Lagani 50 Ma Haida Lalonai ‘Lau Hanaia Lao’

EMMANUEL PATERAKIS ESE INAI SIVARAI IA GWAURAIA

Lagani 1900 gunanai aposetolo Paulo ese boiria hereva idauna ta ia kamonai: “Makedonia kahana dekenai oi mai, oi durua ai.” Mai ena ura ida Paulo ese unai dala matamatana ia abia dae ‘Sivarai Namona harorolaia’ totona. (Kara 16:​9, 10) Lau abia boiria herevana be unai neganai lau abia lasi, to lagani 50 gunanai teritori matamata dekenai ‘lau hanaia lao’ Isaia 6:​8 ena lalohadai hegeregerena: “Lau be inai, do lau lao! Lau do oi siaia!” Egu laolao momo dainai lau idia gwauraia Hanaihanai Ia Loaloa Tauna, to lau karaia karadia be loaloa taudia edia kara bamona lasi. Nega momo egu hotel daiutuna dekenai lau ginidae neganai, lau tui diho bona Iehova lau tanikiu henia badina lau ia naria.

JANUARY 16, 1916 ai, Crete ena taoni ta, Hieràpetra dekenai lau vara, Otodoks tomadihona ia goadalaia ruma besena lalonai. Lau maragi negana amo Sinagu ese lau bona egu taihuna toi be Sunday ai dubu dekenai ai ia abia lao. To egu tamana, ia ura ruma dekenai ia noho bona Baibel ia duahia. Egu tamana​—koikoi lasi hebogahisi tauna namona​—lau ura henia bada, bona ena mase, egu mauri lagani be 9 neganai, lau lalohisihisilaia bada bona lau laloaboio diba lasi.

Lau laloatao egu mauri lagani be ima neganai, sikuli dekenai hereva ta lau duahia, ia gwau: “Ita itaia gaudia ibounai ese ita idia hadibaia Dirava be ia noho.” Lau bada lau lao neganai, unai lalohadai lau abia dae momokani. Unai dainai, egu mauri lagani be 11 neganai, lau ese hereva ta lau torea, ena sinado be Salamo 104:24 amo: “Lohiabada e, oi ese gau ibounai oi karaia vadaeni. Mai oiemu aonega bada danu idia ibounai oi karaia. Inai oi ese oi karaia gaudia ibounai ese, inai tanobada idia hahonua momokani.” Lau itaia hoa gaudia ese egu lalona idia veria, gau maragidia danu, hegeregere uhe, lai ese au ena keruma amo ia abia lao totona idia be mai edia apena maragi uhedia unai. Egu hereva lau atoa vareai bena pura ta murinai, egu tisa ese klas taudia ibounai dekenai ia duahia, bona gabeai sikuli taudia ibounai dekenai. Unai neganai, tisa taudia ese Komiunis lalohadaina idia tuari henia bona Dirava ia noho lau hamomokania toho dainai idia moale. To lau, lau moale bada badina Havaraia Tauna dekenai egu abidadama lau hahedinaraia diba.

Egu Henanadai Edia Haere

Iehova ena Witness taudia be nega ginigunana lagani 1930 murinai lau davaria be lau do laloatao goevagoeva. Emmanuel Lionoudakis be Crete ena taoni bona hanua ibounai lalonai ia haroro. Lau ese buklet momo ia amo lau abia, to egu lalona ia veria gauna be buklet ta ladana Where Are the Dead? Mase garina lau gari dikadika dainai egu tamana ia mase daiutuna lalonai lau vareai diba lasi. Unai buklet lau duahia loulou bona Baibel ena lalohadai mase taudia edia noho dekenai lau diba neganai, egu gari dikadika ia ore.

Lagani ta ta iboudiai, siahu negana lalonai, nega tamona Witness taudia ese emai taoni idia vadivadi henia bona buka idia mailaia lau duahia totona. Sisina sisina egu lalo-parara Baibel dekenai ia bada ia lao, to Otodoks Dubu dekenai lau do lao noho. To Deliverance bukana ese unai ia haidaua. Ia ese Iehova ena orea bona Satani ena orea edia idau ia hahedinaraia goevagoeva. Unai negana amo, hanaihanai Baibel bona lau abia diba Watch Tower Society ena buka lau stadilaia matamaia. Greece dekenai gavamani ese Iehova ena Witness taudia ia taravatua dainai, hunia dalanai hanuaboi ai lau stadi. To, lau dibaia gaudia dainai egu lalona ia siahu bada bona iboudiai dekenai unai gaudia lau herevalaia lau koua diba lasi. Nega daudau lasi murinai, pulisi ese lau idia raraia matamaia, bona nega ibounai dina bona hanuaboi ai lau idia vadivadi henia buka idia tahua totona.

Lagani 1936 ai, nega ginigunana hebou dekenai lau lao Iráklion dekenai, ena daudau be kilomita 112. Lau moale bada Witness taudia lau davaria dainai. Idia momo be tau badadia lasi, momo be biru taudia, to lau dekenai idia hamomokania inai be hereva momokani. Unuseniai bona unai negana ai, Iehova lau gwauhamata henia.

Egu bapatiso be lau laloaboio diba lasi gauna. Hanuaboi ta lalonai lagani 1938 ai, Tadikaka Lionoudakis ese lau bona egu Baibel stadi taudia rua be dibura momokani lalonai kone dekenai ai ia hakaua lao. Ia guriguri murinai, ranu lalonai ai ia hadihoa.

Idia Dogoatao Lalonai

Nega ginigunana haroro gaukara totona lau lao neganai, gau momo idia vara. Egu sikuli turana gunana, pris ai ia lao tauna lau davaria, bona ai herevahereva hebou namo herea. To murinai ia gwau bisop ena oda dainai, dala ia karaia lau idia dogoatao totona. Taoni ena tau badana ena opesi dekenai, kahirakahira hanuana amo do ia mai pulisi tauna ai naria lalonai, taunimanima hutuma be murimuri ai idia hebou. Unai dainai opesi dekenai ia noho Greek Taravatu Matamatana lau abia bona Mataio karoa 24 ena hereva amo hereva ta lau henia matamaia. Matamana neganai taunimanima idia ura lasi kamonai, to pris tauna be hereva haida ia gwauraia. Ia gwau: “Ena hereva umui koua lasi, ia ese iseda Baibel ia gaukaralaia.” Hora tamona mai kahana lalonai lau hereva diba. Unai amo, egu haroro dina ginigunana be egu pablik tok ginigunana ena nega danu. Hereva lau haorea to pulisi idia do ginidae lasi dainai, taoni ena tau badana bona pris ese edia lalona idia hadaia tatau edia grup ta ese taoni amo lau idia lulua. Dala ena kona ginigunana dekenai, lauegu goada ibounai ida lau heau haraga, idia negea nadi amo lau siri totona.

Unai dina murinai, bisop ese ia bamodia pulisi tauna rua ese gaukara gabuna dekenai lau idia dogoatao. Pulisi steiseni dekenai, Baibel amo idia dekenai lau haroro diba, to egu Baibel bukadia dekenai taravatu ena hereva hegeregerena bisop ena gwaumaoro makana ia noho lasi dainai, lau idia samania taunimanima edia tomadiho dalana lau haidaua toho bona idia taravatua buka lau hariharilaidia. Lau idia ruhaia to kota negana lau naria.

Hua ta murinai egu kota idia karaia. Egu maoro lau hamomokania totona lau gwau lau ese Keriso ena haroro haheganina lau badinaia sibona. (Mataio 28:​19, 20) Hahemaoro henia tauna be hereva aukana ia gwauraia hevaseha dalanai: “Natugu e, unai hahegani ia henia Tauna idia hasatauroa. Madi, lau be siahu lasi unai bamona oi do lau panisia totona.” To, lau diba lasi loea matamatana ta ia gini toreisi bona lauegu maoro ia hamomokania toho, ia gwau Komiunis taudia bona Dirava ia noho idia abia dae lasi taudia be momo dainai, namona be kota taudia idia moale badina Dirava ena Hereva idia hamomokania matamata taudia idia noho. Unai murinai lau dekenai ia mai bona lau sibona egu maoro hamomokania toho totona lau torea herevana dainai lau ia hanamoa, unai be faila dekenai ia noho gauna. Lau be matamata dainai ia hoa, bona ia ura egu maoro ia hamomokania toho davana lasi. Dibura dekenai ta idia siaia ena nega kwadogina be hua toi, to unai hua toi lau dekenai idia gwauraia lasi to dina 10 sibona idia gwauraia bona 300-drachma faini idia gwauraia. Unai bamona dadaraia karana ese lau ia hagoadaia sibona, Iehova lau hesiai henia bona hereva momokani ena maoro lau hamomokania toho totona.

Nega ma ta lau idia dogoatao neganai, hahemaoro tauna ia itaia Baibel ena hereva lau gwauraia be auka lasi. Ia ese bisop ia noia ena opesi ia rakatania, ia gwau: “Oiemu gaukara oi karaia vadaeni. Lau ese do lau kara henia.” Bena iena Baibel ia abia, bona adorahi ibounai Dirava ena Basileia ai herevalaia. Unai bamona gaudia ese lau idia hagoadaia hekwakwanai lalonai danu egu gaukara lau karaia noho.

Mase Davana Idia Gwauraia

Lagani 1940 ai, lau idia boiria ami dekenai lau vareai totona bona revareva lau torea lau vareai diba lasi ena badina lau hahedinaraia totona. Dina rua murinai pulisi ese lau idia dogoatao bona lau idia botaia dikadika. Bena tuari ia auka momokani gabuna dekenai Albania ai lau idia siaia, unuseniai ami ena kota dekenai lau idia kota henia, tuari dekenai lau vareai lasi dainai. Ami ena siahu taudia be lau idia hamaoroa lau be maoro o kerere idia laloa bada lasi to egu haheitalai ma tuari taudia haida dekenai idia laloa bada. Lau dekenai mase davana idia gwauraia, to kota ena pepa dekenai kerere ta ia noho dainai, unai hahemaoro herevana idia haidaua dibura gaukara aukana be lagani 10 lalonai do lau karaia, bona unai lau moalelaia bada. Unai murinai Greece dekenai lau be hua haida lalonai ami ena dibura rumana dekenai lau noho bona mauri ia auka herea dainai, lau abia gorere haida lau do hekwarahilaia noho.

To, dibura ese egu haroro gaukara ia koua lasi. Lasi momokani! Hereva lau hamatamaia be auka lasi, badina momo idia hoa dahaka dainai ami lasi tauna be ami ena dibura rumana dekenai ia noho. Lalo-momokani matamata tauna ida unai bamona ai herevahereva murinai, dibura ruma ena ariara dekenai Baibel stadi ai hamatamaia. Lagani 38 murinai, hebouhebou ta dekenai unai tau lau davaria lou. Ia ese hereva momokani ia abia dae bona Lefkás ena motumotu dekenai kongregesen naria tauna ena gaukara ia karaia.

Lagani 1941 ai, Hitler ena ami taudia be Yugoslavia dekenai idia vareai neganai, ai idia siaia lao saut kahanai Preveza ena dibura rumana ta dekenai. Emai laolao lalonai, German ena bomu peleini ese ai idia pidia bona ai dibura taudia dekenai aniani idia henia lasi. Lauegu paraoa sisina ia ore murinai, Dirava lau guriguri henia: “Bema oiemu ura be mase davana amo lau oi hamauria murinai hitolo dainai lau mase, vadaeni, oiemu ura do ia vara be namo.”

Unai dina murinai, emai ladadia idia boiria lalonai, ofesa ta ese lau ia abia siri bona, egu hanua, egu tama sina, bona dibura dekenai lau noho ena badina ia diba murinai, lau ia hamaoroa ia murinai lau lao be namo. Lau ia abia lao ofesa taudia edia aniani rumana taoni dekenai, paraoa, sisi, bona idia gabua mamoe idia noho patana dekenai lau ia hakaua lao, bona ia gwau lau aniani be namo. To lau gwau egu lalona ia hegeregere lasi lau aniani, badina dibura taudia ma 60 idia aniani lasi. Unai ofesa ia haere: “Iboudiai lau ubua diba lasi! Oiemu tamana ese egu tamana ia durua bada. Lau be mai egu maduna oi dekenai to unai ma haida dekenai be lasi.” Lau haere: “Unai neganai do lau giroa sibona.” Ia laloa sisina bena puse badana ia henia lau dekenai aniani amo lau hahonua totona.

Dibura dekenai lau giroa murinai, puse lau atoa diho bona lau gwau: “Tatau e, inai be umui totona.” Varani adorahi sibona, lau idia samania idia gwau dibura taudia ma haida edia noho dikana be egu kerere badina idia ida Maria Haneulato Rami-Hebouna lau guriguri henia lasi. To, Komiunis tauna ta ese lau ia durua. Hari unai aniani ia itaia neganai, ma haida dekenai ia gwau: “Umui emui ‘Maria Haneulato Rami-Hebouna’ be edeseniai? Umui gwau inai tau dainai do ita mase, to ia ese aniani ia mailaia ita dekenai.” Unai murinai lau dekenai ia giroa bona ia gwau: “Emmanuel! Mani oi mai bona oi guriguri.”

Nega sisina murinai, German ami ia mai kahirakahira dainai, dibura ena naria taudia idia heau, bona dibura ai rakatania diba. May 1941 dokona kahanai Athens dekenai lau do lao lasi neganai, Patras dekenai lau lao guna, Witness taudia ma haida lau davaria totona. Unuseniai dabua haida bona tamaka lau abia diba bona nega ginigunana lagani tamona mai kahana murinai lau digudigu danu. Ela bona Germany ena tuari taudia ese Greece idia biagua karana ia ore, Germany taudia ese hanaihanai lau idia koua lau haroro neganai, to lau idia dogoatao lasi. Idia ta ia gwau: “Germany dekenai Iehova ena Witness taudia ai pidia. To iniseniai ai ura emai inai taudia ibounai be Witness taudia!”

Tuari Murinai Lau Karaia Karadia

Toana be Greece dekenai tuari ena bada ia hegeregere lasi, badina tano tamona taudia idia tuari heheni lagani 1946 amo ia lao 1949 ai, bona unai tuari lalonai taunimanima tausen momo idia mase. Hebou dekenai idia lao karana sibona dainai idia dogoatao diba negana lalonai, tadikaka be goada idia abia be namo. Tadikaka momo dekenai be edia gini siri karana dainai mase davana idia gwauraia. Ena be unai gaudia idia vara, to taunimanima momo ese Basileia ena sivarai idia abia dae, bona pura ta ta ibounai tamona o rua be idia bapatiso. Lagani 1947 ai, Society ena opesi Athens dekenai lau gaukara matamaia, unai be dina lalonai bona hanuaboi lalonai, loaloa naria tauna ena gaukara lau karaia bona kongregesen lau vadivadi noho.

Lagani 1948 ai, lau moale badina Watchtower Bible School of Gilead, United States dekenai lau idia boiria. To hekwakwanai ta ia vara. Guna lau dekenai kota hereva idia henia dainai, paspot lau abia diba lasi. To, egu Baibel stiuden ta be ami jeneral ena turana. Unai stiuden dainai, pura haida sibona lalonai, egu paspot lau abia. To lau laloa momo, badina egu laolao be kahirakahira neganai, Gima Kohorona lau hariharilaia dainai lau idia dogoatao. Pulisi tauna ese lau ia abia lao Athens ena State Security Police ena biaguna dekenai. Lau hoa bada badina ia be egu dekena tauna ta! Pulisi tauna ese lau ia dogoatao ena badina ia hahedinaraia bona magasin ia henia. Egu dekena tauna ese ena gaukara patana amo Gima Kohorona momo ia abia bona lau ia hamaoroa: “Magasin matamata lau do abia lasi. Ta lau abia diba, a?” Lau moale bada unai bamona gaudia dekenai Iehova ena imana lau itaia dainai!

Gilead ena klas 16, lagani 1950 ai, be egu diba ia habadaia ekspiriens ta. Ia ore murinai, Cyprus dekenai lau idia siaia, bona nega daudau lasi murinai lau itaia haroro taudia ese iseda gaukara idia dagedage henia bada, Greece dekenai idia karaia bamona. Nega momo tomadiho idia goadalaia dikadika taudia hutuma ai davaria, Otodoks pris taudia ese edia lalona idia ania dainai idia lalo-dika. Lagani 1953 ai, egu visa Cyprus dekenai lau noho totona idia henia lou lasi, bona lau idia siaia lao Istanbul, Turkey ai. Unuseniai danu, nega sisina sibona lau noho. Turkey bona Greece be politikol dalanai idia hepapahuahu dainai, ena be haroro gaukara ese anina namona ia havaraia, to gabu ma ta dekenai lau idia siaia lao​—Egypt dekenai.

Guna dibura dekenai lau noho neganai, Salamo 55:​6, 7 lau laloa. Unuseniai Davida ia ura taunimanima idia noho lasi gabuna dekenai ia roho lao. Nega ta lau laloa lasi dina ta unai bamona gabu dekenai do lau noho. Lagani 1954 ai, dina momo lalonai mai hesiku danu trein bona Nile sinavai ena bouti amo lau loaloa murinai, lau lao henia gabuna dekenai lau ginidae​—Khartoum, Sudan ai. Lau ura bada do lau digu bona lau mahuta sibona. To lau laloaboio ia be dina tubua. Ranu, guhi dekenai ia noho tanika lalonai ia noho gauna, ese lau ia gabua, bona nao taudia edia kwarana gauna be hua momo lalonai lau karaia ela bona egu kwarana ia namo lou.

Nega momo egu mamina be tau ta ia noho lasi, Sahara ihuanai lau sibona lau noho, kongregesen ena daudau be kilomita tausen momo, to Iehova ese lau ia naria bona goada ia henia lau gaukara noho totona. Nega haida hahegoada be hoa dalanai idia vara. Dina ta Museum of Khartoum ena gunalaia tauna lau davaria. Ia be kamonai tauna, bona ai herevahereva namonamo. Ia kamonai Greece amo lau mai neganai, lau ia nanadaia bema miusiam dekenai do lau lao bona lagani 500 C.E. murinai ia noho dubu ta amo idia davaria gaudia dekenai idia noho toretore do lau hahanaia. Hora ima ruma ena badina daiutuna dekenai lau noho murinai, mereki ta lau davaria bona ia dekenai Iehova ena ladana ena Leta Hani idia noho. Egu moale mani oi laloa! Europe dekenai nega haida Dirava ena ladana be dubu dekenai ita davaria diba, to Sahara ihuanai lau davaria be hoa gauna!

Lagani 1958 ena intenesenel hebouhebou murinai, lau idia abia hidi soun naria tauna bamona tadikaka do lau vadivadi henia tano bona teritori 26 dekenai, Middle bona Near East bona Mediterranean kahirakahira ai. Nega momo lau diba lasi hekwakwanai be edena bamona do lau hanaia, to hanaihanai Iehova ese dala ia kehoa.

Nega ibounai Iehova ena orea ese tano idauidau dekenai sibona idia noho tadikaka ia naria dalana lau hoalaia. Nega ta, India tadikaka ta lau davaria, oela idia tahua gabuna dekenai ia gaukara. Toana be ia sibona be Witness tauna unai tano ai. Gaukara gabuna ai ena kohu ia atoa mauana dekenai gado idauidau 18 edia buka idia noho, unai be iena gaukara turadia dekenai ia henia. Unuseniai danu, bese idauidau edia tomadiho ibounai idia taravatua gabunai, iseda tadikaka ese ena maduna, sivarai namona harorolaia maduna unai, ia laloaboio lasi. Iena gaukara turadia idia hoa bada, badina iena tomadiho tauna ta idia siaia ia vadivadi henia totona.

Lagani 1959 ai, Spain bona Portugal lau vadivadi henia. Unai neganai idia ruaosi be ami ena lohia aukana henunai idia noho, bona gavamani ese Iehova ena Witness taudia dala aukana ai ia taravatua. Hua ta lalonai, hebou handred bona ma haida lau karaia diba, tadikaka lau hagoadaia do idia hesiku lasi ena be hekwakwanai badadia idia davaria.

Sibona Lau Noho Maurina Ia Ore

Lagani 20 bona ma haida lalonai, headava lasi tauna bamona ful-taim hesiai gaukara lalonai Iehova lau hesiai henia, to hanaihanai lau loaloa bona noho gabuna korikorina be lasi lau hesikulaia matamaia. Unai neganai lau be Annie Bianucci, Tunisia ai ia noho spesel painia ta, lau davaria. Lagani 1963 ai, ai headava. Iena lalokau Iehova bona hereva momokani dekenai, haroro gaukara ia laloa bada karana mai ena hadibaia namonamo karana ida, bona gado idauidau ia diba be hahenamo badana emai misinari bona sekit gaukarana lalonai Africa ena not bona west kahanai bona Italy dekenai.

August 1965 ai, egu adavana bona lau be Dakar, Senegal ai, idia siaia, unuseniai egu hahenamo be brens opesi ena gaukara lau hegaegaelaia. Senegal be tomadiho ia abia dae tanona badana, reana unai be ena presiden, Léopold Senghor, dainai. Lagani 1970 murinai Malawi ai Iehova ena Witness taudia be dagedage bada idia henia neganai, Africa ena tano edia biagudia haida sibona be Malawi ena Presiden Banda dekenai idia torea Witness taudia idia durua totona, bona idia ta be presiden Léopold Senghor.

Iehova Ena Hahenamo Badana

Lagani 1951 ai, Gilead lau rakatania Cyprus dekenai lau lao neganai, egu sutkeisi be 7. Turkey dekenai lau lao neganai, idia be ima. To lau loaloa momo dainai, kohu ena hetoana kilogaram 20 lau manadalaia, bona unai lalonai be egu faila bona egu “beibi” taipraita idia noho. Dina ta ai Tadikaka Knorr, unai neganai ia be Watch Tower Society ena presiden, lau hamaoroa: “Kohu ura henia karana amo lau umui gimaia. Umui henia gaukara dainai egu kohu be kilogaram 20 sibona, bona egu mauri ia namo herea.” Lau laloa lasi gau namodia lau reaia ena be egu kohu be haida sibona.

Egu laolao lalonai hekwakwanai badana be tano ta lau vareai bona lau rakatania neganai. Dina ta ai, gavamani ese gaukara ia taravatua tanona ta ai, kastom ofesa ta ese egu faila ia tahua matamaia. Unai kara ese unai tano dekenai idia noho Witness taudia dekenai dika ia havaraia diba, unai dainai egu kouti amo egu adavana ia siaia revareva lau abia bona unai kastom ofesa dekenai lau gwau: “Lau itaia oi ura revareva oi duahia. Oi ura egu adavana ia siaia revarevana oi ura duahia danu, a? Ia be faila dekenai ia noho lasi.” Ia hemarai, ena sori herevana ia gwauraia bona lau ia ruhaia.

Lagani 1982 amo ema bona hari, egu adavana bona lau be Nice dekenai misinari gaukara ai karaia, unai be France ena saut kahanai. Gorere dainai, lau be hegeregere lasi guna bamona hari lau gaukara. To unai ese emai moale ia hadokoa lasi. Ai itaia vadaeni ‘emai hekwarahi be hekwarahi kava lasi momokani.’ (1 Korinto 15:58) Moale bada lau abia badina lau itaia lagani momo lalonai lau stadi henia taudia momo bona egu famili taudia 40 bona ma haida ese mai abidadama ida Iehova ena hesiai gaukara idia karaia noho.

‘Lau hanaia lao’ dainai egu mauri lalonai lau reaia gaudia lau laloa bada lasi. Momokani, ita henia gaudia ta be Iehova bona ena Natuna, Iesu Keriso, be ita dainai idia karaia gaudia ida ita hahegeregerea diba lasi. Hereva momokani lau diba lagani 60 lau laloa neganai, lau gwau diba Iehova ese lau ia hanamoa bada. Aonega Herevadia 10:22 ia gwau bamona, “Lohiabada ena hanamoa sibona ese, kohu momo oi dekenai ia henia noho.”

Momokani, Iehova ena ‘bogahisihisi bona lalokau ese, inai tanobada ena mauri idia hereaia.’ (Salamo 63:3) Buruka dainai hekwakwanai idia momo idia lao neganai, Dirava ena lauma amo salamo torea tauna ena hereva be egu guriguri lalonai lau gwauraia: “Lohiabada e, oi sibona lau abidadama henia noho. Lau do oi durua, vadaeni nega ta hemarai ese lau do ia abia lasi. Badina be, Lohiabada Dirava e, oi be egu mauri namona abia dalana. Lohiabada e, egu uhau dinadia ia mai bona hari, lau ese oi lau abidadama henia vadaeni. Dirava e, lau be mero negana dekena amo, oi ese lau oi hadibaia vadaeni, bona unai negana ia mai bona hari, lau ese oiemu hoa karadia lau gwauraia vadaeni, bona do lau gwauraia noho. Momokani hari lau be buruka, bona egu huina idia kurokuro vadaeni. To Dirava e, lau do oi rakatania lasi.”—Salamo 71:1, 5, 17, 18.

[Picture on page 25]

Lauegu adavana, Annie, ida hari

“Harihari Gauna Hereadaena Iehova Amo”

MAY 1, 1996, Gima Kohorona ese Keristani taudia be politikol karadia amo idia gini siri karana bona Iehova bona “Kaisara” dekenai iseda maduna be edena bamona ita huaia namonamo karana ia herevalaia goevagoeva. (Mataio 22:21) Unai hereva matamata dainai tanikiu herevadia momo ai abia. Unai tanikiu herevadia ta be inai revareva, Greece dekenai ia noho Witness tauna ta ese Iehova ena Witness taudia edia Hakaua Oreana dekenai ia siaia:

“Lau ura egu kudouna ibounai ida umui tadikaka ibounai lau tanikiu henia bada badina umui ese lauma dalanai ai umui naria namonamo dainai. Egu Keristani abidadamana dainai lagani 9 dibura ruma dekenai lau noho, unai dainai May 1, 1996, Gima Kohorona ena hereva namodia lau moalelaia bada. (Isaia 2:⁠4) Ia be harihari gauna hereadaena Iehova amo.​—⁠Iamesi 1:⁠17.

“Unai hereva namodia lau moalelaidia noho lalonai, Gima Kohorona (August 1, 1994, rau 14) gunana ma ta ena hereva lau laloatao, ia gwau: ‘Ia hedinarai momokani, kara hametaua lasi karana be mai anina bada gauna, badina unai ese ita ia hasiahua Iehova ita lalokau henia bada totona.’ Oibe, tadikaka, Iehova lau tanikiu henia badina lau be iena hebogahisi bona lalokau oreana, iena aonega ia hahedinaraia oreana, dekenai lau noho dainai.​—⁠Iamesi 3:⁠17.

“May 1 Gima Kohorona ese ia hahedinaraia diari herevana be Greece dekenai edia abidadama dainai guna lagani haida idia dibura eiava dibura ruma ai idia do noho taudia ese idia moalelaia bada. Umui lau tanikiu henia lou. Mani Iehova ese iena lauma amo umui ia hagoadaia bena ai dekenai lauma aniani do umui henia noho diba inai hekwakwanai negadia lalonai.”