 15:5) Iesu be ia badu noho lasi, to Petero ia helalo-kerehai dainai ena dika ia gwauatao bona ia hagoadaia. Gabeai, Iesu ese Petero dekenai maduna badadia ia henia.—Kara 2:14; 8:14-17; 10:44, 45.
16. Iseda tadikaka edia hereva eiava kara ta ese ita ia hahisia neganai, edena bamona Iesu ena kara ita tohotohoa diba?
16 Iseda tadikaka be kara dika taudia dainai edia hereva eiava kara ta ese ita ia hahisia neganai, Iesu bamona ita hebogahisi bona edia kerere ita gwauatao be namo, a? Petero ese abidadama tamona taudia ia hagoadaia: “Umui ibounai mai lalona tamona danu do umui noho, umui ta ta dekenai durua do umui henia. Umui ta ta dekenai do umui lalokau henia, tadikaka bamona. Umui ta ta dekenai do umui bogahisihisi henia, do umui manau. Tau ta bema umui dekenai ia kara dika neganai, davana do umui henia lasi. Bema umui dekenai idia hereva dika neganai, umui ese hereva dika do umui henia lou lasi. Lasi, to hanamoa hereva do umui henia lou.” (1 Petero 3:8, 9) To bema tau ta be Iesu ena kara hegeregerena ita dekenai hebogahisi ia hahedinaraia lasi bona iseda dika ia gwauatao lasi, dahaka do ita karaia? Ena be unai ia vara, to ita be mai eda maduna Iesu ita tohotohoa totona, bona ia karaia hegeregerena ita karaia.—1 Ioane 3:16.
Basileia Ena Ura Atoa Guna
17. Dahaka ese ia hahedinaraia Iesu ese Dirava ena ura be ena mauri lalonai ia atoa guna?
17 Dala ma ta ai Iesu Keriso hegeregerena ita raka be namo. Iesu ena mauri lalonai Dirava ena Basileia harorolaia gaukarana be mai anina bada. Iesu be Samaria dekenai Sukara hanua badinai Samaria hahinena ia haroro henia murinai, ena hahediba taudia ia hamaoroa: “Egu aniani be inai: Lau ia siaia Diravana ena ura do lau karaia, iena gaukara do lau karaia haorea momokani.” (Ioane 4:34) Iesu be ena Tamana ena ura ia karaia dainai, goada ia abia; ia be aniani bamona Iesu ia hagoadaia bona ia hamoalea. Dirava ena ura ita karaia karana ita laloa bada amo Iesu ita tohotohoa be mauri dalana namona.
18. Haida be edia natudia idia hagoadaia ful-taim hesiai gaukara idia karaia totona, dahaka hahenamo idia davaria?
18 Tama sina bona edia natudia be hahenamo momo do idia abia bema edia natudia idia hagoadaia ful-taim hesiai gaukara idia karaia totona. Tadikaka ta be ena hekapa natudia memero idia do maragi neganai, ia hagoadaia painia gaukara idia karaia totona. Unai hekapa be edia sikuli idia haorea murinai, painia taudia ai idia lao. Edia tamana be ia moale bada bona ia gwau: “Aiemai natudia memero be ai idia hahisia lasi. Bona mai moale ida ai gwau diba, ‘Natudia be Dirava ena harihari gauna ita dekenai.’ ” (Salamo 127:3) Bona natudia be ful-taim hesiai gaukara idia karaia neganai, edena dala ai namo do idia davaria? Sina ta, mai ena natudia faiv ia gwau: “Painia gaukara ese lauegu natudia ia durua Iehova idia tura henia namonamo, sibona edia stadi karana idia hanamoa, edia nega idia gaukaralaia namonamo, bona lauma gaudia be edia mauri lalonai idia atoa guna totona. Ena be idia ibounai ese gau momo idia haidaua, to idia ta be ia abia hidi dalana dekenai ia lalohisihisi lasi.”
19. Matamata taudia be mai aonega ida vaira negana totona, dahaka palani idia karaia diba?
19 Matamata taudia e, vaira negana totona emui palani be dahaka? Oi ura moni gaukara namona ta do oi abia, a? Eiava ful-taim hesiai gaukara karaia totona oi hegaegae noho? Aposetolo Paulo ia gwau: “Umui emui kara do umui naria namonamo. Aonega taudia bamona do umui noho, kavakava taudia bamona lasi. Harihari emui nega namona ia noho Dirava ena kara do umui karaia totona. Emui nega do umui haorea kava lasi, badina hari nega be nega dikana.” Ma ia gwau: “Unai dainai do umui kavakava lasi, to Lohiabada ena ura gaudia sibona do umui tahua.”—Efeso 5:15-17.
Mai Kamonai Ida
20, 21. Iesu be edena dala ai kamonai karana ia hahedinaraia, bona ena kara be edena bamona ita tohotohoa diba?
20 Iesu hegeregerena ita raka totona, ena kamonai karana ita tohotohoa be namo. Baibel ese Iesu ena kamonai karana ia herevalaia: “Oibe, Keriso be Dirava danu ia hegeregere, to ia laloa lasi unai bamona do ia noho, ia sibona do ia dogoatao gauna. Lasi, to ia ese sibona ena ura dainai, iena dagi badana ia negea, bona hesiai tauna momokani ia lao. Ia be taunimanima hegeregerena ia vara, bona taunimanima edia toana ia abia. Oibe, Keriso ese iena hairai ia laloa lasi, to ia manau momokani. Bona ia ese Dirava ia kamonai henia ela bona ia mase, oibe, satauro dekenai ia mase.” Iesu be mai ena kamonai ida Iehova ena ura ia karaia karana amo, ia ese Dirava ena lohia siahuna ia abia isi. Dirava ia kamonai henia ela bona mai hisihisi bada ida satauro dekenai ia mase. Namona be ita be “Keriso ena laloa bamona ita laloa” bona mai kamonai ida Dirava ena ura ita karaia.—Filipi 2:5-8.
21 Iesu ese ena aposetolo taudia dekenai badinaia karana ia hahedinaraia. Ena be idia be mai edia kara dika bona idia goevadae lasi, to Iesu ese idia ia lalokau henia “ia lao bona dokona.” (Ioane 13:1) Unai hegeregerena, namo lasi iseda tadikaka edia kara dika dainai idia ita gwauraia dika.
Iesu Ia Hahedinaraia Dalana Badinaia
22, 23. Iesu ia hahedinaraia dalana ita badinaia neganai, dahaka hahenamo do ita davaria?
22 Oibe, ita be goevadae lasi taudia dainai, iseda Haheitalai Tauna goevadaena ena aena gabudia ita badinaia namonamo diba lasi. To, namona be ita hekwarahi ena aena gabudia ita badinaia totona. Unai bamona ita karaia totona, namona be Keriso ena hakaua dalana bona ia hahedinaraia dalana ita lalopararalaia bona ita badinaia.
23 Keriso ita tohotohoa neganai, hahenamo momo do ita abia. Iseda mauri be mai anina bada gauna ai do ia lao bona do ia namo, badina ita sibona iseda ura ita karaia lasi, to Dirava ena ura ita karaia. (Ioane 5:30; 6:38) Lalomamina namona ita abia. Iseda raka dalana amo haheitalai namona ita hahedinaraia diba. Iesu ese tauanina manoka bona gaukara metau idia karaia taudia ia boiria ia dekenai idia mai totona, bona laga-ani do idia davaria. (Mataio 11:28-30) Iesu ena haheitalai ita badinaia neganai, iseda hebamo karana amo ma haida ita hagoadaia diba. Vadaeni namona be Iesu hegeregerena ita raka.
Oi Laloatao, A?
• Hari inai negai, edena dala ai Keriso ese ena murinai idia raka taudia ia gunalaia?
• Edena dala ai elda taudia be Dirava ese ia henia maduna totona Keriso ena hakaua dalana idia tohotohoa diba?
• Ma haida idia kerere neganai, edena dala ai Iesu ena haheitalai ita badinaia diba?
• Edena dala ai matamata taudia ese Basileia ena ura idia atoa guna diba?
[Picture on page 13]
Keristani elda taudia ese ita idia durua Keriso ena gunalaia dalana ita badinaia totona
[Pictures on page 14, 15]
Matamata taudia e, dahaka palani umui karaia vadaeni Keristani mauri namona umui abia totona?