1-3. (a) Dahaka dainai Iosua be haheitalai namona? (b) Abia hidi ita karaia neganai, dahaka ita laloatao be namo?

ITA karaia abia hidi be mai anina bada, badina unai abia hidi ese iseda mauri ita gaukaralaia dalana do idia biagua. Unai be hegeregere, tau ta be dala ta ai ia raka lao bena dala rua dekenai ia ginidae. Edena dala do ia abia hidi? Reana ia ura lao henia gabuna dekenai do ia ginidae haraga dalana do ia abia hidi, ani?

² Baibel lalonai abia hidi badadia idia karaia taudia momo edia sivarai idia noho. Hegeregere, Kaino be abia hidi do ia karaia, iena badu do ia biagua eiava lasi. (Gen. 4:6, 7) Iosua be abia hidi do ia karaia, Dirava momokani eiava dirava koikoidia do ia tomadiho henia. (Ios. 24:15) Iosua ia ura Iehova kahirakahira ia noho dainai, dala maorona ia abia hidi be mai anina bada. To, Kaino be ena abia hidi dainai, Iehova amo ia daudau.

³ Nega haida abia hidi badadia ita karaia, badina ita ura dala maorona ai ita raka noho. Namona be ita laloatao, ita karaia abia hidi ese Iehova ena ladana ia hanamoa bona ia kahirakahira ita noho, eiava ia amo ita ia hadaudaua diba. (Heberu 3:12 duahia.) Inai stadi bona wiki vaira ena stadi ai, ita be gau 7 do ita herevalaia. Do ita itaia edena dala ai unai gaudia dekenai dala maorona ita abia hidi, bena Iehova amo do ita daudau lasi.

MONI GAUKARA

4. Dahaka dainai moni gaukara ita karaia be gau badana?

⁴ Keristani taudia idia gaukara be namo, unai amo idia sibona bona edia ruma bese idia naria diba. Baibel ese ia hahedinaraia bema tau ta ia ura lasi ena ruma bese ia naria, iena dika ese abidadama lasi tauna ena dika ia hereaia. (2 Tes. 3:10; 1 Tim. 5:8) Unai dainai, moni gaukara oi karaia be gau badana. To bema oi naria namonamo lasi, oi abia hidi moni gaukara ese Iehova amo oi ia hadaudaua diba. Edena dala ai?

5. Moni gaukara ta oi do abia dae lasi neganai, dahaka gaudia oi laloa guna be namo?

⁵ Bema oi be moni gaukara lasi be edena bamona? Bema moni gaukara oi davaria be auka, reana moni gaukara ta do oi abia dae kava sibona. To, dahaka do oi karaia bema unai moni gaukara ese Baibel ena hakaua herevadia ia utua? Eiava, dahaka do oi karaia, bema unai moni gaukara dekenai emu nega bada oi haorea dainai, nega be lasi emu kongrigeisen o famili oi bamoa totona? Do oi laloa, oi be moni gaukara lasi dainai, unai gaukara do oi abia dae sibona, a? Namona be oi laloatao, oi karaia abia hidi dainai oi be Iehova kahirakahira do oi noho, eiava ia amo do oi daudau. (Heb. 2:1) Bema oi be moni gaukara ta oi tahua, o emu moni gaukara oi ura haidaua, edena dala ai abia hidi maorona oi karaia diba?

6, 7. (a) Taunimanima be moni gaukara idia abia neganai, dahaka gau rua idia laloa bada? (b) Edena tahua gauna ese ta be Iehova kahirakahira ia abia lao diba, bona dahaka dainai?

⁶ Emu mauri lalonai oi ura do oi karaia gaudia hegeregerena, moni gaukara oi abia hidi be namo. Sibona oi nanadaia, ‘Lau ura inai moni gaukara ese edena bamona lau do ia durua?’ Bema emu tahua gauna be, moni gaukara oi abia badina oi ura oi sibona bona emu famili oi durua Iehova umui hesiai henia totona, vadaeni Ia ese oi do ia durua. (Mat. 6:33) Bema hekwakwanai ta dainai emu moni gaukara oi haboioa, Iehova ese oi ia naria diba. (Isa. 59:1) Dirava “ese ia idia badinaia taudia be hahetoho amo ia hamauridia dalana ia diba.”​—⁠2 Pet. 2:9.

⁷ To, bema emu tahua gauna be oi ura moni momo oi haboua, be edena bamona? Reana moni momo do oi abia diba, to bema oi naria namonamo lasi, unai ese oi ia hadikaia diba. (1 Timoteo 6:9, 10 duahia.) Bema emu mauri lalonai moni gaukara bona moni momo haboua karana oi laloa bada, vadaeni oi be Iehova amo do oi daudau.

8, 9. Tama sina ese edena henanadai idia lalodia dobu be namo, bona dahaka dainai?

⁸ Bema oi be tama o sina ta, namona be oi laloatao emu natudia ese emu abia hidi karaia dalana idia itaia noho. Idia itaia diba, emu mauri lalonai oi be dahaka gaudia oi laloa bada. Emu hetura karana Iehova ida eiava moni gaukara oi laloa bada, a? Bema oi be ladana bada o moni momo oi laloa bada, reana emu natudia danu be unai dala dikana do idia abia hidi, ani? Idia ese oi do idia matauraia, a? Keristani matamata ta ia gwau: “Guna amo ema bona hari, lau laloatao egu tamana be ena moni gaukara dekenai ia bisi bada herea. Matamanai, ia gaukara goada badina ia ura emai ruma bese do ia naria namonamo. To vanegai lagani lalodiai gau ta ia idau, ia gaukara momo bona dava bada kohudia ia hoia. Unai dainai, momo idia laloa aiemai ruma bese be taga taudia, to ma haida ai hagoadaia lasi Iehova kahirakahira idia lao totona. Lau ura lasi egu tamana be moni gaukara ia karaia momo, to lau ura do ia gaukara goada emai ruma bese be Iehova kahirakahira ia lao totona.”

⁹ Tama sina e, namona be emui moni gaukara ese Iehova amo umui ia hadaudaua lasi. Emui natudia dekenai haheitalai namona umui hahedinaraia be namo. Idia dekenai umui hahedinaraia, umui abia dae momokani Iehova tura henia karana ese moni bona kohu ia hereaia.​—⁠Mat. 5:3.

10. Matamata tauna ta ese moni gaukara ia do abia hidi lasi neganai, dahaka ia laloa guna be namo?

¹⁰ Bema oi be matamata tauna ta bona oi laloa noho nega vairai edena moni gaukara do oi abia hidi, edena dala ai abia hidi maorona oi karaia diba? Emu tahua gauna hegeregerena, emu abia hidi do oi karaia. Bema sikuli dekenai moni gaukara ta ena treinini oi karaia, oi laloa unai gaukara ese oi do ia durua Iehova ena hesiai gaukara oi atoa guna totona, a? Eiava, unai gaukara ese Iehova amo oi do ia hadaudaua? (2 Tim. 4:10) Eiava oi be tanobada taudia bamona moni momo sibona oi haboua neganai do oi moale, a? Eiava, Davida bamona oi be Iehova do oi abidadama henia, a? Davida ia gwau: “Gunaguna lau be mero, harihari lau be buruka, to nega ta kara maoromaoro tauna ta be Dirava ese ia rakatania, a? Lasi momokani, nega ta lau itaia lasi. Bona tau namona ena natuna be nega ta idia hitolo, a? O iena natuna ese aniani totona taunimanima idia noia, a? Lasi, nega ta lau itaia lasi. Lasi momokani.” (Sal. 37:25) Namona be oi laloatao, oi karaia abia hidi ese Iehova amo oi do ia hadaudaua, eiava mauri namona dekenai oi do ia hakaua lao. (Aonega Herevadia 10:22; Malaki 3:10 duahia.) Edena abia hidi do oi karaia?a

MOALE KARADIA

11. Baibel ese moale karadia be edena bamona ia herevalaia? Bona dahaka ita laloatao be namo?

¹¹ Baibel be moale karadia ia taravatua lasi, bona ia gwau lasi idia be nega haorea kava karadia. Danu, Paulo ese Timoteo ia hamaoroa tauanina ita eksasais be mai ena namo. (1 Tim. 4:8) Baibel ia gwau, “kiri be mai ena nega” bona “mavaru danu be mai ena nega,” bona ita ia hagoadaia, ita laga-ani o mahuta namonamo totona. (Had. 3:4; 4:6) To, bema oi naria namonamo lasi, moale karadia ese Iehova amo oi idia hadaudaua diba. Edena dala ai? Unai do ia vara bema moale karadia dekenai nega bada oi haorea, o moale karadia kereredia oi abia hidi.

12. Moale karadia oi ura abia hidi neganai, dahaka oi laloa guna be namo?

¹² Mani ita itaia, edena bamona moale karadia ita abia hidi be namo. Moale karadia namodia ita davaria diba. Momokani, tanobada ena moale karadia momo be Dirava ese ia inai henia gaudia, hegeregere dagedage, meamea bona matabodaga karadia idia hahedinaraia. Unai dainai, do oi abia hidi moale karadia oi laloa namonamo guna be gau badana. Mani inai henanadai oi laloa: ‘Lau abia hidi moale karadia ese lau idia durua, eiava? Inai moale karana ese lau ia doria lau dagedage, ma haida ida lau kara helulu, o egu bese lau abia isi totona, a? (Aon. 3:31) Inai moale karana dekenai egu moni bada lau haorea, a? Inai moale karana ese haida ia hahekwakwanaia, a? (Roma 14:21) Inai moale karana dainai lau be daidia lau bamoa? (Aon. 13:20) Inai moale karana ese egu lalona ai ura dikadia ia havaraia, a?’​—⁠Iam. 1:14, 15.

13, 14. Dahaka dainai moale karadia totona oi haorea nega ena bada oi laloa be namo?

¹³ Moale karadia karaia totona oi haorea nega ena bada oi laloa danu be namo. Sibona oi nanadaia: ‘Lau be moale karadia dekenai nega bada lau haorea dainai, nega be lasi haroro gaukara bona hebou lau lao totona, a?’ Bema nega bada be moale karadia dekenai oi haorea, do oi moalelaia momokani lasi. Nega maorona ai moale karadia idia karaia taudia, be unai nega idia moalelaia bada. Dahaka dainai? Badina idia diba idia ese mai anina bada gaudia idia karaia vadaeni dainai, edia laga-ani negana idia moalelaia.​—⁠Filipi 1:10, 11 duahia.

¹⁴ Ena be emu laga-ani negana ai nega bada oi haorea karana be mai ena moale, to unai ese Iehova amo oi ia hadaudaua diba. Mauri lagani 20 taihu ta ladana Kim, dekenai unai ia vara. Ia gwau: “Wikeni ibounai, Friday, Saturday, bona Sunday, lau be pati momo dekenai lau lao. To hari lau be mai anina bada gaudia momo lau karaia, hegeregere lau be painia ta bona haroro gaukara totona daba 6 oklok lau noga. Unai dainai, pati gabunai lau noho ela bona daba 1 o 2 oklok be hegeregere lasi. Lau laloparara moale karadia ibounai be dika lasi, to idia ese egu hesiai gaukara idia hadikaia diba. Unai dainai lau naria namonamo.”

15. Tama sina ese edena dala ai natudia idia durua diba, moale karadia maorodia idia abia hidi totona?

¹⁵ Tama sina be mai edia maduna tauanina dalanai edia ruma bese idia naria totona. Danu, idia ese ruma bese do idia durua Iehova kahirakahira idia noho, bona idia moale totona. Bema oi be tama o sina ta, namo lasi oi laloa moale karadia ibounai be dika. Moale karadia haida be namo. (1 Kor. 5:6) Bema oi hekwarahi moale karadia maorodia oi abia hidi totona, oi bona emu ruma bese be do umui moale hebou.b Unai dala amo, oi abia hidi moale karadia ese Iehova amo oi do ia hadaudaua lasi.

RUMA BESE TAUDIA

16, 17. Tama sina momo be dahaka dainai idia lalohisihisi? Edena dala ai ita diba, Iehova be edia lalohisihisi ia diba?

¹⁶ Vaia, ruma bese lalonai tama sina bona natudia idia lalokau heheni. Iehova danu ia gwau, ia ese ena taunimanima ia lalokau henidia, sina ta ese ena natuna ia lalokau henia bamona. (Isa. 49:15) Iseda ruma bese tauna ta ese Iehova ia rakatania neganai, vaia do ita lalohisihisi bada. Taihu ta ena natuna kekeni be idia atoa siri neganai ia gwau: “Lau lalohisihisi bada, bona lau laloa, ‘Dahaka dainai ia ese Iehova ia rakatania?’ Lau laloa reana egu kerere dainai unai ia vara.”

¹⁷ Bema oi be unai bamona oi mamia, Iehova be emu hemami ia diba. Iehova ese tanobada ai ia havaraia natuna ginigunana, Adamu ia gwau-edeede neganai, Iehova ena “lalohisihisi be ia bada momokani.” Bena gabeai, Noa ena negai taunimanima be Noa idia kamonai henia lasi neganai, Iehova ia lalohisihisi danu. (Gen. 6:5, 6) Haida be unai lalohisihisi ena mamina idia diba lasi, badina edia lalokau tauna ta be Iehova ia rakatania lasi. To, emu ruma bese tauna ta ena kara kererena dainai, Iehova amo oi daudau be aonega karana lasi. Bema emu lalokau tauna ta ese Iehova ia rakatania, edena dala ai emu lalohisihisi oi haheaukalaia diba?

18. Natuna ta be Iehova ia rakatania neganai, unai be tama sina edia kerere, a?

¹⁸ Emu natuna idia atoa siri neganai, namo lasi oi gwau unai be oiemu kerere. Ruma bese lalonai idia bapatiso natudia “ta ta sibona ena metau do ia huaia,” bona do ia abia hidi Iehova do ia hesiai henia, eiava lasi. (Gal. 6:5) Iehova ese unai kerere tauna sibona do ia hahemaoro henia, bona oi do ia hahemaoro henia lasi. (Ese. 18:20) Namo lasi ma haida dekenai kerere oi atoa. Danu, Iehova ese ena taunimanima ia matahakani henia dalana oi matauraia be namo. Namona be kongrigeisen idia gimaia elda taudia oi badu henidia lasi. To, namona be Diabolo oi tuari henia bona Iehova kahirakahira oi noho.​—⁠1 Pet. 5:8, 9.

19, 20. (a) Edena dala ai edia natuna idia atoa siri tama sina ese edia lalohisihisi idia haheaukalaia diba? (b) Tama sina ese dahaka idia laloa noho be namo?

¹⁹ To dahaka do ia vara, bema emu natuna idia atoa siri dainai Iehova dekenai oi lalohisihisi? Emu badu karana ese Iehova amo oi ia hadaudaua diba. Namona be idia atoa siri natuna do ia itaia, oi be Iehova oi lalokau henia bada. Unai dainai, emu lalohisihisi oi haheaukalaia totona, namona be emu hetura karana Iehova ida ia goada noho. Hanaihanai Keristani tadikaka taihu oi bamodia be namo. (Aon. 18:1) Danu, emu hemami be guriguri amo Iehova dekenai oi gwauraia hedinarai. (Sal. 62:7, 8) Namo lasi ekskius oi tahua idia atoa siri famili tauna ta oi hereva henia, eiava e-mail amo oi tore henia totona. (1 Kor. 5:11) To, namona be Iehova ena hesiai gaukara oi goadalaia noho. (1 Kor. 15:58) Paragraf 16 ai ita herevalaia taihu ia gwau: “Lau diba Iehova ena hesiai gaukara lau goadalaia bona egu hetura karana Iehova ida ia goada be namo. Unai amo egu natuna kekeni be Iehova dekenai ia giroa neganai, ia lau durua diba.”

²⁰ Baibel ia gwau “gau ibounai lalonai [lalokau] be mai ena helaro.” (1 Kor. 13:4, 7) Namona be oi laloa noho, emu lalokau tauna be Iehova dekenai ia giroa lou diba. Lagani ta ta ai, idia atoa siri taudia momo be idia helalo-kerehai bona Iehova ena orea dekenai idia giroa lou. Idia helalo-kerehai murinai, Iehova be idia ia badu henia noho lasi. To, ia noho hegaegae edia ‘kara dika ia gwauatao’ totona.​—⁠Sal. 86:5.

ABIA HIDI MAORODIA OI KARAIA

21, 22. Oi ura emu mauri lalonai edena bamona abia hidi do oi karaia?

²¹ Iehova ese taunimanima dekenai ura kwalimu ia henia, sibona edia abia hidi idia karaia totona. (Deuteronomi 30:19, 20 duahia.) To, ita dekenai maduna ia noho abia hidi maorodia do ita karaia. Keristani taudia ta ta ese sibona do idia nanadaia: ‘Lau karaia abia hidi ese lau idia durua dala maorona ai lau raka noho totona, a? Egu moni gaukara, moale karadia bona ruma bese taudia dainai lau karaia abia hidi ese Iehova amo lau ia hadaudaua, a?’

²² Iehova ena lalokau ena taunimanima dekenai be ia ore diba lasi. Unai dainai, gau ta ese Iehova amo ita ia hadaudaua diba lasi. To, bema ita sibona ese abia hidi kererena ita karaia, unai ia vara diba. (Roma 8:38, 39) Ita ura lasi unai do ia vara! Namona be oi hekwarahi gau ta ese Iehova amo oi ia hadaudaua lasi totona. Wiki vaira ena stadi ai ita ese gau foa do ita herevalaia. Bona do ita itaia, edena dala ai unai gaudia dekenai abia hidi maorodia ita karaia diba.

1, 2. (a) Satani be edena dala ai ita ia dibagania noho? (b) Dahaka ese ita do ia durua Dirava kahirakahira ita lao totona?

IEHOVA DIRAVA ese taunimanima ia karaia neganai, ia do idia tura henia urana be edia lalona ai ia atoa. To Satani ia ura do ita laloa, Iehova ita tabekau henia be anina lasi. Satani be Eden umana ai Heva ia koia negana amo unai ia karaia noho. (Gen. 3:4-6) Unai nega amo ema bona hari, taunimanima momo idia laloa edia mauri lalonai Dirava idia badinaia be anina lasi.

² To, ita ura lasi unai lalohadai kererena ita abia. Baibel ese Satani ena koikoi karadia be ita dekenai ia hadibaia. (2 Kor. 2:11) Satani ia ura ita ia dibagania unai amo abia hidi kereredia ita karaia, bena Iehova amo do ita daudau. Vanegai stadi ese ita ia durua moni gaukara, moale karadia bona ruma bese taudia totona abia hidi maorodia do ita karaia. Inai stadi lalonai Satani ese kompiuta bona unai bamona gaudia ma haida, helt, moni bona hekokoroku karana amo ita ia dibagania daladia do ita herevalaia. Bema unai gaudia dekenai abia hidi maorodia ita karaia, ‘Dirava kahirakahira ita lao’ diba.​—⁠Iam. 4:8.

KOMPIUTA BONA UNAI BAMONA GAUDIA MA HAIDA

3. Kompiuta bona unai bamona gaudia edia namo bona dika be dahaka? Haheitalai haida gwauraia.

³ Hari inai negai, momo be mobael fon, kompiuta, televisen, bona unai bamona gaudia idia gaukaralaia. Bema unai gaudia be dala maorona ai ita gaukaralaidia, ita idia durua diba. To, bema dala kererena ai ita gaukaralaidia, iseda guba Tamana amo ita idia hadaudaua diba. Kompiuta be mai ena heduru. Hegeregere, iseda orea ese kompiuta idia gaukaralaia Gima Kohorona magasin idia torea bona printaia totona. Danu, kompiuta ita gaukaralaia diba tahua gaukara ita karaia, bona ma haida ida ita herevahereva totona. Oibe, kompiuta gaukaralaia dalana ita moalelaia diba. To, bema kompiuta ita ura henia dikadika, reana ena gaukara daladia do ita laloa momo, bona eda nega bada do ita haorea. Bisinesi momo ese taunimanima edia lalona idia veria, unai bamona kohu matamatadia idia hoia totona. Hegeregere, mero matamata ta be kompiuta ta ia ura henia dikadika dainai, hunia dalanai ia ese ena nadinadi (kidney) ta ia hoihoilaia, bena unai kompiuta ia hoia. Unai be kavakava karana!

4. Edena dala ai tadikaka ta be kompiuta gaukaralaia kerere karana ia hadokoa?

⁴ Bema unai bamona kohu dekenai nega bada ita haorea o ita gaukaralaia kerere, eda hetura karana Iehova ida ita hadikaia diba. Tadikaka ta ladana Jon, ena mauri lagani be 28 ia gwau, ena nega bada be kompiuta dekenai ia haorea dainai, Baibel stadilaia karana ia karaia lasi.a Hanuaboi ia mahuta haraga lasi, badina hora momo lalonai Intanet ia gaukaralaia. Ena be ena matana ia mahuta, to ma haida ida ia herevahereva eiava vidio itaia karana ia hadokoa be auka. Nega haida vidio dikadia ia itaia danu. Jon be unai kara ia hadokoa totona, ena kompiuta ia program bona ena mahuta negana ai kompiuta be sibona ia bodo.​—⁠Efeso 5:15, 16 duahia.

5, 6. (a) Tama sina ese natudia totona dahaka idia karaia be namo? (b) Edena dala ai tama sina ese natudia idia durua tura namodia idia abia hidi totona?

⁵ Tama sina e, ena be emui natudia ese idia karaia gaudia ibounai umui biagua lasi, to namona be kompiuta idia gaukaralaia dalana umui biagua. Namo lasi emui natudia umui rakatania Intanet ai matabodaga o meamea karadia idia itaia, dagedage vidio gadara idia gadaralaia, o taunimanima dikadia ida idia herevahereva totona. Bema idia umui koua lasi reana do idia laloa, ‘Egu tama sina be lau idia koua lasi dainai, reana inai gaudia be kerere lasi.’ Animal haida ese edia natudia be dika amo idia gimaia. Hegeregere, animal ta ese bea maragina ia ura hamasea neganai, bea ena sinana ese unai animal do ia heatu henia. Umui tama sina ese dika gaudia amo emui natudia umui gimaia danu be namo, unai amo idia be Iehova amo idia daudau lasi!​—⁠Hosea 13:8 sekea.

⁶ Emu natuna oi hagoadaia Keristani taudia matamatadia bona burukadia ia bamoa totona, badina idia be abia hidi maorodia idia karaia taudia. To namona be oi laloatao, emu natudia idia ura nega do oi atoa idia ida oi kiri, gadara bona gaukara hebou be gau badana. Unai ese umui ibounai do ia durua Iehova kahirakahira umui noho totona.b

HELT

7. Dahaka dainai ita ura lasi ita gorere?

⁷ “Oi namo?” Nega momo ita ese ma haida dekenai unai bamona ita henanadai. Adamu bona Heva be Satani idia kamonai henia neganai, Iehova amo idia daudau. Unai nega amo ema bona hari, taunimanima ibounai be idia gorere noho. Ita gorere neganai Satani ia moale, badina Iehova ita hesiai henia be auka. Danu bema ita mase, Dirava do ita hesiai henia diba lasi. (Sal. 115:17) Unai dainai, namona be iseda tauanina ita naria namonamo, unai amo do ita gorere momo lasi.c Danu, iseda tadikaka taihu edia helt ita laloa bada be namo.

8, 9. (a) Edena dala ai ita hahedinaraia ita be eda helt sibona ita laloa lasi? (b) Dahaka dainai ita moale noho be namo?

⁸ Haida be hebou gabudiai medikol daladia, muramura idauidau bona aniani idia herevalaia momo, to Basileia ena sivarai namona idia herevalaia lasi. Reana idia laloa idia ese ma haida idia durua. To, namona be Kingdom Hall o hebouhebou badadia ai, muramura ita hoihoilaia eiava gorere hanamoa daladia ita herevalaia lasi. Dahaka dainai?

⁹ Ita hebou ena badina be, ita ura Baibel ita herevalaia bona ita moale​—⁠badina lauma helaga ena huahua ta be moale. (Gal. 5:22) Ita be medikol heduru daladia o muramura idauidau ita herevalaia totona ita hebou lasi. Unai gaudia ita herevalaia neganai, ma haida edia moale ita hadikaia diba. (Roma 14:17) Namona be idia sibona ese edia abia hidi idia karaia, edena muramura o medikol heduru idia abia dae totona. Doketa taudia eiava tau ta be hegeregere lasi gorere ibounai idia haorea totona. Danu, nega ibounai eda gorere ita laloa momo karana ese ita do ia durua lasi. (Luka 12:25) To Baibel ia gwau, “iena kudouna ia moale tauna” be namo do ia davaria.​—⁠Aon. 17:22.

10. (a) Iehova ia laloa dahaka ese ta ena toana ia hahairaia? (b) Edena negai gorere ibounai do idia ore?

¹⁰ Momokani, iseda toana ita laloa danu be namo. To namo lasi dala idauidau ita tahua, ita matamata lou totona. Baibel ia gwau: “Kara maoromaoro taudia edia mauri dinadia, be do idia momo, bona buruka taudia edia huina kurokuro, be matauraia gauna.” (Aon. 16:31) Iehova ia itaia iseda hairai korikorina be eda kudouna ai ia noho, bona ita danu be unai bamona ita laloa be namo. (1 Petero 3:3, 4 duahia.) Unai dainai, namo lasi tauanina ena toana hanamoa totona medikol heduru o opereisen ita abia, badina unai ese gorere ma haida ia havaraia diba. Herevana ita buruka o matamata eiava ita gorere, to “Lohiabada dainai ita moale” neganai, unai be hairai korikorina. (Neh. 8:10) Tanobada matamatana lalonai, iseda tauanina do ia goada bona do ita matamata lou. (Iobu 33:25; Isa. 33:24) Unai ita naria noho lalonai, namona be abia hidi maorodia ita karaia bona Iehova ena gwauhamata idauidau ita abidadama henia noho. Unai ese ita do ia durua eda mauri ita moalelaia, bona eda gorere ita laloa momo lasi totona.​—⁠1 Tim. 4:8.

MONI

11. Edena dala ai moni ese Iehova amo ita ia hadaudaua diba?

¹¹ Moni be gau dikana lasi, bona dala maorona ai bisinesi ita karaia danu be kerere lasi. (Had. 7:12; Luka 19:12, 13) To bema moni ita ura henia dikadika, Iehova amo ita ia hadaudaua diba. (1 Tim. 6:9, 10) Inai hereva, “inai nega oromana ena lalohekwarahi,” anina be tauanina durua gaudia abia totona ita lalohekwarahi momo karana. Unai ese Iehova amo ita ia hadaudaua diba. Inai hereva, “taga ena koikoi siahuna,” anina be taga ese ita ia koia bona do ita laloa, moni sibona ese ita ia hamoalea bona gimaia diba. (Mat. 13:22) Iesu ia gwau, ta ese Dirava bona taga be nega tamona ia hesiai henia diba “lasi.”​—⁠Mat. 6:24.

12. Edena dala ai taunimanima idia ura moni momo idia abia haraga? Edena dala ai abia hidi kereredia ita dadaraia diba?

¹² Bema moni ita ura henia dikadika, hedibagani lalonai ita moru diba. (Aon. 28:20) Haida idia ura moni momo do idia abia haraga dainai, laki tiketi idia hoia. Tadikaka haida be moni momo abia haraga bisinesi karadia lalonai idia vareai, bona kongrigeisen taudia ma haida idia veria danu unai bisinesi lalonai idia vareai totona. Eiava tadikaka taihu amo moni idia abitorehai, bona idia gwauhamata davana idia henia lou neganai, moni bada do idia atoa kau. Bema ita mataganigani, reana bisinesi karana ta lalonai do ita vareai, bena eda moni ibounai ita haboioa diba. Nega momo unai bamona bisinesi karadia be koikoi. Unai dainai, mataganigani karana ita dadaraia be namo.

13. Edena dala ai Iehova ena lalohadai moni dekenai be tanobada taudia edia amo ia idau?

¹³ Bema ita ese “Dirava ena Basileia bona ena kara maoromaoro” ita atoa guna, Iehova ese iseda hekwarahi do ia hanamoa. (Mat. 6:33; Efe. 4:28) Dirava ia ura lasi ita ovataim momo dainai, hebou lalonai ita mahuta. Danu, ia ura lasi Kingdom Hall lalonai ita helai neganai, moni ita lalohekwarahilaia. Tanobada taudia momo idia laloa idia gaukara goadagoada be namo, moni idia haboua totona. Unai amo do idia buruka neganai do idia hekwarahi lasi. Edia natudia idia hadibaia unai bamona do idia karaia danu. To, Iesu ia hahedinaraia unai be maoro lasi. (Luka 12:15-21 duahia.) Gehasi ia laloa ena be ia mataganigani, to unai ese ena hetura karana Iehova ida do ia hadikaia lasi.​—⁠2 Kin. 5:20-27.

14, 15. Dahaka dainai moni dekenai ita tabekau be aonega karana lasi? Haheitalai gwauraia.

¹⁴ Ugava manudia haida be gwarume metauna idia abia, bona idia rakatania haraga lasi dainai, idia maloa mase. Bema ita hekwarahi bada taga taudia ai ita lao totona, ita dekenai unai bamona ia vara diba. Elda tauna, Alex ia gwau ena moni gaukaralaia dalana ia naria namonamo. Danu ia ura lasi digu sopu ia haorea kava. To ia laloa, moni momo ia abia neganai, gaukara amo do ia doko bona do ia painia. Unai dainai, stock market ena gaukara dalana ia dibaia, bona ena moni ibounai ia gaukaralaia kampani ta dekenai share ia hoia totona. Danu, ma haida amo ia abitorehai, bona share ma haida ia hoia! To, kampani be profit ia karaia lasi dainai, Alex ese ia hoia share ibounai be anina lasi. Ia gwau: “Lau hekwarahi egu moni lau abia lou totona.” Alex ia laloa bema ia naria sisina, unai kampani be profit do ia karaia bona ena moni do ia abia lou.

¹⁵ Hua momo lalodiai, Alex be unai share sibona ia laloa. Ia mahuta namonamo lasi bona Iehova ena hesiai gaukara ia atoa guna lasi. Kampani ese Alex ena moni ia henia lou lasi dainai, ia ese ena moni ibounai ia haboioa, bona ena ruma ia hoihoilaia. Ia gwau, ena ruma bese lalonai hekwakwanai bada ia havaraia. To, ia ese gau badana ta ia dibaia. Ia gwau, bema ta ia laloa Satani ena tanobada ese noho namo bona moale do ia mailaia, unai tauna be gabeai do ia lalohisihisi. (Aon. 11:28) Bema ita ese moni eiava sibona eda diba dekenai ita tabekau, anina be ita ese Satani, “inai nega oromana ena dirava” ita abidadama henia. (2 Kor. 4:4; 1 Tim. 6:17) Alex be ena mauri ai gau haida ia haidaua, unai amo nega bada ia gaukaralaia sivarai namona ia harorolaia totona. Hari, ia bona ena famili idia moale bona Iehova kahirakahira idia noho.​—⁠Mareko 10:29, 30 duahia.

HEKOKOROKU

16. Bema ita hekokoroku dahaka do ia vara?

¹⁶ Ita moale badina ita be Iehova ena Witnes taudia, bona ita hekwarahi Iehova ena taravatu ita badinadia bona abia hidi maorodia ita karaia totona. (Ier. 9:24) To, namona be ita naria namonamo. Namo lasi ita hekokoroku bona ita laloa iseda diba ese Iehova ena diba ia hereaia. Unai ese Iehova amo ita ia hadaudaua diba.​—⁠Sal. 138:6; Roma 12:3.

17, 18. (a) Baibel lalonai daika be ia manau bona daika be ia hekokoroku? (b) Tadikaka ta be dahaka ia karaia, unai amo hekokoroku karana ese Iehova amo ia ia hadaudaua lasi?

¹⁷ Baibel lalonai hekokoroku bona manau taudia edia sivarai idia noho. King Davida be mai manau ida Iehova ena heduru ia noia, bona Iehova ese ia hanamoa. (Sal. 131:1-3) To King rua, Nebukanesa bona Belesasa be edia hekokoroku karana dainai, Iehova ese ia panisidia. (Dan. 4:30-37; 5:22-30) Nega haida ita hekokoroku dainai, hekwakwanai ita davaria diba. Ryan, ena mauri lagani be 32 bona ia be hesiai tauna ta, be kongrigeisen matamata ta dekenai ia lao neganai, ia laloa elda maduna do ia abia haraga. To, lagani ta ia ore bona ia be elda tauna ai ia do lao lasi. Ryan be ia hekokoroku dainai, elda taudia dekenai ia badu, a? Ia hekokoroku dainai hebou lao henia karana ia hadokoa, bona Iehova bona kongrigeisen amo ia daudau, a? Bema oi be Ryan, dahaka do oi karaia?

¹⁸ Ryan ese Baibel buka bona magasin amo haheauka karana ia stadilaia. (Aon. 13:12) Ia gwau: “Lau laloparara do lau manau bona haheauka be namo. Namona be Iehova ena hahediba dalana lau abia dae.” Ryan ese tadikaka taihu bona teritori ai ia davaria taudia durua daladia ia laloa matamaia. Daudau lasi murinai, Baibel stadi namodia ia davaria. Ia gwau: “Lau ese haroro gaukara lau moalelaia dainai, elda maduna abia totona lau laloa momo lasi. Bona lagani ta mai kahana murinai, elda maduna lau abia neganai, lau hoa.”​—⁠Salamo 37:3, 4 duahia.

IEHOVA KAHIRAKAHIRA OI NOHO

19, 20. (a) Edena dala ai do ita naria namonamo, unai amo ita karaia gaudia ese Iehova amo ita idia hadaudaua lasi? (b) Daidia edia haheitalai ese ita ia durua diba, Iehova kahirakahira ita lao totona?

¹⁹ Inai stadi rua lalonai ita herevalaia gau 7 be mai edia namo. Hegeregere, ita moale badina ita be Iehova ena Witnes taudia, to ita ura lasi ita hekokoroku. Bona eda famili taudia ita lalokau henidia, bona ita ura lasi ita gorere momo. Danu, ita laloparara moni gaukara bona moni ese ita idia durua, ita bona eda famili ita naria totona. Ma danu, moale karadia amo moale ita davaria, bona kompiuta bona unai bamona gaudia ese ita idia durua diba. To, bema unai gaudia be dala kererena ai ita gaukaralaia, nega bada do ita haorea, o iseda tomadiho dalana ia hadikaia diba. Unai kara ese Iehova amo ita ia hadaudaua diba.

²⁰ Satani ia ura oi be Iehova amo do oi daudau. To, namona be oi hekwarahi oi bona emu famili oi gimaia totona! (Aon. 22:3) Iehova kahirakahira oi lao bona ia oi rakatania lasi. Baibel lalonai, unai bamona idia karaia taudia edia sivarai momo idia noho. Hegeregere, Enoka bona Noa be ‘Dirava momokanina ida idia raka.’ (Gen. 5:22; 6:9) Danu, ena be Mose ese Dirava ia itaia lasi, to ia abidadama henia. (Heb. 11:27) Bona Iesu be nega ibounai ena Tamana ena ura ia karaia, bona Ia ese ia hanamoa. (Ioa. 8:29) Unai haheitalai ibounai oi tohotohoa be namo. Baibel ia gwau: “Nega ibounai do umui moale. Nega ibounai do umui guriguri. Gau ibounai dainai Dirava do umui tanikiu henia.” (1 Tes. 5:16-18) Namo lasi gau ta ese Iehova amo oi ia hadaudaua!