Iehova Ena Lauma Dubuna Badana

“Ita be mai iseda Hahelagaia Tauna Badana. . . . Ena hesiai gaukara guba ena tomadiho dubu dekenai ia karaia noho, unai be Palai Dubu momokanina, taunimanima ese idia haginia lasi, [Iehova] sibona ese ia haginia.”​—⁠HEBERU 8:​1, 2.

IEHOVA DIRAVA ese taunimanima ia lalokau henia bada dainai, boubou gauna ta ia henia, tanobada ena dika kokia totona. (Ioane 1:​29; 3:​16) Ena vara guna Natuna ena mauri be guba amo ia abia oho, Iuda rami-hebou kekenina ta ladana Maria ena bogana lalonai ia atoa. Iehova ena aneru ese Maria ia hadibaia goevagoeva, do ia abia merona “be Dirava ena Natuna do idia gwauraia.” (Luka 1:​34, 35) Aneru ese ena maoheni Iosepa ia hamaoroa, Maria be hoa dalana ai ia rogorogo, ma ia hamaoroa ena natuna ese “iena bese taudia edia kara dika dekena amo do ia hamauridia.”​—⁠Mataio 1:​20, 21.

² Iesu ia tubu daekau lalonai, ia be hoa dalana ai ia vara sivaraina be ia lalo-pararalaia matamaia. Ia diba ena Tamana guba dekenai ia ura hahemauri gaukarana be tanobada ai do ia karaia. Unai dainai, ena mauri lagani be 30 bamona neganai, Iesu be Dirava ena peroveta tauna Ioane dekenai ia lao, Ioane ese Ioridane Sinavaina ai do ia bapatisoa totona.​—⁠Mareko 1:9; Luka 3:​23.

³ Iesu be bapatiso ia abia neganai, ia guriguri noho. (Luka 3:​21) Toana be unai negana amo, ia ese Salamo 40:​6-8 ia hagugurua matamaia, aposetolo Paulo ese gabeai ia hahedinaraia hegeregerena: “Boubou karadia bona harihari gaudia be oi ura lasi, to oi ese lau totona tauanina ta oi abia hegaegae.” (Heberu 10:5) Unai amo Iesu ese ia hahedinaraia ia diba Dirava ia “ura lasi” Ierusalema ena dubu dekenai animal do idia bouboulaidia noho. Ia diba Dirava ese tauanina goevadaena ia hegaegaelaia iena, do ia bouboulaia totona. Unai murinai animal do idia bouboulaidia be anina lasi. Iesu ia hahedinaraia ia be mai ena lalona ibounai ida ia ura Dirava ena ura do ia badinaia, ia guriguri, ia gwau: “Dirava e, lau inai, oiemu ura gauna do lau karaia, Taravatu Buka lalonai egu sivarai ia torea hegeregerena.” (Heberu 10:7) Unai dina ai Iesu ese ena boga-auka bona sibona ena ura dadaraia lalohadai be dala hereadaena amo ia hahedinaraia goevagoeva, ena hahediba taudia ai do idia lao taudia ese do idia tohotohoa totona!​—⁠Mareko 8:​34.

⁴ Dirava ese ia hahedinaraia Iesu ena bapatiso gurigurina ia abia dae, a? Iesu ena aposetolo ta ena haere be inai: “Iesu ia bapatisoa, vadaeni maoromaoro, ranu dekena amo ia daekau neganai, guba be ia kehoa vadaeni, bona Iesu ese Dirava ena Lauma ia itaia, pune manu bamona ia diho, ia dekenai ia helai. Bona gado ta guba dekena amo ia boiboi, ia gwau, ‘Inai be lauegu Natuna, egu lalokau, lau moale bada ia dekenai.’ ”​—⁠Mataio 3:​16, 17; Luka 3:​21, 22.

⁵ Iesu ena tauanina, ia bouboulaia gwauraia gauna, be Dirava vairanai ia hahedinaraia neganai, Dirava ese unai ia abia dae. Ierusalema ena dubu ena boubou patana ia hereaia gauna be lauma dalanai ia vara unai. Boubou patana korikorina, ia latanai animal idia bouboulaia gauna, ese unai lauma patana, Dirava ena “ura,” Iesu ena tauanina be boubou gauna bamona ia abia dae dalana, ia laulaulaia. (Heberu 10:10) Unai dainai aposetolo Paulo ese Keristani taudia ia tore henia, ia gwau: “Ita be mai iseda boubou patana. To Iuda taudia edia hahelagaia taudia be hegeregere lasi iseda boubou patana dekena amo aniani idia ania.” (Heberu 13:10) Anina be, Keristani korikori taudia be kara dika kokia boubou gauna hereana amo namo idia davaria, Iuda hahelaga taudia momo ese idia dadaraia gauna.

⁶ Dirava ese Iesu be lauma helaga amo ia horoa, anina be ena lauma dubuna ibounai ia havaraia, ia lalonai Iesu be Hahelaga Tauna Badana ai do ia lao. (Kara 10:38; Heberu 5:5) Hahediba tauna Luka be lauma ena siahu amo ia gwau “Tiberio Kaisara be lagani 15 ia lohia neganai” unai gau badana ia vara. (Luka 3:​1-3) Unai be lagani 29 C.E.​—⁠King Aratasaseta ese Ierusalema ena magu haginia lou oda ia gwauraia negana amo lagani puradia 69, lagani 483 unai, be unai lagani lalonai idia ore. (Nehemia 2:​1, 5-8) Peroveta herevana ia gwau “Mesia” be unai lagani ai do ia ginidae. (Daniela 9:​25) Toana be Iuda taudia momo be unai idia diba. Luka ia gwau Mesia, eiava Keriso, be edena bamona do ia hedinarai “idia laloa momo,” Heberu gado herevana “Mesia” bona Greek gado herevana “Keriso” edia anina tamona be “horoa tauna.”​—⁠Luka 3:​15.

⁷ Iesu be bapatiso ia abia neganai, Dirava ese ena noho gabuna guba ai ia horoa; anina be ia abia hidi bena lauma dubuna badana ena “Hahelaga Herea Gabuna” ai ia halaoa. (Daniela 9:​24) “Palai Dubu momokanina, taunimanima ese idia haginia lasi, Lohiabada sibona ese ia haginia” gauna, ia gaukara matamaia. (Heberu 8:⁠2) Danu, Iesu Keriso be ranu bona lauma helaga amo bapatiso ia abia neganai, ia vara lou, Dirava ena lauma Natuna ta ai ia lao. (Ioane 3:3 itaia.) Anina be gabeai Dirava ese ena Natuna do ia boiria, guba ai do ia noho lou totona; unuseniai, iena Tamana ena idibana kahanai, King bona Hahelaga Tauna Badana edia dagi gaukara do ia karaia, bona ia “be Melekisedeka ena orea tauna ela bona hanaihanai.”​—⁠Heberu 6:​20; Salamo 110:​1, 4.

Guba Ena Helaga Herea Gabuna

⁸ Iesu be bapatiso ia abia dinana ai, Dirava ena guba terona dekenai gau matamatadia idia hedinarai. Dirava ese taunimanima goevadaena ta ia gwauraia hidi, tanobada ena kara dikadia do ia kokia; unai ese ia hahedinaraia iena helaga be taunimanima edia dika amo ia idau vaitani. Dirava ese danu ena hebogahisi ia hahedinaraia, ia hahedinaraia ena lalona ia hegeregere unai herohemaino karana do ia abia dae. Unai dala amo Dirava ena terona guba ai be dubu ena lalonai daiutu hegeregerena ai ia lao, unuseniai hahelaga tauna badana be lagani ta ta ai nega tamona animal ena rara ia abia vareai, laulau dalanai dika ia kokia totona.

⁹ Helaga Gabuna bona Helaga Herea Gabuna ia hapararaia dabuana ese Iesu ena tauanina ia laulaulaia. (Heberu 10:19, 20) Tanobada ai Iesu be taunimanima ta neganai, unai ese ia koua dainai ena Tamana vairanai ia vareai diba lasi. (1 Korinto 15:50) Iesu ia mase neganai, “Dubu Helaga ena koua dabua helagana badana be ia darea, ataiai dekena amo ia diho mai bona henuna dekenai, kahana rua ia lao.” (Mataio 27:51) Hoa dalana ai unai ese ia hahedinaraia Iesu be guba ai do ia vareai dalana ia koua gauna be ia kokia vadaeni. Dina toi murinai, Iehova Dirava ese hoa karana badana ia karaia. Iesu be mase amo ia hatorea isi neganai, ia be taunimanima ta lasi, mai ena hidio bona mai ena rara lasi, to ia be “noho hanaihanai” lauma mai hairaina. (Heberu 7:​24) Dina 40 murinai, Iesu be guba ai ia daekau bona “Helaga Herea Gabuna” korikorina ai ia vareai, “Dirava ena vairanai, ita durua totona.”​—⁠Heberu 9:​24.

¹⁰ Dirava ese Iesu ena rara, ia hebubu gauna, be tanobada ena dika kokia gauna bamona ia abia dae, a? Momokani, ia ese ia abia dae. Iesu ia toreisi lou, bena dina 50 murinai, Pentekoste ariana dinana ai, unai ia hamomokania gauna ia vara. Dirava ena lauma helaga be Iesu ena hahediba taudia 120, Ierusalema ai idia hebou taudia, latanai ia bubua diho. (Kara 2:​1, 4, 33) Unai amo ia horodia, edia Hahelaga Tauna Badana Iesu Keriso hegeregerena, Dirava ena lauma dubuna badana dekenai ‘hahelaga taudia’ ai do idia lao, bona lauma ena “boubou gaudia” do idia henia. (1 Petero 2:5) Inai danu, unai horoa taudia be bese matamatana, Dirava ena “bese helagana” lauma Israela ai idia lao. Unai nega amo, Israela ena namo idia perovetalaia herevadia ibounai, Ieremia 31:31 ena “gwauhamata taravatu matamatana” herevana hegeregerena, edia anina be horoa Keristani taudia edia ekalesia, “Dirava ena Israela momokani,” dekenai do idia vara.​—⁠1 Petero 2:9; Galatia 6:​16.

Dirava Ena Lauma Dubuna Ena Gau Ma Haida

¹¹ Ena be Helaga Herea Gabuna ese “guba,” Dirava be ena terona ai ia helai gabuna, ia laulaulaia, to Dirava ena lauma dubuna ena gau oredia iboudiai be tanobada gaudia. (Heberu 9:​24) Ierusalema ena dubu ai, hahelaga taudia edia lalonai ariara gabuna ia noho, ia dekenai be boubou patana ta bona besini badana ta mai ena ranu, hahelaga taudia ese unai amo sibodia idia hagoevaia guna, bena gaukara helagana idia karaia. Unai gaudia ese dahaka idia laulaulaia, Dirava ena lauma dubuna ai?

¹² Iesu Keriso dekenai, hahelaga taudia edia lalonai ariana gabuna ese ia laulaulaia gauna be inai: Ia be Dirava ena Natuna, unai dainai ia be taunimanima goevadaena mai ena kara dika lasi. Iesu ena orea taudia, horoa taudia, ese ena boubou karana idia abidadama henia dainai, Dirava ese ia gwauraidia maoro. Unai dainai ia kara henidia diba, hegeregere idia be mai edia kara dika lasi bamona. (Roma 5:1; 8:​1, 33) Unai dainai, unai ariara gabuna ese ia laulaulaia gauna ma ta be inai: Dirava ena matana ai, hahelaga taudia ta ta iboudiai be ia gwauraia vadaeni kara maoromaoro taudia. To, horoa Keristani taudia be idia do goevadae lasi, bona kara dika idia do karaia. Ariara gabuna dekenai ia noho ranu besini ese Dirava ena Hereva ia laulaulaia, ia amo Hahelaga Tauna Badana ese hahelaga taudia ia hagoevaia noho. Unai hagoevaia karana idia abia dae dainai, edia toana be namo herea, ia amo Dirava idia hanamoa bona murimuri taudia idia veria mai iena tomadiho goevana dekenai.​—⁠Efeso 5:​25, 26; ma danu Malaki 3:​1-3 itaia.

Helaga Gabuna

¹³ Dubu ena daiutu ginigunana ese ariara gabuna ena noho ia hereaia noho ia laulaulaia. Tau goevadaena Iesu Keriso dekenai, unai daiutu ese ia laulaulaia gauna be inai: Ia vara lou neganai, ia be Dirava ena lauma Natuna ta ai ia lao, gabeai guba maurina do ia abia lou. Ena orea taudia, horoa taudia, ese Keriso ena rara, ia hebubu gauna, idia abidadama henia dainai Dirava ese ia gwauraidia maoro murinai, Dirava ena lauma ese idia danu be unai dala idauna amo ia kara henia. (Roma 8:​14-​17) “Ranu [idia edia bapatiso unai] dekena amo bona Lauma Helaga dekena amo” idia “vara lou” bona Dirava ena lauma natuna ai idia lao. Edia helaro be bema idia gini goada ela bona mase, do ia hatoredia isi lou bena Dirava ena lauma natuna edia mauri guba dekenai do idia abia.​—⁠Ioane 3:​5, 7; Apokalupo 2:​10.

¹⁴ Murimuri ai idia noho tomadiho taudia ese tanobada dubuna ena Helaga Gabuna ai idia gaukara hahelaga taudia idia itadia lasi. Unai hegeregerena, horoa Keristani taudia ese idia abia lauma nohona be Dirava idia tomadiho henia taudia momo, edia helaro be paradaiso tanobadana ai do idia mauri hanaihanai taudia, ese idia abia lasi bona idia lalo-pararalaia lasi. Dubu ena golo lamepa dogoatao gauna, ese horoa Keristani taudia idia abia diarina ia laulaulaia. Dirava ena lauma helaga ena gaukara, lamepa edia oela hegeregerena, ese Baibel ia hadiaria. Keristani taudia ese unai dainai idia abia lalo-pararana be idia dogoatao lasi. Lasi, Iesu ena hereva idia badinaia, ia gwau: “Umui be tanobada taudia ibounai edia diari. . . . Umui emui diari taunimanima edia vairana dekenai unai bamona do umui hedinaraia, vadaeni umui emui kara namodia do idia itaia neganai, umui emui Tamana guba dekenai do idia hanamoa.”​—⁠Mataio 5:​14, 16.

¹⁵ Unai diari lalonai do idia noho totona, namona be horoa Keristani taudia ese beredi patana latanai ia noho beredi ia laulaulaia gauna do idia aniani loulou. Lauma aniani idia abia gabuna badana be Dirava ena Hereva. Dala idia tahua, dina ta ta iboudiai do idia duahia bona do idia laloa namonamo. Iesu ese danu ia gwauhamata, iena ‘hesiai tauna mai ena kamonai bona mai ena kara maoromaoro’ ena amo “edia aniani neganai edia aniani do ia henia.” (Mataio 24:45) Unai “hesiai tauna” be tanobada ai idia noho horoa Keristani taudia edia orea ibounai, herevana edena negai idia noho. Keriso ese unai horoa oreana ia gaukaralaia, Baibel ena peroveta herevadia idia momokani daladia bona hari inai negai Baibel ena hakaua herevadia badinaia daladia halasia totona. Unai dainai, horoa Keristani taudia ese unai lauma aniani ibounai idia ania mai edia ura bada ida. To edia lauma mauridia ubua dalana be edia darana bona edia lalona ai Dirava dibalaia herevadia idia abia dae karana sibona lasi. Iesu ia gwau: “Egu aniani be inai: Lau ia siaia Diravana ena ura do lau karaia, iena gaukara do lau karaia haorea momokani.” (Ioane 4:​34) Unai hegeregerena, horoa Keristani taudia edia lalona idia hegeregere, badina be dina iboudiai idia ese Dirava ena ura, ia hahedinaraia gauna, be idia badinaia namonamo.

¹⁶ Dabai bona adorahi ai, Helaga Gabuna lalonai hahelaga tauna ta ese Dirava dekenai muramura mai bonana namona ia gabua muramura ena pata ai. Unai neganai, hahelaga lasi taudia be dubu ena ariara gabuna ai idia gini bona Dirava idia guriguri henia. (Luka 1:​8-​10) Baibel ia gwau: “Unai muramura ena bonana namona be Dirava ena taudia edia guriguri ena toana.” (Apokalupo 5:8) Davida be salamo ta ai ia gwau: “Lau ura egu guriguri do oi abia dae, bona ena mamina oi dekenai be namo, muramura mai bonana namona bamona.” (Salamo 141:2) Horoa Keristani taudia ese guriguri idia laloa bada danu, badina be Iesu Keriso ena amo Iehova kahirakahira idia lao diba. Ta ena lalona amo idia aru guriguridia be muramura mai bonana namona hegeregerena. Horoa Keristani taudia ese danu dala idaudia amo Dirava idia hanamoa, edia udu bibinadia amo ma haida idia hadibaia. Dirava ese ia moalelaia bada gauna be inai: Hekwarahi idia haheaukalaidia bona hetoho negadiai idia kara maoromaoro.​—⁠1 Petero 2:​20, 21.

¹⁷ Kara Dika Boubouna Dinana ai, Israela ena hahelaga tauna badana be Helaga Herea Gabuna ai ia vareai bena muramura mai bonana namona be golo kapusina ai ia gabua, unai kapusi lalonai be lahi gidadia. Unai ia karaia guna, bena kara dika bouboudia edia rara ia abia vareai diba. Unai peroveta laulauna hamomokania karana ai, unai tau tamona, Iesu, be Iehova Dirava vairanai ia kara maoromaoro vaitani ela bona ena mauri ia henia, iseda kara dikadia boubouna hanaihanai tamona. Unai amo ia hahedinaraia, herevana taunimanima goevadaena ta be Satani ese edena bamona ia tohoa, to Dirava vairanai ia kara maoromaoro noho diba. (Aonega Herevadia 27:11) Iesu ese hahetoho ia abia neganai, ia guriguri “mai taitai bona mai matana ranu danu. . . . Bona Dirava ese Iesu ena noinoi ia abia dae, badina . . . ia be Dirava henunai ia manau noho dainai.” (Heberu 5:7) Unai dala amo Iesu ese Iehova ia hanamoa, badina be ia be kara maoromaoro Pavapavana bona guba bona tanobada ia lohiaia be maoro. Dirava ese Iesu dekenai davana namona ia henia; mase amo ia hatorea isi lou, bena ia doko diba lasi maurina be guba ai ia henia. Unai atai gabuna amo Iesu ese tanobada dekenai ia mai ena badina iharuana ena anina ia havaraia; edia kara dika amo idia helalo-kerehai taudia ia durua, Dirava ida do idia maino karaia.​—⁠Heberu 4:​14-​16.

Dirava Ena Lauma Dubuna Ena Hairai Bada

¹⁸ Iehova ia gwau: “Inai Dubu Helaga matamatana ena hairai ese Dubu Helaga gunana ena hairai do ia hereaia.” (Hagai 2:9) Iehova ese Iesu ia hatorea isi lou bona mase diba lasi Pavapavana bona Hahelaga Tauna Badana ai ia halaoa, unai amo ena lauma dubuna ia hahairaia bada. Unai neganai Iesu be hegeregere “idia kamonai henia taudia ibounai dekenai, be mauri hanaihanai do ia henidia.” (Heberu 5:9) Unai bamona idia kamonai henia taudia ginigunadia be hahediba taudia 120, lagani 33 C.E. ai Pentekoste ai lauma helaga idia abia taudia. Apokalupo bukana ia gwau dokonai unai lauma Israela taudia edia momo be 144,000. (Apokalupo 7:4) Idia momo be idia mase murinai mase guridia lalonai mase ena mahuta ai idia mahuta, Iesu be pavapava siahuna ida do ia ginidae negana idia naria. Peroveta herevadia Daniela 4:​10-​17, 20-​27 ai ese idia hahedinaraia lagani 1914 ai Iesu be ena inai taudia bogaraginai ia lohia matamaia. (Salamo 110:2) Lagani 40 bamona lalodiai, horoa Keristani taudia ese unai lagani idia naria mai edia ura bada ida. Tanobada ibounai tuarina ginigunana bona ia ida idia vara hebou hisihisidia ese idia hamomokania Iesu be lagani 1914 ai King dagina ia abia. (Mataio 24:​3, 7, 8) Bena nega sisina murinai, “Dirava ese iena orea taudia do ia kota henidia guna” negana ia ginidae dainai, Iesu ese ena gwauhamata be iena mase ai idia mahuta horoa hahediba taudia, dekenai ia hamomokania: “Do lau giroa mai, lau dekenai do lau abia dae umui.”​—⁠1 Petero 4:​17; Ioane 14:3.

¹⁹ Hahelaga taudia iboudiai be 144,000, to idia haida be maka ginigabena idia do abia lasi bona Iesu ese ia do gogodia lasi guba dekenai. Orena be tanobada ai idia do noho, edia noho lauma dalana ai be Helaga Gabuna ese ia laulaulaia; edia tauanina, edia dala koua ‘dabuana’ unai, ese idia bona Dirava ena noho gabuna helagana ia hapararaia. Idia be mai abidadama ida idia mase neganai, maoromaoro idia toreisi lou. Unai neganai idia be mase diba lasi lauma taudia, ai idia lao, bona guba ai idia noho vadaeni 144,000 orea taudia ida do idia hebou.​—⁠1 Korinto 15:51-​53.

²⁰ Guba dekenai hahelaga taudia momo herea be Hahelaga Tauna Badana ida idia gaukara hebou noho dainai, Dirava ena lauma dubuna ena hairai be ma ia bada ia lao. Bona hahelaga taudia oredia ese gaukara mai anina be tanobada ai idia karaia noho. Edia haroro gaukarana amo, Dirava be ena hahemaoro herevadia amo ‘bese iboudiai ia hamarerea noho,’ Hagai 2:7 ia peroveta hegeregerena. Bona tomadiho taudia milioni momo, “bese ibounai edia kohu namodia” ia gwauraia taudia, be Iehova ena dubu ena tanobada ariara gabudia ai idia vareai. Dirava ese ia karaia tomadiho dalana dekenai edia kara korikori be dahaka, bona nega vairai iena lauma dubuna badana ena hairai be edena bamona? Unai henanadai be hereva gabena lalonai do ita tahua.

Riviu Henanadai

◻ Lagani 29 C.E. ai, Iesu ese dahaka kara toana namo hereana ia hahedinaraia?

◻ Dahaka be lagani 29 C.E. ai ia matamaia?

◻ Helaga Gabuna bona Helaga Herea Gabuna ese dahaka idia laulaulaia?

◻ Lauma dubuna badana be edena bamona ia hahairaia vadaeni?

Tomadiho Momokani Ena Kwalimu be Kahirakahira

“Lohiabada be tanobada ibounai ena King do ia lao.”​—⁠SEKARAIA 14:⁠9.

TANOBADA ibounai tuarina ginigunana negana ai, idia tuari besedia ese nega momo horoa Keristani taudia idia hahisia bona idia hadiburaia. Edia boubou karadia, Iehova hanamoa karadia, idia koua, bona lauma dalana ai idia hadiburadia. Unai ibounai be Sekaraia 14:2 ese ia perovetalaia, ia gwau bese idauidau ese Ierusalema do idia tuari henia. Ia perovetalaia hanuana be “Ierusalema, guba dekenai.” Dirava ena guba Basileiana be unai, ia lalonai be “Dirava bona Mamoe ena Natuna edia helai gabuna badana.” (Heberu 12:22, 28; 13:14; Apokalupo 22:3) Dirava ena horoa taudia tanobada ai be unai hanua ena gwaukau taudia. Unai orea taudia mai edia kamonai be unai tuari lalonai idia boio lasi; edia inai taudia ese ‘hanua dekena amo idia siaidia lao lasi.’a

² Lagani 1919 ai, Dirava ese ena horoa taudia mai edia kamonai be edia dibura amo ia ruhaia, bena tuari murinai ia vara maino negana be maoromaoro idia gaukaralaia. Idia be guba Ierusalema ena gwaukau taudia, unai dainai idia ese Dirava ena Basileia ena sivarai namona idia harorolaia, bona 144,000 taudia oredia gogoa gaukarana idia durua. (Mataio 24:14; 2 Korinto 5:​20) Lagani 1931 ai inai ladana maorona, Iehova ena Witness taudia, be Baibel amo idia abia.​—⁠Isaia 43:10, 12.

³ Unai nega amo ema bona hari, Dirava ena horoa Witness taudia be idia kwalimu noho. Hitler bona ena Nazi tuari oreana ese edia hereva idia koua diba lasi. Ena be tanobada hegegemadai haida ese idia dagedage henidia, to tanobada ibounai dekenai edia gaukara ese anina ia havaraia. Lagani 1935 amo ema bona hari, Apokalupo bukana ese ia perovetalaia taudia ‘hutuma bada herea’ bese idauidau amo ese idia bamodia. Idia danu be gwauhamata bona bapatiso vadaeni Keristani taudia, bona “edia dabua idia huria vadaeni Mamoe ena Natuna ena rarana lalonai, vadaeni edia dabua be kurokuro.” (Apokalupo 7:​9, 14) To idia be horoa taudia lasi, bona guba maurina idia naria lasi. Edia helaro be Adamu bona Heva ese idia haboioa gauna, taunimanima edia mauri goevadaena paradaiso tanobadana ai, be do idia abia. (Salamo 37:29; Mataio 25:34) Hari inai negai, hutuma bada herea be taunimanima milioni ima mai kahana. Iehova tomadiho henia karana momokanina be ia kwalimu noho, to ena kwalimu ginigabena be dohore.

Idau Bese Taudia Dirava Ena Lauma Dubuna Ai

⁴ Idia gwauraia guna bamona, “dina bona hanuaboi” hutuma bada herea ese “Dirava ena hesiai gaukara idia karaia noho, iena dubu helaga lalonai.” (Apokalupo 7:​15) Idia be lauma Israela taudia lasi, hahelaga taudia lasi, unai dainai toana be Ioane ese ia itadia, dubu lalonai idia gini, Idau Bese taudia edia ariara gabuna ai. (1 Petero 2:5) Iehova ena lauma dubuna ena hairai be bada, badina be ena magu lalonai be unai hutuma bada herea amo ia honu, bona idia be lauma Israela taudia oredia ida Iehova idia hanamoa noho!

⁵ Hutuma bada herea ese hahelaga taudia edia lalonai ariara gabuna ia laulaulaia nohona ai Dirava ena hesiai idia lao henia lasi. Ia gwauraidia maoro lasi ena lauma natudia ai do ia halaoa totona. (Roma 8:​1, 15) To, Iesu ena boubou karana idia abidadama henia dainai, Iehova vairanai idia goeva. Ia gwauraidia maoro iena turadia ai do idia lao totona. (Iamesi 2:​21, 23 itaia.) Idia danu be hegeregere, boubou gaudia maorodia be Dirava ena lauma boubou patana latanai do idia henia. Unai hegeregerena, Isaia 56:​6, 7 ena peroveta herevana be dala namo hereana ai ia momokani: “Idau bese taudia bema egu bese ena orea lalonai idia vareai, lau do idia tomadiho henia totona, bona lau Lohiabada egu ladana do idia lalokau henia, . . . inai taudia be lau ese egu ororo helagana dekenai do lau hakaua, bona egu guriguri rumana dekenai lau ese moale do lau henidia. Edia gabua bouboudia bona edia boubou gaudia idauidau be, egu boubou patana ena latanai do lau abidia dae. Bona egu Dubu Helaga be bese idauidau ibounai edia guriguri rumana do idia gwauraia.”

⁶ Unai idau bese taudia ese idia henia gaudia haida be edia “uduna bibina” amo ‘hanamoa Dirava dekenai idia henia, [idia hegaegaelaia namonamo uitina] boubou gauna bamona,’ bona idia ‘kara namo,’ bona ‘kohu lasi taudia danu edia kohu idia abia hebou.’ (Heberu 13:15, 16) Besini badana mai ena ranu, hahelaga taudia ese idia gaukaralaia idia digu totona gauna, ese idau bese taudia dekenai gau badana ia hadibaia. Edia lalo-parara Dirava ena Hereva dekenai be ia bada ia lao lalonai, namona be lauma dalana ai do idia goeva idia lao, bona edia kara ai danu.

Helaga Gabuna Bona Ena Kohu

⁷ Unai idau bese taudia hutuma bada herea dekenai Helaga Gabuna bona ena kohu be mai anina, eiava? Helaga Gabuna ese ia laulaulaia nohona be do idia abia lasi. Idia vara lou lasi, Dirava ena lauma natudia ai do idia lao bona guba maurina do idia abia totona. Unai dainai idia mama, a? Lasi. Idia moale, badina be idia laloa 144,000 oredia idia durua be namo, bona Dirava ena palani idia laloa bada; unai palani hegeregerena unai 144,000 be ena lauma natudia ai ia halaoa, bena Keriso ida taunimanima do idia hanamoa ela bona do idia goevadae. Inai danu, idau bese taudia hutuma bada herea ese Dirava ena hariharibada idia laloa bada, badina be helaro ia henidia, tanobada ena Paradaiso dekenai do idia mauri hanaihanai. Unai idau bese taudia haida, idaunegai Nethinim taudia hegeregerena, be kwara dagina idia abia, hahelaga taudia durua gaukaradia ai.b (Isaia 61:5) Idia haida be Iesu ese ‘tanobada kahana ibounai dekenai lohia taudia ai do ia halaodia.’​—⁠Salamo 45:16.

⁸ Ena be idau bese taudia hutuma bada herea be Helaga Gabuna ese ia laulaulaia gabuna ai do idia vareai lasi, to ena kohu amo diba namona idia abia. Lamepa dogoatao gauna ena oela idia bubua loulou hegeregerena, idau bese taudia ese lauma helaga idia abia be namo, Dirava ese Baibel ena hereva momokani, ‘hesiai tauna mai ena kamonai bona mai ena kara maoromaoro’ ena amo ia henia herevadia, idia lalo-pararalaia totona. (Mataio 24:45-​47) Danu Dirava ena lauma ese ia durudia inai hereva hegeregerena do idia kara: “Lauma Helaga bona Headava Matamata Hahine [horoa taudia oredia] idia gwau, ‘Oi mai.’ Bona inai hereva idia kamonai taudia danu, namona be idia gwau, ‘Oi mai.’ Ranu mase taudia, umui mai. Bona ranu umui ura henia taudia, mauri ranuna do umui abia dae, ia be davana lasi.” (Apokalupo 22:17) Unai hegeregerena, lamepa dogoatao gauna dainai hutuma bada herea idia diba namona be Keristani taudia hegeregerena, edia diari do idia hahedinaraia bona Dirava ena lauma helaga idia hahisia lalohadai, hereva, o kara iboudiai amo do idia raka siri.​—⁠Efeso 4:​30.

⁹ Beredi patana ese hutuma bada herea ia hadibaia lou, lauma dalana ai do idia goada noho totona, namona be lauma anianina be Baibel ena amo bona ‘hesiai tauna mai ena kamonai bona mai ena kara maoromaoro’ ena buka edia amo do idia ania loulou. (Mataio 4:⁠4) Muramura patana ese ia hadibadia, gau badana be mai edia momokani ida Iehova do idia noia do ia durudia do idia kara maoromaoro noho. (Luka 21:36) Namona be edia guriguri lalonai ia do idia hanamoa bona do idia tanikiu henia mai edia lalona ibounai ida. (Salamo 106:⁠1) Muramura patana ese danu ia hadibadia, namona be dala ma haida amo Dirava do idia hanamoa. Anina be Keristani heboudia dekenai Basileia anedia do idia abia goadagoada, bona do idia hegaegae namonamo, ‘edia abidadama be edia uduna dekenai do idia gwauraia hedinarai’ totona.​—⁠Roma 10:⁠10.

Tomadiho Momokani Do Ia Kwalimu Guguru

¹⁰ Hari inai negai “bese ibounai . . . edia taunimanima” be Iehova ena tomadiho rumana dekenai idia aru mai. (Isaia 2:​2, 3) Apokalupo 15:⁠4 ese unai ia hamomokania, ia gwau: “Lohiabada e, daika ese oi dekenai do ia gari henia lasi? Daika ese oiemu ladana do ia hanamoa lasi? Badina be oi sibona be helaga. Bese ibounai oi dekenai do idia mai, oi dekenai do idia tomadiho henia, badina be oiemu kara maoromaoro be ibounai idia itaia vadaeni.” Sekaraia karoa 14 ese unai murinai do ia vara gauna ia gwauraia. Nega daudau lasi, tanobada taudia momo edia lalona do idia dika momokani. Do idia hebou lou, Ierusalema be nega ginigabena ai do idia tuari henia totona​—⁠anina be guba Ierusalema ena gwaukau taudia tanobada ai do idia tuari henia. Bena Iehova ese kara ta do ia karaia. Unai idia karaia dainai, Tuari Diravana ta bamona “do ia toreisi, unai bese idauidau taudia do ia tuari henia.”​—⁠Sekaraia 14:​2, 3.

¹¹ “Vadaeni unai bese idauidau taudia, Ierusalema idia tuari henia bese taudia, be Lohiabada ese gorere dikana dekena amo do ia hadikadia. Inai gorere ena dika be inai: Idia mauri noho neganai edia kopina be do ia bodaga lao. Edia matana bona edia malana danu be edia kwarana lalonai do idia bodaga lao. Unai dina dekenai, Lohiabada ese unai bese idauidau tuari taudia do ia hagaridia, bona idia dekenai daradara do ia havaraia. Vadaeni tuari taudia ta ta ese iena turana tuari tauna do ia dogoatao, bona do ia heatu henia.”​—⁠Sekaraia 14:​12, 13.

¹² Ita do diba lasi unai be gorere korikorina eiava gau ta ia laulaulaia dainai namona be ita naria, ela bona do ita itaia. To ita diba momokani gauna be inai: Dirava ena inai taudia ese Iehova ena hesiai taudia tanobada hegegemadai do idia tuari henia gwauraia neganai, Dirava ese ena siahu bada herea do ia hahedinaraia, unai amo do ia koudia. Edia uduna do ia koua, hegeregere edia gwau-edeede malana idia bodaga bamona. Idia be guna mai edia lalo-tamona ida idia tahua gauna be do idia itaia namonamo diba lasi, hegeregere edia matana idia bodaga bamona. Edia tauanina edia goada, ia dainai tuari idia goadalaia gauna, be do ia ore. Edia daradara ai, do idia ala-ala heheni badabada. Dirava ena tomadiho idia inai henia taudia iboudiai tanobada ai be unai dala amo do ia haorea. Unai neganai Iehova ese bese iboudiai ia doria vadaeni ena tanobada bona guba lohia siahuna idia diba totona. Inai peroveta herevana do ia momokani: “[Iehova] be tanobada ibounai ena King do ia lao.” (Sekaraia 14:⁠9) Unai murinai, Satani bona ena lauma dikadia do idia guia bona Keriso ena Lagani 1,000 Lohia Negana do ia matamaia; unai nega lalonai taunimanima ese hahenamo badadia do idia abia.​—⁠Apokalupo 20:​1, 2; 21:​3, 4.

Tanobada ai Do Idia Toreisi Lou

¹³ Sekaraia be Sekaraia karoa 14, siri 16 ai ma ia peroveta, ia gwau: “Bese idauidau taudia, tuari dekena amo idia do mauri noho taudia, be lagani ta ta ibounai Ierusalema dekenai do idia lao, Siahu Ibounai Lohiabada, edia King, do idia tomadiho henia totona. Au Raurau Ruma Maragidia Aria ena tomadiho kara danu do idia badinaia.” Baibel ese ia hahedinaraia, hari inai negai idia noho bona do idia mauri noho ela bona inai nega dikana ena dokona bena hahemaoro do idia abia idia be tomadiho momokani idia inai henia noho taudia, be “Dirava ese idia do ia hadikaia ore momokani, bona inai bamona do idia noho hanaihanai.” (2 Tesalonika 1:​7-9; ma danu Mataio 25:​31-​33, 46 itaia.) Do idia toreisi lou lasi. Unai dainai, toana be “tuari dekena amo idia do mauri noho taudia” haida be bese idauidau taudia, Dirava ena tuari ginigabena ia do vara lasi neganai idia mase taudia unai; Baibel ese ia hahedinaraia do idia toreisi lou diba. Iesu ia gwauhamata, ia gwau: “Nega ta do ia mai, mase guria gabu dekenai idia noho taudia ibounai ese iena gadona do idia kamonai. Vadaeni guria gabu dekena amo do idia toreisi, kara namo taudia ese do idia toreisi mauri hanaihanai totona, to kara dika taudia do idia toreisi kota henia totona.”​—⁠Ioane 5:​28, 29.

¹⁴ Unai toreisi lou taudia iboudiai be kara ta do idia karaia be namo, edia toreisi lou amo mauri do idia abia bona hahemaoro davana dikana do idia abia lasi totona. Namona be tanobada ai Iehova ena dubu ena ariara dekenai do idia mai bona Dirava do idia igo diho henia, anina be Iesu Keriso ena amo do idia gwauhamata henia. Idia toreisi lou murinai unai bamona idia kara lasi taudia ese hisihisi do idia davaria, hari inai negai idia noho besedia do idia davaria hisihisina hegeregerena. (Sekaraia 14:⁠18) Daika ia diba toreisi lou taudia hida be hutuma bada herea ida Au Raurau Ruma Maragidia Ariana do idia badinaia mai edia moale ida? Momokani, idia momo ese do idia badinaia, bona unai dainai Iehova ena lauma dubuna badana ena hairai be ma do ia bada ia lao!

Au Raurau Ruma Maragidia Ariana ese Ia Laulaulaia Gauna

¹⁵ Dirava ese idaunegai Israelana ia hagania, lagani ta ta iboudiai Au Raurau Ruma Maragidia Ariana do idia badinaia. Dina 7 lalodiai idia karaia, edia uma edia anina gogoa negana ena dokona ai. Unai be Dirava tanikiu henia negana mai moalena. Unai pura lalonai idia be au raurau ruma maragidia lalodiai idia noho, unai raurau momo be pamu au rauraudia. Unai aria dainai Israela taudia ese Dirava ena kara idia laloa lou, edia tubudia be Aigupito amo ia hamauria, bena lagani 40 lalonai tano gagaena ai idia loaloa lalonai kalaga dekenai idia noho neganai ia naridia ela bona Gwauhamata Tanona ai idia ginidae. (Levitiko 23:​39-​43) Unai aria negana lalonai, boromakau 70 be dubu ena boubou patana latanai idia bouboulaia. Toana be unai aria karana ese Iesu ena hahemauri gaukarana goevadaena, ia karaia guguru gaukarana, ia laulaulaia. Gabeai, Noa ena amo idia vara besedia 70 edia tubudia momo herea ese iena boubou karana ena anina namona do idia abia.​—⁠Genese 10:​1-​29; Numera 29:​12-​34; Mataio 20:28.

¹⁶ Unai dala amo Au Raurau Ruma Maragidia Ariana ese ia hahedinaraia Keriso ese ia hoia lou kara dika taudia be Iehova ena lauma dubuna badana ai do idia gogodia mai edia moale ida. Unai aria ese ia laulaulaia gauna be Pentekoste 33 C.E. ai ia matamaia, lauma Israela taudia be Keristani ekalesiana lalonai idia gogoa matamaia mai edia moale ida neganai. (Kara 2:​41, 46, 47) Unai horoa taudia idia diba Satani ena tanobada dekenai idia be “hanua lasi taudia,” badina be “edia hanua korikori be guba.” (1 Petero 2:​11; Filipi 3:​20) Momo ese hereva momokani dalana idia rakatania dainai Kerisendom ia vara bona unai ese unai aria badinaia karana ia koua. (2 Tesalonika 2:​1-3) To unai aria be lagani 1919 ai idia badinaia matamaia lou; unai neganai lauma Israela taudia 144,000 ginigabedia idia gogoa, bena unai murinai Apokalupo 7:⁠9 ia gwauraia hutuma bada herea be bese idauidau amo idia gogoa.

¹⁷ Baibel ia gwau hutuma bada herea edia imana ai pamu au rauraudia idia dogoatao. Unai ese ia hahedinaraia Au Raurau Ruma Maragidia Ariana ese ia laulaulaia gauna be idia danu ese idia badinaia mai edia moale ida. Idia be gwauhamata Keristani taudia, unai dainai idia danu ese tomadiho taudia ma haida be Iehova ena dubu lalonai gogodia gaukarana idia karaia. Inai danu, idia be kara dika taudia dainai, idia diba idia be hegeregere lasi tanobada ai do idia noho hanaihanai. Namona be idia, bona nega vairai do idia toreisi lou taudia danu, ese Keriso ena boubou karana do idia abidadama henia noho, ela bona Keriso ena Lagani 1,000 Lohia Negana ena dokona ai do idia goevadae.​—⁠Apokalupo 20:⁠5.

¹⁸ Unai neganai, tanobada ai Dirava idia tomadiho henia taudia be ia vairanai do idia gini mai edia mauri goevadaena, bona guba ena hahelaga taudia ese do idia durudia lou be anina lasi. Unai neganai danu Iesu Keriso ese “Basileia be Tamana Dirava ena imana dekenai do ia atoa.” (1 Korinto 15:24) Satani be “nega sisina sibona” do idia ruhaia, idia goevadae vadaeni taudia tohoa totona. Idia gini auka lasi taudia be do idia hamasea ore ela bona hanaihanai, Satani bona ena demoni dikadia ida. Idia gini auka taudia ese mauri hanaihanai do idia abia. Tanobada ena Paradaiso dekenai do idia noho ela bona hanaihanai. Au Raurau Ruma Maragidia Ariana ese ia laulaulaia gauna be unai dala amo do ia guguru mai ena hairai bona mai ena kwalimu ida. Tomadiho momokani do ia kwalimu dainai, Iehova do idia hanamoa ela bona hanaihanai bona taunimanima do idia moale ela bona hanaihanai.​—⁠Apokalupo 20:​3, 7-​10, 14, 15.