Tatau E—Keriso Ena Kwara Dagina Umui Tohotohoa
“Tatau ibounai edia kwarana be Keriso.”—1 KORINTO 11:3.
1, 2. (a) Ruma bese kwarana namona be edena bamona tauna? (b) Dahaka dainai ita abia dae Dirava be headava ia havaraia be mai anina bada?
EDENA bamona tauna be ruma bese kwarana namona? Iena diba be bada bona ena tauanina be goada tauna, a? Dava bada moni gaukarana ia karaia tauna, a? Eiava ia ese ena adavana bona natudia be lalokau bona hebogahisi dalanai ia kara henidia tauna? Madi, tatau momo be tanobada ena lalohadai idia tohotohoa dainai, lalokau bona hebogahisi dalanai edia adavana bona natudia idia kara henidia lasi. Dahaka dainai? Badina idia be headava ia Havaraia Tauna—“tau ena ruduna turia dekena amo hahine ta ia karaia, vadaeni tau dekenai hahine ia abia lao” Tauna unai—idia diba lasi bona ena hakaua herevadia idia badinaia lasi.—Genese 2:21-24.
2 Iesu Keriso ese ena inai taudia dekenai, Baibel lalonai ia noho headava ginigunana ia herevalaia, ia gwau: “Buka Helaga umui duahia lasi, a? Ia torea, ‘Hamatamaia nega ia karaia neganai, Dirava ese tau bona hahine ia karaia, bona ia gwau: Inai dainai tau be iena tamana sinana do ia rakatania, iena adavana dekenai do ia hakapua, vadaeni idia ruaosi be tamona idia noho.’ Unai dainai idia be rua lasi, edia anina be tamona. Dirava ese ia hakapua taudia, be taunimanima ese do idia hapararaia lasi.” (Mataio 19:4-6) Headava ia namo totona mai anina bada gauna be inai: Headava taudia do idia abia dae headava be Dirava ese ia havaraia bona Baibel lalonai idia noho hakaua herevadia idia badinaia be namo.
Tatau Ia Durua Gauna
3, 4. (a) Edena dala ai Iesu be headava maurina ia diba namonamo? (b) Laulau dalanai Iesu ena adavana be daika, bona tatau ese edena dala ai edia adavana idia kara henia be namo?
3 Headava tauna be adavana namona ai ia lao totona, ia be Iesu ese ia gwauraia herevadia do ia stadilaia bona Iesu ena kara ia badinaia be namo. Iesu be headava maurina ia diba namonamo, badina Iehova ese tau bona hahine ginigunadia ia havaraia bona edia headava ia karaia neganai, Iesu be ia noho. Iehova Dirava ese Iesu ia hamaoroa: “Taunimanima ita karaia namo, iseda toana bona iseda laulau hegeregerena.” (Genese 1:26) Oibe, Dirava be iena “gaukara karaia tauna” ia hereva henia, Dirava be taunimanima ta eiava gau ta ia do havaraia lasi neganai, unai tauna ia havaraia. (Aonega Herevadia 8:22-30) Tanobada bona mauri gaudia ma haida ia do havaraia lasi neganai, Iesu be “Dirava ese ia karaia gaudia ibounai edia biaguna.” Ia be Dirava ena “vara guna Natuna.”—Kolose 1:15; Apokalupo 3:14.
4 Baibel ese Iesu ia gwauraia “Dirava ena Mamoe Natuna” bona ia hahedinaraia laulau dalanai ia be headava tauna bamona. Guna, aneru ta ia gwau: “Oi mai, headava matamata hahinena, Mamoe ena Natuna ena adavana oi dekenai do lau hedinaraia.” (Ioane 1:29; Apokalupo 21:9) Unai headava matamata hahine be daika? “Mamoe ena Natuna ena adavana” be Keriso murinai idia raka horoa taudia, idia be Iesu ida iena guba Basileiana lalonai do idia lohia. (Apokalupo 14:1, 3) Unai dainai, tatau ese edia adavadia do idia kara henia neganai, Iesu be iena hahediba taudia ia kara henidia dalana idia tohotohoa be namo.
5. Daidia ese Iesu idia tohotohoa be namo?
5 Momokani, Baibel ia gwau Keristani taudia ibounai ese Iesu ena haheitalai idia tohotohoa be namo: “Keriso ese umui dainai hisihisi ia abia. Vadaeni iena kara toana umui dekenai ia hedinaraia, iena murinai do umui raka totona. Iena aena gabudia dekenai do umui raka.” (1 Petero 2:21) To, tatau ese iena haheitalai idia tohotohoa be mai anina bada. Baibel ia gwau: “Tatau ibounai edia kwarana be Keriso, hahine edia kwarana be edia tau, bona Keriso ena kwarana be Dirava.” (1 Korinto 11:3) Keriso be tatau edia kwarana dainai, tatau ese iena haheitalai idia tohotohoa be maoro. Unai dainai, ruma bese maurina ia namo bona idia moale totona, Dirava ena hereva kwara dagina dekenai idia matauraia be gau badana. Idia moale totona, tatau ese edia adavadia do idia lalokau henia, laulau dalanai Keriso ese ena adavana, ena horoa tadikaka unai, ia kara henidia hegeregerena.
Headava Lalonai Hekwakwanai Hamaoromaoroa Dalana
6. Tatau be edena dala ai edia adavadia ida idia noho be namo?
6 Inai tanobada dikana lalonai, tatau ese Iesu ena haheauka, lalokau bona kara maoromaoro hakaua herevadia badinaia karana idia tohotohoa be namo. (2 Timoteo 3:1-5) Iesu ena haheitalai hegeregerena, Baibel ia gwau: “Tatau e, umui danu, emui adavana danu umui noho hebou ena dala do umui laloa namonamo.” (1 Petero 3:7) Oibe, Iesu ia karaia bamona, tatau ese headava ena hekwakwanai be aonega dalanai idia hamaoromaoroa be namo. Iesu be hisihisi bada ia davaria neganai, ia laloparara unai hisihisi be Satani, ena demoni bona inai tanobada dikana ese idia havaraia. (Ioane 14:30; Efeso 6:12) Iesu be hekwakwanai ia davaria neganai, ia hoa lasi. Unai hegeregerena, headava taudia be “metau bada do idia abia” neganai, namo lasi idia hoa. Baibel be ia hahedinaraia vadaeni, headava taudia be metau do idia davaria.—1 Korinto 7:28.
7, 8. (a) Tatau be edia adavadia ida idia ‘noho hebou ena dala do idia laloa namonamo’ ena anina be dahaka? (b) Dahaka dainai tatau ese edia adavana idia matauraia be namo?
7 Tatau e, Baibel ia gwau namona be “emui adavana danu umui noho hebou ena dala do umui laloa namonamo. Hahine ena tauanina be goada herea lasi, unai dainai do umui naria namonamo, bona matauraia.” (1 Petero 3:7) Baibel ia hahedinaraia tatau ese dagedage dalanai edia hahine idia biagua karana be do ia bada, to headava tauna be Iehova ena lalonamo ia abia totona, namona be ena adavana do ia matauraia. (Genese 3:16) Namona be tau ese ena adavana be dava bada gauna ta bamona do ia kara henia, bona ia botaia lasi. To, ia ese adavana ena hemami do ia laloa, nega ibounai do ia matauraia bona ia lalokau henia.
8 Dahaka dainai tatau ese edia adavadia idia matauraia be maoro? Baibel ese unai ia haerelaia, ia gwau: “Dirava ena hariharibada umui abia hebou dainai, mauri hanaihanai umui davaria. Unai bamona do umui karaia neganai, emui guriguri haere dalana be gau ta ese do ia koua lasi.” (1 Petero 3:7) Namo lasi tatau idia laloa Iehova ese idia ia laloa bada bona hahine ia laloa maragi. Lasi, Iehova ese ia idia tomadiho henia tatau bona hahine be maka tamona dekenai ia lalodia bada. Iehova ese ia lalonamo henidia hahine be tatau ese do idia abia mauri hanaihanai ahuna do idia abia bona momo be guba maurina do idia moalelaia danu. Bona, guba dekenai idia be tau eiava hahine lasi, to idia ibounai be lauma tauanina do idia abia. (Galatia 3:28, BHğ) Namona be tatau idia laloatao Iehova ese taunimanima ta ta edia abidadama ia laloa bada. Herevana idia be tau eiava hahine, headava tauna eiava adavana, eiava natu ta to unai ia laloa lasi.—1 Korinto 4:2.
9. (a) Petero ena hereva hegeregerena, dahaka dainai tatau ese edia adavana idia matauraia be namo? (b) Edena dala ai Iesu ese hahine ia matauraidia?
9 Tatau be mai hemataurai ida edia adavana do idia kara henidia be mai anina bada ena badina be Aposetolo Petero ese ia hahedinaraia, ia gwau: “Unai bamona do umui karaia neganai, emui guriguri haere dalana be gau ta ese do ia koua lasi.” Bema emu guriguri be gau ta ese ia koua neganai unai be dika bada herea! Oibe, Dirava ena hesiai taudia gunadia dekenai ia vara hegeregerena, Dirava ese ena adavana ia matauraia lasi tauna ena guriguri ia koua diba. (Lalohisihisi ena Ane 3:43, 44) Unai dainai, aonega dalana be Keristani tatau—idia headava vadaeni bona headava idia laloa noho tatau—be Iesu ese hahine ia kara henia daladia idia stadilaia be namo. Iesu ese hahine ia abidia dae ia danu idia haroro hebou totona, bona ia hebogahisi henidia bona ia matauraidia. Bona danu, Iesu ese mai anina bada herevana ta be hahine taudia dekenai ia hahedinaraia guna, bona ia hamaorodia tatau do idia hadibaia!—Mataio 28:1, 8-10; Luka 8:1-3.
Haheitalai Tatau Dekenai
10, 11. (a) Dahaka dainai tatau ese Iesu ena haheitalai idia stadilaia be namo? (b) Edena dala ai tatau ese edia adavadia idia lalokau henia diba?
10 Guna ita herevalaia bamona, Baibel ese tau bona hahine edia headava be Keriso bona iena “adavana,” horoa Keristani taudia ida ia hahegeregerea. Baibel ia gwau: “Tau be iena adavana ena kwarana, Keriso be ekalesia ena kwarana bamona.” (Efeso 5:23) Unai hereva ese tatau ia hagoadaia, Iesu be kongrigeisen lalonai ena kwara dagina ia gaukaralaia dalana idia stadilaia totona. Unai bamona idia karaia neganai, Iesu ese kongrigeisen ia naria hegeregerena, tatau ese Iesu do idia tohotohoa namonamo bona edia adavadia idia lalokau henia bona naria namonamo diba.
11 Baibel ese Keristani tatau ia sisiba henidia, ia gwau: “Tatau e, emui adavana do umui lalokau henia, Keriso ese ekalesia ia lalokau henia bamona. Keriso ese danu iena mauri ia atoa diho ekalesia dainai.” (Efeso 5:25) Efeso karoa 4 lalonai ia hahedinaraia unai “ekalesia” be “Keriso ena tauanina.” Laulau dalanai unai tauanina be mai ena kahana momo—tau bona hahine—bona idia ibounai be unai tauanina ena gaukara idauidau idia karaia namonamo. To, Iesu “be ekalesia ena kwarana bona ekalesia be iena tauanina.”—Efeso 4:12; Kolose 1:18; 1 Korinto 12:12, 13, 27.
12. Laulau dalanai Iesu ese edena bamona iena tauanina dekenai lalokau ia hahedinaraia?
12 Laulau dalanai Iesu be mai lalokau ida ena tauanina, eiava “ekalesia” ia naria bona idia ta ta edia namo ia laloa bada. Hegeregere, iena hahediba taudia idia hesiku neganai, ia gwau: “Umui mai, taunimanima noho lasi gabuna dekenai ita lao, ita laga-ani sisina.” (Mareko 6:31) Ena be hora haida sibona idia noho bena do ia mase, Iesu be ena lalokau ia do hahedinaraia noho. Aposetolo Ioane ese unai ia gwauraia: “Inai tanobada dekenai, sibona ena lalokau taudia [laulau dalanai ena tauanina ena kahana ta ta] dekenai ia lalokau henidia, ia lao bona dokona.” (Ioane 13:1) Iesu ese tatau dekenai edia adavadia do idia kara henia dalana ena haheitalai namona ia hahedinaraia unai!
13. Tatau ese edena bamona edia adavadia do idia lalokau henia?
13 Aposetolo Paulo be Iesu ese tatau totona ia hahedinaraia haheitalaina ia herevalaia, bona inai sisiba ia henia: “Namona be tatau ese edia adavana do idia lalokau henia, idia edia tauanina idia lalokau henia hegeregerena. Adavana ia lalokau henia tauna ese sibona ia lalokau henia noho. Badina be tau ta ese sibona ena tauanina ia badu henia diba lasi. To ia ubua noho, bona ia naria noho, Keriso ese ekalesia ia ubua bona naria noho hegeregerena.” Paulo ma ia gwau: “Tau ese iena adavana do ia lalokau henia, ia sibona ia lalokau henia hegeregerena.”—Efeso 5:28, 29, 33.
14. Tau ese iena goevadae lasi tauanina be edena bamona ia naria, bona unai dainai iena adavana be edena bamona do ia kara henia?
14 Mani Paulo ena hereva ita laloa. Ia laloa maoromaoro tauna be sibona ena tauanina do ia haberoa, a? Ia raka noho lalonai gau ta ia bampaia dainai, ena aena do ia botaia, a? Lasi! Tau be iena turadia vairanai sibona ena manoka gaudia dainai ia udu mauri bona sibona ia hahemaraia, a? Lasi! Vadaeni, dahaka dainai ena adavana be kerere maragina ta ia karaia neganai, ia gwau henia dikadika eiava ia botaia? Namo lasi tatau be sibodia edia namo idia laloa, to namona be edia adavadia edia noho namo do idia laloa bada.—1 Korinto 10:24; 13:5.
15. (a) Iesu ena hahediba taudia idia manoka neganai, dahaka ia karaia? (b) Iesu ena haheitalai amo tatau be dahaka idia dibaia?
15 Iesu ena hanuaboi ginigabena ai, ena hahediba taudia be idia goada lasi neganai, Iesu ese idia ia laloa bada. Getesemane umana ai ena be nega momo ia noidia do idia guriguri totona, to nega toi idia mahuta. Bena, tuari taudia idia ginidae bona Iesu ese ia nanadaidia: “Daika umui tahua?” Idia haere: “Iesu, Nasareta tauna.” Iesu ma ia gwau: “Lau inai.” Ia diba ena mase negana be ia ginidae dainai, ia gwau: “Umui tahua tauna be lau inai, lauegu diba tahua taudia be inai, mani do idia lao.” Iesu be nega ibounai ena hahediba taudia—laulau dalanai idia be ena adavana ena kahana—edia namo ia laloa bada bona dala ia karaia idia heau mauri totona. Tatau be Iesu ese ena hahediba taudia ia kara henia dalana idia stadilaia neganai, edia adavadia idia naria namonamo daladia momo do idia dibaia.—Ioane 18:1-9; Mareko 14:34-37, 41.
Iesu Ena Lalokau Karana
16. Iesu ena hemami be edena bamona Mareta dekenai, bona edena dala ai ia sisiba henia?
16 Baibel ia gwau: “Iesu ese Mareta mai ena tadina Maria danu, bona Lasaro danu, ia lalokau henia.” (Ioane 11:5) To, Mareta be nega bada ia haorea aniani ia hegaegaelaia totona bona ia be nega lasi Iesu ia kamonai henia dainai, Iesu ese Mareta ia sisiba henia. Ia gwau: “Mareta e, Mareta e, gau momo totona oi laloa momo bona oi hekwarahi, to gau tamona sibona be ia bada herea.” (Luka 10:41, 42) Oibe, Iesu ese Mareta ia lalokau henia dainai, ia sisiba henia neganai Mareta ia kamonai. Unai hegeregerena, tatau ese edia adavadia be mai lalokau bona hebogahisi ida idia hereva henidia be namo. Iesu ia karaia hegeregerena, bema hahine ena kara be ia maoro lasi, namona be tau ese ia hamaoromaoroa.
17, 18. (a) Petero ese edena dala ai Iesu ia hereva auka henia bona dahaka dainai Iesu ese ia sisiba henia be maoro? (b) Tau ena maduna be dahaka?
17 Ma nega ta ai, Iesu be ena aposetolo taudia ia hadibaia ia be Ierusalema dekenai do ia lao, bona “hanua tau badadia bona dubu biagudia bona taravatu hadibaia taudia ese hisihisi momo do idia henia, bona do idia alaia mase. To dina toi murinai be do ia toreisi lou.” Unai ia gwauraia neganai Petero ese Iesu ia hakaua siri bona ia hereva auka henia, ia gwau: “Lohiabada e, unai bamona lasi. Unai bamona do idia karaia lasi oi dekenai.” Oibe, Petero be ia laloa maoromaoro lasi. Iesu ese Petero ena lalohadai ia hamaoromaoroa be maoro. Unai dainai Iesu ese ia hamaoroa: “Satani e, lauegu murina kahana oi lao. Lau hamorua totona oi hereva, badina oiemu laloa be Dirava ena lasi, to taunimanima edia.”—Mataio 16:21-23.
18 Iesu ia herevalaia gauna be Dirava ena ura do ia hagugurua—hisihisi do ia mamia bena do idia hamasea. (Salamo 16:10; Isaia 53:12) Unai dainai, Petero ese Iesu dekenai unai bamona ia hereva be kerere. Oibe, Iesu ese Petero ia sisiba henia be maoro. Ita danu nega ta ta ai ma haida ese ita idia sisiba henia be maoro. Tau be ruma bese kwarana dainai, iena maduna be ruma bese taudia, adavana danu, do ia sisiba henia be maoro. Ena be sisiba aukana ia henia, to lalokau dalanai ia karaia be namo. Iesu ese Petero ia durua lalohadai maorona ia abia hegeregerena nega haida tau ese ena adavana dekenai unai bamona do ia karaia. Hegeregere, bema ia itaia adavana ena dabua, herahera gaudia eiava vairana hahairaia gaudia atoa dalana be Keristani hahine edia toana hegeregerena lasi, namona be manau dalanai iena adavana ia hadibaia.—1 Petero 3:3-5.
Tatau Idia Haheauka be Namo
19, 20. (a) Aposetolo taudia huanai dahaka hekwakwanai ia vara, bona Iesu ese edena bamona ia hamaoromaoroa? (b) Edia kara idia haidaua haraga, a?
19 Bema tau ese ena adavana ena kara ta ia hamaoromaoroa toho, namo lasi ia laloa adavana ese ena kara do ia haidaua haraga. Iesu be nega daudau lalonai ia hekwarahi ena aposetolo taudia edia kara ia haidaua totona. Hegeregere, aposetolo taudia idia heiriheiri daika be bada idia huanai, bona Iesu ena tanobada maurina dokonai unai idia hepapahuahulaia lou. (Mareko 9:33-37; 10:35-45) Nega iharuana ai unai idia hepapahuahulaia murinai, Iesu be idia ida ena Pasova ginigabena abia totona ia hegaegae. Unai nega ai, idia ta ese ibounai edia aena kahu ia huria lasi. To, Iesu ese edia aena ia huria bena ia gwau: “Dala lau hedinaraia vadaeni umui dekenai.”—Ioane 13:2-15.
20 Iesu ena manau karana idia tohotohoa tatau be edia adavadia ese do idia durudia bona do idia kamonai henidia. To haheauka be gau badana. Unai hanuaboi ginigabena ai, aposetolo taudia ese daika be bada idia huanai idia hepapahuahulaia lou. (Luka 22:24) Namona be ita diba, taunimanima edia lalohadai bona kara kereredia be haraga momokani idia haidaua diba lasi, to metairametaira idia hamaoromaoroa. To, edia kara idia hanamoa neganai ita moale, aposetolo taudia idia moale hegeregerena!
21. Headava lalonai hekwakwanai idia vara neganai, tatau ese dahaka idia laloatao bona dahaka do idia karaia be namo?
21 Hari inai negai, headava taudia be hekwakwanai badadia idia davaria noho, guna bamona lasi. Momo be headava neganai idia karaia gwauhamata idia laloa bada lasi. Unai dainai, tatau e, headava be daika ese ia havaraia umui laloa dobu be namo. Namona be umui laloatao iseda lalokau Diravana, Iehova ese headava ia havaraia. Bona iena Natuna Iesu, be ita hamauria totona ia siaia diho sibona lasi, to haheitalai namona ia hahedinaraia danu tatau ese idia tohotohoa totona.—Mataio 20:28; Ioane 3:29; 1 Petero 2:21.
Edena Bamona Do Oi Haere?
• Dahaka dainai ita abia dae headava ia havaraia Tauna be Iehova Dirava be mai anina bada?
• Edena dala ai tatau ese edia adavadia idia lalokau henia be namo?
• Iesu ese edena dala ai ena hahediba taudia ia kara henidia bona edena dala ai tatau ese Keriso ena kwara dagina idia tohotohoa diba?
[Picture on page 4]
Dahaka dainai tatau be Iesu ese hahine ia kara henidia dalana idia stadilaia be namo?
[Picture on page 5]
Hahediba taudia idia hesiku neganai Iesu ese edia namo ia laloa
[Picture on page 6]
Tatau ese mai lalokau bona hebogahisi herevadia amo adavadia do idia sisiba henidia