Iehova Dekenai Emu Abidadama Oi Hagoadaia

Ala-ala totona palani ta idia karaia noho. Tano ena lohia taudia ibounai idia herevahereva hebou bona taravatu matamatana ta idia ura karaia. Idia ura Gavamani ese ia abia dae lasi tomadihona ia badinaia tauna ena davana be mase.

UNAI bamona sivarai ta guna oi kamonai, a? Histori lalonai haheitalai momo idia noho, taunimanima ese taravatu amo dika idia havaraia. Ataiai ia noho sivaraina be Parasa Basileiana dekenai ia vara, peroveta tauna Daniela ena nega lalonai. King Dariuse ese ia atoa taravatuna be inai: “Dina 30 lalonai be tau ta ese gau ta do ia noia lasi dirava ta dekenai, o tau ta dekenai, to [king] dekenai sibona do ia noia. Bema tau ta ese inai hereva ia utua, be do idia negea laiona ena guri dekenai.”​—⁠Daniela 6:​7-9.

Idia hamasea diba negana lalonai, Daniela be dahaka do ia karaia? Ena Dirava, Iehova, do ia abidadama henia noho, eiava do ia rakatania bona king ena hereva do ia badinaia? Baibel ia gwau: “Unai hereva Daniela ia diba neganai, ia lao iena ruma dekenai. Ataiai daiutuna ta dekenai be uindo toi idia noho Ierusalema itaia lao ena kahana dekenai. Nega ibounai ia karaia bamona, unai uindo dekenai ia tui diho dina ta nega toi, bona Dirava dekenai ia guriguri henia.” (Daniela 6:10) Unai sivarai murinai idia vara gaudia ita diba. Daniela be ena abidadama dainai laiona ena guri dekenai idia negea, to Iehova ese “laiona edia uduna ia koua” bona ena kamonai hesiai tauna ia hamauria.​—⁠Heberu 11:33; Daniela 6:​16-22.

Sibona Eda Kara Ita Tahua Namonamo Negana

Hari inai negai, Iehova ena hesiai taudia be dagedage tanobadana lalonai idia noho, tauanina bona lauma dalanai hadikaia gaudia momo idia davaria. Hegeregere, bese idau taudia inai henia karana dikana be tano haida dekenai ia vara neganai, Witnes taudia momo idia hamasea. Gabu ma haida dekenai, Iehova ena hesiai taudia be aniani lasi, moni hekwakwanai, abata bamona idia vara kava dika idauidau, gorere badadia, bona idia dainai edia mauri idia haboioa diba gaudia ma haida danu idia davaria. Danu, dagedage, hekwakwanai gaukara gabuna ai, bona hedibagani idauidau dika karaia totona idia haheaukalaia, bona unai ibounai dainai lauma dalanai dika idia davaria diba. Momokani, Inai Tauna badana, Satani, be ia kwalimu diba daladia ibounai ia gaukaralaia, Iehova ena hesiai taudia ia hadikaia totona.​—⁠1 Petero 5:⁠8.

Unai bamona gau idauidau ita davaria dainai, dahaka ita karaia diba? Ena be eda mauri ia hadikaia diba gauna ita davaria neganai ita gari, to aposetolo Paulo ena hagoadaia herevana ita laloa be namo, ia gwau: “Dirava be inai bamona ia hereva, ia gwau: ‘Lau ese umui do lau negea lasi, bona umui do lau rakatania lasi Lasi bona lasi momokani.’ Unai dainai, mai goada danu, inai bamona do ita hereva, ‘Lohiabada be lauegu durua Tauna, lau be lau gari diba lasi. Taunimanima edena bamona lau do idia hadikaia diba?’ ” (Heberu 13:​5, 6) Ita diba momokani hari danu Iehova be ena hesiai taudia dekenai unai bamona ia laloa. To, Iehova ena gwauhamata ita diba be gau ta, to ita abia dae momokani ita totona do ia kara be ma gau ta. Gau badana be Iehova ita abidadama henia ena badina ita laloa namonamo bona iseda abidadama ita hagoadaia bona ita dogoatao noho totona ita hekwarahi. Bema unai bamona ita karaia, ‘Dirava ena maino ese Keriso Iesu dainai iseda lalona bona iseda kudouna do ia gimaia.’ (Filipi 4:⁠7) Bena hedibagani idia vara neganai, do ita laloa namonamo diba bona mai aonega ida do ita kara.

Iehova Ita Abidadama Henia Ena Badina

Ita be mai eda badina momo iseda Havaraia Tauna, Iehova, ita abidadama henia totona. Idia amo gau ginigunana be, Iehova be lalokau Diravana bona ena hesiai taudia ia laloa bada. Baibel lalonai Iehova ese ena hesiai taudia dekenai ia hahedinaraia lalokau karadia edia sivarai momo idia noho. Mose be Iehova ena kara, ia abia hidi Israela taudia dekenai ia herevalaia neganai, ia gwau: “Ia ese taunimanima noho lasi tano dekenai, idia ia davaria. Rei lasi tano dekenai idia ia davaria. Lohiabada ese idia ia naria bona ia ubua. Ia ese idia ia gimaia, sibona ena lalokau tauna ia gimaia bamona.” (Deuteronomi 32:10) Hari inai nega ai, Iehova ese ena hesiai taudia edia orea bona idia ta ta ia naridia namonamo noho. Hegeregere, Bosnia dekenai tano tamona taudia idia tuari heheni lalonai, Witnes taudia haida be aniani dekenai idia hegeregere lasi momokani neganai, Iehova ese dala ia karaia Croatia bona Austria tadikaka edia gari lasi karana amo heduru gaudia idia abia diba, unai idia karaia ena be edia tadikaka dekenai unai gaudia abia lao totona gabu dika herea idia hanaia lalonai edia mauri idia haboioa diba.a

Iehova Dirava be Siahu Ibounai Diravana dainai, ia be hegeregere noho dalana idauidau ai ena hesiai taudia ia naria. (Isaia 33:22; Apokalupo 4:⁠8) Ena be Iehova ena hesiai taudia haida idia kamonai noho ela bona mase bona Iehova ese unai ia koua lasi, to ia hagoadadia bona durudia kara maoromaoro idia badinaia diba totona, bona unai amo idia gini goada, idia moale, bona mai gari lasi ida idia noho ela bona dokona. Unai dainai, ita danu be salamo torea tauna ena lalo-goada hegeregerena ita gwau diba: “Dirava be iseda heau mauri gabuna, bona ia ese ita dekenai goada ia henia. Iseda nega dika negadia ibounai ita dekenai ia noho, ita do ia durua totona. Unai dainai ita be do ita gari lasi, dika ia vara neganai. Tano be sedira do ia mareremarere bada, bona ororo be do idia kokia, davara lalonai do idia moru, to ita be do ita gari lasi.”​—⁠Salamo 46:​1, 2.

Baibel ese ia hahedinaraia danu Iehova be hereva momokani Diravana. Unai ena anina be ena gwauhamata ibounai do ia hagugurua. Momokani, Baibel ia gwau ia be “koikoi diba lasi” Diravana. (Tito 1:⁠2) Iehova ia hahedinaraia loulou ia ura ena hesiai taudia ia gimaia bona hamauria, unai dainai ita diba momokani Iehova ia hegeregere sibona lasi to ia hegaegae vadaeni ena gwauhamata ia hagugurudia totona.​—⁠Iobu 42:⁠2.

Iseda Abidadama Hagoadaia Daladia

Ena be badina momo idia noho Iehova ita abidadama henia totona, to namo lasi unai kara ita laloa maragi. Unai ena badina be tanobada taudia edia abidadama Dirava dekenai be bada lasi, bona unai bamona lalohadai ese Iehova dekenai iseda abidadama ia hamanokaia diba. Unai dainai, namona be ita hekwarahi bada unai abidadama ita hagoadaia bona dogoatao noho totona. Iehova be unai ia diba, bona unai ita karaia diba totona dala ia hegaegaelaia.

Gau ginigunana be, ena Hereva, Baibel, ia henia, ia lalonai ena hesiai taudia totona ia karaia kara badadia momo idia torea. Mani oi laloa, bema ta ena ladana sibona oi diba, ia dekenai emu abidadama ena bada be edena bamona? Reana maragi momokani, eiava ia noho lasi. Ia oi abidadama henia totona namona be, gau idauidau ia karaia dalana bona ena kara oi diba, ani? Unai bamona Baibel sivaraidia ita duahia bona laloa loulou neganai, iseda diba Iehova Dirava bona ena dala namodia dekenai do ia bada, bona ita abia dae momokani ia ita abidadama henia diba. Unai amo ia dekenai iseda abidadama ia goada ia lao. Salamo torea tauna be haheitalai namona ia hahedinaraia, Dirava ia guriguri henia goadagoada neganai, ia gwau: “To Lohiabada e, lau ese oiemu kara do lau laloa noho. Oiemu hoa karadia gunadia do lau laloa lou. Oiemu gaukara ibounai do lau laloa noho, bona oiemu siahu karadia danu do lau laloa.”​—⁠Salamo 77:​11, 12.

Baibel amo sibona lasi, to ita ese lauma aniani momo herea be Iehova ena orea ese idia halasia Baibel bukadia bona magasin amo ita abia danu. Hanaihanai unai bamona buka bona magasin lalonai, hari inai negai Dirava ena hesiai taudia edia mauri sivarai namodia idia noho, idia hahedinaraia hekwakwanai aukadia idia davaria neganai Iehova ese heduru ia henia. Hegeregere, Martin Poetzinger, gabeai Iehova ena Witnes taudia edia Hakaua Oreana tauna ta ai ia lao, be ena tano ia rakatania bona Europe ena tano haida dekenai ia painia noho neganai, ia gorere bada. Ia be moni lasi bona doketa ta ia ura lasi ia idia durua. To Iehova ese ia rakatania lasi. Dokonai, hospital ena heduru henia tauna idia hereva henia. Ia be Baibel ia abia dae tauna dainai, unai hebogahisi tauna ese Tadikaka Poetzinger ia naria ena natuna mero bamona, unai ia karaia davana lasi. Unai bamona mauri sivaraidia ita duahia karana ese iseda abidadama eda guba Tamana dekenai ia hagoadaia diba.

Iehova ese iseda abidadama ia dekenai ita hagoadaia totona ia henia dava bada heduru gauna ma ta be guriguri. Aposetolo Paulo be mai lalokau ida ita ia hamaoroa, ia gwau: “Gau ta totona do umui laloa hekwarahi lasi. To umui dekenai hegeregere lasi gaudia do umui abia totona, Dirava do umui noia. Bona umui noia negadia ibounai, mai tanikiu danu do umui guriguri henia.” (Filipi 4:⁠6) Unai “hegeregere lasi gaudia” ena anina be iseda hemami, dabu gaudia, gari, bona lalo-hekwarahi gaudia. Mai kudouna ibounai ida Iehova ita guriguri henia hanaihanai neganai, iseda abidadama ia dekenai do ia goada.

Iesu Keriso be tanobada dekenai ia noho neganai, nega haida taunimanima idia noho lasi gabuna dekenai ia lao gau ta ese ena guriguri ia hadikaia lasi totona. (Mataio 14:23; Mareko 1:35) Mai anina bada gaudia ia abia hidi neganai, hanuaboi ibounai ena Tamana dekenai ia guriguri. (Luka 6:​12, 13) Ita hoa lasi Iesu be Iehova ia abidadama henia goada bona ia hegeregere hetoho dika hereana ia haheaukalaia totona. Satauro dekenai ena hereva ginigabena be: “Egu Tamana e, egu lauma be oiemu imana dekenai lau atoa inai.” Unai abidadama herevana ese ia hahedinaraia, ela bona dokona ena abidadama Tamana dekenai ia goada noho, ena be Iehova ese kara ta ia karaia lasi ena mase koua totona.​—⁠Luka 23:⁠46.

Iseda abidadama Iehova dekenai ita hagoadaia dalana ma ta be mai edia kudouna ibounai ida ia idia abidadama henia taudia ita bamoa hanaihanai. Iehova ese ena taunimanima ia haganidia idia hebou hanaihanai be namo, ia idia dibaia bona idia ta ta idia hagoadaia heheni totona. (Deuteronomi 31:12; Heberu 10:​24, 25) Unai bamona hebamo karana ese Iehova dekenai edia abidadama ia hagoadaia, bona ia durua edia abidadama idia tohoa gaudia idia haheaukalaia totona. Haroro gaukara idia taravatua Africa tanona ta dekenai, pulisi ese Iehova ena Witnes taudia idia durua lasi, idia dekenai loaloa pepadia bona headava ena setifiket idia henia lasi, hospital amo heduru idia abia lasi, bona moni gaukara idia henidia lasi. Gabu ta ai tano tamona taudia idia tuari heheni neganai, unai gabu kahirakahira ia noho kongregesen taudia 39, natudia danu, be edia taoni idia hadikaia karana amo idia heau mauri totona hua hani bamona tano kaukauna ena nesehanai ta henunai idia noho. Unai bamona hekwakwanai bada negana lalonai, Baibel idia herevalaia hanaihanai bona idia karaia hebou ma haida ese idia dekenai goada ia henia. Unai dainai unai hekwakwanai idia haheaukalaia bona lauma dalanai idia goada noho. Unai sivarai ese Iehova ena taunimanima ida hebou hanaihanai karana ena namo ia hahedinaraia namonamo.

Danu, iseda abidadama Iehova dekenai ita hagoadaia totona, Basileia harorolaia gaukarana ita karaia goadagoada be namo, nega ibounai ita gini hegaegae ma haida dekenai sivarai namona ita herevalaia totona. Canada ai ia noho goada pablisa matamatana, liukimia gorerena ia abia kekenina, ena sivarai namona ese unai ia hahedinaraia. Herevana ia gorere bada, to ia ura regula painia gaukara, unai be ful-taim hesiai gaukarana, ia karaia. Gorere amo nega sisina ia namo lalonai, ia hegeregere hua tamona lalonai heduru painia gaukara ia karaia. Bena ena gorere ia bada ia lao, bona hua haida murinai ia mase. To, lauma dalanai ia goada noho ela bona mase, ena abidadama Iehova dekenai be nega ta ia marere lasi. Ena sinana ia gwau: “Ela bona ia mase, ia be sibona ena namo ia laloa lasi to ma haida edia namo ia laloa bada. Idia ia hagoadaia Baibel idia stadilaia totona, ia hamaorodia, ‘Gabeai Paradaiso dekenai do ita noho hebou.’ ”

Eda Abidadama Iehova Dekenai Ita Hamomokania

“Tauanina bema mai ena lauma lasi, ia be mase gauna, ani? Vadaeni unai bamona danu, abidadama mai ena kara namodia lasi, be mase gauna.” (Iamesi 2:26) Iamesi ena hereva be mai anina bada Dirava ita abidadama henia karana dekenai. Herevana ita hereva goada Dirava ita abidadama henia, to bema unai abidadama be iseda kara amo ita hahedinaraia lasi, ia be anina lasi. Aberahamo be Dirava ia abidadama henia momokani bona mai lalo-daradara lasi ida ena taravatu ia kamonai henia karana amo unai abidadama ia hamomokania, ia hegeregere ena natuna Isako ia hamasea totona danu. Unai bamona abidadama bona kamonai karana dainai, Aberahamo be Dirava ena turana ai ia lao.​—⁠Heberu 11:​8-10, 17-19; Iamesi 2:⁠23.

Namo lasi ita naria ela bona hetoho dikana ta ia vara ita dekenai bena Iehova dekenai iseda abidadama ita hahedinaraia. Iesu ese ena hahediba taudia ia hamaoroa: “Gau maragina ia karaia maoro tauna ese gau badadia do ia karaia maoro, to gau maragina ia karaia kerere tauna ese gau badadia do ia karaia kerere danu.” (Luka 16:10) Namona be dina ta ta lalonai ita karaia gaudia ibounai lalonai Iehova ita abidadama henia karana ita dibaia, anina maragi gaudia dekenai danu, ia ita kamonai henia. Unai bamona kamonai karana amo ia mai hahenamo ita itaia neganai, iseda guba Tamana dekenai iseda abidadama ia hagoadaia, bona unai ese ita ia durua hahetoho badadia ita haheaukalaia totona.

Tanobada be ena dokona dika hereana dekenai ia lao noho lalonai, Iehova ena taunimanima be hahetoho bona dika gaudia momo do idia davaria. (Kara 14:22; 2 Timoteo 3:12) Hari Iehova dekenai iseda abidadama ita hagoadaia momokani amo, nega vairai ia gwauhamatalaia tanobada matamata dekenai do ita roho mauri diba​—⁠hisihisi badana ita hanaia karana amo eiava ita toreisi lou karana amo. (2 Petero 3:13) Namo lasi abidadama lasi karana ese Iehova ida iseda hetura karana namona ia hadikaia. Bena, Daniela be laiona edia guri amo idia veria daekau murinai ia dekenai idia gwauraia bamona, ita dekenai danu do idia gwauraia diba: “Dika sisina ia davaria lasi, badina Dirava ia abidadama henia dainai.”​—⁠Daniela 6:⁠23.

[Footnote]

[Picture on page 9]

Iehova ena abidadama hesiai taudia edia sivarai, hegeregere Martin Poetzinger ena, ita duahia karana ese iseda abidadama ia hagoadaia