Karoa 29

Kwalimu Ane Matamatana Idia Abia

Matahanai 9​—⁠Apokalupo 14:​1-​20

Anina: Siona Ororona latanai 144,000 taudia be Mamoe ena Natuna danu idia gini hebou; aneru edia hereva be tanobada ibounai dekenai idia lao; taunimanima idia gogodia

Hagugurua negana: Lagani 1914 amo ia lao hisihisi bada herea negana

IOANE ena matahanai ma ta ita laloa neganai, ita moale! Ia be huala ena dagedage oreadia amo ia idau momokani. Iehova ena kamonai hesiai taudia bona edia kara Lohiabada ena dina lalonai ita itaia. (Apokalupo 1:10) Apokalupo 7:​1, 3 lalonai ita itaia vadaeni, aneru 4 ese lai 4 edia toa dalana idia koua ela bona horoa taudia 144,000 iboudiai ese maka be edia baguna ai idia abia. Apokalupo 12:17 lalonai ia hahedinaraia, unai nega lalonai Satana, huala, ese “hahine ena natuna oredia” ia dagedage henidia bada. Bona Apokalupo karoa 13 lalonai, Satana be tanobada dekenai ia havaraia politikol oreadia idia hedinarai goevagoeva. Unai orea ia havaraia, Iehova ena kamonai hesiai taudia ia hahekwarahia bona ia dagedage henidia bada totona. To unai inai tauna badana ese Dirava ena ura ia koua diba lasi! Do ita itaia, ena be Satana ia kara dika henidia, to Dirava ese 144,000 taudia iboudiai ia gogodia, mai ena kwalimu ida.

² Matahanai amo, Ioane, bona hari inai negai idia noho Ioane oreana taudia danu, ese unai moale negana idia itaia: “Ma lau itaia, Mamoe ena Natuna be Siona ororo dekenai ia gini. Ia danu be taunimanima 144,000 idia gini, iena ladana, bona iena Tamana ena ladana be edia baguna dekenai Dirava ese ia torea.” (Apokalupo 14:⁠1) Ita diba vadaeni, Mamoe ena Natuna be Mikael, Diabolo bona ena demoni be guba amo ia kokia tauna unai. Daniel ia gwau, unai tau Mikael be “[Dirava ena] bese taudia totona ia gini,” bona ia hegaegae, do ia “toreisi,” Iehova ena hahemaoro maoromaoro karaia totona. (Daniela 12:1; Apokalupo 12:​7, 9) Lagani 1914 amo, sibona ena mauri ia atoa diho tauna, Dirava ena Mamoe Natuna unai, be Siona Ororona dekenai ia gini, ia be Mesia Pavapavana.

³ Unai be Iehova ena peroveta hereva ta hegeregerena, “Lau, Lau inai, ese lauegu pavapava Siona dekenai lau haginia vadaeni, lauegu ororo helagana dekenai.” (Salamo 2:6; 110:⁠2) Tanobada Siona Ororona be tanobada hanuana Ierusalem ena gabu, bona idaunegai ia be David besena pavapavadia edia lohia hanuana. To unai hereva ese unai tanobada hanuana ia gwauraia lasi. (1 Sivarai 11:​4-7; 2 Sivarai 5:⁠2) Lasi, badina lagani 33 C.E. ai Iesu ia mase bona ia toreisi lou murinai, ia be guba Siona Ororona ena nadi badana ai ia lao. Iehova ena ura hegeregerena, unai guba Siona Ororona be “mauri Diravana ena hanua ta, guba Ierusalem,” lalonai ia noho. Unai dainai, “Siona Ororona” ena anina be Iesu bona ena tadikaka, edia dagi badana. Idia be guba Ierusalem eiava Basileia. (Heberu 12:​22, 28, NW; Efeso 3:⁠6) Iehova be Lohiabada ena dina lalonai unai pavapava dagi mai hairaina ia henidia. Lagani handred momo lalodiai, horoa Keristen taudia, “mauri nadidia” bamona, be mai edia ura dikadika danu idia naria ela bona unai guba Siona Ororona latanai hairai tauna Lohiabada Iesu Keriso ena Basileia hereadaena lalonai idia gini hebou.​—⁠1 Petero 2:​4-6; Luka 22:​28-​30; Ioane 14:​2, 3.

⁴ Ioane ia itaia, Iesu sibona lasi, to guba Basileia do idia abia taudia 144,000 danu be Siona Ororona latanai idia gini. Matahanai lalonai ia hedinarai negana ai, 144,000 taudia momo, to idia iboudiai lasi, be guba dekenai idia daekau vadaeni. Gabeai unai matahanai lalonai, Ioane ia davaria unai helaga taudia haida idia haheauka noho bona idia gini goada ela bona mase be gau badana. (Apokalupo 14:​12, 13) Unai dainai, toana be unai 144,000 taudia haida be tanobada dekenai idia do noho. Bema unai bamona, dahaka dainai Ioane ese 144,000 taudia iboudiai Siona Ororona dekenai Iesu ida idia gini ia itaia?a Badina be idia be horoa Keristen kongregesen lalonai idia noho dainai, “Siona Ororona ta bona mauri Diravana ena hanua ta, guba Ierusalem kahirakahira dekenai idia mai vadaeni.” (Heberu 12:​22, NW ) Paulo be tanobada dekenai ia do noho negana hegeregerena​—⁠lauma dalanai​—⁠idia daekau vadaeni, idia be Iesu ida guba dekenai idia noho hebou totona. (Efeso 2:​5, 6) Danu, lagani 1919 ai, inai boiboi idia kamonai: “Umui daekau mai iniseni.” Bena, laulau dalana ai, “ori ta lalonai guba dekenai idia daekau.” (Apokalupo 11:12) Unai siri dainai, ita lalo-parara 144,000 taudia iboudiai be​—⁠lauma dalanai​—⁠Iesu Keriso ida Siona Ororona dekenai idia gini.

⁵ Dagedage gauna idia tomadiho henia taudia be unai laulau namba 666 ena maka idia abia, bona 144,000 taudia be idia amo idia gini siri. (Apokalupo 13:​15-​18) Unai abidadama taudia be idau. Edia baguna ai Dirava ena ladana bona Mamoe ena Natuna ena ladana idia torea. Momokani, Iuda tauna Ioane ese Dirava ena ladana ia itaia neganai, inai Heberu leta יהוה ia itaia.b Iesu ena Tamana ena ladana be edia baguna ai idia torea dainai, unai maka abia taudia idia gwauraia hedinarai idia be Iehova ena witness taudia, Iena hesiai taudia unai. (Apokalupo 3:12) Iesu ena ladana be edia baguna ai idia torea dainai, ia hahedinaraia danu idia lalo-parara idia be Iesu ena. Ia be edia “adavana” ai ia lao bona idia be iena ‘maoheni kekenina’ ai idia lao, “gau matamatana” ta bamona, Dirava ena hesiai gaukara idia karaia, bona edia helaro be guba dekenai do idia lao. (Efeso 5:​22-​24; Apokalupo 21:​2, 9; 2 Korinto 5:​17, NW ) Iehova bona Iesu Keriso ida idia hetura namonamo dainai edia lalohadai bona edia kara ibounai ia haidaua.

Ane Matamatana Idia Abia

⁶ Unai hegeregerena, Ioane ia gwau: “Vadaeni guba dekena amo gado ta lau kamonai. Inai gado be sinavai momo idia aru haraga ena regena bamona, bona guba ena boiboi bada bamona. Unai gado danu be gita taudia momo edia gita idia gadara nega tamona bamona. Inai taunimanima 144,000 ese ane matamatana idia abia, Dirava ena helai gabuna badana vairanai, bona mauri gaudia 4, bona badana taudia [elda taudia] edia vairanai. Unai ane be tau ta ia davaria diba lasi, unai taunimanima 144,000 sibona. Dirava ese unai taudia tanobada dekena amo ia hamauria.” (Apokalupo 14:​2, 3) Ioane ese 144,000 taudia edia ane namona ia kamonaia neganai, ia laloa edia gado regena be sinavai momo idia aru haraga edia rege bamona, bona guba ena boiboi momo bamona. Miusik be gita ena miusik namo hereana bamona! (Salamo 81:⁠2) Tanobada dekenai ane abia oreana ta lasi ese unai guba ane ena hairai idia tohotohoa diba.

⁷ Bona unai “ane matamatana” be dahaka? Apokalupo 5:​9, 10 ena hereva ita tahua neganai, ita davaria vadaeni unai ane lalonai Iehova ena Basileia gwauhamatadia idia gwauraia, bona idia hahedinaraia Iesu Keriso amo dala ia karaia lauma Israel be ‘basileia ta bona Dirava ena hahelaga taudia’ ai ia halaodia totona. Unai ane amo Iehova idia hanamoa bona Dirava ena Israel edia amo bona Dirava ena Israel totona ia karaia gaudia matamatadia idia gwauraia hedinarai. (Galatia 6:16) Unai lauma Israel taudia be salamo torea tauna ena boiboi idia badinaia, ia gwau: “Taunimanima e, Iehova umui hanamoa! Iehova dainai ane matamata umui abia, abidadama taudia edia ekalesia lalonai umui hanamoa. Idia ia karaia Tauna dainai Israel ia moale be namo, Siona ena natudia​—⁠edia Pavapava dainai idia moale be namo.” (Salamo 149:​1, 2) Momokani, unai hereva be lagani handred momo gunanai idia torea, to iseda nega lalonai, unai ane idia abia neganai, unai hereva edia anina be idau. Lagani 1914 ai, Mesia ena Basileia idia haginia. (Apokalupo 12:10) Lagani 1919 ai, Iehova ena orea taudia tanobada dekenai ese “Basileia ena sivarai” idia harorolaia, mai edia lalo-goada ida. (Mataio 13:19) Lagani 1919 ena siri badana (Isaia 54:17) dainai, bona idia be lauma paradaisona dekenai idia giroa lou dainai, idia lalo-goada, bona unai lagani lalonai ‘ane idia abia matamaia, bona Lohiabada idia hanamoa edia kudouna lalonai.’​—⁠Efeso 5:⁠19.

⁸ To, dahaka dainai Apokalupo 14:3 dekenai, 144,000 taudia sibona be unai ane idia diba? Badina Dirava ena Basileia idia abia totona ia abia hidi taudia ese idia davaria gaudia be unai ane lalonai idia hedinarai. Dirava ese unai taudia sibona ia abia dae iena natuna bamona bona idia sibona ia horoa ena lauma helaga amo. Idia sibona be tanobada amo ia abia, unai guba Basileia lalonai do idia vareai totona, bona idia sibona be “boubou helaga karaia taudia” ai do idia lao, bona lagani 1,000 lalonai Iesu Keriso danu “do idia lohia,” taunimanima be mauri goevadaena dekenai do idia hakaudia lao totona. Ita itaia, idia sibona ese “ane matamatana idia abia” Iehova ena vairanai.c Idia sibona ese unai gau idaudia idia davaria dainai, bona unai helaro idauna be idia sibona idia abia dainai, Basileia idia laloa bada herea, bona ane lalonai idia gwauraia dalana be ma tau ta lasi ia tohotohoa diba.​—⁠Apokalupo 20:6; Kolose 1:13; 1 Tesalonika 2:​11, 12.

⁹ To, ma taunimanima haida be unai ane dekenai idia kamonai bona kara idia karaia. Lagani 1935 amo, mamoe idaudia hutuma bada herea ese unai kwalimu ane idia kamonai bona unai ese ia doridia, ane abia taudia ida Dirava ena Basileia idia harorolaia hebou totona. (Ioane 10:16; Apokalupo 7:⁠9) Momokani, unai kamonai matamata taudia be unai ane abia dalana idia tohotohoa namonamo diba lasi. Edia ane be gabeai Dirava ena Basileia lalonai do idia lohia taudia edia ane amo ia idau. To idia danu ese ane namona idia abia hebou, Iehova ena ladana idia abia isi totona, anina be edia ane badana amo Iehova idia hanamoa, gau matamatadia ia karaia dainai. Unai dala amo salamo torea tauna ena hereva idia hagugurua, ia gwau: “Iehova dekenai ane matamatana abia. Tanobada taudia iboudiai e, Iehova dekenai ane umui abia. Iehova dekenai ane abia, iena ladana hanamoa. Dina ta ta iboudiai ia amo ia mai hahemauri sivaraina harorolaia. Bese iboudiai lalonai iena hairai umui harorolaia, taunimanima iboudiai dekenai iena hoa karadia harorolaia. Tanobada besedia e, Iehova ena hairai bona goada harorolaia. Bese bogaragidiai umui gwau: ‘Iehova be pavapava ai ia lao vadaeni.’ ”​—⁠Salamo 96:​1-3, 7, 10; 98:​1-9.

¹⁰ Unai 144,000 taudia be edena bamona elda taudia “edia vairanai” ane idia abia diba, badina elda taudia 24 be 144,000 taudia, bona guba hairaina dekenai idia noho? Lohiabada ena dina ena matamana dekenai, “Iesu idia abidadama henia taudia, bona mase dekenai idia mahuta vadaeni taudia” be lauma tauanina dekenai idia toreisi lou. Unai dainai, idia kwalimu vadaeni kamonai horoa Keristen taudia be guba dekenai idia noho hari, bona laulau dalanai edia gaukara be hahelaga elda taudia edia orea 24 edia gaukara bamona. Matahanai lalonai idia be Iehova ena guba oreana lalonai. (1 Tesalonika 4:​15, 16; 1 Sivarai 24:​1-​18; Apokalupo 4:4; 6:11) Unai dainai, 144,000 taudia edia orena taudia tanobada dekenai ese unai ane matamatana idia abia neganai, edia toreisi lou tadikakadia edia vairanai idia gini.

¹¹ Reana hari ita henanadai: Dahaka dainai unai horoa kwalimu taudia be elda taudia 24 bona 144,000 taudia idia gwauraidia? Badina be Apokalupo bukana lalonai, unai orea be dala rua amo ia gwauraia. Elda taudia 24 be edia gini gabuna dekenai idia hedinarai, idia be Iehova ena terona kahirakahira dekenai idia gini. Idia be pavapava bona hahelaga taudia guba dekenai. Ena be hari inai negai, 144,000 taudia edia orena taudia haida be tanobada dekenai idia do noho, to elda taudia 24 ese 144,000 taudia iboudiai guba dekenai idia laulaulaia. (Apokalupo 4:​4, 10; 5:​5-​14; 7:​11-​13; 11:​16-​18) To, Apokalupo karoa 7 lalonai ia hahedinaraia 144,000 be tanobada taudia amo idia mai, bona ia hahedinaraia goevagoeva, Iehova ia ura lauma Israel taudia iboudiai edia baguna dekenai ena maka do ia atoa, bona ita duahia diba lasi hutuma bada herea taudia dekenai hahemauri do ia henia. Apokalupo karoa 14 lalonai ia hahedinaraia, Basileia oreana taudia iboudiai, kwalimu taudia 144,000 iboudiai be Mamoe ena Natuna danu Siona Ororona dekenai do idia hebou. Hari do ita itaia, Baibel ia hahedinaraia edena bamona taudia idia hegeregere, 144,000 taudia edia orea lalonai idia vareai totona.d

Mamoe Ena Natuna Murinai Idia Raka

¹² Ioane ese unai 144,000 taudia, “Dirava ese . . . tanobada dekena amo ia hamauria” taudia, ia herevalaidia noho, ia gwau: “Inai taudia be hahine danu idia sihari lasi momokani. Idia be helaga bona goevagoeva. Idia ese Mamoe ena Natuna murinai idia raka, iena loaloa gabudia ibounai. Taunimanima ibounai edia huanai dekena amo Dirava ese idia ia hoia vadaeni. Bona idia be taunimanima ginigunadia Dirava bona Mamoe ena Natuna ese idia abia, edia. Koikoi hereva nega ta idia gwauraia lasi, idia be kerere lasi momokani.” (Apokalupo 14:​4, 5) Unai 144,000 taudia “be hahine danu idia sihari lasi momokani.” Ita gwau diba lasi, unai hereva ena anina be tanobada dekenai idia noho neganai idia headava lasi. Lasi. Aposetolo Paulo be guba dekenai do idia lao Keristen taudia dekenai revareva ia torea, ia gwau, ena be headava lasi maurina be mai ena namo, to nega haida Keristen taudia idia headava be namo. (1 Korinto 7:​1, 2, 36, 37) Unai orea ena kara badana be lauma dalana ai idia be rami-hebou kekenina bamona. Tanobada ena politikol oreadia ida bona tomadiho koikoi ida lauma dalanai idia sihari kava lasi. (Iamesi 4:4; Apokalupo 17:⁠5) Idia be Keriso ena maoheni kekenina bamona dainai, idia kara goeva, ‘idia be kerere ta lasi . . . tanobada taudia mai edia dika bona mai edia kerere bada danu edia huanai idia noho.’​—⁠Filipi 2:⁠15.

¹³ Danu, “koikoi hereva nega ta idia gwauraia lasi.” Unai dala amo idia be edia King, Iesu Keriso, bamona. Ia be tau goevadaena neganai, “kara dika ta ia karaia lasi. Bona iena uduna dekena amo hereva koikoi ta ia gwauraia lasi.” (1 Petero 2:​21, 22) Idia be kerere lasi bona idia be hereva momokani taudia dainai, 144,000 taudia be Iehova ena Hahelaga Tauna Badana ena headava matamata kekenina goevana bamona idia hegaegae. Iesu be tanobada dekenai ia noho neganai, kudou-maoro taudia iboudiai ia boiridia, idia be iena murinai do idia raka totona. (Mareko 8:34; 10:21; Ioane 1:43) Iesu ena boiboi idia abia dae taudia ese ena mauri dalana idia tohotohoa, bona ena hahediba herevadia idia badinaia. Unai dala amo, tanobada dekenai idia noho neganai, bona Mamoe ena Natuna be Satana ena tanobada lalonai ia hakaudia neganai, idia be “Mamoe ena Natuna murinai idia raka, iena loaloa gabudia ibounai.”

¹⁴ Dirava ese 144,000 taudia be “tanobada dekena amo ia hamauria.” “Taunimanima ibounai edia huanai dekena amo Dirava ese idia ia hoia vadaeni.” Dirava ese unai taudia ia abia dae, iena natudia bamona, bona idia toreisi lou murinai, idia be mai edia rara bona hidio taudia bamona idia noho lasi. Apok 14 Siri 4 lalonai ia hereva hegeregerena, idia be “taunimanima ginigunadia Dirava bona Mamoe ena Natuna ese idia abia, edia.” Momokani, Keristen taudia ginigunadia edia nega lalonai Iesu ese “toreisi lou taudia . . . ia gunalaia.” (1 Korinto 15:​20, 23) To goevadae lasi taudia ibounai edia huanai 144,000 taudia be ‘vara guna natudia.’ Iesu be ena boubou amo idia ia hoia. (Iamesi 1:18) To, Dirava be taunimanima amo ia gogodia taudia be idia sibona lasi. Apokalupo bukana lalonai ia hahedinaraia ita duahia diba lasi hutuma bada herea taudia idia boiboi badabada, idia gwau: “Taunimanima hamauria siahuna be iseda Dirava ena, helai gabu badana dekenai ia helai Diravana. Inai siahu be Mamoe ena Natuna ena danu.” Unai hutuma bada herea taudia be hisihisi bada hereana amo do idia roho mauri, bona “mauri ranuna, ia lohilohi gauna” idia inua noho neganai, taunimanima goevadaedia ai do idia lao tanobada dekenai. Hisihisi bada hereana ia ore murinai, mase taudia be Hade amo do idia kokia, bona ma taunimanima milion milion do idia toreisi lou bona unai mauri ranuna, ia lohilohi gauna amo, do idia inua danu. Unai hegeregerena, hutuma bada herea taudia be mauri idia abia mamoe idaudia ginigunadia ita gwauraidia be maoro​—⁠idia be ‘Mamoe ena Natuna ena rarana lalonai edia dabua idia huria’ taudia ginigunadia bona edia helaro be tanobada dekenai do idia mauri ela bona hanaihanai.​—⁠Apokalupo 7:​9, 10, 14, 17; 20:​12, 13.

¹⁵ Unai taunimanima ginigunadia oreadia toi (Iesu Keriso, 144,000 taudia, bona hutuma bada herea taudia) bona idaunegai Mose ena Taravatu henunai idia karaia ariadia be kara haida dekenai idia hegeregere. Nisan 16 dinana ai, Hatubua Lasi Paraoa ena Aria idia karaia neganai, bali utua negana ai, ia vara guna bali ena kahana ta be Iehova dekenai idia henia. (Levitiko 23:​6-​14) Nisan 16 be Iesu ena toreisi lou dinana. Dina namba 50 Nisan 16 murinai, hua ihatoina dekenai, Israel taudia ese mage uiti haboua ariana idia karaia. (Esodo 23:16; Levitiko 23:​15, 16) Gabeai, unai aria ena ladana idia hatoa Pentekoste (unai ladana be Greek gado herevana amo idia abia, ena anina be “namba 50”). Pentekoste 33 C.E. ai, Dirava ese 144,000 taudia ginigunadia be lauma helaga amo ia horoa. Bena, hua namba 7 lalonai, aniani ibounai idia gogoa neganai, Kalaga Ariana idia karaia. Unai neganai, Israel taudia ese Iehova idia tanikiu henia mai edia moale bada ida, bona dina 7 lalonai kalaga lalodiai idia mahuta. Unai kalaga be niu rigidia bona ma gau haida amo idia karaia. (Levitiko 23:​33-​43) Unai hegeregerena, haboua negana badana ai idia haboudia gaudia, hutuma bada herea taudia unai, ese Dirava idia tanikiu henia neganai, Dirava ena terona vairanai idia gini bona “niu rauna idia dogoatao.”​—⁠Apokalupo 7:⁠9.

Noho Hanaihanai Sivarai Namona Idia Gwauraia

¹⁶ Ioane be ma ia gwau: “Vadaeni aneru ma ta lau itaia, guba ena ataiai ia roho lao. Iena gaukara be, noho hanaihanai Sivarai Namona do ia gwauraia hedinarai. Taunimanima ibounai dekenai ia gwauraia, bese ibounai, iduhu ibounai, gado ibounai bona kopina idauidau ibounai taudia. Ia boiboi goadagoada, ia gwau, ‘Dirava do umui gari henia, ia do umui hanamoa bada, badina be Dirava ese taunimanima ibounai do ia kota henia ena nega ia ginidae vadaeni. Guba bona tanobada bona davara bona ranu guridia ibounai ia karaia Diravana do umui tomadiho henia.’ ” (Apokalupo 14:​6, 7) Unai aneru be “guba ena ataiai” ia roho, manu edia roho gabuna unai. (Apokalupo 19:17 itaia.) Unai dainai, ena gadona be tanobada ibounai dekenai idia kamonaia diba. Unai aneru ena haroro be gabu ibounai dekenai idia kamonai; televisen amo idia halasia sivaraidia be unai hegeregerena lasi!

¹⁷ Aneru ese taunimanima iboudiai ia hagoadadia, dagedage gauna bona ena laulau dekenai lasi, to Iehova dekenai idia gari totona. Iehova ena siahu be bada herea; Satana ese ia biagua dagedage gauna ena siahu ia hanaia momokani. Iehova ese guba bona tanobada ia karaia, bona hari nega ia ginidae ia ese tanobada do ia hahemaoro henia totona! (Genese 1:1; Apokalupo 11:18 itaia danu.) Iesu be tanobada dekenai ia noho neganai, hari iseda nega ia perovetalaia, ia gwau: “Basileia ena Sivarai Namona be tanobada ibounai dekenai do idia harorolaia. Vadaeni unai murinai dokona be do ia ginidae.” (Mataio 24:14) Horoa Keristen oreana ese unai hahegani idia badinaia noho. (1 Korinto 9:16; Efeso 6:15) Apokalupo bukana be unai siri amo ia hahedinaraia, aneru danu be haroro gaukarana lalonai idia vareai. Nega momo ia hedinarai, aneru ese Iehova ena Witness tauna ta be lalohisihisi tauna ena ruma dekenai ia hakaua lao, badina unai tau ia ura dikadika lauma dalana ai heduru ia abia, bona ia guriguri goadagoada dainai!

¹⁸ Guba ataiai ia roho lao aneruna ia hereva hegeregerena, Dirava ese taunimanima ibounai do ia kota henia ena nega ia ginidae vadaeni. Dirava ese dahaka hahemaoro do ia henia? Aneru iharuana, aneru ihatoina, aneru namba 4, bona aneru namba 5 edia hereva dainai, taunimanima edia taiana do idia hisihisi.​—⁠Ieremia 19:⁠3.

[Footnotes]

[Study Questions]

1. Apokalupo karoa 7, 12, bona 13 lalonai, dahaka ita davaria, bona dahaka do ita itaia?

2. Apokalupo 14:​1 lalonai Ioane ese dahaka moale negana ia gwauraia hedinarai, bona Mamoe ena Natuna be daika?

3. Mamoe ena Natuna bona 144,000 taudia be “Siona ororo dekenai [idia] gini.” Unai “Siona ororo” be dahaka?

4. Edena bamona 144,000 taudia iboudiai be Siona Ororona dekenai idia gini?

5. Unai 144,000 taudia edia baguna dekenai daidia edia ladana idia torea, bona unai ladana ta ta idia torea dainai dahaka idia hahedinaraia?

6. Ioane ese dahaka ane ia kamonai, bona unai ane be edena bamona ia gwauraia?

7. (a) Ane matamatana Apokalupo 14:3 dekenai be dahaka? (b) Edena bamona iseda nega lalonai Salamo 149:1 ena ane be ane matamatana?

8. Dahaka dainai 144,000 taudia sibona be Apokalupo 14:3 ena ane matamatana idia diba?

9. Hutuma bada herea taudia be edena bamona horoa taudia edia ane idia abia dae, bona unai dala amo dahaka hereva idia hagugurua?

10. Unai 144,000 taudia be edena bamona elda taudia 24 “edia vairanai” ane idia abia?

11. Dahaka dainai horoa kwalimu taudia be elda taudia 24 bona 144,000 taudia idia gwauraidia?

12. (a) Ioane be edena bamona 144,000 taudia ia herevalaidia noho? (b) Edena dala ai 144,000 taudia be rami-hebou kekenidia bamona?

13. Dahaka dainai 144,000 taudia be Iesu Keriso ena headava matamata kekenina ai idia lao be maoro, bona edena bamona “Mamoe ena Natuna murinai idia raka, iena loaloa gabudia ibounai”?

14. (a) Dahaka dainai 144,000 taudia be “taunimanima ginigunadia Dirava bona Mamoe ena Natuna ese idia abia, edia”? (b) Edena dala ai hutuma bada herea taudia danu be taunimanima ginigunadia?

15. Dahaka gau dekenai unai taunimanima ginigunadia oreadia toi bona idaunegai Mose ena Taravatu henunai idia karaia ariadia idia hegeregere?

16, 17. (a) Ioane ia itaia aneru ta be edeseniai ia roho lao, bona aneru ese dahaka ia boiboilaia? (b) Daidia be Basileia harorolaia gaukarana lalonai idia vareai, bona dahaka be nega momo ia vara dainai, unai ia hamomokania?

18. Guba ataiai ia roho lao aneruna ena hereva hegeregerena, dahaka nega ia ginidae, bona daika daika do idia hereva danu?

[Pictures on page 202, 203]

144,000

Elda taudia 24

Mamoe ena Natuna ida Basileia do idia abia taudia edia toana rua