Hisihisi Negadiai, Iehova be Iseda “Mauri Davaria Gabuna”
“Kara maoromaoro taudia, be Lohiabada ese do ia hamauria, vadaeni hekwarahi o nega dika neganai, Lohiabada dekenai idia lao diba, badina ia be edia mauri davaria gabuna.”—SALAMO 37:39.
1, 2. (a) Iesu be ena hahediba taudia totona ia guriguri neganai, dahaka ia gwau? (b) Iehova ena ura be dahaka ena taunimanima dekenai?
IEHOVA be siahu ibounai Diravana. Ia be mai ena siahu dainai ena ura dalana hegeregerena ai ena abidadama tomadiho taudia ia gimaia diba. Ia ese iena taunimanima be tanobada taudia amo ia hapararaia bena noho namo bona maino gabuna dekenai ia atodia diba. To, Iesu ese ena hahediba taudia totona ia guriguri neganai, ena Tamana dekenai ia gwau: “Lau noinoi lasi tanobada dekena amo idia oi kokia totona, to lau noinoi Tau Dikana dekena amo idia do oi hamauria.”—Ioane 17:15.
2 Iehova ia abia hidi vadaeni ‘tanobada dekena amo ita do ia kokia lasi.’ To, iena ura be inai tanobada taudia huanai do ita noho bona iena helaro sivaraina ita harorolaia bona haida ita hagoadaia. (Roma 10:13-15) To, Iesu ena guriguri lalonai ia hahedinaraia hegeregerena, inai tanobada dekenai ita noho neganai, “Tau Dikana” be ita ia hadikaia diba. Gwau-edeede taudia bona lauma dikadia ese hisihisi bona lalo-hekwarahi bada idia havaraia, bona Keristani taudia be hisihisi idia mamia danu.—1 Petero 5:9.
3. Mai abidadama ida Iehova idia tomadiho henia taudia be dahaka idia davaria danu, to Dirava ena Hereva lalonai dahaka hagoadaia herevana ita davaria?
3 Unai bamona hahetoho ita davaria neganai, vaia ita lalo-manoka diba. (Aonega Herevadia 24:10) Baibel lalonai, hisihisi idia davaria abidadama taudia momo edia sivarai idia noho. Salamo torea tauna ia gwau: “Kara maoromaoro tauna ena hisihisi be momo, to Lohiabada ese unai tau do ia durua, vadaeni unai hisihisi do ia ore.” (Salamo 34:19) Oibe, “kara maoromaoro tauna” dekenai danu gau dikadia idia vara. Salamo torea tauna Davida bamona, reana nega haida ita danu ita “manoka” momokani. (Salamo 38:8) To, Iehova “be lalohisihisi taudia kahirakahira ia noho, bona ia ese edia lalona ia ore taudia ia hamauria noho” bona unai ita diba be hagoadaia gauna.—Salamo 34:18; 94:19.
4, 5. (a) Aonega Herevadia 18:10 hegeregerena, Iehova ese ita ia gimaia totona dahaka ita karaia be namo? (b) Dahaka kara haida ita karaia be namo, Dirava ena heduru ita abia totona?
4 Iesu ena guriguri hegeregerena, Iehova be ita ia naria noho. Lalohisihisi negadiai, Ia be iseda “mauri davaria gabuna.” (Salamo 37:39) Aonega Herevadia bukana be unai bamona ia hereva danu, ia gwau: “Lohiabada be kohoro goadana hegeregerena. Kara maoromaoro taudia be unuseni do idia heau vareai, bona do idia mauri noho.” (Aonega Herevadia 18:10) Unai siri ese ia hahedinaraia Iehova be ia havaraia taudia ia lalokau henidia bada. Kara maoromaoro taudia be Dirava dekenai idia heau lao, hegeregere heduru totona kohoro goadana ta dekenai ita heau lao neganai, ia ese ita ia gimaia.
5 Lalohisihisi idia havaraia hekwakwanai ita davaria neganai, edena bamona Iehova dekenai ita heau lao bena ia ese ita ia gimaia diba? Iehova ena heduru ita abia totona, ita karaia diba mai anina bada gaudia toi mani ita herevalaia. Gau ginigunana be, iseda guba Tamana ita guriguri henia be namo. Iharuana be, iena lauma helaga ena hakaua dalana ita badinaia be namo. Bona ihatoina be, Iehova ese ia hegaegaelaia dalana ita badinaia bona ita idia durua diba Keristani tadikaka bona taihu ita bamodia be namo.
Guriguri Karana Ena Siahu
6. Keristani taudia momokanidia ese guriguri karana be edena bamona idia laloa?
6 Diba momo taudia haida idia gwau, lalohisihisi bona lalo-hekwarahi hanamoa dalana namona be guriguri karana. Momokani, ena be guriguri negadiai laloa namonamo karana ese ita ia durua ita lalo-hekwarahi momo lasi totona, to manu edia tai, eiava ta ese emu doruna ia gigia karana ese unai hemami ia havaraia diba danu. Keristani taudia momokanidia idia laloa lasi guriguri karana be hemami namona havaraia gauna sibona. Ita abia dae guriguri be mai hemataurai danu iseda Havaraia Tauna ida ita herevahereva karana. Dirava ita tomadiho bona abidadama henia karana lalonai, guriguri be mai anina bada. Oibe, guriguri be iseda tomadiho karana ena kahana ta.
7. Mai abidadama ida ita guriguri ena anina be dahaka, bona edena dala ai unai bamona guriguri karana ese ita ia durua lalo-hekwarahi ita haheaukalaia totona?
7 Namona be iseda guriguri karadia ese idia hahedinaraia, ita be Iehova ita abidadama bona ita tabekau henia. Aposetolo Ioane ia gwau: “Dirava ita abidadama henia dainai, ita diba momokani, bema gau ta iena ura hegeregerena ita noia neganai, ia ese ita dekenai do ia kamonai.” (1 Ioane 5:14) Iehova, Atai Herea bona siahu ibounai Diravana bona Dirava momokani tamona, be ia ura bada ia idia tomadiho henia taudia edia guriguri ia kamonai. Ita ia hagoadaia gauna be, ita diba iseda lalo-hekwarahi bona hekwakwanai be iseda lalokau Diravana dekenai ita gwauraia diba bona ia kamonai.—Filipi 4:6.
8. Dahaka dainai abidadama Keristani taudia be Iehova idia guriguri henia neganai, namo lasi idia hemarai eiava idia laloa idia be anina lasi?
8 Abidadama Keristani taudia be Iehova idia guriguri henia neganai, namo lasi idia hemarai, idia laloa idia be anina lasi, eiava idia mamia Dirava idia tabekau henia diba lasi. Momokani, ita sibona dekenai ita moale lasi eiava hekwakwanai be momo neganai, reana nega momo ita ura lasi Iehova ita guriguri henia. Unai bamona negadiai, namona be ita laloatao Iehova be “iena bese taudia, idia hisihisi noho bese, do ia bogahisihisi henia” bona “hisihisi idia abia noho taudia ia durua.” (Isaia 49:13; 2 Korinto 7:6) Hisihisi bada bona lalo-metau negadiai, namona be mai abidadama ida iseda guba Tamana, iseda mauri davaria gabuna, ita lao henia.
9. Dirava ita guriguri henia neganai, dahaka dainai abidadama be mai anina bada?
9 Guriguri ena namo ita abia totona, namona be iseda abidadama be momokani. Baibel ia gwau, “bema tau ta be Dirava kahirakahira ia ura lao neganai, ia ese Dirava do ia abidadama henia guna, Dirava be ia mauri noho. Bona unai tau ena abidadama be inai bamona: Dirava idia tahua taudia ibounai, be davana namona Dirava ese do ia henidia.” (Heberu 11:6) “Dirava be ia mauri noho” herevana ita abia dae sibona be abidadama karana lasi. Abidadama momokanina ena anina be ita abia dae momokani, Dirava ita badinaia dainai, ia ura ita dekenai davana namona do ia henia bona unai ia karaia momokani diba. “Lohiabada ese, kara maoromaoro taudia ia naridia noho, bona edia guriguri ia kamonai henia noho.” (1 Petero 3:12) Iehova be ita ia lalokau henia, bona nega ibounai unai ita laloa neganai, iseda guriguri karana do ita laloa bada.
10. Iehova ese lauma dalanai ita ia naria totona, namona be iseda guriguri be edena bamona?
10 Mai iseda kudouna ibounai ida Iehova ita guriguri henia neganai, iseda guriguri ia kamonai henia. Salamo torea tauna ia gwau: “Lohiabada e, mai egu kudouna ibounai danu oi dekenai lau boiboi. Lau dekenai mani do oi haere.” (Salamo 119:145) Iseda guriguri karana be tomadiho oreadia momo lalonai idia karaia karana ta lasi eiava idia gwauraia kava gurigurina ta lasi. Mai iseda “kudouna ibounai danu” Iehova ita guriguri henia neganai, iseda hereva be mai edia anina bona badina danu. Unai bamona guriguri murinai, iseda ‘lalo-hekwarahi be Lohiabada dekenai ita henia’ ena namo do ita mamia matamaia. Baibel ia gwauhamata bamona, ‘ia ese ita do ia durua.’—Salamo 55:22; 1 Petero 5:6, 7.
Dirava Ena Lauma Helaga be Ita Ia Durua Tauna Bamona
11. Iehova ita “noinoi” henia noho dainai, edena dala ta ai iseda guriguri ia haerelaia diba?
11 Iehova be guriguri ia Kamonai Henia Tauna sibona lasi to ia be Haere Henia Tauna danu. (Salamo 65:2) Davida ia gwau: “Egu hekwarahi neganai, lau ese oi dekenai lau tai henia noho, badina oi ese lau dekenai oi haere henia noho.” (Salamo 86:7) Unai hegeregerena, Iesu ese iena hahediba taudia ia hagoadaia Iehova ena heduru totona ‘do idia noinoi’ noho, badina “Tamana guba dekenai ia noho ese Lauma Helaga be idia noinoi taudia dekenai do ia henidia.” (Luka 11:9-13) Oibe, iena taunimanima dekenai Dirava ena lauma helaga be durua tauna eiava hagoadaia tauna bamona.—Ioane 14:16.
12. Hekwakwanai be momo herea neganai, Dirava ena lauma helaga ese edena bamona ita ia durua diba?
12 Hahetoho ita davaria neganai danu, Dirava ena lauma helaga ese ita dekenai ‘siahu bada’ ia henia diba. (2 Korinto 4:7) Hisihisi momo ia haheaukalaia tauna, aposetolo Paulo, be mai lalo-goada ida ia gwau: “Keriso ese lau ia hasiahua, vadaeni gau ibounai lau goadalaia diba.” (Filipi 4:13) Unai hegeregerena, Keristani taudia momo hari be Iehova idia guriguri henia neganai, edia haere idia abia badina edia lalona bona lauma dalanai idia goada lou. Nega momo, Dirava ena lauma helaga ena heduru ita abia murinai, ita mamia ita idia hahisia hekwakwanaidia be metau momokani lasi. Dirava ese ita dekenai ia henia goadana dainai, aposetolo Paulo bamona ita hereva diba: “Kahana ibounai dekena amo, hisihisi bona metau ai dekenai idia henia noho, to ai idia hadikaia momokani lasi. Nega haida ai laloa daradara, to gaukara dekena amo ai doko lasi. Taunimanima momo ese ai idia dagedage henia, to Dirava ese ai ia rakatania lasi. Ai idia botaia, ai moru, to ai mase lasi.”—2 Korinto 4:8, 9.
13, 14. (a) Edena dala ai Iehova be ena Hereva amo ia hamomokania, hisihisi negadiai, ia be iseda mauri davaria gabuna? (b) Baibel ena hakaua herevadia badinaia karana ese edena dala ai oi ia durua?
13 Ita eda namo totona, lauma helaga ese danu Dirava ena Hereva ia havaraia bona ia naria. Edena dala ai Iehova be ena Hereva amo ia hamomokania, hisihisi negadiai, ia be iseda mauri davaria gabuna? Dala ta be ita dekenai aonega bona laloa namonamo karana ia henia. (Aonega Herevadia 3:21-24) Baibel ese ita ia hadibaia iseda laloa maoromaoro karana ita hanamoa totona. (Roma 12:1, NW ) Hanaihanai Dirava ena Hereva ita duahia, ita stadilaia, bona ita badinaia karana amo, iseda lalona ita hadibaia ‘maoro bona kerere edia toana ita diba namonamo’ totona. (Heberu 5:14) Reana oi itaia vadaeni hekwakwanai oi davaria neganai, Baibel ena hakaua herevadia ese oi idia durua abia hidi maorona oi karaia totona. Baibel ese ita dekenai aonega ia henia bona unai ese ita ia durua diba iseda hekwakwanai hanamoa dalana namona ita davaria totona.—Aonega Herevadia 1:4.
14 Dirava ena Hereva be dala ma ta amo ita ia hagoadaia—unai be hahemauri ena helaro. (Roma 15:4, Buka Helağa) Baibel ese ia hahedinaraia gau dikadia be hanaihanai do idia vara noho lasi. Ita mamia hekwakwanai be nega kwadogina sibona gaudia. (2 Korinto 4:16-18) Iseda “abidadama ese mauri hanaihanai ia havaraia noho. Inai mauri hanaihanai be tanobada ia do karaia lasi neganai, Dirava ese ia gwauhamatalaia, bona Dirava be koikoi diba lasi.” (Tito 1:2) Bema unai helaro ita moalelaia bona Iehova ese ia gwauhamatalaia vaira nega namona ita laloa hanaihanai, hekwakwanai do ita haheaukalaia diba.—Roma 12:12; 1 Tesalonika 1:3.
Kongrigeisen —Dirava Ena Lalokau Toana Ta
15. Edena dala ai Keristani taudia be ta ta dekenai idia heduru heheni diba?
15 Iehova ese hisihisi negadiai ita ia durua diba dalana ta be Keristani kongrigeisen lalonai ita davaria tura namodia amo. Baibel ia gwau: “Tau ta ena turana ese ia lalokau henia noho, nega ibounai, bona nega dika ia vara neganai, oiemu tadikakana ese iena lalokau ia hedinaraia noho.” (Aonega Herevadia 17:17) Dirava ena Hereva ese kongrigeisen taudia ibounai ia hagoadaia ta ta dekenai do idia hemataurai bona lalokau heheni. (Roma 12:10) Aposetolo Paulo ia gwau: “Tau tamona sibona ena namo do ia tahua lasi, to namona be tau haida edia namo do ia tahua.” (1 Korinto 10:24) Unai bamona lalohadai ita abia ese ita ia durua diba ita sibona eda hekwakwanai ita laloa momo lasi, to ma haida durua daladia ita tahua guna totona. Ma haida ita durua neganai, idia sibona ita durua lasi to ita danu ita moale bona iseda hekwakwanai ita haheaukalaia diba.—Kara 20:35.
16. Edena dala ai Keristani taudia ta ta ese ma haida idia hagoadaia diba?
16 Ma haida hagoadaia gaukarana lalonai, lauma dalanai lo tatau bona hahine be mai anina bada maduna idia huaia diba. Unai bamona idia karaia totona, idia ese ibounai idia tura henia namonamo bona idia noho hegaegae heduru idia henia totona. (2 Korinto 6:11-13) Kongrigeisen be hahenamo bada do ia davaria momokani, bema ibounai ese nega idia atoa matamata taudia idia hanamoa, kamonai matamata taudia idia hagoadaia, bona lalo-manoka taudia idia durua. (Roma 15:7) Tadikaka lalokau henia karana ese ita ia durua ta ta dekenai lalohadai kereredia ita abia lasi totona. Namo lasi karaharaga ita gwau hekwakwanai ia davaria tauna be lauma dalanai ia manoka ena toana. Paulo ese Keristani taudia ia hagoadaia “manoka taudia do umui durua.” (1 Tesalonika 5:14) Baibel ese ia hahedinaraia abidadama Keristani taudia danu be hisihisi idia davaria.—Kara 14:15.
17. Edena dala idauidau ai iseda Keristani tadikaka ida hetura heheni karana ita hagoadaia diba?
17 Keristani heboudia be nega namodia, ta ta ita durua bona hagoadaia heheni totona. (Heberu 10:24, 25) Hebou negadia sibona ai unai lalokau karadia ita karaia lasi. To, Dirava ena taunimanima ese dala idia tahua danu nega idaudia ai idia moale hebou totona. Hisihisi ita davaria negadiai, do ita hegeregere ta ta ita durua totona, badina hetura karana goadana ita haginia vadaeni. Aposetolo Paulo ia gwau: “Tauanina be do ia parara lasi . . . bona kahana ibounai ese ta ta ibounai do idia naria. . . . Vadaeni, kahana ta do ia hisihisi neganai, kahana ibounai ese unai hisihisi ena mamina do idia abia. O bema kahana ta do idia hanamoa neganai, kahana ibounai ia danu do idia moale nega tamona.”—1 Korinto 12:25, 26.
18. Ita lalo-metau neganai dahaka kara ita dadaraia be namo?
18 Nega haida, reana ita lalo-metau bada dainai, ita ura lasi iseda Keristani tadikaka edia hebamo ita moalelaia. Unai bamona lalohadai ita dadaraia be namo, iseda tadikaka edia heduru bona hagoadaia karadia ita reaia be namo lasi. Baibel ese inai sisiba ia henia: “Ia sibona ia noho, turana lasi tauna, ese sibona ena ura mo ia tahua noho. Ia ese taunimanima haida edia laloa namodia ia ura lasi.” (Aonega Herevadia 18:1) Iseda tadikaka bona taihu edia kara amo Dirava ese ia hahedinaraia, Ia be ita ia laloa bada. Bema unai lalokau karana ita abia dae, hisihisi negadiai heduru do ita davaria diba.
Lalohadai Maorona Dogoatao Noho
19, 20. Baibel ese edena bamona ita ia durua lalohadai kereredia ita dadaraia totona?
19 Ita lalo-manoka bona lalo-metau neganai, lalohadai kereredia idia vara haraga diba. Hegeregere, hekwakwanai idia vara neganai, haida idia laloa reana lauma dalanai idia goada lasi, idia laloa Dirava be idia dekenai ia badu dainai, unai hekwakwanai idia davaria. To, namona be ita laloatao, Iehova be “kara dika” amo ita ia dibagania lasi. (Iamesi 1:13) Baibel ia gwau: “Lohiabada ese, ia ura lasi ita dekenai lalohisihisi o hisihisi do ia havaraia.” (Lalohisihisi Ena Ane 3:33) Iena hesiai taudia be hisihisi idia davaria neganai, Iehova ia hebogahisi bada.—Isaia 63:8, 9; Sekaraia 2:8.
20 Iehova be “bogahisihisi bona durua ibounai ia henia Diravana.” (2 Korinto 1:3) Ia ese ita ia laloa bada, bona nega korikorina ai ita do ia durua. (1 Petero 5:6, 7) Nega ibounai do ita laloatao, Dirava be ita ia lalokau henia, bona unai ese ita do ia durua lalohadai maorona ita dogoatao bona ita moale noho totona. Iamesi ia gwau: “Lauegu varavara taudia e, bema dibagani idauidau ese umui dekenai ia ginidae neganai, inai bamona do umui laloa be namo: Inai be moale gauna sibona.” (Iamesi 1:2) Dahaka dainai? Ia haere: “Badina be unai dika dekena amo ia kwalimu neganai, ia ese Dirava ia gwauhamata gauna, mauri hanaihanai, iena kwalimu ahuna, do ia davaria. Dirava ia hereva vadaeni, ia idia lalokau henia taudia ibounai ese unai mauri hanaihanai do idia davaria.”—Iamesi 1:12.
21. Herevana dahaka hekwakwanai ita davaria, Dirava ese ia idia abidadama henia taudia dekenai dahaka gwauhamata ia karaia?
21 Iesu ena hadibaia herevana hegeregerena, tanobada dekenai hisihisi do ita abia. (Ioane 16:33) To, Baibel ena gwauhamata be ‘nega dika, hisihisi, dagedage, hitolo, ogogami, eiava gari bada gauna ese’ ita dekenai amo Iehova bona Iesu edia lalokau idia koua diba lasi. (Roma 8:35, 39) Ita moale badina ita diba ita davaria hisihisi be daudau lasi murinai do idia ore! To, taunimanima ese idia davaria hisihisi idia ore negana ita naria noho lalonai, iseda lalokau Tamana, Iehova be ita ia naria noho. Hisihisi idia vara neganai, bema ia dekenai ita heau lao, ia be iseda “heau mauri gabuna momokani” ai do ia lao.—Salamo 9:9.
Dahaka Ita Dibaia?
• Keristani taudia be inai tanobada dikana lalonai idia noho dainai, idia diba dahaka do idia davaria?
• Hahetoho ita davaria neganai, edena dala ai iseda guriguri goadagoada karana ese ita ia hagoadaia diba?
• Edena dala ai Dirava ena lauma be durua tauna ta bamona?
• Dahaka ita karaia diba ta ta ita durua heheni totona?
[Picture on page 12]
Kohoro goadana ta dekenai ita heau vareai bamona, Iehova do ita tahua be namo
[Pictures on page 14]
Lauma dalanai lo taudia be nega ibounai ma haida idia hanamoa bona hagoadaia