Ena be Hahetoho Idia Vara, to Iehova Dainai Lau Moale Noho
GEORGE SCIPIO ESE IA SIVARAILAIA
December 1945 ai, hospital wodi dekenai lau hekure, egu tauanina ibounai ia mase, to egu imana bona aena sibona idia marere diba. Lau laloa nega kwadogina sibona do lau gorere, to haida idia laloa do lau raka lou diba lasi. Mauri lagani 17 mero goadana dekenai unai be hahetoho aukana! Lau ura lasi edia hereva lau abia dae. Egu palani be momo, ta be vaira lagani dekenai egu biaguna ida England dekenai do lau lao.
EMAI noho gabuna, St. Helena motumotu dekenai poliomyelitis gorerena ia bada herea bona lau be unai gorere lau abia danu. Taunimanima 11 idia mase bona momo herea be edia tauanina kahana ta idia gaukaralaia diba lasi. Bedi dekenai lau hekure neganai, egu mauri kwadogina bona egu vaira negana lau lalohadailaia momo. Unai lau karaia neganai, lau lalo-parara ena be lau gorere, badina namona ia noho lau moale totona.
Dala Maragina amo Ia Vara
Lagani 1933 ai, egu mauri lagani be ima neganai, egu tamana, Tom, ia be pulisi tauna bona Baptis Dubu ena diakono tauna ta, be Iehova ena Witness taudia rua amo buka haida ia abia. Unai Witness taudia rua be ful-taim hesiai taudia, eiava painia taudia, idia ese nega kwadogi lalonai emai motumotu idia vadivadi henia.
Unai buka ta ena ladana be The Harp of God. Egu Tamana ese emai ruma bese ida ia stadilaia bona kamonai taudia haida ia stadi henidia neganai, unai buka ia gaukaralaia. Ia be auka bona ena anina lau lalo-pararalaia lasi. To lau laloatao ai kikilaia siri iboudiai be egu Baibel lalonai lau makaia. Daudau lasi murinai, egu Tamana ia lalo-parara ai stadilaia gauna be hereva momokani, bona Baptis Dubu lalonai ia harorolaia gaudia amo ia idau. Taunimanima ma haida ia haroro henidia matamaia, bona dubu lalonai ia hahedinaraia Toi Tamona be lasi, lahi gabuna be lasi, bona mase diba lasi souli be lasi. Unai ese hepapahuahu ia havaraia dubu lalonai.
Vadaeni, unai hekwakwanai idia hamaoromaoroa totona, dubu ena hebou ta idia karaia. Inai henanadai idia gwauraia, “Daika be Baptis Dubu kahanai ia gini?” Momo idia toreisi. Henanadai iharuana be, “Daika be Iehova ena kahanai ia gini?” Idia toreisi taudia be 10 eiava 12 bamona. Idia hamaorodia dubu do idia rakatania.
Unai dala maragina amo St. Helena dekenai tomadiho orea matamatana ia vara. Egu tamana ese Watch Tower Society ena hedikwota, United States dekenai, ia tore henia bona taunimanima dekenai Baibel herevadia idia halasia rekoda masini badana totona ia noinoi. Idia hamaoroa unai masini be bada herea dainai, St. Helena dekenai do idia siaia lasi. To rekoda masini maragina idia siaia bona gabeai tadikaka ese ma rua idia oda. Unai motumotu ai, taunimanima dekenai sivarai namona idia abia lao totona, aena amo idia raka bona doniki amo idia loaloa.
Sivarai namona be gabu ibounai dekenai ia lao neganai, dagedage danu ia bada ia lao. Egu sikuli dekenai maragidia be inai ane idia abia: “Umui mai, umui mai, Tommy Scipio ena rekoda ben kamonai!” Unai be hahetoho aukana lau dekenai, badina lau ura egu sikuli turadia ese lau idia ura henia. Dahaka ese lau ia durua lau haheauka totona?
Emai ruma bese badana—natudia ibounai be 6—be nega ibounai ruma bese Baibel stadi ai karaia. Bona daba ibounai, ai do aniani lasi neganai Baibel ai duahia hebou. Momokani, unai ese emai ruma bese ia durua lagani momo lalodiai hereva momokani lalonai ai gini auka totona. Lau do maragi neganai Baibel lau ura henia bada, bona idia hanaia lagani lalodiai, lau be nega ibounai Baibel duahia karana lau badinaia. (Salamo 1:1-3) Egu mauri lagani be 14 bona sikuli lau rakatania neganai, hereva momokani lau abia dae momokani vadaeni, bona egu kudouna lalonai Iehova gari henia karana ia noho. Unai ese lau ia durua dainai, ena be hahetoho idia vara, Iehova dainai lau moale noho.
Hahetoho Bona Hahenamo Ma Haida
Lau gorere bona bedi dekenai lau hekure noho lalonai, guna negadia bona vaira negana lau laloa. To, Baibel lau stadilaia dainai lau diba unai gorere be Dirava amo ia mai hedibagani eiava hahemaoro karana ta lasi. (Iamesi 1:12, 13) To, unai polio gorerena dainai lau lalohisihisi bada, bona ia havaraia dika be do ia noho egu mauri ibounai lalonai.
Lau namo lau lao neganai, raka dalana lau dibaia lou. Danu, egu imana ena masolo haida lau gaukaralaia diba lasi. Dina ta ta ibounai, nega momo herea lau moru. To, lau guriguri goadagoada bona lau hekwarahi noho ela bona lagani 1947 ai, itotohi amo lau raka diba.
Unai nega lalonai lau be hahine matamata ta ladana, Doris, lau ura henia. Ia be Witness ta danu. Ai be do matamata dainai ai headava haraga lasi, to unai hetura karana ese lau ia durua egu raka dalana lau hagoadaia totona. Egu moni gaukara danu lau rakatania badina ena davana be ia hegeregere lasi moni lau haboua bona gabeai lau headava totona. Lau sibona egu isena kliniki lau haginia, bona lagani rua lalonai lau gaukara. Lagani 1950 ai, ai headava. Unai nega ai egu moni ia hegeregere bona motuka maragina ta lau hoia. Vadaeni, tadikaka bona taihu be hebou bona haroro gaukara dekenai lau abidia lao diba.
Motumotu Dekenai Tiokratik Gaukara Ia Bada Ia Lao
Lagani 1951 ai, Society ese ena gwaukau tauna ginigunana ia siaia mai ai dekenai. Ia be Jacobus van Staden, tau matamatana South Africa amo. Ai be vanegai sibona ruma badana ai abia dainai, lagani tamona lalonai ia be ai ida ia noho diba. Lau be sibona egu bisinesi lau haheaua dainai, nega bada be ia danu lau haroro diba, bona ia amo mai anina bada gaudia lau dibaia.
Jacobus, eiava ai boiria Koos, be nega ibounai dala ia karaia kongregesen hebou ai abia totona, bona ai ibounai be mai moale ida unai hebou dekenai ai lao. Aiemai hekwakwanai be ai kamonai taudia ibounai huanai motuka be rua sibona. Unai gabu dekenai, uda bona ororo be momo, bona unai negai dala namodia be lasi. Unai dainai, hebou dekenai tadikaka ibounai abia lao be gaukara badana. Haida be daba maragi ai idia raka matamaia. Egu motuka maragina amo toi lau udaia, lau abidia lao bona dala ena kahana dekenai lau atodia. Idia diho bona idia raka lao. Lau giroa, ma tadikaka toi lau udaia, lau abidia lao bona dala ena kahana dekenai lau atodia, bona lau giroa. Vadaeni, ibounai be unai dala amo hebou dekenai idia ginidae. Hebou murinai, unai kara tamona ma ai karaia lou.
Koos ese ai dekenai anina idia havaraia haroro hereva namodia ia hadibaia. Ai ese ekspiriens momo ai davaria, haida be namo bona haida be namo momokani lasi. To haroro gaukara lalonai ai davaria moale ese emai haroro gaukara idia dagedage henia taudia ese idia havaraia hahetoho ibounai ia hanaia. Daba ta lau be Koos ida lau gaukara, bona iduara ta ai lao henia neganai, ruma lalona amo gado ta ai kamonai. Tau ta be mai gado regena bada ida Baibel ia duahia noho. Isaia karoa 2 ena hereva ai kamonai goevagoeva. Siri 4 ia duahia gwauraia neganai, ai pidipidi. Tau buruka ta be mai ena moale ida ai ia boiria vareai, bona ai ese Isaia 2:4 ai gaukaralaia ia dekenai Dirava ena Basileia ena sivarai namona ai gwauraia hedinarai totona. Ena be iena noho gabuna lao henia dalana be auka momokani, ia danu Baibel stadi ai hamatamaia. Ai ese ororo ta ai diho, nadi latadiai sinavai ai hanaia, ororo ma ta ai daekau, bena ai diho lao iena ruma dekenai. To emai hekwarahi be davana namona ia havaraia. Unai manau tau burukana ese hereva momokani ia abia dae bona ia bapatiso. Hebou dekenai ia lao totona, itotohi rua danu ia raka lao gabu ta dekenai bena lau ese unuseniai egu motuka amo lau udaia bona hebou dekenai lau abia lao. Ena abidadama ia dogoatao auka ela bona ia mase.
Pulisi komisina tauna be aiemai gaukara ia inai henia momokani bona nega momo ia gwau Koos be South Africa dekenai do ia siaia lou. Hua ta ta iboudiai Koos be nega tamona ia boiria ia henanadai henia totona. Koos be maoromaoro Baibel amo ia haere henia dainai, unai ese ma ia habadua dikadika. Unai dina ta ta ai, ia ese Koos ia hamaoroa haroro gaukara do ia hadokoa, to nega ibounai Koos ese ia haroro henia. Ena be Koos ese St. Helena ia rakatania vadaeni, to pulisi kominisa tauna be emai gaukara ia do inai henia noho. Bena unai komisina tauna, tau badana mai goadana be ia gorere bona ia ena tauanina ia maragi momokani. Doketa ese iena gorere idia davaria diba lasi dainai, emai motumotu ia rakatania.
Bapatiso Bona Orea Ia Bada Ia Lao
Koos be hua toi motumotu dekenai ia noho murinai, ia laloa bapatiso karaia hebouna ai karaia be namo. Bapatiso karaia gabuna ai davaria be auka. Emai lalona ai hadaia guri badana do ai geia, semenisi amo do ai koua bona ranu do ai huaia mai ai hahonua totona. Bapatiso be Sunday do ai karaia to Saturday hanuaboi ai, medu ia diho, bona dabai guri be ranu amo ia honu dae bona ai moale bada.
Unai Sunday dabai Koos ese bapatiso herevana ia henia. Bapatiso do idia abia taudia ia noidia idia gini tore neganai, ai ibounai 26 ai gini, nega ibounai idia henia henanadai ai haerelaidia totona. Ai moale bada badina unai motumotu dekenai ai be bapatiso ai abia Witness taudia ginigunadia. Unai dina be egu moale bada dinana badina nega ibounai egu lalo-hekwarahi be lau do bapatiso lasi negana ai Aramagedono do ia mai.
Vadaeni, kongregesen rua ai haginia, ta be Levelwood dekenai bona ta be Jamestown dekenai. Pura ta ta ai, ai toi eiava hani be kongregesen ta dekenai ai lao, ena daudau be kilomita 13 bamona, bona unuseniai Saturday adorahi ai Haroro Sikuli bona Hesiai Hebou ai karaia. Sunday dabai haroro gaukara murinai ai giroa bona emai kongregesen dekenai adorahi bona hanuaboi ai unai hebou ai karaia lou bona Gima Kohorona Stadi danu ai abia. Emai Saturday bona Sunday be mai moale tiokratik gaukarana amo idia honu. Lau ura dikadika ful-taim haroro gaukara lau karaia, to lau be mai egu maduna egu ruma bese lau naria totona. Unai dainai lagani 1952 ai, gavamani totona ful-taim isena hanamoa gaukarana lau abia.
Lagani 1955 ai sekit naria taudia, Society ena loaloa elda taudia, be lagani ibounai emai motumotu idia vadivadi henia matamaia, bona edia vadivadi negana ena kahana ta ai lauegu ruma dekenai idia noho. Idia be aiemai ruma bese idia durua bada. Unai nega lalonai danu, lau ese Society ena muvini piksa toi be motumotu ena kahana idauidau dekenai lau hahedinaraia, unai be hahenamo ta.
Dirava Ena Ura Hebouhebouna
Lagani 1958 ai, Dirava Ena Ura Intenesenel Hebouhebouna, New York dekenai lau lao totona, gavamani ena gaukara amo lau doko lou. Unai hebouhebou be mai ena anina bada egu mauri lalonai—Iehova dainai lau moale karana ia habadaia. Emai motumotu dekenai sisima ia lao momo lasi dainai, hua ima mai kahana ai noho New York dekenai. Unai hebouhebou be dina 8 lalonai idia karaia, bona dina ta ta be daba 9 amo ia hamatamaia ela bona hanuaboi 9 ai ia doko. To lau hesiku lasi, bona dina ta ta lau moalelaia bada. Lau be unai hebouhebou ena program dekenai miniti rua lalonai St. Helena ena gaukara lau kikilaia, bona unai be hahenamo badana ta. Yankee Stadium bona Polo Grounds dekenai taunimanima hutuma lau hereva henia be gari bada gauna.
Unai hebouhebou ese egu painia urana ia habadaia. Pablik tok ladana, “God’s Kingdom Rules—Is the World’s End Near?,” ese lau ia hagoadaia momokani. Hebouhebou murinai, Society ena hedikwota, Brooklyn dekenai ai lao bona faktori ai itaia. Lau be Tadikaka Knorr ida St. Helena ena gaukara ai kikilaia. Unai nega ai ia be Watch Tower Society ena presiden. Ia gwau ia ura dina ta emai motumotu do ia vadivadi henia. Ai ese hereva iboudiai edia teipi bona hebouhebou ena muvini piksa ai abia giroa, emai famili bona turadia idia itaia bona kamonai totona.
Ful-Taim Hesiai Gaukara Lau Karaia
Lau giroa lou neganai, idia ura egu gaukara gunana lau abia lou, badina emai motumotu dekenai isena hanamoa doketa ta ia noho lasi. To, lau hamaorodia egu ura be ful-taim hesiai gaukara do lau karaia. Ai herevahereva murinai, idia gwau lau be dina toi moni gaukara do lau karaia diba, to egu davana be guna dina 6 lau gaukara ena davana do ia hanaia. Iesu ena hereva be ia momokani: “To umui ese Dirava ena Basileia bona iena kara maoromaoro do umui tahua guna, vadaeni unai gau ibounai danu umui dekenai dohore ia henia.” (Mataio 6:33) Motumotu ena ororo gabudia dekenai egu aena manokana amo lau loaloa be auka momokani. To herevana, lagani 14 lalonai painia gaukara lau karaia bona motumotu taudia momo lau durudia hereva momokani idia diba totona—unai be moale bada gauna momokani.
Lagani 1961 ai, gavamani ia ura lau ia siaia lao Fiji dekenai lagani rua lalonai kosi ta do lau karaia, isena doketa namona ai do lau lao totona. Idia gwau egu ruma bese be lau danu idia mai diba. Unai ese egu lalona ia veria, to lau laloa namonamo murinai, lau abia dae lasi. Lau ura lasi nega daudau lalonai egu tadikaka lau rakatanidia, bona idia lau durua gaukarana ena hahenamo lau haboioa. Unai kosi dekenai do lau lao ia hegaegaelaia medikol ofesa badana be ia lalohisihisi bada herea. Ia gwau: “Bema oi laloa dokona be kahirakahira, oi ese inai nega lalonai do oi abia monina oi gaukaralaia diba.” To lau egu lalona lau haidaua lasi.
Lagani matamata lalonai, lau idia siaia lao South Africa dekenai Basileia Hesiai Gaukara Ena Sikuli totona. Ia be hua tamona lalonai idia karaia kosina kongregesen elda taudia totona. Emai kongregesen ai durua namonamo totona mai anina bada gaudia idia hadibaia ai dekenai. Unai sikuli murinai, loaloa naria tauna ida lau gaukara bona lau dekenai gau ma haida ia hadibaia. Bena lagani 10 mai kahana lalonai nega haida sekit gaukara lau karaia, bona St. Helena dekenai idia noho kongregesen rua lau vadivadi henia. Bena, idia hegeregere tadikaka ma haida ese unai gaukara idia karaia diba dainai, ai ta ta be emai nega emai nega ai kongregesen ai vadivadi henia.
Unai nega lalonai, ai ese Jamestown ai rakatania bona Levelwood dekenai ai lao, unai gabu dekenai Witness taudia be momo lasi bona unuseniai lagani 10 ai noho. Unai nega ai, lau bisi bada herea bona lau laga-ani namonamo lasi—painia gaukara lau karaia, gavamani totona dina toi lau gaukara, bona aniani hoihoilaia sitoa maragina lau naria. Unai sibona lasi, to lau be kongregesen lau naria, bona lau bona egu adavana be natudia hani ai naria danu. Unai lau haidaua totona, lau ese egu dina toi gaukara lau rakatania, sitoa lau hoihoilaia, bona Cape Town, South Africa dekenai egu ruma bese ibounai lau abia lao bona hua toi ai laga-ani unuseniai. Bena Ascension Motumotu dekenai ai lao bona unuseniai lagani ta ai noho. Unai nega lalonai, ai ese momo ai durua Baibel ena hereva momokani dekenai diba maorona idia abia totona.
St. Helena dekenai ai giroa lao neganai, Jamestown dekenai ai noho. Kingdom Hall dekenai ia noho rumana ai hanamoa, bona lau bona egu natuna mero, John, be Ford taraka ta amo ice cream hoihoilaia motuka ai karaia, bona lagani ima lalonai ice cream ai hoihoilaia bona unai ese tauanina dalanai ai ia durua. Unai bisinesi ai hamatamaia bena nega daudau lasi murinai, motuka dekenai aksiden lau davaria. Ia moru bona egu aena ia moia. Unai dainai, egu tuina henunai idia noho hemami varovarodia idia mase bamona, bona hua toi lalonai metairametaira lau namo lau lao.
Guna Bona Vaira Negana Ena Hahenamo Namodia
Idia hanaia lagani lalodiai, hahenamo momo ai davaria—unai be ai moale ena badina ma haida. Emai moale ena badina ta be lagani 1985 ai, South Africa ena hebouhebou badana dekenai ai lao bona Betele rumana matamatana ai itaia, idia do karaia noho lalonai. Bona ma ta be, lau bona egu natuna mero, John, be Jamestown kahirakahira dekenai Assembly Hall ta haginia gaukarana ai durua sisina. Ai moale danu badina emai natudia memero toi be elda taudia, bona emai tubuna merona ta be South Africa Betele dekenai ia gaukara. Bona ai ese momo ai durudia Baibel amo diba maorona idia abia dainai ai moale bada herea.
Emai haroro gaukara teritori be maragi, taunimanima 5,000 sibona idia noho. To herevana, ai ese unai teritori dekenai ai gaukara lou lou dainai, anina namona ia havaraia. Taunimanima be ai idia kara dika henia lasi. St. Helena taudia be taunimanima namodia, edeseniai oi loaloa—dala dekenai oi raka eiava motuka dekenai oi heau neganai— oi do idia boiria bona idia hanamoa. Lau davaria bema oi ese taunimanima oi diba namonamo neganai, oi haroro henidia be auka lasi. Ena be momo be tano ma haida dekenai idia lao, inai negai emai pablisa taudia be 150.
Emai headava laganidia be 48, bona hari emai natudia ibounai idia bada vadaeni bona ruma idia rakatania bona lau bona egu adavana sibona ai noho. Lagani momo lalodiai ena lalokau bona heduru ese lau ia durua, mai moale ida Iehova lau hesiai henia totona, ena be hahetoho lau davaria. Emai tauanina ena goada be ia ore ia lao noho, to dina ta ta ai lauma dalanai ai goada ai lao. (2 Korinto 4:16) Lau, bona egu famili taudia bona turadia be mai moale ida nega vaira namona ai laloa, unai neganai, egu goada be egu mauri lagani be 17 neganai ena goada do ia hanaia. Lau ura dikadika gauna be do lau goevadae momokani, bona gau badana be, lau ura iseda lalokau bona hebogahisi Diravana, Iehova, bona iena hari ia lohia Pavapavana, Iesu Keriso, do lau hesiai henidia ela bona hanaihanai.—Nehemia 8:10.
[Picture on page 26]
George Scipio bona iena natudia memero toi, idia be elda gaukara idia karaia
[Picture on page 29]
George Scipio bona ena adavana, Doris