Kota Vairanai Do Oi Kerere Lasi Eiava?

“Taunimanima ena Natuna be mai ena hairai danu do ia mai, mai ena aneru helagadia danu, ena terona namo herea momokani latanai do ia helai.”​—MATAIO 25:31.

‘KERERE O KERERE LASI?’ Kota karadia edia sivarai haida idia kamonai neganai, taunimanima momo idia daradara. Kota biagudia bona idia abia hidi oreana taudia be reana idia kara maoromaoro toho, to nega ibounai edia kota karadia be maoromaoro, a? Kota karadia gagevadia bona taunimanima be maka idauidau amo kota henidia karadia edia sivarai haida be oi kamonai vadaeni, ani? Iesu ena parabole ta Luka 18:​1-8 lalonai ese ia hahedinaraia kota gagevadia be gau matamatana lasi.

² Herevana taunimanima edia kota karana dainai oi dekenai ia vara gauna be dahaka, to mani Iesu ena parabole herevana ena dokona oi laloa: “Dirava ese ia abia hidi taudia, dina bona hanuaboi ia dekenai idia taitai taudia, be idia dekenai idia badu taudia edia davana do ia henia lasi, a? . . . Lau hamaoroa umui dekenai, kota maoromaoro bona durua do ia henia haraga idia dekenai, to Taunimanima ena Natuna do ia mai neganai, tanobada dekenai abidadama do ia davaria o?”

³ Oibe, Iehova ese iena hesiai taudia do ia durua, kota maoromaoro be gabeai do idia abia totona. Hari inai negai Iesu danu be mai ena ahuna unai kara lalonai, bona hari unai be mai anina bada, badina be ita be inai tanobada oromana dikana ena “dokona” negana ai ita noho. Nega daudau lasi Iehova ese ena Natuna mai siahuna be do ia gaukaralaia, kara dika be tanobada amo do ia kokia totona. (2 Timoteo 3:1; 2 Tesalonika 1:​7, 8; Apokalupo 19:​11-16) Iesu ese ia gwauraia sivarai hegeregeredia ginigabedia ta, mamoe bona nanigosi sivaraina, amo, iena gaukara ita lalo-pararalaia diba.

⁴ Nega daudau lalonai ita laloa unai parabole ese ia gwauraia gauna be inai: Lagani 1914 ai Iesu be terona ai ia helai bona King ai ia lao bona unai nega amo taunimanima ia kota henidia​—ia gwau mamoe bamona taudia ese mauri hanaihanai do idia abia, to nanigosi bamona taudia ese mase hanaihanai do idia abia. To unai parabole ai tahua lou neganai, ai davaria iseda lalohadai iena nega bona ena anina dekenai ita haidaua be namo. Inai lalohadai matamatana ese iseda haroro gaukarana ena anina bona unai gaukara dainai taunimanima idia karaia karadia edia anina ia habadaia. Iseda lalo-parara unai parabole dekenai ia hadobua ena badina ita diba totona, namona be Baibel ena hereva Iehova bona Iesu edia King dagina bona edia Diadi dagina dekenai ita laloa.

Iehova be Kota Biaguna Badana

⁵ Iehova ese guba bona tanobada ibounai ia lohiaia. Ia be matamana lasi bona dokona lasi, ia be “Noho Hanaihanai King.” (1 Timoteo 1:17; Salamo 90:​2, 4; Apokalupo 15:3) Ia be mai ena siahu taravatu do ia haginidia bona do ia ha-aukadia. Unai siahu dainai ia be Kota Biaguna danu. Isaia 33:22 ia gwau: “[Iehova] be iseda Kota Biaguna, ia sibona be iseda King. Ia ese ita do ia biagua, bona ita do ia hamauria.”

⁶ Dirava ena hesiai taudia be nega daudau lalonai idia abia dae Iehova be kara dika bona hepapahuahu kotalaia Tauna. Hegeregere, “tanobada ibounai ena kota biaguna” ese Sodoma bona Gomora edia kara dika sivaraina hamomokania gaudia ia tahua murinai, unai hanua idia noholaia taudia ia kota henidia, ia gwau do idia mase be maoro, bona unai kota herevana maoromaorona ena anina ia havaraia. (Genese 18:​20-33; Iobu 34:​10-12) Iehova be Kota Biaguna mai ena kara maoromaoro bona nega iboudiai ena kota herevadia hegeregeredia ia kara; unai ita diba dainai iseda abidadama ia goada be namo!

⁷ Idaunegai Israelana lalonai, nega haida Iehova ese kota herevana ia gwauraia. Bema unai neganai oi noho bona oi diba Kota Biaguna goevadaena be kota ia karaia, unai ese emu lalona ia hagoadaia, ani? (Levitiko 24:​10-16; Numera 15:​32-36; 27:​1-11) Dirava ese danu “kota” herevadia ia henidia, idia be namo momokani, idia hegeregeredia kota do idia karaia totona. (Levitiko 25:​18, 19; Nehemia 9:13; Salamo 19:​9, 10; 119:​7, 75, 164; 147:​19, 20) Unai be mai anina ita ibounai dekenai, badina ia be “taunimanima ibounai edia Kota Biaguna Badana.”​—Heberu 12:23.

⁸ “Uitnesi tauna” ta ese ia itaia gauna sivaraina ese unai ia hamomokania. Dirava ese mata hanai be peroveta tauna Daniela ia henia, ia lalonai dagedage boromadia ia itaia, idia ese gavamani o basileia idia laulaulaia. (Daniela 7:​1-8, 17) Ia gwau: “Gabu ta ta dekenai terona idia atoa. Mauri Noho Hanaihanai Tauna ia mai, terona ta dekenai ia helai. Iena dabua be kurokuro momokani sinou bamona.” (Daniela 7:9) Mani oi laloa, Daniela ese terona ia itadia, bona “Mauri Noho Hanaihanai Tauna [Iehova] . . . ia helai.” Emu lalona ai inai bamona oi henanadai, ‘Dirava be King ai ia lao karana be Daniela ese ia itaia, a?’

⁹ Vadaeni, inai hereva, ta be terona ai “ia helai diho,” bema ita duahia, reana ita laloa ia be king ai ia lao, badina be nega haida Baibel be unai bamona ia hereva. Hegeregere: “[Simiri] ena lohia negana ia hamatamaia ai, ena terona latanai ia helai diho neganai, ia ese . . .” (1 King Taudia 16:​11, NW; 2:12; 1 Sivarai 29:23) Mesia ia perovetalaia herevana ta be inai: “Iena terona dekenai do ia helai, bona ia ese iena taunimanima do ia biagua.” Unai dainai, inai hereva, ‘terona dekenai ia helai,’ ena anina ta be king ai ia lao. (Sekaraia 6:​12, 13) Baibel siridia haida ese Iehova idia gwauraia King ta, terona ai ia helai. (1 King Taudia 22:19; Isaia 6:1; Apokalupo 4:​1-3) Ia be “Noho Hanaihanai King.” To, ena pavapava siahuna be dala matamatana ai ia gaukaralaia neganai, ita gwau diba ia be King ai ia lao, hegeregere ena terona ai ia helai diho lou bamona.​—1 Sivarai 16:​1, 31; Isaia 52:7; Apokalupo 11:​15-17; 15:3; 19:​1, 2, 6.

¹⁰ To hereva badana ta be inai: Idaunegai pavapavadia edia gaukara badana ta be kara dika bona hepapahuahu idia tahudia bona kota herevadia idia gwauraia. (Aonega Herevadia 29:14) Solomona ena kota karana mani oi laloa lou, hahine rua ese beibi tamona be idia edia idia gwauraia neganai, ia kota henidia mai ena aonega ida. (1 King Taudia 3:​16-28; 2 Sivarai 9:8) Iena gavamani rumana ta ena ladana be “Terona Ruma.” Ena ladana ma ta be “Kota Henia Gabuna. Unuseni Solomona ese taunimanima edia hepapahuahu ia hamaoromaoroa.” (1 King Taudia 7:7) Ierusalema idia gwauraia “king taudia ese, edia bese taudia idia kota henia” gabuna. (Salamo 122:5) Ia hedinarai goevagoeva, ‘terona dekenai helai’ karana ena anina ta be kota henia karana danu.​—Esodo 18:13; Aonega Herevadia 20:8.

¹¹ Vadaeni, Daniela ese ia itaia gauna mani ita laloa lou; gauna be, “Mauri Noho Hanaihanai Tauna ia mai, terona ta dekenai ia helai.” Daniela 7:10 ia gwau: “Kota badana ena nega ia ginidae, bona buka danu idia kehoa.” Oibe, Mauri Noho Hanaihanai Tauna ia helai, tanobada lohiaia dalana do ia kota henia bona taunimanima ena Natuna do ia gwauraia ia hegeregere do ia lohia. (Daniela 7:​13, 14) Baibel be ma ia gwau: “Mauri Noho Hanaihanai Tauna ia mai, bona ia ese kota ia karaia, iena kota hereva ese Ataiai Momokani Dirava ena helaga taudia ia durudia,” ia gwau idia be hegeregere taunimanima ena Natuna ida do idia lohia hebou. (Daniela 7:22) Dokonai, ‘kota Biaguna Badana ese iena kota ia hamatamaia’ lou bena kota herevana aukana be tanobada basileiana ginigabena latanai ia gwauraia.​—Daniela 7:26.a

¹² Unai dainai, Daniela ese Dirava ia itaia ‘terona dekenai ia helai,’ ena anina be kota karaia totona Ia mai. Gunaguna, Davida ese ane ta ia abia, ia gwau: “[Iehova] e, oiemu kota hereva ibounai, be maoromaoro bona momokani, bona oi ese egu kara maoromaoro, be oi hamomokania vadaeni.” (Salamo 9:​4, 7) Bona Ioela ese inai hereva ia torea: “Bese idauidau taudia be, kota totona idia noho hegaegae namo, bona koura, ena ladana be ‘Dirava be Kota Biaguna’, dekenai do idia haboua mai. Unuseni lau [Iehova] be do lau helai, bona bese idauidau taudia ibounai, be do lau kota henia.” (Ioela 3:12; ma danu Isaia 16:5 itaia.) Iesu bona Paulo danu be kota lalodiai idia hedinarai; unai negadiai taunimanima ta ia helai, samani herevadia do ia kamonai bona kota herevana do ia gwauraia totona.b​—Ioane 19:​12-16; Kara 23:3; 25:6.

Iesu Ena Dagi

¹³ Iehova be King bona Kota Biaguna danu. Vadaeni, Iesu ena dagi be dahaka? Iena vara ia gwauraia hedinarai aneruna be ia gwau: “[Iehova] Dirava ese iena tamana Davida ena King dagina do ia henia. Bona . . . iena basileia be do ia doko lasi.” (Luka 1:​32, 33) Iesu be Davida ena king dagina abia hanaihanai tauna. (2 Samuela 7:​12-16) Ia be guba amo do ia lohia, badina be Davida ia gwau: “[Iehova] ese egu Lohiabada [Iesu] dekenai ia hamaoroa, ia gwau, ‘Lauegu idiba kahana dekenai do oi helai, ela bona oi dekenai idia tuari henia taudia, be oiemu aena atoa gauna dohore lau halaoa.’ Siona dekena amo [Iehova] ese, oiemu King siahuna do ia habadaia, [Iehova] ese oi ia hamaoroa, ia gwau, ‘Oi dekenai idia tuari henia taudia do oi biagua.’ ”​—Salamo 110:​1-4.

¹⁴ Unai be edena negai do ia vara? Iesu be tanobada ai ia noho neganai, King dagina ia abia lasi. (Ioane 18:​33-37) Lagani 33 C.E. ai ia mase bena ia toreisi lou bona guba dekenai ia daekau. Heberu 10:12 ia gwau: “Keriso ese, kara dika kokia totona, boubou gauna tamona sibona ia henia. Inai boubou gauna be mai ena siahu ela bona hanaihanai. Keriso ese unai bamona ia karaia murinai, Dirava ena idiba kahanai ia helai diho.” Unai neganai Iesu ese dahaka siahu ia abia? “Guba dekenai Keriso ia atoa neganai, ia be Dirava ena idiba kahana dekenai ia helai. Keriso ese guba ena lohia taudia ibounai, gunalaia taudia ibounai, gavana taudia ibounai, bona siahu taudia ibounai ia ese idia ia hereaia . . . bona [Dirava] ese ekalesia ena kwarana momokani Keriso ia halaoa.” (Efeso 1:​20-22) Unai neganai Iesu ese Keristani taudia ia lohiaia, unai dainai Paulo ia gwau Iehova ese “dibura ena siahu dekena amo ita ia hamauria vadaeni, bona iena Natuna, iena lalokau, ena Basileia lalonai ita ia abia vareai vadaeni.”​—Kolose 1:13; 3:1.

¹⁵ To, unai neganai, Iesu ese tanobada besedia ia pavapavaia lasi bona ia kota henia lasi. Ia be Dirava badinai ia helai, Dirava ena Basileia ena King ai do ia lao negana ia naria. Paulo ese ia herevalaia, ia gwau: “Gunaguna Dirava be inai bamona ia hereva, ia gwau: ‘Lauegu idiba kahana dekenai do oi helai, ela bona oi idia tuari henia taudia, be oiemu aena henunai do lau atodia.’ To Dirava ese nega ta unai bamona aneru ta ia herevalaia, a? Lasi momokani.”​—Heberu 1:13.

¹⁶ Iehova ena Witness taudia ese hereva momo idia halasia vadaeni, unai hereva ese idia hamomokania Iesu ese ia naria negana be lagani 1914 ai ia ginidae, bena guba lalonai Dirava ena Basileia ena pavapava ai ia lao. Apokalupo 11:​15, 18 ia gwau: “Tanobada biagua siahuna be iseda Lohiabada bona iena Keriso idia abia vadaeni. Bona Lohiabada ese tanobada do ia biagua momokani, ela bona hanaihanai.” To “Dirava diba lasi taudia idia badu dikadika, badina be oiemu badu ena nega ia ginidae vadaeni.” Oibe, Tanobada Ibounai Tuarina Ginigunana neganai bese idauidau idia badu heheni. (Luka 21:24) Lagani 1914 amo ema bona hari, tuari, tano mareremarere, daihanai goreredia, hitolo, bona unai bamona gaudia ma haida ita itaia, bona idia hamomokania Iesu be Dirava ena Basileia lalonai ia lohia, bona tanobada ena dokona momokani be kahirakahira.​—Mataio 24:​3-14.

¹⁷ Mani inai ita laloa lou: Ita gwau diba Dirava be terona ai ia helai badina ia be King, to ena terona ai ia helai diho ena anina ma ta be kota do ia karaia. Lagani 33 C.E. ai, Iesu be Dirava ena idiba kahanai ia helai, bona hari ia be Basileia ena King. Iesu be hari ia lohia, to kota gaukarana danu ia karaia, a? Bona badina be dahaka hari inai negai unai ita laloa be namo?

¹⁸ Iehova be mai ena maoro kota biagudia do ia abia hidi. Ia ese Iesu ia abia hidi bona Kota Biaguna ai ia halaoa, badina be Iena matana ai Iesu be hegeregere. Iesu ese unai ia hahedinaraia, taunimanima be lauma dalanai idia mauri karana ia herevalaia neganai; ia gwau: “Tamana ese tau ta ia kota henia lasi, to kota henia ena siahu ibounai iena Natuna dekenai ia henia vadaeni.” (Ioane 5:22) To, Iesu ena kota karana ese unai ia hereaia, badina ia be mauri taudia bona mase taudia kota henia tauna. (Kara 10:42; 2 Timoteo 4:1) Nega ta ai Paulo ia gwau: “Dirava ese dina ta ia abia hidi vadaeni, unai dina dekenai iena abia hidi Tauna [Iesu] ese tanobada ibounai do ia kota henia mai maoromaoro danu. Bona inai kara Dirava ese ia hamomokania taunimanima ibounai edia vairanai, unai Tau mase dekena amo ia hamauria dainai.”​—Kara 17:31; Salamo 72:​2-7.

¹⁹ Unai dainai, bema ita gwau Iesu be terona mai hairaina ai ia helai kota karaia totona, unai hereva be maoro, a? Oibe. Iesu ese aposetolo taudia ia hamaoroa, ia gwau: “Lauegu murina dekenai umui raka taudia, be gau ibounai karaia matamata ena neganai, Taunimanima ena Natuna ena terona diaridiari dekenai do ia helai neganai, [umui danu be] terona 12 dekenai do umui helai, Israela edia iduhu 12 dekenai dohore umui kota henia.” (Mataio 19:28) Ena be hari inai negai Iesu be Basileia ena King, to Mataio 19:28 ena hereva hegeregerena do ia karaia gaukarana ma ta be, Lagani 1,000 Negana lalonai terona ai do ia helai, kota karaia totona. Unai neganai ia ese taunimanima iboudiai, kara maoromaoro taudia bona kara maoromaoro lasi taudia, do ia kota henidia. (Kara 24:15) Unai ita laloatao be namo, Iesu ena parabole ta ita laloa neganai; unai parabole be mai anina iseda nega dekenai bona iseda mauri dekenai danu.

Parabole be Dahaka Ia Gwau?

²⁰ Iesu ena mase be kahirakahira neganai, iena aposetolo ese idia nanadaia, idia gwau: “Oiemu hereva gauna edena negai do idia vara? Do oi giroa mai, bona tanobada dokona danu, ena toana be dahaka?” (Mataio 24:3) Iesu ia gwau ‘dokona be ia do ginidae’ lasi neganai, tanobada ai gau badadia do idia vara. Unai dokona be kahirakahira neganai, bese iboudiai ese “Taunimanima ena Natuna do idia itaia, guba ena ori latanai do ia mai, mai ena siahu bada, bona mai ena hairai danu.”​—Mataio 24:​14, 29, 30.

²¹ To, taunimanima ena Natuna be mai ena hairai ida do ia ginidae neganai, unai bese idauidau taudia dekenai dahaka do ia vara? Mani mamoe bona nanigosi parabolena amo unai ita tahua; ena hamatamaia herevadia be inai: “Taunimanima ena Natuna be mai ena hairai danu do ia mai, mai ena aneru helagadia danu, ena terona namo herea momokani latanai do ia helai. Vadaeni bese ibounai be iena vairana dekenai do idia haboua.”​—Mataio 25:​31, 32.

²² Nega daudau lalonai ita laloa bamona, lagani 1914 ai Iesu be mai ena pavapava siahuna ida ia helai diho neganai, unai parabole ena anina ia vara, a? Mataio 25:34 ese Iesu be Lohiabada ia gwauraia, unai dainai lagani 1914 ia be King ai ia lao neganai amo unai parabole ena anina ia vara. To unai lagani murinai sisina, dahaka kota gaukarana ia karaia? “Bese ibounai” ia kota henidia lasi. To, sibodia idia gwauraia ‘Dirava ena orea taudia’ ia laloa. (1 Petero 4:17) Malaki 3:​1-3 ena hereva hegeregerena, Iesu, Iehova ena hereva gwauraia tauna, ese horoa Keristani taudia oredia tanobada ai ia kota henidia. Unai be Kerisendom kota henia negana danu, badina be ia koikoi, sibona ia gwauraia ‘Dirava ena orea taudia.’c (Apokalupo 17:​1, 2; 18:​4-8) To gau ta ese ia hahedinaraia lasi, lagani 1914 ai, eiava unai nega murinai, Iesu ia helai vadaeni bese iboudiai ia kota henidia bona mamoe eiava nanigosi ia gwauraidia totona.

²³ Iesu ena gaukara unai parabole lalonai bema ita tahua namonamo, ita itaia dokonai ia ese bese iboudiai do ia kota henidia. Unai parabole ese ia hahedinaraia lasi unai kota gaukarana be lagani momo lalonai do ia karaia, hegeregere idia hanai laganidia 80 bamona lalonai idia mase taudia ia kota henidia, ia gwau mase hanaihanai eiava mauri hanaihanai do idia abia. Lasi. Toana be unai nega lalonai idia mase taudia momo herea be mase taudia iboudiai edia gara gabuna idia lao vadaeni. (Apokalupo 6:8; 20:13) To, unai parabole ese ia gwauraia negana be inai: Iesu ese “bese ibounai” unai neganai idia do mauri noho bona iena kota herevana ena anina idia dekenai do ia karaia negana be kahirakahira negana.

²⁴ Anina be, unai parabole ese nega vairai ia herevalaia, taunimanima ena Natuna be mai ena hairai ida do ia mai negana. Do ia helai diho, unai negana ai idia mauri taudia do ia kota henidia totona. Unai neganai edia kara amo idia hahedinaraia idia be edena bamona taudia; unai hegeregerena do ia kota henidia. Unai neganai ‘kara maoromaoro tauna bona kara dika tauna’ edia idau do ia hedinarai goevagoeva vadaeni. (Malaki 3:18) Nega kwadogi lalonai ena kota herevana do ia gwauraia bena do ia hamomokania. Taunimanima be edia mauri lalonai idia karaia vadaeni karadia hegeregeredia Iesu ese do ia kota henidia mai ena maoromaoro ida.​—Korinto Iharuana 5:10 itaia.

²⁵ Vadaeni, unai ena anina be, Mataio 25:31 ese ia gwauraia karana, Iesu be kota karaia totona ‘ena terona namo herea momokani latanai do ia helai’ karana, be nega vairai do ia vara; unai neganai inai King mai ena siahu be do ia helai, bese iboudiai do ia kota henidia bona edia davana do ia henidia totona. Oibe, Mataio 25:​31-33, 46 ese ia gwauraia gauna, Iesu ese kota do ia karaia negana, ena toana be Daniela karoa 7 ese ia gwauraia negana ena toana bamona; unai neganai, ia lohia noho Pavapavana, Mauri Noho Hanaihanai Tauna, ia helai diho kota do ia karaia totona.

²⁶ Mamoe bona nanigosi parabolena ena anina be unai bamona dainai, ia hedinarai mamoe bona nanigosi kota henidia negana be do vairai. Mataio 24:​29, 30 ese ia gwauraia ‘negana dikana’ do ia matamaia bona taunimanima ena Natuna be “mai ena hairai danu do ia mai” murinai unai kota karana do ia vara. (Mareko 13:​24-26 itaia.) Unai neganai, tanobada oromana dikana ibounai ena dokona neganai, Iesu do ia kota karaia bona davana do ia henia.​—Ioane 5:30; 2 Tesalonika 1:​7-10.

²⁷ Inai hereva ese iseda lalohadai Iesu ena parabole ena anina do ia vara negana dekenai ia hamaoromaoroa, ia hahedinaraia edena negai mamoe bona nanigosi do ia kota henidia. To ena anina be dahaka, ita Basileia ena sivarai namona harorolaia goadagoada taudia dekenai? (Mataio 24:14) Iseda gaukara ena anina ia hamaragia a, eiava iseda maduna ia hametaua, a? Ena anina ita dekenai be hereva gabena ai do ita itaia.

Nega Vairai Mamoe Bona Nanigosi ese Dahaka Do Idia Abia?

“Ia ese [taunimanima] do ia hapararaia, mamoe naria tauna ese mamoe bona nanigosi ia hapararaia bamona.”​—MATAIO 25:32.

1, 2. Badina be dahaka mamoe bona nanigosi parabolena ita laloa bada be namo?

MOMOKANI, Iesu Keriso be Hadibaia Tauna Hereadaena, tanobada ena hadibaia taudia iboudiai ia hereaia tauna. (Ioane 7:46) Iena hadibaia dalana ta be parabole eiava sivarai hegeregeredia amo. (Mataio 13:​34, 35) Iena parabole be haraga to idia amo tomadiho bona peroveta herevadia momokanidia mai dobudia ia hahedibalaia mai ena siahu ida.

² Mamoe bona nanigosi parabolena lalonai, Iesu ese nega ta ia gwauraia, unai negai gaukara idauna do ia karaia, ia gwau: “Taunimanima ena Natuna be mai ena hairai danu do ia mai . . .” (Mataio 25:31) Unai parabole ita laloa bada be namo, badina be Iesu ese inai henanadai, “Do oi giroa mai, bona tanobada dokona danu, ena toana be dahaka?” ena haere ena dokonai ia gwauraia dainai. (Mataio 24:3) To ena anina ita dekenai be dahaka?

3. Ena haroro herevana ena kahana ginigunana ai, Iesu ia gwau hisihisi bada do ia matamaia murinai, maoromaoro dahaka do ia vara?

³ Iesu ia gwau hisihisi bada do ia matamaia, bena “maoromaoro” gau badadia do idia vara; unai gau ita naridia noho. Ia gwau unai neganai “Taunimanima ena Natuna ena toana” do ia hedinarai. “Tanobada ena bese ibounai” ese unai do idia laloa momo, bona “Taunimanima ena Natuna do idia itaia, guba ena ori latanai do ia mai, mai ena siahu bada, bona mai ena hairai danu.” Taunimanima ena Natuna ‘ena aneru’ ese ia do idia bamoa. (Mataio 24:​21, 29-31)a Mamoe bona nanigosi parabolena be edena bamona? Baibel momo lalonai unai parabole be karoa Mat 25 ai, to ia be Iesu ena haere ena kahana ta; mai ena hairai ida do ia mai neganai do idia vara gaudia ma haida ia gwauraia bona “bese ibounai” do ia kota henidia karana ia gwauraia momo.​—Mataio 25:32.

Parabole Taudia

⁴ Iesu ese inai hereva amo unai parabole ia gwauraia matamaia: “Taunimanima ena Natuna be mai ena hairai danu do ia mai.” Reana oi diba vadaeni “Taunimanima ena Natuna” be daika. Evanelia torea taudia be nega momo idia gwau ia be Iesu. Iesu be sibona unai bamona ia gwauraia danu, badina be reana inai ia laloa dainai: Daniela be mata hanai lalonai tau ta ia itaia, “iena toana be taunimanima edia toana bamona,” ia lao Mauri Noho Hanaihanai Tauna dekenai, “siahu bona mataurai bona dagi bada” do ia abia totona. (Daniela 7:​13, 14; Mataio 26:​63, 64; Mareko 14:​61, 62) Hari parabole lalonai Iesu be mai anina bada tauna, to ma haida ese idia bamoa danu. Ena haroro herevana ena kahana ginigunana ai, Mataio 24:​30, 31 ena hereva hegeregerena, Iesu ia gwau taunimanima ena Natuna “do ia mai, mai ena siahu bada, bona mai ena hairai danu” neganai, iena aneru ese gaukara badana do idia karaia. Unai hegeregerena, mamoe bona nanigosi parabolena ese ia hahedinaraia Iesu be kota karaia totona ‘ena terona namo herea momokani latanai ia helai’ diho neganai, aneru be ia ida idia noho. (Mataio 16:27 itaia.) To Kota Biaguna bona ena aneru be guba ai, unai dainai parabole ese taunimanima ia herevalaidia eiava?

5. Edena bamona ita diba Iesu ena “tadikakana” be daidia?

⁵ Inai parabole ese orea toi ia gwauraia; idia ta ta ita dibaia be namo. Mamoe bona nanigosi mo lasi, to orea ihatoina danu be taunimanima ena Natuna ese ia gwauraidia. Unai orea ita diba be gau badana, mamoe bona nanigosi be daidia do ita diba totona. Iesu ese unai orea ihatoina ia gwauraia iena lauma tadikakana. (Mataio 25:​40, 45) Idia be tomadiho taudia momokani, badina be Iesu ia gwau: “Lauegu Tamana . . . ena ura idia karaia taudia, idia sibona be lauegu tadina, bona lauegu taihuna, bona lauegu sinana.” (Mataio 12:50; Ioane 20:17) Unai ia hamomokania gauna ma ta be, Paulo ese Keristani taudia, “Aberahamo ena natuna” taudia bona Dirava ena natuna unai, be ia gwauraidia Iesu ena “tadina” bona “Dirava ese ia abia hidi” taudia.​—Heberu 2:​9–3:​1; Galatia 3:​26, 29.

⁶ Badina be dahaka Iesu ese iena tadikakana “ogogami herea” ia gwauraia? Guna iena aposetolo idia kamonai ia be unai bamona hereva ia gwauraia, Ioane Bapatiso bona guba maurina do idia abia taudia edia idau ia herevalaia neganai, badina be Iesu ia do mase lasi neganai Ioane ia mase dainai, ia be mai ena tanobada helarona. Iesu ia gwau: “Hahine edia bogana dekena amo idia vara taudia ibounai be ta ese Ioane ia hereaia lasi, to Guba Basileia lalonai, tau maragina sibona ese Ioane ia hereaia.” (Mataio 11:11) Guba dekenai do idia lao taudia haida be reana mai edia dagi badana kongregesen lalonai, hegeregere aposetolo taudia, bona ma haida be mai edia dagi maragina, to idia iboudiai be Iesu ena lauma tadikakana. (Luka 16:10; 1 Korinto 15:9; Efeso 3:8; Heberu 8:11) Unai hegeregerena, ena be toana be tanobada ai idia haida idia maragi, to idia be iena tadikakana bona unai hegeregerena idia kara henidia be namo.

Mamoe Bona Nanigosi be Daidia?

⁷ Baibel ese mamoe kota henia karana be inai bamona ia gwauraia: “[Iesu] ese iena idiba kahana taudia dekenai do ia hamaoroa, do ia gwau, ‘Umui mai, egu Tamana ese ia hanamoa taudia e, Basileia umui abia, tanobada ia karaia neganai, ia ese ia karaia hegaegae umui emui. Badina be lau hitolo neganai, umui ubua lau. Lau ranu mase, ranu umui henia lau dekenai. Lau be idau tauna, to umui abia dae lau. Lau be dabua lasi, dabua umui atoa lau dekenai. Lau gorere neganai, egu lalona umui hanamoa. Dibura ruma dekenai lau noho neganai, lau dekenai umui vadivadi.’ Vadaeni kara maoromaoro taudia ese do idia haere henia ia dekenai, do idia gwau, ‘Lohiabada e, edena negai ai itaia oi, oi hitolo, ai ubua oi, o oi ranu mase, ranu ai henia oi dekenai? Edena negai ai itaia oi, oi be idau tauna, vadaeni aniani ai henia oi dekenai? O dabua lasi, vadaeni dabua ai atoa oi dekenai? Edena negai ai itaia oi, oi gorere, o dibura ruma dekenai oi noho, ai vadivadi henia oi?’ Vadaeni Lohiabada ese idia dekenai do ia haere, do ia gwau, ‘Umui lau hamaoroa momokani, inai lauegu tadikakana ogogami herea taudia dekenai unai bamona umui karaia neganai, be lau dekenai umui karaia vadaeni danu.’ ”​—Mataio 25:​34-40.

7, 8. Iesu ese mamoe be edena bamona ia gwauraidia, unai dainai ita diba idia be daidia?

⁸ Ia hedinarai goevagoeva unai mamoe, Iesu ese ia kota henidia neganai ia lalo-namo henidia dainai ia laloa idia be hegeregere iena idiba kahana dekenai do idia gini mamoedia, ese taunimanima oreana ta idia laulaulaia. (Efeso 1:20; Heberu 1:3) Dahaka idia karaia bona edena negai? Iesu ia gwau aniani, ranu, bona dabua idia henia mai edia hebogahisi bona mai edia hemataurai ida, bona ia gorere neganai eiava dibura rumana ai ia noho neganai, idia durua. Mamoe idia gwau unai bamona idia karaia lasi Iesu dekenai, to ia gwau idia ese iena lauma tadikakana, horoa Keristani taudia oredia, idia durudia, anina be ia idia durua.

9. Badina be dahaka parabole ena anina be Lagani 1,000 Negana ai do ia vara lasi?

⁹ Unai parabole ena anina be Lagani 1,000 Negana lalonai do ia vara lasi, badina be unai neganai horoa taudia be tanobada taudia lasi; hitolo, ranu mase, gorere, eiava dibura rumana do idia hisihisilaia lasi. To, hari inai nega dokona lalonai idia momo ese unai bamona gaudia idia hisihisilaia. Iesu ese tanobada dekenai ia negea diho negana amo, Satani ese orena taudia ia badu henidia momokani; taunimanima ia veridia bena idia ese idia kirikirilaidia, idia dagedage henidia, bona idia aladia mase.​—Apokalupo 12:17.

10, 11. (a) Badina be dahaka ita laloa lasi Iesu ena tadikakana idia kara namo henidia taudia iboudiai be mamoe? (b) Mamoe ese daidia idia laulaulaia maoromaoro?

¹⁰ Bema ta ese paraoa ta eiava ranu kapusi ta be Iesu ena tadikakana ta ia henia, unai kara dainai ia hegeregere Iesu ese ia be mamoe do ia gwauraia, a? Iesu ena hereva ena anina be unai, a? Bema ta be unai bamona ia karaia, momokani unai be hebogahisi karana ta, to toana be parabole lalonai ia gwauraia mamoedia be unai sibona idia karaia lasi. Hegeregere, idia gwau Dirava be lasi taudia eiava pris bona pasto taudia, bema nega ta iena tadikakana ta idia kara namo henia, unai kara dainai Iesu ese mamoe do ia gwauraidia lasi. Lasi, nega rua Iesu ese mamoe be “kara maoromaoro taudia” ia gwauraia. (Mataio 25:​37, 46) Unai dainai mamoe be inai bamona taudia: Nega taina lalonai Keriso ena tadikakana idia durudia bona Dirava idia abidadama henia dainai ia gwauraidia maoromaoro.

¹¹ Idaunega amo ema bona hari, Dirava ese taunimanima momo ia gwauraia maoromaoro; idia ta be Aberahamo. (Iamesi 2:​21-23) Noa, Aberahamo, bona mai edia kamonai taudia ma momo be “mamoe idaudia,” Dirava ena Basileia henunai mauri do idia abia Paradaiso lalonai. Iseda nega lalonai taunimanima milioni milioni ese tomadiho momokanina idia abia dae; idia be mamoe idaudia, bona horoa taudia ida idia be ‘orea tamona’ ai idia lao. (Ioane 10:16; Apokalupo 7:9) Unai taunimanima mai edia tanobada helarona ese idia abia dae Iesu ena tadikakana be Basileia ena gwaukau taudia, unai dainai idia durudia​—tauanina bona lauma daladia ai. Iesu ia laloa mamoe idaudia ese iena tadikakana tanobada ai idia kara henidia karadia be ia dekenai idia karaia karadia. Unai bamona taudia, bese iboudiai kota henidia totona ia mai neganai idia mauri noho taudia, be mamoe do ia gwauraidia.

12. Badina be dahaka mamoe be reana idia henanadai, edena dala ai Iesu idia kara namo henia?

¹² Bema hari inai negai mamoe idaudia be horoa taudia ida sivarai namona idia harorolaia bona idia durudia, badina be dahaka idia henanadai, idia gwau: “Lohiabada e, edena negai ai itaia oi, oi hitolo, ai ubua oi, o oi ranu mase, ranu ai henia oi dekenai?” (Mataio 25:37) Reana badina be idauidau. Inai be parabole ta. Ia amo, Iesu ese ia hahedinaraia iena lauma tadikakana ia lalodia bada; idia abia mamina be ia danu ia abia, bona ia be idia ida hisihisi idia ania hebou. Guna Iesu ia gwau: “Umui ia abia dae tauna ese lau danu ia abia dae, bona lau ia abia dae tauna ese lau ia siaia Diravana danu ia abia dae.” (Mataio 10:40) Unai hereva hegeregerena lalonai, Iesu ese ia hahedinaraia, ta ese iena tadikakana dekenai ia karaia karana (namona o dikana) ena mamina be guba dekenai ia abia, hegeregere guba ai ia dekenai ia karaia bamona. Inai danu, Iesu ese ia hahedinaraia goevagoeva Iehova ena kota herevadia, davana namona herevadia bona davana dikana herevadia, be momokani bona maoromaoro. Nanigosi be inai ekskius herevana, ‘Bema emai matana amo oi ai itaia,’ be idia gwauraia diba lasi.

13. Nanigosi bamona taudia ese Iesu idia gwauraia “Lohiabada” reana badina be dahaka?

¹³ Inai parabole ese ia gwauraia kota karana ena nega ita lalo-pararalaia neganai, ita diba goevagoeva nanigosi be daidia. Parabole ena anina do ia vara negana be inai: “Taunimanima ena Natuna ena toana guba dekenai do ia hedinarai. Unai neganai tanobada ena bese ibounai do idia tai, badina be Taunimanima ena Natuna do idia itaia . . . ia mai, mai ena siahu bada, bona mai ena hairai danu.” (Mataio 24:​29, 30) Babulonia Badana latanai do ia vara hisihisina amo do idia roho mauri taudia, King ena tadikakana idia kara henidia mai edia badu ida taudia unai, be reana unai neganai mai edia gari ida Kota Biaguna do idia gwauraia “Lohiabada”; do idia laloa unai amo mauri do idia davaria.​—Mataio 7:​22, 23; ma danu Apokalupo 6:​15-17 itaia.

14. Iesu ese dahaka hegeregerena mamoe bona nanigosi do ia kota henidia?

¹⁴ To, Iesu ese guna dubu idia lao henia taudia, o idia gwau Dirava be lasi taudia, o ma haida be mai edia gari ida do idia gwauraia herevadia hegeregeredia do ia kota henidia lasi. (2 Tesalonika 1:8) To, kota biaguna ese taunimanima edia lalohadai bona edia kara gunadia iena “tadikakana ogogami herea taudia” dekenai do ia laloa. Momokani, horoa Keristani taudia tanobada ai idia do noho edia momo ia diho. To, horoa taudia, ‘hesiai tauna mai ena kamonai bona mai ena kara maoromaoro’ oreana taudia, ese lauma aniani bona hahekau herevadia idia do henia noho lalonai, mamoe ai do idia lao diba taudia be mai edia dala, unai hesiai oreana taudia do idia kara namo henidia, ‘taunimanima hutuma bada herea, bese idauidau, iduhu idauidau, bona kopina idauidau’ amo ese idia kara henidia vadaeni hegeregerena.​—Apokalupo 7:​9, 14.

15. (a) Edena dala ai momo ese idia hahedinaraia idia be nanigosi bamona? (b) Badina be dahaka taunimanima be mamoe o nanigosi ita gwauraidia be namo lasi?

¹⁵ Keriso ena tadikakana bona mamoe idaudia milioni milioni, orea tamona ai idia lao taudia, be taunimanima ese edena bamona idia kara henidia vadaeni? Taunimanima momo ese Keriso ena orea taudia be idia kara dika henidia lasi, gau tamona, mai edia lalokau ida idia kara henidia lasi. Nanigosi bamona taudia ese tanobada dikana idia ura henia dainai, herevana ta ese Basileia sivaraina be idia dekenai ia harorolaia eiava dala idauna ta amo unai sivarai idia kamonai, to idia dadaraia. (1 Ioane 2:​15-17) Momokani, Dirava ese ia abia hidi do ia kota henidia tauna be Iesu. Mamoe be daidia bona nanigosi be daidia gwauraia gaukarana, be iseda lasi.​—Mareko 2:8; Luka 5:22; Ioane 2:​24, 25; Roma 14:​10-12; 1 Korinto 4:5.

Nega Vairai Orea Ruaosi ese Dahaka Do Idia Abia?

¹⁶ Iesu ese ena kota herevana mamoe totona be ia gwauraia vadaeni, ia gwau: “Umui mai, egu Tamana ese ia hanamoa taudia e, Basileia umui abia, tanobada ia karaia neganai, ia ese ia karaia hegaegae umui emui.” Unai be lalokau boiboina​—“Umui mai”! Dahaka totona do idia mai? Mauri hanaihanai abia totona, parabole ena dokonai ia gwauraia hegeregerena: “Kara maoromaoro taudia be mauri hanaihanai gabuna dekenai do idia lao.”​—Mataio 25:​34, 46.

16, 17. Nega vairai mamoe ese dahaka do idia abia?

¹⁷ Moni parabolena lalonai, Iesu ese ia hahedinaraia ia ida guba ai do idia lohia hebou taudia ese dahaka idia karaia be namo, to mamoe bona nanigosi parabolena lalonai, ia hahedinaraia Basileia ese do ia lohiaia taudia ese dahaka idia karaia be namo. (Mataio 25:​14-23) Iesu ena tadikakana idia durudia mai edia lalona ibounai ida dainai, mamoe ese iena Basileia do ia biagua tanobadana ai edia gabu do idia abia. Paradaiso tanobadana ai mauri do idia moalelaia​—Dirava ese ia hoia lou diba taudia edia “tanobada hamatamaia” negana amo, unai helaro ia hegaegaelaia idia edia.​—Luka 11:​50, 51.

¹⁸ Nanigosi do idia abia davana be idau vaitani! “Iena lauri kahana taudia dekenai do ia hamaoroa, do ia gwau, ‘Dika bada taudia, lau dekena amo umui raka siri, lahi do ia bodo lasi lalonai do umui lao, ia gabua hegaegae vadaeni, Satani danu mai ena aneru danu edia. Badina be lau hitolo, umui ubua lasi lau. Lau ranu mase, ranu umui henia lasi lau dekenai. Lau be idau tauna, lau umui abia dae lasi. Lau be dabua lasi, dabua umui atoa lasi lau dekenai. Lau gorere, bona dibura ruma dekenai lau noho neganai, umui vadivadi henia lasi lau dekenai.’ Vadaeni idia danu do idia haere henia ia dekenai, do idia gwau, ‘Lohiabada e, edena negai ai itaia oi, oi hitolo, o oi ranu mase, o oi be idau tauna, o oi be dabua lasi, o oi gorere, o oi be dibura ruma dekenai oi noho, vadaeni oi dekenai durua ai henia lasi?’ Vadaeni ia ese do ia haere idia dekenai, do ia gwau, ‘Umui lau hamaoroa momokani, inai ogogami taudia dekenai durua umui henia lasi neganai, lau danu umui durua lasi inai.’ ”​—Mataio 25:​41-45.

18, 19. (a) Iesu do ia gwau nanigosi ese dahaka davana do idia abia? (b) Dahaka dainai ita diba momokani nanigosi ese hisihisi do idia ania lasi ela bona hanaihanai?

¹⁹ Baibel stadilaia taudia idia diba unai ena anina be inai lasi: Nanigosi bamona taudia edia mase diba lasi laumadia be lahi lalonai hisihisi do idia ania ela bona hanaihanai. Lasi, badina be taunimanima be mai edia mase diba lasi laumadia lasi. (Genese 2:7; Hadibaia Tauna 9:​5, 10; Esekiela 18:4) Kota Biaguna ia gwau “lahi do ia bodo lasi lalonai” do idia lao, anina be do idia mase bona boio vaitani; Diabolo bona ena lauma dikadia danu edia dokona momokani be unai. (Apokalupo 20:​10, 14) Unai hegeregerena, Iehova ena Kota Biaguna ese davana idauidau ia gwauraia. Mamoe ia hamaorodia, ia gwau, “Umui mai”; nanigosi ia hamaorodia, ia gwau, “Lau dekena amo umui raka siri.” Mamoe ese “mauri hanaihanai” do idia abia. Nanigosi ese ‘davana dikana,’ mase hanaihanai, do idia abia.​—Mataio 25:46.b

Ena Anina Ita Dekenai be Dahaka?

²⁰ Aposetolo hani, Iesu ese iena lou mai bona tanobada dokona edia toana ia gwauraia herevana idia kamonai taudia, be iena hereva dainai gau momo idia laloa be namo. Namona be idia noga bona idia gima noho. (Mataio 24:42) Mareko 13:10 ese ia gwauraia haroro gaukarana idia karaia be namo. Hari inai negai Iehova ena Witness taudia ese unai gaukara idia goadalaia.

20, 21. (a) Keristani taudia edia anina bada gaukarana be dahaka? (b) Dahaka hapararaia karana be hari ia vara noho? (c) Mamoe bona nanigosi parabolena ena anina do ia vara neganai, dahaka do ia vara taunimanima dekenai?

²¹ To, inai lalohadai idauna mamoe bona nanigosi parabolena dekenai ena anina ita dekenai be dahaka? Taunimanima ese idia ura henia dalana be hari idia abia hidi noho. Haida be ‘mase gabuna ia lao dalana badana’ ai idia raka, to ma haida be ‘mauri gabuna ia lao dalana maragimaragina’ ai idia raka noho. (Mataio 7:​13, 14) To Iesu ese mamoe bona nanigosi, parabole lalonai ia gwauraia taudia, do ia hididia bona edia davana do ia gwauraia negana momokanina be do vairai. Taunimanima ena Natuna be ena Kota Biaguna siahuna ida do ia mai neganai, ena lalona do ia hadaia, Keristani korikori taudia momo​—idia gwauhamata vadaeni mamoedia “hutuma bada herea”​—be idia hegeregere “hisihisi badana” ena kahana ginigabena amo do idia roho mauri bena tanobada matamatana lalonai do idia noho. Hari inai negai unai helaro idia moalelaia be namo. (Apokalupo 7:​9, 14, NW) To, taunimanima momo “bese ibounai” amo ese do idia hahedinaraia idia be kamonai lasi nanigosidia bamona. ‘Davana dikana,’ mase hanaihanai, do idia abia. Unai neganai tanobada ena hekwarahi do ia ore!

22, 23. Ena be parabole ena anina do ia vara negana be do vairai, to badina be dahaka hari ita karaia haroro gaukarana be mai anina bada?

²² Ena be parabole lalonai ia gwauraia kota karana be nega sisina murinai do ia vara, to harihari danu mai anina bada karana ta ia vara noho. Ita Keristani taudia ese taunimanima hamauridia gaukarana ita karaia noho; taunimanima ia hapararadia herevana ita harorolaia noho. (Mataio 10:​32-39) Paulo ia gwau: “ ‘Dirava ena ladana idia noinoi henia taudia ibounai, be mauri do idia davaria.’ To idia abidadama henia lasi taudia be edena bamona Lohiabada do idia noinoi henia diba? Bona iena Sivarai idia kamonai lasi taudia be edena bamona do idia abidadama diba? Bona bema haroro tauna be lasi neganai, edena bamona do idia kamonai?” (Roma 10:​13, 14) Tano 230 bamona lalonai, iseda haroro gaukarana amo Dirava ena ladana bona iena hahemauri herevana be taunimanima ita hadibadia. Keriso ena horoa tadikakana ese unai gaukara idia do gunalaia noho. Hari inai negai mamoe idaudia milioni ima bamona be idia ida idia gaukara hebou. Bona tanobada hegegemadai taunimanima ese Iesu ena tadikakana ese idia harorolaia herevana idia abia dae.

²³ Ruma ta ruma ta ai o gabu idaudia ai o nega idaudia ai ita haroro negadiai, taunimanima ese iseda haroro herevana idia kamonai diba. Ma haida ese ita diba lasi daladia ai Iehova ena Witness taudia bona ita harorolaia herevana idia dibaia. Kota negana do ia ginidae neganai, Iesu ese do ia kota henidia neganai, edia bese o edia famili edia kara danu do ia laloa, eiava? Ita diba lasi, bona unai ita gesilaia be anina lasi. (Korinto Ginigunana 7:14 itaia.) Hari inai negai taunimanima momo idia ura lasi kamonai, eiava Dirava ena orea taudia idia kirikirilaia o idia dagedage henidia. Unai dainai, hari be mai anina bada negana; unai bamona taudia be reana unai kara do idia manadalaia ela bona kota neganai Iesu ese do ia gwauraidia nanigosi.​—Mataio 10:22; Ioane 15:20; 16:​2, 3; Roma 2:​5, 6. 

24. (a) Badina be dahaka taunimanima ese ita harorolaia herevana idia abia dae be gau badana? (b) Inai stadi ese oi ia durua oiemu haroro gaukarana be edena bamona do oi laloa?

²⁴ To, moale gauna be inai: Taunimanima momo ese haroro herevana idia abia dae, Dirava ena Hereva idia stadilaia, bona Iehova ena Witness taudia ai idia lao. Ma haida, hari inai negai edia toana be nanigosi bamona taudia, be reana do idia senisi bena mamoe bamona ai do idia lao. Kahirakahira, Iesu be kota karaia totona ena terona ai do ia helai diho; hari inai negai haroro herevana idia abia dae bona Keriso ena tadikakana idia durudia taudia ese edia kara amo idia hahedinaraia idia be hegeregere, unai neganai ena idiba kahanai do ia atodia. Dirava ese hari ia hanamodia bona do ia hanamodia noho. Unai dainai, namona be hari parabole ese ita ia hagoadaia, Keristani haroro gaukarana do ita goadalaia totona. Nega ia do ore lasi neganai, namona be Basileia ena sivarai namona do ita harorolaia mai eda goada ibounai ida, bena unai amo dala do ita kehoa taunimanima ese do idia abia dae diba totona. Bena kota neganai Iesu sibona ese davana dikana o davana namona do ia henidia.​—Mataio 25:46.