Haere Dalana Maorona Oi Diba

HENANADAI haida be ranu lalonai idia hure au badadia bamona. Edia kahana badana be ranu lalonai ia hunia. Nega momo henanadai lasi to henanadai ena badina korikori be mai anina bada.

Ena be henanadai tauna ia ura dikadika haere ia abia, to haere dalana maorona oi davaria totona emu hereva ena lata bona gwauraia dalana oi laloa guna be namo. (Ioa. 16:12) Iesu ese ena aposetolo taudia dekenai ia hahedinaraia bamona, reana nega haida ta ia ura gau ta ia diba to unai gauna ia diba be maoro lasi eiava ia do ia durua lasi.​—Kara 1:​6, 7.

Baibel ese ita ia sisiba henia: “Nega ibounai mai laloa namona bona mai gado namo do umui hereva. Bona taunimanima ta ta dekenai do umui haere henia mai maoromaoro danu.” (Kol. 4:6) Unai dainai, ita do haere lasi neganai, ita gwauraia herevana sibona lasi to ita gwauraia dalana danu do ita laloa.

Henanadai Tauna Ena Lalohadai Oi Laloa

Sadukea taudia ese Iesu idia tarapua toho totona, nega momo ia headava hahinena ena toreisi lou idia henanadailaia. To, Iesu ia diba idia ese toreisi lou idia abidadama henia lasi. Unai dainai edia henanadai ia haerelaia neganai, idia laloa kerere gauna, edia henanadai ena badina korikorina unai, ia herevalaia. Iesu ese hereva dalana namona bona idia diba Baibel siridia ia gaukaralaia, guna idia laloa lasi gauna ta​—Dirava ese mase taudia do ia hatorea isi lou ia hahedinaraia goevagoeva gauna ta—ia hahedinaraia totona. Iena haere dainai unai dagedage taudia idia hoa bada bona henanadai ma ta idia gwauraia lasi.​—Luka 20:​27-40.

Haere dalana maorona oi diba totona, henanadai taudia edia lalohadai bona idia lalo-hekwarahilaia gaudia oi diba be namo. Hegeregere, reana sikuli eiava gaukara turana ta ia henanadai dahaka dainai Krismas oi hahelagaia lasi. Dahaka dainai ia henanadai? Ia ura momokani emu kara ena badina ia diba, eiava ia daradara sibona bema moale karadia ta oi karaia diba? Unai oi diba totona, reana oi henanadai dahaka dainai unai henanadai ia gwauraia. Bena unai hegeregerena oi haere. Bona reana oi ura hahedinaraia Baibel ena hakaua herevadia ita badinaia dainai, Krismas lalonai taunimanima ese idia lalohisihisilaia gaudia bona idia davaria metau gaudia ita davaria lasi.

Mani oi laloa, oi idia boiria stiuden taudia dekenai Iehova ena Witnes taudia edia sivarai do oi herevalaia. Oiemu hereva murinai, reana henanadai idia gwauraia. Bema edia henanadai be mai momokani ida idia gwauraia maoromaoro, emu haere idia hedinarai goevagoeva bona idia kwadogi be namo. Bema edia henanadai amo oi itaia ita idia lalo-dika henia kava, reana oi do haere lasi neganai, edia lalohadai unai gaudia dekenai idia haidaua diba gaudia oi herevalaia bona Iehova ena Witnes taudia idia ura Baibel ena taravatu idia badinaia ena badina oi gwauraia guna be namo. Namona be oi laloa edia henanadai idia gwauraia badina taunimanima edia namo idia laloa, to heai dainai lasi​—ena be idia gwauraia dalana be unai bamona. Unai dala ai, emu haere amo kamonai taudia edia lalo-parara oi habadaia, idia dekenai diba maorona oi henia, bona ita abia dae gaudia edia badina be Baibel amo oi hahedinaraia.

Bema emu gaukara biaguna ia ura lasi hebouhebou dekenai oi lao totona nega ia henia, edena bamona oi haere be namo? Iena lalohadai oi laloa guna. Bema oi gwau nega ma ta ai ovataim oi karaia, do ia abia dae, a? Bema oi hahedinaraia iseda hebouhebou dekenai idia hadibaia gaudia ese ita idia durua, gaukara taudia namodia ai ita lao totona, ena lalohadai do ia haidaua, a? Bema oi hahedinaraia ia laloa gaudia oi laloa bada, reana emu mauri lalonai mai anina bada gauna do ia laloa danu. To bema ia ura koikoi karana ta do oi karaia be edena bamona? Unai oi dadaraia goevagoeva bona Baibel ena lalohadai ta oi gwauraia neganai, oiemu lalohadai do ia diba. To reana namo bada do oi havaraia bema ia dekenai oi hahedinaraia, bema ta be ia totona ia koikoi, reana ia dekenai do ia koikoi eiava ia amo gau ta do ia henaoa diba danu, ani?

To, reana oi be stiuden ta bona oi ura lasi sikuli gaukaradia haida oi karaia, badina Baibel ese ia gwauraidia dika. Namona be oi laloatao, reana tisa tauna ena lalohadai bona oiemu lalohadai be idau, bona klas dekenai gau iboudiai idia heau namonamo be iena maduna. Inai gaudia do oi karaia be namo, (1) oi hahedinaraia tisa ena gaukara oi laloa bada, (2) hemataurai dalanai oiemu lalohadai oi hahedinaraia, bona (3) Iehova ia hamoalea dalana dekenai oi gini goada. Namo oi havaraia totona, reana oi abia dae gauna oi gwauraia hedinarai sibona be hegeregere lasi. (Aon. 15:28) Bema oi matamata, oiemu tama eiava sina ese oi ia durua diba, do oi gwauraia gauna oi hegaegaelaia totona.

Reana nega haida, siahu tauna ta ese oi ia samania bona oi ura emu kara ena maoro oi hahedinaraia. Reana pulisi tauna ta, gavamani tauna ta, eiava hahemaoro tauna ta ese taravatu ta kamonai henia karana, oiemu Keristani gini siri karana, eiava emu lalohadai bese abia isi karana ta dekenai ia henanadailaia bona ia ura do oi haere. Edena dala ai oi haere be namo? Baibel ena sisiba ia gwau “mai mataurai bona manau danu.” (1 Pet. 3:15) Danu, oi sibona oi nanadaia dahaka dainai unai gaudia idia laloa bada, bona mai hemataurai ida oi hahedinaraia unai oi lalo-pararalaia. Bona dahaka oi karaia? Aposetolo Paulo be Roma ena taravatu ese ia kehoa daladia ia gwauraia, unai dainai oi idia durua taravatu oi gwauraia diba. (Kara 22:​25-29) Reana unai siahu tauna ese Keristani taudia ginigunadia bona Iehova ena Witnes taudia tanobada hegegemadai idia badinaia dalana ia diba neganai, iena lalohadai ia habadaia. Eiava reana oi hahedinaraia taunimanima ese Dirava ena siahu idia abia dae neganai, taunimanima edia taravatu maorodia do idia badinaia namonamo danu. (Roma 13:​1-14) Bema unai bamona gaudia ia diba, reana oiemu kara ena badina be Baibel amo oi gwauraia neganai, do ia kamonai.

Henanadai Tauna Ena Lalohadai Baibel Dekenai

Haere dalana oi abia hidi neganai, reana henanadai tauna ena lalohadai Buka Helaga dekenai oi laloa danu. Iesu ese Sadukea taudia edia henanadai toreisi lou dekenai ia haerelaia neganai, unai bamona ia karaia. Iesu ia diba idia ese Mose ena toretore sibona idia abia dae dainai, Pentateuch lalonai ia noho sivaraina ia herevalaia bona ia matamaia neganai, ia gwau: “To mase dekena amo idia toreisi lou herevana be Mose ese ia hamomokania vadaeni.” (Luka 20:37) Reana oi davaria danu, kamonai taudia ese Baibel ai idia abia dae bona idia diba kahana ta oi gaukaralaia be namo.

To bema kamonai tauna ese Baibel ena siahu ia abia dae lasi be edena bamona? Namona be aposetolo Paulo ese Areo dekenai hereva ia henia neganai ia karaia gauna oi laloa, unai sivarai be Kara 17:​22-31 ai ia noho. Ia ese Baibel ena hereva momokani ia herevalaia to Baibel amo ia gwauraia lasi. Bema namo, unai oi karaia diba danu. Gabu haida ai, namona be nega sisina momo tau ta ida do oi herevahereva guna, gabeai Baibel amo hereva oi gwauraia diba. Baibel amo hereva oi gwauraia neganai, reana aonega dalana be bema Baibel ia laloa ena badina oi hahedinaraia guna, ia be Dirava ena Hereva oi gwauraia sibona lasi. To, oiemu ura gauna be Dirava ena ura oi hahedinaraia goevagoeva, bona oi ura gabeai kamonai tauna ese Baibel ena hereva be ia sibona do ia itaia. Baibel ena lalona veria siahuna ese iseda hereva ibounai ia hereaia.​—Heb. 4:12.

‘Mai Lalo-Namo Ida’

Iehova, lalo-namo Diravana, ena hesiai taudia idia hagoadaia ‘nega ibounai mai lalo-namo bona mai gado namo ida idia hereva’ be maoro momokani! (Kol. 4:6; Eso. 34:6) Anina be mai manau ida ita hereva, herevana ita dekenai kara namo idia hahedinaraia lasi. Namona be eda hereva ena mamina ia namo, hereva aukadia bona ma haida hahisia herevadia ita gwauraia lasi.

Taunimanima momo ese metau bada idia huaia, bona dina iboudiai hadikaia herevadia idia kamonai. Unai bamona taudia ita vadivadi henia neganai, reana idia hereva auka. Edena bamona do ita haere? Baibel ia gwau: “Mai manau danu ia haere tauna, ese badu ia koua noho.” Unai bamona haere ese iseda lalohadai ia abia dae lasi tauna ena lalona ia hamanaua diba. (Aon. 15:1; 25:15) Kara namo bona gado regena namona ese dina iboudiai hereva aukadia idia kamonai taudia edia lalona idia veria diba, bona reana ita harorolaia sivarai namona do idia kamonai.

Ita ura lasi hereva momokani idia matauraia lasi taudia ida ita heai. To, eda ura be idia ura idia kamonai taudia ida Baibel ita herevalaia. Herevana dahaka ia vara, namona be mai manau ida ita haere bona ita hahedinaraia ita abia dae momokani Dirava ena gwauhamata namodia do idia guguru.​—1 Tes. 1:5.

Ita Abia Hidi Gaudia Bona Lalona Ena Mamina

Bema Baibel stiuden ta eiava tadikaka ta ese oi ia nanadaia, inai eiava unai ia vara neganai dahaka ia karaia be namo, edena bamona do oi haere? Reana oi diba oi ese dahaka do oi karaia. To taunimanima ta ta ese sibona ia abia hidi gaudia edia maduna ia huaia be namo. (Gal. 6:5) Aposetolo Paulo ia gwau ia haroro henia taudia ia hagoadaia, Dirava “do idia abidadama henia bona kamonai henia totona.” (Roma 16:26) Unai be haheitalai namona ita tohotohoa totona. Bema ta ese Baibel hadibaia tauna eiava taunimanima ma ta hamoalea totona gau ta ia abia hidi ia be taunimanima edia hesiai gaukara ia karaia, to abidadama ia hahedinaraia lasi. (Gal. 1:10) Unai dainai, reana henanadai oi haerelaia sibona be henanadai tauna ia durua momokani lasi.

Vadaeni, oi haere neganai Baibel ia hahedinaraia dalana be edena bamona oi badinaia? Reana Baibel ena hakaua herevadia bona haheitalai namodia Baibel lalonai oi hahedinaraia diba. Nega haida, reana hereva tahua karana oi hadibaia, ia ese unai hakaua herevadia bona haheitalai namodia ia davaria totona. Unai hakaua herevadia bona haheitalai edia namo oi herevalaia diba, to ia henanadailaia gauna dekenai ia badinaia dalana oi gwauraia lasi. Ia oi nanadaia bema idia lalonai heduru gaudia ia itaia, abia hidi namona ia karaia totona. Ia oi hagoadaia, unai hakaua herevadia bona haheitalai amo Iehova ese ia moalelaia dalana do ia davaria toho. Unai dala amo ia oi durua, ia sibona ese ‘maoro bona kerere edia toana do ia diba namonamo.’​—Heb. 5:14.

Kongregesen Heboudia Dekenai Haere Karana

Nega momo Keristani heboudia dekenai dala ia kehoa, taunimanima vairanai iseda abidadama ita hahedinaraia totona. Unai ita karaia dalana ta be idia henia henanadai ita haerelaia. Edena dala ai ita haere be namo? Namona be eda ura be Iehova do ita hanamoa, eiava gwauraia namo. Salamo torea tauna be “hebou badana lalonai” ia noho neganai unai ia karaia. (Sal. 26:12) Danu, ita haere dalana amo iseda tadikaka ita hagoadaia, ‘lalokau bona kara namodia’ do idia karaia totona, aposetolo Paulo ese ita ia hagoadaia bamona. (Heb. 10:​23-25) Unai ita karaia totona hebou ena hereva idauidau ita stadilaia guna be namo.

Oi haere neganai, hereva momo oi gwauraia kava lasi, anina oi hahedinaraia goevagoeva, bona emu haere oi hakwadogia. Paragraf ibounai oi herevalaia lasi; gau tamona sibona. Bema haere ena kahana ta sibona oi henia, ma haida idia haere diba danu. Unai kahana dekenai idia gwauraia siridia edia anina oi hahedinaraia be namo herea. Unai oi karaia neganai, ma haida oi durua unai siri lalonai umui herevalaia gauna ia hahedinaraia kahana idia laloa. Paragraf amo haere duahia lasi to sibona emu hereva amo haere dalana oi dibaia. Oi lalohisihisi lasi bema emu hereva oi hakererea sisina. Haere taudia ibounai dekenai nega haida unai bamona ia vara.

Ia hedinarai goevagoeva haere dalana maorona ita diba totona haere sibona ita diba be hegeregere lasi. Laloa kehoa be gau badana. To mai emu kudouna ibounai ida haere oi henia bona emu haere ese ma haida edia kudouna ia hamarerea neganai, moale bada oi abia!​—Aon. 15:23.