Dirava Ena Maino Tanobada Matamatana—Unuseniai Oi Noho Diba

DIRAVA ese Adamu bona Heva be Eden umana lalonai ia atodia. Herevana idia kamonai henia lasi bona idia mase, Dirava ese edia natudia, bona ita totona dala ia karaia Paradaiso dekenai ita noho ela bona hanaihanai totona. Baibel ia gwau: “Kara maoromaoro taudia ese, Dirava ia henidia tano dekenai do idia noho ela bona hanaihanai.”​—Salamo 37:29.

Baibel be “guba matamata” bona “tanobada matamata” ia gwauraia. (Isaia 65:17; 2 Petero 3:​13) Hari ia noho “guba” anina be hari inai negai taunimanima edia gavamani, to Iesu Keriso bona ia ida guba dekenai do idia lohia taudia be “guba matamata” lalonai idia noho. Do ia namo herea bema inai guba matamata, maino ia mailaia Dirava ena kara maoromaoro gavamanina unai, ese tanobada ibounai ia lohiaia!

Vadaeni, “tanobada matamata” be dahaka?— Tanobada matamata be Iehova idia lalokau henia kara namo taudia. Baibel ese “tanobada” ia herevalaia neganai, nega haida ia be tanobada dekenai idia noho taudia ia herevalaia, to tano korikorina lasi. (1 Sivarai 16:31; Salamo 69:34; 97:1) Unai dainai tanobada matamatana ese ia laulaulaia taudia be inai tanobada dekenai do idia noho.

Unai neganai kara dika taudia edia tanobada be do ia noho lasi. Laloatao, Noa ena negai ia vara Abata ese taunimanima edia tanobada dikana ia hadikaia ore. Bona ita dibaia vadaeni, inai tanobada dikana be Aramagedono ai do idia hadikaia ore. Aramagedono murinai Dirava ena tanobada matamatana dekenai mauri be do edena bamona, mani ita laloa.

Oi ura Dirava ena maino tanobada matamatana ena Paradaiso dekenai do oi noho ela bona hanaihanai, a?— Doketa ta be ita dekenai mauri hanaihanai ia henia diba lasi. Muramura ta ese ita do ia durua diba lasi ita mauri hanaihanai totona. Do ita mauri diba ela bona hanaihanai ena dala tamona be Dirava kahirakahira ita lao. Bona Hadibaia Tauna Badana be ita dekenai unai dala ia hadibaia.

Mani iseda Baibel ita abia bona Ioane karoa 17, siri 3 dekenai ita kehoa. Unuseniai Hadibaia Tauna Badana ena hereva ita davaria, ia gwau: “Mauri hanaihanai be inai: Idia ese oi Dirava momokani tamona do idia diba, bona Iesu Keriso, oi ese oi siaia tauna danu do idia diba.”

Unai dainai, Iesu ia gwau ita mauri hanaihanai totona dahaka ita karaia be namo?— Gau ginigunana be, iseda guba Tamana, Iehova bona ena Natuna, ita dainai iena mauri ia henia tauna ita dibaia. Anina be Baibel ita stadilaia be gau badana. Inai buka, Hadibaia Tauna Badana amo Diba Ita Abia, ese ita ia durua noho unai bamona ita karaia totona.

To edena dala ai Iehova dibaia karana ese ita ia durua ita mauri hanaihanai totona?— Dina ta ta ai aniani ita abia hegeregerena, namona be dina ta ta ai Iehova ita dibaia. Baibel ia gwau: “Aniani sibona dekena amo taunimanima do idia mauri lasi, to Dirava ena uduna dekena amo idia mai hereva ibounai ese mauri ia henia.”​—Mataio 4:4.

Namona be Iesu Keriso ita dibaia danu, badina Dirava ese iena Natuna ia siaia iseda kara dika ia kokia totona. Baibel ia gwau: “Hamauria be Iesu sibona ese ia henia diba taunimanima dekenai.” Bona Baibel ma ia gwau: “Dirava ena Natuna ia abidadama henia tauna ese mauri hanaihanai do ia abia.” (Kara 4:​12; Ioane 3:​36) Iesu ita abidadama henia bona ita abia dae unai dala tamona amo mauri hanaihanai ita abia diba, a?— Bema ita abia dae, dina ta ta ai Hadibaia Tauna Badana amo diba ita abia noho bona ia hereva gauna be do ita karaia.

Hadibaia Tauna Badana amo diba ita abia dalana ma ta be, inai buka ita duahia loulou bona ena laulau ibounai ita itaia bona ita laloa. Mani oi itaia bema oi hegeregere unai laulau ida idia torea henanadai oi haerelaia diba. Danu, emu sinana eiava tamana ida inai buka oi duahia. Bema emu tama sina idia noho lasi, taunimanima badadia bona natudia ma haida ida oi duahia. Do ia namo herea bema ma haida oi durua Hadibaia Tauna Badana ena sivarai idia diba totona, unai amo Dirava ena tanobada matamatana ai do idia mauri hanaihanai diba, ani?—

Baibel ia gwau: ‘Tanobada be kahirakahira do ia ore.’ To Dirava ena tanobada matamatana dekenai ita noho diba dalana be Baibel ese ia gwauraia hedinarai. Ia gwau: “Dirava ena ura ia karaia noho tauna be do ia noho ela bona hanaihanai.” (1 Ioane 2:​17) Unai dainai edena dala ai Dirava ena tanobada matamatana ai ita noho hanaihanai diba?— Oibe, Iehova bona ena lalokau Natuna, Iesu ita dibaia karana amo. To ita dibaia gaudia ita badinaia danu be namo. Inai buka stadilaia karana ese oi do ia durua unai oi karaia totona.