Dala Maorona ai Iehova Oi Naria Noho, A?
HARI, inai tanobada ai, taunimanima momo be tau ta eiava gau ta idia naria totona idia haheauka diba lasi. To, Baibel ese Dirava ena taunimanima ia hagoadaia, “naria noho” lalohadaina do idia hahedinaraia totona. Peroveta tauna Mika be ena hanua taudia amo ia idau, ia gwau: “Lau ese Lohiabada do lau naria noho . . . ia ese lau do ia hamauria.”—Mika 7:7; Lalohisihisi ena Ane 3:26.
To, Iehova ita naria noho ena anina be dahaka? Keristani tauna ese edena bamona Dirava do ia naria noho be namo? Unai karaia totona, dala kereredia bona maorodia idia noho, a? Iona be lagani 900 B.C.E. murinai ia noho peroveta tauna ta, bona ia dekenai ia vara gauna amo gau ta ita dibaia.
Naria Noho Dalana Kererena
Iehova Dirava ese Iona ia oda henia Nineva hanua taudia ia haroro henidia totona. Nineva be Asuria besena ena siti badana. Nineva ena ladana ta be ‘taunimanima edia rara ia bubua hanuana,’ badina ia ese bese ma haida ia dagedage henidia bada. Histori torea taudia bona akioleji taudia ese unai idia hamomokania. (Nahumu 3:1) Nega ginigunana ai, Iona be ia ura lasi unai gaukara ia karaia, to gabeai Iehova ese dala ia karaia Iona be Nineva dekenai ia lao totona.—Iona 1:3–3:2.
“Iona ese hanua lalonai ia raka vareai hamatamaia, dina ta ena raka hegeregerena ia lao. Vadaeni ia haroro, ia gwau, ‘Dina 40 do idia ore, vadaeni Nineva hanua be do ia dika momokani.’ ” (Iona 3:4) Iona ena haroro gaukarana ese kara idauna ta ia havaraia: “Nineva dekenai idia noho taudia ese Dirava ena hereva idia abidadama henia. Unai dainai taunimanima ibounai ese aniani ania lasi taravatu idia gwauraia. Edia ladana bada bona ladana maragi taudia ibounai danu ese puse dabua idia karaia, edia lalona giroa toana do idia hedinaraia totona.” (Iona 3:5) Unai dainai, Iehova, ‘ia ura lasi tau ta ia mase to ia ura taunimanima ibounai ese dika dekena amo edia lalona do idia giroa’ Diravana, ese unai hanua taudia ia hamasedia lasi.—2 Petero 3:9.
Iona be dahaka ia karaia? Baibel ia gwau: “Iona ia moale lasi inai kara dekenai, ia be ia badu.” (Iona 4:1) Dahaka dainai? Reana, Iona ia laloa bema ia perovetalaia dika be nega korikorina ai ia vara lasi, taunimanima do idia gwau ia be peroveta koikoi tauna. Ia be sibona ena ladana ia laloa bada, to ma haida ia hebogahisi henidia lasi bona edia mauri ia laloa lasi.
Momokani, Iona be ena peroveta gaukarana amo ia doko lasi. To, ia helai bona ia naria badina ia “ura dahaka ia vara Nineva hanua dekenai do ia itaia.” Oibe, ia be mai moale lasi ida dahaka do ia vara ia naria noho. Ia itaia ia peroveta hegeregerena ia vara lasi neganai, ruma maragina ia karaia bona ena keruma henunai mai badu ida ia helai bona dahaka do ia vara ia naria. To, Iehova be Iona ena kara ia moalelaia lasi. Iena peroveta tauna ena lalohadai be kerere dainai, Iehova ese mai lalokau ida ia sisiba henia.—Iona 4:5, 9-11.
Iehova Ia Haheauka Ena Badina
Ena be Nineva taudia idia helalo-kerehai bona Iehova ese ia hadikadia lasi, to gabeai kara dika idia karaia lou. Peroveta taudia Nahumu bona Sepanaia amo, Iehova ese Nineva ena dika ia gwauraia. Iehova ese ‘taunimanima edia rara ia bubua hanua’ ia herevalaia neganai, ia gwau Asuria do ia hadikaia bona Nineva be taunimanima idia noholaia lasi gabuna ai do ia halaoa. (Nahumu 3:1; Sepanaia 2:13) Lagani 632 B.C.E. ai, Nineva idia hadikaia ore bona ia gini lou lasi.
Unai hegeregerena, hari inai tanobada be rara bada herea ia bubua danu, ena kerere be Nineva ena kerere ia hanaia momokani. Unai bona kara dika ma haida dainai, Iehova ia gwau inai tanobada dikana be guna ia vara lasi “hisihisi badana” lalonai, do ia hadikaia ore.—Mataio 24:21, 22.
To, Iehova ese ia gwauraia dika ia do mailaia lasi, unai amo Nineva dekenai idia helalo-kerehai taudia bamona, hari inai negai kudou maoro taudia be idia helalo-kerehai bona idia roho mauri diba. Aposetolo Petero ese Dirava ena haheauka karana be inai bamona ia gwauraia: “Lohiabada ia gwauhamata vadaeni, kara haida do ia karaia. Ia ese iena gwauhamata badinaia totona ia hesiku lasi, haida idia laloa bamona. Lasi, to umui totona ia haheauka noho. Badina be ia ura lasi tau ta ia mase. Ia ura taunimanima ibounai ese dika dekena amo edia lalona do idia giroa.”—2 Petero 3:9, 10, 13.
Naria Noho Dalana Maorona
Petero ma ia gwau: “Vadaeni, umui laloa: Bema inai gau ibounai unai bamona do idia boio ore, umui be edena bamona do umui noho? Umui emui kara ibounai do idia helaga be namo, bona Dirava do umui badinaia namonamo. Ma Dirava ena Dina do umui naria noho, bona do ia ginidae haraga totona do umui gaukara goada noho.” (2 Petero 3:11, 12) Mani oi itaia, Iehova ena dina ita naria noho lalonai, ita hahedinaraia iseda ‘kara ibounai do idia helaga be namo, bona Dirava do ita badinaia namonamo’—anina be ita gaukara, ita helai kava lasi.
Oibe, mai lalohadai maorona ida ita naria noho neganai, ita hahedinaraia ita abia dae momokani Iehova ena dina be ia gwauraia nega korikorina ai do ia mai. Unai bamona abidadama dainai, helaga bona Dirava badinaia karadia do ita hahedinaraia, bona unai kara badana ta be Dirava ena Basileia ena sivarai namona ita harorolaia gaukarana. Iesu be haheitalai namona ia hahedinaraia haroro gaukara dekenai bona ena murinai idia raka horoa taudia dekenai, ia gwau: “Emui rami do umui kwatua, bona emui lamepa do umui gabua, umui noho hegaegae. Edia biaguna dekenai idia naria noho taudia bamona do umui noho hegaegae. Edia biaguna be headava aria dekena amo do ia giroa mai, do ia pidipidi, vadaeni iduara do idia kehoa haragaharaga. Bema biaguna do ia mai neganai, do ia davaria iena hesiai taudia idia mahuta lasi, unai hesiai taudia do idia moale.”—Luka 12:35-37.
Aposetolo edia negai bema hesiai taudia idia ura gaukara goadana ta idia karaia, idia ese edia rami idia veria daekau bona edia gabana varona dekenai idia kwatua. Unai hegeregerena, Keristani tauna be gaukara namodia do ia karaia goadagoada. Namo lasi lauma gaukara dekenai ia lahedo, bona reana ena goada be moale eiava kohu tahua karadia dekenai ia haorea. To, namona be Iehova ena dina badana mai garina ia naria noho lalonai, ‘Lohiabada ena gaukara do ia karaia goadagoada.’—Roma 12:11; 1 Korinto 15:58.
Ita Naria Noho Lalonai Do Ita Gaukara
Iehova ena Witnes taudia be Iehova ena dina idia naria noho lalonai idia gaukara goadagoada noho. Hegeregere, lagani 2003 ena hesiai laganina lalonai, dina ta ta lalonai Iehova ena hereva idia harorolaia horadia ibounai ena averes be 3,383,000. Mani oi laloa, dina tamona lalonai idia hagugurua gauna, be bema tau tamona ese ia karaia, lagani 386 lalonai do ia haroro bona ia laga-ani lasi!
To, namona be ita sibona ita nanadaia, ‘Lau be edena bamona naria noho lalohadaina lau hahedinaraia?’ Iesu ese parabole ta amo ia hahedinaraia, abidadama horoa Keristani taudia do idia gaukara goadagoada. Hesiai taudia toi ia herevalaia: “Ia [biaguna] ese ta dekenai 5000 kina ia henia, ma ta dekenai 2000 kina ia henia, ma ta dekenai 1000 kina ia henia, idia ta ta edia diba hegeregerena. Vadaeni ia lao gabu daudau dekenai. Vadaeni 5000 kina ia abia tauna be ia lao, ia hoihoilaia, 5000 kina ma ia abia. Inai bamona danu, 2000 kina ia abia tauna be ia lao, 2000 kina ma ia abia. To 1000 kina ia abia tauna be ia lao, tano ia geia, biaguna ena moni ia guria. Nega daudau ia lao, vadaeni unai hesiai taudia edia biaguna ia giroa mai, bona idia dekenai ia nanadaia edena bamona ena moni idia naria.”—Mataio 25:15-19.
Unai hesiai taudia toi be edia biaguna ena lou mai idia naria. Idia naria noho lalonai idia gaukara taudia rua be edia biaguna ia giroa mai neganai, idia dekenai ia gwau: “Namo herea! Oi be hesiai tauna namona, kara maoromaoro tauna.” To, ia naria kava tauna dekenai hereva idauna ia gwauraia. Biaguna ia gwau: “Hesiai tauna dikana be do umui negea murimuri dekenai mai dibura danu.”—Mataio 25:20-30.
Ena be unai parabole be horoa Keristani taudia totona, to herevana iseda helaro be dahaka, ita ibounai ese gau ta ita dibaia diba. Biaguna, Iesu Keriso, be ia ura Iehova ena dina badana ai do ia lou mai negana ita naria noho lalonai, ita ta ta be iena hesiai gaukara do ita karaia goadagoada noho. Ia ese taunimanima “ta ta edia diba” bona karaia gaukara ia abia dae. Do ita moale bada bema ita naria noho negana ia ore bona ita kamonai iseda Biaguna ia gwau, “namo herea!”
Iseda Lohiabada Ena Haheauka Dainai Hahemauri Ita Abia
To edena bamona, bema guna ita laloa inai tanobada ena dokona be do ia mai haraga, to ia vara lasi? Tanobada ena dokona ia do mai lasi be mai ena badina namona. Aposetolo Petero ia gwau: “Lohiabada ese umui ia naria noho, mai haheauka danu. Ia ese nega namona umui dekenai ia henia noho inai, iena hamauria do umui davaria totona.” (2 Petero 3:15) Bema, Dirava ena palani ita diba namonamo bona mai manau ida ita laloparara iena ura hagugurua karana be mai anina bada, to iseda lalohadai be anina lasi, unai ese ita do idia durua Iehova be inai tanobada ia haheaukalaia hegeregerena ita haheauka totona.
Baibel torea tauna Iamesi ese Keristani taudia ia durudia idia haheauka totona, haheitalai ta ia gaukaralaia. Ia gwau: “Umui laloa: Biru tauna ese iena uma anina ia naria, mai ena haheauka danu. Oibe, ia naria ela bona medu ginigunana bona medu dokona danu idia diho vadaeni. Umui danu do umui haheauka. Bona mai abidadama ena laloa goada danu, Lohiabada do umui naria noho, badina iena mai be kahirakahira.”—Iamesi 5:7, 8.
Iehova Dirava ia ura lasi ita naria noho lalonai, ita hesiku eiava iseda gaukara ita rakatania. Iena gaukara ia henia ita dekenai bona ia moale bema ita naria noho negana ita gaukaralaia unai gaukara ita karaia goadagoada totona. Iehova ia ura ita be aposetolo Paulo ese Heberu taudia dekenai ia torea revarevana lalonai ia gwauraia taudia huanai do ita noho: “Ai ura bada umui ta ta ese unai bamona do umui karaia goadagoada noho, ela bona emui mauri dokona. Badina be unai neganai, umui naria noho davana namona, mauri hanaihanai, do umui abia momokani. Umui lahedo lasi. To abidadama bona haheauka taudia edia kara bamona do umui karaia. Vadaeni Dirava ia gwauhamatalaia davana namona, iena natuna taudia do idia abia gauna, be umui ese do umui abia.”—Heberu 6:11, 12.
Unai dainai namo lasi ita hesiku. To, namona be iseda mauri lalonai iseda hetura karana Iehova Dirava ida, iseda abidadama Iesu ena boubou gauna dekenai bona iseda helaro namona nega matamata totona ese ita idia hagoadaia. Iesu ena parabole lalonai ia herevalaia ‘hesiai tauna namona mai ena kara maoromaoro’ bamona, namona be ita hahedinaraia ita be hesiai taudia namodia, bona davana namona ita abia be maoro, badina ita be Dirava ena ladana hanamoa gaukarana ita karaia noho, salamo torea tauna ese ia karaia bamona. Ia gwau: “Lau ese oiemu durua lau naria noho, mai egu abidadama danu. Bona oi do lau hanamoa noho, bona inai hanamoa ma do lau habadaia.”—Salamo 71:14.
[Picture on page 30]
Iona ia badu, bona Nineva dekenai dahaka do ia vara ia itaia totona ia naria
[Pictures on page 31, 32]
Iehova ena dina ita naria noho lalonai namona be Dirava badinaia karana ita hahedinaraia