Iseda Dekena Taudia Ita Lalokau Henia Ena Anina
“Oiemu badibadinai tauna dekenai oi lalokau henia, oi sibona oi lalokau henia bamona.”—MATAIO 22:39.
1. Edena bamona ita hahedinaraia diba ita be Dirava ita lalokau henia?
IEHOVA be Ia idia tomadiho henia taudia amo dahaka ia ura? Iesu ese haere kwadogina ia henia, to ia be mai anina bada. Ia gwau taravatu hereadaena be Iehova do umui lalokau henia mai emui kudouna ibounai, lalona ibounai, bona goada ibounai ida. (Mataio 22:37; Mareko 12:30) Stadi ginigunana dekenai ita itaia vadaeni, Dirava ita lalokau henia ena anina be Iehova bona iena taravatu do ita badinaia, badina Ia ese ita ia lalokau henia. Dirava idia lalokau henia taudia be Iena ura idia karaia mai moale ida, idia dekenai unai be metau gauna lasi.—Salamo 40:8; 1 Ioane 5:2, 3.
2, 3. Dahaka dainai dekena taudia lalokau henia taravatuna ita laloa bada be namo, bona dahaka henanadai idia vara?
2 Iesu ia gwau taravatu iharuana be ginigunana hegeregerena: “Oiemu badibadinai tauna dekenai oi lalokau henia, oi sibona oi lalokau henia bamona.” (Mataio 22:39) Hari ita be unai taravatu do ita herevalaia bona ia be mai anina. Badina hari inai negai, taunimanima momo be lalokau idia hahedinaraia lasi. Aposetolo Paulo be “nega ena dokona” ia herevalaia neganai, ia gwau taunimanima be ta ta do idia lalokau henia lasi, to sibona edia ura do idia tahua, moni bona moale do idia ura henia. Momo be “lalokau do idia diba lasi,” eiava Baibel ta ia gwau bamona, “edia ruma bese do idia lalokau henia lasi.” (2 Timoteo 3:1-4) Iesu Keriso ia gwau: “Taunimanima momo . . . ese ta ta do idia samania, bona idia ta ta ese ta ta do idia badu henia. . . . Taunimanima momo edia lalokau be do ia keru.”—Mataio 24:10, 12.
3 To, Iesu ia gwau lasi taunimanima ibounai edia lalokau do ia keru. Badina idaunega amo ema bona hari, haida be Iehova idia do lalokau henia noho. Iehova idia lalokau henia momokani taudia ese ma haida do idia lalokau henia, Ia ese idia ia lalokau henia hegeregerena. Daidia be iseda dekena taudia? Edena dala ai iseda dekena taudia dekenai lalokau ita hahedinaraia diba? Baibel ese ita ia durua diba unai mai anina bada henanadai ita haerelaia totona.
Lauegu Dekena Tauna be Daika?
4. Levitiko karoa 19 hegeregerena, Israela taudia be daidia do idia lalokau henia?
4 Iesu ese taravatu iharuana—dekena tauna oi lalokau henia sibona oi lalokau henia, hegeregerena—be Farisea tauna dekenai ia gwauraia neganai, Israela taudia edia taravatu ta ia herevalaia. Unai taravatu be Levitiko 19:18 ai ia noho. Unai karoa ia hahedinaraia, Iuda taudia be Israela taudia sibona lasi, to ma haida danu do idia lalokau henia be namo. Siri 34 ia gwau: “Idau taudia be emui bese korikori hegeregerena umui emui huanai do idia noho. Do umui lalokau henidia, umui sibona umui lalokau henia hegeregerena. Do umui laloaboio lasi, umui danu be Aigupito tano dekenai idau taudia bamona umui noho guna.” Unai dainai, Iuda lasi taudia danu be mai lalokau ida do idia kara henia.
5. Iuda taudia be dekena taudia lalokau henia karana ena anina be edena bamona idia lalopararalaia?
5 To Iesu ena negai idia noho Iuda gunalaia taudia edia lalohadai be idau. Idia gwau Iuda taudia sibona be edia “turana” bona “dekena tauna.” Iuda lasi taudia be do idia inai henia. Idia gwau Dirava idia tomadiho henia taudia ese Dirava idia tomadiho henia lasi taudia idia inai henia be namo. Buka ta ia gwau: “Taunimanima momo be unai lalohadai kerere idia abia dainai, unai nega lalonai, inai heheni karana be ia bada herea.”
6. Iesu be dekena taudia lalokau henia karana ia herevalaia neganai, dahaka gau rua ia hahedinaraia?
6 Iesu ena Ororo Harorona ai, unai gauna ia herevalaia, unai amo ia hahedinaraia daika dekenai lalokau idia hahedinaraia be namo. Ia gwau: “Umui kamonai vadaeni, guna idia gwau, ‘Emui turadia dekenai umui lalokau henia, to badu henia taudia dekenai do umui badu henia.’ To lau ese umui lau hamaoroa, umui dekenai idia badu henia taudia do umui lalokau henia, bona umui dekenai idia dagedage henia taudia dainai do umui guriguri. Unai dekena amo emui Tamana guba dekenai ia noho ese iena natuna do ia halaoa umui. Badina be ia ese kara dika taudia bona kara namo taudia edia latanai dina ena diari ia henia noho. Medu danu kara maoro taudia bona kara kerere taudia edia latanai ia siaia diho.” (Mataio 5:43-45) Iesu ese gau rua ia hahedinaraia. Ginigunana be, Iehova ese ena hariharibada bona hebogahisi be kara maoromaoro bona kara dika taudia dekenai ia hahedinaraia. Iharuana be, iena haheitalai ita tohotohoa be namo.
7. Samaria tauna ena parabole amo dahaka ita dibaia?
7 Nega ta, taravatu ia diba momo Iuda tauna ta ese Iesu ia nanadaia: “Lauegu badibadinai tauna be daika?” Iesu ese parabole ta ia gwauraia. Samaria tauna ta ese Iuda tauna ta ia davaria, unai tauna be henaohenao taudia ese idia dadabaia bona ena kohu ibounai idia henaoa. Ena be Iuda taudia ese Samaria taudia idia inai henia, to Samaria tauna ese unai tauna ena bero ia kumia bona ia namo lou totona laolao taudia edia ruma dekenai ia abia lao. Unai amo dahaka ita dibaia? Iseda lalokau be bese tamona eiava tomadiho tamona taudia sibona dekenai ita hahedinaraia lasi.—Luka 10:25, 29, 30, 33-37.
Iseda Dekena Taudia Ita Lalokau Henia Ena Anina
8. Levitiko karoa 19 hegeregerena, lalokau be edena bamona do idia hahedinaraia?
8 Dirava lalokau henia karana hegeregerena, dekena taudia lalokau henia karana be hemami ta sibona lasi, to kara amo ita hahedinaraia danu. Levitiko 19 ese Dirava ena taunimanima ia hagoadaia edia dekena taudia do idia lalokau henia, sibona idia lalokau henia hegeregerena. Unai dainai unai karoa ibounai ita laloa be namo. Unuseniai ia hahedinaraia, Israela taudia be uma aniani idia haboua neganai, ogogami taudia bona idau bese taudia do idia lulua lasi, to idia danu be aniani do idia haboua. Israela taudia be do idia henaohenao lasi, koikoi lasi, eiava kara gageva lasi. Hahemaoro idia karaia neganai, ta ena toana idia laloa lasi be namo. Ena be ta ia kerere neganai, do idia hahemaoro henia be namo, to inai sisiba idia abia danu: “Emui tadikakana do oi badu henia noho lasi, oiemu lalona dekenai.” Unai dainai inai hereva be mai anina bada: “Emui badibadinai tauna do umui lalokau henia, umui sibona umui lalokau henia hegeregerena.”—Levitiko 19:9-11, 15, 17, 18.
9. Dahaka dainai Iehova ese Israela taudia ia hagania, idau bese taudia ida do idia turana karaia lasi?
9 Ena be Israela taudia be ma haida dekenai lalokau idia hahedinaraia be namo, to namona be Dirava koikoi idia tomadiho henia taudia idia bamoa lasi. Iehova be Israela taudia dekenai hebamo dikana ese ia havaraia dika ia gwauraia. Hegeregere, Israela taudia ese bese haida do idia halusia dainai, Iehova ese idia ia hagania: “Bese taudia ta do umui adavaia lasi, umui emui natudia kekeni be edia uhau taudia dekenai do umui henidia lasi, bona edia natudia kekeni do umui abidia lasi emui uhau totona. Badina unai bamona neganai, idia ese emui natudia Lohiabada dekena amo do idia hakaua siri, idau dirava tomadiho henia totona.”—Deuteronomi 7:3, 4.
10. Namona be daidia ita bamoa lasi?
10 Unai hegeregerena, namona be Keristani taudia be edia abidadama do idia hamanokaia diba taudia do idia bamoa lasi. (1 Korinto 15:33) Baibel ena sisiba be: “Dirava idia abidadama henia lasi taudia danu do umui hakapua tamona lasi.” Anina be Keristani kongrigeisen lalonai idia noho lasi taudia do ita bamoa lasi. (2 Korinto 6:14) Danu, Keristani taudia be ‘Keristani tauna sibona do idia adavaia’ be namo. (1 Korinto 7:39) To, ita be Iehova ita tura henia dainai, namo lasi Iehova idia tomadiho henia lasi taudia ita inai henia. Keriso be kara dika taudia totona ia mase, bona guna kara dikadia idia karaia taudia momo be edia kara idia haidaua bona Dirava ena turana ai idia lao.—Roma 5:8; 1 Korinto 6:9-11.
11. Edena dala ai Iehova idia hesiai henia lasi taudia dekenai lalokau ita hahedinaraia diba, bona dahaka dainai?
11 Iehova ena kara ita tohotohoa totona, namona be Dirava idia hesiai henia lasi taudia dekenai lalokau ita hahedinaraia. Ena be Dirava be kara dikadia ia ura henia lasi, to ia ese taunimanima ibounai dekenai hebogahisi-mai-lalokauna ia hahedinaraia, unai amo idia be edia kara dika amo do idia helalo-kerehai bona mauri hanaihanai do idia abia. (Esekiela 18:23) Iehova “ia ura taunimanima ibounai ese dika dekena amo edia lalona do idia giroa.” (2 Petero 3:9) Ia ura “taunimanima ibounai ese mauri do idia davaria, bona hereva momokani do idia diba.” (1 Timoteo 2:4) Unai dainai Iesu ese ena murinai idia raka taudia ia hagania idia haroro bona hadibaia gaukara idia karaia totona, bona ‘bese ibounai be diba tahua taudia do idia halaoa.’ (Mataio 28:19, 20) Unai gaukara ita karaia neganai, Dirava bona dekena taudia, ita idia inai henia taudia dekenai danu, lalokau ita hahedinaraia diba!
Iseda Keristani Tadikaka Lalokau Henia
12. Iseda tadikaka lalokau henia karana dekenai, aposetolo Ioane be dahaka ia gwau?
12 Aposetolo Paulo ia gwau: “Taunimanima ibounai dekenai kara namodia do ita karaia. To Keriso ena abidadama henia taudia do ita durua bada herea be namo.” (Galatia 6:10) Ita be Keristani taudia dainai, iseda tadikaka bona taihu dekenai lalokau ita hahedinaraia be namo. Edena dala ai unai lalokau be mai anina bada? Aposetolo Ioane ese unai ia hahedinaraia, ia gwau: “Iena tadikakana ia badu henia noho tauna be ala-ala tauna. . . . Tau ta bema ia gwau, ‘Lau ese Dirava lau lalokau henia,’ to ia ese iena tadikakana ia badu henia, unai tau be koikoi tauna. Badina be iena tadikakana, ia itaia diba tauna, bema ia ura henia lasi, edena bamona ia itaia diba lasi Diravana do ia ura henia diba?” (1 Ioane 3:15; 4:20) Unai hereva be mai ena siahu. Iesu Keriso ese Satani Diabolo ia gwauraia “alaia tauna” bona “koikoi tauna.” (Ioane 8:44) Ita ura lasi ita be unai bamona do idia gwauraia!
13. Edena dala ai iseda tadikaka dekenai lalokau ita hahedinaraia diba?
13 Dirava ese Keristani taudia ia hadibaia ta ta idia lalokau henia totona. (1 Tesalonika 4:9) Lalokau be “hereva sibona dekena amo lasi, to mai kara, bona mai momokani danu” ita hahedinaraia. (1 Ioane 3:18) Taunimanima ita “lalokau henia koikoi lasi.” (Roma 12:9) Lalokau dainai hebogahisi, dika gwauatao karana, bona haheauka ita hahedinaraia. To ita mama lasi, hekokoroku lasi, bona sibona iseda ura ita tahua lasi. (1 Korinto 13:4, 5; Efeso 4:32) Ita ia hagoadaia ‘ta ta dekenai durua ita henia totona.’ (Galatia 5:13) Iesu ese ena hahediba taudia ia hamaoroa ta ta do idia lalokau henia, ia ese idia ia lalokau henia hegeregerena. (Ioane 13:34) Unai dainai Keristani tauna ta be mai ena ura ida ena tadikaka totona ena mauri ia atoa diho be namo.
14. Edena dala ai ruma bese lalonai lalokau ita hahedinaraia diba?
14 Keristani ruma bese lalonai bona headava tau bona hahine huanai lalokau idia hahedinaraia be gau badana. Unai dainai Paulo ia gwau: “Namona be tatau ese edia adavana do idia lalokau henia, idia edia tauanina idia lalokau henia hegeregerena. Adavana ia lalokau henia tauna ese sibona ia lalokau henia noho.” (Efeso 5:28) Ma Paulo ese siri 33 dekenai unai ia gwauraia lou. Tau be ena adavana ia lalokau henia be namo, namo lasi Malaki ena negai edia adavadia idia koia Israela tatau edia kara idia tohotohoa. (Malaki 2:14) Tau be ena adavana do ia laloa bada. Ia ese ena adavana do ia lalokau henia, Keriso ese kongrigeisen ia lalokau henia hegeregerena. Unai hegeregerena, lalokau dainai hahine ese ena adavana do ia matauraia.—Efeso 5:25, 29-33.
15. Mozambique ai, tadikaka be lalokau idia hahedinaraia dainai, dahaka ia vara?
15 Momokani, lalokau be Keristani taudia edia kara korikori. Iesu ia gwau: “Unai dekena amo taunimanima ibounai do idia diba umui be lauegu diba tahua taudia, ta ta dekenai do umui lalokau henia dainai.” (Ioane 13:35) Ta ta ita lalokau henia dainai, taunimanima do idia ura ita lalokau henia bona hesiai henia Diravana kahirakahira idia lao. Hegeregere, Mozambique amo Witnes famili ta ena ripoti ia mai. Unai ripoti ia gwau: “Unai bamona gauna ta ai itaia diba lasi. Adorahi ai, lai badana ia toa matamaia, bena medu bada herea ia diho. Unai lai badana ese emai ruma ia hadikaia. Kongrigeisen haida amo tadikaka idia mai bona emai ruma idia haginia lou neganai, emai dekena taudia idia hoa dainai, idia gwau: ‘Emu tomadiho taudia be namo herea. Emai dubu taudia be unai bamona heduru idia henia diba lasi.’ Idia dekenai Ioane 13:34, 35 ai duahia. Hari, emai dekena taudia momo be Baibel idia stadilaia noho.”
Taunimanima Ta Ta Lalokau Henia
16. Taunimanima ibounai bona ta ta dekenai ita hahedinaraia lalokauna, ena idau be dahaka?
16 Iseda dekena taudia ibounai ita lalokau henia be auka lasi. To tau ta dekenai lalokau ita hahedinaraia be ia auka. Hegeregere, taunimanima haida be dekena taudia dekenai edia lalokau idia hahedinaraia totona, taunimanima durua oreadia dekenai edia kohu bona moni idia henia. Momokani, ena be ita gwau iseda dekena tauna ita lalokau henia, to bema iseda gaukara turana ta be ita ia laloa bada lasi, bona iseda dekena tauna eiava turana ta be ia badu momo, unai bamona taudia ita lalokau henia be auka.
17, 18. Edena dala ai Iesu ese taunimanima ta ta dekenai lalokau ia hahedinaraia, bona unai bamona ia karaia ena badina badana be dahaka?
17 Taunimanima ta ta lalokau henia karana dekenai, Dirava ena kara ia hahedinaraia goevagoeva tauna Iesu amo diba do ita abia. Ena be tanobada taudia ibounai edia kara dika kokia totona ia mai, to taunimanima ta ta dekenai lalokau ia hahedinaraia, hegeregere, ia gorere hahine, lepera tauna, bona natuna ta dekenai. (Mataio 9:20-22; Mareko 1:40-42; 7:26, 29, 30; Ioane 1:29) Unai hegeregerena, dina ta ta ai iseda dekena taudia ita kara henia dalana amo lalokau ita hahedinaraia.
18 Namona be ita laloaboio lasi, Dirava ita lalokau henia dainai, ita ura ma haida dekenai lalokau ita hahedinaraia. Ena be Iesu ese ogogami taudia ia durua, gorere taudia ia hanamoa, hitolo taudia ia ubua, bona hutuma ia haroro henia, to unai ia karaia badina ia ura taunimanima ia durua Dirava idia tura henia totona. (2 Korinto 5:19) Iesu be ia lalokau henia Diravana ia hesiai henia bona Iena kara ia hahedinaraia dainai, ia karaia gaudia ibounai lalonai Dirava ia hanamoa. (1 Korinto 10:31) Iesu hegeregerena, dekena taudia dekenai lalokau ita hahedinaraia diba bona inai tanobada dikana do ita dadaraia.
Edena Dala ai Iseda Dekena Tauna Do Ita Lalokau Henia, Sibona Ita Lalokau Henia Hegeregerena?
19, 20. Sibona ita lalokau henia hegeregerena, iseda dekena taudia do ita lalokau henia, ena anina be dahaka?
19 Iesu ia gwau: “Oiemu badibadinai tauna dekenai oi lalokau henia, oi sibona oi lalokau henia bamona.” Sibona ita naria namonamo bona ita matauraia be kerere lasi. Badina bema unai bamona oi karaia lasi, Iesu ese ia gwauraia taravatu be anina lasi. Sibona ita matauraia karana be Paulo ese 2 Timoteo 3:2 ai ia gwauraia sibona eda ura tahua karana amo ia idau. Baibel ia diba momo tauna ta ia gwau, ‘sibona lalokau henia karana be sibona ia abia isi lasi eiava ia hamaragia lasi.’
20 Sibona ita lalokau henia hegeregerena, haida ita lalokau henia, ena anina be haida ita kara namo henia hegeregerena, ita ura idia danu ese unai bamona ita idia kara henia. Iesu ia gwau: “Unai dainai, gau ibounai umui ura taunimanima ese do idia karaia umui dekenai, umui ese unai bamona do umui karaia idia dekenai.” (Mataio 7:12) Iesu ia gwau lasi ma haida ese guna ita dekenai idia karaia gauna dainai, ita ura davana ita henia lou. Lasi. To, namona be ita laloa, ita ura edena bamona ma haida ese ita do idia kara henia, bena ita ese idia be unai bamona do ita kara henia. Mani Iesu ena hereva oi laloa, ia gwau lasi iseda turadia eiava tadikaka sibona do ita lalokau henia. Inai hereva “taunimanima” ia gaukaralaia amo, ia hahedinaraia ita hedavari taudia ibounai dekenai kara namo ita hahedinaraia.
21. Ma haida ita lalokau henia neganai, ita be dahaka ita hahedinaraia?
21 Dekena tauna ita lalokau henia dainai, ita ura lasi kara dikana ta do ita karaia. Aposetolo Paulo ia gwau: “Taravatu ia gwau: Do umui heudahanai lasi, taunimanima do umui alaia lasi, do umui henaoa lasi, bona tau ta ena kohu dainai do umui mama henia lasi. Inai ibounai, bona Taravatu oredia ibounai be inai Taravatu tamona lalonai idia haboua: Oiemu badibadinai tauna dekenai do oi lalokau henia, oi sibona oi lalokau henia bamona. Daika ese iena badibadinai tauna ia lalokau henia, be do ia hadikaia diba lasi.” (Roma 13:9, 10) Lalokau dainai dala do ita tahua ma haida dekenai kara namodia ita hahedinaraia totona. Taunimanima ita lalokau henia neganai, ita hahedinaraia Iehova, iena toana hegeregerena taunimanima ia havaraia Diravana, ita lalokau henia.—Genese 1:26.
Edena Bamona Do Oi Haere?
• Lalokau be daika dekenai do ita hahedinaraia, bona dahaka dainai?
• Edena dala ai Iehova idia hesiai henia lasi taudia dekenai lalokau ita hahedinaraia diba?
• Iseda tadikaka dekenai ita hahedinaraia lalokau be Baibel ese edena bamona ia gwauraia?
• Sibona ita lalokau henia hegeregerena, iseda dekena taudia do ita lalokau henia, ena anina be dahaka?
[Picture on page 28]
“Lauegu badibadinai tauna be daika?”
[Picture on page 31]
Iesu be taunimanima ta ta ia lalokau henia