Ia maoro Davida ese Dirava be unai bamona ia hamaoroa, a? Dirava be oi ia laloa, a? Taunimanima momo idia laloa siahu ibounai Dirava ese idia ia laloa lasi. Dahaka dainai?

Badina ta be Dirava be guba ai ia noho bona taunimanima amo ia daudau. Dirava ia itaia bese ibounai be “ranu ena hetuturu tamona bamona, . . . edia metau . . . be tano ena kahu maragidia bamona.” (Isaia 40:15) Dirava ia abia dae lasi toretore tauna ta ia gwau, “Dirava ese ita karaia gaudia ia laloa bada be heagi lalohadaina.”

Ma danu, taunimanima haida idia laloa edia kara dainai Dirava ese idia ia laloa lasi. Hegeregere, tau ta ladana Jim ia gwau: “Hanaihanai maino bona sibona biagua karana totona lau guriguri, to daudau lasi murinai lau badu lou. Dokonai, lau laloa egu kara be dika dainai Dirava ese lau ia durua lasi.”

Dirava be taunimanima amo ia daudau dainai, ita ia laloa lasi, a? Dirava ese goevadae lasi taudia be edena bamona ia laloa? Bema Dirava ese ena sivarai ia hahedinaraia lasi, ta ese Dirava dainai idia vara henanadai edia haere do ia davaria lasi. To, Dirava ena hereva, Baibel, ese ita ia hadibaia Ia be ita amo ia daudau lasi, bona ita ta ta ia laloa. Oibe, Baibel ia gwau: “Ia be ita ta ta amo ia noho daudau lasi.” (Kara 17:27) Dirava ese ita ia hadibaia ia be ita ta ta ia laloa, bona unai ia hahedinaraia dalana be atikol ma foa ese do idia herevalaia.

HAIDA IDIA DARADARA ENA BADINA: Vanegai tahua gaukarana ta amo idia davaria iseda galaksi sibona lalonai planeti 100 bilioni bamona idia noho. Iunives ena bada dainai, momo idia henanadai, ‘Havaraia Tauna hereadaena amo ita taunimanima be maragi herea to dahaka dainai ita karaia gaudia ia itaia?’

BAIBEL ENA HEREVA: Dirava be ita dekenai Baibel ia henia bena ita ia laloaboio, a? Lasi. Iehova ia gwau: “Lau ese . . . sisiba oi dekenai do lau henia.”​—Salamo 32:8.

Lagani 1900 B.C.E. bamona ai ia noho Aigupito hahinena, Hagara ena sivarai ita laloa. Ia be ena biaguna Sarai ia matauraia lasi dainai, Sarai ese ia lulua bona Hagara be taunimanima noho lasi gabuna dekenai ia heau lao. Hagara be ia kerere dainai, Dirava ese ia laloaboio, a? Baibel ia gwau: “Lohiabada ena aneru ese . . . ia davaria.” Aneru ese Hagara ia hamaoroa: “Lohiabada ese oiemu hisihisi, bona emu tai ia kamonai vadaeni.” Bena Hagara be Iehova dekenai ia gwau: “Oi be lau oi itaia noho Diravana.”​—Genese 16:4-13.

Dirava be oi ia itaia o naria danu. Haheitalai be inai: Sina lalokauna ta be ena natuna maragina ia naria namonamo. Natu ia do maragi dainai, ena tama sina ese idia naria namonamo be gau badana. Unai hegeregerena, Dirava ese ita ia itaia o naria diba, bema ita mamia ita be anina lasi bona durua tauna ta be lasi. Iehova ia gwau: “Egu noho gabuna be ataiai bona helaga. To lau be, edia lalona idia giroa, bona edia lalodia idia manau taudia danu lau noho. Lau Dirava ese, iena lalona ia manau tauna ena lauma do lau hagoadaia lou. Bona iena lalona ia giroa tauna, be lau ese iena kudouna do lau hamatamataia lou.”​—Isaia 57:15.

To, reana oi henanadai: ‘Edena dala ai Dirava ese lau ia laloa? Ia ese egu toana amo lau ia hahemaoro henia, eiava lau ia diba namonamo?’

HAIDA IDIA DARADARA ENA BADINA: Momo idia laloa Dirava matanai taunimanima be kara dika taudia sibona—idia goeva lasi bona anina lasi. Kendra, daradoko gorerena ia abia hahinena, be Dirava ena ura ia badinaia goevagoeva lasi dainai ia lalohisihisi. Unai dainai, ia gwau: “Lau guriguri lasi.”

BAIBEL ENA HEREVA: Iehova be emu kerere ia laloa momo lasi bona emu kara ia lalopararalaia. Baibel ia gwau: “Ia diba, ita be tanobada ena kahu dekena amo ita ia karaia. Bona ita dekenai ia laloa noho, ita be kahu sibona.” Danu, Ia ese “iseda kara dika ena bada hegeregerena davana ia henia lasi,” to ita helalo-kerehai neganai, mai hebogahisi ida eda dika ia gwauatao.—Salamo 103:10, 14.

Rau 3 ese ia herevalaia Israela ena king Davida, ita laloa. Dirava ia guriguri henia, ia gwau: “Lau be do lau vara lasi neganai, oi ese lau oi itaia. Lau be do lau vara lasi neganai, oi ese egu mauri dinadia oi torea vadaeni oiemu buka dekenai, . . . Dirava e, egu kudouna do oi tahua, ena dala ibounai do oi diba.” (Salamo 139:16, 23) Oibe, ena be Davida be nega haida kara dika badadia ia karaia, to ia diba Iehova ese ena helalo-kerehai kudouna ia itaia.

Iehova sibona be oi ia diba namonamo. Baibel ia gwau: “Taunimanima ese tau ena toana idia itaia, to Lohiabada ese tau ena kudouna ia itaia.” (1 Samuela 16:7) Dirava be emu kara ena badina ia diba—emu tama sina amo oi abia hanai karadia, emu tubu daekau dalana, emu hanua taudia, bona emu kara ese ia hahedinaraia oi be edena bamona tauna. Ena be kerere oi karaia, to Dirava ia itaia oi hekwarahi kara namodia oi karaia totona, bona unai ia laloa bada.

Edena dala ai Dirava ese oi ia diba namonamo karana ese oi ia durua?

HAIDA IDIA DARADARA ENA BADINA: Ena be taunimanima haida idia ura dikadika heduru idia abia, to idia laloa Dirava idia noia kara ta ia karaia o ia durudia be sibona ena namo laloa karana. Hahine ta ladana, Raquel ia gwau: “Taunimanima ese idia davaria hekwakwanai badadia lau itaia neganai, lau laloa egu hekwakwanai be maragi dainai, Dirava ena heduru lau noia be anina lasi.”

BAIBEL ENA HEREVA: Dirava be dala badana amo kara ta ia karaia vadaeni, taunimanima ia durua bona hagoadaia totona. Ita ibounai be kara dika taudia dainai, ita hegeregere lasi Dirava ena ura ita badinaia goevagoeva totona. To, Dirava “ese ita ia lalokau henia bona ena Natuna [Iesu Keriso] ia siaia iseda kara dika ia koua boubouna ia henia.” (1 Ioane 4:10) Iesu ena mase ese dala ia kehoa, Dirava ese iseda kara dika ia gwauatao, eda lalomamina ia goeva, bona tanobada matamatana mai mainona lalonai mauri hanaihanai ita abia totona.a To, unai boubou gauna be tanobada besena ibounai totona, eiava ia hahedinaraia Dirava be ita ta ta ia laloa?

Aposetolo Paulo ita laloa. Iesu ena boubou gauna ia laloa bada bona ia gwau: “Dirava ena Natuna lau abidadama henia dainai lau mauri, ia ese lau ia lalokau henia bona lau totona ia sibona ia henia.” (Galatia 2:20) Momokani, Iesu ia mase murinai, Paulo be Keristani tauna ta ai ia lao. To, Paulo ia laloa ia dekenai Iesu ena boubou gauna be Dirava ena harihari gauna ta.

Oi dekenai danu Iesu ena boubou gauna be Dirava ena harihari gauna. Unai harihari gauna ese ia hahedinaraia Dirava ese oi be dava bada gauna ta bamona ia laloa. Unai ese oi ‘ia hagoadaia hanaihanai bona oi dekenai helaro namona ia henia,’ unai amo ‘kara namodia bona hereva namodia ibounai lalonai do oi gini goada.’—2 Tesalonika 2:16, 17.

To, lagani 2,000 bamona gunanai, Iesu ese ena mauri be boubou gauna ta bamona ia henia. Dahaka ese ia hamomokania hari Dirava ese oi ia boiria iena turana ai oi lao?

HAIDA IDIA DARADARA ENA BADINA: Momo idia abia dae Dirava ia noho, to idia mamia Ia be idia amo ia daudau. Hanaihanai dubu ia lao Ireland hahinena, Christina ia gwau: “Lau laloa Dirava be gau ibounai ia havaraia tauna sibona. To ia lau diba lasi, bona lau mamia ia be lau kahirakahira ia noho lasi.”

BAIBEL ENA HEREVA: Bema ita mamia ita be helaro lasi, Iehova ese hanaihanai ita ia durua. Dirava ese ita ia laloa dalana be Iesu ese inai bamona ia haheitalaia: “Bema tau ta ena mamoe be 100 bona ta ia boio, ia ese ororo dekenai unai 99 do ia rakatania bona do ia lao ia boio mamoena ia tahua totona, ani?” Ita dibaia gauna be dahaka? Iesu ia gwau: “Unai hegeregerena, egu Tamana guba dekenai be ia ura lasi inai ladana maragi tauna ta ia boio.”—Mataio 18:12-14.

Dirava ese ‘ladana maragi taudia’ ibounai ia laloa bada. Edena dala ai Dirava ese ia “boio mamoena ia tahua”? Ioane 6:44 ese ia hahedinaraia, Iehova ese taunimanima ia veria mai.

Dirava ese kudou-maoro taudia ia veria mai dalana ita laloa. Aposetolo edia negai, Dirava ese Keristani hahediba tauna, Filipo ia siaia Etiopia tauna ta dekenai, bona Etiopia tauna ese ia duahia peroveta herevana ena anina ia gwauraia hedinarai totona. (Kara 8:26-39) Gabeai, Dirava ese aposetolo Petero ia siaia Roma ena ofesa ta ladana, Korenelio ia vadivadi henia, Korenelio be ia guriguri bona ia ura Dirava ia tomadiho henia. (Kara 10:1-48) Danu, Dirava ese aposetolo Paulo bona ena bamodia ia hadibaia Filipi siti ena murimuri ai ia noho sinavai ta dekenai idia lao. Unuseniai “Dirava tomadiho henia hahinena” Lidia idia davaria, bona “Iehova ese ena lalona ia kehoa bona Paulo ia gwauraia herevadia ia abia dae.”—Kara 16:9-15.

Unai sivarai lalodiai, Iehova ese dala ia kehoa ia idia tahua taudia ese ia idia diba totona. Hari daidia be taunimanima edia ruma bona pablik gabudiai, Dirava sivaraina be Baibel amo idia herevalaia? Momo idia gwau, “Iehova ena Witnes Taudia.” Sibona oi nanadaia, ‘Dirava be idia ia gaukaralaia lau ia boiria totona, a?’ Oi ai hagoadaia Dirava oi guriguri henia, unai amo do oi mamia ia be oi ia boiria.a