Edena Bamona Ita Ha-Uraia Heheni, Lalokau Bona Kara Namodia Havaraia Totona?
“Do ita laloa heheni, bena do ita ha-uraia heheni, lalokau bona kara namodia do ita havaraia totona. . . . Do ita hagoadaia heheni, oibe, inai kara do ita habadaia, badina be, umui itaia, dina badana be ia kahirakahira.”—HEBERU 10:24, 25, NW.
EDIA ruma iduaradia idia lokaia, bena ruma lalonai idia hebou hehuni. Murimuri ai dika idia davaria diba. Edia Hakaua Tauna, Iesu, be vanegai idia hasatauroa, bona ia ese guna ia hadibadia vadaeni idia danu be unai bamona do idia kara henidia. (Ioane 15:20; 20:19) To idia lalokau henia tauna Iesu be hereva maragi ai idia herevalaia lalonai, edia lalona idia goada, badina be idia helai hebou dainai.
2 Unai murinai, lagani momo lalonai, Keristani taudia ese hetoho idauidau bona dagedage idia davaria. Unai hahediba taudia ginigunadia hegeregeredia, idia be edia hebou karadia amo goada idia abia. Unai dainai, aposetolo Paulo be Heberu 10:24, 25 (NW) ai ia gwau: “Do ita laloa heheni, bena do ita ha-uraia heheni, lalokau bona kara namodia do ita havaraia totona. Iseda hebou karadia do ita hadokoa lasi, haida ese idia hadokoa hegeregerena, to do ita hagoadaia heheni, oibe, inai kara do ita habadaia, badina be, umui itaia, dina badana be ia kahirakahira.”
3. Dahaka dainai oi gwau Heberu 10:24, 25 be Keristani taudia do idia hebou haheganina sibona mo lasi?
3 Unai hereva amo ia haganidia edia hebou karadia do idia karaia noho. Unai sibona lasi, to Dirava ena lauma ese ia hadibalaia karadia ia gwauraia danu, unai kara be Keristani taudia edia hebou iboudiai lalodiai do idia karaia be namo. Hari inai negai, ita itaia goevagoeva Iehova ena dina ia kahirakahira, bona inai tanobada dikana lalonai hekwarahi bona dika idauidau idia vara, unai dainai gau badana be iseda hebou be roho mauri gabudia ai do ita halaodia, idia lalodiai ita ibounai ese goada do ita davaria totona. Unai be edena bamona do ita karaia diba? Mani Paulo ena hereva do ita tahua namonamo bona inai henanadai badadia toi do ita henanadailaidia: “Do ita laloa heheni” anina be dahaka? “Do ita ha-uraia heheni, lalokau bona kara namodia do ita havaraia totona” anina be dahaka? Bona, edena bamona “ita hagoadaia heheni” diba, inai hekwarahi momo negana lalonai?
“Do Ita Laloa Heheni”
4 Paulo ese Keristani taudia ia haganidia do ‘idia laloa heheni.’ Unai neganai, Greek gado herevana ka·ta·no·eʹo ia torea; unai hereva amo inai hereva “lalo-parara” ena anina ia habadaia. Buka ta ladana Theological Dictionary of the New Testament ia gwau unai hereva ena anina be “ta ese gau ta ia laloa mai ena lalona ibounai ida.” W. E. Vine ia gwau ena anina ma ta be “lalo-pararalaia momokani, laloa namonamo.” Unai dainai, Keristani taudia idia “laloa heheni,” anina be idia diba heheni sisina sibona lasi, to idia lalo-parara heheni toho mai edia lalona ibounai ida.—Heberu 3:1 itaia.
5. Reana taunimanima ta ena dahaka ena toana be ena vairana dekenai ia hedinarai lasi, bona dahaka dainai unai gau ita lalodia be namo?
5 Namona be inai do ita laloatao: Taunimanima ta ena toana o ena kara bema ita itaia sisina sibona, ia ita diba momokani lasi. (1 Samuela 16:7) Reana ta ena lalohadai be dobu eiava ia ese fani herevadia ia moalelaia, to unai ena toana be ena vairana dekenai ia hedinarai lasi. Bona taunimanima edia noho be idauidau. Haida ese hisihisi badadia idia haheaukalaia vadaeni; ma haida ese hisihisi badadia hari idia haheaukalaia noho, unai hisihisi ita lalo-pararalaia be auka. Nega momo, tadikaka ta o taihu ta ena noho ita diba momokani neganai, iseda badu iena kara ta dekenai be ia ore.—Aonega Herevadia 19:11.
6. Do ita diba heheni momokani daladia haida be dahaka dahaka, bona reana unai ese dahaka namo do ia havaraia?
6 To, bema ta ese ita ia noia lasi, namona be ia sibona ena kara do ita tahua toho lasi. (1 Tesalonika 4:11) To, ita ese iseda bamodia edia namo ita tahua diba. Anina be Kingdom Hall lalonai do ita hanamodia sibona lasi. Oi ura do oi dibaia namonamo tauna be do oi abia hidi, bena hebou negana vairanai eiava murinai nega sisina do oi hereva henia toho be namo. Dala namo hereana be inai: Ta o rua be do oi boiridia, bena ‘emu ruma dekenai do oi abidia dae’ bona aniani sisina do umui ania hebou. (Roma 12:13) Edia hereva do oi kamonaia mai emu ura ida. Bema ta oi nanadaia ia ese Iehova edena bamona ia dibaia bena ia lalokau henia, reana unai ese gau momo do ia hahedinaraia. To, ta do oi dibaia momokani dalana be, ruma-ta-ruma-ta gaukarana lalonai do umui gaukara hebou. Bema unai bamona do ita laloa heheni, do ita ura heheni mai eda lalo-tamona bona mai eda momokani ida.—Filipi 2:4; 1 Petero 3:8.
“Do Ita Ha-uraia Heheni”
7 Ita laloa heheni neganai, ita hegaegae do ita ha-uraia heheni totona. Keristani elda taudia ese inai kara amo anina bada idia havaraia. Baibel ia gwau Iesu be nega ta taunimanima ia haroro henidia neganai, “iena hadibaia hereva dekenai idia hoa bada.” (Mataio 7:28) Ma nega ta tuari taudia haida, ia do idia dogoatao totona idia siaidia taudia, ese idia rakatania, ma idia gwau: “Hamatamaia nega dekena amo ia mai bona hari, tau ta ia hereva lasi inai tau ia hereva bamona.” (Ioane 7:46) Dahaka dainai Iesu ena hahediba herevadia be mai edia siahu? Ia be mai ena siahu ida ia boiboi badabada dainai, a? Lasi; Iesu ia hereva mai ena hemataurai ida. To ena hereva idia kamonai taudia edia lalona ia ania toho. Taunimanima ia lalodia dainai, ha-uradia dalana ia diba. Ia ese taunimanima edia kara korikori be parabole haragadia lalonai ia gwauraidia. (Mataio 13:34) Unai hegeregerena, iseda hebou ai idia haroro taudia ese Iesu do idia tohotohoa be namo; namona be do idia hereva mai edia siahu bona mai edia ura ida, hebou taudia ha-uradia totona. Iesu hegeregerena, ita ese parabole herevadia do ita tahudia diba, ita haroro henidia taudia dekenai do idia hegeregere bona edia lalona ai do idia abia dae herevadia unai.
8. Iesu be sibona ena haheitalai amo edena bamona ia ha-uradia, bona unai kara dekenai edena bamona do ita tohotohoa diba?
8 Iseda Dirava ena hesiai ita lao henia lalonai, ita ibounai be iseda haheitalai amo ita hagoadaia heheni diba. Iesu ese ena hereva idia kamonai taudia ia ha-uradia. Ia ese Keristani hesiai gaukarana ia ura henia bada bona ia abia isi. Ia gwau unai gaukara be iena aniani. (Ioane 4:34; Roma 11:13) Unai bamona lalo-goadana ia hanai diba haida dekenai. Unai hegeregerena, emu moale, haroro gaukarana moalelaia moalena, be oi hahedinaraia diba, a? Namona be emu ekspiriens namodia be kongregesen taudia do oi hamaorolaidia, gau tamona, do oi heagilaidia lasi be namo. Haida do oi boiridia idia be oi ida do umui gaukara hebou neganai, namona be do oi durudia toho, iseda Dirava Hereadaena, Iehova, do idia harorolaia mai edia moale momokani ida totona.—Aonega Herevadia 25:25.
9. (a) Haida be edena dala amo do ita ha-uradia lasi be namo, bona dahaka dainai? (b) Ita be dahaka ura maorona dainai Iehova ena hesiai ita lao henia be maoro?
9 To, namona be do oi naria namonamo, haida do oi ha-uradia kerere garina. Hegeregere, bema ita naria namonamo lasi, reana haida be inai dala amo do ita hahemaraidia: Do ita hamaorodia idia be gaukara goadagoada taudia haida ida idia hegeregere lasi, eiava reana siboda eda hahetoho do ita haginidia bena do ita gwau idia hanaia lasi taudia be hegeregere lasi. Reana unai dala amo haida do ita ha-uradia, bena nega sisina do idia gaukara, to Paulo ia gwau lasi, ‘Do ita ha-uraia heheni, hemarai bona kara namodia do ita havaraia totona.’ Lasi, namona be do ita ha-uradia, lalokau do ita havaraia totona, bena edia ura namona ese kara namodia do ia havaraia. Bema ta ia gaukara badina be ia gari, kongregesen taudia haida do idia laloa ia be hegeregere lasi garina, unai be maoro lasi.—2 Korinto 9:6, 7 itaia.
10. Dahaka dainai namona be ita laloatao haida edia abidadama ita biagua lasi?
10 Ena be ita ha-uraia heheni, to ita ta ese ena bamona do ia biagua lasi be namo. Ena be aposetolo Paulo be Dirava ese siahu bada ia henia, to Korinto ena kongregesen taudia ia hamaorodia mai ena manau ida, ia gwau: “Ai ese umui emui abidadama ai biagua lasi.” (2 Korinto 1:24) Iseda bamodia be Iehova ena hesiai lao henia karadia hida do idia karaia bona gau ma haida danu be idia sibodia ese idia lalohadailaia be maoro; unai gau lalohadailaidia be iseda gaukara lasi. Bema Paulo hegeregerena ita ese unai ita lalo-pararalaia mai eda manau ida, do ita “kara maoromaoro auka herea lasi,” bona iseda moale do ia boio lasi. (Hadibaia Tauna 7:16) Kara auka taudia mai edia moale lasi ese haida idia ha-uradia lasi; edia lalona idia hametaua sibona.
11. Israela ena Palai Dubu idia haginia gwauraia neganai, dahaka ese ia ha-uradia dainai harihari gaudia idia mailaia, bona unai edia kara be edena bamona ita tohotohoa diba?
11 Ita ura iboudiai ese Iehova ena hesiai do idia lao henia mai edia ura namona ida, idaunegai Israela taudia ese Palai Dubu idia haginia gwauraia neganai harihari gaudia idia henia hegeregerena. Esodo 35:21 ia gwau: “Bona harihari gaudia idia ura idia henia taudia ibounai ese edia harihari gaudia be Lohiabada dekenai idia mailaia, Palai Dubu do idia haginia totona.” Ta ese ia fosidia lasi, to edia lalona ese idia ha-uradia. Heberu gado ai ia torea herevana ena anina korikorina be “edia lalona ese idia abia isi taudia iboudiai” ese unai harihari gaudia idia mailaia. (Italiks be aiemai.) Unai ia hereaia karana do ita karaia toho be namo; anina be, do ita hebou negadiai, iseda lalona do ita abia isi heheni toho. Bena Iehova ena lauma ese anina do ia havaraia diba.
“Do Ita Hagoadaia Heheni”
12 Inai hereva, “do ita hagoadaia heheni,” be Paulo ese ia torea neganai, Greek gado herevana pa·ra·ka·leʹo hegeregerena herevana ta ia torea; ena anina ma ta be ‘lalona hagoadaia.’ Greek Septuagint Baibel lalonai unai hereva be Iobu 29:25 ai idia torea; unai siri lalonai Iobu ia gwau ia ese lalohisihisi taudia be laloa goada ia henidia. To, madi, Iobu ese hetoho aukana ia davaria neganai, ta ese ena lalona unai bamona ia hagoadaia lasi. Ena turana koikoidia toiosi ese idia hahemaoro henia bona idia gwau henia mo; ia idia lalo-pararalaia lasi bona idia hebogahisi henia lasi. Momokani, edia hereva iboudiai lalonai, Iobu ena ladana be nega ta idia hatoa lasi. (Iobu 33:1, 31 ena idau itaia.) Toana be idia laloa ia be hekwakwanai ta sibona. Unai dainai Iobu ese ia haere henidia mai ena badu ida, ia gwau: “Bema umui be lauegu gabu dekenai umui noho”! (Iobu 16:4) Unai hegeregerena, hari inai negai, bema oi ura ta do oi hagoadaia, ena lalona ena mamina do oi abia be namo! Do oi kota henia lasi. Roma 14:4 ia gwau: “Oi be daika, tau ta ena hesiai tauna do oi gwauraia kerere? Iena Biaguna sibona ese do ia gwauraia ia be maoro o kerere. Bona ia be do ia gini, badina be Lohiabada ese ia haginia diba.”
13, 14. (a) Iseda tadikaka bona taihu edia lalona hagoadaia totona, namona be do ita durudia, dahaka hereva momokanina badana do idia abia dae totona? (b) Aneru ta ese Daniela edena bamona ia durua?
13 Pa·ra·ka·leʹo hegeregerena herevana ta danu be Motu gado ai idia hahanaia neganai, ‘lalona hagoadaia’ be 2 Tesalonika 2:16, 17 ai idia torea: “Iseda Lohiabada Iesu Keriso bona iseda Tamana Dirava ese ita idia lalokau henia noho. Edia hariharibada ese ita ta ta iseda lalona idia hagoadaia noho, bona unai dainai Dirava ena gau namodia ita naria noho, mai haheauka danu. Bona idia ese umui do idia haginia auka, mai goada danu. Vadaeni nega ibounai kara namodia do umui karaia, bona hereva namodia do umui gwauraia.” Mani inai oi laloa: Paulo ia gwau iseda lalona idia hagoadaia ena badina korikorina be Iehova ese ita ia lalokau henia. Unai dainai, namona be unai hereva momokanina badana hamomokania herevadia amo do ita hagoadaia heheni.
14 Nega ta, peroveta tauna Daniela ese mata hanai ta mai garina be ia itaia murinai, ia laloa momo dainai ia gwau: “Lauegu vairana ena toana be ia idau momokani, tau ta ia diba lasi inai be lau, bona egu goada ia ore momokani.” Iehova ese aneru ta ia siaia, bena unai aneru ese Daniela ia hamaoroa loulou Dirava ese “ia lalokau henia bada.” Unai dainai, Daniela ese aneru ia hamaoroa, ia gwau: “Oiemu hereva dekena amo goada lau abia vadaeni.”—Daniela 10:8, 11, 19.
15. Elda taudia bona sekit bona distrik naria taudia ese hahenamo herevadia bona kerere sisibalaia herevadia be edena bamona idia gaukaralaidia namonamo hebou be namo?
15 Vadaeni, haida do ita hagoadaia dalana ma ta be inai: Iseda hereva amo do ita hanamodia! Bema ita naria namonamo lasi, reana do ita lalo-auka henidia bona do ita maumauraidia momo. Reana nega haida ta ese ia hamaoromaorodia be namo, bona elda taudia bona sekit bona distrik naria taudia ese unai bamona idia karaia be mai anina bada. To namona be tadikaka ese do idia lalodia tao, hahemaoro idia goadalaia dainai lasi, to edia hereva namodia amo idia hagoadadia dainai.
16. (a) Lalo-metau taudia ita hagoadadia neganai, bema ita hamaorodia Iehova ena hesiai do idia lao henia badabada be namo, dahaka dainai reana unai be hegeregere lasi? (b) Elia ena lalona ia metau neganai, Iehova ese edena bamona ia durua?
16 Lalo-metau taudia edia lalona do ita hagoadaia be gau badana. Iehova ia ura ita Keristani taudia ese iseda orea taudia unai bamona be do ita durudia, bona bema ita be elda taudia, unai be mai anina bada. (Aonega Herevadia 21:13) Edena bamona ita durudia diba? Bema ita hamaorodia Iehova ena hesiai do idia lao henia badabada be namo, reana unai be hegeregere lasi. Badina be reana unai hereva ena anina be, edia lalona idia metau badina be edia gaukara ena bada be hegeregere lasi. To momo be unai bamona lasi. Nega ta peroveta tauna Elia ena lalona ia metau momokani dainai ia ura do ia mase; to unai neganai ia ese Iehova ena hesiai ia lao henia badabada noho. Vadaeni, Iehova ese edena bamona ia kara henia? Aneru ta ia siaia do ia durua totona. Elia ese ena lalo-metau ibounai be Iehova dekenai ia gwauraia hedinarai, ia gwau ia laloa ia be anina lasi iena mase tubuna hegeregeredia, ena gaukara ibounai be hekwarahi kava sibona, bona ia sibona mo ia noho. Iehova ese ena hereva ia kamonaia, bena Iena siahu be hahegari dalana amo ia hahedinaraia ia dekenai, bona ia hamaoroa ia be sibona lasi, bona ia hamatamaia gaukarana be do ia hagugurua; unai ibounai amo iena lalona ia hagoadaia. Iehova ese danu Elia ia gwauhamata henia, bamona ta do ia henia; Elia ese do ia hadibaia bena gabeai ia ese Elia ena gabuna do ia abia.—1 King Taudia 19:1-21.
17 Ena lalona ia hagoadaia momokani unai! Namona be ita ese lalo-hekwarahi taudia ita bogaraginai be unai bamona do ita hagoadaia. Idia do oi lalo-pararalaia totona, edia hereva do oi kamonaia be namo! (Iamesi 1:19) Idia ta ta ena manoka ena manoka hegeregeredia Baibel ena hereva amo do oi hagoadadia. (Aonega Herevadia 25:11; 1 Tesalonika 5:14) Sibodia edia lalona ese idia kota henidia momo taudia hagoadaia totona, reana elda taudia ese Baibel amo do idia hadibadia Iehova ese ia lalokau henidia bona ia lalodia bada.a Bema haida idia laloa idia be anina lasi, Iesu ena boubou karana do ita herevalaia idia dekenai be hagoadadia dalana mai siahuna. Bema ta ese ena kara dikana gunana ta ia lalohisihisilaia, reana namona be do ita hadibaia, bema ia helalo-kerehai bona unai kara ia dadaraia vaitani, unai boubou ese ia hagoevaia vadaeni.—Isaia 1:18.
18. Iesu ena boubou karana herevana be edena bamona ita gaukaralaia diba, ta ese reipi amo ia hadikaia kekenina ena lalona hagoadaia totona?
18 To, momokani, elda ese lalo-metau tauna do ia laloa namonamo guna, unai dala amo do ia hadibaia maoromaoro totona. Haheitalai ta mani oi laloa: Keriso ena boubou be animal bouboudia ese idia laulaulaia; unai animal bouboudia be Mose ena Taravatu hegeregerena idia henia, edia kara dikadia iboudiai abia oho totona. (Levitiko 4:27, 28) To, taravatu ia gwau lasi tau ta ese ia reipia kekenina ese unai bamona kara dika boubouna ta do ia karaia. Ia gwau ‘unai kekeni dekenai panisia kara do idia karaia lasi.’ (Deuteronomi 22:25-27) Unai dainai, bema hari inai negai taihu ta be tau ta ese ia reipia dainai mamina ia abia ia be mai mirona bona ia be anina lasi, namona be elda ta ese do ia hamaoroa Iesu ena boubou ese unai kara dikana amo do ia hagoevaia be namo, a? Lasi vaitani. Unai tau ese ia reipia neganai, kekeni ia kara dika lasi. Unai tau sibona ia kara dika dainai, ia sibona ia miro. To Iehova bona Keriso edia lalokau, boubou karana lalonai idia hahedinaraia lalokauna, be elda ese kekeni do ia hamaorolaia be namo; unai amo do ia hahedinaraia ma ta ena kara dika ese ia hamiroa lasi Dirava ena matana ai, to Iehova ese ia laloa bada bona ia lalokau henia noho.—Mareko 7:18-23; 1 Ioane 4:16 itaia.
19. Dahaka dainai ita diba nega haida iseda tadikaka bona taihu edia hebamo ese ita do ia hagoadaia lasi, to iseda lalona be edena bamona ita hadaia be namo?
19 Oibe, herevana ta ena noho dalana be edena bamona, bona herevana ena mauri gunana lalonai dahaka ia hisihisilaia, to namona be Iehova ena orea taudia edia kongregesen lalonai goada do ia davaria. Bona, do ita hebou negadiai, bema ita ta ta ibounai be do ita laloa heheni toho, bona bema do ita ha-uraia heheni toho bona do ita hagoadaia heheni toho, goada do ia davaria. To, ita goevadae lasi dainai, ita ibounai be nega haida unai kara haida ita reaia, bona nega ta ta ita hahisia heheni. Vadaeni, kongregesen taudia edia kerere oi lalodia momo lasi. Bema oi lalodia momo, reana kongregesen do oi maumauraia momo, bena reana tarapu ta lalonai do oi moru. Paulo ia ura bada ita do ia durua, unai tarapu, iseda hebou karadia hadokoa karana, amo do ita raka siri totona. Ia lalonai do ita moru lasi be namo! Inai tanobada gunana ena dika bona ena hekwarahi idia bada idia lao noho lalonai, namona be iseda lalona ita hadaia, iseda hebou ai iseda hebamo amo do ita hagoadaia heheni—bona inai kara do ita habadaia, badina be, ita itaia, dina badana be ia kahirakahira!
[Footnotes]
a Reana elda ta ese Gima Kohorona bona Noga! edia hagoadaia herevadia do ia abia hidi, ia be unai bamona tauna ida do idia herevalaia hebou totona—unai hereva rua be inai: “Lalo-Metau Ena Hekwakwanai Oi Hanaia Diba” bona “Lalohisihisi Neganai Heduru Oi Davaria Diba”—Gima Kohorona, July 1, 1990, bona July 15, 1992.
Edena Bamona Do Oi Haere?
◻ Dahaka dainai hari inai dina gabedia ai iseda hebou bona iseda hebamo ese ita idia hagoadaia be gau badana?
◻ Ita laloa heheni anina be dahaka?
◻ Ita ha-uraia heheni anina be dahaka?
◻ Ita hagoadaia heheni anina be dahaka?
◻ Lalo-metau taudia be edena bamona ita hagoadadia diba?
1, 2. (a) Dahaka dainai Keristani taudia ginigunadia ese goada be edia hebou lalodiai idia davaria be mai anina bada? (b) Paulo ese edena bamona ia hadibadia do idia hebou loulou be namo?
4. “Do ita laloa heheni” anina be dahaka?
7. (a) Taunimanima ese Iesu ena hadibaia herevadia edena bamona idia laloa? (b) Dahaka dainai ena hadibaia herevadia be mai edia siahu?
12. (a) Greek gado herevana ta ena anina ta be “hagoadaia,” bona ena anina ma ta be dahaka? (b) Iobu ena bamona toiosi ese ena lalona hagoadaia karana edena bamona idia reaia? (c) Dahaka dainai ita hahemaoro heheni lasi be namo?
17. Sibona ena lalona ese ia kota henia momo tauna be reana elda ta ese edena bamona ia hagoadaia diba?
[Picture on page 16]
Iseda heabidae karadia amo ita diba heheni momokani
[Picture on page 18]
Elia ena lalona ia metau neganai, Iehova ese ena lalona ia hagoadaia mai ena hebogahisi ida